[فيتامين سي]

البــــــــــــــــــــــ ــــارت الثاني...


ام ميثه عقب ما سكرت ام فهد عنها نادت ميثه اللي توها نازله تبي تروح السوق ويا شواخ بنت خالتها...
ام ميثه:تعالي امايه ميثه ابغيج بسالفه
ميثه تيلس عدال امها وتحط نقابها وشنطتها بحضنها:خير امي
ام ميثه:بويهج ياامايه...
ام ميثه كانت ناويه تقولها بس قالت احسن اتريا ابو ميثه يكلمها احسن
ام ميثه:ااه؟لا لا ماشي..وين قررتن اتسيرن
ميثه حست ان امها تبا تكلمها بموضوع بس غيرت رايها بس سوت انها ما انتبهت وقالت:العين مول..فساتينه حلوه..
ام ميثه:وانتي؟
ميثه:مالي خاطر اسير العرس انا بسير عشان شيخه تبا فستان
ام ميثه:لا والله وهاي حلفه بعد..يتسيرين يعني بتسيرين..حلوه هاي!!ولد خالتج بيعرس وانتي ما بتحضرين
ميثه قامت تضحك بشوي شوي:خلاص خلاص ..بشوف شو يصير ويايه..(تلبس نقابها
ام ميثه:دوري لج فستان حلو
ميثه:ههه انشالله امايه (تمسك شنطتها وتطلع مفاتيح سيارتها:يالله امايه شي فخاطري؟
ام ميثه:الله يحفظج ولا تنسين تاخذين فستان
ميثه:ههه انشالله يالله مع السلامه
ام ميثه:بحفظ الرحمن..
ميثه تطلع.............
نوره منسدحها على الشبريه واتصيح..فهد جنبها وحاط يده على كتفها يجاول يهديها..
فهد:خلاص نوره قطعتي قلبي؟دخيلج لا تصيحين..والله ثم والله اني احبج والعرس كله موفبالي..بس شو اسوي ببويه وامايه ابويه تعرفين انه من متى حاشرني !بس الله يهديهم ما فيهم صبر..والله تعبت من كثر ما اقولهم صبروا نوره حملت مره وانشالله بتحمل مره ثانيه..ومناك ما اريد اغضب ابويه وامايه عليه..
نوره تيلس مرتبكه وعيونها تدمع والكحل مسوي بلاوي..
نوره تحاول ما تبين ارتباكها:ماابيك ما ابيك طلقني..ما اتحمل انك تاخذ وحده علي...طلقني اقولك..
فهد وسع عيونه:استهدي بالله يا حرمه وماله داعي هالحجي..انتي تعرفين زين اني ما بقلبي غيرج.
نوره حاطه يدينها على ويها:ما اباك طلقنييي
فهد يهز راسه:لا حول ولا قوة الا بالله
نوره تقوم من على السرير وتروح لغرفة الملابس..ويلحقها فهد
نوره تدور الشنطه الكبيره وتفتحها وتبدا تحط ملابسها وتمسح دموعها..
فهد:يابنت الحلال ما بخذها ما بخذها..
نوره:لا والله.!؟!!؟!عيل من شوي شو تقول؟؟انا بسير بيت اهليه طلقني..
فهد عصب ومسكها من ذراعها:طلاق مب مطلق...فاهمه؟؟؟؟|(فتح يدها وبحنيه وكأنه يتوسل لها:اسف نوري..بس لا تخليني اعصب..انا احبج وما ابي اخسرج..واذا عصبت بكسر الدنيا جدامي
نوره يلست على الكرسي العريض اللي بنص غرفة الملابس جنب الشنطه...:وليش ما ترد عليهم ليش ما تقولهم انك ما تباها
فهد يلس جنبها يوم شاف انها هاديه..
فهد وكأنه يكلم ياهل:حبيبتي..والله من متى وانا معارض تعبت من كثر ما قلت لهم ما اريد اعرس..ابا اسّكت ابويه بس..حتى ولو وصار وتزوجتها..مالي دخل فيها..انا لج انتي وبس...بيبها وبتوحها فالحجره ..
نوره:شوووه؟؟؟بعد بتسكنها هنيه؟؟؟؟؟؟؟؟؟؟؟؟؟؟؟حرام عليك حرام عليك(تصيح
فهد:لا حول ولا قوة الا بالله..وين تبيني احطها؟؟ما عندي افتح بيتين..
نوره:ما اريد ما اريد..مثل ما خطبوها لك خلهم يتكفلون ببيتها انا ما اريد اجابلها كل يوم فويهي
فهد:خلاص ولا يهمج ما يصير خاطرج الا طيب بخبر ابويه وبقوله بعد شوه!؟
نوره وقفت وقالت:عندي شرط
فهد وقف:آمري تدللي
نوره:زواجكم يكون على ورق وبسسس
فهد:قصدج...
نوره:انت فاهم قصدي..زواجكم على ورق وبس..والعيال انا اللي بيبهم لك مو هيه
فهد:خلاص ولا يهمج شو ابا فيها دام غناتي وقلبي نوره موجوده
نوره:وشرط ثاني بعد
فهد:اللي تبينه بسويه اهم شي ما اشوفج متضايقه وزعلانه
نوره:كل يوم تبات عندي
فهد:اوووه!!هاي قويه..ما اقدر عليها
نوره:من أولها؟؟خلاص خلاص انا مو موافقه ولا شي
فهد:ههه نوره حبيبتي شو بقول لبويه يوم يشوفني كل يوم ابات هنيه؟!مره مرتين بروم ألقا غذر بس مو كل يوم..صعبه
نوره:دبر عمرك ما يهمني
فهد:بحاول
نوره:لا مو تحاول اكيد.
فهد:خلاص اكيد ولا يهمج..
نوره:وثالث شرط
فهد وسع عيونه:بعد؟؟؟؟؟؟؟؟؟
نوره:ماشي عرس ولا شهر عسل
فهد:ههههه وفي هاي انا وياج..بعدين هيه ارمله عوده شو تبا فالاعراس ما بسوي عرس ولا شهر عسل
نوره يلست مرتاحه شوي...
نوره محد يعلم باللي فخاطرها..وليش قالت له هالقرار..بس بيني وبينكم يتعلق بالمعصيبه اللي سوتها لفهد...وفهد ما يدري بها.

نوره:فهد,,,شو....شو رايك...شو رايك نسافر؟
فهد يلس جنبها ويسوي نفسه يفكر:حبيبتي كم مره سافرنا؟؟وكل مره نفس الكلام...الواحد يتوكل على الله ويصبر..بس ولا يهمج..انشاالله بعد ما اخلص الدوره اللي عندي...
نوره:ومتى بتخلص؟
فهد يقوم ويفصخ الحمدانيه(الغتره الملفوفه على الراس):خل تبداء أول..محد يدري به هالمدير مره يقول هالاسبوع..ومره يقول عقب شهر..الله يعلم
نوره توقف وتمسك الغتره:بتطول؟
فهد:لا مو وايد..يمكن اسبوعين بس
نوره:ووين هالمره؟
فهد يفتح معاقم الكندوره:اعتقد فرنسا
نوره:الله..خل اسير وياك
فهد:/ههههه اتصدقين..انا قلت فخاطري..اذا بيكون الدوره نهار بس بشلج ويايه..بس اخاف يكرفوني ليل ونهار..بس ولا يهمج..انا بتخبر السكرتير بو فيصل هناك وبخذ العلوم من عنده.وبرد لج خبر
نوره مبسوطه وايد وتلمه..
فهد:ههههههههههه كل هذا عشان السفره.؟
نوره تفتحه وتقط الغتره على ويهه بغشمره
..........................ــــــــــــ ــــــ*ـــ^

المول........
شواخ:اقول ميثه شو رايج بهالمحل؟
ميثه تلف تشوف :هيه والله..يالله تعالي ويايه انشوف
ودخلن المحل...........
شواخ طاحت عينها على فستان كحلي...ماسك من الصدر وواسع حيل من تحت
ميثه تشوف الفستان:الـــــله وايد حلو
شواخ:انا لقيت لي خلاص...يالله الحين دورج..شو رايج بهالسكري؟
ميثه:لالالال ما با
شواخ:ترا خالوتي قالت ما ارد اليوم البيت بدون ما ناخذ لج فستان
ميثه وسعت عيونها:بسم الله متى كلمتج.؟
شواخ:مساعه يوم دشينا المصلى نصلي العشاء
ميثه:اهاااا وانا اقول شو بلاج تتكلمين فالتلفون ثرج تكلمين الوالده؟
شواخ تدفرها من ورا:هيه..ويالله يالله تحركي خلينا نقايس..
ميثه ابتسمت ومشت وياها
.............
.............
بالباجر الصبح...........................
بو فهد:بيت بروحها؟
بو فهد وفهد يالسين في الصاله الثانيه بروحهم...
فهد:هيه ابويه..انتوا خطبتوها لي بس انا ما عندي اافتح بيتين ومناك..انا ما اريد مشكال وعوار راس..
بو فهد فهم عليه وانا الكلام مو كلام فهد..بس قال:ولا يهمك
فهد وسع عيونه وفخاطره يقول:معقوله بيسويها وبياخذ بيت؟؟؟؟لا لا لا
بو فهد:البيت موجود...
فهد:شوه؟؟؟مسرع!!!!بيت من؟؟؟
بو فهد:بو علي زهبت فلة ولده علي وبيتحول...وانا بقوله اني ابا فلتهم
فهد:بو علي؟؟؟اي بو علي هذا؟؟
بو فهد يأشر بيده لليمين:هذا يارنا
فهد وسع عيونه وياشر بيده وكأن الريال جنبهم واقف:هذا بو علي ما غيره؟؟؟؟؟؟؟؟؟؟؟؟؟؟بس هذا لاصق جداره بجدارنا!!!
بو فهد ببراءه:ليش انت عندك مانع؟؟؟؟؟
فهد:أه؟؟لا بس
بو فهد يوقف:قم بس قم خل انسير صوبه
فهد يقوم بسرعه:اصبر اصبر بلاك مستعيل؟؟انا ما عندي فلوس اخذ فلل
بو فهد:ومن قال انك انت اللي بتاخذها..انا اللي بشتريها بفلوسي انا ..
فهد:بس ابويه هاي فلة مو بيت شعبيه!!؟
بو فهد:الخير وايد والحمد لله
فهد يلس:ايلس ابويه ايلس ليش انت دوم مستعيل
بو فهد يمشي مطنشنه:خير البر عاجله ويمكن اطير من يدنا واذا ما بتسير ايلس برايك انا بسير له بروحي
يطلع بو فهد.....
فهد يحك راسه:ياربي...انا قلت بقوله عن البيت وبيكنسل..ياربي ابويه عنيد واللي براسه بيسويه
ام فهد من وراه:منوه ذا العنيد؟
فهد لف شافها ورد براسه على جدام:وفي احد ثره عنيد غير ابويه فهالبيت؟
ام فهد يلست جنبه:عيب عليك لا ترمس جيه عن ابوك
فهد بنص عين:يعني الحين تحاولين تقنعيني ان ابويه مو عنيد؟
ام فهد ببراءه:لا والله صدق كلامك من جهة انه عنيد.. فهو عنيد..بس ليش تقول جيه؟
فهد:قلت له اني ابا بيت ثاني للحرمه الثانيه
ام فهد:شوه؟؟ليش عاد؟؟في قسم عود فوق
فهد:امايه انا ما اريد المشاكل وعوار الراس..وجيه احسن لنا
ام فهد:انزين وبعدين.؟؟
فهد:ويوم خبرته قال بيسير لبو علي يارنا
ام فهد ابتسمت وموسعه عيونها:هيه والله صدقه بو فهد..بو علي بيتحول..وبناخذ بيته وبنشل الجدار اللي امبينا..وبيكونن فلتين بحوش واحد>>اشتغل مخ المهندس
فهد وسع عيونه ويطالع امه:اماااااااااااااااااه؟� �الحين انا وين وانتي وين؟؟؟؟؟؟
ام فهد:شووووووووه؟وانا صادقه...(تقوم وتمشي لبرا:بتريا ابوك فالحديقه..
فهد ضرب يبهته بيده:اخخخ ياربيييييي
وقف فهد وراح فوق عند نوره يخبرها بأبوه....
نوره واقفه ولامه ايدينها الثنتين:لا يعني لا..الحين انا هنيه متحمله وعايشه ويا اهلك وتي هاي وتسكن بفله كامله بروحها؟؟؟؟لا يعني لا.
فهد موسع عيونه:وبلاها عيشتج هنيه؟؟؟اهليه من متى غثوج بشي..
نوره تيلس ورافعه خشمها:ما اريد
فهد يلس زين ولم اصابع ايدينه مع بعض:والحين شوه يعني؟
نوره:تخلي عمي يشتري الفله لي انا.وهيه هاتها هنيه تخدم امك وابوك
فهد:اولا امايه وابويه مب شواب(كبار)عشان الواحد يخدمهم..وبعدين انتي من متى خدمتيهم؟؟امايه قايمه قوم بهالبيت بروحها..حتى خداماتج ما يسون شي غير طلباتج
نوره توقف:فــــهد؟؟؟يعني الحين تبا صدق تسكنها بفله بروحها؟
فهد وقف وشكله معصب:سمعي عاد..مب انتي اللي بغيت انها تسكن بروحها؟وان ابويه هوه اللي ياخذ البيت؟؟خلاص صار اللي تبينه..ابويه بياخذ فلة يارنا وبسكنها فيها
نوره تقرب منه وتحط يدها اليمين على كتفه اليسار وتسند راسها على كتفه اليمين..:حبيبي..خل نسكن بروحنا..انا مليت من العيشه هنيه...وهناك برتاح اكثر...وبعدين بنسوي باب امبينا وانت كل يوم عندهم..حبيبي دخيلك..خل اعيش مرتاحه ببيت بروحي..
فهد فخاطره(ياكثر طلياتج يا نوره..والله صرت ما افهم عليج...
نوره:شو قلت حبيبي؟
فهد:ما ادري...اخاف اقول لبويه ويكنسل ما ياخذها
نوره بسرعه وبيدينها الثنتين:لا لا لا لا خله ياخذها قبل..وعقب ما يشتريها بنتحول فيها..(بدون نفس:اما النسره خلها تسكن هنيه
فهد حاس بوز:اوفففففففف
نوره مبتسمه وتدف كتفها بكتفه:يالله عاد والله بناخذ راحتنا اكثر فبيت بروحنا
فهد حك يبهته........
صحيح ان شخصية فهد ممكن للبعض يقول انها شخصيه ضعيفه رغم شكله اللي ما يوحي بالضعف ابد..بس فهد حب نوره قبل الزواج...واهله كانوا معارضين لانهم ما يعرفون اصل البنت وفصلها..وكانوا يبون يخطبون له بنت خالته اللي عرسها بعد كم يوم(اللي بياخذها عبيد ولد خالة ميثه) بس فهد رفض وماطاع ياخذ غير نوره..وبطلعت الروح وافقوا اهله يزوجونه نوره..
بو فهد اتفق ويا بو علي على البيت وليش ان بو فهد صاحب وجار لبو علي ..بو علي ماقصر ونزل له من قيمة الفله وايد لخاطر عيون ربيعه بو فهد....وتوكلوا على الله واشترى بو فهد الفله ..

اليوم عرس عبيد ولد خالة ميثه.............

فالعرس..كان الكل حاضر....وحتى نوره زوجت فهد....

بعد صلاة العشاء طلعت ميثه وشواخ من الصالون متوجهات للقاعه........
.....من جهه ثانيه فهد وسيف يالسين يعبون بترول فالشيشه..
ميثه:اوه!!!لازم نعبي بترول
شواخ شهقت:الحين؟؟؟؟؟؟حلفي؟؟؟؟
ميثه:ههههههههه ليش احلف بعد؟فيها توصلنا القاعه بس ما فيها ترجعنا
شواخ طلعت عطر من شنطتها رشت شوي..
ميثه:هيه انتي
شواخ:تبيني انروح بترول يعني؟
ميثه:ههههه انزين صبري لين نخلص ونعبي قبل
ميثه وقفت فالشيشه جنب سيارة فهد
فتحت شوي من الدريشه بعد ما غطت عيونها بالشيله زين لانها متمكيجه
ميثه:عب 100
وسكرت الرديشه
سيف :شوف شوف
فهد لف وين ما يطالع سيف
سيف:شوف مب سياره عندها..شكلها غنيه
فهد يطلع بوكه ويشوف الفلوس:ونحن شكو؟شو نباها عليها بالعافيه
سيف يلف يشوفه:والله انك لوح
فهد يطلع 200 من اليوك:وليش عاد؟
سيف:ياخي حس فيه!!انا ع باب الله..وانت يا دووب ممشي عمررك
فهد:الله يطول عمر امايه وابويه..والوظيفه بعد ما محتاي شي والحمد لله نعمه من عن ربي
سيف:ما قلنا شي..بس بعد زيادة الخير خيرين
فهد يفتح الدريشه ومطنش سيف
فهد:حووووووووووو تعالي خلاص انترس التانكي
الهندي كان بيروح بس سيارة ميثه خلصت وهوه جنبها,,فرجع هوز البترول محله وسكر لها غطاء فتحتة البترول وراح لدريشتها وماشاف غير ال100 درهم ممدوده من طرف الدريشه حتى اصبوعها ما بينن
سيف يطالع يتلفت يمكن يلمحها ....
الهندي رجع لسيارة فهد .........
ميثه تتحرك جدامهم..وفهد حاسب الهندي ومشى وراها...
شواخ تفتح العشوه وتلف المكيف عليها:اووفففف بيخترب مكياجي
ميثه مغمقه سيارتها كامله ولو واحد برا مستحيل يشوف من داخل...
ميثه تفتح شوي من نقابها..ومبتسمه وطالعه تخبل مكياج حلو يجنن صح انه خفيف بس مخليها ملاك ماشالله...
سيف:غريبه
فهد:شو الغريب انشالله يا سيد سيف؟
سيف:ما تلاحظ انها تتجهه لقاعه العرس؟
فهد:انزين يمكن تكون معزومه انت شو تبا الحرمه .؟اول مره تشوف وحده تسوق؟؟؟
سيف:لا بس اتصدق خاطريه اعرف من هاي ياخي ياني فضول
فهد يعطي اشاره لها انه يبا يتجاوزها
ميثه تنتبه:شو يبا ها؟
شواخ تلف:منوه؟
ميثه:ماتشوفيه يعطي اشاره
شواخ:خوزي عن دربه شكله مستعيل
ميثه لفت عنه وفهد تجاوزها مسرع
ميثه بصوت واطي:الله يهديك عن هالسرعه
وصل فهد وسيف قبلهن للقاعه وسار يلس ويا المعرس اللي يكون صديق سيف وايد...بس يعرف فهد معرف سطحيه..يلسوا ويا الاهل يحرسون لين يتعشن الحريم ويدخلون العروس...
ميثه وشواخ دخلن القاعه فصخن عباياهن ويلسن سوالف بعد ما سلمن على امهاتهن...
ام فهد يت صوب ام ميثه:مرحبا مرحبا
ام ميثه مبتسمه ويوايهن بعض:ياهلا وغلا بالقاطعه وينج من زمان ما شفناج؟
ام فهد:ههههه الا انتي قاطعه محد يشوفج ولا شي
ام عبيد(ام المعرس وخالة ميثه وام شواخ)ياهلا وغلا والله يا هلا
ام عبدالله(ام العروس اخت ام فهد)يا هلا يا هلا
الكل يرحب ويأهل ويسهل...
ام فهد مسكت ام ميثه وشلتها يانب وقالت:يت ميثه؟
ام ميثه مبتسمه:هيه اكيه وين تشوفينها؟
ام فهد تشوف وين ما تأشر ام ميثه ووسعت عيونها..شافت ملاك ماشالله:ماشالله ماشالله..من زمان ماشفتها وايد متغيره وصايره قمر
ام ميثه:بسير ازجرها لج صبري
وسارت ام ميثه تنادي ميثه اللي ما عندها خبر بالموضوع...
ام فهد تسمي وتقرا على ميثه لا يصكونها الحريم بعين...
ميثه استغرب:منوه هاي امايه؟
ام ميثه تمسك بنتها بيدها وتمشيها صوب ام فهد:بتعرفين بعدين تعالي سلمي عليها
والحريم يطالعن ميثه من الصبح وخاطرهن يعرفن من هالقمر...
ام فهد تفتح ايدينها وتلم ميثه المنصدمه وتبوسها شرق وغرب:هلا هلا ببنتي ميثه هلا بالعروس هلا
ميثه انصبغت احمر..بس ما حبيت كلمة عروس ميثه:هلا والله خالتي شحالج؟
ام فهد ماسكتها من ذراعها:تف تف تف عليج من العين بسم الله عليج
ميثه منصدمه وتطالع امها
ام ميثه:هههههه الله الحافظ يا ام فهد
ام فهد تسحب ميثه وتيلسها جنبها:يلسي امايه يلسي
وميثه مفتشله ما تبا تيلس بس يلست لا تفشل الحرمه
ام فهد:جنج ما عرفتيني
ميثه مستحيه وطالعت الصحن اللي جدامها مفتشله
ام فهد تضربها على كتفها بخفه:افا بس افا انا خالتج ام فهد..نسيتين يوم ايب لج البثيث؟
ميثه تذكرت ووسعت بعيونها:خـالوه عاشه؟
ام فهد:هههههههههه توج تتذكرين؟
ميثه حطت المستحى جنبها ولفت عليها تشوفها:من زمان ماشفتج خالوه والله متوله على بثيثج
ام فهد بسوالف:ههه الحين متولهه على بثيثي بس؟
ميثه ردت لبست المستحى:ههه لا خالوه مب قصدي والله ..بس صدق تولهت عليج
نوره وقفه ورا ميثه وبدون نفس ورافعه خشمها:هذا مكاني
ميثه انصدمت ووقفت:اسفه والله مو قصدي ايلس مكانج..تفضلي استريحي
ام فهد ما عيبها اسلوب نوره..بس لو تدري انها تباها لفهد ان جان جتلتها الحين
ام فهد تاشر لكرسي ثاني:انزين يلسي الكراسي وايد
نوره تيلس محل ميثه ومسويه طاف لام فهد اللي انقهرت
ميثه حست بحساسيه فالجو:خالتي انسير انسلم عالعروس ؟قبل ما يدخلونها خلاف بيدخل المعرس وما بنواحي
ام فهد تقوم مبتسمه وياها ويسيرن مسويات طاف لنوره المقهوره محلها ومب مطمنه لميثه ابد...بيني وبينكم غارت من ميثه بحلاتها وجسمها الغرشوب وشعرها الطويل اللي فاتحته وشوي لا يوصل ركبتها...حست بقلبها يدق بقو من شافتها ما ارتاحت لها...
ام فهد ماسكه يد ميثه المنحرجه منها ويمشن صوب غرفة العروس...وقفتهن حرمه وتسلم عليهن وعقبها خمس حريم وكل مره حد ايي يسلم بس بصراحه الحريم يبن يعرفن ميثه بنت منوه؟؟؟
ام فهد عرفت زين لهن بس عرس وما تبا الحريم يقولن ما تبا تسلم عليهن.
ميثه داخ راسها من كثر الحريم اللي يسلمن عليهن بس مب مستوعبه
الحريم بكلام متداخل:شحالج امايه..بنت منوه انتي...؟....بسم الله عليج..الله يحفظج لهلج...ماشالله ماشالله..
ام فهد مسكت ميثه بقوه وقالت:هاي حرمة ولديه
ميثه انصدمتO~oO~
ام فهد مشت بميثه لغرفة العروس وميثه مصدومه والحريم تفارجن بعد ما خاب املهن ..
ام ميثه مسكت يبهتها:الله يسامحج يا ام فهد اسميج عكيتي وانا ما رمست البنت بعدني(عكيتي=خربتي الموضوع
.....
ميثه قالت فخاطرها يمكن ان ام فهد قالت جذيه عشان الحريم يسكتن او شي..لا لا ما ظنتي..احسن ما افكر وايد
ام فهد وميثه سلمن على العروس وراحن وميثه استأذنت من ام فهد وراحت عند شواخ
..................
بعد ما خلص العرس............
فبيت بو فهد....
فهد:هاه امايه عسى استانستوا بالعرس.؟
ام فهد:يالله يالله ع العرس و اللي بالعرس
فهد ما فهم؟؟؟
نوره:اقول عموه
ام فهد:قولي
نوره:منوه ذيج البنت اللي كنتي تكلمينها وسرتي وياها عند العروس؟
ام فهد:وحده>>ياخطير انته محدش أدك
نوره:ادري انها وحده وانا قلت واحد؟
فهد ما عيبه كلام نوره وطالها بنظره نوره تتدارك الوضع:اقصد يعني اذا معرسه لو لا
ام فهد:لا والله مو معرسه مخطوبه
نوره:اهااا قلت فخاطريه جن تعرفينها زين بناغي عمتيه اتدور حرمه لعبدالرحمن ولدها
ام فهد:لا لا لا لا خله يستريح هالبنت بالذات لا
نوره بصوت واطي:خيبه وانا شقلت كلتني
فهد\:هههه شمعنا هالبنت يعني؟دام نوره عاجبتها خطبوها لولد عمتها
ام فهد:ما تفهم انت هاي بالذات لا
فهد:ابا اعرف انا انتي ليش مصممه لا لا لا!!!؟
ام فهد بصوت واطي:لانها خطيبتك
نوره سمعتها ووقت بسرعه:شوووووووووووووووووو� �ه؟
فهد ما مستوعب ما يجمع ابسرعه
ام فهد بعفويه:حشى مب أذون عليها|
نوره انصدمت من حلاة هالبنت وقالت اكيد فهد بيستخف عليها ان شافها...وانها مو عوده مثل ما كانت متوقعه
نوره:خطيبت فهد؟؟؟ حسبي الله عليج..حسبي الله عليج
وطلعت تربع فوق........
فهد توه استوعب ان نوره شافت خطيبته فالعرس..ولا فوق هذا اعترفت انها حلوه تبا تخطبها لولد عمتها..والحين اكيد نوره بتستخف صدق...
فهد:امايه!!!!شو هالكلام الله يسامحج
ام فهد حاطه يدينها على صدرها وموسعه بعيونها:تحّسب عليه سوّد الله ويها
فهد بصوت قوي:امايه؟؟؟؟؟؟؟؟؟؟؟؟
ام فهد عقدت حواجبها:وانت؟؟؟ مب رايم تمسك حرمتك وتربيها؟؟؟؟؟
فهد وقف ما عرف شو يقول غير:لا حول ولا قوة الا بالله..اكيد بتكثر المشاكل الحين يا امايه وانا مب ناقص..كفايه شغلي
وطلع فوق .....
ام فهد:علمته حسبي الله عليها..مب رايم يتحمل كلمه من حد..وانا شو قلت تراني..خطيبته!!!>>بيّض الله ويهج بس عكيتي
...........
......................
ميثه موسعه بعيونها:يعني صدق؟؟؟؟؟؟؟
ام ميثه:هيه يامايه ..هيه خطبتج لولدها فهد..ما تذكرينه فهد؟
ميثه:يا امايه اي فهد الحين اي خرابيط ومن قالج اني ابا اعرس؟؟
(ميثه تذكرت معاناتها ويا جاسم الله يرحمه...
ميثه وقفت بسرعه:مو موفقه..
ام ميثه وقفت:يا بنتي يلسي شوي
ميثه شوي وتصيح:امايه دخيلج..انا ...انا..........انا ارمله...تعرفين شو يعني أرمله؟
ام ميثه:وحلوه وصغيره..والا سواه بج جاسم انسيه الحين..خلاص يامايه..حمدي ربج انج ما يبتي ياهل منه والا بيحشرونا اهله هالخمه..وبعدين انتي وايد صغيره على كلمة ارمله
ميثه:بس انا ما نسيت.كيف انسى شخص هاني وعذبني وفوق هذا جتل لي ولدي؟.ما اريد اعرس..دخيلج يا امايه لا تغصبوني مثل ما غصبتوني على جاسم...يعني الحين يتنكرين اني أرمله!
ام ميثه:ما انكر..بس سمعيني عدل....من بيطق بابنا غير الارمل والمطلق واللي معرس والشواب؟؟
ميثه مب قادره تستوعب امها شو تقول
ميثه:الحين انتي تبين الفكاك مني؟؟؟؟انا مضايقتنكم بشي؟؟مثقله عليكم بشي؟.خبريني..خبريني وبشل قشي وبطلع من البيت اذا وجودي يزعجكم..
بهاللحظه دخل بو ميثه..
ام ميثه خبرت بو ميثه بالوضع قبل ما يوصل من السفر
بو ميثه:السلام عليكم
ميثه مسحت دمعه كانت توها بتنزل
ام ميثه وميثه:وعليكم السلام...
ويسلمون عليه ويلس بو ميثه وام ميثه جنبه وميثه مقابلتهم....
بو ميثه:انا اعرف بكل شي
ميثه رفعت راسها تبيه ينقذهاا من هالزواج
بو ميثه:وانا من راي امج
ميثه تحطمت,,ونزلت راسها
بو ميثه يكمل بعقليه:الحين يا بنتي انا وامج مب دايمين لج..اللي صار قبل انسيه ولا تفكرين به ابد....كان اختبار من الله على صبرج وتحملج..وانتي يا بنتي بنت مؤمنه وخايفه الله..
ميثه منزله راسها وتحاول ما تصيح...وتحس بغضب بس كاتمه نفسها
بو ميثه يكمل\:ع حسب علمي ان الريال متزوج بس ما ياب عيال..واذا ما تبين تسكنين ويا اهله انا بشرط عليهم يسكنونج بيبت بروحج
ام ميثه:والله يا بو ميثه ان ام فهد حرمه تنحط عالجرح يبرا..وحتى ميثه تعرفها زين مازين..كانوا جيرانا قبل
بو ميثه مبتسم:هاه يا ميثه..يا بنتي نحن مب دايمين لج....وبعدين فهد ريال والنعم فيه...
ميثه قوت نفسها وقال:تقول ان ما عنده عيال..يعني يباني ايب عيال وبس..ابويه ما اريد اعرس
(ميثه اصلن تموت على العيال بس كرها لجاسم خلاها تخاف تحمل وتيب ياهل تخاف يتعقد والا يستوي به شي)
ام ميثه:يعني تبين تفهميني انج ما تحبين العيال؟وبعين شو فيها.؟يمكن انتي تاخذين محلها
بو ميثه ":خلي هالكلام عنج محلها ما محلها...ميثه حبيبتي..فكري زين...اليوم ياج متزوج بس باجر يمكن ايج واحد فالخمسين...انا ابا مصلحتج...فكري زين...اذا ما وافقتي الحين يمكن اوافق على اول يخطبج بعده..لاني مب ناوي اخليج يالسه فالبيت عندي
وقف بو ميثه وسار عنهم
ميثه تمسح دموعها وتحاول ما تصيح:امايه
ام ميثه تيلس جنبها:يا بنتي وافقي مب زين تيلسين فالبيت جذيه انتي ارمله تعرفين شو يعني ارمله؟
ميثه ما تحملت لمت امها وصاحت......


..انتهى البارت الثاني واتمنى انه يعجبكم..
توقعاتكم للبارت الثالث..