[فيتامين سي]

>> الـــــبــــــــارت الـــرابـــــع و الــــعــــــشـــــرون <<



:: شقة طارق ::

طارق لبس الكاب مال الشرطه ووخذا كوب الجاي عشان بيطلع : ها رنا اليوم ماراح تروحين بيت نهى ؟
رنا شالت مشاري من الفراش : نهى ؟ .. لآآ ما فيني اتزكر داك اليوم
طارق حط الكوب على الطاوله : رنا وبعدين معاج .. خلاص لي متى يعني وانتي جذي .. سويتي الشي وندمتي عليه!! ليش يعني ؟
رنا : طارق خلص بيكفي تأنيب
طارق : اوكي اوكي خلاص ولا يهمج ما راح اتكلم .. بس انتي جذي استانسي وانتي تاكلين بعمرج .. خل امشي احسن

طلع طارق من الاصنصير تحت ولا مسج من بدر

(( عمي شلونك .. قبل لاتروح الدوام ابي ايي لك البيت ابي اكلمك ضروري بموضوع مهم ))

طارق يكلم نفسه : الله يستر شعنده بدر هالحزه
ماوعى الا وسيارة بدر صفطت بالمصافط ونزل من السياره وراح عند عمه وسلم عليه
طارق : ها تبيني ضروري .. شعندك ؟
بدر : آآآ .. الموضوع مايخصني ولا يخصك .. الموضوع يخص رهين
طارق بأكبر علامة تعجب بويهه : رهييين !! .. شذكرك فيها ؟
بدر : شفيك عمي .. ما راحت من حياتنا الا جم يوم .. وبعدين لا تنسى ان رهين اختي
طارق : المهم .. شفيها ؟
بدر : شلون يعني بنوقف هني بالشارع وبنتكلم ؟
طارق : مانقدر نصعد .. تعال سيارتي
وراحوا قعدوا بسيارة طارق وقاله بدر كل اللي صار
طارق : شلوون ؟! .. تبي اوراقها ! .. ليش ؟
بدر : نسيت انكم ما تبونها خلاص .. عيل شتبون باوراقها
طارق تنهد : اووف بلشة وابتلشناها
بدر بقلبه " بلشه !! "
طارق : اوكي اليوم جذي على المغرب مرني وانا اعطيك اياهم


:: المستشفى ::
دخل الدكتور غرفة رهين لقاها حاطه كرسي وقاعده جبال الدريشه

الدكتور : شلونج رهين ؟
رهين لفت عليه : الحمدالله بخير
الدكتور : لااا اليوم شكلج احسن انشالله .. ونفسيتج احسن بعد
رهين : الحمدالله .. دكتور متى اطلع من هني ؟
الدكتور : انا كتبت لج ترخيص ،، باجر تطلعين انشالله
رهين هزت راسها


بــــــــــــــآجــــــــ ـــــر

رهين طلعت من الحمام عدلت شكلها وطلعت ورقه وكتبت فيها ..

<< عشت في مسرحيه طيلة حياتي .. ضحكت في المواقف المضحكه وبكيت في المواقف الحزينه .. كان المسرح مليئاً بالابطال والممثلون .. اما مقاعد المتفرجين كانت خاليه مجرده من المتفرجين .. الا مقعداً واحد .. كنت انا المتفرجه الوحيده في هذه المسرحيه ... وكانوا الابطال يمثلون دور الاقرباء للمتفرجه الوحيده .. ولكن عندما حان الوقت للإعلان عن انتهاء المسرحيه .. خرجت منها وانا متأثره جدا بالأحداث التي جرت بها .. >>

هني علقت على القلم ما عرفت شتقول .. كانت هذي الحقيقه المره .. طلعت رهين من المستشفى وطلبت تاكسي وراحت يم عمارتهم وحمدت ربها ان سويج سيارتها كان وياها بجنطتها نزلت من التاكسي وبطلت سيارتها و راحت تحجز لها تذكره لأقرب واول طياره على بريطانيا .. والحمدالله كان اليوم كل شي لصالحها لقت حجز حق اليوم الساعه 11 بليل ما همها الوقت كونها بنت وبتسافر بروحها وبهالوقت .. راحت السوق شرت لها جم بدله وجم بيجامه .. وطلعت وشافت ان مابقى معاها الا 20 دينار ,، يعني هذيل ما يكفون ولا يسوون شي كللش .. حست نفسها غبيه لما عاندت وراحت شرت لها وماخذت اغراضها من البيت " يوو الحين شسوي " ... توكلت على الله وراحت البيت بس طبعا ما صعدت قعدت بالسياره برا و وقفت بعيد عشان ماتبي احد يمر ويشوفها .. ودزت مسج حق بدر

(( بدر لو سمحت ممكن تسرع شوي ابي اللي وصيتك عليهم امس ))

رد عليها ..

(( انا بالطريج الحين واصل عند عمي واخذهم ))

شوي والا رهين تشوف سيارة بدر يايه ونزل منها واستغرب ان ما لقى لا رهين ولا سيارتها موجوده .. صعد الشقه وكلم عمه طارق ودخل طارق وحط اوراقها وكل شي بظرف وطلع من بوكه فلوس ودخلهم داخل الظرف وصك عليهم وماقال حق بدر عشان مايقول حق رهين ورهين ترد الفلوس وما تاخذهم .. نزل بدر ولقى رهين واقفه تحت

بدر مد ايده بيسلم عليها : هلا والله
رهين بدون لاتمد ايدها و ولاشي : هلا .. ممكن اغراضي
بدر : رهين شفيج ؟ .. ترى اذا اهما مو اهلج انا اهلج انا اخوج لا تنسين
رهين بقلبها " بالرضاعه وانت مطلعها من جبدي " : هه لحد يسمعك يصدق بس ... ابي اغراضي ماني فاضيه
بدر عطاها الظرف : هذي اوراقج .. رهين ،، اخر كلمه اقولج اياها ..عمري ماراح انساج ولا راح انسى ان في يوم من الايام كنتي اختي او حتى وحده من اهلي حتى لو تمر سنين عمري كلها وبدون لا اشوفج ،، الله ويااج ( وراح )
رهين توها بتنزل دمعتها " مالج شغل فيهم كلهم جذابين هذا كله تمثيل "

وراحت سيارتها


الــــــــــــســــــــعـ ــــــوديـــــــه ...

حصه قاعد تسوي كيكه وقاعد تجيك عليها بالفرن .. ونوره وغلا قاعدين بالطاوله اللي بالمطبخ ويسولفون

غلا : اي والله حتى انا ما كنت مصدقه .. بس يا حرام راح عليها الرجال
حصه لفت عليهم : عاد تصدقين غلا .. لو ترجع فيني الايام واصادف زي الموقف اللي كنتوا تاخذون رايي فيه ،، برفض ولاني افكر اني أوافق لحظه وحده حتى
نوره : لييه !! غبيه لو انا منك كان وافقت وانا مغمضه .. وش لي بهالعيشه اللي كنها سجن
حصه : وامي ؟
نوره : امي !!؟ .. وش فيها امي ؟ .. كلنا وياها انا وغلا
غلا قاعد تشمشم حست بريحه : اففف وش هالريحه
حصه صرخت : اووه الكيكه نسيتها

بطلت الفرن ولا الكيكه محترقه وصايره سووده

نوره وغلا : ههههههههههههههههه
حصه : اسكتوا انتم !! زين كذا ؟ .. شغلتوني وياكم وحرقتولي كيكتي
غلا : هههههههههه يالله ماعليه Game Over



:: المطار ::

مرت الساعات والدقايق مثل القرن على رهين كانت تنطر متى تهاجر وترتاح ..


>> النداء الاخير للطياره ..

قامت رهين ومعاها جنطتها لفت على المطار والناس اللي فيه وبقلبها " آآخ يالكويت لو مو كل هاللي صار.. جان انا بعدي متدفيه بحضنج وحاسه بالأمان اللي بفقده من بعد ما اطلع منج .. خايفه اروح واكون ناسيه الروح والقلب عندج .. خايفه اروح و ألووم نفسي الف مره ليش اني فارقتج !.. يارب احفظ هالديره وقدرني اني ارجع لها ياارب "
طلعت رهين وركبت الطياره مع المغادرين .




هجرت البعض طوعاً لأني رأيتَ ،ٍ]
.. قلوبهِم تهوىّ فرآقي !
نعم آشتآق ، لآكن وضعت :
..[ كرآمتيَ فوق آشتيآقيَ -
و أرغبَ وصلهم دوماً ولآكنَ ؟
.. طريق آلمذلَه " لآ تهوآه " سآقيُ ‘!





:: بيت نهى ::

نهى حطت ايدها على راسها : وي وي وي يااا كبرها عند الله 1000 ديناار .. 1000 دينار يالظالم لييييش ..لاهي بنتك ولا شي تحط بيدها كل هذا ليييش !!!!
طارق : مهما يكون كانت تحت مسؤوليتي
نهى : وشكووو تعطييها شكو !
سبيجه : صج خالي شلون تعطي بنت الشوارع هالمبلغ كانت بنتك بس الحين خلاص .. ومالها حق بولا فلس من اللي خذته
سعود : اسمحلي طارق .. انت مثل ماقلت كانت تحت مسؤوليتك .. بس الله يهداك هالمبلغ مو شويه ينعطى حق وحده بهالسن اذا بنتك صج ، قلنا يمكن بتسافر او شي ولك حق انك تأمن لها المصرف .. بس اسمحلي هذي اصلا ما يندرا من وين يايه ومن وين طالعه !!


توقعااااااتكم
و
تعليقاااااااااااااتكم