[اسطورة !]

" قـصـتـي عـيـال الـعـز "

" الـحـلـقــه 2 "

" التكمله "

" لبست ملاك ثوب اخوها اللي كان وايد طويل عليهـا .. عاد اهي قامت ورفعته وربطته على بطنهـا بعد ما البست تحته سروال طبعـا .. طلعت بعدها بتنزل تحت الا امينه اختها تنتبه لهـا .. سالتها مستغربه " ملاكو .. شعندج لابسه ثوب ريايل ؟ "

" تخرعت ملاك" بـسـم الله .. خرعـتـيـنـي يا امينو "

امينه : ما تخرعتي الا لانج ناويه تسوين شي غلط .. ما تقولين لي شعندج الحين ؟

ملاك : سلامتج ..ما ناويه اسوي شي غلط وما عندي شي !
امينه ( تسال ) : عيل ليش لابسه ثوب ريايل ؟

" ابتسمت ملاك مستانسه" بلف بالشوارع مع فصول وانا بالبطبطه الحين "

" انصدمت امينه" شنو ! انتي مو صـاحـيـه ؟ استخفيتي ! انتي اكـيـد ينيتي ؟ "

" عفست ملاك الويه" اشفيج انصدمتي ؟ ما فيها شي لو لفيت بالبطبطه مع اخـوي "

" عصبت امينه" هو مو ان فيهـا شي .. الا فيها اشيا .. ما يجوز يا ملاك هالشي والله ما يجوز .. وهالجلب فصول شلون سمح لج من انج تركبين معاه ؟ يا اما انه شارب له شي ! او استخف "

" تحلطمت ملاك " والله ان فصول كان معاه حق لما قال انج بتسوين سالفه ! انا اقول تعوذي من ابليس وبلا هالعقد بليز .. انا ما بركب مع ريال غريب .. انا بركب مع اخـوي الكبير "

" تنرفزت امينه " امحق اخـو كبير ! انتي وين عايشه ؟ ما تقولين لي انتي وين عايشه ؟ عبالج احنا عايشين في اوروبا عشان تلفين لي بالبطابط جـدام الريايل ؟ "

" تمسخرت ملاك " شنو هالتناقض اللي عليج يا المطوعه ؟ هاا ! افهم من كلامج ان لو كنت في اوروبا عادي اركب بالبطبطه ؟ يعني ريايل اوروبا ما يعتبرون ريايل ؟ "

امينه : انا ما قلت جـذي .. فـلـو سمحتي لا تفسرين كلامي على كيفج .. اللي انا اقصده ان مجتمعنا المحافظ يختلف عن مجتمعهم الفري !

" ما اهتمت ملاك للكلام ومشت عنها رايحه لفيصل .. عصبت امينه" ما اتعبرين كلامي وتمشين ها ؟ هين يا ملوك .. عند الوالد "

" طلعت ملاك بعدها لفيصل مستانسه .. شافها فيصل متحلطم " جان ما يتي يا انسه .. تصدقين عاد لو ما يتي خلال هالخمس ثواني كنت بمشي عنج "

" ابتسمت له وركبت وراه متحمسه" يالله حـرك .. عـجـل .. انـطـلـق .. هـيـااا "

" تمسخر عليهـا" الحمدلله والشكر "

************************************************** ***

" بدار ساره "

دخـل ناصر عليها بالدار معصب : مسويه فيني مقلب بالماسنجر يا الشيخه ؟

ساره ( بلا مبالاه ) : نويصر .. لو سمحت لا تـعـورراسي واطلع بره .. واذا عالماسنجر انا ما كنت ادري ان هالياهل الغبي اللي كلمته هو انت ..

سال متنرفز : حتى ولو ماكنتي تدرين مثل ما تقولين .. انتي حـظـرتـج ليش تـكلمين شباب ؟

ساره : لا تقعد تسوي لي فيها ريال الحين .. توك 13 سنه .. ياهل .. ما طلعت من البيضه .. لا صار عمرك 20 سنه هذيج الساعه تعال حاسبني !

" قامت بعدها متنرفزه وسكرت باب الدار بويهـا" لو سمحت لا تسندري .. انا مو فاضيه لك الحين "

" عصب من هالحركه" هين يا ساروه .. تسكرين الباب بويهي ولا كأنج مسويه شي ! عند الـوالـد "

^^

" المشكله ان كل ما صار شي بالبيت كل واحد يهدد الثاني " بالوالد " مع العلم انهم يتكلمون بدون ما ينفذون كلامهم ! كل هذا خوف من ابوهم " احمد "

******************************
" بالصاله "
" امينه كانت ادور امها متنرفزه .. شافتها امها مستفهمه" اشفيج يا امينه قاعده اتحوسين بالبيت ؟ "
امينه : كنت ادورج يمه .. ابقولج عن سواة هالملاكو مع الحمار فصول !
امها ( تسال ) : ليش ان شالله .. شمسوين ؟
امينه : هالحمار ولدج مركب ملاكو معاه بالبطبطه وقاعد يلف فيها بالشوارع جدام الريايل !
سالت بعدها معصبه : ترضين بالشي هذا يا يمه ؟ بالله عليج ترضين ؟
امها ( ببرود ) : وشفيها يعني ؟ هذا اخـوها مو غريب ..
تعجبت امينه من هالرد : حـتـى ولو يمه .. ما يجوز هالشي .. والله ما يـجـوز ..
امها : وشنو بالله عليج هاللي ما يجوز ؟
امينه : يعني مو عدله يركبهـا معاه ويلف بالشوارع .. فرضا شافوه ربعه معاها ! شبيقولون ؟؟
امها : ان شالله محد بيشوفه معاها .. واذا شافوها هذيج الساعه يصير خير !
انبطت جبد امينه : يمه انتي ليش بارده جـذي ؟ ليش ماخذه الامور ببساطه تامه ؟
امها : انا مو اني بارده او مـاخـذه الامور ببساطه تامه مثل ما تقولين .. انتي اللي مكبره السالفه على شي سخيف !
" فجاه "
" دخل بويوسف الصاله .. شافت ام يوسف امينه بنظره" يعني سكتي ولا اتيبين سالفه لابوج عشان ما يتنرفز "
" بعدها "
سال بويوسف : ما شفتي يوسف يا العنود ؟
ام يوسف ( العنود ) : اعتقد انه بالدار مع مرته .. ليش تبيه بشي ضروري ؟
" قال وهو رايح للدار " بغيته بشغل "
************************************************** ***
" بدار يوسف "
" كان قاعد عالسرير وحـاط راسه على بطن شيخه مرته وهو مستانس .. سال بابتسامه" ليش ما يتحرك حـبـيـبـتـي ؟ اشمعنى لما اشيل راسي تقولين لي اكاهو البيبي تحرك ؟ "
" ضـحـكـت شيخه" الظاهر يناحسك "
" ضـحـك يوسف بالمثل" مو احسن له يـنـاحـس ابوه "
" بعدها "
سالت شيخه بابتسامه : ما قلت لي حـبـيـبـي .. لو يبت لك ولد شبتسميه ؟ ولو بنت شبتسميها ؟
يوسف : لو ولد طلال ولو بنت هديل ..
ما عجبتها الاسامي : طلال وهديل ! بالله عليك شنو هالاسامي المو شي ؟؟
يوسف : اذا هذوله مو شي عيل شنو الاسامي اللي ببالج ؟
شيخه : مشعل + ميعاد ..
ما عجبته الاسامي : بالله عليج الحين هذوله اسامي ؟ شنو مشعل وميعاد ؟
ضحكت عليه :ok حـبـيـبـي .. اللي تشوفه .. بس بالاول خل اشوف شنو جنس البيبي اللي ببطني ! كلها اسبوعين ان شالله وبيشرف للدنيا وبنعرف ^^
يوسف : بالله عليج مو لو مسويه تليفزيون عشان انعرف لو بنت او ولد احـسـن لنا ؟
شيخه : بالعكس .. انا ما بغيت اسال .. حـبـيـتـهـا تون سبرايز ..
" بعدها "
" حـط يوسف راسه للمره 2 على بطن شيخه " ما علينا الحين ويالله قولي حـق هالمناحس يتحرك .. ابي اسمعه وهو يرافس بطنج "
" ضحكت شيخه على هالعبط " ان شالله .. من عيوني "
************************************************** ***
" بالشارع "
" عند المرخيه "
" صرخت ملاك بلا حاسيه وهي على البطبطه " يـااااهـووو يـااا "
" سالهـا فيصل " يا المينونه .. شنو يـااهـوو يـااا ؟؟ قصري حسج ! فـضـحـتـيـنـااا ! "
ملاك : اشفيك انت ؟ لا تصير لي معقد نفس امينو ! ما فيها شي لو عبرت عن وناستي شوي ..
فيصل : اي ما فيها شي .. بس لا تنسين يا الهبله انج بالشارع الحين ومو بالبيت .. والشباب عبالهم انج ولد ! فأنجبي احسن لج وسكري حلجج لا تفضحينا بليز ..
" فجاه "
" مرت بطبطه ملونه من يم بطبطة فيصل .. شاف صـاحـب البطبطه فيصل بابتسامه" اهلين يا الفصيص وينك ما اتبين ؟ وحـشـتـنـا مع فيسك "
" التفت له فيصل " هلااا بابراهيم .. هلا والله .. انا مـوجـود بالدنيا بس متكيسل شويه .. ما قلت لي انت شلونك ؟ وشمسوي ؟ "
ابراهيم : انا الحمدلله بخير .. عايش بالدنيا ..
سال بعدها : ما عرفتنا عالمتلثم اللي قاعد وراك ! هذا اخـوك ؟
" ضحكت ملاك بشويش ورد فيصل بارتباك" اي يا الحبيب .. هذا اخـوي الصغير نـويـصـر " وداس على ريول ملاك " احـم "
ابتسم ابراهيم : عاشت الاسامي .. شلونك يا ناصر ؟
" توهقت ملاك وما قـدرت ترد عليه عشان ما ينكشف امرها وينفضح اخـوهـا معاها .. استفهم ابراهيم" اشبلاك يا ناصر ما ترد ؟ اسالك عن حالك ! شلونك ؟ "
" رد فيصل يبرر" اسمح لـه يا ابراهيم .. المسكين غتم ما يـتـكـلـم موليا "
" تعجب ابراهيم " بس انا ما اخـبـر ان بويوسف عنده عيال غـتـمـان "
" رقع فيصل السالفه " هذا نويصر اخـر واحـد فينا .. شكلك ما شفته وسمعت عنه .. المسكين كان يتلعثم من يوم هو ياهل ليمن انخرس فجاه "
انكسر خـاطـر ابراهيم : الله يشافيه ان شالله .. ما يشوف شر ..
فيصل : الله يسمع منك يا ابراهيم .. تسلم .. الشر ما اييك ..
" مـلاك كانت ماسكه الـضـحـكـه اللي شويه وبتنفجر بس فيصل كان يـدوس على ريولهـا اليسار يعني" انجبي لا تـفـضـحـيـنـا "
************************************************** ***
" بدار يوسف "
" سال يوسف بابتسامه" ما قلتي لي حـبـيـبـتـي .. شتبين ايب لج من الجمعيه ؟ "
" ابتسمت له بالمثل " سيليلاك "
" ضـحـك" شدعوه سيليلاك عاد ؟ "
شيخه : شاسوي ؟ عاد انا خاطري بسيليلاك الحين ..
يوسف : من عيوني حـبـيـبـتـي .. انتي تامرين امر .. لو تبين القمر ايبه لج !
شيخه : تسلم لي عيونك .. وما يامر عليك عدو ..
" بعدها "
" قام يوسف وباس شيخه على راسها وطلع بره الدار .. نزل الصاله وشاف امه العنود قاعده هناك تسولف مع امينه "
شافت ام يوسف ولدها .. سالته : كلمت ابوك يا يوسف ؟
يوسف : لا ..ليش اهو يبيني ؟
امه : توه من شويه كان يسال عنك .. يبيك بشغل !
" استنتج يوسف " اتوقع يبيني بخصوص السياير اليديده اللي طالبينها .. على العموم انا رايح الجمعيه الحين وان شالله بكلمه ليما ارد "
" سال بعدها بابتسامه" تامرين على شي من هناك يا الغاليه ؟ "
" ابتسمت امه" سلامتك ورضى الله "
" التفت بعدها على امينه يسال" وانتي يا امينه ؟ "
" ابتسمت له" هم سلامتك "
" طلع بعدها من الصاله " الله يسلمكم .. يالله فمان الله "
" بالشارع "

" يم باب حـوش بيت الجيران كانت عايشه بنت الجيران واقـفـه هناك بوسط الشارع وتتحلطم معصـبه .. شافت ساعتهـا متسائله" وينه هالعله ليما الحين ما يه ؟ "

" بهـالحظه ركب يوسف بسيارته الفراري .. طلع من البيت .. فجاه وقف بوسط الشارع وهو يشوف عايشهامجابلته "

" وقف بسيارته .. طلع راسه من الشباك يسال " الشيخه ليش واقفه بوسط الممر ؟ ممكن توخرين شوي ؟ ابي اطوف ما عليج امر "

" بحلقت عايشه بعيونها العسليه عالسياره منبهره " Woow سيارة فراري ! حلم حياتي "

استغرب يوسف هالبرود : يا انسه .. انا اكلمج .. ممكن لو سمحتي توخرين عن الدرب شويه ؟ ابي اطوف بالسياره .. ما عليج امر ..

تفشلت عايشه من نفسها : اسفه الشيخ ما انتبهت لك ..

" بعدها "

" وخرت من الشارع وكمل يوسف دربه .. قال بقلبه " في شي اسمه رصيف وليما الحين في ناس متخلف تمشي بالشارع ! والله حاله "

" تمت عايشه امبحلقه بالفراري ليما اختفت من ناظرها ..مسكينه بنت فقر .. ما شايفه خير .. تنهدت بحزن " ياليت عالاقل تكون عندنا ولو سياره وحده بس بالبيت "

شافت ساعتها بعدها وهي تتحلطم : هاليموزين العله وينه ليما الحين ما يه ؟؟

^^

" هذي حالة بيت الجيران ! كل ما بيطلعون يطلبون لهم ليموزين لان ما عندهم سياره .. على قولة عايشه " على الاقل الليموزين ارقى من التاكسي "

See u