في صالة بيت بو خليفة فوق نورة كانت تكلم شمسة و هي تصيح
نورة و هي تصيح: ما ابيه و الله ما ابيه
شمسة: نورة شهالكلام؟؟ انتي تلعبين .. باجر عرسج .. هالكلام خلاص ما منه فايدة ابد
نورة و هي تشهق: مو قادرة اتقبله و الله
شمسة: نورة .. انتي وافقتي من البداية عشان تقهرين فهد صح .. و تثبتين له انج قوية و عادي عندج فراقه .. و انج قادرة تتزوجين من عقبه صح
شمسة: عيل ليش وافقتي .. نوار انا قريبة منج وايد و يمكن اكثر وحدة افهمج .. لا تكابرين
نورة و صياحها يزيد: شماس .. مو عارفة شسوي بموت
شمسة: ارضي بالامر الواقع .. انتي اللي دخلتي عمرج بهالسالفة و محد اجبرج .. و حسب كلامج مايد يحبج .. يمكن نصيبج وياه احسن من نصيبج مع فهد اللي باعج .. خلاص ارضي بالواقع .. و عيشي حياتج .. و مصيرج بتتعودين عليه و بتحبينه
شمسة تعمدت تقول "باعج" عشان نورة خلاص تشيل فهد من بالها .. اما نورة فكانت تدري ان كلام شمسة كله صح .. لكن هي مستحيل تحب مايد
نورة: مستحيل احبه .. يعله الموت
شمسة: بسم الله .. استحي على ويهج و خافي ربج .. شذنبه الريال تدعين عليه؟؟
نورة: ما ابي اعرس ما ابي .. شمّاس دخيلج تعاليلي الحين
شمسة: تدرين مع ان الوقت متاخر بس عشان خاطرج بستاذن امايا و بييج
سكرت شمسة عن نورة و قلبها يعورها على بنت عمها .. الله يسامحك بس يا فهد .. مع ان الساعه تسع و اهلها مستحيل يرضون تطلع بهالوقت .. بس شمسة تمت تحن على امها .. و اللي انقذها ان ابوها موجود فاقنعته ان بنت عمها محتاجتها في ترتيب الاغراض .. راحت لنورة و نامت عندها و تمت تهديها و تقنعها بمايد و ترتب معاها الاغراض .. ارتاحت نورة شوي من عقب يية شمسة .. اما شمسة فقعدت ثاني يوم من الصبح عساس ترد بيتهم و تتجهز "للعرس"
و هي نازلة الصالة ما شافت حد و سمعت صوت بالمطبخ فراحت تسلم على مرت عمها قبل لا ترد
بس اتفاجات ان اللي فالمطبخ مو مرت عمها .. اللي فالمطبخ كان "خليفة" اللي رد من البحرين حق عرس اخته خصوصا ان هالكورس ما عنده الا بحث التخرج و بس .. فمو مضطر يداوم
خليفة و هو يطالعها: و عليكم السلام .. هلا شمسة
شمسة و قلبها يدق من الفرحة: شحالك ؟؟ و الحمدلله عالسلامة
خليفة: الله يسلمج .. و انتي شحالج؟؟
شمسة: بخير ربي يعافيك .. عيل وين عمتي؟؟
خليفة: سارت الخياط تقول اليوم بتزهب كندورتها
شمسة: برايها عيل سلم عليها
خليفة: و مع منو بتسيرين؟؟
شمسة: فهد يترياني برع مع السلامة
انقهر خليفة من عقب ما سمع اسم فهد .. ما يداني يشوفه من عقب اللي سواه باخته .. و من عقب ما طلعت شمسة بينه و بين نفسه .. ما احلاها .. كبرت و تغيرت من زمان ما شفتها .. انا شو خصني فيها حلوت و لا لا .. انا ما ابي الا مريومتي فديتها .. ابتسم يوم تذكر مريم .. و راح فوق يرمس مع اخته شوي
في بيت بو احمد دخلت هنادي و حاست بالبيت و ما حصلت احد .. سمعت حوسة بالمطبخ و دخلت شافت مريم محتشرة بين الاغراض بالمطبخ
هنادي بصوت عالي: صباح الخير
مريم عقب ما نقزت: بسم الله .. خرعتيني .. و هي حايسة بوزها: صباح النور
هنادي: ههههههه .. شدعوة اوي البك "قوي قلبك"
مريم: شنو .. تسوين دعاية "ديو" حضرتج
مريم: الحمدلله و الشكر.. يالله بنعمة العقل .. شفيج منشكحة اليوم
هنادي: و لا شي بس قاعده نشيطة .. الا شتسوين
مريم: ما عندي شي بس مليت و ما عليي دراسة السبت
هنادي: انا عندي بروجكت ادب
مريم: ايهه عاد انتي بتستذبحين عليه عشان تاخذين علامة كاملة
مريم: لا سلامتج .. بس من فترة ما عندج سالفة الا الدكتور محمد و مادته
هنادي: عادي اتحجى عنه مثل ما اتحجى عن غيره .. و انتي تعرفين انه كل المواد تهمني .. الا انتي تتخيلين و تتوهمين
مريم: اتمنى .. انزين قومي يالله خلصت قومي نروح الصالة
هنادي و هي تقوم: عيل وين عمتي؟؟
مريم: راحت مع يدي و يدتي سوق السمك
و طلعوا و قعدوا بالصالة يشوفون التلفزيون
كانت واقفة جدام المنظرة بكامل زينتها .. اليوم خلاص راح تصير زوجة مايد و راح تعيش معاه ببيت واحد و غرفة وحدة!!
دخلت عليها امها و قعدت تكلمها و تنصحها عشان تكون ربة بيت سنعة .. نورة كانت تسمع امها و دموعها تنزل على خدها و عقب حضنت امها و تموا يصيحون هم الثنتين .. ام خليفة كانت اغلب طلعاتها مع نورة و الحين بتطلع من البيت و بتسكن فالعين .. اما نورة فمصيبتها مصيبتين .. راح تفارق اهلها اللي تحبهم .. و الادهى انها بتتزوج واحد ما تحبه!!
دخلت القاعه و العيون كلها عليها .. الكل يناظرها .. كانت محلوة وايد و تسريحتها و مكياجها وايد حلوين .. حتى فستانها اللي اضطرت تصممه بسرعه كان وايد حلوو ..
نظرة الحزن ما فارقت ويها و اكثر وحدة كانت حاسة فيها هي ربيعتها شمسة .. شمسة ركبت عالستيج .. و راحت تسلم على نورة
نورة: الله يبارك فيج .. وينج من اول ما دخلت ادورج
شمسة: كنت موجودة بس انتي اللي ما انتبهتي .. وايد مرتبكة .. بس ما شاءالله عليج قمر
شمسة: يا بخت مايد فيج و الله
نورة و هي تنزل راسها: لا تيبيلي طاريه
شمسة و هي تتنهد: انا بنزل الحين و بييج عقب شوي
عقب فترة من الرقص و الاغاني .. دخل مايد و معاه ابوه و ابوها و اخوانها .. باس راسها و وقف عدالها .. عقبها سلموا عليها اخوانها و ابوها و باركوا لها و تصوروا وياها و طلعوا
نورة من غير ما تطالعه: الله يبارك فيك
مايد كان فرحان و يسولف مع نورة .. و هي يا اما ترد بردود مختصرة .. او ما ترد من الاساس .. هو كان يتحسبها مستحية منه .. و هي كان مخها بمكان ثاني!!
عقب ما زفوهم .. طلعوا من الخيمة .. و ودعوا اهلهم .. راحوا العين على طول .. و بالطريق
مايد: اسف الغالية اني ما بقدر اسفرج شهر عسل .. تعرفين ظروف الشغل .. بس اوعدج اول ما احصل فرصة .. بسفرج احلى شهر عسل
نورة بابتسامه باهته: لا عادي
و لفت الصوب الثاني .. و حطت راسها على الكرسي .. مايد تحراها نامت .. بس هي كانت قاعده .. و تفكر بحياتها اليديدة كيف راح تكون عقب ما صارت حرم مايد!! و هل راح تقدر تتقبله!! و كيف راح تكون حياتهم اليديدة!! كل هالاسئلة كانت ببال نورة و تفكر فيها لين ما نامت
في مدينة الضباب .. جواهر كانت متكشخة فالصالة و تنتظر طلال ايي من الدورة و يبدل .. عشان يطلعون و يتغدون برع .. و رن تلفونها و المتصلة كانت امها
ام يعقوب: هلا و الله ببنيتي .. شلونج يما
جواهر: بخير الحمدلله .. و لهت عليج وايد
جواهر: انتوا شلونكم و شلون ابوي و خواني و شلون البحرين؟؟ .. ولهت عليكم وايد
الام: كلهم بخير و يسلمون عليج .. عيل وين طلال عنج
جواهر: فالدورة انا لابسة و انطره بنطلع
الام: خلاص عيل سلمي عليه .. و تحملي بروحج حبيبتي
جواهر: ان شاءالله يما .. سلمي على اللي عندج
سكرت الام عن جواهر و قلبها مرتاح على بنتها عقب ما حست من صوتها انها سعيدة و مستانسة و مرتاحة
شوي و دخل طلال .. بدل و عقبها طلعوا يتغدون و يدخلون السينما .. طلال مو مقصر عن جواهر بشيء .. و ما باقي لهم الا اسبوعين و يرجعون