[لامارا]

منال: طلبات تجيبها على أساس العزيمة ..

فواز ناظر الورقة وفتح فمه للآخر:معجنات من فطائر مشكلة , ورق عنب وكل واحد منهم صحنين بحجم وسط .. حلويات منوعة من سعد الدين ..
(مقدر يكمل وبقهر) كم مرة أنا أقول لك , لما أرجع من دوآمي , لا تبدين طلباتك ..

منال: أنا بس حبيت أعطيك خبر ..

فواز خذ نفس عميق وهو يستغفر بداخله: يا الله أن تلهمني الصبر , المهم قولي للخدامة تكب الغداء ترى حدي جوعان ..

منال: طيب ..

توجهه لغرفته ..
شلح شماغة والكبك , فتح أزرار ثوبه , وشلحه ..

فتح الدولاب وطلع له بجامة رمادية با أكمام حاير ..

رجع شعره لورى , تعطر بعطر فورس ..

سكر الباب بشويش ..

توجه لغرفة بناته ( ريفان , وعد , بيسان ) ..
طرق الباب بشويش ..

البنات:ادخل ..

فواز دخل والأبتسامة على وجهه : السلام عليكم والرحمة ..

البنات: وعليكم السلام والرحمة ..

بيسان با أبتسامه: أللي يشوفك يقول أنك أخونا , مهوب أبونا ..

فواز رد لها الابتسامه: أي , أشوف البنات يتحذفون علي ..

وعد باندفاع: لا , أنت لأمي وبس ..

فواز بخاطرة ( يا الله تخلف على أمك بس ): ترآي جوعان حيل , ولزوم تتغدون معي ..

بيسان: أي يلا , أنا بنزل ..

ولحقتها وعد ..

وجات بتطلع ريفان بس مسك يدها وبهمس: أبي أكلمك شوي ريف , تسمحين ..؟

ريفان بتردد: أي أكيد يبه , وقتي كله لك ..

فواز جلسها جنبه ومسك يدها: أعرف أنك مخبيه علي شيء , أو أنك مكسوفه بعد مفضحوك خوآتك بفطور اليوم ..

ريفان ناظرته وبندم: يبه أنا آسفة , محبيت أخذلك أو أطلع من شورك بس أغلب البنات يلبسون زي الموضـة ..

فواز مسح على شعرها:وأنا منيب ضدك , بس ضد أنك تلبسين عند الفخذ ..

ريفان باندفاع:أنا لبست لتحت الركبة ..

فواز بنظرات شك:متوكدة ريفان أنه لتحت الركبة .. !!

ريفان ناظرت أبوها لها فضحتها ونزلتها بخيبه أمل ..

فواز بحنان: عشان هالشيء أنا رفضت أنك تلبسين , والعين لها حق يا بنتي , وأبيك أنك ما تكررينها أبد ..

ريفان تنهد:إن شاء الله يبه ..

فواز باس جبين بنته:الله يرضى عليك يا بنتي , يلا قومي عشان نتغدا ..

ريفان أبتسمت وقامت معه ..

صعد فوق مع ولده عمر ..

وشال أمه ونزل بالدرج ..
وعمر يشيل الكرسي المتحرك لها ..
قربها من طاولة الطعام ..

أم فواز: أجل وين منال ..؟

وعد: زي منتي عارفه يا جده , هي تختار لها لبسه عشان عزيمة ربوع اليوم ..

فواز بدون أهتمام: ووش الجديد , يلا أكلوا ..

وبدأ كل منهم يأكل بصمت..

وبعد الغداء ..
أم فواز نزلت فنجان القهوة وناظرته: عيونك حزينة يا ولدي , عسى خير إن شاء الله ..؟

فواز تنهد: الحمدلله على كل حال يالغالية , بروح أجيب جوالي وأجيك ..

أم فواز:مابه خلاف ..

دخل غرفته , وشافها معفسه الغرفة بملابسها فوق السرير وينزل منه شوي ..

منال ناظرته بحيرة:إلا وش رآيك فواز , ألبس ذه ولا ذه ( وهي تأشر عليهم ) ..
فواز ناظرهم: وش الزود فيهم , كل واحد أشلح وأفصخ من الثاني , لبسي حاجة أستر وبتصيرين أحلا ..

منال كشرت بوجها:ذه الموضة , ووش عرفك فيها , أنت من الطرآز القديم ..

فواز: أفضل أكون من الطرآز القديم على قولتك , على أنك تتشلحين بلا معنــى قدام ناس ما يحلون لك ! وتبرزين مفاتنك لهن !

منال تأففت: أنا من أسألك بشيء أتندم , لأن لا أسلوب عندك , ومتعقد بعد ..

فواز: دائم لما أقول الوآقـع , يكون جوابي بنظرك معقدك ولا به أسلوب ..

منال بزمره:العيشــه معك تقصر العمر , وأنا صابرة عليك واجد ترى ..

فواز انصدم من كلامها , وبسخريه: والله ما يندرا من أللي صابر على الثاني ..

منال رفعت من نبره صوتها وبقهر: أنا نفسي أعرف حاجة وحدة بس , وش أللي يعجبك فيني أصلا ! مغير متذمر ولا يرضيك شيء , وهالأيام ذي زدت , مدري وش غيرك كذا ..

فواز ماسك أعصابه: لا يعلى صوتك على صوتي , وقصريه ..

منال كفتت يدها وعطته ظهرها: أنت ما جاوبت لأن ما عندك رد على سؤالي !!
أنت تدور الزله علي عشان تعصب وتتنرفز , ولا أنا نفسي ما تغيرت , زي اليوم الصباح تدري أني أتأخر عند الفطور , وبيوم الربـوع بذات ما تواجد على الغداء ,
وتدري أن كل ربوع أسوي عزيمة لصديقاتي , وأحين تجي وتتكلم , وصوتك كان واضح وسمعته وطنشت , فكر شوي وشوف من أللي غلط بحـق الثاني ..

فواز بكره ويأس وحزن:صبري عليك فاض , ولا عدت أستحملك ..

منال رفعت حاجبها وبوقاحة: يكفــي أني متحملتك ورآضيه بالعيشة معك ! حتى مصروف ما تعطيني مثل الخلــق , ولا أسلوب ولا تعامل ,
وصديقاتي رجالهن أللي جايب لهم خدامتين , وأللي مسفرها تركيا أسبوع وأللي ماليزيا , وأللي رآفع حرمته لفوق , وأنا حظي مالت علي بس ( وهشت على وجها ) ..

فواز هز رآسه بقله حيله سحب جواله , وطلــــع ..

منال بصرآخ: وهذا حالتي معك , مغير تطلع ولا ترد علي , حسبي الله عليك من رجال ..

فواز شد على قبضه يده وناظر با آمه الجالسة بالصالة وتناظر فيه بحزن ..




آنتهــــى البارت |