[لامارا]

تكمله الجزء 14

قامت لمياء الظهر وهي مو شبعانه نوم بس ما قدرت تأخذ راحتها وهي ما شافت فيصل
قامت ولبست ملابسها وما شافت هيفاء وعرفت انها عند جدتها
خذت عبايتها وشنطتها وطلعت تدور خديجه
حصلتها تجهز الغداء لام طلال
لمياء : خديجه ممكن طلب
خديجه : طلب واحد بس انتي اطلبي اللي تبين
لمياء : تسلمين انا ابيك توصليني للمستشفى الحين وما ابي احد يعرف
خديجه : من عيوني انتي اطلعي من الجانبي وانا اجيك هناك
طلعت لمياء بسرعه قبل حد يشوفها هي عارفه ان البنات بيقولون استني وهي تبي تشوف فيصل بالحالهم
جات خديجه بالسياره وطلعت معاها وبسرعه على المستشفى
كلمت سعودوقالت له انها شوي وتكون عنده وخذت منه كل التفاصيل
طلعت لمياء للغرفه وهي تحاول تمسك نفسها حست ان الايام اللي راحت استهلكت قوتها بالمره
دقت الباب وطلع لها سعود وقال لها انه بيروح للبيت بيرتاح وبيرجع لها ,, تركتها خديجه وجلست تستناها في الاستراحه ودخلت للغرفه البارده
كان شكل فيصل يقطع القلب رجله مرفوعه واللفافات على رجله ويده اللهم وجهه كان فيه خدوش بسيطه
شكله وهو نايم كأنه زعلان وتخيلت انه زعلان عليها عشانها ما رضت عليه مسكت يده وضغطت عليها شوي
وما حس فيها ,,
قعدت تقرأ عليه ودموعها تنزل بصمت وتمسك يده وتحضنها في يدها وتمسح على شعره بيدها الثانية استمرت على الوضع ذا ربع ساعه وشافت فيصل يحرك يده شوي ويأخذ نفس مره وبعد شوي فتح عينه بسيط وشافها عند راسه وتقرأ عليه غمض عينه ونزلت دمعته على خده وخذ لمياء وحط راسها على صدره
وقالها بصوت هاااادي : سامحيني
لمياء اللي قعدت تصيح بصوت مكتوم وتدموعها تنزل على خدها وشفايفها مسحت دمعته وباست عيونه
وحطت يدها على شفايفه وقالت : لا تقول شي ارجوك ارتاااح
خذ يدها ومسك بقووه وقال : لا تتركيني خليك معي ,, لمياء حست انها شي مهم جدا لفيصل عطت قلبها هدنه من اللي صار وشافت ان اهم شي عندها الحين ان فيصل يصير طيب وبس
فيصل : تدرين اني صحيت على ريحتك شميت عطرك وعرفت انك هنااا بس ما كنت مصدق الا يوم فتحت عيني ولمحتك يا اغلى من مر بعيوني ,,,,
لمياء : وهي تمسك وجهه بين ايديها : ممكن ترتاح والا بطلع ,, انت لازم ترتاح ,,,
فيصل وهو يأشر لها لا لا : خليك عندي يا قلبي برتاح وانتي جنبي وغمض عينه مرتاح من وجود لمياء بجنبه ,,,,

مرت يومين هادئه جدا والجميع فيها قلوبهم على فيصل واكدوا ان محد يعطي فهد خبر علشان ما يقلق على اخوه ,,,,
ام طلال وهي جالسه العصر وعندها بنتها هدى دخلت عليهم هيفاء وسلمت على عمتها
هدى : عاش من شافك يا هيفاء وينك مختفيه ,,
هيفاء : موجوده يا عمتي بس احنا ما نطلع وانتي معد تجين زي اول
هدى بدون نفس : مشاغل عاااد,, الا شخبار رجلك
هيفاء انصدمت من سؤالها وش تقولها انها ما كلمته من سافر والا تدبر لها عذر ,,
هيفاء : طيب الحمدلله
هدى : اذا اتصلتي عليه قولي له عمتك زعلانه
اجل ام نايف وعبير اغلى مني يتصل يسلم عليهم وانا لا ,,
وهدى تقولها بخبث عينها على هيفاء تبي تشوف ردة فعلها ,, لكنها مسكينه ما تعرف هيفاء,,,
هيفاء : فهد مشغول ومو فاضي حد يتصل عليه بس تلاقينهم ازعجوه بالاتصال يا عمري,,,
ام طلال جالسه وتشاهد الوضع انبسطت على رد هيفاء اللي حستها تبرد خاطرها زين ,,,
هدى انصدمت من اجابة هيفاء وحست انها بتكسر عبير بسرعه ,,
قامت هيفاء من عندهم بعد فتره وهي تكلم نفسها ,, كل ما جت النفس ترضى عليك يافهد غميتها بخبر جديد ,,,
طلعت تكلم امها لطيفه صار لها يومين ما كلمتها بعد الاحداث الجديده
وعطتها الاخبار كلها وطمنتها عليهم ان كل شي على ما يرام
كان ودها بعد تكلم عمتها مريم وتسلم عليها بس ما بغت تفجعها بسالفة فيصل فأجلت اتصالها لبعدين
سألتها جدتها اذا كانت تعرف متى فهد بيجي؟؟
فردت انها ما عنده خبر
ام طلال : اجل قومي اتصلي عليه شوفي متى بيجي ,,
هيفاء : يمه يمكن مشغول ,, هو اذا صار فاضي بيتصل ,,وهم في سالفتهم سمعوا صوت عند الباب
وماشافت ام طلال الا فهد يطلع راسه لها وهو يسوي لها مفاجأه
هيفاء كانت قاعده وقامت ... وام طلال ما ملكت فرحتها على انه كانت زعلانه عليه :: يالله حيه الذيب على طاريه
دخل عليهم وسلم على راس جدته وحب يدها وصافح هيفاء وهو متجاهلها ,,,
طلعت هيفاء تبي تجيب القهوة وهي مو مصدقه انه وصل معقول
على انها متوترة بجيته على قد انها فرحانه انه وصل وبخير ,,, ((غريب شعورك يا هيفاء انتي وشتبين ))

انتهى...