[فيتامين سي]

البارت السابع


خالد الي شغل سيارته وهو مو قادر يحس تعب الدنيا كله بجسمه وراسه بينفجر من الصداع الي مخلي التفكير عنده صفر كان يتمنى ان بيته قريب عشان يوصل بسرعه شغل سيارته وما انتظرها لين تسخن وحرك على طول
بالبيت وساره الي خلصت من كل شي والبيت اصلا نظيف بس حبت ترتب وتضيع الطفش وخصوصا ان الكنكت ما شحنتها خلصت واسترخت تطالع التلفزيون وتقلب القنوات بلا مباله واخر شي استقرت على توم وجيري وقعدت تتفرج الحلقات الي تنعاد وتنزاد وهي تطالع وتضحك كأنها تشوفها اول مره
دخل عليها خالد والتعب هاد حيله
خالد: السلام عليكم
ساره الي وقفت وهي تشوف اخوها وجهه كيف منحقن : وعليكم السلام ورحمة الله خالد فيك شي
خالد: والله تعبان يا اختي حيل راسي بينفجر
ساره: بسم الله عليك ان شالله فيني ولا فيك
خالد لف عليها والكلام مو عاجبه : لا عاد اسمع هالكلمه مره ثانيه
وصل غرفته ودخلت وراه اخته وهي تتفحص شكله كانت شايفه التعب كيف منهكه بس ماتبي تزيد عليه
ساره: خالد ارتاح بجيب لك غداك هنا
خالد وهو يقاوم الصداع : لا يالغاليه تعبان ابي انام
ساره : والله ماتنام جوعان وكلمت بصيغة امر ادخل تروش على ماتطلع يكون غداك جاهز
خالد: ........(الله لا يحرمني منك يارب)
طلعت ساره تسخن الشوربه الي طالبتها وتسخن المشاوي لخوها على ما يخلص ترويشته
وما طلوت على اخوها الي رجعت لها بسرعه ولقته توه طالع من الحمام وقاعد ينشف شعره بالفوطه
ساره: وهذا غداك جاز
خالد وهو يبتسم: الله الشوربه الي احبها
ساره:اشربها كلها عليك بمليون عافيه يالغالي
خالد خذ الملعقه وقعد يشرب بس مو قادر الصداع شال راسه مو مخليه ستطعم بشي ساره كانت تتأمله وهو يشرب وعارفه ان فيه شي بس ما حبت تسأل لانها عارفه اخوها بنفسه بيجي يقولها من غير ما تسأل شرب شوي من الشوربه وحطها وسمعته يقول الحمدالله
ساره : سلامات خالد يعني انك شبعت
خالد: والله ياساره مالي نفس اكل تعبان والله
ساره: طيب بس شوي كل وبعدين نام
خالد: طيب خذ لها قطعة كباب وحطها بخبزه وصار ياكلها بشويش ومبين انه ماله نفس ياكل بس عشان يساير اخته الي عارف انها ماراح تخليه الا لين ياكل رن جوال ساره وشافت رقم يمنى وهي تقوم من عنده : يله اكل شوي واجي وعطت يمنى بزي عشان تكلمها من البيت
خالد: لا تطولين بسولف معاك
ساره: ان شالله شوي بس بشوف شفيها وبرجع
ساره وهي تدق رقم صديقتها: الو هلا يمنى
يمنى : اهلين سوسو شقاعده تسوين
ساره: ابد كنت قاعده مع خالد يتغدا
يمنى: امممم خلاص روحي كملي غداك
ساره: انتي من وين تسمعين اقولك هو يتغدا انا تغديت وخلصت
يمنى : طيب قلتي له عن بكره؟
ساره: لا ماقلت له جاي تعبان اذا قام ان شالله بقوله والحين يله قلبي يور فيس لانه يبيني
راحت تركض لغرفة اخوها لقته متمدد ونايم بدون لا يتغطى من قو التعب الي فيه والصنيه جنبه ماشالها
ساره: يا بعد عمري حتى ما كمل اكله شالت الصينيه وطلعت وسكرت الباب عليه وصلت للمطبخ وحطت الصينيه وتوجهت للصاله ودقت على صديقة عمرها
ساره: الو السلام عليكم خالتي
ام يمنى او بالاحرى ام ابراهيم: هلا وعليكم السلام هلا حبيبتي كيفك
ساره: بخير خالتي كيفك انتي ان شالله بخير وكيف السكر معاك
ام ابراهيم: الله يسلم قلبك ياربي ان شالله اني بخير وما اشكي باس
ساره: يارب دوم يا خالتي يمنى عندك
ام ابراهيم: دقيقه بس وصارت تنادي على بنتها
يمنى: الو
ساره: ووجع وشوله ما تردين تفشلت عند خالتي وانا اصرخ بذنها
يمنى: قلتي لي انك بتروحين عند اخوك وشدراني
ساره بنبره حزينه: نام المسكين حتى ماكمل اكله
يمنى: هو مارتاح لمن رجعتوا
ساره: لا والله على طول راح الدوام يخلص شغله
يمنى: الله يكون بعونه ان شالله الا ماقلتي لي انبسطتوا عند خالتك
ساره: والله ما امدانا نقعد الا احنا راجعين الصبح
يمنى: يله خيره
ساره بحماس : فااااتك يا ميمي والله صار شي ما توقعته
يمنى والي تحمست من حماس صديقتها : وشو قولي انخطبتي ولا وشو
ساره: ههههههههه لالالا يا الخبله اسمعي وصارت تقول لها عن سالفة خالد ورجعته وكيف خبو عليها بالتفصيل الممل طبعا بنات وفاضيات ماعندهم شي يعني اكيد بيفصلون بكل شي <<<<مو شغلك ^_^

في بيت ام فارس ولو احس اني من زمان ما تكلمت عنهم
فاطمه: يمه وين جوالي
ام فارس: وانا وش يدريني تقطينه وتقولين لي وينه
فاطمه: وين اقطه يمه كنت حاطته هنا وتأشر على الكنب ياربييييييييييييي وين راح وفارس مو هنا عشان يدق عليه
ام فارس: احسن عساك ماتلقينه اصلا مادري وش لك فيه
فاطمه الي شوي وبتصيح: يمه اقولك وينه وابيه تدعين اني ما الاقيه
ام فارس:....................مو مهتمه لحوسة بنتها على الجوال
فاطمه هي تنزل راسها تحت الكنب: ايييييييه الله ياخذك من جوال وش داسك هنا
ام فارس: الحمدالله والشكر بس يا مثبت العقل
بدخلة فارس وهو يشوف الصاله محيوسه
فارس: السلام عليكم ويحب راس امه وش ذا الحوسه يمه
ام فارس +فاطمه: عليكم السلام
ام فارس: اسأل هالخبله الي لها ساعه تحوس على ذا الغبر الي بيدها
فاطمه : جوالي ضاع ولازم اشحنه عشان الشغل وتوي لقيته يله سي يوو وبتتوجه للدرج
فارس: لحظه وهالحوسه من بيرتبها
فاطمه: بنادي الشغاله
فارس بحزم وبعصبيه من اهمال اخته : لا انتي الي بترتبين الحوسه ذي كلها مو الشغاله والحين بعد
فاطمه تطالع امها تبيها تشفع لها ام فارس ماعبرتها وتطالع التلفزيون
فاطمه : اووووف بس الله ياخذني زين
فارس وهو يجلس جنب امه ويشوفها ترتب عشان يقهرها ازيد: لا مو الحين بعد ماترتبين موتي براحتك هههههههه
فاطمه: سخييييييف وهي تغلي من داخلها
خلصت الترتيب والحين ممكن اروح يا سيدي لغرفتي
فارس ببرود وهو يمسح يده بكلنكس عن التفاحه الي كان ياكلها : تفضلي يا جاريه انصرفي
راحت تركض وهي تتحلطم عليه ويسمعون طقطقة شبشبها بالدرج الي يبين انها معصبه
ام فارس: يمه فارس تراك قاسي على اختك
فارس: يمه انتي تدرين اني احبها وما اقدر على زعلها بس ان عاملنها بهواها بيصير عاده عندها الاهمال
مو عدله يمه كل شي تخربه ويجي الغير يصلحه خلها شوي تتعب عشان تعرف ان الي ينظف يتعب بعد
ام فارس: والله يا وليدي انا ما ودي اضغط عليها صحيح انها موظفه بس ترا عقلها مو ذاك الزود ومتأكده انها الحين تصيح بالغرفه
فارس: يمه الله يخليك الله يخيلك لا شفتيني اتكلم معاها بشي يفيدها لا تسكتيني لانك بتقوينها علي انا مستحيل اضرها ومستعد افديها وافديك بعمري بس الغلط غلط
ام فارس بسم الله على عمرك يمه
فارس وهو يحب يد امه : وعمرك يالغاليه الله لا يحرمنا منك يارب

نرجع لسارونه الي بعد ما هذرت مع صديقتها وخلصت حست بالطفش بلحالها
ساره: اوووف لو النت عندي كان شفت المنتدى وش مسوين ياربي شسوي شسوي راحت لغرفتها وجابت منها دفتر صغير وقلم وصارت تكتب في دفترها الصغير
لا املك شيء كبير ولكني املك قلباً مليئاً بالحب لكل الناس
يجعلني اشعر بأني اميرة هذا الكون
يؤلمني كثيرا حين ارا نظرات من حولي وهي تصغر من قدري
ولكني اعلم ان الشجره المثمره دائما ترمى بالحجاره
لكي يجني الناس ثمارها لا يهمني ابدا ان ارى هذه النظرات
ولكن لو استطيع فقد التخلص من احساسي بالغلط تجاه نفسي
عندما ارا هذه النظرات
سأحاول وسأحاول جاهده وانا اعلم وايقن ان قمة الانتصار
ان ترسم البسمه حين يُنتظر منك ان تبكي <<<<<<بقلمي انا
صحت من اندماجها بالكتابه على صوت اخوها
خالد: ساره ليش ماصحيتيني
ساره : والله يا خالد ماشفت شكلك يكسر الخاطر ما حبيت ازعجك وماوراك شي خلك مرتاح
خالدبعتب: بس شوفي الساعه كم الحين يعني راحت علي صلاة العشا ومتى برجع انام بيتخربط نومي
ساره: لا ان شالله مو متخربط ولا شي
خالد: احس اني للحين تعبان مع اني نمت كثير
ساره: ايه لانك اجهدت نفسك ولا ارتحت اكيد بتتعب بسوي لي شاهي تبي؟
خالد: اي والله ابي اذا ما عليك كلافه
ساره: هههههههههههه خالد وش كلافته بشيل جبل ترا التعب على الغلايه
خالد: المهم ابي ولا تكثرين سكر
ساره : ان شالله راحت للمطبخ وجهزت اكواب الشاهي وشغلت الغلايه جهز الشاهي ورجعت للصاله
ساره: الا ما قلت لي وش صار على شغلتك المهمه ؟
خالد: والله يا اختي لو ربي مارحمن كان توهقت
ساره: خير ان اشالله وش صار
خالد: انكشف لي شي خطير كنت غافل عنه
ساره وهي تحط الكوب وتتربع على الكنب : وشلووووون
خالد: ابد شفت الاوراق وعجبتني الشركه وقبل لا يجي مندوبها كان عندي الفراش وسمعني اتكلم عنها وفهمني هم وش ناوين يسوون
ساره بعدم تصديق: يمكن يكذب عليك او متفق مع شركه ثانيه
خالد: لا ياساره هذا الفراش له عمر معي وانا ما جبرته يتكلم هو الي تكلم وبعدين لمن يكون الواحد صادق ينعرف من نبرة صوته وثقته بالكلام كان يترجاني اني ما اوقع ولو كان متفق مع اي شركه كان على الاقل قالي اسمها عشان احطها ببالي بين لي نوايا ذي الشركه وطلع من عندي
ساره: طيب هو شلون عرف
خالد: عرف وقطع عليه صوت جوال اخته
ساره:..........
خالد: ردي ردي
ساره: ماني راده كمل
خالد: ردي ماراح ازعل
ساره: خلاص كمل مو مهم
خالد: عرف من واحد من الفراشين الي يقعد معاهم ويشتغل بنفس الشركه
ساره:الله يبعد عنك عيال الحرام ويرد كيدهم بنحرهم يارب
خالد: امين ياربي الله يسمع منك
ساره وهي متجهه للمطبخ تودي كاسات الشاهي : خالد ترا بكره بطلع
خالد: وين على الله
ساره: البنات مسوين جمعه كالعاده وبمر السوق ابي اشتري اغراض ناقصتني
خالد:متى بتكون طلعتك
ساره:يعني يمكن ورا العصر
خالد: اوكي مو مشكله
ساره وهي تذكر: خالد الله يخليك الكنكت موقفه ابي شحن
خالد وهو متكيسل يطلع : سويره الحين تبيني اطلع وانا تعبان
ساره: الله يخليك والله طفشت ابي اشوف المنتدى وش مسوين
خالد: اوكي انا مو طالع بكلم البقاله بشوف اذا يوصلون
ساره: يارب يارب يوصلون
خالد:ههههههههههههههههه وان كانوا ما يوصلون اطلع مشي بعد كم ساره عندي
ساره: الله لا يحرمني منك يارب

ويمرباقي اليوم وكل واحد منهم بغرفته ساره على الانترنت تشوف منتداها وخالد بغرفته يشوف عرض الشركه الي رده
ويتمنى انهم ما اتفقوا مع احد عشان يحضى فيه هو
ويمر اليوم عليهم لتفتح عينها بتكاسل على صوت الاذان طالعت في الساعه لقت انها صلاة الفجر قامت من فراشها واتجهت لأخوها تصحيه للصلاه
ساره وهي تطق الباب: خالد صلاة الفجر
خالد:.....................................
ساره: خالد قوم صلاة الفجر
خالد:..........................في سبات
ساره: خالد ترا بفتح الباب يله قووووم
خالد:............. ايضا لا رد
ساره وهي تفتح الباب: خالد يله قوم ما يمديك ترا بتقام الصلاه
خالد: طيب طيب الحين
ساره: الحين الحين قوم لاني ان رحت ما بتقوم
خالد: لا هذاني قمت وقام على الحمام يتوضى ويجهز للصلاه
دخلت تتوضى هي بعد وتصلي طلع للصلاه مع الجماعه ويوم رجع كان يبي يشوفها صاحيه ولا نامت مر من عند الغرفه لقى النور والع طق الباب بشويش ماجاه رد وسع من فتحة الباب لقاها تقرا قران على سجادتها الله لا يحرمني منك يارب ويحفظك من كل شر كان يدعي لها بقلبه واتجه لغرفته يبي يريح لان الصداع موراضي يخف عليه من الضغط الي صار امس غافله النوم وراح بالنومه وماحس الا على صوت المنبه الي يشير له ان موعد الدوام
بتكاسل وبدون لا يفتح عينه مد يده على مكان المنبه وطفاه وانقلب للجهه الثانيه
دخلت عليه اخته: ما ادري وشوله حاط لك منبه دامك بتطفيه وبتكمل نومتك ترا الساعه 7 ونص يله صحصح
خالد: طيب ترا مو نايم بس مكسل اقوم
ساره: طيب قوم تروش على ما اجهز الفطور
خالد: ان شالله
طلعت منه وراحت للمطبخ تجهز الفطور وتحطه على الطاوله جاها بعد ما تروش ولبس ثوبه وشماغه وكان منظره ملفت وريحة عطره ماليه المكان
خالد: شرايك بخوك وهو يغمز لها
ساره: وش ذا الكشخه والله لو مو اني عارفه انك بتروح الدوام كان قلت بتروح تتزوج
خالد:ههههههههههههههه انا مدير ولازم اكشخ كذا ولا تبيني اروح ببجامه
ساه: هههههههههههههه وش بجامته يله بس تعال افطر تبي عصير ولا شاهي
خالد: ابي شاهي
فطروا وهم يسولفون وهو يحمد ربه ان ربي ما ضيعهم بعد موت امهم وابوهم اول شي بتربية خالتهم لهم وبعدها بالحنان الي غامرته ساره ومخليته كانه ولدها مو اخوها
ساره وهي تأشر قدام وجهه: هيييييي نحن هنا
خالد: ونحن ايضا


ساره: ماضنيت وين وصلت
خالد وهو يقوم : ولا مكان تعالي ابيك
ساره: خلني اشيل الصحون واجي
شالت الصحون وراحت له
ساره: خير خالد وش فيك
خالد: مسكي
ساره: خالد والله ما ابي عندي فلوس ترا
خالد:طيب وش بيضرك اذا خذتيهم
ساره: والله عندي فلوس والرصيد ترا ما قربته من زمان
خالد: ترا ماراح تنتهي صلاحيتهم ان ما صرفتيهم الي بالبنك خليهم وصرفي من ذولا
ساره:الله يخليك لي يارب وطبعت بوسه على خده
خالد: ويخليك يارب واذا بغيتي زياده كلميني
ساره وهي تطالع الي بيدها: من جدك انت لو اني بشتري ذهب لا يكفون ويزيدون بعد
خالدوهو يطلع : يله ديري بالك على نفسك
ساره: ان شالله وانت لا تنسى تتوكل على ربك بكل شي الله يحميك يارب
توجه لشغله وهو يطلب من ربه ان الشركه ما اتفقت مع احد وصل ودخل مكتبه بعد ما طلب من ماجد يجيب الاوراق الي يبي لها توقيع دخل ولحقه ماجد بالاوراق
ماجد: تفضل يا استاذ
خالد: شكرا الله يعطيك العافيه
ماجد : الله يعافيك ما سويت شي
خالد: ماجد تخبر شركة الـ الي كانت تبي تتعاقد معانا وانا ما اعرتهم ااهتمام
ماجد وهو يدور بنظره كأنه يسوي مسح بفكره : ايه ذكرتها وش فيها
خالد: انا ابيك تكلم واحد من مندوبيهم وتشيك اذا تعاقدوا مع غيرنا ولا لا
ماجد: ان شالله ابشر
خالد: الله يبشرك بالجنه ان شالله
ماجد وهو طالع : اجمعين
قعد خالد بمكتبه يوقع اوراقه ويشوف شغله على مايرد عليه ماجد

يمر الوقت بسرعه على ساره الي كانت نايمه ومستغرقه بالنوم لتفتح عينها على الساعه 11 وتبتدي تتقلب وكأن ماودها تقوم شافت ان التقلب طفشها قامت واتجهت للحمام وخذت لها شور سريع ينشطها ولبست بجامه ناعمه واتجهت للمطبخ تفكر وش بتطبخ هي ماكانت تطبخ بدري لان اخوها ما يجي الا على العصر فلو طبخت بدري بيبرد وهو ماجا قررت تطبخ مكرونه بالبشاميل لانها تحبها وتجيدها وخالد ما يمانع انه ياكلها جهزت الاغراض وكل شي وقالت تبتدي تطبخ بعد شوي صبت لها كاس عصير واتجهت للصاله تقلب بالتلفزيون رن جوالها الي كان بالغرفه
وراحت تاخذه
يمنى: لاكان رديتي
ساره: التلفون بالغرفه وكنت بالصاله
يمنى: كيفك ؟
ساره: زينه
يمنى وهي تقلدها : زينه وش فيك تردين بنفس
ساره: فيني النوم
يمنى: وليش تقومين دام فيك النوم
ساره: خلاص شبعه هي وبعدين صلاة الظهر مابقى لها شي
يمنى: طيب كيف على الطلعه؟
ساره: خلاص على العصر ان شالله
يمنى: ترا بنمر جمعى البنات الكل يسأل عنك يوم رحت هذيك المره وبصراحه ما ابي اروح لهم لحالي
ساره: اوكي مو مشكله بس مانبي نطول عندهم
يمنى: اوووك قلتي لخوك انك بتتأخرين
ساره: ايه عطيته خبر
يمنى: على خير يله مع السلامه
في المكتب ماجد يدخل على مديره
خالد: هاه بشر يا ماجد
ماجد: ردوا علي والحمدالله ما تعاقدوا مع اي احد
خالد وهو يبتسم: الله يبشرك بالجنه
ماجد: اجمعين
خالد: طيب كان قلت لهم يرسلوا مندوبهم عشان نتفاهم معاه
ماجد: هذا ما يفوتني كلمتهم ولمن تأكدت انهم ما تعاقدوا قلت لهم يرسلوا مندوبهم وان شالله انه بالطريق
خالد: يالله ياكريم ان شالله ربي ييسر
ماجد: ان شالله يارب
خالد: بالله ماجد خل ايمن يجيب لي قهوه
ماجد: بس ايمن عطيته اجازه ومافيه الا الفراش الهندي
خالد: ايه صح والله نسيت اوكي خله يسوي لي بس عساه يضبطها ما يحط فيها فلفل بدال السكر ههههههههه
ماجد: ههههههههههه ان شالله دقايق وهي عندك
طلع ماجد وانهمك خالد بشغله بدون لا يفكر يرفع عينه للساعه ما يبي الوقت يسرقه وهو ما خلص شغله قاطع انهماكه صوت جواله
خالد وهو يبتسم: اهلين وسهلين
ساره: هلا كيفك
خالد: بخير الحمدالله صحيتي من النووم
ساره: ايييه من 11 صاحيه بتجي للغدا
خالد: ما اتوقع اني اجي وش مسويه غدا
ساره: ليش مسويه بشاميل
خالد: يم يم بس بجي اكلها متأخر اتوقع بعد العصر اجي
ساره: الله واجد
خالد: ابي اخلص الشغل الي عندي كله ماابي يضل عندي شي متعلق وبعدين عندي مقابله مع مندوب ومستحيل ارجع قبل لا اقابله
ساره: الله يكون بعونك
خالد: متى بتطلعين انتي
ساره: يعني على 4 ونص 5 شفيك تسأل تبي شي
خالد: ما عندي شي بس اسأل حرام
ساره: لا مو حرام بس اذا عندك شي أأجل الطلعه
خالد: لا ماعندي شي طلعي
ساره: ترا الطلعه للسوق وللبنات
خالد: ساره شفيك اقولك يله مع السلامه حدي مشغوووووووووول
قفلت منه وفكرت انها تقعد على المنتدى شوي تشوف وتطوراتهم وش عندهم شي جديد دخلت اليوزر والباس وورد ودخلت واول ما دخلت طلع بوجهها رساله جديده فتحتها كانت من إحدى الاعضاء يثني على موضوعها الي كاتبته ويحثها تكتب وتبين مواهبها عشان الكل يستفيد وذيل الرساله ببريده الاكتروني
ساره : ههههههههههههههه مجنون هذا مايدري اني اقدر اعطيه باند على رسالته بس يله ماراح اسويها ولا انا راده عليه وكملت فرفره بالمنتدى وردت على مواضيعها طفشت توها بتسكر الجهاز طلعت لها من الجنب
:.....السلالالالالام
ساره الي كانت حاطه المسنجر بالخارج : اهليين هلا وعليكم السلام كيفك مها
مها كانت حاطه توبيك وصوره مو حلوه ماعجبت ساره: بخير كيفك انتي وشخبارك من جد لك وحشه هاه بتجين اليوم
ساره: ان شالله بجي اشوفك هناك والحين اخليك بطلع
مها: تو الناااااااااااس
ساره: من عمرك بس مشغوله (فاضية لك انا )
مها : اوكي سي يو
قبل لا تطلع عطتها بلوك سجلت خروج وطلعت من الانترنت كله خذت دفترها وقعدت تشخبط وترسم رسومات كتبت كم كلمه وسكرت الدفتر بعد وشغلت التلفزيون وقلبت بالقنوات وعجبها فلم هندي ولانها من النوع الي يبكي بسرعه خلته ..لووووول..

وبعد ما خلص الفلم سمعت صوت الاذان يعلن عن دخول وقت العصر تمددت على الكنب وهي ناويه تقوم تدخل صينية المكرونه عشان تتحمر حطتها بالفرن وراحت تتوضى وتصلي العصر
رن جواله وكان عنده المندوب ماقدر يرد عطها مشغول ارسلت له مسج
ساره: يالدب لا تعطيني مشغول ادري انك مشغول تراني خليت غداك جهاز بالفرن اذا جيت طلعه واذا تبيه ساخن اكثر حطه بالمكرويف شوي الله يعطيك العافيه طبعا ما قراه لانه كان منهمك مع المندوب وكل واحد فيهم يبي يبين ان الشي الي يقوله هو الصح.
ساره الي ارسلت المسج وبعدها راحت تتروش وتجهز نفسها عشان طلعة البنات لبست لبس ناعم مره طول عمرها تحب النعومه بلبسها والي مكسبها طله حلوه لبست تيشيرت رمادي تتوسطه ورده جوريه باللون الزهري الفاتح ومتناثر عليها فصوص كرستاليه بطريقه عارية الظهر ولكنها دخلت معها بدي باللون الزهري وجنز بأزرق فاتح جدا باقي ويصير ابيض درجتين او ثلاث ما حبت تحط مك اب لانها بتطلع للسوق وما تبي احد يقط عليها كلام رفعت شعرها بشكل حلو مرتب طالعت نفسها بالمرايه وهي تشعر بالرضى التام وطلعت من الغرفه
رن جوالها ساره: الوو
يمنى: جاهزه انتي تكلمها وهي تلبس صوتها مو واضح
ساره: ايه جاهزه بتجين الحين
يمنى: يبي لي عشر دقايق واكون عندك
ساره: اوكي
يمنى: بدق لك رنه واطلعي باي

وش راح يصير لهم بطلعتهم للسوق ؟:
وهل بيروحون لجمعة البنات ؟. وش راح يصير؟؟؟؟؟؟؟؟؟؟؟؟؟
توقعاتكم & قراءه ممتعه

************