[فيتامين سي]

الجزء الثالث



جلس فيصل على الكرسي حزين ومحتار وحط يده على رأسة يفكر ..
أم فيصل راحت لغرفتها ومسكت الجوال وأتصلت بوالدة منال ..
الوو السلام عليكم كيف حالك اخباركم أن شالله بخير
أم منال : بخير جعلك بخير ..
أم فيصل : شوفي ياخيتي انا طالبتك طلب لاترديني
أم منال : سمي ابشري بعزك اطلبي
أم فيصل : ولدنا يقول ماسمع منال وياليتكم تسمحون له بشوفة ثانية
أم منال : المشكلة مب فيني الله يسلمك .. تدرين بحاول مع ابو منال كود يوافق ..
ابشري أن قاله الله برد عليك انتظري أتصال مني قريب ..
من بكرة جلس ابومنال وام منال بعد المغربية مع القهيوة وصبت الفنجال
أم منال : ترا فيصل اللي تقدم لمنال يطلب منك تسمح له بنظرة شرعية ثانية
ابو منال : وشو ليش ؟؟
أم منال : يقول ماسمعها زين وتعرف شباب هاليومين خلة يجي مرة ثانية
وانت موجود دقايق ويمشي والله يكتب اللي فيه خير ..
ابو منال : خلاص كلميهم يجي بكرة بعد المغرب والله يسهل ألامور ..

حضر فيصل في الوقت المحدد وقابل والد منال ودخل المجلس
وجلس واخذ القهوة من يد أبو منال ليصب لابومنال باحترام لحظات
الا منال دخلت ومعها الشاهي وجلست جنب ابوها ..
فيصل : مساء الخير يامنال
منال بأستحياء وخجل : هلا
فيصل : أنتي تخرجتي من الجامعة ماشاء الله وتخصصك لغة عربية
وش تقديرك وش تخططين مستقبلاً بتكملين والا بتتوظفين
منال : غيرت جلستها وناظرت أبوها وبعدين جلست شوي تفرك اصابعها
واخيراً وبعد التعب قالت : أتوظف ..
أبو منال : لا يامنال ما اتفقنا انك تهتمين ببيتك وعيالك وشولة الوظيفة
والغثاء انا قايل لك مادام رأس ابوك يشم الهواء لاتشيلين هم يابنتي ..
فيصل : منال انا عندي قدرة افتح لك بيت لوحدك ..
واذا تحبين تسكنين مع أمي وابوي واختي مافية مشكلة اللي تحبين وش رأيك ..
منال ترفع رأسها وتناظر أبوها وكلها خجل او خوف : اللي يشوفة أبوي
ابو منال : لا يافيصل بنتي لازم تسكن في بيتها أنت عارف يافيصل
أن الزوجة ماترتاح الا ببيت بروحها صح والا انا غلطان يابنتي
منال ورأسها تحت : صح
فيصل : يامنال وش الاكلات اللي تحبينها ..
منال : أحب البيتزا و ... يقاطعها ابوها : اقول فيصل ترا البنت
تتعلم الطبخ موب مشكلة الطبخ ...
فيصل : عمي انا عارف هالشي وانا ممكن اعلمها مب القصد الله يسلمك
بس أنت خلنا نتكلم وراك كل شوي تقاطعها الله يطول عمرك
عطها فرصة تتكلم الله يسلمك ..
ابو منال غاضباً : أقول منال روحي داخل يالله توكلي على الله
وانت تفضل خلاص المقابلة أنتهت لو سمحت توكل على الله
مع السلامة ..
يطلع فيصل من البيت ويركب سيارتة ويروح يم مكان تعود يروح
له لين تضايق مكان مرتفع يطل على مدينة الرياض ..
مكان يشوووف منه انوار الشوارع والمباني من الاعلى منظر ليلي جميل ..
رجع للبيت الا امة جالسة تحترية بالصالة ..
أم فيصل : واخرتها معاك يافيصل الناس اتصلو أبو البنت متضايق
ولا عاد يبيك تقول نظرة شرعية خلاص ..وش فيك وانا أمك ليش
البنت مافيهاعيب وانت اللي مسختها وليش يافيصل مايصير هاللي قاعد تسوية ..
فيصل : الدنيا ضايقة فيه وصامت .. يمه تكفين اللي فيني مكفيني ..
أم فيصل : طيب يعني كل ماجبنا لك بنت قلت ما أبيها ..
فيصل : اللي يسمعكم يقول الان جالس أختار !! .. ريم بنت صغيرة
ماتناسبني وانتي شايفة وانتي اللي اخترتيها .. ومنال هم بعد أنتي اخترتيها
وأبوها محاصرني ولا فيه اي فرصة اقدر اتواصل معها والله تعبت ..
ام فيصل : انا اخترتها صح لانها تناسبك وخوش بنت ..
فيصل : وش دراك انها تناسبني كيف قدرتي تحددين انها تناسبني
عشانها جميلة وحلوة وكشخة ومعاها شهادة بس مافكرتي ولو لحظة عن شخصيتها
منال شخصيتها معدومة يايمة ابوها خلاها جماد انسانة ضعيفة مالها شخصية ..
ماتقدر حتى تعبر عن رأيها .. خلاها مهمشة مالها قيمة اطلاقاً يايمة ..
ام فيصل : معاها شهادة ومتخرجة من الجامعة وشلون مهمشة ..
فيصل : عمر الشهادة ماكانت مقياس ولا الجمال مقياس .. تصوري أن ابوها
يملي عليها كل شي بحياتها كل صغيرة وكبيرة ماعطاها ولا دقيقة تعبر عن رأيها
تخاف تتكلم , تخاف ترفع رأسها , تخاف تختار ...
انا متأكد يايمة حتى انه ما شاورها ولا سألها تقبلني والا ترفضني
انا اراهنك صدقيني أنتي ماكنتي معاي تشوفين اللي انا شفتة عشان تحكمين
وحتى لو انا وافقت وحاولنا نصلح الامور انا ومنال صدقيني أبوها ماراح
يخلينا بروحنا بيتدخل بكل صغيرة وكبيرة وبيتعبنا وبيفرض نفسة ..
صدقيني انا ما اقدر استمر يا يمة ارجوك ياميمتي خليني اختار لا تفرضون
علي شي ما اقتنعت فيه ارجوكم ..
أم فيصل : خلاص يافيصل ولا يهمك ارتح يا ولدي ولا تتضايق
انا مدري وش السواة والله اني تعبت .. يارب هووونها يارب ...

أنتهت قصة منال & فيصل لم يكتب الله لهم النصيب ..

بعد كم يوم فيصل واقف عند صراف خارج البنك بيصرف وعند وضع
البطاقة ليصرف ويسدد فواتير ..
صوت بنت خلفة يقول لو سمحت انا مستعجلة ممكن تستعجل لو سمحت
التفت فيصل يناظر الا البنت واقفة وكانت واضعة ساتر على الوجة خفيف
ممكن معرفة تفاصيل الوجة ..
نظرة وحدة من فيصل بعدها رجع وسحب البطاقة وقال تفضلي خذي راحتك

ابتعد فيصل عن الصراف وطلع برا الزجاج وجلس ينتظر ..
بسرعة البنت فتحت الشنطة وكانت مرتبكة ومستعجلة وانتهت وطلعت
ركبت السيارة مع السواق وفيصل يناظر ..
دخل فيصل وناظر الى أن محفظة طايحة على الارض
خذاها وشاف الا بطاقات البنت وفلوسها بالمحفظة ..
طلع يركض الا السيارة حقت البنت راحت ..
راح يناظر ماشاف السيارة لا يمين ولا شماال ..
دخل البنك وقال بأنتظر يمكن تجي بعد شوي .. جلس يسدد الفواتير
وخلص من الصراف ولا رجعت .. البنك مُقفل لانة الوقت بالليل ..
راح للبيت وجلس يفكر وفتح المحفظة يدور اي شي يستدل على صاحبة المحفظة
ووجد بالفعل بطاقة البنت وصورتها وأسمها وعنوان عملها
ليعرف أنها طبيبة بأحدى المستشفيات ...


يتبع