[اسطورة !]

في بيت بوعلي...
نورة في المطبخ مع خالتها...يدخل حمد...
حمد:قوة..
الجميع:الله يقويك..
حمد:اشلونج يمه؟
ام علي:الحمدلله..انت شاخبارك؟
حمد:الحمدلله..
ام علي:جاي بروحك؟
حمد:أي..كنت عند الربع فقلت امركم قبل لرد البيت..اخبارج نورة؟
نورة:الحمدلله..
حمد:شتسوين؟
نورة:اطبخ للعشاء..
حمد:ياسلام..وشنو العشاء؟
نورة:معكرونة بالباشميل..
حمد:امم..عيل شكلي بتعشى عندكم..
نورة:حياك..
حمد:بيطول؟
نورة:يعني يبيلك تنطر نص ساعة ولازم ننطر عمي بعد..
حمد:ليش يمه وين ابوي؟
ام علي:راح بيت عمك حمود..
حمد:ومتى بيرد؟
ام علي:ماادري..انا بروح الصالة نورة اذا بغيتي شي خلي الخدامة تساعدج..
نورة:ان شاء الله..مشكورة خالتي..
حمد:وين العنود خلها تساعدها..
ام علي:لو تقدر تقنعها روح..
في الصالة..
حمد:يمه تدرين ان سيف راد باجر..
ام علي:ويعني؟
حمد:يمه هو مشتاق لكم وايد..
ام علي:خله يشتاق..
حمد:يمه هذا ولدكم..
ام علي:حمد اذا انت جاي علشان هالسالفة فرد بيتك احسن وريح عمرك..
حمد:يمه تطرديني؟
ام علي:انا مااطردك..بس غير الموضوع..
حمد:يمه انا بغيتج عون علشان اقنع ابوي صرتي علي فرعون..
ام علي:حمد..روح زوجتك وعيالك ينتظرونك..
حمد:يمه مايصير..هو غلط خلاص سامحوه..
ام علي:روح عند ابوك وقوله هالحجي..
حمد:اذا ابوي سامحاه انت بتسامحينه؟
ام علي:اللي سواه اخوك ماكان شوي..
العنود تنزل...
حمد:يمه سيف جاي باجر..
العنود(استانست):صج..سيف جاي باجر..ياسلام احلى خبر سمعته..
ام علي:لاتفرحين تراه مب داخل هالبيت..
العنود(حزنت):ليش يمه؟؟
ام علي:اللي قلته يمشي.. وياويلكم لو فتحتوا الموضوع مع ابوكم..(قامت)
في بيت بوسالم...تدخل مريم تسلم على يدتها ويدها...
مريم:يدتي وين خالي سلطان؟
ام سالم:في المرسم..هو ينتظرج..
مريم:عن اذنكم..
تمشي وقلبها مليان خوف وعقلها مليان بالتفكير..ماهي عارفة شالسالفة..اول مرة طلبها في المرسم لما قالها عن محمد والحين ايش؟؟
دخلت...شافت سلطان قاعد مع مها....
سلطان:حياج مريم..تعالي..
مها(تسلم عليها):اشلونج يالعروس؟
مريم:الحمدلله..انت اشلونج؟
مها:انا بخير..حياج قعدي..انا بروح اسوي لكم عصير..
مريم:لاتعبين عمرج..ماله داعي..
سلطان:انت ايش عليج انا ابي..روحي مها..تعالي قعدي..
مريم قعدت...
سلطان(كان يرسم فكمل رسمته واستغرب هدوء مريم):ايش فيج ساكتة؟
مريم:أنا!!
سلطان:ايش رايج باللوحة؟
مريم:حلوة..
سلطان:تبينها؟
مريم:خالي..امي قالت لي انك بغيتني..في شي صاير؟
سلطان(هد الفرشاة والالوان):اشفيج متوترة وخايفة وايدج ترتجف..
مريم:باجر عندي امتحان وخايفة..
سلطان(كمل رسم):ايشقد صار لكم متزاعلين؟
مريم(فجت عينها واستغربت):متزاعلين!!..مع من؟
سلطان:مع محمد..
مريم:وانت من قالك ان احنا متزاعلين؟
سلطان:اعرف اشلون مااعرف..وجهج قال..
مريم:وجهي بخير وماقال شي..
سلطان(هد اللي بيده وراح لها):ترى عادي لو اختلفتوا..هذا احسن وقت تتعرفون على بعض..
مريم:خالي..
سلطان:نعم؟
مريم:على ايام الخطبة مها كانت تقولك كل شي؟
سلطان:يعني اشلون؟
مريم:يعني كانت تخش عليك مثلا؟
سلطان:يمكن..بس هذا عادي..بس الحين مااخليها..مو على كيفها..
مريم(قامت):خالي انا رايحة البيت..
سلطان:مريم..
مريم(وقفت):نعم..
سلطان:من بيوصلج؟
مريم:ابوي واقف عند الباب..
سلطان:انت متأكدة ان مافي شي صاير؟
مريم:اجاوبك بس من غير أسئلة بعدها..
سلطان:انزين جاوبي..
مريم:في شي صاير..بس مااقدر اتكلم..(راحت لحقها سلطان ومنعها)
سلطان:مريم في شي بينج وبين محمد؟؟
مريم(دمعت عينها):لا..
سلطان:ريحتي بالي..عيل شنو؟
مريم:خالي احنا اتفقنا من غير أسئلة..
سلطان:بس مااقدر اخليج جذي..
مريم:خالي انت عصبي وماتقدر تتحمل..فانا مااقدر اقولك شي..عن اذنك..
سلطان:يعني شنو؟مريوم عن السخافة وتحجي..
مريم:حاليا مااقدر اقول شي..لأحتجتك صدقني بقولك..ياللا انا رايحة..
مها تدخل..
مها:اشفيك واقف جذي؟
سلطان:مافهمت ولاشي..اشفيها؟
مريم كانت في حالة تفكير..ردت البيت..وفي غرفتها...
مريم:فطوم الله يخليج شاسوي؟؟
فاطمة:انا ايش دراني..باجر الامتحان وشوفي شيصير وعقب قرري..
تحت...
بوعبدالعزيز:باجر ان شاء الله بيوصل السائق..
زينة:وايد زين ياعمي..بدر تعب وهو رايح راد..
بوعبدالعزيز:لازم يتعب على خواته..بدر اتصل في عبدالعزيز وطمنا على اخوك..
بدر:ان شاء الله..
باجر...
في ألمانيا....



عبدالعزيز:وليد هذي مريم تقولك ادعي لها عندها امتحان عقب شوي..
وليد:قولها تامرين..سلم عليها..
عبدالعزيز:يقولج تامرين..ويسلم عليج..يوصل..وانت بعد ركزي عدل..ياللا مع السلامة..
وليد:تميم ماهو راد؟
عبدالعزيز:لا..بغيته بشي؟
وليد:لا بس أسأل عنه..عبدالعزيز الدكتور ماقال متى بيرخصوني؟
عبدالعزيز:يبيلك بعد اسبوعين..
وليد:وايد..
عبدالعزيز:يمكن سبحان الله حصلت قلب..
وليد:مااعتقد..
في الجامعة...طلعت مريم من الامتحان وهي تبجي..تلحقها فاطمة....
فاطمة(وهي تاخذ نفس):حرام عليج صبري علي شوي..مريم هدي شوي..
مريم:فاطمة هالريال بيذبحني..طول الامتحان واقف فوق راسي..شنو هذا وين قاعدين؟؟
فاطمة:هالشي ماينسكت عنه..انت لازم تروحين تشتكين عليه..
مريم:انا اعرف شاسوي فيه.
في الشغل...محمد يدخل مكتب السكرتير..ويطلع تليفونه يشوف في مكالمات لم يرد عليها 3..طنش..
محمد:خلصت الاوراق فواز؟
فواز:ياللا ثواني بعد..
محمد(وصله مسج فتحاه..محمد تكفى رد علي ابيك في شي ضروري):ياللا فواز عندي اجتماع عقب ربع ساعة..
فواز:ياللا كاهم..تفضل..
محمد:مشكور..
في بيت بوعبدالعزيز...
زينة:عمتي وين السايق؟
ام عبدالعزيز:راح يجيب مريم من الجامعة..
زينة:وبيتأخر؟
ام عبدالعزيز:ماادري..تبينه؟
زينة:ياليت والله..
ام عبدالعزيز:ليرد ان شاء الله..
في بيت بوسالم....سلطان يركض ينزل من الدري ويطلع من البيت..ومها راحت عند ام ريلها...
ام سالم:مها اشفيه سلطان؟؟
مها(بحزن):خالتي مريم كانت مع السايق وصار لهم حادث..
ام سالم(حطت ايدها على قلبها):وهي وينهي الحين؟
مها:في العمليات..
ام سالم:امها تدري؟
مها:لا..
ام سالم:الله يكون بعونها..تحصلها من من ولا من من..وسلطان من وين درى؟
مها:بوعبدالعزيز اتصل وخبراه..
في بيت بوعبدالعزيز...
هالة(تبجي):لا مستحيل..
ام عبدالعزيز(مو مصدقة)
بوعبدالعزيز:قوموا خلنا نروح لها..
موزة(تبجي):مريم..
راحوا جميع المستشفى...



واقفين برع وهم يبجون..الدكتور طلع...التموا حوله...
بوعبدالعزيز:ها دكتور طمنا..
الدكتور:السايق حالته مستقرة..
بوعبدالعزيز:انا أسأل عن بنتي..
الدكتور:هي في العمليات..انا ماعندي اخبارها..بس بغيت اطمنكم على السايق..عن اذنكم..
سلطان(راح على جنب واتصل في محمد)
محمد كان قاعد في البيت في غرفته..رن تليفونه شاف رقم سلطان شك انه يعرف شي..
سلطان:السلام عليكم..
محمد:وعليكم السلام ورحمة الله وبركاته..
سلطان:محمد وينك؟
محمد(استغرب من صوته ليكون وليد صار فيه شي؟):أنا في البيت..
سلطان:محمد تقدر تيينا المستشفى؟
محمد(اخترع):المستشفى!!..ليش؟. .من تعبان؟؟
سلطان:وحدة من بنات اختي تعبانة..ونبيك توقف مع مريم لأنها محتاجتك وهي في هالظرف..
محمد:انتوا في الطواري؟...خلاص ربع ساعة واكون عندكم..
سلطان:ناطرينك..مع السلامة..
بوعبدالعزيز:قلت له؟
سلطان:ماقدرت اقوله ان مريم اللي تعبانة..خفت يصير فيه شي وهو بالطريق..
بوعبدالعزيز:زين سويت..
الدكتور(يطلع):السلام عليكم..
بوعبدالعزيز:وعليكم السلام..ها دكتور طمنا عليها الله يخليك..
الدكتور:الضربة جات قوية على مريم اكثر من السايق..يعني هي تأذت أكثر..صادها ارتجاج بالمخ..وكسر بالرجل اليسرى..وصادها نزيف حاد..بس الحمدلله وصلت في الوقت المناسب..وهي الحين في العناية تحت الملاحظة...
بوعبدالعزيز ماقدر يتحمل الصدمة..وقف بعيد عنهم..راحت له منيرة..
سلطان:يعني حالتها مستقرة؟
الدكتور:حاليا الحمدلله..
بدر:دكتور نبي نشوفها نقدر؟
الدكتور:الحين الزيارة ممنوعة..لطلعت من العناية يصير خير..عن اذنكم..
محمد وصل..شاف الكل واقف الا مريم..استغرب..عيل مريم وين راحت؟؟؟
محمد:بدر كيف حالك؟
بدر:الحمدلله..
محمد:شالي صار مين التعبان؟
بدر:بناديلك سلطان..
محمد:بدر وين مريم مااشوفها معاكم؟؟
بدر:ثواني بس..(راح عند سلطان)..خالي محمد هناك..
سلطان راح له...ووداه يقعدون بعيد شوي...
محمد:سلطان شالسالفة؟؟وين مريم مااشوفها..بعدين شالي صاير؟؟
سلطان:مريم..مريم في العناية..تطلب دعواتك..
محمد(انصدم):اشلون؟؟...ماني فاهم شي..سلطان مريم اشفيها؟؟
سلطان:صار لها حادث..وهي الحين بالعناية..
في ألمانيا...
تميم(والتليفون في يده):اتصل البيت محد يرد علي..اتصل بسلطان هم مايرد..ماادري وينهم..عبدالعزيز اتصل في بيتكم..
عبدالعزيز:أنا بعد حاولت اكلمهم من نص ساعة محد رد علي..قلت يمكن طالعين..
وليد:تميم الله يخليك كلم لي الدكتور ابي اطلع..
تميم:على كيفك..انت يبي لك راحة ماتقل عن اسبوعين..
في طواري حمد...
سلطان:محمد ..يامحمد وين رايح؟؟
محمد(وهو متألم):خلني بحالي..
طلع من المستشفى ووقف بعيد بعيد عن الناس..في هالظلمة راح يمشي وهو مايدري وين مسيرته..وده يبجي ويصرخ..بس مايقدر..قعد على الرصيف..فتح تليفونه وشاف آخر مسج منها.. محمد تكفى رد علي ابيك في شي ضروري..حس ان قلبه يتقطع..ليش مارديت عليها ليش؟؟...ايش بغيتي مني يامريم..ايش؟؟..انا صج ياهل..اشلون ازعل على اتف الاسباب..اشفيني انا..عيل اشلون اقدر امشي حياتي اذا زعلت على اتفه الاسباب..مريم مريم الله يخليج قومي..وقولي لي شنهو هالشي الضروري اللي بغيتيه مني..
في المستشفى...
سلطان:ياللا جماعة قوموا ردوا البيت..قعدتكم مامنها فايدة..بدر خذ خواتك وردوا البيت..وانت يابوعبدالعزيز خذ فوزية وردوا البيت..وانت يبه خذ امي وردوا البيت..انا بتم هني..
بوعبدالعزيز:محمد وينه؟
سلطان:ماادري..بس اكيد جاي..ماراح بعيد..
خولة:خالي ايش صار على الخدامة؟
سلطان:ماادري تصدقين..بروح أسأل عنها..
بدر:خلك انا بروح..
الكل يرد البيت..ويتم سلطان..وتصير الساعة 9 في الليل..يطلع الدكتور...
الدكتور:حضرتك شتصير لها؟
سلطان:خالها..خير دكتور..
الدكتور:هي قامت..
سلطان:الحمدلله..اقدر اشوفها؟
الدكتور:انت اسمك محمد؟
سلطان:لا..انا سلطان..ليش؟
الدكتور:اسمعها تنادي واحد اسمه محمد..
سلطان:محمد خطيبها..
الدكتور:ماخبرتوه؟
سلطان:بلا..
الدكتور:عيل ياليت يي..
سلطان:وانا مااقدر اشوفها؟
الدكتور:بلا..تقدر..تفضل..
سلطان دخل وشافها بهالمنظر المحزن..قرب منها..فتحت عينها...
مريم:خالي..(تسكر عينها وتفتحها مرة ثانية)..خالي وين محمد؟
سلطان:محمد برع ..تبينه؟
مريم(هزت راسها بنعم)
الدكتور:ارجوك لاتخلونها تتكلم وايد..
سلطان:حاضر..
سلطان:مريم ارتاحي..وشدي حيلج علشان تطلعين من هني..
مريم:ابي محمد..(دمعتها تنزل)
سلطان:الحين..
سلطان طلع علشان يتصل فيه...
سلطان:محمد وينك فيه؟؟...تعال بسرعة مريم قامت وتبي تشوفك...اي..في امان الله..
محمد ماعرف يركض ولايمشي..مشى بسرعة بسرعة..وماهو منتبه ان شد الناس بمشيته لين ماوصل للعناية..شاف سلطان واشر له انه يدخل...دخل شافها بحالة صعبه..قرب منها شاف عيونها مسكرة..مسح بإيده على جبينها وقعد يقرأ عليها..مريم فجت عينها..شافته بغت تتكلم محمد ماخلاها وقعد يكمل...
في بيت بوعبدالعزيز...
ام عبدالعزيز:سلطان طمني على بنتي....قول والله...تحجت؟...انزين انا جاية الحين....ليش؟...ابي اشوفها..محمد راح لها؟...ومتى بيطلعونها من العناية؟
سلطان:ماادري..على حسب حالتها..تطمني هي بخير..انزين انا بسكر لأن تميم على الخط الثاني..مع السلامة..السلام عليكم..
تميم:وعليكم السلام..وينك ياريال..ذبحتوني وانا اتصل..وينكم؟
سلطان:كنت شوي مشغول وماقدرت ارد عليك..
تميم:انت وينك فيه عندك ازعاج..واصوات..انت في المطار؟(عبدالعزيز ووليد ناظروا بعض)
سلطان:لا..
تميم:عيل وين؟
سلطان:بقولك بس لاتقول حق عبدالعزيز ووليد..سمعت..
تميم:انزين..
سلطان:ولاتبين له ان في شي..
تميم:ان شاء الله..
سلطان:مريم بنت اختك صار لها حادث..
تميم:مع من؟
سلطان:مع السايق الجديد..وتعورت شوي..وهي الحين في العناية..
تميم:أخباركم بعد؟
سلطان:الحمدلله الكل بخير..ادري ان في ودك تسأل بس ماتقدر..بس تطمن هي بخير..والكل بخير..انت طمنا على وليد..
تميم:وليد بخير..حالته قاعدة تتحسن يوم ورى يوم..
سلطان:الحمدلله..ومتى راجعين؟
تميم:يمكن عقب اسبوعين..
سلطان:على خير ان شاء الله..سلم عليهم..
تميم:يوصل..في امان الله..
عبدالعزيز:سلطان وينه؟
تميم:في الدوحة..
عبدالعزيز:عيل ليش تقوله صوت مطار ماادري وشو؟
تميم:كان برع البيت فكان في ازعاج..حسبته في المطار..
عبدالعزيز:شاخبارهم؟
تميم:الحمدلله..كلهم بخير..
وليد:ليكون مريم تفكر تأجل عرسها علشاني..انا بخير..وبرد الدوحة وبحضر عرسها..
تميم(قال في نفسه:الظاهر بتغير يوم عرسها علشان روحها)
محمد يطلع من العناية..
سلطان:اشلونها؟
محمد:قريت عليها لين مانامت..ماكلمتها..
سلطان:شكلك تعبان..رد البيت..
محمد:وانت؟
سلطان:برد عقب شوي..بس بروح لعند الدكتور استفسر عن حالتها..
محمد:عيل خلاص خذني معاك..
سلطان:مشينا..
في بيت بوعلي...قاعدين يطالعون تلفزيون...
بوعلي:العنود حطي الاخبار..
العنود:ضروري؟
بوعلي:طبعا ضروري..
العنود:ان شاء الله..
نورة(قامت):انا رايحة فوق..
ام علي:وين؟
نورة:بشوف كتبي يمكن نسيت احل واجب..عن اذنكم..
محمد يدخل البيت...
محمد:السلام عليكم..
الجميع(بإندهاش من شكله):وعليكم السلام..
نورة وقفت وهي في الدري...
ام علي:محمد اشفيك؟
محمد(قعد):العنود جيبلي كلاص ماي..(فتح ازرته والتعب باين عليه)
بوعلي(ترك الاخبار):محمد يبه اشفيك؟..صاير شي؟
العنود قامت تجيب ماي..ونورة نزلت من الدري....
محمد:بس اشرب ماي بقولكم..
ام علي:العنود بسرعة..
العنود(جاية من المطبخ):ان شاء الله..تفضل محمد..
محمد(شرب الماي مرة وحدة وحط الكوب على الطاولة)
بوعلي:تحجى محمد..
محمد:مريم في العناية..
الكل انصدم ومستغرب...
ام علي:ايش صار عليها؟؟
محمد:صار لها حادث..
العنود:واشلونها الحين؟
محمد:الله يعلم بحالها..ادعوا لها..
بوعلي:تعورت وايد؟
محمد:تقريباً..(قام وركب الدري)
ام علي:عين وصابتهم..الله يعين اهلها..
الصبح الساعة 5 بعد الصلاة..سلطان يدخل غرفته..شاف مها على السجادة...
سلطان:مها متى ولادتج؟
مها:على اساس الموعد اللي حددي لي الدكتور عقب ثلاث اسابيع..ليش؟
سلطان:بس أسأل..(ياخذ تليفونه وبوكه ومفتاح السيارة)..انا رايح المستشفى..اذا بغيتوا شي اتصلوا..
مها:مب رايح الدوام؟
سلطان:بلا رايح..بس اتطمن على مريم وعقب اروح..مع السلامة..
مها:مع السلامة..
في المستشفى...



سلطان يمر العناية يحصل ممرضة...
سلطان:لو سمحتي..في وحدة داخل اسمها مريم سعود..
الممرضة:من ربع ساعة طلعوها..
سلطان(استانس):ووين ودوها؟
الممرضة:غرفتها..
سلطان:كم رقم غرفتها؟
الممرضة:تقدر تاخذه من استقبال العناية..عن اذنك..
وسريع راح سلطان غرفة مريم...دخل شاف الممرضة تغطيها...
سلطان:السلام عليكم..
الممرضة:وعليكم السلام..
سلطان:نايمة؟
الممرضة:أي نعم..ياليت تخلونها تنام..
سلطان:هي اشلونها الحين؟
الممرضة:الحمدلله حالتها في تحسن..حضرتك ابوها؟
سلطان(ابتسم):ابوها مرة وحدة..لا طبعا خالها..
الممرضة(انحرجت):آسفة..عن اذنك..
سلطان(قرب من مريم وشافها بصورة غريبة اول مرة يشوفها):حمدلله على سلامتج ياحلوة..مو بسج رقاد..شكلج مب قايمة الحين..خلني اتصل في امج اطمنها..
طلع من الغرفة..رن تليفونه...
سلطان:وعليكم السلام..هلا محمد...بخير انت شاخبارك؟
محمد:الحمدلله..بغيت اسأل عن مريم..رحت لها؟
سلطان:تطمن مريم بخير طلعوها من العناية..
محمد(استانس):الحمدلله..من متى؟
سلطان:ماصار لها وايد..
محمد:وايش قالك الدكتور؟
سلطان:ماشفته..توني جاي..
محمد:وشفت مريم..قامت؟
في بيت بوعبدالعزيز...



في الصالة....
بوعبدالعزيز:فوزية بدر ماراح المسجد؟
ام عبدالعزيز:ماادري عنه..الله يخليك خلنا نروح لها..من امس مانايمة..
بوعبدالعزيز:وموزة مابتجبينها؟
ام عبدالعزيز:شوي ونازلة..انا قعدتها..انت روح سخن السيارة..
يرن تليفون البيت...وموزة تنزل....
ام عبدالعزيز:موزة ردي..
موزة:ان شاء الله..السلام عليكم..بخير..لابسين علشان نروح المستشفى..صج(استانست)..ياللا احنا جايين..كم؟...ان شاء الله مع السلامة..
ام عبدالعزيز:من؟
موزة:مريم طلعوها من العناية..
في الجامعة..



فاطمة تتصل على جوال مريم يطلع لها مغلق..
فاطمة:هذي ايش عندها من امس تليفونها مغلق مايسوى علينا..خلني ادخل المحاضرة لأحصل تهزيئة..وهي كيفها..
دخلت المحاضرة..
الدكتور:فاطمة وين مريم غايبة؟
فاطمة(قالت في نفسها:لاحول):ماادري عنها..
الدكتور:اشلون ماتدرين مو انت رفيجتها؟
فاطمة:بلا بس مااعرف ليش ماجات..
الدكتور:ترى غياباتها كثرت..آخر شي بحطها رسوب..
فاطمة(بصوت واطي):كثرت غياباتها منك انت اللي ماترحم..
الدكتور:نعم؟!!
فاطمة:يمكن عندها عذر..
الدكتور:على العموم قولي لها خلها تمرني المكتب..
في المستشفى...
ام عبدالعزيز:ألف حمدلله على سلامتج ياقلبي..
مريم:الله يسلمج..
موزة:اشلون تحسين عمرج الحين؟
مريم:احس ان جسمي متكسر..
بوعبدالعزيز:الحمدلله ان الحادث عد على خير..
مريم:الا ايش صار على السايق والخدامة؟
موزة:السايق في المستشفى مرقد..والخدامة ماشاء الله عليها ماصار لها شي الا خدوش في وجهها..وردت البيت امس..
مريم:الحمدلله..السايق تعور وايد؟
بوعبدالعزيز:مو وايد..ايده انكسرت وشوية جروح..انت اكثر وحدة تظررتي..
مريم:معليه حصلت اجر اكثر وحده..
ام عبدالعزيز:فديت العاقلة..
يرن تليفون ام عبدالعزيز...
ام عبدالعزيز:وعليكم السلام...هلا بنيتي فاطمة..بخير انت شاخبارج؟
فاطمة:الحمدلله..اقول خالتي بنتج يبلها طق وينهي فيه من امس وانا اتصل فيها تليفونها مغلق..وليش مادوامت للحين؟؟
ام عبدالعزيز(ابتسمت):حبيبتي فاطمة مريومة صار لها حادث امس..(فاطمة فجت عيونها)..وهي الحين مرقدة في المستشفى..
فاطمة:ايش صار عليها؟؟
في دوام محمد...
عيسى:اشوفك سرحان اشفيك ياريال صار لك من جم يوم مو على بعضك..
محمد(كط القلم على الطاولة وراح صوب الدريشة):خطيبتي..صار لها حادث امس..
عيسى(اندهش):لاحول ولاقوة الا بالله..واشلونها الحين؟
محمد:سلطان قالي بخير..بس خاطري اروح اشوفها..
عيسى:خذ اجازة وروح..
محمد:مااقدر..الحين اكيد اهلها عندها..
عيسى:ماشفتها؟
محمد:امس لما كانت في العناية شفتها..وقريت عليها..واليوم الصبح قالي سلطان طلعوها من العناية..
عيسى:الحمدلله..خرعتني..تعور� � وايد؟
محمد:يقول الدكتور هي اكثر شخص تعور في الحادث..
عيسى:من كان معاها في السيارة؟
محمد:تصدق ماادري..ماسألت..بس انا لما رحت امس كلهم كانوا موجودين..
عيسى:يمكن هي تسوق؟
محمد:لا..مريم ماتسوق..تصدق ماجى على بالي هالسؤال..
عيسى:لرحت لها إسألها..(شاف ساعته)..ياللا امش الاجتماع بيبتدي عقب شوي..
في المستشفى...



فاطمة:مع هالوجه خرعتيني عليج..لو كنت اسوق جان جيتج من بدري..
مريم:ليش طلعتي من الجامعة..الحين بتفوتين المحاضرات..
فاطمة:تولي..قولي لي شاخبارج الحين؟
مريم:الحمدلله احسن..
ام عبدالعزيز:فاطمة بتمين عند مريم؟
فاطمة:ليش خالتي؟
ام عبدالعزيز:بروح شوي اجيب ملابسها وشوية غرض ورادين..وموزة بنزلها المدرسة..
فاطمة:عادي خالتي خذي راحتج..انا قاعدة عندها لين ماتردين..
ام عبدالعزيز:ياللا يمه انا رايحة..ايش مابغيتي اتصلي علي..
مريم:ان شاء الله..
موزة(تسلم على اختها):مع السلامة..
مريم:مع السلامة..
موزة(تسلم على فاطمة):مع السلامة فاطمة..
فاطمة:مع السلامة..
عقب ماراحوا...
فاطمة:بقولج شي..
مريم:شنو؟

فاطمة عندها سالفة مهمة تبي تقولها لمريم..بس شنهي؟؟