[اسطورة !]

كل ماذكرنا الدنيا نذكر العابها
وكل ماذكرنا الاخره نذكر عذابها وجنتها
انثرت كلمات قلمي...لتخرج منها الكلمات...وتنسج لكم حلقات مترابطه
لنخرج معها بقصه ...يملئها التشويق والاثاره ..والحب والكره والعذاب
قصه لن تكون من ارض الواقع
قصتي هذه من نسج الخيال ..لكن المجتمع لا يخلو منها
لا يخلو من طلب المال والطمع..لا يخلو من الحقد والانانيه..قصتي تعتبر جزء من هذه الحياه
لكنها من نسج خيالي..ولا تمد لحقيقه الواقع بشئ
الحب..الكره..الطمع..الفرح..ال حزن..الانانيه..الحقد
كلها كلمات تربط قصتنا
انــــــــــــهــــــــــ ــا
~||ورثه في دماء الحب||~
ملاحظه:صفات وطباع بعض الشخصيات مقتبسه من الواقع فقط
وبتتعرفون على الشخصيات من خلال القصه
الجزء الاول
في بيت كبير في غرفه صغيره
كانت جوري مشغله الابتوب وعلى اعلا صوت حاطه اغنيه اجنبيه
دخلت عليها ارجوان وهيه معصبه:جوريوه وصمخ طفي هذا الصنم ولا نقصيه صكيتي راسي به
جوري:اووووه وبعدين معك انتي وش تبغين في الحياه
ارجوان:وش عليك نقصي بس وبعدين جنبنا ناس استحي على وجهك
جوري:اقول اخرجي وقفلي البااب ابرك لنا
اجوان:جوري كلمه توصلك وتتعداك لو مانقصتي وربي لااعلم ابوي وهو يتصرف معك كيفك شوفيني حذرتك
جوري:يمه خوفتيني يلا اقول قفلي البااب
ارجوان:جوريوه كيفك
وخرجت وسكرت الباااب بقوه
ورجعت جوري تشغل الاغااني على اعلا صوت مثل قبل
جت ارجوان ووجهها احمر وفتحت الباب بقوه
ارجوان:وبعدين معااك
جوري:انتي هيييه انتي وش تبغين
ارجوان:جوري احترميني انا اكبر منك
جوري:اووه انتي مامليتي من سنفونيتك هذي انا اكبر منك انا اكبر منك خلاص ياعمتي درينا انك اكبر مني وش الجديد
ارجوان:ياقلبي قولي من البداايه ان انا ماانفع معك طيب انتظري شوي
راحت ارجوان عند ابوها :بابا بابا بابا
خالد (ابو ارجوان):وش فيه وش عندكم خير اللهم اجعله خير
ارجوان:بابا شف بنتك هذي
خالد (ابو ارجوان):جوري وش سويتي
جوري مسويه نفسها بريئه:بابا انا ماسويت شئ بس جالسه في غرفتي ومشغله الاغااني وحالي من بالي
ارجوان:حالك من بالك يحلييلك تصدقين تنرحمين..اقوول ابوي شوفها رافعه صوت الاغاني على اعلا شئ وجنبنا ناس
خالد (ابو ارجوان):ارجوان انتي اقعدي في غرفتك وريحينا جوري نقصي صوت الاغااني احسن لنا ولك ولا وربي لاتعامل معكم بطريقه مختلفه
جوري:يمه خوفتوني اقول روحو بس
ودخلت وقفلت الباب
جوري وارجوان يتعاملون مع ابوهم على انه اخوهم وهو الى معطيهم هذي الحريه
لكن كل شئ وله حدوود
ارجوان راحت غرفتها وقفلت البااب ومسكت الجوال ودقت على ابرار بنت عمتها
ارجوان وهي معصبه:ابراروه خير مارديتي بسرعه انا ماني شغاله تنتظر لما تردين
ابرار:بسم الله الرحمن الرحيم وش سويت لك وش فيك...ارجوان
ارجوان بنفس النبره:نعم
ابرار وهي تضحك:جوري او خالي رفعو ضغطك وجيتي تحطين حرتك علي مو
ارجوان هدت من نفسها شوي:ههه وربي يابارو يرفعون الضغط
هذي المخلوقه ترفع الضغط وخالك الشاطر كملها اقول له شوفها ويقول اشياء لا تفيد ولا تضر
بارو:هدي ياقلبي مافي شئ يستاهل بعدين انتي الى عندك اهون من الى عندي
ارجوان:ههههه وش سو الى عندك بعد
ابرار:وااي ياجون وربي انهم يجيبون المرض
ارجوان:بارو انتي مشكلتك ماتاخذين وتعطين معهاهم
ابرار:جون وش اخذ منهم وش اعطي اقول والى يرحم والديك هذولي ماينأخذ منهم شئ ولا ينعطون شئ
ارجوان:باارو عندك انتي اخوان يطلعونك ويمشونك
ابرار:ايه الحين اذا قلت لواحد منهم طلعني راحو الاثنين وتضاربو كل واحد يبي هو الى يطلعني
ارجوان:ههههههه بارو تخيلي شكل مشاري ومتعب مضاربه
ابرار:هههه تقول المضاربه بتلبق على متعب لكن مشاري مايصلح
ارجوان:ايه صح لانه متزوج بس بجد انتي لو تفقدين النعمه بتحسين فيها
ابرار:ارجوان مامعك عايله مثل عايلتي
ارجوان:ايه الى يسمعك يقول اني معي عايله امراء اقوول عايلتي هم عايلتك من طينه وحده
ابرار:ايه بس انتي ماعندك اخوان يغثونك
ارجوان:انا ابي اخوان تصدقين اني اطلب ابوي يتزوج عشان تخلف لنا اولاد
ابرار:واذا جابت بنت
ارجوان:برميها هيه وبنتها
ابرار:ههههه اتحدااك وربي ان تطردك قبل ماتطردينها
ارجوان بأنفعال:تخسى والله لا هي ولا اشكالها الى يخرجني من بيت خالد الـ.......
ابرار:الله خالد الـ....... هذا الى يسمعك يقول انه اكبر تاجر في السعوديه
ارجوان:هو صح مو اكبر تاجر في السعوديه لكن وجوده مخلي له هيبه ياقلبي
ابرار:ايه صح والدليل ان انتي وجوري تكلمونه كنه اخوكم
ارجوان:ياقلبي عليه يبغى يحسسنا ان معنا اخو
ابرار:شوفتي ماعندك الى عندي
ارجوان:اووه بارو وبعدين معك احمدي ربك على الاقل ابوك مايقعد عند راسك ويسوي لك سالفه من تكلمين ولمين ترسلين
ابرار:والله ابوك عنده عذر انه يشك في الناس كلهم بس الى عندي مالهم اي عذر
.........................................
اولا بقول لكم وش سالفه العايله
هذي عايله مكونه من 4 اولاد وبنتين
وابوهم مات وخل وراه حلااال كثير من فندق وشقق وارااضي
وصار بينهم مشاكل بسبب هذا الحلال
في ناس يفتنوون لاخوان خالد وخالد يطالب بحقه وحق بناته في المحاكم
وصارت بين الاخوان مشاكل لدرجه خلت خالد (ابو ارجوان) يتفقد بناته عشان لا يكلمون امهم الا بامره
لانه يتوقع انها راح تغير تفكيرهم لان هي اجنبيه وهم عربيات
.........................................
ناخذ نظره بالعايلتين اهل ابرار واهل ارجوان
خالد (ابو ارجوان)
خالد"عمره 46سنه مطلق وعنده بنتين ارجوان وجوري ووسيم
وهو يعصب بسرعه وماعنده وقت لتفاهم لكن ياخذ بعض الاشياء بهدوء مع بناته بس
لكن مع العالم ماياخذ شئ برويه وكان متزوج اجنبيه
ارجوان"عمرها 17 سنه ثاني ثانوي عصبيه مثل ابوها وذكيه بيضاء وعيونها زرقها وشعرها مايل لشقار و ناعم وماخذه جمال امها ماتحب الصخب وتحب الهدوء
اذا قررت شئ تنفذه لو على جثتها تحب جوري اختها لكن جوري ترفع ضغطها
تعرف تتكلم انجليزي لكن مو مثل جوري
جوري"عمرها 16 سنه ثالث متوسط ذكيه وعيونها كمان ازرق بس مايل لسماوي وشعرها مايل للبني وناعم
البعض يقول ارجوان اجمل والبعض يقول جوري اجمل تحب اختها ارجوان لكن تحب تنرفزها اكثرهذي البنت ماعندها في احد والى في راسها تسويه وتخطط وبعدها على طول تنفذ
اخت ابرار ومشاري ومتعب بالرضاعه
تحب الاجانب مره وهيه في الانجليزي طلقه لان امها اجنبيه وتعلمت منها بعض الكلام
.........................................
نروح عايله ابرار
ابو مشاري
محمد"عمره 48سنه متزوج وهو زوج عمة ارجوان وجوري وملتزم
ام مشاري
فوزيه"عمرها 45سنه اصغر من اخوها خالد بسنه فلاويه وحلوه وفيها من الهبال مثل البنات
والبنات يحبونها ويحبون جلستها معهم لانه مررره فلاويه
مشاري"عمره 24سنه متزوج وهو ولدهم الاكبر وهو عسكري
وفيه من الجمال الى مخلي نص البنات ميتاات عليه والنص الباقي طيحات
منار"زوجة مشاري"عمرها 22سنه هاديه وذكيه وفيها جمال يقارب جمال مشاري
ايمان"عمرها 23سنه متزوجه وعندها بنت اسمها ميرو
هاديه وذكيه وبيضاء بأختصار ملكة جمال ومتفهمه وتعامل ارجوان وجوري والعنود
مثل ابرار تمااما وعلاقتها فيهم مايدل على اعمارهم
متعب"22سنه يدرس في الجامعه وهو فلاوي لابعد حدوود
بنات عمه وبنات خاله وقاربه يشوفهم كلهم مثل ابرار اخته
وهو بعد فيه جمال يقارب اخوه مشاري لكن مشاري اجمل
ابرار"عمرها 17 سنه ثاني ثانوي (علمي) ذكيه وفيها جمال لاخوانها
صريحه ولا تحب الف والدوران ووجه الحق تقوله من دون ماتهتم لاحد
ماعندها في احد وماعندها وقت ولما تجتمع مع حور وجوري والعنود تصير فلاويه
واذا حطت شئ في راسها تسويه
تركي اخو ابرار الصغير بعمر جوري
جود اختهم الصغيره واخر العنقود عمرها سنتين لكن في عقلها مدن
.........................................
نرجع لابرار وارجوان
ارجوان:بارو انا جايه اوسع صدري فيك.. اقول بتداومين بكره ولا لا
ابرار:ايه
ارجوان:والعنود
ابرار:عاد هي ادبي يعني ماخذه راحتها بتداوم متى ماتغى وتغيب متى ماتبغى
ارجوان تقلدها:هي ادبي ...ورجعت لصوتها..اقول لا تحريني مالت عليها ذا العنود ماخذتها فله وهياطه وانا وانتي يحليلنا
ابرار:هههههه وش فيك عصبتي بعدين انا ماحريتك..بعدين هذا اختيارنا ليه ندخل علمي
ارجوان:والله حبيبتي انا بدخل طب ومن الطبيعي اني ادخل علمي
ابرار:كنت بتدخل طب بس لو اشوف دم بدوخ
ارجوان:ههههههه خلي انتي مسمينك الماايعه في شلتي
ابرار:يرحموني شلتك ذولي اقول وربي انك ماعندك ماعند جدتي
ارجوان:على الاقل انا اروح اي شله ابيها شله الهادييات وهم شلتي ولا شلت المهايطات وهم شلتك ولا شلة المبلدات وهم شلة جوري
ابرار:ههههههه نذله وش مبلدات ذولي
ارجوان:وااي بارو وربي وحده من صديقات جوري لما تشوفني تقوم تهبد فيني تخووف
ابرار:هههههههه وش تهبد هذي بعدين انتي الى تستاهلين مالقيتي الى ذيك المخلوقه تناقرينها
ارجوان:ترفع الضغط ماتشوفين الى تمد لسانها مترين ونص وين احنا عايشين يابو
ابرار:جون عمتك مدري وش فيها تصارخ خليني اروح اشوف وش تبغى
ارجوان:طيب
ابرار:يلا تامرين على شئ
ارجوان:لا سلامتك وسلميلي على منور وامك
ابرار:يوصل ان شاء الله يلا باااي
ارجوان:باااي
راحت ارجوان ودقت على جوري
ارجوان:جور جور وصمخ
جوري تفتح الباب بقوه:انتي ماتريحين احد
ارجوان:خير مقفله البااب بالمفتاح وش عندك
جوري:والله وحده في غرفتها وتسوي الى تبي انتي وش عليك
ارجوان دخلت:ايه ايه طيب..اسمعي
جوري:وش عندك
ارجوان:وش رايك انا مليت من البيت
جوري:وين نروح
ارجوان:اي مكان خلينا نروح عند عمتي
جوري:كل يوم واحنى في وجه عمتي فوزيه ملت منا وملينا منهم
ارجوان:طيب والحل
جوري:الحل ياطويلت العمر انا نروح نخطط مكان
ارجوان باهتماام:وش مافهمت وضحي مع ادق التفاصيل
جوري جلست قدام ارجوان على السرير:اسمعي
ارجوان:كلي اذان صاغيه
وبدائت جوري تقول لارجوان الخطه وكيف يقنعونهم وكيف ينفذونها
ارجوان:تماام خطه حلوة بس فيه مشكله الحين كيف نقنع الجيش السعودي المعارض؛تقصد ابوها وعماتها؛
جوري:تصدقين انك درج انا الحين ساعه وانا ابح واكد صوتي على ايش ياثوره
ارجوان بكل برائه:اييش..
جوري:هذي الى بتجنني ياعالم
ارجوان:وش سويت
جوري:ارجوان لا تتكلمين والى يعافيك انتي خليك ساكته وانا بسوي خطه بدونك
ارجوان:لييه؟
جوري:عشان ماتخربينها
وخرجت من الغرفه وشوي الى ترجع جوري:ارجوان
ارجوان:نعم
جوري:هذي غرفتي يعني انتي الى تخرجين مو انا يلا برا
ارجوان :هههههههههههههههه وااااي وش ذا البلاهه وتقولين عني درج اجل انتي ايش هههههههههه
وقامت وخرجت من الغرفه
ودخلت غرفتها ورفعت الجوال
ارجوان:عنيد كيفك يادبه
العنود:هلا والله وغلا نورتي
ارجوان :ننوورك ياقلبي كيفك؟
العنود:بخير انتي كيفك وكيف خالي وجوري
ارجوان:بخير كلنا والحمد الله..وانتي القوم الكريم الى عندك
العنود:كلنا بخير والحمد الله
ارجوان:الحمد الله..الى تعالي
العنود:هلا
ارجوان:خططنا انا وجوري بخطه رهييبه
العنود:بجد وش هي
وقالت ارجوان كل شئ للعنود
العنود:وربي اختك هذي خطيره
ارجوان:مره لدرجه اني سويت ماني فاهمه عشان لا اتورط معها
العند:هههه نذله
ارجوان:والله ماني مستعده لها ولمشاكلها الى ماتخلص
العنود:اي والله عاد مشاكلها قد البلد
ارجوان:ولا تمل
العنود ابد
.........................................
نجي لاهل العنود
ام صماد"عمرها 52سنه وهي اكبر العيال ماتحب المشاكل
والى بين اخوانها ماتدخل فيه ابد
صماد"عمره 25 سنه متزوج وهو من النوع العصبي شوي
مايطاوع احد لكن يحب زوجته بشكل مو طبيعي
وفاء" عمرها 23سنه زوجته عندها بنتين وولد
وتحب زوجها صماد نفس حبه لها
فهد"عمره 22سنه يحب اخته العنود ودايم يلبى طلباتها
ومايبخل عليها ابد يبغى يحسسها انه الاب بعد وفاة ابوه وعنده عيون تذبح
العنود"17سنه ثاني ثانوي اخر العنقود وحسااسه بالمره
وماتكتم حساسيتها ابد فرفوشه وفلاويه والقعده ماتنمل معها
لكن تزعل بسرعه اذا احد قال كلام مايعجبها
.........................................
جاء اليوم الثاني وجوري مخططه انها تسوي الخطه الى عزمت عليها
جوري:بابا
خالد (ابو ارجوان) وهو يتابع التلفزيون:نعم
جوري:ابغى اروح عند عمه فوزيه
خالد (ابو ارجوان):طفشتو عمتكم ماصارت تلف مكان في بيتها الى تشوفكم
جوري:لو انها طفشت كان دقت عليك..بعدين هيه ماشكت لك ومافي ام تطفش من عيالها
خالد (ابو ارجوان):لا
جوري بدلع:باابي بليييييز
خالد (ابو ارجوان):لا
جوري بنفس الدلع :بابي قلبي عمري حيـ..
قاطعها خالد (ابو ارجوان):لا يعني لا جوري على غرفتك
جوري لما تزعل تقلب البيت فوق تحت:اوووووووووف ياربي ليه كذا
خالد (ابو ارجوان):جووري على غرفتك
جوري:ماابغى ابغى اروح عند عمتي
خالد (ابو ارجوان):والى يقول لك انك مابتروحين وش بتقولين
جوري بتهديد:عاادي مابقول له شئ
وقامت وراحت غرفتها ومسكت الجوال ودقت على عمتها فوزيه
فوزيه:الوو
جوري وهي تبكي:عمه عمه فوزيه
فوزيه بخوف:وش فيه وش صار وش فيك تبكين ابوك صار له شئ
جوري"عمتي ماتفكر الى باابوي طيب على الاقل تسألن على ارجوان":لا ياعمه ابوي ماصار له شئ
فوزيه وكنها تطمنت :طيب وش صار
جوري وهي تبكي:بس تخيلي ياعمه مقفل علينا الجناح وهو عند التلفزيون عمه تكفين قولي له نجي عندك انا وارجوان لحالنا ويمكن هو يروح لاشغاله وينساانا
فوزيه:وليه يقفل الجناح
جوري:مدري عن اخوك
فوزيه:طيب طيب بكلمه بس انتم وش سوتو عشان اعرف ليه قفل الجناح عليكم
جوري وهي باقي تبكي:عمه اخوك مدري وش فيه صار ينافخ ويعصب واخر شئ قفل الجناح علينا تكفين عمه خلينا نجي عندكم وبعدين اليوم الخميس
فوزيه:طيب خلاص جوري حبيبتي لا تبكين ياقلبي انا بكلمه بس انتي لا تبكين خلاص
جوري وهي تسوي انها تهدي نفسها:طيب بس تكفين نبغى نجي عندك
فوزيه :طيب يلا باي
جوري:باي..يـــــــــــــــ� �س وربي انك رهيبه ياجوري
ارجوان من عند الباب وهي مصدومه:يالكذابه يالمناافقه اي تعصيب واي تقفيل بااب شوفي الباب مفتوح اخرجي
جوري والبسمه شاقه وجهها:ارجوان ياختي المتعبه الغبيه هذي خطه لاستدراج عمتي الى ابي
ارجوان:استدراج عمتي الى ابي ...جوريوه وش مخططه له
جوري:ولا شئ بس ابوك الشاطر ماخلاني اروح عند عمتي وانا سويت هذي التمثيليه يستاهل كان ريح عمره وخلانا نروح
ارجوان:الله يطعني عنك يابوي الحين وش يفكك من لسان اختك
جوري وهي تضحك:وش رايك في اختك
ارجوان طالعت فيها باسغراب:وش اقول كذابه ومناافقه وحراميه
جوري وهي تضحك بشكل هستيري:ههههههههههههههه
شوي الى يسمعون صوت ابوهم
خالد (ابو ارجوان):فوزيه فوزيه اسمعيني...يابنت الحلال....طيب اسمعي....فوزيه...طيب طيب هدي انتي وارسلي متعب يجي ياخذهم..ايه..يلا مع السلامه
خالد (ابو ارجوان):جووووووووووووووووو ري
ارجوان:يااويلك
جوري بكل ثقه:ماسويت شئ
وراحت عند ابوها:نعم
خالد (ابو ارجوان):الجوال
جوري بانصدام:ليييييييييييييييي� �ه؟
خالد (ابو ارجوان):لاني قفلت عليكم باب الجناح يلا الجوال
ارجوان من ورا جوري:هههههههه احسن تستاهلين هههه كفو والله يابو ارجوان تعجبني والله
جوري:انتي على ترابي..ومدت الجوال لابوها..انا مظلومه لكن بعطيك الجوال لاني ماابغاه خذ
خالد (ابو ارجوان):مافي جوال لشهر عشان مره ثانيه تكلمين عمتك وتكذبين خلاص
جوري:ابشر طال عمرك اي اوامر ثانيه
خالد (ابو ارجوان):اذلفي عن وجهي وروحي البسي يلا روحي
جوري:هههههه انت الحين ليه متنرفز عادي اختك سوت لك سالفه ورحنا
ارجوان:مفروض ماتتكلمين لمدة سنه
جوري:ليه ان شاء الله؟اقول اسكتي بس
خالد (ابو ارجوان):جوري على غرفتك يلا وانتي ياالكبيره اعقلي
ارجوان:مين انا؟
خالد (ابو ارجوان):لا خيالك..ايه انتي
ارجوان:انا عاقله لكن فيه احد يعيش مع بنتك ومايفقد عقله
خالد (ابو ارجوان):روحوا البسو ولا بغير رايي
جوري من عند غرفتها:ايه يلا غير رايك وبيوصل لعمتي
خالد (ابو ارجوان):قلت انا ظفي وجهك
وراحت جوري وارجوان يبدلون ملابسهم
وشوي الى يدق البااب وراح خالد (ابو ارجوان) يفتح الباب
:هلا والله بولدي كيفك
متعب:تماام كيفك انت ياخال
خالد (ابو ارجوان):تماام وش ذا الغيبه تتغلى على خالك
متعب:ابد بس اشوف غلاي عندك
خالد (ابو ارجوان):ههههه غالي غالي ياولد اختي غالي تفضل
متعب:لا مشكور بس ججيت اخذ بناتك الى قوموني من السرير عشانهم
خالد (ابو ارجوان):افآآآ لو كنت ادري كان ماخليتهم يروحون
متعب:لا اصلا الى عندي بتصحيني بدل امي
خالد (ابو ارجوان):ابرار
متعب:ايه
خالد (ابو ارجوان):وين هي
شوي الى ابرار من ورا خالها:انا هنا ياخال كيفك؟
خالد (ابو ارجوان):بسم الله متى دخلتي
ابرار:خال لا تخليني جني وانت تسمي مني
خالد (ابو ارجوان):حشى ماجابته امه الى سمه منك الى انتي يسمون عليك مو منك
ابرار وهي مستحيه شوي:مشكور ياخال
خالد (ابو ارجوان):العفو..بس برورتي قوليلي وش الطريقه السحريه الى استخدمتيها عشان تدخلين
ابرار:شئ سحري اسمه الباب الخلفي
خالد (ابو ارجوان):من فتحه
ابرار:خال مابنتظرك لما تقوم وتروح تفتح الباب فأتصلت على ارجوان وفتحته لي
خالد (ابو ارجوان):بسم الله متى انتم تخططون لهذي الاشياء
ابرار:هههههه خبره خبره ياخال
خالد (ابو ارجوان):هههههه الله يقويكم
ابرار:ويااك
جوري:انا جيييييييييييييييت..باي بابا يلا بارو
خالد (ابو ارجوان):ايه بااي
ابرار:هههه شكل خالي حاقد عليك
جوري:وبقوووه هههههه
ارجوان:انتظرو ..... لحظه ..... هيييه ........ على مهل اووووووف
خالد (ابو ارجوان):ارجوان الله يهديك وين انتي رايحه
ارجوان وقفت نص الدرج:وش قصدك يعني مابروح معهم
خالد (ابو ارجوان): الا بس ليه هذي الشنطه الكبيره
ارجوان شافت شنطت اليد حقتها:هههه لا بابا هذي شنطت يد عاديه بس شكلها كبير لكن الى فيها اشياء بنوتاات
خالد (ابو ارجوان):ايه..امشي بس الله يهديكم والاشياء الى تشيلونها
ارجوان ابتسمت ونزلت ودعت ابوها وركبت السياره
خالد (ابو ارجوان):متعب
متعب:سم
خالد (ابو ارجوان):سم الله عدوك لا اوصيك انتبه لهم ورجعهم الساعه 11
متعب:لا توصي حريص اخواتي في عيني وابشر 11 يعني 11 اي خدمه طال عمرك
خالد (ابو ارجوان):مشكور الله معك
متعب:يلا مع السلامه
خالد (ابو ارجوان):مع السلامه
في السياره بداء عذاب متعب وتسلية البنات
جوري:وربي اني رهيبه
متعب:الا خطيره
جوري:وش حرك انت
متعب:انا الحين ماني مستوعب ليه انتم يالبنات كذا مرعبات وتخوفون مع انكم انعم الكائنات
ارجوان:تكلم عن جوري بس
ابرار:لا تعوب ترا بس جوري الى من هذا الصنف
جوري:نعم نعم وبكل فخر اعترف اني من الكائنات المرعبه
متعب:الله يعين الى بياخذك
جوري:لييه ان شاء الله؟
متعب:مرعبه
جوري وارجوان وابرار كانوا متنقبات ومتعب يشوف عيونهم
جوري تبتسم ابتسامه شيطانيه:متعب
متعب طالع عيونها عرف ان وراها شئ:الله يستر وش عندك
جوري: يمكن تكون انت سعيد الحظ الى بياخذني
ارجوان ظربت جوري على ظهرها
متعب يسايرها لانه يعرف ان جوري هبله:يمه تبغين اروح للموت برجولي
جوري بصوت عالي يسمعه متعب:ارجوانوه وجع خير تضربيني...متعبووه وش قصدك الحين ياشاطر لو يشفوني الرجال خقو وتراكذو ورااي
ارجوان ظربت جوري مره ثاانيه
جوري بصوت عالي مررره:آآآآآآآآآآآآآآآآآآآ� �آآآآآه ارجواانوه ووجع يوجع راسك ياهبله ياغبيه
ارجوان بصوت واطي:جوري حدوودك
جوري بصوت عالي:ايش وش قلت بعدين متعب حاله حال اخوي وش فيك عادي بقول له الى ابي اقول كيفي
ارجوان بصوت واطي:جوريوه لو تتمادين بتندمين كيفك
جوري:اووووه
متعب:وش فيكم
جوري:هذي الهبله مدري وش فيها
ارجوان خلاص شوي وودها تاكل جوري
ارجوان"الله ياخذك ياغبيه وش لسانك هذا اوف منك"
ارجوان ابعدت جوري لانها كانت جالسه بينها وبين ابرار وكلمت ابرار
:بارو قلبي
ابرار:هلا
ارجوان:بتسكتين هذي ولا كيف
ابرار:خليها بعدين تعرفين متعب ماعنده حتى هو لسانه مثل هذي الخبله
ارجوان:طيب بلييز بارو قولي له يوقف عند بقاله
ابرار:وااي جوني دايم اقول لك قولي له انتي دايم تطلبيني مدي لسانه مثل اختك
ارجوان:ايه بمده بس وش بقول وقف للبقاله مااقوى وجهي
ابرار:مالي دخل تصرفي
ارجوان:مالت عليكم
ابرار مابتبخل على ارجوان بشئ لكن دايم ارجوان تطلب ابرار هذا الطلب
وابرار تبغاها تتعود زي جوري والعنود لانهم يطلبونه اي شئ لكن ارجوان شوي خجووله
ارجوان:احم احم متعب
متعب:هلا
ارجوان:ممكن توقف عند بقاله
متعب:وش تبغين من هناك
ارجوان:بس بيبسي وبطاطس
متعب:ماجاك انتي شئ من البيبسي
جوري:بسم الله على اختي..وحطت يدها على شعره وقامت تسحبه لان شعر متعب شوي طويل..متعبووه وقف عند بقاله ولا بستحب شعرك وبحط راسك قداامك
متعب:يمه لا خلاص بوقف بس بليز جوري ابعدي يدك عن شعري لاني قعدت ساعه وانا اسويه
جوري ببطريقه شيطانيه:ايه قعدت ساعه..عشان البنات يعجبون فيك صح
متعب:هههههه اصلا البنات بيعجبون فيني سواء قعدت ساعه على شعري ولا ثانيه
جوري:اووووم الثقه ياعمي..من وين طلعت هذي الثقه ياشيخ
متعب:ههه طول عمري واثق ياشيخه
متعب:وش تبغون اجيب لكم
ابرار:ميرندا وبطاطاس حار
ارجوان:بيبسي وبطاطاس حار
جوري:بايسن وبايسن
متعب:جوري 2 بايسن
جوري:نعم نعم
متعب:ارقبيني
ونزل
ترقبو الجزء الثاني
انا اليوم اضفت لكم جزء
اتمنى انه ينال على اعجابكم
وان شاء الله ماني مطوله في تنزيل الجزء الثاني
لان الروايه من البدايه الى النهايه جاهزه ماعلي الى انزلها لكم
لكن ابغى ردود تزيد من حماسي في تنزيل البقيه
واتمنى انها تكون امانه ان مااحد ينسبه لنفسه
تحياتي