[فيتامين سي]

صحى من النوم على صوت المنبه..
قام بتكاسل و توجه للحمام وبالمرة توضا لان الحين وقت صلاة الفجر..
طلع من الحمام وصلى و بعد ما صلى على طول قام و لبس ملابسه الخاصة بالدوام..
وطبعا المعطف الأبيض مسكه بيده..
طلع من الغرفة و هو يذكر ربه و شاف بالصالة أخته سحر متمدده على الكنب..
خالد:وأنتي هذا قعدتك من أمس ما نمتي..
سحر لفت له:أوف تو قبل شوي انتهى الفلم..الحين بقوم أنام..
خالد بطناز:شاطره..أقول قومي صلي و قدامي تحت..
سحر قامت مشت لغرفتها وهي تتمدد بالهوا بنوم:أوفـ..
هز راسه بالنفي و مشى لتحت و شاف أبوه توه طالع من غرفته و قعد بالصالة وهو يذكر ربه بهدوء..
خالد ابتسم و مشى له و باس راسه:صباح الخير يبا..
أبو خالد بابتسامة:صباح النور..
خالد قعد يمه:ها أمي وينها؟
أبو خالد:بالمطبخ تجهز الفطور..خواتك وينهم؟
خالد:والله يبا شكلهم للحين ما صحوا..سحر توها قبل شوي بتنام؟
أبو خالد قطب حواجبه:إنا لله مع هالبنت الناس تصحى وهي تنام مدري متى بتعدل نفسها..
خالد بابتسامة:ما عليك منهم يبا..
بنفس هالوقت طلعت أم خالد وبيدها سفره الفطور و الشغالة وراها..
مع ان عندهم طاولة طعام بس أبو خالد يفضل غالبا الأكل بالأرض..
أم خالد بابتسامة:حيا الله دكتور خالد..
خالد ابتسم:الله يحيك..
قعدت أم خالد و تكلمت وهي تعدل السفرة بالأرض:ها قلي شخبارها عروسنا؟
خالد توسعت ابتسامته:خير يما قاعد معها أنا..هذاني معكم من أمس..
أم خالد ابتسمت له:أي بس أنت أمي رحت المستشفى يعني معقولة ما شفتها..
خالد ضحك و هو فاهم تنحيز أمه بس تضايق لما تذكر شكلها أمس كيف كان و تكلم و هو يتنهد:إن شاء الله بخير..
أبو خالد ابتسم عشان ولده:ما قلت لما متى تبي ملكتك يا خالد؟
خالد ناظرهم:ودي بأقرب وقت ممكن..بس مدري عن الظروف..
أم خالد ابتسمت بفرح وهي تناظره:ويه يا خالد والله لو توافق البنت الخميس هذا ملكتك نبي نفرح فيك..
خالد:هههههههههههههههههههه� �هههههههههههه مستعجله يما الخميس هذا مرة وحدهـ..
أم خالد:أي الخميس هذا شفيها قلت شي غلط أنا..
أبو خالد تكلم وهو يناظره:طيب يا خالد يعني البنيه بتقعد بالمستشفى ليوم زواجكم..والله مو عدله؟
خالد اختفت ابتسامته و تكلم:فكرت فيها يبا..
أبو خالد:وش وصلت له؟
خالد و هو يوزع نظره بينهم:أنا وصلت لحل يبا..بس مدري هو بيرضيكم أو لا..
أم خالد بجدية:قول يا خالد؟
خالد تكلم بهدوء:أنا فكرت بعد الملكة أجيبها هنا..تقعد معنا بالبيت..
أم خالد و أبو خالد تبادلوا النظرات و خالد تكلم:طبعا لو أنتوا وافقتوا..والبنت وافقت؟
أبو خالد:يعني شايف أن كذا صح يا خالد..بتجيبها تقعد هنا ليوم الزواج..
خالد:ما عندي حل ثاني يبا..صحيح مو عدله بس كذا أحسن من أنها تقعد بالمستشفى ليوم الزواج..صح كلامي..
تكلم بعد صمت:بعدين هي بعد الملكة بتصير زوجتي يبا..ما فيها شي..
أم خالد قطبت حواجبها:مدري يا خالد والله مو حلوة قدام الناس..
خالد تضايق لأنه لاحظ أنهم مو موافقين:شتبيني أسوي يما..زي منتي عارفة البنت ما عندها مكان تروح له..
أبو خالد تنهد بضيق:مو لو أنك خطبت وحده من بنات عمك كان أحسن لك يا خالد..شوف وش حطيتنا فيه؟
خالد:افا يبا الحين عشان موضوع السكن صارت السالفة مشكلة..ما فيها شي يبا أنا بتزوج البنت على سنة الله و رسوله و مو عيب لو جات قعدت ببيتي ليوم الزواج..خصوصا أن هالشي مو بيدها يا يبا هي مضطرهـ..
أبو خالد تنهد:إنا لله و إنا إليه راجعون..
أم خالد لاحظت الجو بدا يتكهرب و تكلمت وهي تناظرهم:أقول كنا نسينا الفطور..خلونا نفطر و يحلها ألف حلال..
.
.
.
كانت قاعدة على واحد من الكنبين المنفردين اللي بزاوية من زوايا الغرفة و تتصفح مجله..
طفشت من هالمجله..
ما عندها غيرها هنا..
و من الملل كل يوم ترجع و تعيد قرايتها مرة ثانية و ثالثة و عاشرة لعل و عسى تلقا فيها شي جديد..
حتى إنها صارت حافظة المواضيع اللي فيها من كثر ما قرتها..
ناظرت الساعة اللي على الجدار و استغربت(الساعة صارت9وخالد للحين ما جا)
ابتسمت بسخرية وهي ترجع تفرر المجله(من جدي أنا أفكر فيه كذا..وليه أبعرف جا أو لا..ولو جا هو مو مجبور يجيني كل يوم)
رجعت قطبت حواجبها وهي تنقل عيونها لزاوية من زوايا الغرفة(بلا هو مجبور يجيني كل يوم..هو دكتوري..وقريب بيصير ز..زوجي..يعني بالحالتين هو مجبور يجي ويشوفني..بس وينه للحين ما بين)
وللمرة الثانية رجعت تناظر سطور المجله(مصدقه نفسي أنا..ليه قاعده أفكر فيه بهالطريقة..هو للحين ما صار زوجي..ما صـآإآإر!)
صحت من سرحانها لما سمعت صوت ضرب على الباب و بسرعة عدلت الشيلة على راسها و بدون ما تتكلم انفتح الباب و دخل منه الشخص اللي كانت ريم قبل شوي تفكر فيه..
خالد..
خالد تكلم بابتسامة وهو يناظرها:صباح الخير..
ريم بهدوء:صباح النور..
خالد:إن شاء الله اليوم أحسن..
ريم انحرجت لأنها فهمت إن قصده حالتها أمس و هزت راسها بالإيجاب:الحمد لله..
خالد كان حاب يقعد يتكلم معها..
بس يحس أن شكلهم غلط يقعدون لحالهم كذا و يتكلمون..
بس لازم يكلمها..
لازم يتفق معها على كل شي..
مو هي شريكة حياته..
صحيح المفروض أهله هم اللي يتفاهمون معها على كل شي..
بس حالتهم هنا غير..
عشان كذا هو حاب إن هو اللي يتفق معها على كل شي..
كلــ شيــ..
خالد تكلم وهو يناظرها بهدوء:حنا لازم نتكلم مع بعض شوي..
ريم دق قلبها بقوة و ناظرته وهي تبلع ريقها و خالد تكلم:ممكن أقعد..
ريم بدون شعور منها هزت راسها بالإيجاب..
مو أول مرة خالد يقعد معها..
من قبل كانت ترد عليه برد مغتضب و بحمق بس الحين ما تقدر..
ما تدري ليه؟..
بس الحين كل شي تغير..
خالد احتار يقعد بالكنب المنفرد المجانب لكنبها أو يقعد على الكرسي اللي عند سريرها و اللي يبعد عنها بمسافة..
بس فضل إنه يكون قريب منها..
هو ما يحب لما يتكلم مع أحد يكون كل واحد بطرف..
مشى و قعد بالكنب المنفرد اللي عند كنبها ما يفصل بينهم ألا فراغ صغير مما أربكها أكثر..
خالد بدا الكلام بهدوء:أنتي عارفة أنا أبي أتكلم بأي موضوع..
ريم نزلت راسها تحت بصمت و خالد تكلم بهدوء:ريم حنا قريب بنتـ..بنتزوج..و حنا ولا مرة تكلمنا بخصوص هالموضوع..أنا عارف أن كذا غلط..
المفروض أهلي هم اللي يجون و يشوفون وش هي طلباتك..بس..أنتي شايفه الحال..الظروف أحيانا تتحكم فينا؟
ريم ضلت تناظر الأرض بصمت و خالد ضل يناظرها هو الثاني و مو عارف من وين يبدا كلامه..
اليوم يبي يخلص كل شي..
بس كيف؟
ما يدري؟
تنهد وهو يتكلم:ريم أنتي ما عندك شروط..
ريم رفعت راسها و ناظرته بصمت و خالد تكلم:كلميني يا ريم حنا لازم نتفق على كل شي ونخلص الموضوع لمتى بنضل كذا..
ريم بالغصب تكلمت و بتردد:أنا..عنــ..عندي شرط واحد بس..
خالد ما يدري ليه ابتسم وهو يسمع صوتها المرتبك و تكلم بابتسامة:أللي هو..
ريم بلعت ريقها و تكلمت وهي تحس إنها باختبار صعب:بدون عرس..
خالد استغرب بقوة..
هي اللي تطلب منه هالطلب..
ليهـ طيبـ؟
خالد قطب حواجبه:والسبب؟
ريم و هي تلعب بأصابع يدها:هذا شرطي الوحيد..منت مستعد تنفذهـ..؟
خالد ضل يناظرها و كنه يدقق بملامحها البريئة:................................... ....... ...........
ريم تكلمت وهي تحاول ما تحط عينها بعينه و صوتها شوي و يختفي:أنا عارفة أن أهلك ودهم يفرحون فيك..بس أنا من حقي أطلب اللي أبي..و أنا ما أبي غير هالشي..ولا تسألني ليه؟
خالد تكلم و هو ينقل بصره للغرفة:طيب..
خالد رجع لف لها:أسبوعين يكفي..
ريم وهي تناظر الأرض:شقصدك؟
خالد:على ملكتنا؟
ريم ما تدري شتسوي و شتقول..
هي الحين قاعده تتكلم مع هالشخص اللي بيصير زوجها قريب..
وقاعده تتفاهم معه على أمور زواجهم..
متى صارت هذي؟
وين صارت؟
ولا الظروف صارت تتحكم حتى بأدق الأمور بحياتهم..
خالد وقف و هو وده يقعد..
عنده كلام ما قاله..
يبي يقول لها كل شي..
بس مو وقته الحين..
هذا يكفي اليوم..
تكلم وهو واقف:بكلم أختي تجي لك..عشان تشوفين وش ناقصك و وش محتاجة..يمكن هي بتفهمك أكثر مني..سلام..
مشى لباب الغرفة و طلع منها وهو متضايق و بنفس الوقت فرحان..
فرحته لأنه قعد معها..و لأنه بياخذها بعد أسبوعين..
ومتضايق من طلبها..بدون عرس؟؟
أكيد أهله بيرفضون هالطلب بس هو بيحاول معهم..
بصراحة بعد هو شايف أن كذا أحسن..ياخذها بعد الملكة..
وهي..
طلع و تركها تناظر الأرض بصمت و دموعها تجمدت بعيونها..
هي بنت مثل كل البنات..ودها تشوف يوم زواجها..ودها بالفستان الأبيض..
حلمها..
بس ما تقدر..
كيف تسوي زواج و هي لحالها..
ما معها أحد يوقف معها بيومها الوردي..
قامت و تمددت على السرير الأبيض الممل بهدوء و ببطء و دمعتها تدحرجت على خدها(أختك تجيني..عشان تشوف وش ناقصني..أنا كل شي ناقصني..ما عندي شي..كل شي ناقصني..كل شي)
.
.
.
ندى وهي تضحك:هههههههههههههههههه طيب خلاص مرام آخر مرة..
مرام لفت لها بتكشيرة:زين سامحتك خلاص..
ندى:يللا ما تبين تقولين لي شصار بينكم؟
مرام ابتسمت:ما صار شي شبيصير يعني..كل السالفة أني التقيت فيه بس؟
ندى رفعت حواجبها:بس!..
مرام:أي بس..
ندى سندت ظهرها لورا:مع اني مو مصدقه بس يللا بمشيها لك..
مرام بعد صمت ابتسمت:بس والله إنه مزيوون..تغير عن آخر مرة شفته فيها..
ندى:أحمـ طالع على أخته؟
مرام كشرت:تخسين..وين الثرا و وين الثريا..
ندى بنذاله:هين والله بقول له..مع أن علاقتي معاه مو ذاك الزود بس بقول له؟
مرام لفت لها:شنو بتقولين له؟
ندى ببرود:بقول له إني لما قلت أني أشبهه قلتي وين الثرا و وين الثريا..
مرام:أي قصدي أنتي الثريا و هو الثرا..
ندى:ههههههههههههههههههههه� �آآي حلوهـ..عموما في الحالتين بقول له؟
مرام تتصنع البرود:أي عادي قولي له..
ندى:المهم ما علينا شخبار ولد العم؟
مرام كشرت:خليني أنساه واللي يسلمك يا ندى..زوجته حامل؟
ندى ابتسمت لها:مبروك؟
مرام بضيق:الله يبارك فيك..
ندى بابتسامة:أدري أنك متضايقه عشانه بس خليه عنك أنسيه..
مرام سكتت و ندى تكلمت بمزح وهي ترفع يدها للسما:إن شاء الله فهد بينسيك ولد عمك و اللي جابوه بعد..ههههههههههههههههههههه ههه..
مرام لفت لها بعصبية:يالحمارة يالزفته..
ندى:ههههههههههههههههههههه� �ههههههههههههههههه شسوي لك تتكلمين عن أخوي وكنه العشيق الدور بيجي عليه..
مرام ضربتها وهي تضحك:هههههههههههههههههههه� �ههههههه ما بقول لا إلا مين اللي بيجي ياخذك اليوم..
ندى بابتسامة جانبية:أخوي فهوود تبين أوصل له شي..
مرام ضحكت:أقول عاد لا تاخذين السالفة جد أمزح..إلا ما قلتي لي شصار على فصوول؟
ندى ابتسمت:ذاك اليوم كلمته وكل يوم أفتح المسن و أشوفه داخل بس ما كلمني من ذاك اليوم..شكله ينتظرني أتكلم معه؟
مرام بابتسامة:أقول عطيني ايميله بس..
ندى:أوهـ طفشتيني فيه خلاص بعطيك ايميله و فكيني منه..
سمعت ندى صوت يناديها و قامت سلمت على صديقتها و مشت و تركت مرام لحالها..
قاعده هنا بين الزحمة و الضجه..
بين الحب و الشتات..
.
.
.



(***وش يعيد الوقت قلي غير خطوات الرجوع***)