[لامارا]

الجزء السادس

شوي و تكلم امين : الوو ..
امبي من زمان ما سمعت صوته .. تغير احسه صار ريال .. إذا صوته جذي شكله شنو ؟: يا هلا و الله شلونك ؟
امين : انا ؟.. الحمد لله بخير و نعمة .
جهاد : الحمد لله ..
امين : انتي شلونج ؟
جهاد : الحمد لله .. وايد اوكي ... اسأل عنك .
امين : سألت عنج العافية قولي امين ..
جهاد : امين ... الحمد لله على سلامتك .
امين : الله يسلمج يا رب ... عقبالج .. تروحين برع و تدرسين و تييبين شهادة .
جهاد : لا ويي عاد انا خليني بروحي .. ابوس ايدي ورا و جدام على 82 اللي مكتوبه في الشهادة بعد بعثة و ما اعرف شنو ؟.. انا اقول يبة خل الدراسة لاصحابها .. انا مال كسل و طلعات و وناسة موب دراسة ..
امين : عيل وين الياهله اللي كانت رفيجتي وقت الطفولة اللي كانت تموت في الدراسة ؟
جهاد : افا عليك .. ملاك و اختك قامو بالواجب و اكثر خلوني اكره الدراسة ... و طبعاً كل وناسة و سخافة ...
سكت شوي و رد تكلم : تعرفين احسج وايد تغيرتي عن قبل .. صوتج و حتى طريقة كلامج .
جهاد : ترى اربع سنين تسوي الهوايل موب بس تغيرني ..
امين : انتي للحين مثل قبل يعني ... يعني شكلج و هاي مثل ....
حست ا نه توهق و ما عرف يسأل بس انا ساعدته : و انت تعرف ان ابوي للحين اهو ابوي عايش ما مات و للحين فيه عقدة نفسية من البنات و معقدني معاه ؟
امين : سوري بس حبيت اسأل ..
جهاد : عادي لا سوري و لا غيره انا خلاص تعودت على هالسالفة .. هاذي حياتي بس يلا ... الله كريم ..
امين : انزين ما قلتي لي شلونج في المدرسة ؟
جهاد : و الله تمام تعرف بنت تجاري لا علمي اكل الكتب قبل الامتحان و لا ادبي احفظ و بس .. تجاري افهم و احياناً اروح الامتحان بدون دراسة عادي .. ما في شي مهم .. موب مثلك ماشا الله عليك علمي و كنت وايد تدرس .. الله يحميك من الحسد ..
امين : انشا الله ... تذكرين ايام اول كنتي تقولين انا بصير دكتورة و ما اعرف شنو .. ما كنت اعرف اني انا اللي بصير دكتور .
جهاد : بيي تذكر ايام اول شنو كنا نسوي .. مسخرة .. صج كنا هبلان ..
امين : ما ادري إذا تذكرين او لا يوم اللي ييراننا يابو لهم حمار و قعدنا نلعب معاهم ..
جهاد : ما اذكر ..
امين : بلى .. يوم كنا صغار لما ييرانا شرو لهم حمار و خلونا نلعب معاهم و ركبنا على الحمار ... و لما تهاوشنا معاهم رحنا طقينا الحمار بحصى .. يوم اللي قصينا شعر سماح بنت الييران .
جهاد : ايي تذكرت مسكينة .. و ما نستحي بعد مخلينا نلعب مع حمارهم .. رحنا و قصينا شعرها نصة .
امين : ههههه ... و الله محد قال لها تسوي شعرها ظفاير و تراوينا عبالها بسكت عنها ..
جهاد : كنا شياطين و احلى شي ان محد يصدق علينا ... ابرياء شنسوي ؟
امين : أيي وااااضح من ام سماح لما يات شرشحتنا في البيت ..
المهم ظلينا نتكلم شوي عن ذكرياتنا مع بعض لما كنا صغار و سكرت عنه ..
رقدت ...


يوم ثاني كان في مدرسة ... صحيت ملاك و رحنا مع صقور ...
شوي و وصلو البنات قعدنا مع بعض شوي و طق الجرس .... مرت اول الحصص عادية ... في الفسحة رحنا مكاننا و قعدنا هناك ...
حنان : جهاد سمعي النكتة ..
جهاد : شنو ؟
حنان : مرت ابوي ولدت و يابت ياسر ابوي متصل فيني يقول لي روحي لها .
جهاد : و ليش ما تروحين روحي .. زيارة المريض واجب .
حنان : ما بقى إلا انا اروح حق هاذي .. احلامها .
جهاد : لا صج مري عليها و شوفي اخوج .
حنان : خل اصير اوكي مع خواتي الكبار بعدين اروح حق هاذي .. انا امي لما ولدت ما مريت عليها تبين الحين اروح حق هاذي ؟... تحلم ..
ياتنا انسانة ما اقدر اقول عنها بنية .. شكلها صبي 100% لو ما المريول خلاص صبي لا محال .. اسمها علياء بس الكل يسميها علوي .. يعني مثل علي ..
علوي : هاي ..
جهاد : هلا ..
علوي : جهاد .. لو سمحت شوي ..
رحت لها .. شفيها ذي ... شتبي مني ؟
علوي : بسألك انت منو حبيبتك ؟
جهاد : شنو يعني ؟
علةي : يعني منو حبيبتك ؟
جهاد : انا ما عندي حبيبه ..
علوي : انزين و ملاك .
جهاد : ملاك بنت خالي و اختي و بس .
علوي : انزين عادي لو كلمتها ؟
انا فهمت انها تبي تكلم ملاك و تقول لها انها تحبها بس حامض على بوزها : شوف .. اللي يتقرب من ملاك احطمه فاهم ؟... عندك ملايين البنات اختار اللي تبيها .. بس ملاك خلك بعيد عنها ..
علوي : أي بس انت قلت انها موب حبيبتك ..
جهاد : أي موب حبيبتي .. بس خلك بعيد .
علوي : اوكي سوري .
جهاد : لا عادي موب مشكله .. بس لا تفكر مجرد تفكير انك تكون جريب منها ..
علوي : اوكي .. بااي .
مشت عني و انا رديت قعدت معاهم ..
حنان : شسالفة ؟
جهاد : سوالف بويات انتي لا تتدخلين ..
طالعتني بنظرة على كلمة بويات ..
جهاد : لا تطالعيني جذي .. و لا تحاولين معاي ... انا بنظرهم بوية ما يعرفون بيتنا شلون ... يات تسألني عن شي و جاوبتها ..
طق الجرس و دشينا الصفوف ..
الحصة السادسة المعلمة غايبة .. شوي و دشو حنان و سوسن ..
جهاد : شنو عندكم ؟
حنا ن: عندنا انج معلمة بشرى النحيسة .. طردتني و طلعنا ..
جهاد : زين قعدو احنا معلمتنا غايبة ..
قعدنا نسولف شوي و بعدين ...
حنان : انا عطشانة .. تعالو نروح الكفيتيريا .....
ملاك : انا تعبانة
سوسن : انا ما لي بارض .
جهاد : قومي انا بروح معاج .
حنان : قومي ...
وصلنا لنص الطريج و احنا ساكتين لحد ما تكلمت حنان : امم .. بقول لج شي و انتي وصليه حق صقر .
جهاد : شنو ؟
حنان : قولي له ان انا قبلت اعتذاره بس مره ثانية لو الموت ما اطوفها له جذي .
جهاد : وصل انشا الله .. اممم بس شنو اللي خلاج تغيرين رايج مع انج كنتي .. يعني ..
حنان : لاني ما كنت اعرف اهو ليش سوا جذي بس الحين لما عرفت اهو ليش سوا جذي اوكي .. أي و قولي له يستحي على ويهه و ما يمزح مع بنات جذي .. هاذي مزحة و يقول لها جذي لو صج شيقول لها ؟


يوم ثاني كنت قاعدة في الصالة بروحي .. البيت فاضي من غيري و الخدامة و اشوف مسلسل .. سخيف و قصته ما لها معنى بس قعدت اشوفه ... شوي و انفتح الباب .. كان فهد .. وصل و اخيراً من العمرة .. ع الاقل في احد اقعد معاه في البيت ..
رحت له و سلمت عليه : الحمد لله على سلامتك .
فهد : الله يسلمج .. ها شلونج ؟
جهاد : تمام انت شلونك ؟
فهد : تمام الحمد لله .
جهاد : شلون سفرتك .
فهد : و الله كانت ... او تعرفين ؟... بروح ببدل و بتسبح و بعدين بنزل .
و بعد ما رد قال لي عن سفرتهم و شلون استانسو فيها ...
جهاد : شربت ماي زمزم ؟
فهد : شلون بعد ؟ في احد يروح هناك و يفوت ماي زمزم .. يبت لكم بعد .. شربيه يمكن الله يهديج ...
جهاد : انشا الله يهديني .
و قعدت اسولف معاه .. في الليل ياب لي صوغتي كانت وايد حلوة ... قران شكله وايد مميز و حلو ... و معاه سيادة صلاة و مسبحه حجر كريم ...
لاحظت ان صوغتي مثل صقر موب مثل ملاك .. بس يللا .. الله كريم ..
عقب ما راح فهد يرقد رحت فوق اكلم شيما
حمد : شيوم قلتي بتراويني صورتج و ما راويتيني .
شيما : يعني لازم ؟
حمد : إذا ما تبين بكيفج بس بعدها لا تسأليني ليش زعلت ؟
شيما : اوكي .. دقيقة بس .
شوي و حطت لي صورة ياهله : الحين انا اقول لج صورتج تحطين لي صورت بنت خالتج الصغيرة ؟؟
شيما : هههههه .. لا هاذي انا لما كنت صغيره .
حمد : لا انا ابي اشوف صوريتج الحين و انتي كبيرة .. موب و انتي ياهل .. انا لما يشوفوني ناس ما يصدقون ان انا مثلي الياهل .. لاني وايد تغيرت .. ابي اشوفج و انتي الحين كبيرة .
شيما : انزين ... شلون تبيني اثق فيك و انا ما اعرف انت من ؟
حمد : يعني ما تثقين فيني ؟
شيما : انا ما قلت جذي ..
حمد : شقصدج يعني غير جذي ؟...
شيما : انا بس سألت..
حمد : عيل خلج في تساؤلاتج و خليني بروحي ... بااي ..
سويت لها بلوك على طول .. خلها شوي تفكر باللي سوته .. عشتو يعني عبالها متأثرة صج .. بس خلها .. تتعلم .

وقت الفسحة يوم ثاني قعدنا انا و سوسن مع بعض .. و حنان و ملاك راحو يشترون لنا ماي و اكل ....
و لما ردو ..
ملاك : سمعو بنات الخبر .
سوسن : شنو ؟
ملاك : توقعوا من في الكافيتيريا ؟
سوسن : من ؟
ملاك : شيما .
سوسن : انزين و يعني ؟
ملاك : كانت تصيح .
سوسن : افا و ما عرفتو ليش ؟
ملاك : بلى مو هذا الخبر اللي ابي اقول لكم عنه .
سوسن : شنو ؟
ملاك : حبيبها زعلان عليها و موب راضي يكلمها .
انا هني جذبني الموضوع .. الحقيرة يعني تخون حمد اللي اهو انا .. او انها صج تحبني .
جهاد : و ما عرفني ليش ؟
ملاك : بلى ... تقول لما كانو يتكلمون قالت له من باب مزحة انها ما تثق فيه .. زعل و ما رضا يكلمها .. تقول حتى سوا لها بلوك ..
ابتسمت .. تستاهل البايخة .. إذا اهلها ما ربوها انا اعرف شلون اربيها .
حنان : بس شكلج وايد واثقة انه حبيبها .
ملاك : لما رحتي تشترين في الزحمة انا كنت اسمعها .. ياو لها ربعها و سألوها شفيج تصيحين ؟ قالت حمد زعلان علي ... و لما سألتها وحده منو حمد قالت لها حبيبي ...
جهاد : اها .. كيفها .. تولي اهي و دموعها ...


و مر باقي الاسبوع عادي و انا للحين ما اكلم شيما مع انها كل يوم تطرش لي إيميلات و بطاقات بريدية على إيملي بس انا عاطيته االسين ...
اليوم الخميس .... مر علينا صقور بيت خالي و خذانا و رحنا مجمع الواحة ... نشتري هدية حق حنان لان عيد ميلادها يوم الاحد ... احترت شنو اخذ لها .. بعدين خذيت لها مجموعة ميك اب يديد نزل و سمعت انها خاطرها فيه ..
صقر : احم احم .. اممم جهاد ؟
جهاد : صقر لا تعطي مقدمات ادخل في الموضوع على طول ...
صقر : امممم ... شرايج اشتري هدية و اعطيج اياها تعطينها حنان ؟
طالعته بنظره : بصفتك شنو انشا الله ؟
صقر : و لا شي .
جهاد : عيل ليش تشتري لها هدية انشا الله ؟
صقر : امم ... يعني اعتذار عن اللي صار من قبل ...
جهاد : و انا على حد علمي ان انا قلت لك انها قبلت اعتذارك .. اصلاً حتى لو ما راح ترضى تاخذها .. ترى اهي موب رخيصة مثل البنات اللي بس ابتسم لها قالت يحبني .
صقر : هههههه .. انا ما قلت انها جذي بالعكس مكرمة عنهم ... بس .. يعني انتي فاهمة قصدي .
جهاد : البنات كلهم كوم و ربعي بكوم لو شنو صار علشان جذي اقول لك لا .
صقر : افف .. زين ......... انزين شرايج اعطيج اقتراح ثاني ؟
جهاد : غرد .
صقر :امم .. الهدية منج و البطاقة مكتوب عليها انها منج ... و كل شي يدل على انها منج .. بس انا ما ابي اخسرج .. تكون الهدية على حسابي ..
جهاد : انزين شنو الفرق يعني ؟.. في كلا الحالتين اهي منك .
صقر : لا اكييد في فرق .. الحالة الاولية بتعر ف انها مني بس المرة الثانية انا ما لي خص فيها و لا في هديتها .. بس انا اللي دفعت و انتو طبعاً ما راح تقولوون لها منو اللي دافع .
جهاد : لا اقنعتني .. يلا بدور اغلى شي و بدفعك فلوسه ..
شريت لها عطر و خليته يدفع ... و ملاك اشترت لها هدية من بدي شوب ... مجموعة كاملة في علبة وحدة مالت هدايا ...
و في السيارة قلت له يردنا بيت خالي ... رحنا هناك و كان عزوز مبدل و لابس ثياب سبورت ..
جهاد : وين رايح ؟
عزوز : رايح الممشى اتمشى شوي .. من زمان ما مشيت و هالايام زايد وزني قلت يلا .
جهاد : بتروح مع منو ؟
عزوز : بروح بروحي .
جهاد : عيل انطر بروح معاك ... بتيين ملاك ؟
ملاك : لا موب رايحة .
جهاد : عيل انطرني دقايق و رادة .
رحت بدلت لبست برمودة بيضا واسعة شوي .. و فانيلة حمرا دم غزال اكمام قصيرة و على كل كتف خطين بيض ... و جوتي احمر فيه خط ابيض .. عدلت شعري و نزلت ما لقيت احد طلعت السيارة لقيته هناك ..
عزوز : تأخرتي .
جهاد : اعدل شعري .
رحنا الممشى .. تمشينا و ركضنا شوي .. و سولفنا وايد علشان يمر الوقت ... مشينا ساعة و نص ثمانية كيلومتر .. يعني لو كل يوم امشي هالمسافة اضعف ... بس انا جسمي حلو موب لازم اضعف و لا ازيد و عضلاتي بعد حلوين موب وايد و لا شوي .. بين و بين ...
درينا البيت و انا هلكانة من التعب : اووووف ... تعبنااااا ...
على طول قعدت في الصالة ... ملاك شوي و نزلت قلت لها اتييب ماي ... يابت لي جيك ماي شربت نصه و النص الباقي شربه عزوز ... بيي تذكرت .. اتصلت في فهد : الو ؟
جهاد : هلا فهيد .. وينك ؟
فهد : انا ويا الصبيان ... شتبين ؟
جهاد : اها ... متى بترد البيت ؟
فهد : انا اليوم موب راد بندش حداق البحر .
جهاد : اوكي عيل .. يلا بااي .
سكرت عنه و اتصلت في صقور : هلا .
جهاد : وينك ؟
صقر : امم .. انا الحين في القهوة .
جهاد : انزين متى بترد ؟
صقر : ما ادري شتبين ؟
جهاد : ابيك اتمر البيت بعدين اتيي بيت خالي .
صقر : ليش ؟
جهاد : ابيك اتييب اللاب توب مالي فيه صور و اشياء ابيهم موب منزلة في لاب توب مال ملاك .
صقر : اوكي بس ما اقدر اقول لج متى اييج .. يمكن عقب ساعة ساعتين ثلاث الساعة وحدة ما ادري لان الشباب للحين قاعدين .
جهاد : اوكي بس قبل ما اتيي كلمني .
صقر : اوكي .. بااي .
شغلت التلفزيون و قعدت اشوف برنامج في بو ظبي ... ملاك فاتحة اللاب توب و عزوز يطالع معاي ... و كلهم ساكتين .. عقب نص ساعة تقريباً طق الجرس : هاذي اكيد صقر .
ملاك : لا تتعبين روحج و تقومين تفتحين انا بفتح بروح خاطري اتنيذل عليه شوي ...
قامت يا زعم فتحت الباب و قبل ما تتكلم سكرته مرة ثانية و راحت فوق بسرعة ... انفتح الباب و دش صبي .... ما اعرفه بس اعتقد انه امين .. بلى هاذي اهو مثل الشكل و الملامح .... بييييييي واايد تغير ..
امين : سلام عليكم .
و ردينا السلام .. يا صوبي و مد ايده يسلم : شلونك صقر ؟
ما راح تعرفون شعوري قلبي يدق بسرعة بسرعة يسرعة .. يمكن منحرجة ... ابي اختفي من جدام ويهه بسرعة ..
مديت يدي و سلمت عليه بما ان انا موب بنية : تمام الحمد لله بس انا موب صقر .
طالعني بنظرة مستغرب : منو ؟
جهاد : جهاد .
فتح عينه حده مستغرب : منو ؟
جهاد : جهااد .
امين : أي جهاد ؟
جهاد : اخت فهد و صقر ..
امين : يعني انت مثل ... سوري .. يعني انتي اللي كلمتج من جم يوم ؟
جهاد : أي انا .
امين : بيييي .. صوتج كلش ما يلوق على شكلج و لا واحد بالمئة .
جهاد : بعد شسوي ؟
امين : صج صج واااايد تغيرتي عن اخر مرة شفتج فيها .. ما توقعت اني اسافر و ارد و القاج مثلج ما تغيرتي .
جهاد : يعني قصدك ان انا موب صبي و لا بنية ؟؟.... عادي إذا بتتعود تشوفني تعود على الصبي موب البنية لان ما في امل انك تشوفها اصلاً ...
امين : صج ان هيئتج ما تغيرت ... بس انتي وايد تغيرتي ... يعني ويهج و ملامحج ... صريت غير ..
راح يسلم على عزوز : اهلاً اهلاً ... شلونك ؟
امين : تمام اسأل عنك .
عزوز : أي جذي خلينا نشوفك .
امين : و راح تشوفني وايد لاني هالسنة بقعد شهرين و نص .
اهم مستانسين بس انا هاذي اهو شعوري ما ابي امين يشوفني .. يعني ما ادري ليش بس اعتقد انه يمكن لاني اعرفه و عاش معاي طفولتي .. الله اعلم ...
جهاد : شباب انا استأذن .
امين : وين ؟ قعدي معانا .
جهاد : لا وين ؟... بروح اتسبح يايه تعبانة من المشي .
رحت فوق و قطيت روحي على السرير ... انا طول هالشهرين و نص ما ابي امين يشوفني .. لانه يحرجني لما يذكرني بأصلي شنو .. و انا قلبي يعورني لما اتذكر هالشي .. صح ان طول حياتي كانت جذي ... بس لما افكر بالموضوع بجد .. انا بنية و لازم اكون عاطفيه ...
طلعت ملاك من الحمام : ليش ييتي ؟
جهاد : بتسبح و برقد راسي يألمني شوي .. انتي ليش ركظتي ؟
ملاك : لان ما علي حجاب ... اممم اصحيج حق العشا ؟
جهاد : لا ... او أي انا يوعانة .
ملاك : ما تغديتي ؟
جهاد : بلى و ماكلة العصر بعد لما كنتي تتسبحين .
ملاك : اها .. انا الحين اخليج تولين و انا بروح .
طلعت .. اضطريت ان انا اجذب عليها علشان اتجنب شوفة امين ... دشيت تسبحت و مليت البانيو ماي و حطيت فيه رغوة ليمون و قعدت فيه .. احس ان اعصابي ارتاحت ... قمت عقب فترة و بدلت ثيابي لبست ثياب بيت مريحة شورت و فانيلة ... احس ان راسي صج يألمني موب جذب ... مثل اللي يقول لج تمارض فمرض فمات ... انا تمارضت و مرضت لان راسي بدا يألمني .. سكرت كل الليتات و تغطيت و رقدت ...

ملاك : جهاد ... جهاد اصحي ..
صحيت و انا احس ان راسي بينفجر من الالم .. و ان الليت في عيني ..
جهاد : ملاك سكري الليت .
ملاك : قومي و خلي عنج الرقاد امي مسوية عشا حلو .. قومي تعشي .
جهاد : ملاك سكري الليت يعور عيني .
ملاك : ما اقدر على عيون الرقيقة .. قومي و خلي عنج الكسل .
ملاك موب قادرة تفهم ان انا صج اتألم ... يا ربي راسي يألمني ... اسوي أي شي بس ينفع معاه .. احس روحي بصيح من الالم .
قمت الحمام ركظ و على طول فرغت كل اللي في جبدي حتى اللي كليته على الغدا .. احس روحي بموت .. موب قادرة اتحمل الالم ... قعدت على الارض و استندت على الطوفة ... نزلت دموعي تعبر عن واحد بالمئة من الالم الي احس في الحين ... قمت و غسلت ويهي .. و توي بفتح الباب رديت للحمام و كملت المهمة الصعبة اللي كنت اسويها من شوي .. هالمرة قعدت على الارض بدون ما اقدر اقوم .... طقت ملاك الباب و صوتها كان يبين انها خايفة : جهاد .. فتحي الباب شفيج ؟
قلت لها و انا موب قادرة ارد عليها من التعب .. : الباب مفتوح .
اول ما دشت و شافت حالتي شهقت و يات عندي بسرعة : شفيج ؟
جهاد : راسي يألمني موب متحملة الالم ..
ملاك : انزين قومي ..
ساعدتني اوقف و اغسل روحي مرة ثانية ... فتحت الباب و انا حاطة كل ثقل جسمي عليها ... صج ان انا اشيل حديد بس انا خفيفة وايد ... المهم .. مشيت شوي .. دخت ..: ملاك احس بيغمى علي ....
و قبل ما اكمل جملتي طحت على الارض و ما ادري شنو اللي قاعد يصير حواليني ... ملاك على طول قامت تطقني يمكن احس بس انا فاقدة الاحساس نهائي .. نزلت بسرعة تحت و صرخت : يمة جهاد طاحت أغمي عليها و تقول ان راسها يعورها ما ادري شفيها روحي شوفيها بسرعة .. ركض عزوز و خالتي سلامة بسرعة لي فوق لقوني طايحة على الارض ... يابو لي ماي و غسل عزوز ويهي فيه بس بعد ما صحيت ... حملني و دخلني الحجرة و خلاني على السرير ... ياب لي كولونيا و شممني اياها و صحيت و فتحت عيني بهدوء بس بحركة سريعة يودت راسي بقوة و غطيت عيوني بذراعي ... :سكروا الليت .. بسرعة ...
قامم ملاك و سكرت الليت بسرعة ...
جهاد : اااااااااااااااخ ..
ملاك : سلامتج انشا الله ...
جهاد : خالتي وين امين ؟
سلامة : تحت .
جهاد : نزلو قعدو معاه بسرعة اهو كلها فترة بسيطة و بيسافر عنكم اما انا بظل معاكم على طول .
سلامة : ما اقدر اخليج بهالحال انتي بنتي .
جهاد : عزوز قوم اقعد مع الريال ... و ملاك نزلي تحت ما ابيج تقعدين معاي .
ملاك و هي تصيح : ما اقدر اخليج بروحج .
جهاد : و انا ما اقدر اسمعج تصيحين بسبتي ..
يات يمي و حظنتني .. حسيت انها صج تحبني و خايفة علي . ... شوي شوي صرت حاطة راسي بحظنها وبدا الالم يزيد و بديت اصيح من الالم ..... شوي شوي دوختني دموعي و رقدت .... بس شوي و صحيت على صوت تلفوني يرن ..
جهاد : ملاك سكريه بسرعة ...
بس شكلها ردت لاني سمعتها تقول : هلا حنان ....... ماشي الحال ..... و لا شي بس جهاد تعبانة ......... ما تقدر ترد عليج راسها وايد يألمها ....... قاعدة تصيح من الالم انتي ما تفهمين .,,,,,,,,, لا ما له داعي لما تصير احسن بكلمج او بخليها تكلمج ........ حنان بلا ....
بس هالمرة انا اللي قاطعت كلامها : ملاك طلعي برع تحجي الصوت يألمني اكثر .
طلعت برع شوي و ردت ....
جهاد : شتبي حنان ؟
ملاك : و لا شي بس كانت تسأل عنج ..
شوي سكت لاني ما اقدر اتكلم . : ملاك تذكرين الغطا الاسود اللي كنت البسه على عيني لما كنت ارقد .. اهو شكله مثل النظارة بس اسود ..
ملاك : شفيه ؟
جهاد : يبي لي اثنين منهم لان راسي وايد يألمني .
ملاك : انزين شدخله ؟
جهاد : علشان الليت ما يصير في عيني .
ملاك : انشا الله ..
راحت يابتهم لي لبستهم فوق بعض ..: الحين إذا تبون فتحو الليت ...
ظلينا ساكتين ... بس انا رديت اصيح بس بعدها رديت رقدت ... حسيت لملاك لما باست راسي و غطتني و طلعت ... لاني للحين ما رقدت زين ....

عقب فترة صحيت بس ظلت عيني مسكرة و الالم ما تغير ..... ظليت واعية فترة و انفتح الباب ...
ملاك : شفتي جهاد راقدة .. اهي تعبانة ما تقدر تتكلم .
رديت بس بصعوبة : تعالي انا موب راقدة .
سمعت حس وحدة غير ملاك تتكلم .. يات قعدت يمي : سلامتج ... اجر و عافية انشا الله
عرفت انها حنان .... بس ما رديت عليها حدي تعبانة ... شوي و رن تلفوني : ملاك إذا ما سكرتي هالتلفون الحين بكسره ..
ملاك : هاذي صقر ... خلاص سكر بس مسوي مسد كول ... انا بروح برع بكلمه اشوف شيبي ...
نزلت تحت و حنان ظلت يمي ..
جهاد : حنان يبي لي ماي من الثلاجة اللي في الصالة .
حنان : دقيقة .
راحت و شوي و دشت ..
عطتني اياه في يدي عقب ما فتحت الغرشة ... شربت شوي و رديت عطيتها ...
انفتح الباب و سمعت ملاك تقول : حنان لبسي شيلتج عدل صقر يبي يكلم جهاد .
جهاد : شيبي ؟
هاذي انا و ما اتغير لما اصير مريضة يصير خلقي ضيج و بسرعة اتنرفز .
ملاك : نطري الحين اهو يكلمج .
: احم احم ... السلام عليكم .
حنان : و عليكم السلام .
صقر : جهاد انتي صاحية ؟
جهاد : أي موب راقدة .
صقر : راسج وايد يألمج ؟
جهاد : لا قاعدة امزح معاكم و كل اللي صار تمثيلية .. شهالسؤال ؟
صقر : انزين لا تعصبين .
جهاد : موب عاجبك قوم اطلع برع .
صقر : انزين سوري ..... قومي بوديج المستشفى ...
جهاد : ما ابي اروح يعني شبيسوون ؟ ... بيعطوني بندول و يردوني البيت .
صقر : انزين قومي خل ناخذ منهم بندول .
انا عصبت : شوف إذا تبي تستخف بدمك موب علي ترى و الله ما لي بارض و تعبانة بتستخف بدمك قوم اطلع برع .
صقر : انزين بس خلاص ...بس قومي اكيد بيحطون عليج سيلان و لا يعطونج ابره اكيد يسوون لج تحليل خل نشوف شنو اللي صار ..
شوي شوي صار يقنعني لحد ما قلت له اوكي : بس ملاك طلعي لي ثياب غير .
ملاك : اوكي .
جهاد : طلعي لي شي خفيف قطن ... الجو صار حر الحين .... طلعي لي برمودا .
ملاك : اوكي .
لبست ثيابي مع اني ما اعرف شنو قاعدة البس بس كنت اتوقع ..كملت لبس و ناديتهم .. دش بس صقر ..
جهاد : اسمع ما اابي احد غير خالتي سلامة إذا قالت تبي اتيي بس ما ابي لا ملاك و لا حنان ما لي بارض اسمع اوادم تصيح .
صقر : ههههه .. اوكي بس هاذي حنان النحيسة ما بترضى ...
جهاد : لا قول لها ان انا ما ابيها ...
دشو حنان و ملاك علينا و سكتت ...
صقر : يلا قومي ..
جهاد : انطر اول بشيل الغطا من على عيني ..
شلتها و حسيت ان راسي بدا يدور بس تجاهلته .. سندني صقر و ظليت امشي يمه
شوي و صار راسي يدور بسرعة طحت على الارض موب قادرة اقوم ..
صقر : شفيج ؟
جهاد : راسي يدور موب قادرة اقوم ..
صقر :ا نزين حاولي ..
وقفت و على طول الحمام ... فرغت مرة ثانية و احس اني هالمرة صج دايخة و احتاج اني اروح المستشفى ..
دشت علي حنان و ملاك الحمام و انا اسمع ملاك تصيح و يتهيأ لي صوت حنان بس ما ادري ... سندوني و قمت غسلت ويهي و طلعت ... قعدت على الكرسي صقر راح اييب لي ماي و ملاك راحت تلبس علشان عبالها انها راح اتيي معاي .. و تتييب الغطا مال عيوني لاني موب متحملة الليت .. يابت لي الغطا لبسته و تسندت على الكرسي يا زعم انطر ملاك بس الصج اني ما كنت قادرة اقوم من مكاني .. سكتنا حنان قاعدة يمي على الكرسي و صقر واقف على يساري يم الكرسي ..
حنان : انا بعد يايه معاكم .
صقر : لا انتي راح تظلين مع ملاك هني .
حنان : اولاً ملاك يايه معاكم و ثانياً لو تبي ملاك تظل هني بروحها خلي ملاك بروحها انا يايه يعني يايه .
صقر و بدت نذالته : سيارتي و كيفي ما ابيج لا انتي و لا رفيجتج .
حنان : عيل خلي جهاد هني و احنا بنخلي أي احد يوديها المستشفى ..
صقر : انا إلله ... اهي قالت لي ما تبيكم فهمي عاد .
حنان : انت اللي افهم ... انا رايحة غصباً عنك و عنها فاهم ؟
صقر : و انا قلت ....
قاطعتهم و انا اصارخ : بس عاد .... عورتو راسي فوق العوار اللي فيني ... خلاص ... اللي يبي ايي بكيفه و اللي ما يبي بكيفه بس عاد كفاية ... لاكن انشا الله اموت و افتك من كل شي .
حسيت بإيدين على ظهري و حنان و صقر يكلمون مع بعض في مثل الوقت ..
حنان : اسم الله ..
صقر : لا تقول ...
و في نفس الوقت الإيدين انشالو عن ظهري و الاثنين سكتو ..!!!!!
شكلي فهمت اللي قاعد يصير كل واحد منهم كان يبي يقول لي شي و يرفع من معنوياتي المتحطمة .. بس صارت إيدينهم على بعض بالغلط من جذي الاثنين سكتوا ... احس ان الحين صقر مبتسم بس بدون ما يحاول يبين لها شي و حنان ويهها منحرق من الفشلة ....
بديت اضحك بشكل خفيف : ههه ... ههههه ... هههههه
الحين لاكن صج ضحكت و خليتها تعصب : ههههههههههههههههههههههههه هه هههههههههههههههه و الله انكم نكتة .
حنان عصبت : حتى و انتي مريضة و تعبانة بعد تتطنزين على الاوادم ؟... ما تيوزين عن الحركات البايخة ..
صقر تكلم بهدوء : مسامحة الشيخة حصل خير .
حنان : و انت لو سمحت اكرمني بسكوتك .
صقر ما يسكت و اثنينهم يذكروني بتوم ان جيري : انزين يعني كنت اقصد اسوي جذي ؟ ... كان بالغلط عاد كليتيني ... شهالامم التعبانة ..
حنان شهقت : الحين انا تعبانة ؟... انت جفت ويهك ؟؟؟
جهاد : استغفر الله العظيم على هالاوادم ... بس عاد سكتو يهال انتو ؟ سكتو و اللي الحين بتكلم بحط حرة الالم كلها فيه ..
سكتنا .... انا احس ان راسي زاد الالم اللي فيه ... مسكت راسي بقوة و تكورت على نفسي ... احس نفسي بموت من الالم ...
جهاد : اااااي .... اااااااااااي ...
بديت اصيح من الالم ..
ملاك : قومي خل نروح المستشفى .
جهاد : موب قادرة اقوم ...
نطرت عشر دقايق اقل اكثر ما ادري ... لما خف الالم وقفت علشان اروح المستشفى بس تماسكت في فانيلة صقر قبل ما اطيح .. حملني صقر و حطاني في السيارة ... ملاك قعدت جدام يم صقر ... و حنان معاي ورا و حطيت راسي على حظنها ...
حنان : ملاك يبي القران اللي هناك .
صقر : لا ... يبي شوي ... بطلع منه اوراق ...
شوي و عطاها القران ... صقر يول شي حق ملاك و ملاك قاعدة ترد عليه اما حنان كانت تقرا قران على راسي .... صوتها خفيف ما ينسمع واضح لان ملاك و صقر يسولفون ما اعرف شيقولون ... و لما سكتو صار صوتها ينسمع ... صوتها كان حلو و هي تقرا قران ... ما شا الله ... و بما ان المستشفى بعيد عن البيت قرت سورة محمد كاملة على راسي ... احس ان الالم هدا ...
وصلنا المستشفى و انا احس اني متكسرة ...
صقر : نطرو بروح اييب ويل جير حقج و برد ... بسم الله ..
نزل من السيارة شوي و رد ... قمت من مكاني و رحت على الكرسي ... رديت راسي لورا احسه يألمني إذا ارفعه .. شوي بس و دخلنا على الدكتوورة ... هاذي دكتورتي و ما اروح عند غيرها ... هندية بس تتكلم عربي احسن مني ... كلمها صقر و قال لها شنو صار بس ملاك و حنان كانو واقفين برع ... شوي سأتني جم سؤال ... خلتني في غرفة صغيرة فيها بس سرير .. سحبت مني دم و حطت لي ابر و سيلان و ملاك و حنان قعدو معاي ... حنان تقرا قران و احنا نسمعها ... و عقب ما خلصت سورة ثانية ...
جهاد : حنان الحين الوقت متأخر قومي روحي البيت ..
حنان : عادي ما عندي احد يسأل عني او يحاتيني إذا تأخرت ..
جهاد : حتى لو . انا احاتيج .. ملاك ... روحي نادي صقور من برع ..
شوي و دخل صقر ...
جهاد : صقر روح انت و ملاك وصل حنان و تعال لي اكون انا خلصت من السيلان ...
صقر : اوكي .. يلا .
طلعو كلهم عقب ما سلمت علي حنان .... و انا حد تعبانة ... رقدت ..... صحيت على صوت الممرضة ... شالت من يدي السيلان .. شوي و دش صقر ... رحت معاه للدكتورة ... قالت لي ان دمي5.5 يعني وايد ناقص من جذي كان يغمي علي و ضغطي نازل وايد بعد و السكر منخفض عندي ... قالت لي تخليني في المستشفى اليوم بس انا قلت لها ان انا ابي ارد البيت ... و عقب خمس ايام ارد لها .... صح ان الالم خف شوي بس للحين يألمني ... و في السيارة ...
صقر : اممم .. الحين بنروح البيت .
ملاك : لا انا بروح بيتنا .
جهاد : انا ما بروح البيت بروح بيت خالي .
صقر : لا تعالي البيت خلج مع امي .
جهاد : اللي يسمع صج لو رحت البيت بتهتم فيني .. امي بس تهتم بالاوادم و عيال الاوادم بس احنا و لا حتى تسأل عننا تقول لي تهتم فيني ؟ .. صل على النبي اقول ... انا بالنسبة لي خالتي سلامة اهي امي ... تهتم فيني اكثر من ما تهتم امي ... ما بروح معاك ...
رديت البيت "بيت خالي" ... و ما كان في احد دشيت الحجرة و حطيت راسي على المخدة .... دشت خالتي سلامة و عطتني ماي زمزم اشربه .... و يابت ماي زمزم قارين عليه ختمة كاملة للقران يستخدمون حق المرضى ... مسحت راسي فيه و انشا الله اصير احسن ... بس طلعت انا غطيت في نوم عميق ...

صحيت يوم ثاني و انا احس ان وايد احسن صج ان راسي يألمني للحين بس موب مثل البارحة اليوم احسن يعني اقدر افتح عيوني و اقدر امشي ....
نزلت تحت و سلمت على خالي و خالتي ... تريقنا و قعدنا مع بعض بس بعدين قعدت احل واجباتي و ادرس شوي ... سكرت الكتاب لان احس ان راسي الحين بدا يألمني ... سكرت عيوني و شربت دوا من اللي عطتني الدكتورة امس ... هالالم ذابحني بسوي أي شي بس يوقف .... اففففف ... شوي و كملت دراسة ... فتحت اللاب توب اللي يابة لي امس صقر و كملت البروجكت مال القانون و سكرته لان راسي بدا يرد يألمني ... من شربت الماي و مسحت خالتي جسمي بماي زمزم احس اني صرت احسن ... سبحان الله .. يايبينة من مكان مقدس اكيد له تأثير علي ....

مر الويك اند و انا يوم زينة و يوم موب زينة بس ليلة المدرسة كنت اوكي ... و اليوم عيد ميلاد حنان .. سويناه ثري لاين انا و ملاك سبيكر مع سوسن و حنان جريب الساعة 12 و غنينا لها هابي بيرث داي ... كانت صج مستانسة ... و بعدين عقب نص ساعة تقريباً ...كل واحد راح بروحه بس ظلينا انا و حنان نكلم بعض ... شوي و صاحت ...
جهاد : شفيج حنان ؟ ليش تصيحين ؟
ردت علي و هي تشهق بين كلامها : تعرفون ... انا وايد احبككم .... انا اصيح لاني قاعدة افكر تخيلي ... انتي رفيجتي و عادي لو تذكريني .... بس المشكلة في امي و ابوي .... تخيلي امي و ابوي حتى ما تذكرو انه اليوم عيد ميلادي ..... الله يسامحهم ... ما اعرف ليش يابوني ..
جهاد : حنان حبيبتي لا تحطين في بالج هالحجي ترى حرام ما يجوز هاذي يعتبر اعتراض على حمكة الله ... لا تخلين الشيطان يلعب براسج ... ترى احنا نحبج و الكل يحبج ....
حنان : بس هذيل امي و ابوي تعرفين يعني شنو ؟
جهاد : و ترى الكل يتمنى لج سنة طيبة ..... حتى صقر قال لي اقول لج كل سنة و انتي سالمة .
حنان : و هو سالم (( تذكرت )) بس هاذي نحيس ما يسمع الحجي للحين منقهرة عليه على يوم الخميس لما رحنا معاج المستشفى ... النذل عقب ما نزلني بيتنا يقول لي لا تتصلين في اختي ترى راسها يألمها و ما تقدر تتكلم في التلفون لا تزعجينها ..... شهالاسلوب الحقير ؟
جهاد : فديت اخوي و الله .... تعرفين اهو يقول عنج مثل هالكلام يقول انج نحيسة و ما تسمعين الحجي ...
حنان : يعني يقول عني نحيسة ؟
جهاد : سكتي و لا تعترضين ترى انتي تقولين له مثل الحجي ..
حنان : انزييييييين ... امم شرايكم باجر اتيون بيتنا ؟
جهاد : اوكي ... بس كلمي سوسن انا راسي بدا يألمني برقد .... يلا بااي
حنان : اممممم ... ثانكس جهاد .
جهاد : على شنو ؟
حنان : على كل شي .... انكم تذكرتوني ..... و لما اكون زعلانة تخففين عني ... صج صج شكراً ... اقولها لج من قلبي .
جهاد : و لو احنا خوات ما بيننا هالكلام .... يلا عاد ... حشى لزقة ... فهمي عاد انا تعبانة و ابي ارقد ... وراي مدرسة ..
حنان : ههههههههه ... اوكي يلا بااااااااااي .
جهاد : بيباي ..
سكرت عنها و على طول رقدت عقب ما شربت الدوا .... و صحيت الصبح و انا احس جسمي متكسر من التعب بس قمت رحت المدرسة ... طول طريج الصبح و صقور ساكت ما تعلف فيني بس مشغل قران ... و لما دشيت المدرسة دشيت الصف حطيت اغراضي و طلعت مرة ثانية ... ملاك وصلت معاي المدرسة في نفس الوقت بس ظلت في الصف و انا طلعت انا اشوف إذا وصلت حنان او لا ؟....
بس دشيت صفهم كانت واقفة وعاطيتني ظهرها ... رحت يمها غطيت عيونها بإيديني ...
حنان : ما يبي لها شي جهاد ..
شلت إيديني من عيونها افترت لي و حظنتني .... حظنتها و تمنيت لها سنة سعيدة ...
طلعت معاها عقب ما حطيت يدي على جتفها ... انا و طبعاً ما راح اقدر بس ع الاقل احاول اني اعوضها شوي عن الحب اللي لازم تحصله ممن اهلها ... بس الحمد لله على كل حال ...
مشينا شو قلت لها : اليوم انا يايه يايه حتى لو كنت بروحي بيي لج إذا سوسن و ملاك موب يايين انا يايه ..
حنان : افا عليج عيوني اوسع لج من البيت .
مرت علينا شيما و وقفت : اوووووووووو .... شكلج متهاوشة مع الحب ملوووك قلتي تاخذين حنان بدل ؟
جهاد : اقول خلج بعيده عني احسن لج .
شيما : نسيت انج ما ترضين احد بنادي بأسمها تغارييييييييين .
جهاد : اقول خليني في حالي و روحي حق هالخايس (( طالعتها بنظرة سخيفة مثل نظراتها )) حموووود (( رديت لطبيعتي )) و خليني انا في حالي فاهمة ؟
وقفت منصدمة : انتي شدراج بحمد ؟
جهاد : هه ... لا تحاولين تضحكيني ... المدرسة كلها تعرف بالسالفة و انتي ؟.... لا تعليق .... ما في احد ما يعرف سالفتج مع حمد ... اوه لا لا ... زعل منج لانج ما تثقين فيه ؟.... اللي يسمعج يقول انتي اللي تساهلين الثقة ... مسكين هالحمد لو يدري جم الف واحد غيره تكلمين و فالتها ع الاخر عبالج الناس تسكت ؟... بس اقول خلج في احلامج الذهبية اللي ما بتصير ... الله يعين قلبج ... (( كلمت حنان )) امشي بس امشي .. خلينا في حالنا ما نبي مشاكل مع ناس همها تتمشكل مع الاوادم ....
مشينا و خليناها مصدومة ... و رحنا الصف شفنا ملاك وقاعدة تحل في دفترها و شكلها زعلانة : شفيج لوكة ؟
ملاك طالعتني بنظرة : ما فيني شي ...
عرفت انها تجذب طبعاً ... بس ما حبيت اكبها جدام حنان يمكن ما تبي تقول جدامها
ظلت حنان طول الوقت ساكتة حتى وقت الفسحة ... ردينا الصف الحصة الرابعة بعد الفسحة و عرفنا ان معلمة الادر غايبة علشان جذي ..
جهاد : ملاك شفيج ؟
طالعتني : قومي خل ننزل و بقول لج ..
نزلنا تحت و اهي ساكتة وتفكر ... رحنا مكاننا مال كل يوم ....: امس تهاوشت مع مريم .
جهاد :أي مريم ؟
ملاك : امس اتصل فيني محمود و قام يسولف ... و انا اسمع طقة مال كول ثاني ... لما سكرته طلعت لي مريم حبيبته ... قلت لها هلا قالت لي لا اهلين و لا سهلين (( بدت تصيح على خفيف )) ياللي ما تستحين باللي موب مربية ... تقول لي .... تقول لي إذا تعرفين ان محمود يحبني و يبيني ليش تكلمينه ؟ انا اتصلت فيه شفته ويتنغ عرفت انه يكلمج انتي يالرخيصة .... و اتصلت فيج شفته بعد ويتنغ ... استحي على ويهج و لا تكلمينه .... قلت لها ... شلون ما تبيني اكلمه و انا بنت عمته ... اهو ولد خالي ... قالت لي انا ما اكلم عيال خالي لانه عيب البنية تكلم صبيان ... قلت لها يعني موب عيب تكلمين واحد غريب ؟.. قالت لي محمود حبيبي موب غريب علي انتي اللي بعدي عن طريجنا و خلاص ...
سكرت في ويهي .... شسوي الحين ؟... ليش كل مرة تتسبب و انا ساكتة عنها ... الحقيرة هددتني ان إذا ظليت اكلم محمود الحقيرة هددتني ان إذا ظليت اكلم محمود راح تقول حق عزوز لانه معاها في الجامعة اني طايحة مغازل مع عيال الاوادم ...
ظلت تصيح و انا ما حاولت اهديها لاني قاعدة افكر ...
جهاد : اممممم سمعي عندج حل واحد بس ...
ملاك : شنو ؟
جهاد : تقولين لمحمود ...!!!