[فيتامين سي]

البارت السادس

ام فهد وابو فهد وفهد وميثه يالسين يفطرون فالحديقه.. بو فهد وام فهد سوالف شوي ومغازل شوي..وفهد مره يعصب ومره يضحك..وميثه مستانسه وايد...
شخص من وراهم :السلام عليكم
كلهم لفوا يشوفون منو؟!
وشافوا نوره واقف وراهم..
ام فهد وبو فهد طالعوا بعض...
فهد وقف:نوره؟قربي
ميثه مع انها كانت مستغربه ييت نوره بس ما بينت شي ونزلت راسها شوي
نوره تتقرب وتيلس بين ميثه وفهد..
فهد يلس...
ام فهد:كنت احسبج فبيت أهلج
نوره تمسك خبزه وتقصها:لا خالوه ما سرت(تاخذ بالخبزه شوي جبن وتقول لفهد:قول اه
فهد انحرج شوي.وطالع امه وابوه وقال:أأه
ميثه لين الحين منزله راسها وكسرت الخبزه فيدها وتطالعها وشكلها سرحانه(دام صدق يحبون بعض ليش زوجوه؟؟ليش ما صبروا عليها؟؟ )
نوره تكمل:امايه بتسافر هاليومين..ويوم بترد بسير لها
ام فهد:يعني بتسير ******؟.
نوره بنص عين:هيه..
ميثه حست انها مخنوقه....
ام فهد شافت سرحان ميثه صبت لها كوب شاي
ام فهد تناولها الشاي:سمي
ميثه انتبهت ومسكت الكوب:سم الله عدوج
فهد لمح ميثه ورد يشوف نوره وهوه مبتسم..
بو فهد طبعا طنش الكل ويالس ياكل زيتون اخضر عشقه....
ام فهد تعطي ميثه المدلاه وكوب:اندوج صبي لريلج
ميثه ابتسمت وتوها بتاخذهن مسكتهن نوره قبلها:هاتي عنج انا اقرب..
مسكت المدلاه وصبت لفهد كوب...
ميثه انحرجت مسكت كوبها وشربت شوي منه
نوره تريد تبين لميثه انها مب سهله وقويه....
بو فهد وعينه على حبة الزيتون اليي فيده:نوره صبي كوب
نوره تحط المدلاه عند ميثه:صبي له اكوه الكوب عدالج
ميثه بدون ما تشوف نوره خذت المدلاه
ميثه فهمت ع نوره وانها تبي تحرجها اكثر بس ميثه ابتسمت بهدوء وصبت الكوب وناولته عمها وهيه مبتسمه:سم عمي
بو فهد:سسمممم الله عدوج
ميثه تقوم وهيه مبتسمه:الحمد لله بترخص عنكم
ام فهد وبو فهد:وين.؟؟؟؟؟
ميثه :هههه بروح فوق شوي بيب تلفوني..نسيته..
ام فهد و بوفهد حسوا بان ميثه صدق منحرجه من اليلسه وياهم...بس اكتفوا بنظرات لنوره اللي ما مهتمه فيه ويالسه تقص خبز لفهد وتأكله..
فهد بيني وبينكم تضايق يوم شاف نوره ..لانه كان يبي يروح لها الفله ولا انها تي عندهم...بس ما حب يحرجها..ما يبي مشاكل وعوار راسه على قولته....
ام فهد غمزت لفهد وكأنها معصبه..وتبيه يلحق ميثه
فهد :بس بس نوره الحمد لله..(يقوم ويمشي شوي
نوره:فهد:لا تتاخر ابيك بموضوع
فهد لف عليها وسوا حركه بصبوعه(ok)
ام فهد يوم دخل فهد:انتي ما تستحين على ويهج؟
نوره:لا ما استحي..وانا شو سويت؟؟؟
بو فهد قام وسار عنهم متجهه صوب الحديقه الثانيه....
ام فهد:بس عيب عليج..هيه عروس..شو يايبنج.؟
نوره:ابا فهد بموضوع
ام فهد:انزين مب رايمه تتصبرين لين ايج بنفسه؟
نوره توقف:لا.
ام فهد وقفت:نوره عيب عليج..انا عمتج تكلمي ويايه باخترام
نوره:والله انا كيفي..لو شفت منج احترام جان كلمتج باحترام بس انتي حيه..ما ارتحتي لين يوزتيه..
ام فهد:استغفر الله العظيم واتوب أليه..يا بنتي بدل ما تركضين تيوزينه بنفسج يايه تقولين حيه وما حيه؟
نوره:أيوزه؟ليش انا مينونه؟وبعدين فهد بنفسه ما يبا عيال
ام فهد بطنازه:هههه وحد ثره ما يبا العيال..؟؟هوه ساكت عشان خاطرج..والا الود وده يكون عنده عيال ويلاعبهم
نوره تضايقت وايد وطنشت عمتها وسارت عنها...
...............
ميثه تمسك تلفونها اللي كان محطوط على طاوله فنص الصاله ابتسمت يوم شافت شواخ ترمسها بالمسجات
ميثه(بسم الله الرحمن الرحيم..انتي ما ترجدين؟)
شواخ(هيهيهيهيهييه...شو اخبارج يالعروس؟)
ميثه(الحمد لله...بس ليش مطرشه مسج الساعه خمس!! لا وبعد فاضي)
شواخ(اوعيج للصلاه.x.x)
ميثه(حماره وحده هههههه حد قالج ما اصلي؟)
شواخ(خخخخخخ اقول وين عريس الغفله؟)
ميثه(شواخ يا الحماره استحي على ويهج تراه ريلي)
شواخ(خخخخ اوكيه اوكي سوري..اقصد زوجج المحترم)
ميثه(تحت عند اهله)
شواخ(اها!!!! اوك!!!! برايج الحين..!!! ونزلي تحت عنده!!! لا تلحس حرمته عقله!!!!)
ميثه(شو سالفة الـ!!!!!)
شواخ(مدري!!!!!)
ميثه(هههه الله يكملج بعقلج..يالله مع السلامه وسلمي على خالوه)
شواخ(آمـــــــــــــــــي� �...يوصل انشالله مع السلامه)
ميثه:هههه وربي انج سوالف
فهد من وراها:منو؟
ميثه تروعت وطاح تلفونها ابسرعه:بسم الله
فهد مسك التلفون وعطاها:ليش يني؟
ميثه تمسك تلفونها:لا بس ...ما سلمت وروعتني
فهد:السلام عليج
ميثه بنص عين(الحين؟!):وعليكم السلام
يلس فهد على الكرسي يشوف التلفزيون....
ميثه ما عرفت شو تسوي ويلست على القنفه الثانيه :أممم
أقول فهد
فهد لف عليها...
ميثه:ابغي اقطع اجازتي..
فهد:أي اجازه؟
ميثه:من الشغل
فهد: ثرج تشتغلين؟
ميثه:هيه
فهد:وين؟
ميثه:بلدية العين
فهد:والله بكيفج..
ميثه ابتسمت على الاقل الشغل يسليها..
ميثه:بكنسلها الاسبوع الياي
فهد يشوف التلفزيون وينسدح على القنفه:بكيفج
ميثه توقف ..
فهد:وين؟
ميثه:بروح تحت
فهد:لا يلسي شوي..
ميثه:ليش؟!
فهد:يلسي انتي..
ميثه ما فهمت عليه ويلست...
فهد:نص ساعه ونزلي..
ميثه مو مستعوبه..مسكت تلفونها وحطت ريل على ريل وألتهت سوالف ويا شواخ..
فهد مره يشوف التلفزيون..بين دقيقه والثانيه يلمح ميثه شوي حس بقلبه يدق...
فجأه وقف بسرعه حتى ميثه تروعت....
فهد طلع من قسمهم ...
ميثه:بسم الله الرحمن الرحيم....شو بلاه هالريال؟؟
..............
نوره:ليش بطيت؟
فهد يلس :نوره...من أولها؟؟
نوره يلست:شوف..ترا امك بدت تطول لسانها عليه
فهد:نوره..حبيبتي...انتي اللي سويتيه غلط
نوره وسعت بعيونها:نعم نعم نعم نعم نعم نعم!!!شقلت؟؟؟
فهد:الحين البارحه الملجه اليوم انتي مصبحه؟ترا حتى ولو كان الزواج عالفاضي مو معناتها تغثيت بنت الناس..انا قلت لها
نوره:خير؟!؟!؟بنت الناس؟؟؟وقلت لها؟؟؟انت عن شو تتكلم؟
فهد:انا خبرت ميثه ان زواجنا اباها على ورق وبس
نوره:انزين؟؟
فهد:وماقالت شي..فدام انها متعاونه ومتساهله ما اريد مشاكل وعوار راس..خلج هنيه وهيه بتم فبيت ابويه..ما اريد صدعه
نوره شافت ان فهد معصب شوي :فهد..بس انا اشتقت لك والله
فهد يوقف:حتى انا اشتقت لج..بس اللي صار اليوم ما اباه يتكرر..
نوره:خلاص ولا يهمك..انا اثق فيك..متى بترد الليله؟
فهد يمشي لبرا:هالاسبوع ببات عندهم ما اريد صدعه ويا ابويه
نوره تلحقه:وقف وقف
فهد لف عليها وشكله متملل
نوره:بس انت وعدتني تبات كل يوم هنيه.
فهد:وانا ما قلت شي..خلي اول اسبوع يمر..خلاف لكل حادث حديث..يالله برايج ..
وطلع فهد مخلي نوره بتموت من القهر والعصبيه....
نوره:اخخخخخخخخخخخخخ ان ما خليتك تصبحها بطراق وتمسيها بطراق ما اكون نوره..
....على الغداء..فهد حط تلفونه صامت من كثر مسجان نوره وازعاجها....
ميثه تصب على غدا صحن بو فهد صالونه(مرق)
بو فهد مبتسم:بس امايه يزاج الله خير
ميثه:أصب لج خالوه؟
ام فهد:شوي لا أغص.ما احب الاكل ناشف
ميثه:هههه انشالله
وتصب لأم فهد...
يلست ميثه..
ام فهد:وانت فهد ما تبا؟
ميثه افتشلت....:اصب لك؟
فهد يمسك المغرفه من يدها:لا بصب بنفسي
ميثه تقوم:لا والله هات عنك
مسكت المغرفه وصبت لفهد
فهد:بس يكفي
ميثه ردت المغرفه فالمله ويلست(المله= وعاء المرق
بو فهد:ما ناوين اتسيرون بقعه؟
ميثه غصت:كحححححححححححح كحححححححححححح
فهد جنبها دحها على ظهرها وناولها كوب الماي وشربت شوي
ام فهد:بسم الله عليج بسم الله عليج..
بو فهد:بسم الله عليج
فهد شاف عيون ميثه احمرت وكيف شكلها كيوت :هههههه شوي شوي لا تغصين ههههههه
ميثه انحرجت
ام فهد وابو فهد ابتسموا...
ميثه بدون اراده منها شاتت ريل فهد من تحت الطاوله وهيه تحاول ما تبين لهم
فهد انصدمن مليووووووون مره من حركتها..
ميثه عقب ما حست باللي سوته انحرجت من فهد.يالفشله والله ما استحي ع ويهي.
فهد ما يبا يبين لهم ان ميثه ضربته على ريله كان بيتسم لهم ويمسح بيده على ريله من تحت الطاوله....ومستغرب من وين يابت الجرأه تضربه على ريله!؟
بو فهد:هاه شو قلتوا.؟
فهد:اححح ..اها؟لا ما يحتاي..ميثه عندها دوام الاسبوع الياي
ام فهد:شوه؟؟؟ما وحتي؟
ميثه: عندي شغل
بو فهد:اجلي شغلج امايه
ميثه مستحيه منهم ومجندسه..(مجندسه=اطالع تحت

ام فهد:امج قايله انج ماخذه شهر
ميثه:أه؟؟(مسرعج يا امايه وخبرتيهم)هيه..بس بكنسلها
ام فهد:لالالالالا استريحي ..لا تكنسلينها ولا شي...شو رايكم اتسيرون الامارات الشماليه؟(دبي والشارقه وعجمان)
فهد طالع ميثه اللي بدورها طالعته
فهد:ما يحتاي
ميثه مسكت خاشوقتها وكلت لقمه..(خاشوقتها=مغرفتها
فهد ياكل....
بو فهد يطالعهم ويطالع ام فهد:شو فيهم ذيلا!؟!؟!؟
فهد وميثه طالعوه
ام فهد:علمي علمك...انتو...انتو بلاكم؟؟؟أول مره اشوف معاريس ما يبون يسيرون بقعه؟
فهد:ما له داعي نيلس فالبيت احسن
بو فهد:لاحق ع البيت..باجر اباكم شالين شنطكم وسايرين شمال..شو بتقول ميثه؟؟عروس وما يبون يطلعوني
ميثه:.......................ما..ماله داعي عمي
فهد(الله يعيني على نوره):...............زين ما عليه زهبي شنطتج...
..........يقوم فهد:بسير اقيل شوي
ميثه تقوم:الحمد لله
فهد:كملي غداج
ميثه:لا بس الحمد لله..
وطلع فهد وميثه وراه...
ام فهد:ما لاحظت شي بو فهد؟
بو فهد:شي مثل شوه؟
ام فهد:مادري...
بو فهد يكمل غداه:كلي كلي خلي عنج الوسواس
ام فهد حاست بوز وكملت غداها....
فهد يفتح الباب ويدش وميثه من وراه...

فهد حط غترته وعقاله على الكرسي..ودخل الحجره..بيروح للحمام...(اكرمكم الله )
ميثه مسكت الغتره والعقال ومشت وراه...راحت للشماعه اللي بغرفة الملابس وحطتهن...
فهد طلع من الحمام(عزكم الله)وشكله غاسل ويهه والماي ينزل منه..ميثه شلت الفوطه وعطته:تفضل..
فهد شل الفوطه ومسح ويهه:مشكوره..اقول
ميثه:همم
فهد:يومين بس..خلينا انسير يومين..ومناك..ما اريد اهلج يقولون بخيل وما يطلعها
ميثه(بخيل وما يطلعها؟؟):زين
مشت ميثه مطنشتنه فصخت شيلتها وحطتها على الكرسي وراحت للكبت تطلع لها كندوره اماراتيه ,,,
فهد تذكر:تعالي صدق
ميثه تلف براسها تشوفه وايدينها بالكبت....
فهد:ليش تشوتين صيمي؟؟؟؟؟؟ بغى ينكسر!(صيمي=ريلي
ميثه احمرت وطالعت للكبت وتدخل بجسمها ع داخل ما تبيه يطالعها...:سوري
فهد يتقرب وشبه معصب:سوري آه؟؟؟؟سوري؟؟؟صيمي بغى ينكسر وانتي تقولين سوري.؟
ميثه طلعت اتشوفه بعيونها من ورا باب الكبت:"ما كنت اقصد..اسفه(تبا تضحك بس ماسكه نفسها صدق حركتها غبيه شوي)
فهد شاف عيونها...قلبه يدق ويدق....حب يغير الموضوع
فهد يدور لحافه ومخدته:وينهن؟؟؟وينهن؟؟؟
ميثه بعفويه:شو ذا؟منو؟
فهد:لحافي
ميثه راحت للخزانه الثالثه وفتحتها وطلعتهن فهد شالهن عنها وسار...:الساعه ثلاث ونص وعيني
ميثه:زين!!!!
...........................!!!..
فهد منسدح فالصاله..مسك تلفونه وشاف مسجات من نوره..
نوره(متى بتي؟)
(فهد رد)
(فهد ليش ما ترد؟)
(ترا ان عصبت بيي البيت الحين)
(وبعدين؟يعني ما بترد؟)
فهد هز راسه(ادري انها تحبني بس مب لهالدرجه..
فهد طرش لها مسج(سوري..كنت انغداء..آمري)
نوره(لا والله؟!وليش ما ترد؟)
فهد(قلت لج اتغداء)
فهد انسدح وتلحف
نوره(تعال عندي)
فهد(نوره ابا اقيل)
نوره(تعالي قيل عندي)
فهد(الله يهديج)
نوره(ليش انا مينونه؟)
فهد(ما قلت شي..بس خليني اقيل..وببات عندج اليوم)
نوره(صدق؟)
فهد(هيه صدق..يالله الحين برايج)
نوره(حياك الله واترياك الليله)
فهد حط تلفونه على الطاوله وتلحف زين و رجد...
....
ميثه مو متعوده تقيل الظهر..ف فتحت شنطه وحطت فيها ملابس تكفيها يومين..سكرت شنطتها وفتحت باب الحجره واتشوف فهد فسابع نومه..شافت الساعه فتلفونها 2:30 مشت على طرف اصابعها وفتحت باب الصاله بشوي شوي طلعت وسكرت الباب وراها ..فهد حط يده على اذنه حكها وهوه نايم..zzzzz

ميثه تمشي على الدري وحاطه يدينها ورا ظهرها وتشوف يمكن تلقى عمتها او عمها يالسين فالصاله..ما شافت حد وراحت صوب المطبخ,...ما لقت حد...وسارت تتمشى فالبيت تستكشف.
...
شواخ منسدحه على الشبريه على بطنها وتلعب فاللابتوب...
وصلها مسج ومسكت تلفونها
ميثه(ToT)
شواخ يلست مستغرب؟؟(شو فيج ميثه؟)
ميثه(متملله)
شواخ(كركركرر)
ميثه(ضحكت عنز عند باب المسلخه)
شواخ(أفا...شو فيج معصبه؟)
ميثه(مو معصبه بس متملله ما عارفه شو اسوي)
شواخ(ريلج وين عيل؟)
ميثه حاست بوز:اي ريل الله يهديج؟(نايم)
شواخ:يالبغام!!شو ميلسنها وريلها راجد؟!(انزين رجدي ليش تحوطين شروات حمارة القايله؟)
ميثه(انا حمارة القايله؟؟؟ الله يسامحج)
شواخ(هههه تشبيه تشبيه...)
ميثه(تشبيهج سخيف)
شواخ(صح ما قلت لج)
ميثه(خير)
شواخ|(خالي سلطان يا من السفر)
ميثه(ليش ما قالي؟)
شواخ(احتشر يو درا انكم ملجتو وسرتي بدون عرس)
ميثه(لا تقولين!!! صدق؟)
شواخ(والله صدق .يمكن اي هاليومين عندنا العين)
ميثه(خبرتيه اني انا اللي ما ابا العرس؟)
شواخ(لا ما قلت له )
ميثه كانت يالسه فالصاله تحت ودخلت عليها ام فهد:سلام عليج ميثه
ميثه وقف يوم انتبهت:وعليج السلام
ام فهد:شو ميلسنج هنيه بروحج؟
ميثه:ما اداني ارجد الظهر
ام فهد:ههه يلسي يلسي
تيلس ام فهد وتيلس ميثه جنبها
ام فهد:كلنا فهالبيت نموت على المقيل الظهر
ميثه:انا ما متعوده ما اعرف ان رجدت الظهر بسهر طول الليل
ام فهد:هيه,,فهد بعده راجد؟
ميثه تشوف ساعتها:بعد شوي بوعيه
ام فهد توقف:بسير اخلي البشكاره تسوي قهوه
ميثه:انا بطلع فوق اوعيه شي فخاطرج؟
ام فهد:الله يحفظج ولا تنسين تزهبين غريظاتكم..تكشتوا شوي
ميثه مبتسمه:إن شاء الله عمتيه
تمشي ام فهد صوب المطبخ وتفتح ميثه تلفونها وتراسل شيخه وهيه تصعد فوق.....
....
ميثه فتحت الباب بشوي شوي...
وتطل براسها ونشوف فهد بعده راجد...دخلت وسكرت الباب عالهادي ومشت صوبه وبصوت واطي من بعيد:فهد....فهد!!.....فهد قوم...فهد
فهد فسابع نومه.....
ميثه تتقرب شوي:فهد....فهددد قووم
فهد نايم حك اذنه وعفس شعره.....
ميثه بلعت ريجها...تقربت شوي.....تمت اتطالع فهد...خاطرها تدخل اصابعها فشعره وتمسح على راسه..شكله هادي وبرئ وايد..حست بأحساس انها تعرف فهد قبل هالمره بس ما قدرت تتذكر..حست بأحساس يجذبها لفهد..نزلت راسها شوي .وتقربت منه تشوفه زين.....فجأه عقد حواجبه وهوه نايم...ميثه عقدت حواجبها مستغربه!...فتح عيونه ابسرعه ميثه تروعت وشهقت وردت خطوتين ورا وطاحت يالسه على الطاوله اللي بنص الصاله:بسم الله الرحمن الرحيم
فهد انقلب واحد ثاني نقز ابسرعه وشكل عيونه حمر ومسكها من يدها بقوه وبصوت مرعب:من انتي؟؟؟؟؟؟؟؟؟؟
ميثه شافت جاسم رد للدنيا وصرخت أأاييي:أي ايدي جاسم..اخخ يدي افتحت يدي

انتظروني البارت القادم..