[فيتامين سي]

البارت الخامس ..

بيت بوسلطان الصبح الساعه 9 ..
راشد وسلطان يتريقون وام سلطان عدالهم تلعب احمد وموزه عيال سلطان
سلطان: متى بترد سياره البنت ,, عيب عليك عاد
راشد: انتو شلكم ,, انا وهي متفاهمين ,, بس ارتاح انا اللحين بخطف سيارتها وباخذ سيارتيه من عندها
سلطان: بسم الله ,, ليش غيضت انزين !! انا اتخبرك بس
ام سلطان : رااشد ,, بلاك ع اخوك !! هو يسالك ,, وبعدين صدقه ,,متى بتردها ,, انت ماخذنها يوم واحد بتسير وبترد واشوفها عيبتك وخليتها يومين
راشد: استغفرررر الله ,, شووو فيهاااا ؟!!
ام سلطان : مافيها شي يابويه .. لكن الواحد روحه يعرف ,, الشي اللي ياخذه من حد بدون ما يطلبون منه يرده
راشد: حشى ماتسوى عليه هالسياره اللي بادلتبها ,, ما اعرف ليش مسوينها قضيه (وقام بيطلع) يلاا ,, اكرمكم الله
ام سلطان: الله يحفظك
وطلع عنهم ,, اول ما ركب وشغل ,,عطاهاااا ريييييس عشان يغايض ,, او يفرغ غيضه بالمعنى الاصح وروح ..
خطف بيت عمه وشاف سياره عمه موجوده قال في خاطره زين بعد ,, بينزل ييلس عنده شوي ويسولف وياه .. دخل السياره الكراج ونزل وهو يمشي صوب البيت طرش لروضه مسج ..

(( صباح الخير ياحلوه .. انا فبيتكم وابا سويج سيارتي ))
روضه كانت نازله من فوق وهي تقرا المسج طالعت من الدريشه شافت راشد بيدخل ركضت صوب الباب وفتحت بنفس الوقت اللي راشد كان بيفتح الباب .. قفز راشد ورد على ورا
راشد: بسم الله ,, من وين طلعتي انتي
روضه: ههه من بطن امي
راشد: ههههاي ,, تستخفين دمج
روضه: لا استضرف
راشد: الله يعينا ع المتفيجين ,, خوزي عني بدخل ,, وين عمي
روضه: اوه نسيت ,, هلا حيااك اقرب
راشد: قرييب (ودخل ومشى وراها للصاله اللي قاعدين فيه) السلاام عليكم
بوخلفان: وعليك السلام
راشد وهو يتجدم بسرعه صوب عمه ويحط ايده على جتف عمه : استرييج عمي استريح (ويحبه ع راسه)
بوخلفان: يعلني افداك ,, شحالك
راشد: طيب طاب حالك ,, انت شحالك
بوخلفان:والله الحمدلله ,, مقزرين فهالدنيا
راشد:الله يعطيك طولت العمر والصحه والعافيه
سارت روضه تيب سويج سياره راشد من فوق وردت لهم الصاله ,, راشد وعمه كانو يسولفون عن العزبه عقب بوخلفان سال راشد عن الشركه واوضاعها لان مثل ما تعرفون راشد اللي ماسك شركه العايله ,, وعقب شوي ياهم سالم توه ناش من الرقاد .. حب ابوه على راسه وتوايه ويا راشد ونشت روضه وحبته وانسدح وقال لروضه تصبله حليب ..
بوخلفان: شورايك تشربك اياه بعد
سالم: يالييييت والله
بوخلفان اونه يعني معصب عـ سالم: بتعلمهم كباار والا صغااار
راشد: هههه قووم يلااا ,,شو هالكسل اللي فيك توك ناش من الرقااد
سالم: انتو ليش منقهرين خلو ختيه تدلعني
بوخلفان: اسمع الرمسه انته ,, عنبووووك ريال وتدلع
سالم يعدل يلسته: اصبحنا واصبح الملك لله
راشد هلكاان ضحك على سالم ,, سالم هااا سووووداني ,, من ينش من الرقاد لازم على قولته يريح شوي ما ادري شو كان يسوي فالحلم !! جنه يصارع .. حب راشد يكملها ويغايض
راشد: الااا اقول بوغنيم
سالم: آآآآآآآمر
راشد: مايامر عليك ظالم ,, انت اللحين بتقعد 7شهور صح !!
سالم: هيه
راشد: و7شهور بتقعد بطالي
سالم: يعني ادور شغل لـ 7شهور بس وعقب اودره واساافر
راشد: ما يحتاي تدور ,, الشركه موجوده
سالم يطالع راشد بنظره يعني اسكت احسنلك ,, وراشد بالغصب ميود عمره عن لايضحك
طبعا بوخلفان عيبته الفكره وتم يرمس سالم وسالم يتحلف لراشد ,, عقب ترخص راشد وقام بيطلع وقامت روضه وياه ..
طلعت وياه لين عند السياره وعطته السويج وخذت سويجها ..
راشد وهو يركب : نظفتيها عاد عن كشرتج
روضه: كشره فعييينك !! انا انسانه نظيفه ,, سيارتيه ما خيسها عشان اخيس سياير الناس
راشد: يعل الناس يفدونج ,, اسولف
استحت روضه واونها يعني اخرت ع ورا عشان يسكر الباب وهي بتروح ,, زخها راشد من يدها قبل لا تروح
راشد: لحظه
بسرعه روضه فجت يدها من يده ولفت تطالعه
راشد: امم ,,سوري بس كنت ابا ارمسج
روضه:ماعليه ,,بالحل ,, آآمر
راشد: مايامر عليج ظالم ,, بس كنت ابا اشبع عيوني من عيونك شوف قدر المستطاع
ابتسمت روضه وروحت عنه وهو ضحك وحرك وطلع من بيتهم ..
مرت الايام والاوضاع عاديه مابين الكل بس احداث عاديه تصير بين سالم وميره كل مايلتقون .. وحموودي كبر وطلع من الاربعين وام سلطان كانت مسويه طلوع محمد فبيتهم .. وكانت العزيمه عائليه ..
وفجاه وبدون سابق انذار من راشد وعقب ما تغدوا وقدام كل الريايل .. راشد لف صوب ابوه وزقره
بوسلطان: لبيه الغالي
راشد: لبيت في منى ,, ابويه انا عزمت وبعرس
بوسلطان متفاجأ من رمسه ولده وسالم يطالع سطان وخلفان وكانهم يسالون بعض بنظراتهم (شو سالفته هاا ؟! تخبل .. حد يقول لابوه جدام العرب كلها ابا اعرس !!)
واحد من الريايل : بالبركه ياولديه
سلطان: راشد قوم اباك شوي
راشد: لحظه سلطان انا ما خلصت رمستيه (ورد يرمس ابوه) ها ابويه شو قلت ؟!
بوسلطان: الصراحه فاجاتني يابوسنيده بطلبك ,, شوو الطاري !! والا لسعك الشوق وتويعت
راشد ابتسم
بوسلطان: الساعه المباركه يا ولديه ,, وعروسك عاد نتافهم عليها عقب ,, بنتشاور وياك
راشد: لا انا اباك تخطبلي اياها اللحين دام ابوها واخوانها حاضرين
سلطان يرمس خلفان: خويه تخبل ,, بيخطب من الريال وهو فبيته
خلفان: ياخي ظهر اخوك من الميلس ,, فضحنا
بوسلطان: اخطبلك من الريال وهو في بيتي !! لاااابوسنيده ضاع دليله .. الشوق لاعببه عدل
راشد: ابا بنت عمي محمد
الريايل : ونعم الساااع من بوخلفان
بوخلفان: تممم يابوسنيده ,, ماعندي اللي اغلى منك .. انا عني موافق
لف راشد يطالع سالم وخلفان (شو رايكم؟!)
خلفان: بالبركه يابوسنيد ,, مالنا شوور عقب شور الوالد
سالم: ان وافقت البنت,, مبرووك
بوسلطان مستغرب من تصرف ولده ويضحك فخاطره على خباله ,, والا هاي طريقه واسلوب يخطبون فيها !! .. بعد ماظهروا الريايل (يرانهم وهل بوسلطان واللي يقربون لهم وانسابتهم) وحتى الحرمات ..
خلفان شل حرمته وولده وروحو البيت ,, وسالم وابوه وامه وروضه بعد ردو االبيت وفالسياره سالم وبوخلفان كانو يتكلمون عن السالفه بس روضه وامها مب فاهمات ولا شي .. ويوم وصلوا البيت روضه سارت حجرتها وسالم لحقها وبوخلفان وام خلفان سارو حجرتهم وخبرها بوخلفان باللي صار ,, استغربت تصرف راشد وضحكت عليه وفرحت لبتها ..وسالم طبعا لاحقنها بيخبرها عن راشد وهي تتحرا بيسال عن ميره عشان جيه اول مادخل قالتله انها ما يلست وياها وايد ولاشافتها لان ميره نزلت شوي بس عن خاطر شما والا البنيه ثنويه عامه وعليها امتحانات
عقب ماخذ العلوم ضحك على روضه وقالها انه ياينها بسالفه غير .. وخبرها بسالفه راشد من البدايه لين اخر شي

يتبع ..