[فيتامين سي]

البــــــــــــارت الرابـــــــــــــع

مر الوقت على ميثه وهيه تفكر وتفكر.بموضوع زواجها من فهد..ما تبي توافق تخاف تعيد معاناتها الأوليه...وفي نفس الوقت ما تبي تظلم فهد يمكن يكون ريال محترم صدق مثل ما يقولون عنه وينسيها عيشتها الزفته ويا جاسم الله يرحمه...
ام فهد زارت ام ميثه تبي تسمع قرارهم.......
ام ميثه:قربي قربي زارتنا البركه
ام فهد تفتح غشوتها:ساعتج ابرك يا الغاليه
ام ميثه تتقرب وتمد يدها:تفضلي تفضلي استريحي
ام فهد تيلس مبتسمه وين ما اشرت لها ام ميثه:شحالج ام ميثه
ام ميثه تيلس جنبها:ابخير وسهاله شو حالج انتي وشحال بو فهد وفهد
ام فهد:ابخير الحمد لله يسرج حالهم..شو ميثه وعلي؟
ام ميثه:ابخير الحمد لله...
ام ميثه توقف:نـــــامي..نـــامي هاتي القهوه..
ميثه كانت فالمطبخ تسوي سويتات...
نامي يت مسرعه ووقفت بسرعه قبل ما تدعم ميثه وحطت يدينها على صدرها بسرعه:بسم الله الرهمن الرهيم
ميثه:بسم الله بلاج ؟؟؟؟؟؟؟؟؟؟
نامي تضرب ويها طراق خفيف عشان تصحى اوين>>خدامتهم مصفوقه شوي عليها خفه دم وعقل
ميثه:خيبه رد بها طرانها)طرانها..مرضها او عوقها تقصد الخفه
ماني:لا لا لا ميسووه(تقصد ميثوه)....ماما يريد قهوه في هورمه برا صديق يمكن
ميثه:اهاااا زين اكيه القهوه شليها وسيري..اقول..تعرفينها انتي؟
نامي تشل الصينيه:لا ما في معلوم. انا اول مره يشوف
ميثه نغزها قلبها....:انزين شو موقفنج؟؟سيري وصلي القوه وتعالي اباج تساعديني..
نامي هزت راسها:جين جين ون منت
ميثه وسعت عيونها:....ون منت؟؟؟؟اول مره تقولها!!!
نامي طلعت وشكلها مطيره ومستعيله..
ميثه:خخخخخ شكلها بتمردغها امايه اليوم(بتمردغها=بتضربها
نامي دخلت المطبخ مطيره مره ثانيه:ميسووه ماما يريد برا
ميثه:شوه؟
نامي بهزت الراس:انتي ما يسمع؟؟ماما يريد برا...هازا هورمه انا اسمع يقول يبي يشوف انتي
ميثه:مسرع سمعتي الحجي يا ام الحجي ..قومي قومي عني بسير برا..(تأشر للصحن.:يوم يبرد هاتيه برا
نامي تاخذ بسكوته وتفرها بثمها:جين ميسووه
ميثه تهز راسها دوم تضحكها نامي وسوالف عليها:خخخ
نامي فتحت حلجها ع الآخر وتربع تشرب ماي
نــامي:آآآآآآآآآآآآآآآه هازا زياده هـــــــــــار..
ميثه:وانتي شو كالفنج؟؟لو تسمعين الكلام جان ما حرقج البسكوت..ما قلت لج يوم يبرد هاتيه؟؟تراه حار يالخسفه..
وطلعت ميثه ونامي تشرب ماي وتهز راسها....
ميثه شافت ام فهد وبلعت ريجها..(الله يستر..الله يستر..
تقربت ميثه وسلمت:السلام عليكم
ام فهد توقف مبتسمه وتتقرب منها تبوسها وتضمها:وعليكم السلاااااام ورحمه الله شحالج يامايه وشخبارج؟
ميثه مستحيه منها..:ابخير خالتيه الحمد لله..شحالج انتي؟
ام فهد:ابخير وسهاله..شو الدوام؟
ميثه: ههه الحمد لله زين
ام فهد تمسكها من يدها:تعالي امايه يلسي عدالي
وتيلس ام فهد وهيه ساحبه ميثه جنبها..
ام ميثه تقوم:من رخصتج شوي..بسير اشوف علي عليه امتحان واحيده فوق يذاكر..
ام ميثه متعمده تخليهن بروحها لان ام فهد طلبت منها هالشي يوم عرفت ان ميثه ما قررت لين الحين..
ام فهد مبتسمه:ميثه شحالج؟
ميثه كانت تشوف امها ومستغربه علي ما عليه امتحان!!
ميثه تشوف ام فهد:ابخير خالتي
ام فهد ما عارفه كيف تبدا بالموضوع وياها:أاا مم أأا ...
ميثه عرفت انها تبي تكلمها بموضوع العرس..ميثه حاسه بمشاعر مختلطه...تبي اتصيح..تبي تعصب...تبي تصارخ...ما تبي تحرج ام فهد...اكتفت بالسكوت ومنزله راسها...
ام فهد:ميثه امايه...
ميثه :..................
ام فهد:تبين الصدق..ما اعرف شو اقول...والله اني حبيتج من كل قلبي...وما بلقى وحده اخير منج لولديه فهد...
ميثه:.....................
ام فهد بلعت ريجها:ميثه حبيبتي...شو رايج بالموضوع...؟
ميثه خانقتها العبره ومستحيه من ام فهد..
ام فهد:والله يا ميثه اني بحطج بعيوني...انا اعرف انج رافضه
ميثه رفعت راسها (كيف عرفت)
ام فهد:يابنتي مو كل الريايل مثل بعض..واللي صار ويا زوجج الله يرحمه..اختبار من عند ربج...وانتي يا بنتي بعدج صغيره والدنيا جدامج...واللي تسوينه حرام..
ميثه حست ان الكلام مارايم يطلع من يوفها..(حلجها):بس..
ام فهد:حتى لو ما تبين فهد..محد يقدر يغصبج بشي...بس يابنتي عرفت انج رفضتي حتى ولد خالتج
(ام عبيد خطبتها لعبيد بدون حتى ما تشاور عبيد اللي يشوفها مثل اخت بالنسبه له.بس ميثه كانت نفسيتها التعبانه بذيج الفتره ورفضت لان عبيد مثل أخوها.وما قدروا يضغطون عليها)
ام فهد تكمل:حبيبتي محد بيقوم بج ولا بيراعيج غير ظناج..اهلج ما بيدومون لج...
ميثه نزلت دمعه من عينها وهيه منزله راسها ما تبي ام فهد تشوفها
ام فهد شافتها ونزلت دمعتها رحمت ميثه وايد..ياحليها كيف متعذبه فعيشتها...ام فهد تلم ميثه وتخليها تصيح فحظنها:لا تكدرين نفسج يا بنتي..لا تصيحين ولا شي..ما بيصير غير اللي تبينه..ولا يهمج حد..
ميثه وايد ارتاحت من حظن ام فهد لها...وايد حبتها وحست بالامان وياها...
ام فهد تقوم ميثه من صدرها وهيه مبتسمه..وتمسح دموع ميثه:خلاص امايه ما اريد اشوف دموعج...ما بيصير غير اللي تبينه..
ميثه حست انها ياهل جدام ام فهد...ونزلت راسها..
ام فهد ترفع راس ميثه بصبوعها:ميثه!!(بأسلوب مميز ومضحك:افااااااااااااااااا بتقلبين زيارتيه لج هم وصياح؟؟؟ما اروم اصيح انا وان روحت البيت ما بيعرفني بو فهد من عيوني المتنفخه وبيشوتني برا البيت
ميثه :هههههه
ام فهد:خخخخخ هيه توج حرمه..خلي الصياح عنج يانب...
ميثه حست براحه كبيره...
ام فهد بجد:سمعي حبيبتي...صلي استخاره...وعقبها قرري...وسواء وافقتي او لا..انا ما بزعل منج ولا شي...
ميثه هزت راسها:انشالله خالتي
ام ميثه نزلت عندهن واستغربت تشوف ام فهد وميثه شكلهن كانن يصيحن...بس ما علقت على الموضوع ويلست مبتسمه:ياهلا والله ام فهد..
ام فهد :هلا فيج والله
نامي يت وحطت صحن البسكوت فالنص وتهز راسها لميثه..
ميثه تشوف ويه نامي وارم:شو فيج؟.
ام فهد تطالع فم نامي:خيبه لا يكون فيها خاز باز
(خازباز=مرض..يورم الفم والحلق,,
ام ميثه:بسم الله...شو فيج نامي؟؟؟؟
نامي طلعت الثلجه من حلجها وبصوت عالي وتاشر للبسكوت:هازا حرك لسان مال انا
ميثه وام فهد وام ميثه:هههههههههههههههههههه� �هههههههههههههههههههههههه ههههههههههههههههههههههههه ههههههههههههههههه
ام فهد:ههههه غربل الله عدوها
ام ميثه:هههه زولي داخل سيري..فضحتينا ويا لسانج هذا
ميثه تتكركر بروحها:خخخخخخخ
نامي ترد الثلجه في ثمها وتروح داخل.....
...............
ميثه فالليل بغرفتها...فارشه سيادة الصلاه ولابسه حجاب الصلاه ورافعه يدينها تدعي الله...

بعد يومين من زياره ام فهد لبيت ام ميثه....

بو ميثه:وافقت؟؟؟؟؟؟؟؟؟؟؟؟؟؟؟� �؟؟؟؟؟
ام ميثه متشققه من الفرحه.هيه(تيلس جنب بو ميثه:توها تقولي انها وافقت...صلت استخاره وارتاحت وايد....بس قالت ما تبا عرس..
بو ميثه:الله يبشرج بالخير...بس ليش؟
امميثه:خلها براحتها|...مع اني ابا اسوي لها عرس ينسيها جاسم حسبي الله عليه بس ما اريد اضغط عليها
بو ميثه:لا تحسبين على الريال..الميت ما تيوز عليه غير الرحمه
ام ميثه:استغفر الله العظيم..الله يرحمه....من اللي فيني لا تلومني يا بو ميثه
بو ميثه يقوم:الله يكتب اللي فيه الخير..بسير العزبه بتسيرين ويايه
ام ميثه:لا ما بسير بس ميثه تبا تسير وياك قايلتلي يوم تسير تبا تسير وياك
بو ميثه ابتسم:يالله بترياها تحت
......
ميثه كانت تلم شعرها دخلت عليها امها وخبرتها ان ابوها يحرسها تحت..لبست ميثه عباتها ونقابها ونزلت بسرعه...
..ميثه وايد تحب تروح العزبه تحس براحه كبيره يوم تكون فالبر....
بو ميثه يالس فالسياره نيسان1012 على السيت الثاني...
ميثه شافت ابوها ابتسمت وركبت على سيت الدريول..
ميثه:السلام عليك بو ميثه
بو ميثه:هههه بوميثه عاد؟وعليكم السلام(يناولها السويج:تفضلي
ميثه تتناول السويج وتشغل السياره:هاه طال عمرك ع العزبه؟
بو ميثه:بسم الله توكلنا على الله
ميثه:والنعم بالله...
وتحرك ميثه صوب العزب....
فالسياره..بو ميثه حاس بندم..يطالع ميثه...:ميثه
ميثه:نعم بويه
بو ميثه:قالت لي امج انج موافقه
ميثه استحت من ابوها وارتبكت:انشالله
بو ميثه:اذا ماب مقتنعه بلاه الزواج.
ميثه ابتسمت:انا صليت استخاره..والحمد لله وايد مرتاحه.
بو ميثه:انا حاس اني ضغطت عليج شوي
ميثه مبتسمه:لا بويه عادي..انا عارفه انك اتدور مصلحتى..
بو ميثه حط يده على يد ميثه اللي كانت على القير:الله يوفقج انشالله
ميثه لفت مبتسمه على ابوها وردت اتشوف الدرب
بو ميثه حس ان ميثه هالفتره وايد متغيره..صايره تسولف اكثر من قبل وتبتسم أكثر..الله يسعدها يا رب..
..........................
بوفهد حاط غترته على كتفه وواقف بنص الصاله:فــــــــــــــهد
فهد كان توه ينزل من الدري بشكل سريع:خير ابويه بلاك؟
بو فهد:تأخرت انقفض
فهد وصل لبوه:يالله مشينا .
بو فهد:يالله..ما تشبع رجاد؟نهار وليل؟
فهد:ههههه يالله يالغالي تفضل
مشى بو فهد وفهد رايحين للعزبه....
فالسياره:اقول ابويه..
بو فهد:هاه؟
فهد:خلاص خذيت الفله؟
بو فهد:هيه...ليش تتخبر؟
فهد:أه؟؟؟لا بس علشان اشتري لها اثاث
بو فهد:لا تتعب عمرك.بخلي ميثه تختار الاثاث كامل
فهد:من ميثه؟
بو فهد وسع عيونه..:الحين نحن من زمان عن منوه نتكلم؟؟؟حرمتك اليديده...
فهد:اهاااا...بس انا ما كنت اعرف اسمها
بو فهد:وها انت عرفت..
فهد:ابويه بقولك شي بس لا تزعل
بو فهد:خير من الله..دامك يالس تمهد لموضوع..الله يستر بس
فهد بلع ريحه:ابويه...انا ....بحط..نوره فالفله
بو فهد ابتسم على جنب وكأنه كان متوقع ..:انزين؟
فهد استغرب ردت فعل ابوه...:وبخلي الارمله عندك
بو فهد عصب من سمع فهد يقول الارمله:فهد؟؟؟استح ع ويهك..البنت اسمها ميثه...
فهد:خلاص خلاص ما صار شي لا تاكلني...تراها ارمله !!
بوفهد:بس البنت بعدها صغيرونه توها اول العشرين لو كانت ارمله مب زين منك تقول هالكلام وهيه بتكون حرمتك
فهد:شوه؟؟فالعشرين؟؟؟؟اتحر� �ها اكبر عني!!
بو فهد:امك قالت لك انها عوده؟
فهد:لا بس...ما توقعت انها تكون صغيره ...اقصد..يعني ....قلت يمكن تكون فالثلاثينات
بو فهد بنفس مرتاح:لا,,,,البنت صغيره وايد....وانشالله بتعيبك على تمديح امك لها
فهد حاس بوز...:ابويه...انا عندي شغل شوي...عقب صلاة المغرب بيي اشلك....بس ما عندك مانع ان نوره تسكن فالفله؟
بو فهد:لا ..ما عندي مانع...لو تبا اليوم تقدر تتحول فيها..بس الاثاث اشتره بمالك..
فهد ما توقع ان ابوه يوافق بهالسهوله:مشكور ابويه الله يطول بعمرك...
....بو فهد كان عارف بهالشي من قبل..عارف انه بياخذ الفله وان نوره اللي بتسكنها..يدري ان نوره مب هينه..وان لو سكنت بروحها بتطير عيشة فهد اللي من تزوجها من 6 سنين وهوه متغير 180 درجه.حتى العزبه ما ايلس فيها مثل ما كان قبل 24 ساعه فيها..وبعدين حاس بحنيه صوب ميثه اللي لين الحين ما شافها..بس من خبرته ام فهد كيف كانت عيشتها قبل ما تترمل..خاف يخليها بروحها وحس بالشفقه عليها..فحب ان ميثه تكون عنده فالبيت ويجابلها وما يقص عليها فهد بكلمتين من كلام نوره..
وصلوا العزبه ونزل بو فهد وفهد سار يخلص اشغاله....
قبل اذان المغرب بو فهد بعد ما عشى بوشه وخلص يحرس فهد ايي.:اووهوووو شكله نساني مسود الويه..انا براويه...
ويمشي بو فهد صوب العزب يمكن يلاقي احد يرده البيت...
مشى على كمن عزبه وما لقى حد فيهن غير العاملين...وشاف من بعيد سيارة بو ميثه توه بيتحرك..بو فهد يلوح بغترته:هحووووووووووووو حووووووووووووو وقف وقف..حووووووووووووو
بو ميثه:صبري صبري
ميثه توقف السياره:خير ابويه؟
بو ميثه:شوفي ذاك الريال
ميثه تشوف:يمكن يبا شي..
بو ميثه نزل ويوم تقرب بو فهد عرفوا بعض...وسلموا على بعض...
بو فهد:والله قلت انك بتسير ما لقيت حد يردني البيت
بو ميثه:افا والله فالك طيب...
بو ميثه ينادي ميثه تطلع من السياره وميثه استحت ما تعرف الريال..يالفشله
ميثه :السلام عليكم
بو فهد عرف انها ميثه:وعليكم السلام والرحمه..شحالج ميثه؟
ميثه:ابخير عمي شحالك انته؟
بو فهد:الحين انا بخير يوم شفتج
ميثه استحت وحليلها...(طبعا ميثه متنقبه)
بو ميثه:ميثه امايه ..هذا عمج بو فهد..ابو فهد اللي بيكون زوجج انشالله
بو فهد وسع عيونه فهم ان ميثه وافقت...
بو فهد لف براسه يشوف بو ميثه
بو ميثه هز راسه(نعم موافقه)
ميثه ودت ان الارض تنشق وتبلعها من المستحى...
بو ميثه:امايه ميثه وصلي عمج بيتهم..
فهاللحظه تلفون بو فهد صاح...:ألو
(نخلي بو فهد وفهد يتكلمون ونسير صوب ميثه اللي تقربت من ابوها وتقوله انها تستحي توصل ريال غريب
بو ميثه ابتسم ومسك السويج عنها)
فهد:ابويه وينك؟؟؟انا فالعزبه...
بو فهد:يالله يالله الحين بيي اصبر.(سكر بدون ما يسمع من فهد..
بو فهد:امايه ميثه وصليني العزبه...ريولي عورني من كثر ما مشيت
بو ميثه:يالله انا بوصلك
بو فهد:تعالي امايه لا تيلسين بروحج هنيه والا تستحين مني؟
ميثه:ههه لا عمي بس بيلس عند البوش شوي
بو فهد:ما تتروعين تنقز عليج واحده منهن
ميثه:هه لا عمي
بو ميثه:ههههه لا تخاف بو فهد ميثه رابيه وياهن من يوم يومها
بو فهد:هه ما شاء الله انتبهي ع عمرج امايه
ميثه:انشاء الله عمي
وتوجهه بو ميثه بعد ما ركب بو فهد ..صوب عزبة بو فهد..

ميثه مبتسمه لناقتها تمسح شوي على رقبتها وعلى راسها..

فهد يالس يمسح على راس الناقه والناقه كأنها تعاتب فهد اللي من زمان ما شافته وتهز راسها بقو..
فهد:هههههه...افا يالمملوحه افا.(المملوحه اسم ناقته
فهد:هههه تعالي تعالي..يمسك راسها زين ويخاشمها:اسف يالغاليه بطيت عليج...
سمع صوت سياره تتقرب فتح ناقته اللي كان لاوي عليها ولف براسه وشاف ابوه ينزل من السياره ونزل بو ميثه لانه شاف فهد.
بو فهد:فــــــــــــهــــد
فهد يتقرب ويسلم على بو ميثه
فهد:شحالك عمي
بو ميثه مبستم:ابخير وسهاله شحالك فهد؟
فهد:ابخير الحمد لله قرب
بو ميثه:قريب يالله بو فهد من رخصتكم
بو فهد:افا قرب بتاخذ لك فنيان
بو ميثه:لا والله مستعيل .ما اروم اخليها بروحها اكثر من جذيه
بو فهد فهم :هيه برايك عيل وسلم عليها
بو ميثه يرفع يده:يوصل..يالله وادعتكم
بو فهد وفهد:بحفظ الرحمن
بو ميثه حرك سيارته وسار.............
فهد:ابويه
بو فهد:شو بغيت؟
فهد:ابويه من ذا؟
بو فهد موسع عيونه:ما تعرفه؟
فهد:لا
بو فهد:كيف ما تعرفه ؟ما كنا يران من قبل؟ما تحيده؟
فهد معقد حواجبه وضام شفايفه يحاول يتذكر:امممم ما ادري..انا حاس اني شفته من قبل بس ما اذكر
بو فهد يحط يده على كتف فهد يحركه:مش مش اظلمت البقعه
فهد يمشي ويفكر...وركبوا السياره وتحركوا

في بيت عبيد...
فالحديقه الخارجيه......
شواخ يالسه على الكرسي وجنبها ميثه وفاطمه حرمة عبيد لانهم ردوا من السفر...
شواخ اللفه على ريلها خفيفه وعدوها يشيلونها هالاسبوع لانه حشرتهم شواخ ما تبيها تمللت منها
فاطمه تناول ميثه صحن وفيه كيكه وميثه مسكتها مبتسمه:مشكوره
فاطمه:العفو
وتحط لشواخ كيكه وتعطيها:اندوج شواخ
شواخ تمسكه وتحطه قدامها:مشكوره فطوم لا خليت منج
فاطمه:حبيبتي والله
فاطمه:خلصتي زهابج ميثه ؟
ميثه :هيه خلصت
شواخ:شكلج يقول غير جذيه
ميثه تحط صحن الكيك قدامها لانها كلت شوي منه:ليش عاد؟خلصت ما باقي لي شي
شواخ بنص عين:كل شي كل شي؟
ميثه:لا تشككيني خذيت شويت شغلات ومقتنعه فيهن
شواخ بنفس النظره:متأكده؟1
فاطمه:هههه شواخ خفي عليها قالت لج مخلصه
شواخ:ينخاف منها ميثوه ما تلم السوق..
ميثه موسعه عيونها:وليش ألّم السوق؟(ألّم=أخذ الاولي والتالي
شواخ:لانج عروس !! لازم تشترين وايد
ميثه:والله مو قاعده..واذا اعتزت شي المولات بكل مكان
فاطمه:صدقها ميثه
شواخ :والله انا يوم بيي نصيبي ما بخلي شي ما بخذه ..خل احس اني صدق صدق عروس
ميثه:هههه برايج..شكلج بتفقرين الريال وبعده ما يا
شواخ ترفع ايدنها تدعي ربها":يااااا رب..يااا رب
فاطمه:ههههههه تبيني ادور لج ريال رزين؟
شواخ:وووووععع لا مابا..ومن قالج دوريلي؟(بدلع:انا بعدني صغيونه
ميثه:هههه بقوم اشوف خالتيه احسن لي
وتقوم ميثه ومخليه فاطمه وشواخ سوالف وضحك
ميثه لفت الفله الداخليه وقبل ما تدخل شافت اخوها علي يمشي..ومسكت يده بنت صغيره تقريبا عمرها 9 سنوات..انا ما قلت من قبل..بس علي عمره 16 سنه..المهم البنت مسكت يد علي وعلي مبتسم نزل شي على ريوله ومسح على راسها وشكلهم يتكلمون
ميثه رجعت بها الذاكره.لورا........................... .......
ميثه عمرها 8 سنوات.......................
كانت لابسه فستان وردي ناعم وفيه ربطه من ورا وايدينه نص كم..وشعرها مفتوح وطويل يوصل أخر ظهرها..وحاطه وردتين على قصتها من فوق ولابسه جوتي ودلاغات بيض...وكانت راكبه الدرفانه(المرجيحه) فالحديقه العامه ومبتسمه وتضحك..وفجأه طاحت من الدرفانه وتعورت ركبتها..وبدت اتصيح...حست ان حد جنبها رفعت راسها وشافت واحد مبتسم ويمسح على راسها:ليش اتصيحين؟
ميثه معقده حواجبها من الالم....
فهد شاف ركبتها وبحنيه:ترومين توقفين؟
ميثه هزت راسها(هيه)
فهد عمره 17 سنه
فهد ابتسم ومسكها من كتوفها وقامت ميثه:اخ
فهد مسكها من يدها وبيدها الثانيه مسح على راسها.:تبيني اشلج؟
ميثه استحت وحليلها وهز راسها(هيه)>>اخ منج
فهد لف ع ورا وركبت ميثه على ظهره وتعلقت برقبته ومبسوطه وكأن ما فيها شي
فهد:ههههه تبينا انروح الدكان؟
ميثه مبسوطه:هيه
فهد وسع عيونه وابتسم:ههههه يالله
وساروا للدكان..اخذ لها حلاوى ونمكي وعصير.....
ورجعها للدرفانه ولقى امها تدورها..ونزلها فهد وربعت ميثه لأمها وسوت باي باي لفهد...
ردت ميثه للواقع وابتسمت لعلي اللي طلع حلاوى من مخباته وعطاها البت وردت تربع ويا صاحباتها لبيت جيرانهم اللي مقابلنهم..
علي يدخل مبتسم:هاه ميثه شو موقفنج هنيه؟
ميثه مبتسمه:منوه هالبنت؟
علي يلف براسها لبرا ويرد يشوف ميثه ومبتسم:ههه هاي كل يوم تشوفني ايي من المدرسه وتقولي ابا حلاوى..وصرت ايب لها كل يوم
(المدرسه عدال بيت عبيد وعلي يسير يمشي لانها قريبه وايد من البيت )
ميثه:هههه...غريبه شو يايبنك بيت خالتك؟
علي:امايه سوت لي تلفون تقول غدا عندهم لسلامة شيخه
ميثه:هيييييييييييييييه زين زين قرب فالميلس لين ايي عبيد
علي:وينه هوه؟
ميثه:مدري بس مو فالبيت
علي:يالله بسير الميلس انا
ميثه:برايك...
.............................
..نوره من درت ان عمها وافق..وكانت كل يوم اتسير تاخذ اثاث لفلتها..
اما بو فهد..فكسر الجدار اللي بين الفلتين >>من افكار المهندسه ام فهد..
وألغوا باب الفله الثانيه .وسكروا باب فلة بو فهد..وسووا فالنص باب كبير بين الفلتين...ورتبوا حديقه بين الفلتين بس تكون فيها جلسه ومظلات ونافوره حلوه صغيره فالنص..

ام فهد رتبت الطابق الثاني اللي في فلتها..ووسعت فيه وبدلت صبغه واثاثه والديكورات بعد....
فهد سافر فرنسا شغل.ونوره ما سارت وياه..كانت تاثث فلتها..كمل اسبوعين..ويوم خلص..كانت نوره مجهزه الفله كامله..
وبينتقلون فيها...
بعد شهرين..طبعا ام ميثه خبرت ام فهد بان ميثه ما تبا عرس..وام فهد يالله يالله وافقت وخبرت فهد اللي ارتاح لانه كان شرط من شروط نوره......
وقرروا يسوون حفله بسيطه في بيت بو ميثه..........

اليوم الحفله هوه حفله وملجه بنفس اليوم..بس بسيطه بين الاهل..
عقب ما ملج الملاج وسار..المعازيم بدوا يخفون شوي شوي عقب العشاء..بس لان فهد بيشل ميثه وبيروح بيته رباعت فهد ما ساروا لانهم بيسون له زفه مع ان فهد مخبرنهم ما يبا هالخرابيط ولا شي..
ميثه تتغشى وتنزل ...
ام ميثه بعد ما سلم عليها فهد اللي اول مره تشوفه ابتسمت ما شالله مملوح
ام ميثه:ايلس ابويه الحين بتنزل ميثه
فهد ما له نفس ايلس بس يلس بدون صوت..
ميثه نزلت متغشيه ومشت صوب امها وتفاجأة يوم شافت فهد ووقفت مكانها

... انتهى البارت الرابـــــــــــــــــع

شـــــو تـوقــعـــــــــاتكــــــ ـم؟؟