[فيتامين سي]

:: 24 ::

مرن يومين وسالم ما كلم ميره ولا فكر حتى ,, خلااص مخلنها عـ راحتها ..
وعقب يومين .. وتحديدا بعد صلاه العصر سارت روضه صوب ميره اللي كانت في حجرتها تتعدل
روضه: الله الله ,, عـ وين ا نشا الله
ميره: ولا مكان ,, صليت وحسيت اني ملانه وقلت بكشخ .. وبعدين بيلتمن الحرمات كالعاده خليني اطلع كاشه بينهن اليوم
روضه: لا ما ظني حد بيلتم اليوم ,, لان امج بتسير بدع زايد
ميره: ماااشاا الله عليهاا ,, منو قالج ؟!
روضه: راشد بيوديها
ميره: وشو تسوي عاد سايره بدع زايد ؟!
روضه: بيسيرون عزا ما ادري منو
ميره: اهاا ,, وينه اللحين ريلج ؟!
روضه: سار العزبه
ميره: اخييييييه بيسير عند العرب وريحته ريحه بوش ,, بيلوع جبودهم
روضه(ضربتها ع جتفها وضحكت ميره ): تخسين ,, بيتسبح طبعا .. فديت ريحته
ميره: ياويلي عليج
روضه: جب جب ,, يلا اخلصي
قعدت روضه عـ الشبريه تتريا ميره تخلص واتصلت لامها وقالتها امها انها بتسير ويا خلفان وشما بدع زايد وعقب ما سكرت عنها قامت بتنزل مع ميره لانها خلصت
روضه: حتى امايه بتسير ويا خلفان
ميره: عيل بقول لـ شما تينا تولهت عليها السودا
روضه: بتسير وياهم
حاست ميره ويها وضحكت عليها روضه ونزلن ,, وعـ الساعه خمس رد راشد من العزبه وسار بسرعه فوق بيتسبح ويلبس وبيسير ولحقته روضه تجهزله ثيابه .. حطتهن عـ الشبريه وطلعت الصاله
طلع من الحمام( وانتو بكرامه ) ولبس بسرعه .. سمعت صوته روضه ودخلت الحجره
روضه: نعيماااااااااااان
راشد( يفتح يده لروضه) : الله ينعم علييييييج
سارت صوبه روضه ولوى عليها وباسته : يلا يلا عموه بتتهندق عليك
راشد: الله يهديها مستعيله
روضه: ترا امايه سارت عنها وهي تمت هنيه تترياك
راشد: جان سارت وياهم يوم هي تبا امج
روضه: لا انته ودها
راشد: من عيووووووني
ابتسمت روضه: يعلهن سالمات ياربي
وصاح تيلفون روضه وميره اللي كانت متصله
شل راشد التلفون من يدها (وبصوت حاد): شو تبين ؟!
ميره: بسم الله ,, بلااااك
راشد ( يبا يخوفها وصرخ عليها ) : شوو تبين ؟! (حتى روضه فزت)
ميره: عوذ بالله منك ,, امايه تقولك انقفض
سكر راشد التيلفون بدون ما يرد عليها ..
روضه: ليش رديت عليها جيه
راشد: هههه ابا اروعها
كفخته عـ صدره روضه: انا اللي تروعت
يود راشد يدها وباسها : فديت روحج .. ههه اسف
روضه: يلا انزين ,, تحيرت على امك
راشد: يلا
نزلوا راشد وروضه تحت وهو يقودها من يدها ورفيعه كانت داشه البيت يوم شافت راشد عـ طول خنقتها العبره ودمعت عينها ,, راشد عـ طول طلع وام سلطان لحقته ..
روضه سارت صوب رفيعه ووايهتها وانتبهت ان فيها شي بعكس ميره اللي ما كانت منتبهه
روضه: شحالج ام احمد
رفيعه: الحمدلله ,, انتي شحالج
روضه: بخير وسهاله ...... (وخذتهم السوالف ,, بس رغم ها روضه كانت تحس ان رفيعه فيها شي وتجرأت وسألتها ) ام احمد شي مضايقنج ؟!
رفيعه غرغرت عينها : لا ابد
هنيه انتبهت ميره: لااا صدقها روضه ,, شي فيج .. والدليل انها يوم سألتج غرغرت عيونج
رفيعه: صدقوني ما فيه شي ,, لو متضايقه ادري ان مالي حد غيركم
ودخلت عليهم لطيفه ..
لطيفه: السلااااام عليكم
الكل : وعليكم السلاام
لطيفه: حي الله ام احمد ,, شحالج
رفيعه: تماام ,, انتي شحالج
لطيفه: طيبه ,, وين حماادي عيل
رفيعه : يلعبون خاري ويا عيال شما
ميره: عيال شما هنيه
رفيعه: هيه ,, نزلتهم وسارت
كملن سوالفهن اللي ما تخلص اصلا واذن المغرب ,, لطيفه سارت ويا رفيعه بيتها وميره وروضه صلن في ميلس الحرمات وعقبها سارت ميره المطبخ تسويلهن نسكفيه .. وروضه قعدت عند التلفزون
خلصت ميره وردت لروضه ,, وهن يتقهون اتصل سالم بـ روضه
روضه: هلا والله
سالم: اهلين ,, شحالج حياتي
روضه: تماام فديت روحك .. انت شحالك ؟!
سالم: هب بخير
روضه: افااا ,, ليش
سالم: وين من يومين ما تتخبرين عني
روضه: هههه فديتك والله نسيت .. انت تدري انك دووم في بالي
ميره تتحراه راشد: ياااااويلي عليك ,, شو بيستوي يعني ان ما رمستك كل شوي
سالم: حد حولج غيرها ؟!
روضه: لا
سالم: عيل والله تحطين سبيك ( ضحكت روضه) والله رويض ,, دخيلج
حطت سبيك : سمعي شو يقولج
سالم: بالنسبه لج عاادي انها ما ترمس راشد كل شوي .. اللي ما فيه قلب ولا يحس باللي يحبه كيف بيحس بالناس اللي تحب بعضها
صخخخخخخخت ميره وروضه انصدمت ما توقعت انه بيقول جيه وعـ طول ميره قامت من مكانها وروضه شلت التلفون
روضه: الله يهديك يابوغنيم شو ها الرمسه ,, شو تحس وما تحس
سالم: آآآآآآه يا رويض ,, قاهرتني من يومين وحارقه قلبي
روضه: بسم الله عـ قلبك ,, بوغنيم انا بسير اطالع ميروه لان شكلها زعلت برد ارمسك عقب
سالم: اوكي ,, طمنيني عليها عاد
روضه: تعق الرمسه وتقول طمنيني عليها ,, والله انك سالفه
سالم: هههه يلا انزين سيريلها هالدلوعه
روضه: اااه منك ,, يلا بااي
سكرت عنه وسارت بسرعه لـ ميره ,, دقت الباب وما ردت عليها وزقرتها وبعد ما ردت .. سارت حجرتها وطرشت لـ سالم مسج
(( ما طاعت ترمسني وقافله على عمرها ,, شو استفدت عااد يوم زعلتها ))
(( براايها .. خليها تحس شوي .. حارقه قلبي واحس بضيق منها ما تطيع ترمسني ولا تيلس ويايه ولا حتى تحسسني بحبها لي لو بنظراتها هذا اذا كانت تحبني))
(( عن الحركاات عاد ,, ادري انها ما تهون عليك ولا ترضى انها اتم زعلانه .. وتدري انها تحبك عن التغلي ))
(( ليتني القالي اللي اتغلى عليه ويغليني))
(( اااه يا ويلي منك ))
واتصللها : ما تعرفيين تتصلين ,, تعبت وانا اكتب ..مادااني المسجات
روضه: هههه تطور ياخي
سالم: خس الله هالتطور ,, اصبوعي عورتني
روضه: هههههه (سمعت صوت جرس السرعه) وين انته
سالم: راد من العزبه
روضه: انزين اخطف عليه تميت روحي,, زعلت اللي كانت يالسه ويايه
سالم: هههههههه زين يلا دقيقتين واكون عندج بس بتسيرين ويايه فالكلوزر ؟!
روضه: شعليه ,, بسير فياك
سالم: يلا انزين ياينج

سكرت عنه وردت تحايل ميره تفتح الباب بس ماشي امل وهي راده حجرتها سمعت صوت وييييييييل عاااااااااااااااالي وعقبها صوت شي طااح وصرخت فجأه : ساااااااااااااااااااااااا ااااااااااااااااااااااااا ااااااااااااااااااااااااا الم
ميره سمعت صوت السياره وصرخت روضه وبطلت الباب بسرعه وهي تصيح وتركض بسرعه تبا تتأكد من اللي سمعته
روضه من سمعت الصوت وصرخت ركضت تحت وبسرعه طلعت الحوي وركضت قدام البيت وميره لحقتها .. وهن طالعات لطيفه ورفيعه كانن طالعات من بيت رفيعه يشوف نشو السالفه لان الصوت وايد قريب شكله فـ الحوي ..
وبالفعل طلع توقع روضه فـ محله .. سالم انجلب
ميره تصنمت قدام الباب وهي تشوف روضه تركض صوب السياره وشباب كانوا واقفين قريب ركضون بعد ويزقرون سالم ,, الحادث كان عند اللفه اللي بعد الدوار القريب من البيت شوي .. ما اهتمت روضه للمسافه ولا لحد وركضت لاخوها
روضه تصيح وتصارخ وهي حاطه راس سالم عليها : طلبوااا الشرطه ,, الاسعاااف بسرعه ,, اخويه ينزف
وبسرعه اتصلوا بالشرطه ويوهم هم والاسعاف ونقلوا سالم المستشفى وروضه وياه
تيلفون روضه كان فالبيت وراشد وهو راد يتصللها وما ترد جان يتصل لميره وبعد ما ردت عليه لانها قاعده عند رفيعه وتصيح وتيلفونها فوق ورد واتصل بـ لطيفه وردت عليه
لطيفه: الوو
راشد: الوو هلا
لطيفه: اهلين
راشد: اخباركم
لطيفه: تماام
راشد: وين رويض وميره اتصللهن ما يردن ,, قوليلهن خفن الريس شوي ,, عن الهذربان وايد
لطيفه: هااه؟!
راشد: شو هااه !! ,, بلااج ما تستوعبين
لطيفه: هاه ماشي ,, استوعبت استوعبت
راشد: انزين زقري رويض
لطيفه(ارتبكت): محد ,, لا لا هنيه .. بس محد
راشد: ايييه يلاج انتي ,, اقولج زقري رويض
لطيفه: تتسبح
راشد: كم هو السبوح قبل ما اسير احيدها نظيفه ,,عن العيازه والحجج قومي وديلها التلفون
لطيفه: سارت عند رفيعه
راشد: راااااعيهن ,, كل شوي بتقوليلي مكان .. انا ادريبج لطوف عيازه ما فيج تنشين تزقرينها لكن ما عليه انا براويج يوم برد
لطيفه: لا والله مب جيه بس صدق رويض محد
استغرب راشد: وين سارت ؟!
لطيفه: اممم ,, ما ادري ما ادري .. يلا باي
وسكرت عنه ,, تروع راشد خاف روضه فيها شي ورد يتصل لروضه ما ترد وميره نفس الشي ورد للطوف وبعد ما ردت وحاول وحاول وردت جان يفتن عليها
لطيفه: بلااك ,, قلتلك ما ادري وينها
راشد: لطووف ان ما قلتيلي وين رويض واللحين بسرعه يا ويلج
لطيفه: امم ,, انزين هد وانا بقولك
راشد: هااادي ,, يلا قولي
لطيفه: امممم,, سالم سوا حادث وهي عنده فالمستشفى
راشد خبط بريك : شووووووو ؟!
لطيفه: اللي سمعته
راشد: متى هاا ؟!
لطيفه: قبل شوي ,, عند الدوار اللي عدال بيتنا
وبدون ما يرد عليها سكر وفر التيلفون وحطها ريييييييييييييييييس وطيرها للعين وامه عداله تحاول تفهم منه شي مب قادره وتحاول تهديه تباه يخفف وهو هب حولها ,, وصلها العين في زمن قياسي وعلى طول وداه الدختر وياه بدون ما يقولها شي ,,خبط قدام الباب بريك ونزل يركض والسياره شغال هوامه فيها وما تدري بشي
نزل يركض صوب الاستعلامات يسألهم عن الحادث وقالوه في اي غرفه وسار يركض ,, شاف هزاع ولد يرانهم ومنصور واقفين هناك وسار صوبهم
راشد: سالم هنيه ؟!
منصور: هيه
راشد: شو فيه ؟!
هزاع: بسيطه ان شا الله
مر قدام عيون راشد فلم موت اخوه وخانه توازنه وقبضه هزاع
هزاع: بلاااك راشد
راشد ايود رااسه : ساااالم ما بيلحق سلطااان ,, ما بيلحقه .. هوو اللي بقاااالي عقب سلطان .. ما بيخلييييييييييني
منصور: هد يا رياال ,, انشا الله ما عليه شر
هزاع: بسم الله يا راشد ,, تفائل بالخير
وعند ام سلطان ..
نزلت ام سلطان من السياره وتمت عدالها لين شافت شاب من اللي يشتغلون في المستشفى وزقرته
الموظف: امري خالتيه
ام سلطان: فديتك يا ولديه تبند السياره وتعطيني السويج ,, ابا احد داخل
الموظف: ومنو يايبنج ؟!
ام سلطان: يايبني ولديه ,, لكن حدر يربع عن داخل وخلاني عند السياره وانا ابا اتطمن عليه اخاف حد شي صايرله
الموظف: ولا يهمج ,, بس ممنوع الوقوف هنيه,, بوقفها ف الباركن .. انتي دخلي داخل وانا بيبلج السويج
ام سلطان : يزااك الله خير
دخلت ام سلطان داخل والموظف وقف السياره في الباركن ودخل وعطى ام سلطان السويج
ام سلطان: عد ياولديه انا ما ادري وين سار راشد
الموظف: والله ما ادري يا خالتيه (وتذكر شي) ولدج لابس كندوره بنيه؟!
ام سلطان: هيه
الموظف : لحظه شوي خليني اتأكد
سار الموظف ورد عليها : ولدج سار عند واحد مسوي حادث ويايبينه فالاسعاف
ام سلطان: بسم الله ,, منو
الموظف: امم ظني اسمه سالم محمد الــ,,,,
ام سلطان: وييييييه بسم الله ,, شوو تقول انته ؟! ودني عندهم
ووداها قسم الطواري وشافت راشد هناك

شو صاار في سالم واخبار روضه ,, وكيف بيكون خبر حادث سالم على الجميع ؟!! في البارت الياي