[فيتامين سي]

أموت أنا في حبهم 4

في بيت خليفه
ميثا وهي أترحب بأول الواصلين ... أمها عوشه وخواتها الثلاث مهره 24 سنه، شهد 20 سنه وميره 15 سنه وآخر العنقود.. ميثا ربت في بيت يدها لأنه أمها مطلقه
ما عندها أخوان شباب نتيجه للدلع الزايد اللي لاقته من يدها صارت انسانه متكبره واتشوف الناس بطرف عينها ..
عوشه : كانت عندها مشاكل صحيه كانت السبب في تباعد فترات الحمل عندها بشكل كبير ...

ميثا: ما بغيتوا توصلون من متى طالعين ؟؟؟
عوشه: هذا محي الدين حسبي الله على إبليسه ودانا بيت خليفه بن ضاعن غبي لا بارك الله فيه
ميثا : مودنكم بيت بن ضاعن ليش ؟؟؟
مهره : لأن أمايه قالت له ودنا بيت خليفه ما حددت اي خليفه منهم
ميثا وهي معصبه : أمي الله يهداج جي اتقولين له بيت خليفه نسيتي انه هالبيت مكتوب باسمي يعني بيتي
عوشه: يالله بالستر شو هالرمسه الحين تبيني اودر الريال وأقوله بيت ميثا صدق ما اتخيلين
ميثا وهي اتناولها فنيال القهوه : مافيها شي
مهره وشهد : ههههه محد يعرفلج يا ميثا غير أميه
عنود وعهود : السلام عليكم ... سلمن على يدتهن وخالاتهن وعلى طول خذن ميره وسارو غرفتهم

بعدها بعشر دقايق وصلت عايله بوسلطان واللي تتكون من أم سلطان , سيف وسعيد بما أنهم أهل ومافي حد غريب دخلوا الشباب يسلمون على
طليقة عمهم عوشه ...
نوره (أم سلطان) : السلام عليكم ورحمه الله وبركاته
نشوا البنات وتوايهو ويا حرمة عمهم وعوشه سلمت على أم سلطان وآخر وحده كانت ميثا مدت ايدها وتوايهت ويا عمتها وهي حايسه بوزها
ميثا: اشحالج عموه عساج بخير وعافيه
أم سلطان: بخير الله يسلمج ياأم سالم
ميثا : أففف يعني كم مره أقول اسمي ميثا بعدني شباب الي يسمع ام سالم يتحراني وحده صاكه الخمسين
سيف: محشومه أخت ميثا أقصد آنسه ميثا
ميثا: مابرد عليك اتعرف ليش
سيف : أكيد لأنج ما تقدرين عليه
ميثا: غلطان أخ سيف بس ما أحط عقلي بعقل ياهل
سيف وهو متغايض : أصلا إنتي
أم سلطان وهي معصبه : سيف ... سلم على خالتك عوشه وسر الميلس عند أخوك
سيف : ان شاء الله وتجدم باس راس عوشه وسلم عليها ... اشحالج خالتيه
عوشه : حبتك العافيه يا بويه .. بخير وسهاله ومن صوبك
سيف وهو يخز البنات بعينه : بخير دامكم بخير.... ماشاء الله منو هالعرايس اللي وياج خالوه
عوشه : ودي شهد , مهره سلمن على ولد عمكن سيف
مهره + شهد : هلا سيف اشحالك
ميثا (بهمس): هن بعاد وهو ما كلنهم بعيونه لو يقربن شو بيسوي
سيف من الغيض : الله ومن زينهن عاد ترا خواتج ما بيطلعن غير عنج وأنا إن شفت ترا أشوف الله كيف بالي العالم بهالأشكال
أم سلطان: سعيد خذ أخوك برع عن الفضايح
عوشه: ماشاء الله هذا سعيد كبرت يا بويه وتكبرت علينا حتى السلام ما اتعقه علينا
سعيد: تجدم منها وباسها على راسها ... أفا خالتيه ليش هالرمسه كلها أنا بس كنت أتريا دوري
مهره بصوت واطي : يا خجول أنته حليله مسالم هب شرات الملبق اللي طلع
شهد: أششش مهروه صوتج عالي سمعج
سعيد لف عليهن وهو يبتسم : اشحالكن بنيات شو أخبار الدراسه وياكن
مهره : أي دراسه نحن لاحقين انسوي شي ... بخير الغالي اشحالك انت ... وفهاللحظه تقرصها شهد على ايدها عشان اتنبها علي الي تقوله ... فصرخت والكل تلفت يتطالعها
سعيد وهو كلمه الغالي ما راحت عن باله: ... خير الشيخه في شي ؟؟؟
ميثا : الظاهر عيبتك السوالف ويا البنات
سعيد بإشمئزاز : لا الشيخه السموحه منكم ...
وهو طالع سمع حد يناديه: بوعسكور ... خذني وياك
سعيد اول ما التفت شاف سالم نازل من الطابق الثاني :يالهرم الحين أنا صرت بوعسكور حاف؟؟؟!!!!
سالم تجدم وعلى طول عند يدته ام سلطان باس راسها وتم لاوي عليها كأنه يبا يعوض عن فترة غيابها
أم سلطان: فديت روحك حبتك العافيه يا بويه اشحالك شو اخبارك والدراسه طمني عليك .. يالقاطع
سالم و هو بعده لاوي عليها : فديت روحج يدوه والله الحياه ما تسوى من دون شوفج ... أنا بخير وعافيه بشوفتج والدراسه الحمدلله تمام ماشي حالها وما قطعت عنكم ولا شي انتي الله يهداج الا سايره اتزورين فلانه والا علانه ونحنا مب متفيجه لنا
أم سلطان : أفا ما هقيتها منك الغالي يابويه أنتو أخف تقدرون اتمروني متى ما بغيتو بس سولي تلفون قبل عشان حتى لو كنت برع ارجع لكم
سالم: أفا عليج امره لا اتحاتين ان شا ءالله نهاية الأسبوع هاي بتم عندج يومين بخليج اتملين مني
أم سلطان : عساني ما انحرم منك يا بويه البيت بيتك واذا ما اتشيلك الأرض أشيلك بعيوني الثنتين
سعيد: أمايه عشو ناويه هالدب بيعميج ان شلتيه بعيونج
سالم وهو متجه لعمه وتخاشم وياه ولوى عليه بالقو ... أشوف بدينا أنغار يقولون أغلى من الولد ولد الولد
ميثا: والله يا أخ سالم أعتقد في ناس غير بعد المفروض اتسلم عليهم وبعدين عكيفك اتقرر اتروح اتم عند الناس وانا شو طوفه هبيطه ؟؟؟
عوشه وهي أبدا ما عايبتنها تصرفات بنتها : ميثا انتي شو ما اتحشمين حد عيب عليج وبعدين شو اتم عند ناس وما ادري شو هذا بيت يده هب بيت ناس غرب
سعيد وخلاص مب قادر يتحمل غلاسه ميثا : السموحه منج خالتي عوشه بترخص أنا
عوشه: فمان الله الغالي الله يحفظك
سالم: بوعسكور اصبر بخاويك والله يا أخت ميثا أنا بسير أتم بيت يدي وبرضا أبويه واللي عنده رمسه يناقشها ويا بوسالم
ميثا مصدومه من رد ولدها وحست أن الكل بيشمت فيها على اللي سواه ولدها وبغت تتدارك الموضوع واترد عليه بس كان سعيد اسرع سحبه من ايده وطلعوا برع
ولدها وما قدرت أتوقفه عند حده او أترد عليه مالقت غير أم سلطان أتصب جام غضبها عليها ...
ميثا بطنازه : عيل وين الشيخه وعد اشعنه ما شرفت وياكم ؟؟؟؟
أم سلطان : على وصول هي وريلها
ميثا: عنبو شو هاللقافه شو ماشايفه خير اربع وعشرين ساعه لازقه بريلها !!! كلنا تزوجنا بس محد سوا سواتها
مهره : الصراحه ميثا أنتي وايد حاطه عليها وهي ماشا ءالله عليها احسن منها ماشي ولا جد غلطت عليج بشي وبعدين مافيها شي اذا يت ويا ريلها
ميثا: مهره سكتي اخير لج
عوشه: الله يهديج يا بنيتي
أم سلطان : هي ودها أتي ويايه بس ريلها لزم عليها اتروح وياه وان شاء الله ما بيتأخرون

الساعه 2 كل الضيوف وصلوا ما عدا وعد وسلطان
أم سلطان بدت اتحاتيهم وطلبت من سعيد يتصل بأخوه يتطمن عليه ويشوفه وين ....

.....

بعيد عن زحام الناس في منطقه شبه نائيه مطله على شاطىء البحر يالسين شابكين أياديهم ويخططون لمستقبلهم ويرسمون الخطط
سلطان : وعودي
وعد: ياقلب وعود آمر حياتي
سلطان : أتحبيني ؟؟؟؟
وعد: سلطان هذا سؤال تسألنيه إياه !!! أنت بعدك ما أتعرف غلاتك وأنت شو بالنسبه لي !!؟؟؟
سلطان : حبيبي أعرف ومافيها شي لو سمعتها منج
وعد بخجل وويها محمر بهمس : أحبك
سلطان : شو ما سمعت شو قلتي حياتي
وعد : سلطان بلى إحراج انزين
سلطان: وعودي حبيبي انتي حرمتي ومافيها شي لو قلتي لي أحبك بصوت عالي شوفي أنا أحبج وبقولها جدام الكل
سلطان وهو يزااااااااااعج بأعلى صوته : ياناس ياعالم أحبهااااااااااااااااااااا ااااااااا والله أمووووووووووووووووت فيهاااااااا
أحبججججججججججج وعووووووووووووود
وعد وخلاص تتمنى الأرض تبلعها لأنه كل اللي كانوا حواليهم بدوا يتلفتون ويشوفون هالسلطان شو مشكلته
وعد وهي خلاص منحرجه لآخر درجه : سلطان والله عرفت انك اتحبني خلاص اسكت فضحتنا
سلطان وهو يشوف واحد يتطالع صوبه يكلمه: يالطيب فيها شي اذا قلت لحرمتي اني احبها ؟؟؟ فيها شي ؟؟؟؟
الشخص الثاني : لا الغالي خذ راحتك بس عيب عليك احرجتها جدام الناس
سلطان: والله أنا الغلطان اللي أسألك أصلا
الشخص الثاني : أنت مب جنك سلطان ال.... !!!!
سلطان : أشوه أنت منو هي نعم أنا سلطان (طبعا في هاللحظه سلطان كان بعيد اشوي عن وعد واقرب للريال)
فاضل : أفا ما عرفتني ما هقيتها منك يا سلطان
سلطان بعد ما دقق في الريال عدل تذكره وتجدم منه : خشمك بوحميد
فاضل : الحين بوحميد الله يسامحك وينك يا ريال ما لك شوف ؟؟؟
سلطان : الله يازمان من يتخيل أنه الدنيا هالصغر
فاضل: طمني عليك اشحالك و شو اخبار الأهل
سلطان : بخير وعافيه أنت شو أتسوي هني ؟؟؟؟ ليش ما اتصلت بي
فاضل: الله يا سلطان الحين أنا ضيف عندكم واتسمعني هالرمسه
سلطان: أفا بوحميد انا ما قصدت بس غريبه بعد سبع سنين اتطبها البلاد والا أنت كله مسافر والا في العين
فاضل : للظروره أحكام ... الا بتخبرك مزنه اشحالها شو أخبارها وعبادي شو مسوي شو اخباره فديت روحه ولهت عليه
سلطان حس برعشه خفيفه واتيبست اريوله مب قادر يمسك نفسه : اشششش فاضل الله يهداك ما اتشوف الحرمه وياي بتوديني فداهيه انت
فاضل وهو يتطالع صوب وعد : ماشاء الله هاي حرمتك .... أتعرف بوجود مزنه فحياتك والا
سلطان : لا ولا المفروض ما اتعرف
فاضل: بس يا سلطان هالشي مب فصالحك ... اتعرف من الحين احسن من انها تنصدم في المستقبل
سلطان: فاضل السالفه هاي يبالها يلسه محترمه والحين مب وقتها الرمسه كم ناوي اتم هالمره
فاضل : خلاص سلطان أنا بستقر في دبي للأبد وقريب بخطب
سلطان:ابركها من ساعه خلاص عيل هذا رقمي ******* وان شاء الله بينا اتصال بأقرب فرصه
فاضل : وداعة الله وسلم على الأهل (بصوت واطي) مزنه وولدها بعد
سلطان: الله يسلمك يبلغ ان شاء الله
وعلى وعد اللقاء تفارقوا الأثنين .....
فاضل يعتبر صديق سلطان المقرب جداً ... قبل سبع سنين كان مسافر ويا سلطان لبنان كشته (استجمام ) وهناك تعرف فاضل على رغد ونشأت بينهم قصه حب صادقه، حب يتوجها بالزواج الا أن أهله رفضوا هالشي وهددوه أنه لو خذها يتبرون منه وبما أنه فاضل كان غارق فحبها ما أهتم لكلام أهله ورد سافر وسلطان عشان يتم الزواج وبعد شهر العسل رجعوا الإمارات و أستقروا في العين فمنطقه قريبه من بيت أهل فاضل
أهل فاضل قاطعوه كلهم وحاربوه الا أخته مزنه الوحيده الي ما تخلت عن أخوها ووقفت معاه بالحلوه والمره .... وكانت أتزور بيت أخوها بالدس من دون لا حد يدري .... بعد ولادة زوجته كانوا طالعين يتمشون وصار لهم حادث أدى لوفاة رغد وحميد ولده الوحيد ... الشي اللي دمر نفسيه فاضل وخلاه يعاف الدنيا ومافيها ..
وعد: الحمدلله على السلامه هالشيخ سلطان أشوف عيبتك السوالف ويا الريال
سلطان: هي ياوعد هالريال لو أقولج منوه ما بتلوميني
وعد : ..... أمنوه ما عرفته
سلطان وهو يتنهد : هذا فاضل بن مطر
وعد بدهشه : فاضل ربيعك اللي من العين !!؟؟؟
سلطان : هو نفسه
وعد : بعد كل هالسنين .... شو اللي يابه دبي ؟؟؟
سلطان: خلاص يقول بيستقر إهنه
وعد بشهقه : سلطان شوف الساعه كم الحين
سلطان بلامبالاه يشوف ساعة ايده واللي تشير على الوحده وخمس وأربعين دقيقه ... خير حياتي شو يعني
وعد : يلا غناتي وايد تأخرنا على بيت خليفه
سلطان وهو حاس بثقل الدنيا ونظراته تايهه : وعد خلينا أشوي أحس بضيقه فصدري
وعد: اسم الله عليك حبيبي ما اتشوف شر ... تركته على راحته
سلطان حس بخوف كبير من الي كان يفكر به وعلى طول حط راسه عجتف وعد مستند عليها وماسك ايدها بكل قوته .... حاس بالألم يعصر قلبه مب عارف كيف يتصرف
وعد حاسه بالنار اللي داخل سلطان بس مب عارفه سببها من رد عن ربيعه وهي ملاحظه أنه مرتبك ومش على بعضه
وده يقول شي بس مب قادر .. تبغي أتساعده وأتخلصه من اللي فيه بس مب عارفه كيف ... فضلت أتم ساكته وأتخليه على راحته عشان يرتاح وبعدها يمكن يقول اللي فخاطره ....
سلطان ونظرته لبعييييييييييييد : وعد
وعد: عيون وعد شو فيك حياتي
سلطان : أوعديني ما تتركيني أبد
وعد : حياتي شو هالرمسه أكيد مستحيل أتركك أنت عارف هالشي
سلطان : حتى لو فيوم أكتشفتي شي ما يعجبج !!؟؟؟
وعد وفي داخلها ألف سؤال وسؤال بس الحين ما تبي أتضايق سلطان أكثر من الضيقه اللي فيه ...
وعد: مافي شي يفرق بينا غير مشيئه ربك
سلطان ما تطمن ... والجواب ما كان الرد الي يبغيه لسؤاله .... سلطان يعرف وعد زين يمكن الشهور الثمان اللي مرت عليهم فتره قصيره بس قدر سلطان يعرف أطباع وعد زين لأنها إنسانه شفافه وحنونه وقلبها طيب.. بس بنفس الوقت عنيده ومتملكه لأبعد الحدود وخصوصا به هو يعني مستحيل تتقبل فكره أنه حد يشاركها فيه ....
وعد : سلطان حبيبي شو فيك لا أتروعني عليك شي يعورك ؟؟؟ فاضل ذكرك بشي وضايقك؟؟؟ سلطان رد علي لاأتخليني بحيرتي
سلطان: سلامتج حبيبتي وسوري والله مب قصدي أضايقبج بس ما ادري حسيت بضيقه والحين خلاص أنا بخير فديت عيونج لا أتصيحين عشان
ما يسيح جحالج بعدين أخاف....
وعد : يالدب يالعبيط ما أحبك ويلا ودني بسرعه بيت أبوي
سلطان: والله تبين أتروحين بيت أبوج أحسن عشان ناخذ راحتنا دام أبوج محد
وعد: سلطان عن المصاخه قم يلا أنروح وايد تأخرنا
سلطان: حاضر يا سيدتي الجميله تفضلي
وعد: هه راييل آخر زمن ما إيون الا بالعين الحمرا
سلطان :نعم نعم شو قلتي يا حلوه ما سمعت
وعد وهي أتطلع لسانها اتعايره : من قال نعم سمع
وبسرعه تدخل السياره وتيلس مكانها بكل أدب
سلطان : دبدوبي شو قلتي عيدي الرمسه ما سمعتها
وعد : ما قلت شي سلطان والله وايد تأخرنا عيب صدق مب حلوه بتكون اذا دخلت متأخره
سلطان : أفا كله ولا زعل الغاليه أم الغالي وعد حياتي شوفي الحين الساعه 2 بالظبط صح
وعد : صح
سلطان : زين يا حلوه غمضي عينج وبطليها وبتلاقينا عند بيت خليفه بس لا اتزاعجين لأني بسرع
وعد: لا لا أرجوك سلطون حرام عليك خلاص علها اتصير الساعه ثلاث مب مشكله المهم ما تسرع
سلطان : فديت الخوافين ... يا ربي كم بعيش أنا ....
طول الدرب تموا يسولفون بكل شي وأي شي وكل واحد منهم يستهبل على الثاني

بيت خليفه
أم سلطان في الحوي : سعيد أبويه وينه أخوك وحرمته ما بينوا دقيتلهم تطمن عليهم ؟؟
سعيد : ما أدري يا أميه روحي متروع عليهم أشوفه سلطان ما يرد ووعد تلفونها مغلق
أم سلطان حطت إيدها عقلبها : يا حسرة قلبج يا نوره شو صار عليهم سعيد سرازقر أبوك
سعيد : هيدي ياأميه الله يهداج إصبري يمكن يايين في الدرب وتعطلوا بسبه الزحمه
أم سلطان : وين يابويه وأبوك قايل هم متحركين قبلهم
سعيد هني صدق اختلفت تعابير ويهه والخوف بدا يظهر عليه بس ما حب أمه أتحس فأقنعها تدخل الميلس عند الحريم وهو بيشوف أبوه وبيرد عليها خبر ...
أم سلطان دخلت الميلس وهي تدعي ربها يسلم ولدها وحرمته ويردون لهم بالسلامه
سعيد توه بيدخل الميلس الا يشوف موتر سلطان عند باب الحوي على طول ربع صوبهم : أنتوا بخير ؟؟؟!!!
وعد و سلطان : الحمدلله ما فينا الا العافيه
سعيد : أنت ليش ما أترد على تلفونك وأنتي أشعنه غالقه تلفونج ؟؟؟؟؟
وعد وهي أتطلع تلفونها من الشنطه : تلفوني لا مب غالقتنه ...
أنصدمت أنه مغلق وعلى طول اطالعت صوب سلطان اللي دس ويهه عنها
سلطان وهو ماسك ضحكته : وعودي ليش غالقه تلفونج ؟؟؟ سعيد أنا كنت ناسي التلفون في السياره عسب جي ما رديت
سعد مستغرب وحاس انه السالفه فيها ان : أنتوا من صدقكم أمايه من الصبح أتحاتيكم وأنتوا ما أعرف شو أقولكم أدريبه سلطان عليه هفات بس أنتي وعد العاقل شو صار لج والا خلاص من لقى أحبابه نسى أصحابه ... يعني ما أتفكرون فينا اذا انحاتيكم وانخاف عليكم والا لا
وعد حاسه بتأنيب الضمير: سعيد والله سوري خلاص لا اتضيق بروحك ان شاء الله ما بنعيدها ...
سعيد : هههه وين في المدرسه نحن يلا دخلي بسرعه وطمني أمايه وأستعدي لمواجهة ال.... ما يحتاي أكمل
سلطان: أخ سعيد أنا بعدني عايش لا أتم أتآمر علي حرمتي الحين لو سمحت خلنا بروحنا عندنا كلمه راس
سعيد: ههه سلطان أنت مرييييييييييييييييييييييي ييييييييض ودخل عنهم
وعد : ههههههه سلطان شو هالمنكر حرام عليك اتغصص به الا سعيد ما أرضى عليه
سلطان : أقول أقلبي ويهج بسرعه وايد عطيناج ويه
وعد وهي نازلة : سلطان ترا أنا برد بيت أبويه وببات عنده اليوم
سلطان مصدوم: أي أنتي صدق زعلتي شو أتخبلتي أتباتين عند أبوج جي ماشي شغل تبين بخليج أتمين لنص الليل بس بيات ما شي
وعد : بنتفاهم بعدين باي