[فيتامين سي]

أموت أنا في حبهم 7

مزنه ودموعها على وشك السيلان : أنت منو ؟؟؟؟ !!!! وقف السياره من فضلك
التفت عليها والشرر يتطاير من عيونه : أنتي ياحشره ياللي ما تسوين نعالي أنا أتهدد ومن منو وحده حقيره مثلج ماعرفتيني عدل الحين بتشوفين من
أنا عمج وتاج راسج غصبن عنج يالحيوانه تبين تهدمين بيتي أنا بهدم حياتج مب الا بيتج
مزنه بخوف ورهبه : أخوي أنت شكلك غلطان أنا ما أعرفك ولا لي صله بك أنا تحريتها سيارة أخوي والله ما أعرفك أرجوك أستر علي ونزلني
علي : ما أكون أنا علي ولد حمد اذا ما خليتج تندمين على كل كلمه قلتيها والحين تاكلين تبن وتسكتين والله اذا سمعت حسج بذبحج
مزنه وخلاص كل محاولاتها باءت بالفشل مب قادره تستوعب اللي يصير ليش ؟؟ وكيف ؟؟؟ مافي جواب حاولت محاوله أخيره الظاهر هالانسان متقصد وحده غيرها وحظها الردي حطها بدربه .... للمره الأخيره حاولت تكلم الانسان اللي بداخل هالشيطان ...
مزنه علي خاف الله فيني والله انا رايحه عند حرمة أخوي دق عليها ويع الولا دة وماعندها حد مالها غيري ارحمني دخيلك ماتبي اتردني ماعليه نزلني في الشارع اي مكان برجع بروحي ارجووووووووووووووووووك
علي داس على البريك بالقو الشي الي خلا مزنه تتجدم بكل قوتها ويدق راسها بــــــ طبلون السياره (الجزء الأمامي مقابل السائق واللي عداله (
التفت لها ومد ايده شل راسها عن الطبلون وسنده بالكرسي مره ثانيه ... يقاوم احاسيسه ومشاعره يحس أنه بالفعل غلطان ومهما كان الألم اللي سببته له ما تستاهل اللي ناوي عليه ... في الأخير هو انسان متزوج وأب مسؤل عن بنتين وولد في عمر الزهور بدى ضميره يصحى وكأنه في صوت داخلي يكلمه يحاول يرده عن اللي ناوي عليه .. معقوله هالبراءه كلها قناع تخفي وراه خبثها ولؤمها ؟؟؟؟ تم يتأمل ويها فتره بس فجأه شل عينه عنها خاف يضعف ويتراجع .....
علي : ههههه عيديها الرمسه ماسمعتج عدل !!! خاف الله ها ؟؟؟!!!! أنا يالحيوانه أتقولين لي خاف الله وأنتي شو شريفة مكه ؟؟؟؟ تتجسسين علي وأترابعين حرمتي أونه تبين تنتقمين واتخربين بيتي ... ليش منو اللي عاق عمره على الثاني ؟؟ منو اللي تم يلاحقني من بقعه لبقعه وتتدعين أنها صدفه يامحترمه يابنت الأصول منو اللي استنزفت تعبي وشقا عمري منو غيرج يالحيه الرقطا ....لابارك الله فيج
مزنه وهي أتصيح : يعلني الموت لو أنا اللي تقصدها أنت ما أتخاف ربك حسبي الله عليك ونعم الوكيل حسبي الله عليك ..... وقبل لا يتدارك الموقف فتحت الباب ورمت نفسها من السياره ... أتموت أهون عندها من أنها تتعرض لشي لا تحمدعقباه أو يضيع شرفها من دون ذنب ....

حست بقشعريره واشمئزاز من ذكر هالموقف ... شلت ولدها وحضنته تبي أتحس بالأمان هالموضوع نبش ذكرياتها و وخلاها تكره اللحظه اللي طلعت فيها من البيت
فاضل،،، صمته كان يعبرعن ألمه وحزنه للي تعرضت له أخته ما حب يقاطعها حس أنه هاللحظه من حقها هي وبس من حقها تعلن الحداد وتصوم عن الكلام ،،، من حقها تصرخ وتتألم بصوت واضح ومسموع اللي مرت فيه ما كان هين ...

بعد ما فتحت الباب ورمت بنفسها تلقفتها السيايير اللي تمشي على الطريق السريع بين العين وأبوظبي ... أول صدمه تلقتها من الشاحنه اللي كانت حذال سيارة علي أصطدم راسها بتواير الشاحنه اللي طيرتها مثل الورقه على الشارع المقابل .. الله ستر
وكان الشارع شبه فاضي ... تبرع أحد السائقين بأنه يتصل بالشرطه ويطلب لها الاسعاف ....
وصلت مستشفى المفرق تصارع الموت الضربه اللي يتها كانت قويه وتسببت في نزيف حاد في الدماغ والأطباء أعتبروها ميته لا محال ..
بعد ما نبشوا شنطة أيدها لقوا بطاقتها الصحيه وتعرفوا عليها وأتصلوا بأهلها يبلغونهم بالحادث اللي صار لبنتهم ...

في بيت أهل مزنه
خالد : الله يلعنها فضحتنا والله لا أذبحها حيوانه
أبو فاضل : جب ولا كلمه لا تتهم أختك
خالد: شو تبون أكثر مني أنا الشاهد والله يابويه شفتها تركب موتر واحد يا أبويه هاي أختي ليش بتبلى عليها
بدر : خالد ان بعض الظن اثم يمكن ها دريول والا شي وبعدين لا تستعيلون بالحكم خل نسمعها قبل وأنعرف هي وين ومع منو
أبوفاضل منزل راسه : ياعيال دوروا أختكم ولاترمسون عنها شوخليتو للغريب اذا انتوا من دمها ولحمهاهذا كلامكم الناس شو بتقول
خالد: يابويه أنتوا وين عايشين أقولكم شفته قبل لا تركب وياه منزل الدريشه ويراقب الأوضاع مالحقت عليهم والا دفنتهم عندعتبة الباب
أم فاضل وهي أتصيح : الله ياخذها يعلها الموت وياه الله لا يوفقها سودت ويوهنا بين العرب لا بارك الله فيها ماقصرنا عليها بشي
عليا حرمة خالد: عموه الله يهداج هاي مزنه تربيتج وأني أدرى بها مستحيل أتسوي شي من اللي فبالكم
خالد : شو كلكم درتوا ضدي محد فيكم أتهمه سمعتكم كفايه فاضل اللي نزل روسنا للتراب وأتكملها مزنوه
بدر : خالد خف علينا الله يخليك ترا روحي مب مستوعب اللي يصير والأفكاراتوديني وأتييبني
خالد: ما ألومها مب هي أكثر وحده متعلقه فيه!!! لازم بتطلع شراته الله يلعنهم اثنيناتهم
عليا : استهدى بالله ياخالد مب زين اتدعي عليهم أستغفر ربك
خالد: أنا لين ما أشرب من دمها مابيهنالي بال .. يعل تنجلب السياره فيها واللي وياها

مرت الدقايق بطيئه وكئيبه السكوت خيم على المكان كل واحد سارح بفكره بعيد محد قادر يتصور أنه مزنه البنت الحشيم اللي عمرها ما غلطت بشي
تتصرف مثل هالتصرف ... مزنه محيره لولد عمها من صغرها وبانتظار رجعته من ألمانيا عشان يتزوجون........
ترن ترن .... تلفون البيت يرن
خالد وهو يشل سماعة التلفون : يعلها بشارة موتها .... ألو
الطرف الثاني : السلام عليكم ورحمه الله وبركاته
خالد من دون نفس :وعليكم السلام والرحمه ...
الطرف الثاني : عفوا أخوي هذا بيت جابر محمد؟؟؟
خالد: هي نعم منو الريال؟
الطرف الثاني : وياك الملازم سالم
خالد: خير آمر ...
الملازم :مايآمر عليك عدو ممكن أكلم الأخ جابر
خالد: خير شو عندك أنا ولده خبرني شو فيه ؟؟
الملازم : أخوي أختك مزنه جابر محمد مسويه حادث على شارع أبوظبي - العين والحين هي في مستشفى التوام
خالد: اشوه .. وهو يكلم الكل شفتوا سواد ويه بنتكم هذي ملتعنه في المستشفى
الملازم : ألووو
خالد : ماتت؟؟
الملازم : أستغفر الله أنت شو ما عندك احساس أقولك أختك بين الحياه والموت تتبلى عليها بالموت !!!!
خالد : مايخصك أنت وسكر التلفون ...
وعلى طول اتجهوا لمستشفى التوام
أول ما دخلو قسم الحوادث تجدم بدر من مكتب الاستعلامات يسأل عن مزنه
بدر : السلام عليكم
الموظف: وعليكم السلام والرحمه
بدر : أخوي بغيت أسأل عن مريضه مسويه حادث من اشوي
الموظف: الاسم
بدر: مزنه جابر محمد
الموظف :مممم لحظه بس أناديلك الملازم
بدر : ان شاء الله ...
فخاطره ... يعني صدق طالعه ويا واحد يعني صدق سودت ويوهنا معقوله يا مزنه اتجازينا بهالطريقه معقوله ؟؟ وأنا اللي كنت مجذب الخبر فيج قلت مستحيل مزنه أختي الغاليه أتسوي مثل هالشي ... قلت يمكن خالد كعادته يضخم الأمور وأنج بريئه بس أثبتي العكس
ليش؟؟؟ ليش ؟؟؟
بهاللحظه تجدم الملازم من بدر وسلم عليه ..
الملازم صالح : أنت أخوها اللي كلمني ؟؟
بدر : لا أنا أخوها الكبير
الملازم : أها خير ان شاء الله تفضل وياي مكتب الدكتور عشان تتطلع على الحاله وبالمره بخبرك بتفاصيل الحادث
بدر يتبعه بهدوء وتثاقل ما يبي يعرف شو صار فيها لأنه نظره الملازم كانت كافيه ... خايف من الفضيحه يمشي منزل راسه ولاف الغتره بشكل
يخفي ويهه أشوي ما يبي حد يشوفه ويعرف اللي صار وينفضحون جدام الناس ...
وصلوا مكتب الدكتور
بعد السلام ..
الدكتور : تفضل استريح أخ بدر
بدر : مشكور .. طمني عليها دكتور شو ياها ؟؟؟
الدكتور : والله شوف مابخبي عليك وضعها صعب جداً الاصابه يتها في الراس مباشره وهالشي أدى لنزيف في الدماغ سوينالها عمليه سريعه
والحين بانتظار أنها تصحى اذا نشت في الـ 24 ساعه اليايه ان شاء الله بتكون عدت مرحلة الخطوره وماتعاني من شي غير جروح طفيفه بتزول
مع الأيام
بدر : الحمدلله
الدكتور : بس
بدر : شوه بس يادكتور شو في خبرني
الدكتور : اذا ما نشت في هالـ 24 ساعه نعتبرها ميته سريرياً
بدر غمض عيونه من هول الخبر ... مهما صار تظل أخته وماله غنى عنها ممكن يتخيل يصير فيها اي شي الا الموت
الدكتور : آسف بدر بس في خبر ثاني لازم أخبرك عنه .... الله يصبركم ان شاء الله
بدر : دكتور شو ممكن يكون أسوأ من اللي سمعته ... قولي اللي عندك مره وحده ماعد فيني شده أتحمل
الدكتور : اذا نشت وعدت مرحلة الخطر في إحتمال كبير أتكون فاقده البصر وهالشي اللي ما نقدر نتأكد منه الا بعد ما ترجع لوعيها
بدر خلاص هني أنشلت أطرافه وما عاد يحس بشي .. غمض عيونه وسند راسه على الكرسي حس بضياع شي غالي عليه ما يهمه كلام خالد أو الناس
هاي أختي نظر عيني وبوقف وياها في الحلوه والمره مستحيل أتخلى عنها أصلا أنا بعدني مب مصدق اللي صار وأكيد الملازم عنده الخبر اليقين ليش أخلي الضنون تاخذني وأتوديني !!! ليش ما أقطع الشك باليقين الملازم هو اللي بينصفها هو اللي بيبريها ....
بدر وجه نظراته للملازم وإيده على قلبه : أخوي ممكن أتخبرني كيف صار الحادث ؟؟؟
الملازم صالح: أكيد أصلا أنا بس بغيت الدكتور يطمنك عليها وبعدين كنت ناوي أخبرك ملابسات الحادث على حسب اللي قالوه الجماعه الي شافوا الحادث أختك بطلت باب السياره وعقت عمرها .. هالشي يدل على واحد من الأثنين محاولة انتحار أو في شخص ثاني ورا هالحادث حاول يتخلص منها بهالطريقه البشعه .
بدر : مستحيل أختي أتفكر بالانتحار مستحييييييييل ماعندكم أي معلومات عن صاحب السياره من يكون ؟؟؟
الملازم صالح: والله للحين التحريات يدورون عليه مرسيدس أسود رقمه رباعي لوحه حمرا للحين هاي كل المعلومات اللي عندنا بس ان شا ءالله بأقرب فرصه نقبض على الشخص وأنعرف منه الموضوع ..
بدر : خلاص هذا رقمي ******* وأرجوك أتخبرني بالي يصير وياكم
الملازم صالح: ان شاء الله بس في الوقت الحالي بنشدد الحراسه على غرفة أختك لين تتضح الأمور والزيارات ممنوعه اذا حبيتوا تتطمنون عليها ألحين عندكم عشر دقايق بعدها من فضلكم تتركونها ترتاح وأنشوف نحنا شغلنا
بدر : ان شاء الله مشكور دكتور وأنت اخوي صالح ماقصرت فمان الله
طلع بدر وعلى طول راح لقاعه الأستقبال ولقى أمه في حاله يرثى لها خبرهم بالي قاله الدكتور ومروا على غرفتها يشوفونها من بعيد .... ممده على السرير.. جسد بلا روح مافي أي إشاره تدل على أنها حيه ترزق غير صوت ضابط نبضات القلب .....

..................

فتح عيونه بصعوبه يقاوم رغبته في النوم من يديد ... رفع راسه ومرر ايده فشعره على السريع ... نش سبح وتلبس وطلع في الصاله
بوسلطان وخليفه وسعيد يشربون جاهي
سالم : صبحكم الله بالخير ... تجدم من يده وباسه على راسه وسلم على أبوه وعمه صب له استكانة جاهي ويلس بينهم
بوسلطان: سعيد قوم ياأبويه شوف أخوك سلطان وينه ؟؟؟
سعيد : ان شاء الله
خليفه: سعيد برايك أنا بروح له
سالم : يديه كيف أصبحت ان شاء الله أحسن من أمس
بوسلطان: الحمدلله يا أبوي .. أنت طمني عليك ان شاء الله رقدت مرتاح أدريبك طالع على يدك ما تقهر المكان اليديد
سالم : الله يهداك مب مكان يديد الا رقدت رقاد الأموات
بوسلطان: حسبي الله على ابليسك شو هالرمسه الخايسه أشعنه تطري الموت من الصبح هب ناقصين يا بويه
سالم: السموحه منك يدي ما قصدت فديتك ... ونش لوى عليه
بوسلطان : هي يا دنيا شوف البيت من دون الحرمات ما يسوى وين ويه أم سلطان وين ضحكتج يا وعد البيت بلياكن ما يسوى
سعيد : الغالي تامرني بشي بمر الدوام بترخص وبلحقكم
بوسلطان: ما يآمر عليك عدو هالله الله بالطريج وأخوك سيف وينه شوفه قبل لا أتروح
سالم : توه ناش كان يسبح
خليفه وصل عند غرفه سلطان ودق الباب...
خليفه: سلطان ....سلطان ... مافي أي رد ... سلطان ... ماشي جواب ,,, رجع الصاله
خليفه : سالم سر شوف سياره عمك سلطان موجوده؟؟؟
بوسلطان: خير يابويه وينه أخوك
خليفه: أضني مب موجود يمكن نش من وقت وطلع
بوسلطان: لا يابويه أنا في الحوي من الساعه 4 ماشفت حد طلع
سالم : أبويه سيارته مب موجوده
خليفه وعلامات الاستغراب على ويهه : وين راح من الصبح ؟؟؟ بتصل به .... مغلق ؟؟!!!!!
بوسلطان: ليكون رد أختفى شرا المره الي طافت
خليفه : لا حول ولا قوة الا بالله
سالم :أنزين يمكن راح المستشفى ولا تنسون في العنايه ماشي ارسال
خليفه: والله جايز ...
بوسلطان: يالله ياعيال ما نبا نتحير الدكتور بيخطف على أمكم بعد نص ساعه
سيف: صبحكم الله بالخير
الكل :الله بالنور
بوسلطان : سر يا بويه كل لك لقمه وألحقنا
سيف: لا وين ما لي نفس لشي باخذ لي كوب جاهي وبييكم الحين

.......

في بيت بومحمد
عذيجه : روضوه(15) نشي بسج رقاد أفففف حموده (17) قومي خستي من الرقاد يلا ماشي وقت بتتحيرن على المدرسه رواضي حبيبتي قومي
بسج عاد ترا والله بخليكن ترقدن عقب نشن أبغمن (صيحن) أففففف حمدانه
أول ما قالت حمدانه نشت حمده على طول وفرتها بالمخده
عذيجه: هههههههههههههههههههه والله ما أتين الا بالعين الحمرا
حمده : يالكريييييييييييهه
روضه: الله يغربلج حمدوه بتعورين البيبي أنزين
حمده : جب أنتي اليهال ما يرمسون
عذيجه : أصبحنا وأصبح الملك لله ... صدق لي قالوا نوم الظالم عباده ... بسكن تناقر يلا نشن أمايه تعبانه لا تحشرن الدنيا وأتوعنها
روضه : أمي فديتها شو بلاها بسير أشوفها
حمده : أي يالهبله بتطلعين بالبجامه وشعرج كشه والله بتزيغينها
روضه : جب أنتي ما يخصج
عذيجه : لاحول ولاقوة الا بالله أنتن ما تشبعن من الضرابه مافي شي أسمه تفاهم عندكن ....
عارف وهو يدق الباب عليهن : هود هود
عذيجه : ههه والله محد يعرف يأدبكن غيره
حمده : وايه فديت هالصوت على الصبح أقرب فديتك محد غريب
عذيجه : أسميج لوتيه
عارف: صباح الخير يا صاحبات الكشش المرعبه
روضه : عرووووووووووف قول آمين
عارف : عروف فعينج أصغر عيالج أنا يالدبه
روضه بوزت : عافاني الله محد يتغشمر في هالبيت كلهم ماكلين فلفل على الصبح
تقرب منها عارف وقرصها على خدها : أي يالعبيطه أسولف وياج يلا قلت آمين شو كنتي تدعين لي خبريني
حمده: هههههه يحليلك والله مسكين جنيت على نفسك هاي دعاويها مستجابه
روضه : إحم إحم فديتني أنا ...
عارف: قولي شو دعيتيلي ؟؟؟؟
روضه: ماأبا
عارف : رواض أرمسي والا ما بوديج
حمده: وين وين
روضه : ياللقافه
حمده : أنتي جب عارف حبيبي وين بتوديها..؟؟ وليش ما تبا أتوديني وياكم الله يسامحك أنا زعلت
عذيجه: أفففف عوذ بالله منكن من بنات ... بسير أزهب الريوق أخير لي .
عارف : تبين أتعرفين وين بنروح بسرعه خلصي وجابليني عند الباب بعد عشر دقايق maximum أوكي
حمده: عشر دقايق أنت غمض عيونك وبطلها تلقاني جاهزه
روضه: مشكله اللقافه (وتركض الحمام قبل حمده)

بيت عوشه أم ميثا
مهره : صبحج الله بالخير أمايه كيف أصبحتي ... تجدمت منها وحبتها على راسها
عوشه : بخير وعافيه .. حبتج العافيه ... وينهن خواتج بيتحيرن على دواماتهن
مهره : شهد دوامها متأخر الساعه 2 وميروه الحين بتنزل
عوشه : شو دوامه هذا فعز القايله ؟؟؟
مهره : أمايه عندها أمتحان أتعرفين نظام الكليه مرات ما يكون عندهم حصص من الصبح بس امتحان فآخر الدوام
عوشه : زين عيل تجهزوا أنتي وياها بنخطف على حرمة عمج الضحى
مهره : ان شا ءالله أمايه ... وينه أبوي العود ؟؟؟
عوشه: توني مودتنه برع يبا يشوف الزراعه ... (يدهم جابر ريال كبير في السن ما يقدر يمشي الا بمساعدة حد والا على الكرسي المتحرك (
مهره : بروح أسولف وياه ... صبحك الله بالخير أبويه وباسته على راسه
جابر : الله بالنور هلا بالغلا كله هلا والله هلا بشيخة البنات .. حبتج العافيه كيف أصبحتي
مهره : بخير وعافيه .. تريقت ؟؟؟
جابر : وأنا أقدر أتريق من دونج
مهره : فديت قلبك باباتي شو رايك نتريق في الحديقه دام الجو غاوي
جابر : والله يا بنتي على هواج المهم ريقينا ترا اليوع كافر
مهره : بنخليه يسلم و لا تزعل هههه
جابر : يعلني ما أنحرم منها هالضحكه .. الله يقويج يا بنتي ويصبرني عفراقج
مهره : باسم الله عليك ليش جي أتقول أزعل يعني
جابر : يا بنتي فهمتيني غلط أقصد باجر يوم أتعرسين وأتروحين بيت ريلج
مهره : ما بعرس بتم يالسه عندك ماأبي غير رضاك عليه
جابر : لا يبنتي البنت مالها غير بيت ريلها وأنا أبيلج الستر
مهره استحت ونزلت راسها : أبويه
جابر : فديت اللي يستحون ... الله يرزقج بالريل الصالح اللي يقدرج ويعرف جيمتج هب شرات أبوج سود الله ويهه
مهره تغيرت أبتسامتها لحزن ملحوظ : أبوي
جابر : وأنا الصادق عيل حد يسوي سواته؟؟؟
مهره : أبوي ما غلط والشرع حلل للريال أربع
جابر: هي نعم حلل للريال أربع وهذا للي يشوف عمره يقدر على مجابل بيتين والعدل بينهم ...
مهره: أبويه أنا أحس أنه السالفه فيها إن يعني معقوله أبوي تزوج على أمايه بس لأنه يبا يتزوج والا في سبب أبويه نحن هب صغار.. أتصدق أحس أنه ما يبانا يعني يوم أنروح أنسلم عليه ما أشوف بعينه فرحة لقانا جنه مجبور ييلس ويانا مرات أعذره أقول يمكن هو ما يبى يبين بشو يحس
عسب ما أنلاحظ بس بعد أحس في شي نحن ما أنعرفه ....
جابر: من حقكم يا بنتي ولو لا خوفي من الله جان منعتكن أتطبن بيته ... مهره يا بنتي أبوج تزوج على أمج لأنها ما خلفت له ولد
مهره : معقوله أبوي بعده يفكر هالتفكير السطحي ؟؟؟ ما توقعتها منه أشوفه يدلع علاوي أكثر من الكل حتى بناته من حرمته سعاد ..
جابر: قومي بارك الله فيج ييبيلي لقمه أسد بها يوعي ... توني ماخذ حبه السكر
مهره :السموحه منك فديتك الحين بييب لك ريوقك ..

,,,,,,,,,

في بيت عبدالرحمن عم وعد
عبدالرحمن : هاحمد بشرني أشحالها وعد
حمد: شو أقولك يا خوي على حطة إيدك
عبدالرحمن: ما عليها شر ان شا ءالله أزمه وبتعدي مثل ذيج المره
حمد: والله ياخوي قلبي يعورني عليها كاره عمري ما بيدي شي أسويه بغيت أسفرها برع تتعالج قالي الدكتور ما منه فايده نفس الشي
عبدالرحمن : لا أتضيق صدرك وتوكل على الله ان شا ءالله بتنش بالسلامه
وفاء: السلام عليكم
عبدالرحمن + حمد : وعليكم السلام والرحمه
حمد: هلا والله بأم سيف أشحالج
وفاء: بخير عساك بخير كيف أصبحت عمي
حمد: بخير دامكم بخير
عبدالرحمن: الله أكبر الحين أنا جني مش موجود ماشي ترحاب أنا زعلت
وفاء: فديت قلبك أبويه الغالي .. أنت أتعرف غلاتك عندي ما يحتاي أقولك بس فديته عمي متضايق لازم أشوفه قبل
حمد: بارك الله فيج يا بنيتي والله يقومج بالسلامه
وفاء: آمين يارب والله محتايه لدعاويكم
عبدالرحمن : ما عليج شر يا بنت رويه بنت سبع ما ينخاف عليج
وفاء: والله يا أبوي ما أعرف شو أقولك
رويه وهي شاله صينية الريوق : خل عنج هالمنكر أسميكن بنات هاليوم وايد تتدلعن نحن فزمانا أنحمل ونولد ولا حد درابنا هب شراتكن قبل لا تولدن بشهر أتصيحن
عبدالرحمن: الله يهداج يا رويه زمانج غير هاييل شباب هب عاييز شرات بعض الناس
موزه: الله أكبر ألحين أمايه صارت عيوز وأنت يالشيبه نسيت متزوج ماماتي وعمرك 30 سنه !!!
حمد: ههههههههههههه والله سكتوه
هند: موزوه لا تغلطين على باباتي فديته شباب بعده والله البنات اللي يشوفونه عند الكليه يتخبلن عليه باباتي شاور على وحده وباجر بخطبها لك
رويه: الله أكبر عليج الحين أنتي بدل لا أتحامين عني مستويه خطابه حق أبوج مسودة الويه
هند: هههههههههه فديت العيوز يوم أتغار على شيبتها
وفاء: بخبرج أنتي حشمي الي اكبر منج وعن الرمسه الخايسه ومن اليوم وساير الدريول بيوديج الكليه بنات هالأيام ينخاف منهن
هند: ههههههه لا حبيبتي أنا أبوي هو اللي يوديني الكليه ما يخصني
عبدالرحمن : الله الله منو قدي يتضاربن علي البنات بعده سوقي ماطاح
موزه : ههههههههههههه أنا تأخرت أترخص عنكم الحين ... بتروحون عند وعد؟؟؟
وفاء : أنا بروح ويا عمي الحين وبرجع الضهر ...
رويه: ودي شو قايله لج أنا الحين أنتي موصل ما يصير أتهايتن وين بتروحين وكرشتج طالع بيحسدونج
وفاء: أمي الله يهداج مافيها شي بيلس عند وعد وبرجع
حمد : لا يا بنتي أنتي الحين فوضع صعب اسمعي كلام أمج أفهم منج بهالسوالف
وفاء: حرام عمي والله خاطري أشوفها
حمد: خلاص عيل بوديج بس تيلسين نص ساعه لا أكثر
وفاء : ان شا ءالله ... ها أمايه شو رايج
رويه : بعد مالي شور بعد الي قاله بووعد
عبدالرحمن : يالله هنوده البنيات يتريني عند الكليه
رويه : أشوه قلت يا بو سهيل ما سمعتك
عبدالرحمن : سلامتج ما قلت شي
رويه: خلاص أنا بعد بروح وياكم بنوصل هند وبعدين بنمر السوق
عبدالرحمن: الله أكبر أسميهن الحرمات ما يشبعن السوق والهياته
هند: هههه أبويه أنت ما أتعرفها حرمتك بعدها أتغار عليك لو تمشي على عكاز
وفاء : باسم الله على أبوي مسودة الويه فال الله ولا فالج
حمد: يلا وفا سرينا
وفاء : دقايق عميه وبكون عندك
حمد :بالهداوه بنتي
,,,,,,,,
عبدالرحمن (بوسهيل) 57 رجل أعمال عنده شركاته الخاصه يشتغل في مجال المقاولات ... حبوب ومسلي وحنون يحب بناته بجنون يخاف عليهن من نسمه هوا
رويه 54 طيوبه وحنونه بس عنيده وغيوره للحين أتغار على ريلها
وفاء عمرها 28 متزوجه وعندها ولد عمره 5 سنين سيف ... حامل و بالشهر الثامن ...
موزه 24 متخرجه وتشتغل في اتصالات قسم المحاسبه
هند 22 طالبه بكليات التقنيه العليا تدرس إداره أعمال وهاي آخر سنه لها
سهيل 32 سنه .. يدير شركة أبوه السياحيه في العين وساكن فيها .. أرمل وعنده بنت وحيدته نوره عمرها 8 سنين كرس حياته لتربيتها ورعايتها
,,,,,,,,,,,,,,,,,,

في المستشفى الأمريكي
عند غرفه العنايه المركزه ... قاعد وفي إيده المصحف يقرى ويدعي ربه يقومها له بالسلامه ... طلع الدكتور عنها وماشافه
بس هو نادى عليه
سلطان: دكتور لو سمحت
الدكتور: أيوه أتفضل
سلطان: دكتور طمني عليها
الدكتور: عفواً حضرتك بتقربلها
سلطان: أنا ولدها دكتور
الدكتور: طب كويس أوي أصل المدام صحيت اذا حبيت تتطمن عليها
سلطان: صدق دكتور
الدكتور : أه يا بني والحمدلله مافيش أي خوف عليها بعد أشويه حناخدها لغرفه تانيه وان شا ءالله النهرده حتبات عندكوا في البيت
سلطان: مشكوووووووووور دكتور ... وركض على غرفة أمه
دخل بكل هدووووووووووء وعلى طول لوى عليها ... مب مستوعبه اللي يصير متفاجأه معقوله أنا بعلم ...؟؟؟ لا أكيد أتخيل فديت روحه
سلطان وهو يبوسها على راسها وأيدها : فديتج الغاليه أشحالج فديت روحج يعل يومي قبل يومج يعلني أموت ولا أشوفج بهالحاله
أم سلطان ودموعها تنزل : فديت قلبك وين رحت عني ليش خليتيني ورحت ليش يا غناتي ليش
سلطان: سامحني والله غصبن عني ما كنت أعرف شو أسوي والا كيف أتصرف
أم سلطان: وعد أشحالها وينها طمني عليها
سلطان: توني ياي من عندها على حطة إيدج
أم سلطان وهي تدمع : الغالي طلبتك قول تم
سلطان: تم يا بعد قلبي لو تطلبين عيوني
أم سلطان: ما أتعيدها دخيلك إرحم شوابك ولا أتعيدها
سلطان: والله يالغلا ثم والله أني ما أعيدها ولا أفكر حتي فيها ...
أم سلطان : بارك الله فيك .. وين أبوك وأخوانك ...؟؟؟
سلطان : ما أدري عنهم ماياني رقاد طول الليل وأنا أدعي رب العالمين يقومكم بالسلامه ومن أصبح الصبح ييت هني وهم بعدهم رقود
أشوي والا أنه الباب ينفتح ويدخلون خليفه وبوسلطان ، سعيد وسالم، سيف
الكل مب مستوعب اللي قاعدين يشوفونه أم سلطان تتكلم ... الوحيد اللي فكر بقلبه قبل عقله كان سالم .. ركض عندها ولوى عليها وتم يصيح
ما همه حد يشوف أو ينقد عليه أهم شي يدته الغاليه على قلبه بخير وسلامه وهذا اللي يكفيه ....
سيف: يالدب ذبحتها قوم عنها بسرعه
سعيد : فديت قلبج يالغاليه يعله فيني ولا فيج
خليفه: سالم قم وسع نحن هنا
بو سلطان ابتسم ونور ويهه : الحمدلله على سلامتج
سالم بعد عنها أشوي بس بعده لاوي عليها من صوب : أففف هالحساد اللي ما يخلونا ناخذ راحتنا ...
سعيد وهو يلوي على أمه : أففف زحمه ياناس شلوهالملقوف عن أمايتي فديتها
سيف: فز حسبي الله على ابليسك خلصت حنان أمي شو ما عندك أم تاخذ منها حنان !!!
خليفه: لا يامسودين الويوه طايحين فولدي طيحه قوموا أنت وياه خلونا نعرف أنسلم على الوالده
سالم حزت فخاطره الرمسه : هاكم خذوها لكم ما أبي شي ... ونش عنهم يبي يطلع من الغرفه
سيف: سلوم ورفجة الغالي أتم أسولف وياك شو هالحركات
سالم : بس عشان خاطره والا أنتوا ما تنعطون ويه
سعيد : طاع مسود الويه هاللي يعبرك أصلا مشكله اليهال
بوسلطان : ياعيال بسكم عن الحشره خلو أمكم ترتاح
سيف: الله الله هالحب والا بلاش ... أوي سلطون توني أنتبه عليك ... ربع ولوى عليه ...
سلطان : هه ههه يالدب ذبحتني .. تو الناس زين يوم شفت والا أنت ما أتشوف شي بعد مستوى نضرك التعبان
سيف: أفا أنا الغلطان اللي معبرنك
سلطان وهو يبوسه على خده بالقو : فديت روحك والله ما يسوى أعيش الدنيا بلياك لا ولا تسوى حياتي في هالوجود
سيف وهو يبتعد عنه :باسم الله خوزوه عني أي أنا أخوك أنزين .. وبعدين لو سمحت لا أتم أتألف في الأغنيه على كيفك
سلطان: لا يا الهيس شو قصدك يالخايس هاي بوسه أخويه لا تشوبها شائبه.. وبعدين أنت ليش محتر كيفي بغني مثل ما أبي ما يخصك
أم سلطان والفرحه باينه على ويها : يعل عيني ما تبجيكم
الكل : فديت أمايه
بوسلطان: يالله يا عيال ... نوره ألحين بعد ما تطمنا عليج نترخص وأنتي أستريحي بنرجع لج ان شا ءالله
أم سلطان: ان شاء الله وديروا بالكم على نفسكم وأبوكم وطمنوني على وعد
الكل : ان شاءالله
سلطان : ان شاء الله الحين بمر عليها وبرد عليج خبر
سالم: خلاص عيل أنا بترياك هني وأنت ساير خذني وياك ...
سلطان: أوكي حبيبي بس لا أتأذي أمايه
سالم: ان شاء الله
الكل: مع السلامه ......