[لامارا]

تكملة جزء ١٩

نواف وفهد متفقين يتعشون سواء في مطعم يحبون يجونه ,,,مر فهد على نواف وهو عند مدخل بيتهم ,, شاف سيارة عبير جايه للمدخل تقدم شوي بسيارته ,, وهي نزلت وتقدمت لفهد عند النافذه نزل زجاج السياره وما يمديه يقول شي الا عبير متكلمه,,
عبير : هلا فهد وينك ما تسال من غيرك علينا ,,
فهد : هلا عبير كيف خالتي طيبه ,,
عبير: ماعليها ,, ليش ما ترد علي كم مره اكلمك ,,,
فهد : مشاغل عااااد شسوي ,,
عبير : والا كبروا راسك علينا :: يسوونها ,,,
فهد : بغيتي شي عن اذنك بمشي وهو يبي يصرفها
عبير : معليش يا فهد كذا تتنكر لي عشان وحده ما تربت لا وتبي تطردنا من بيت خالتي ,,
فهد : لو سمحتي عبير احترمي نفسك وهيفاء متربية قبل تشوفكم ,,, ويالله ما تشوفين شر
لفت منه عبير وهي تغلي معقوله هذا فهد ,,, غيرته الحيه علي ,,, معليه يا فهد انا بوريك شغلك ,,,
ودخلت على مشاعل وهي تأفف من فهد وكلامه ,, هذا اللي باقي ما يبي يسمعني وانا احكي لا واحترمي نفسك قال
هين يا فهد دواك عندي ,,,
تكلمت وهي تغلي : مشاعل تصدقين شكلها مسويه له سحر ,, ما يبي يسمع عنها شي .,, بموووت قولي لي وشسوي ,,,
مشاعل : يا حبيبتي من جدك انتي تسوي له سحر ,, هاذي اصلا شايفه حالها وما تحب الا نفسها وما تتكلم الامن طرف خشمها ,, وتقولين تسوي له سحر ,, لكن انا بقولك وش راح يجيب راسه عشان يصدق كل كلمه نقولها ,,,
عبير : تكفين علميني وش اقدر اسوي بسوي اللي تبين ,,اهم شي فهد يطلقها ,,,
مشاعل وهي تضحك ضحكه خبيثه : ولا يهمك يا قلبي وصوت ضحكهم مجلجل المكان ,,,
طلع نواف مع فهد ,,وهم في الطريق ,
نواف : شفيك صاير شي :,,
فهد: عبير جت عندي وانا انتظرك وتخربط في الكلام ::,,
نواف : والله الشرهه مو على عبير .. عليك اذا انت بتسمعها انت عارف عبير زين ,,,
فهد : المشكله اني عارفها ,,
اتركنا من عبير هالحين ,, احسك مو على بعضك صار لك فتره ,, متغير شي فيك
فهد : وشو يعني ,,
نواف : انت مو حاس في نفسك ,, فهد انت فيه شي شاغل بالك وتفكر فيه على طول انت تبي مساعده شي ترى انا في خدمتك ,,,
فهد : ايييييييه يا نواف ,, ما ينفع الكلام الحين ,, بس ربك يحلها ,,,
نواف : انت وش تكلم عليه فهمني ,,,
فهد : ماعليه مو الحين في وقته بعلمك بكل شي ,,,

تجمعوا العايلة على العشاء الا طلال اللي حب لطيفه تأخذ راحتها ,
هيفاء وهي تخدمهم من قلبها وهي تحط لهم الاكل ,, حست بغصة عميقة في قلبها لدرجة ان عينها دمعت وحاولت تتحاشى انها تشوف اي احد في عينه عشان ما يكشفونها ,,,حست انها بتخسرهم ومعد راح تشوفهم ثاني وهي متعلقه بهم من قلبها وخصوصا جدتها ,, وشلون بتفارقهم وتترك الجوالعائلي اللي افتقدته طول عمرها ,, الله يسامحك يا فهد كله منك,, ليه كذا بس ,,,
قامت انها تبي تأخذ شي من المطبخ التحضيري وهي قصدها تمسح دموعها قبل تنكشف ,,,
كلش ولا تشوفها لمياء بتسوي مناحه اذا عرفت هيفاء وش بتسوي ,, يا ربي ساعدني طلبتك خفف علي ,, وقعدت تقول بعض الأذكار عشان تهدأ نفسها شويه ,,,,
مرت يومين وهم نفس الروتين ما تغير ,, طلال وسلطانه رجعوا للقصر ,, ولمياء اغلب وقتها عند فيصل او تتمشى معه لأنه حب يمرن نفسه على المشي الخفيف ,, واهتمام هيفاء الملحوظ بعيال مريم ,, الجميع ملاحظ الشي ذا لدرجة انهم يقولون لها لو مريم هنا ما اهتمت بعيالها نفسك ,,,
عينهم على نهاية الاسبوع ووصول مريم وسعود معها وماخذين الايام هاذي راااحة نفسيه من كل الضغوط المحيطة بهم ,,,,

هيفاء حبت تتمشى في المزرعة هي والبنات الصغار فلبستهم ملابس تدفيهم وطلعت معهم يتمشون وخذت لها شرشف صغير تحطه على شعرها وكتوفها في حال جاء احد وهي مستبعده هالشي ,,
تأخرت هي والبنات عند قسم للطيور اول مره ينتبهون له خصوصا ان المزرعة كبيره واشجارها كثيفة واللي ما يعرف الاماكن فيها لازم بيضيع شوي ,,,
بعد ساعه كذا جاها اتصال من ريما
ريما : وين يالدبه وين مختفيه قعدت ادور عليك ما حصلتك ,,,
هيفاء : رحت اتمشى مع البنات ليه فيك شي
ريما : اي فيني تصدقين يا ماما ضرسي يعورني ,,,
هيفاء : الحمدلله والشكر ليه بيبي انتي ,,,
ريما : اسألي نفسك ما تنشافين كله مع البزران عديني وحده منهم ,,,
هيفاء : ريموه صدق انك متفرغه :: عندك شي ولا اسكر ,,
ريما : شفيك زعلتي ,, ترى امزح ,, بعدين تعالي عندي مفاجأه حلوووووه ,,,
هيفاء : تحسبيني مقصه اصدق كل شي ادري تمزحين ,, وش المفاجأه بالله ,,
ريما : لا لا يا قمر وليش سموها مفاجأه اذا جيتي بوريك اياها فأتركي شغل البزران وتعالي اوكي وتسكر ما عطتها اي مجال ,,
هيفاء : ما تخلين حركاتك يا ريما وراح فكرها للمفاجأه وش عندها يمكن طابخه شي هي تجرب فيهم هالايام وكل يوم يصير شكل مره زين ومره خربان ,, والا وش عندها صحيح ,,,,
خذت هيفاء البنات ورجعت للفيلا ,,,
حصلت ريما في المجلس تنتظرها ,, وام طلال وامها لطيفه شكلهم داخل مالهم حس ,,
هيفاء : هذا انا جيت وش عندك ,,
ريما : تصدقين شكلك ما تحبين المفاجأت ماعندك حماس مررره ,,
هيفاء : ابد تصدقين ثلجه ,,,,
قالت لها ريما تعالي معي لاني وديتها فوق خفت احد يشوفها قبلك ,,
هيفاء : مين بيرسل عليك هديه هنا ,,
ريما وهي تضحك ,, تعالي بس ,,,وهما طالعين الدرج هيفاء مو مستوعبه وش عندها ريما ,, غريبه اول مره تسوي لها الحركه ذي ,,,
جت عند غرفة فهد وقالت ريما : تعالي انا حطيتها هنا عشان محد يشوفها ,,,
هيفاء وهي تجي وراها ,,دخلت الغرفة عقبها وتلتفت للسرير ما شافت عليه شي وترجع تلفت ثاني للجهة اللي فيها الكنبة وتحصل فهد قاعد يطالعهم ,, مو عارف وش عندهم داخلين عليه كذا ,,,,
ريما بصوت عالي : سبراااااايز ,,
هيفاء في قلبها : يؤيؤيؤ يا ريما صدق وهقه شغلك عندي ,,
ريما وهي تشوفهم مبلمين كل واحد يشوف الثاني كنه اول مره يشوفه ,,
ريما : وش رايكم اصلح اسوي مفاجأت ,, وقفت اول ما شافتهم ما علقوا ,,
ريما : الحق علي ابي اونسكم ,, سووووري على اللقافة ,,, يالله سي يو بعدين ,, وطلعت ما تركت لهيفاء اي فرصه للكلام ,,
فهد : لهدرجه ما تبين تشوفيني ,,
هيفاء وهي متلعثمه : لا وش دعوا من قال ,, بس صحيح مفاجأه انك جيت لأني ما توقعتها ,,الحمدلله على السلامة,,
فهد : الله يسلمك ,, ماعندي شي قلت اجيكم ,,
هيفاء وهي تحاول تشغل يدها بأي شي موجود يمكن يخفف انفعالها : الله يحيك ,, تبي قهوة ,,

فهد وهو مسمر عينه في عينها وحاس بأحراجها ,, ليه لا اوكي ابي قهوة ,, وطلعت بسرعه من الغرفه على غرفة ريما تبي تهزئها شوي ,,
هيفاء وهي تدخل : يا شينك من قالك اني ابي المفاجأت تسوين حركه سخيفة زي ذي ,,
ريما وهي تضحك : واااو شكلكم رايح فيها انتي وفهد ,,, ترى وااااضح عندكم مشكله ,, احمدي ربك وفرت عليك قلق المواجهة ,, هذا انتي شفتيه وافتكيتي عشان ما تحاتين,,,
هيفاء :الله يسامحك كان ودي تقولين لي مو كذا بعدين ما بينا شي لاتتخيلين شي من عندك ,,,
ريما : اوكي خلاص الحين روحي تجهزي لزوجك جاي من طريق طويل اكيد يبي يقعد معك شوي,,
وبعدين انا بنام عند عيال عمتي مريم روحي لزوجك يا قلبي ,,
هيفاء : لا لا مستحيل انا ما راح اتركهم لين تجي امهم ,, وبعدين فهد مو طاير ,, وطلعت منها وراحت لغرفتها
جلست على طرف السرير وهي تفكر في فهد ,, عيونه فيها شي غرررريب ,, ليه جاء طيب ,, معقولة اشتاق لنا ,, لا لا اكيد زهق بالحاله وجاء ,,,

تجمعوا على العشاء والعيال كانوا في الخيمة وشبة الضو معطيه المكان دفئ عجيب مع ريحة الحطب اللي تخلي المشاعر دافئة ,,
ام طلال ولطيفة قعدوا يشوفون التلفزيون ,, وريما تسولف مع لمياء عن موديل شافته في مجله ودها تسال عن مصممته ,, وهيفاء في فلكها معاهم بالجسم فقط بس عقلها بعيد عن اللي يحكون ,, ريما حاسه فيها ,, بس لمياء مو جاي في بالها ابد ان هيفاء فيها شي وخصوصا انشغالها مع فيصل خلى الامور بالنسبه لها متساوية ما تدقق في شي ,,,

استئذنتهم هيفاء تشوف البنات ,, فقالت لها ريما : مو تتأخرين ترى انا اتملل بالحالي ارجعي ,,
هيفاء : خلاص
طلعت هيفاء وشافت البنات يشوفون قناة اطفال يتابعون رسوم ,, وقد بدلوا ملابسهم وخلصوا ,, حست بأنجاز معهم يسمعون كلامها ويتبعون اللي تقوله بحذافيره ,ارتاحت عشانها تبي تريح عمتها وتطمن بالها على عيالها
تركتهم ونزلت تحت وحصلت ريما بالحالها ,,
هيفاء : وين لمياء عنك ,,
ريما : كلمها فيصل وراحت للملحق ,, تكفين هيفاء ,, ابي اطلب منك طلب
هيفاء : آمري وش تبين ,,
ريما : امشي نروح للخيمه عند فهد واللي يسلمك
هيفاء : يمكن عنده احد من جدك
ريما : لا لا مافي احد كلمته وقلت له بنجيك انا وهيفاء
هيفاء وهي تضحك عليها ك اجل وليه تطلبين مني وانتي رايحه رايحه
ريما : لا تفشليني عاد اسوي قدامك برستيج ,,
هيفاء: اوكي مافي مانع لبست شرشف صغير على شعرها وريما تقولها مافي داعي محد موجود لكن هيفاء قالت لها احتياطا ,, وطلعوا من الفيلا وراحوا يمشون للخيمة اللي تبعد عنهم شويه قعدوا يسولفون بالطريق عن بعض اهتمامات الأنسان وحبه للجمال في كل وقت ,, ريما تحب تقعد مع بنات عمها فيصل كثثييير ومن يوم دخلوا حياتها خفت زيارتها ان لم تكن انقطعت لبيت خالتها ام نايف وعمتها هدى والمقصد العنود تطلع معها من فتره لفتره ,, حست وهي مع لمياء وهيفاء خصوصا ان كلامهم له معنى وفيه شي مفيد ويحكون عن شي كأنه واقع بالاضافه الى تجربتهم في مجالات معينه تناسب اهتمامتها ,,
وصلوا للخيمة ومافيها الا فهد وهويشوف التلفزيون شكله في المكان مع شماغه وثوبه الغامق معطيه جاذبيه غير طبيعيه
دخلت ريما قبل ووراها هيفاء : مساء الورد ياخوي
فهد : مساكم بالنور ,,
فهد حاول ما يلتفت لهيفاء وقعدت ريما من جهة وهيفاء في الجهة اللي جنبه عشان ما تترك له فرصه انه يدقق فيها عيونه كانت تطالع المباراه
ريما : الله احب االاجواء اللي كذا تخليك ما تنسى ذكرياتك في المكان ,,
هيفاء شافت ان مال وجودهم داعي وخصوصا ان فهد يتابع المباراة ,,
بعد عشر دقايق من الصمت المخيم على الجميع تكلمت هيفاء انا بروح للبنات تجين يا ريما
لمحت فهد وهو يركز فيها ,, فردت عليها ريما ما قعدنا اصبري شوي
هيفاء : يمكن يحتاجون شي ::ووقفت تبي ريما تقوم ,
ريما امرنا لله ,, فهد وشرايك تودينا نسوق بكره ,,
فهد : اوكي ليش لا ,,وطلعوا من الخيمة وهم راجعين في الطريق ,,,
ريما : ممكن اسئلك سؤال فيه لقافه شوي
هيفاء : اسئلي
ريما : انتي طول الوقت ساكته مع فهد ما تحكون
هيفاء : على حسب ,,وهي تحاول ما تعطي ريما اجابات تخليها تشك ,,
ريما : بصراحه انتوا ما تهينون علي ولا ابيكم متكدرين بس احس لو تطلعون شوي بالحالكم يكون احسن
هيفاء : ممكن ليه لا بنجرب وهي تضحك
ريما كان ودها ان هيفاء تقول اللي في خاطرها كله عشان تنقله لفهد لكن هيفاء متحفظه في الردود وماتبي اي شي تقوله ,, هو بينهم مشكله عاديه واالا شي كبير ,, الله يجيب الخير ان شالله ,, وصلوا للفيلا وكل وحده راحت لغرفتها ,,, وفي عالمها الخاص ,,
فهد بعد ما طلعوا من الخيمة ,, انقهر من هيفاء ,, ما ودها تقعد وتتحاشاني ,, اكيد عزمت على قرارها ,,
فهد وهو يفكر ,, انا ابي اللي يريحها حتى لو كان طلاق ,, شكلها ما عندها استعداد تفهمني وتتنازل عن القوة اللي هي مغطيه حالها بها
جاء يوم جديد محمل بنسائم المحبة والخير وينتظر قلوب تفتح لها ابوابها لتلقي بها هذا النسيم الرائع بعبير جميل محمل بالراحه والسعاده والايمان ,
وصلت مريم على الظهر وهي مرتاحة نفسيا من اداء العمرة عن والدها وقضت يومين عند اهل زوجها ,, ورجعت وهي تحس بأستقرار جميل ,, شافت ان بناتها متغيرين عن اخر مره شافتهم يووو اكيد ان هيفاء تأكلهم مضبوط
ام طلال : انا ما صدقت انك تجين ,, تدرين اني ما عاد اشوفها ابدا هي وعيالك ,,, كل ما سألت عنها قالوا مع البنات ,,
زين رجعتي عشان بنتي ترجع لي ,,,

مريم " ياعمري ياهيفاء اكيد ما راح تقصر الله يعطيها العافيه ..,,
شوي وهما قاعدين يأخذون اخبار مريم جاهم فهد وكمل معاهم سواليفهم ويسمع مدح جدته في هيفاء واهتمامها بكل شي من صغير وكبير ,,
جتهم ريما وهي تسأل : فهد متى بتأخذنا نطلع شوي بالسياره
فهد : اذا انتوا مستعدين يالله ,,,
ريما وهي تنادي على هيفاء : هيفاااااء
جتهم هيفاء معاها صينية حلووو كل حد حط يده فيها يبي يتذووق ,, الا فهد تابع المنظر يبي يشوف ,, وهي شافته ما مد يده فقربت منه الصينية
هيفاء : تفضل ,,
فهد : تسلمين ,,
ريما : يالله امشي بنروح مع فهد ,, عجلي عاد لا تتأخرين ,,
هيفاء قالت عشر دقايق بس ,, وطلعت فوق بسرعه وبدلت ملابسها ولبست شي يناسب الطلعه وخذت عبايتها معاها ونزلت اول ما شافتها ريما قالت لها
ريما : وين لابسه عبايه حنا هنا في البران ما بين مزارع ورمال وش تبين بالعبايه اصرت هيفاء انها تلبسها وطلعوا للسياره
على طول ركبت ريما ورى ,,
وهيفاء جت بتفتح الباب اللي جنبها قال لها فهد : لا انتوا تبون تسوقون تعالي انتي قدام بعدين دور ريما ,,, وجت وركبت جنب فهد وطلعت السياره من عند بوابة المزرعة ,,
اول ما وصلوا للباب ريما افتعلت حركة ,, حت جهازها على صوت رنين ,,
وكلمت وهي تقول : هلا يمه ,,, احنا بنطلع ,, الا اجيك ثواني بس ,, ريما وهي تقول لفهد : لحظه انا بنزل جدتي تبيني في شغل لها انتوا كملوا ,,, واروح معكم ثاني ونزلت مع الباب وفهد مو متأكد انه يكمل يمكن هيفاء ما تبي
جت هيفاء تفتح الباب تبي تنزل عشان ما تشغل فهد الا ريما تسكر بابها ثاني ,, لا تفوتين الفرصة يا خبله السواقه تجنن ,, يالله استمتعوا ,,,
فهد حرك السيارة وشاف انها فرصة يكون مع هيفاء لحالهم ,,,,,,


انتهى......