[لامارا]

الجزء الرابع عشر

في بيت الشيخ ابراهيم


كانت جالسه في الصاله اللي تحت
ومره مبين عليها انها متضايقه دخل عليها ثامر وصار يقلب في قنوات التلفزيون وحط على العربيه
ثامر متحمس ويحاكي حاله: تؤ تؤ تؤ السوق نازل اليوم!
وبعد عده ثواني
ثامر وعيونه لا زالت متعلقه بالتلفزين : الله يقطع بليسه
وبعد عده ثواني ثامر : تؤ تؤ تؤ تؤ لاحول
شروق خلاص ما عاد صارت تطيق اي شي
شروق بصوت عالي شوي : يووووووووه
ثامر: شروق السوق نازل الله يستر بس
شروق خلاص متنكده: يوووووه ثامر وانا وش دخلني بالسوق خله يطيح ايش دخلني
ثامر لف عليها : وش فيك تنافخين!
شروق بقرف : تؤ ثامر مو رايقه لك
ثامر شاف وجهها اللي مره متعكر: خير شوشو عسى ما شر ؟!
شوشو خلاص وكأنها بتبكي !!: نوف !!
ثامر : وش فيها
شوشو: ما ادري وش فيها من 5 أيام ما أدري عنها
ثامر: طيب كلميها
شوشو: أكلمها بس جوالها مقفول وادق على بيتها يصرفني سنترالهم!
ثامر جا بيقوم من مكانه: أوكي شوشو انا أستأذن بروح
شوشو من غير نفس: مع السلامه
ثامر طالعها باستغراب !!
دخل عليها تركي في الوقت الي طلع ثامر
تركي برحابه صدر: وش فيه الحلو زعلان؟!
شروق تمسح دمعه خانتها: تركي ماني رايقه لك
تركي طالعا باستغراب " وش اللي مزعلها ": وش فيكي يا قلبي تبكين!
شوشو: تركي روح عني ما ابكي!
تركي: ثامر زعلك؟!
شوشو: لا مو ثامر
تركي بخفه دمه وحنانه: اجل مين ...قوليلي وانا اروح اطقه اعطيه بوكس
شوشو ابتسمت : تركي
تركي وهو يشوف اخته ابتسمت : ايوا كذا اضحكي وسعي صدرك الدنيا ما تسواش
شوشو خلاص ما عادت تقدر تتحمل : تركي نوف !!
تركي عبس وجهه: نوف!! وش فيها؟
شوشو: ما ادري صارلها 5 أيام ما ترد علي
تركي: طيب يمكنها مشغوله
شوشو قامت من مكانها تبي تدور لها مبرر ليش نوف ما تكلمها : لا لا هذي مو من عادتها
تركي : شوشو الله يرحم والديك هدي ما فيها الا كل الخير
شوشو شكلها كان مره متوتره:تركي انا خايفه صار لها شي
تركي مره خاف: وش بيصير لها يعني يا شوشو !! كل هذا عشانها ما ردت
شوشو : انت ما تدري نوف !! كل يوم تدق علي وهالمره 5 أيام لا لا مو معقول أكيد صاير شي
تركي:طيب روحيلها...تبيني اوصلك
شوشو من غير تفكير : يالله ..بجيب عبايتي


.................................................. .................................................. .

في بيت نوف

كانت نايمه في غرفتها من بعد ما بكت
ام نايف تتصل على غرفتها من المكالمه الداخليه

ام نايف: نوف
نوف قايمه بس ما ردت
ام نايف: نوف ادري انك صاحيه ...ترى شروق هنا
نوف"ايش جابك يا شوشو!!"
ام نايف: افتحي لها الباب
قامت نوف وراحت للحمام(الله يكرمكم ) وبعد ما غسلت وجهها
فتحت باب غرفتها ولقت شروق قدام الباب على طول
شروق وخلاص متضايقه على حال صاحبتها: وش فيكي يا نوف!
نوف ما قدرت تتكلم على طول رميت نفسها على صدر شروق وصارت تبكي
حضنتها بحنيه ما تعودت أبدا انها تشوف نوف بهالضعف ...ما عمرها شافتها بهالحاله!
شروق وهي تمسح على شعرها : نوف وش فيك قوليلي!!
نوف: مافيني شي بس شويه ارهاق
شروق بحيره: وش صار بينك وبين امك؟
نوف: وانتي ايش عرفك!! هي قالت لك
شروق مره متضايقه: ايوا سالتها وش فيك قافله على روحك؟ و قالتلي انكم اليوم...نوفا انتي مزعله امك!
نوف: شوشو بليز لا تكلميني عنها
شروق : يا نوف كلميني ترى وربي مو زين اللي تسوينه في روحك!
نوف: اصلا انا ما زعلت عشانها ولا بكيت عشانها ...مين هي عشان ابكي لها !!
شروق خلاص بتبكي الحين "تحسب انو اللي مضيق صدر نوف هي امها": لا لا يا نوف عيب اللي تقولينه هذي امك
نوف بهجوميه وصوتها راح فيها من البكي: وش عرفك انتي!! هذي مو امي
شروق بهدوء: هدي هدي
نوف وهي تطالع بعيون شروق" مسكينه انا يا شوشو تحسبين اللي مضيق صدري امي ..!! تحسبين هذا اللي حابسني !! انتي من حطيتي فكره انو جيجي بتردك وانا خايفه انك ترديني بيوم!! اصلا ليش ترديني !! يعني اخوك اللي يدري عني!! والله ما درى عن هوا داري !! ابعدي عني يا شوشو ابعدي ...وابعدي اخوك وطلعيه من حياتي ....آآآه بس وشلون وانا اللي اتنفس هواه!!
بس لازم احارب عشان اوصل لقلبه لازم ...وراح أكسر كل شي بطريقي حتى لو كان انتي يا شوشو صدقيني!!"

شروق متقطع قلبها على نوف :طيب حبيبتي لازم تتأسفين لأمك مهما كان مالها الا انتي
نوف بهدوء: شوشو ابي اجلس لحالي ممكن!
شروق "وش فيك يانوف كذا تعامليني "
نوف بصوت اعلى شوي :ممكن!!
شروق انشل تفكيرها ما حست بنفسها الا وهي قايمه وتسكر الباب

شروق" وش سويت لك انا نوف ليش تعامليني كذا ...هذا جزاي اللي أسأل عنك ...وش فيك تغيرتي مين اللي غيرك علي؟!"


اتصلت على سواقها عشان يجي ياخذها وهي في السياره دقت على جمانه ولقت معها waiting
جيجي: الو
شوشو وهي تبكي : الو
جيجي ارتاعت عليها: ايش فيكي؟
شوشو: مين تكلمين ؟
جيجي: شوشو اكلم فيصل ...ايش فيكي ؟!
شوشو وهي تبتسم من بين دموعها : وانتو ما تملون من بعض
جيجي: شروق قولي وش فيك؟
شوشو: رحت لنوف
جيجي: ايوا فيها شي؟!
شوشو: لا ما فيها شي
جيجي خلاص ارتاعت بالمره : طيب وش فيك تبكين!!
وقالت شوشو لجيجي كل شي صار لها هناك
جيجي: طيب يمكنها منهاره نفسيا من امها....مو تقولين مخانقه كبيره!!
شوشو: يا جيجي لو تشوفينها وهي تكلمني !! كأني انسانه غريبه عليها ما كأني صاحبتها!
جيجي تهدي الأمور: خلاص شوشو انتي ما سويتي شي اهم شي سويتي اللي عليكي واكتر
شوشو: جمانه انا خايفه
جمانه: من ايش ؟!
شروق: اخاف ..اخاف صاير لها شي؟
جمانه اتنرفزت من تفكير شروق : مو انتي اللي تقولين لي هداك اليوم هي ليش تعاملنا كدا وين راح كلامك!!
شروق جت بتتكلم بس قاطعتها جيجي
جمانه: شوشو هي الغلطانه مو انا ولا انتي ...انتي مستوعبه صار لنا 5 أيام ما سمعنا صوتها ...انتي مستوعبه كم مره انا ادق عليها في اليوم!! والله طاح وجهي عند سنترالهم طفشته...انغسل وجهي!!
شروق: ادري يا جيجي
جيجي: لا ما تدرين ...هي بكيفها اذا هي استمرت على كدا
قاطعتها شوشو : لا لا تقولين كذا ياجيجي الله لا يفرقنا


.................................................. ................................................

وبعد 3 أيام
اليوم ال dj حق نوف كانت بالمره فرحانه سبحان الله جتها طاقة غريبه من بعد الأحداث اللي صارت !!
قررت تكون الأنسانه القويه وقررت انها تكون مثال لكل انثى ولكل بنت ...تبي كل البنات يتمنون عيشتها هذا مبتغاها من اليوم
تبي تبرز جمالها وجاذبيتها وقوتها وسلطتها تبي الكل يعرف هي بنت مين ...وايش تركلها ابوها من الميراث !! تبي توري الكل حجم وجمال وروعه وفخامه القصر اللي هي عايشه فيه
كان بيتها مليان بالعمال والرجال اللي ينظمون وينسقون ال dj وكان الديكور بقمه الروعه والفخامه والبوفيه من أحلى وأشهى الاطباق


نوف وهي في غرفة الملابس تنتظر الكوفيره تجيها
كانت جالسه تعمل بداكير ومانكير ..
اللبناينه: يخزي العين شو حلوه
نوف والابتسامه شاقه وجهها: كلك ذوق
اللبنانيه: آنسه نوف بتسمحليلي أسألك سؤال؟!
نوف: أسألي
اللبنانيه: وحده متلك وبجمالك (وتلف بعيونها على الغرفه ) وبهالعيشه مشالله ؟!
نوف الابتسامه شاقه حلقها: ايوا ايش سؤالك!!
اللبنانيه: في شي بينقصك؟
نوف مره استغربت من هالسؤال عمرها ما فكرت فيه "ينقصني!! لا انا ما ينقصني شي !! "
اللبنانيه: ما تؤلي انو الخطاطيب مش عند الباب لانو يا بختو اللي بدو ياخديك!!
نوف سالت نفسها لأول مره"خطاطيب!! انا ما عمري احد خطبني!! ...ليش؟! كل اللي يبوني يجوني من طريق ثاني!"
اللبنانيه: وين سرحتي!
نوف: ابد ولا مكان
اللبنانيه ماخذه وجه بزياده لوول: عند حبيب الألب!!
نوف "خير وش تبي هذي ؟" : لو سمحتي كملي شغلك والا اطلعي
اللبنايه سكتت وكملت شغلها


.................................................. .........................................
في مكان ثاني وفي نفس الحي اللي في بيت نوف

في بيت عبد العزيز بن فيصل

كانت توها طالعه من الشاور
رن جوالها وابستمت غاده وكلها حيويه
غاده: اهلــــين يا حلوه
مها: هلا بالقمر نفسه
غاده: هههههه تصدقين ...انتي خطيره بالمغازل دايم تغلبيني !
مها: احم احم شفتي وشلون!
غاده: اي شفت يالدوبا وحشتيني
مها: انتي اكثر والله
غاده: ها كيفها دبي؟ انبسطتو
مها: مرره انبسطت والله ما نقصني الا انتي
غادة: من جد مره كان ودي اجي .. بس ماما عيت لانو بابا كان عنده شغل
مها: عادي ما تدرين يمكن خيره
غاده:ها تجيني اليوم!
مها شهقت : تستهبلين! اليوم ال dj!!!
غاده اختفى حماسها : يعني ماراح تجيني!؟
مها: ليش انتي ماراح تجين الدي جي؟!
غادة" وهي تتذكر نوف": لا ما اتوقع
مها: غدو لا تقولين انك زعلانه للحين
غاده تبتسم :وربي ما زعلت بس مااشتهيت
مها: طيب غدو عشاني الله يخليك
غادة " وش اقولك يا مها والله اني مارتحت لنوف!!"
مها: بليز لا ترديني
غاده: مها بليز ما اقدر لا تضغطين لاني ما راح اجي
مها عصبت: غديوووه يالدبا مو على كيفك بتجين يعني بتجين واصلا ما شاورتك
غاده تسكر اذنها: آآآه يالكلبه اذني !!
مها: مفهوم والا اصارخ زياده
غاده: قلتلك ماني جايه
مها: والله بتجين واعلى ما في خيلك اركبيه
غاده:لا حول
مها : يالله البسي وتعدلي الساعه 9 بمرك واذا ما لبستي بجرك من شوشتك ما علي منك باي
غاده : مها
وانقطع الخط
غاده: اف منك صدق علّه ...وانا وش يوديني عند نوف!!
راحت واستأذنت من امها تروح ووافقت لها





.................................................. .................................................. ...


الساعه 7 ونص وفي في بيت الشيخ ابراهيم بالتحديد

كانت متجهزه على الآخر طالعه قمر مشالله! طالعت نفسها بالمرايه للمره الألف
شروق وهي تطالع نفسها بالمرايه "حلو والا لا ؟! "
جا من وراها تركي
تركي مطير عيونه : الله شروق !! طالعه قمر اليوم!!
لفت وجهها له : صدق تركي لا تجامل
تركي مبهور بجمال اخته : اجامل؟! والله ما اعرف اجامل انا ...اذا شينه بقولها لك بالوجه!
شوشو: طيب البس كعب ...؟! والا تحس اصير طويله مره!؟
تركي : اممممم البسي وريني !!
لبست الكعب ووقفت
تركي : لا حلو طولك كذا كأنك موديل!!
تركي من دون مقدمات يسوي روحه يتفل عليها : توووف الله يحفظك تووف بسم الله عليك
شوشو: ههههههه تركي لا تفل علي!
تركي: وربي ملاكّ!!
شوشو استحت وباسته على خده: الله يخليك يا أحلى أخو
تركي استحى : هههههه ترى ما اعرف وش اقول
نزلت تحت وقابلت امها
ام ثامر وبأحلى ابتسامه: قمر بسم الله عليك
شوشو: صدق ماما يعني طالعه حلوه!!
ام ثامر: اقولك قمر ...وهو في احد احلى من القمر؟
راحت وباست امها
ام ثامر: يا جعلي أشوفك عروس
شوشو: ههههه توه بدري تبين تفتكين مني!
ام ثامر: لا بدري ولا شي
شوشو تطالع ثامر اللي جالس يقرا في الجرايد وبابتسامه: اذا زوجتو الكبير تعالو كلموني
لف عليها ثامر: هههه واذا بتنتظريني ترى بتعنسين
ام ثامر: فال الله ولا فالك!! انشالله كلكم في ليله وحده
تركي: هههههههههه وانا يمه وين رحت
ام ثامر: ههههه اذا تزوج ثامر يجي دورك
تركي: طيب يمه راعو مشاعري..واذا الأخ قرر العزوبيه لمدى الحياه!!!
ام ثامر: ههههههههه اجل انسى الزواج
تركى ارتاع مره "امي تستهبل أكيد": يمه من جدك؟
ثامر وشروق ضحكو عليه : ههههههههههههههه
وفي هالوقت دقت جيجي على شروق
شروق: heeey
جيجي: هلا وينك؟
شروق وهي تلبس عبايتها : الحين الحين بطلع
جيجي: طيب بسرعه تعالي والا بروح وأخليك
شروق : يالله يالله انا جايه
وسكرت الخط
شروق: تريزا تريزا
تريزا: yes yes im comming
وطلعوا وتوجهت لبيت جمانه

وفي بيت جمانه
..............................
كانت شروق توها واصله وهي في السياره دقت علي جيجي
شروق: جيجي وينك انا بره؟!
جيجي: يووووه طيب ادخلي لسى ما خلصت
شروق: نعم نعم...طيب ليش معجلتني وفي النهايه ما خلصتي
جيجي: ههههه عادي عشان ما تأخريني
شوشو: يعني انتي تأخريني عادي!
جيجي: شروق يالله ادخلي ماني فاضيه لك
شروق: ترى بروح لبيت نوف
جيجي: شروق بليز تعالي ادخلي شوفي شكلي
نزلت شروق من السياره :اوكي باي

شروق وهي تقلد صوت جيجي: يالله يا شوشو تعالي الحين وما ادري ايش أخرتنينا!! ههههه الله يقطع سوالفك يا جيجي
دخلت من باب الفله ورقيت الدرج
شافت أحد جالس بالصاله اللي فوق عرفت انو مصعب كان لابس بوكسرز
شوشو "يالله يجنن حتى وهو لابس البوكسر "
كان ابدا مو منتبه لها جالس ياكل مكسرات
شوشو "ادخل والا لا ؟! بس والله مستحيه!! اخليه يشوفني وانا متزينه والا لا!! يالله لو انه ما قالي أحبك كان عادي بس الحين أستحي ...يالله والله مشكله الحين وشلون ادخل غرفه جيجي لازم امر من عنده "
طالعت نفسها بالمرايه اللي قدامها كانت بمنتى الروعه و الخيال
خلت عبايتها المخصره والمزينه عليها بس مفتوحه
طالعت نفسها بالمرايه "اي كذا حلو !!"
وقبل ما تدخل وبصوت واطي غمضت عيونها وقالت : بسم الله
مصعب اول ما شافها فرك عيونه !!" هذي شروق؟! والا ملاك"
قام من على الكنبه طبعا وهو لابس البوكسرز لووول كان شكله يخقق
شروق مره مستحيه ما تبي تطالعه وهو لابس كذا "ياربي عليك تخقق "
شروق مدت يدها تسلم: كيفك؟
مصعب مسك يدها الناعمه وما تركها: الحمدلله بخير
مصعب خلاص خــــــــــــــاق على الآخر هذي وهي ما فصخت العبايه!!
شروق مستحيه مره" ياربي وشفيه ما يترك يدي "
مصعب برومانسيه وقلبه يدق بقوه : شوشو ...طالعه قمر اليوم
شروق خلاص مستحيه حمر وجهها مره وقلبها صار يدق بقوه
مصعب حط يدها على صدره: تحسين بدقات قلبي
شروق ميته من الحيا :ايوا
مصعب: تدرين ان كل دقه تدق بأسمك!!
شروق: خلاص بتموت حاولت تسحب يدها من يده لكنه كان أقوى منها
مصعب مسكين شوي ويصيح :اقعدي هنا اليوم لا تروحين للدي جي!
شروق خلاص ما قدرت تمسك ضحكتها: هههههه
مصعب: يا حلو هالضحكه ياناس
شروق بدلع من غير ما تحس: مصعب فك يدي
مصعب " يا حلو اسمي على لسانك ": no
شروق بدلع: مصعب
مصعب خلاص راح فيها :لبي عيونه وقلبه وكله
شروق بيغمى عليها : بليز بروح لجيجي
فك يدها وبهمس : أحبك
شروق خلاص خقت وهي تحرك شفايفها وبصوت مره واطي: وانا اموت عليك
مصعب وهو يحرك شفايفه وبنفس الصوت: لا انا
شوشو: خلاص انا بروح
مصعب يطالعها برومانسيه: أحبك
شوشو:مصعب
مصعب خاق خلاص : هـــا
شوشو بكل حب : أحبك
وراحت وخلته دخلت غرفه جيجي وهي بقمة الوناسه
"آآآآآآآآآآآآآآآآآآآآآه ما الومك يا جيجي لو تكلمين فيصل كل يوم وكل دقيقة وكل ثانيه!!! آآآه على الحب "
جيجي: وش فيك يا اختي سرحانه؟
شوشو ما كانت منتبه لجيجي
جيجي: يا هوووو!!
شوشو: ها هلا
جيجي تدور على نفسها: ايش رايك بلبسي؟!
شوشو وتوها تنتبه : واااااو جيجي شكلك يجنن
جيجي :احم احم والله!!
شوشو : واو الأحمر عليكي جنان
جيجي : طيب وريني لبسك!
فسخت شوشو العبايه
جيجي: يــــــــاي طالعه قمر

طلعو من البيت وتجهوا لبيت نوف

كان البيت مليان عمال طبعا جيجي فسخت العبايه لأنه عندها عادي وايزي الوضع بس شروق ما فسختها ورقيو فوق عند نوف
دخلو عليها وكانت المزينه تزين لها الميك أب حقها
نوف :انتو هنا
جيجي بحماس: وحشتيني يا بنت
نوف: وانتي بعد مره وحشتيني ..اعذروني ما اقدر اقوم أسلم
المزينه: هيدي انا خلصت بس باأي البلش
وحطتلها البلش
قامت نوف من على الكرسي وحضنت جيجي بقوه
نوف: وحشتيني والله
جيجي: ليش ما تردي علينا!! يعني بعتينا حنا بعد
نوف: ما عاش من يبيع حبايب قلبي
شروق وهي تطالع نوف تكلم جيجي ولا عبرتها حتى " وش فيك يا نوف ايش عملت لك ؟؟"
ولفت نوف لشروق :اهلين شوشو
وسلمت عليها وباستها عادي ...لكنها ما حضنتها مثل ما حضنت جيجي
شروق" اوكي يا نوف اذا بتلعبين على الحبلين انا اوريك اللعب على اصوله ...انا اللي جيتك وانتي اللي بعتيني "
اما جيجي ما لاحضت شي
كانت نوف بس تشاور جيجي على الترتيبات وتلف وتوريها مكان الدي جي والانارات والبوفيه ...اما شروق !! فنوف ما عبرتها بالمره
ما حبت شروق انها ترمي نفسها على نوف مهما كان لها عزه نفس وكرامه ..."انا صاحبتها ليش معاملتها لجيجي ما تغيرت وبس معاي اللي تغيرت مع انها في الفتره الأخيره كانت أقرب لي من جيجي...أموت وأعرف وش اللي غيرك يا نوف؟!"


وعلى الساعه 10 جو المعزومات وبالمره كان زحمه وكل ساعه يغنون والبنات يرقصون وفالينها على الأخر

كانت نوف تدور على المعازيم وترقص وتضحك كانت شكلها مره ملفت للانتباه كان مبين عليها الغرور وشوفه الحال ومثل ما تمنت
الكل كان يحسدها على العيشه اللي هي عايشتها
منال وهي تدور وتلف بعيونها على القصر : الله يجنن بيتها
رغد: صدق ناس عايشه !!
منال: ما كنت ابدا متوقعه انو في بيوت كذا في الرياض!!
رغد والغيره قاتلتها: يا بختها يا منال شوفي كيف الفرحه سايعتها ..والله ما الومها
منال:جمال وفلوس وعز !!يا بختك يا نوف
رغد تدور حاولين نفسها : الله لو انا الي اعيش في هالقصر !! كان كان ما ادري ايش سويت!
منال:روعه فخامه واناقه ....يالله ليت عندها اخو و يخطبني
رغد: شوفي شوفي شروق ..صاحبتها !! تجنن مشاالله
منال: هذي اخت ثامر
رغد: اي ...تصدقين مره تشبه له
منال : وانتي مخططه عليه
رغد: منال لو يجيني ...كان طلعت من الفقر والعيشه الزفت اللي انا عايشتها



.................................................. ............................

وعند شروق كانت جالسه تشرب بيبسي عند البوفيه ومعاها جيجي
شروق: جيجي جيجي
جيجي اللي كانت تاكل تشيبس من البوفيه: هلا
شروق: مو هذي غادة ومها؟
جيجي لفت تدورهم: وينهم
شروق تأشر عليهم: هناك
جيجي: ايوا
شروق ما تدري ليش فرحانه: امشي نروح لهم

شروق وهي تمشي باتجاهم : اهلـــــــــين نورتوا والله
غاده بابتسامه :اهلين كيفك؟
وسلمو على بعض
شروق: كيفك مها؟
مها : كويسه الحمدلله
وجت جيجي تسلم عليهم
وقضوا أغلب الوقت مع بعض خصوصا غاده شروق كانت سوالفهم ما تخلص وكل ساعه يضحكون ويعلقون على البنات

اما نوف كانت تطالع شروق وهي تضحك ...بس يا ترى مع مين تضحك!! كانت غاده مو مره مبينه لانها كانت جالسه ورا البنات
وأول ما شافتها نوف " وش جابها هذي هنا ؟"

شروق عجبتها دقت الاغنيه : غاده قومي ارقصي
غاده: ههههه ما اعرف
مها: يالنصابه تعرفين
غاده: ما اعرف
شروق: هههههه يالله قومي عادي وسعي صدرك
قامت غاده مع شروق وصاروا يرقصون
كان رقص غاده مره خطير يجنن لدرجه انو كل البنات وقفوا رقص وصارو يطالعونها وكل الأنظار توجهت لها حتى شروق وقفت رقص وصارت تطالعها

شروق وهي تكلم مها: هذي اللي ما تعرف
مها وهي تصفق: ههههههه شفتي وشلون اقولك
وصارا كل البنات يصفقون و يصفرون لغادة
نوف مره ولعت " ابي اعرف ايش تحسب نفسها..من زين رقصها يعني ّّ؟!.. لكن هيّن ان ما فشلتك قدام اللي يسوى واللي ما يسوى ؟ "

اتجهت لها وكان معاها كاس عصير ...صدمت فيها ورمت العصير عليها

غاده وقفت مصدومه
نوف قامت وطالعتها باحتقار : ما تكملين ..يا يالرقاصه!!