[فيتامين سي]

28
خلصت ميره غداها وسارت فوق وروضه يوم خلصت لحقتها ..
روضه: بلاج مياري .. منو اللي نرفزج جيه ؟!
ميره: حد غير اخوج
روضهّ: بلاه ؟!
ميره ( وتنازلها التيلفون ) : شوفي
قرت روضه المسج ( اذا وايد مستعيله بجدم الحجز ولا تعذبين عمرج وتربعين يوم تشوفيني )
روضه: يبا يغايضج بس
ميره ( وغرغرت عيونها ) : مب ناقصه مغايض
لوت عليها روضه : اتصليله وهزبيه
ميره: مابا.. خليه برايه
حاولت روضه تغير الجو على ميره وقعدن يسولفن كالعاده لين ما اذن عليهن العصر وقامن يصلن وروضه سارت حجرتها تشوف راشد لكنها ما لقته واتصلتله
راشد: توج ذكرتي انع ندج ريل تتخبرين عنه
روضه: هههههههه ما يخصه ,, بتضيع يعني ؟!
راشد: ( يقلدها ) ما يخصه .. شو تبين !! انا زعلان
روضه بدلع : انا زعلتك !!
راشد: اااه ياويلي منج
روضه: هههههه
سالم: بس عاد اخلصوا
راشد: اسكت انته
روضه: لا تسكت بوغنيم
راشد: انشا الله ( يرمس سالم) هذرب الغالي ,, هذرب لو لين باجر ماشي اشكاليه
سالم: اسميك هب صاحي
روضه: هههههههه عن الطنازه
راشد: انزين امري شو تبين ؟!
روضه: وين انته؟!
راشد: على خط العين دبي
روضه: نععععععععععععععععععععم
راشد (صرخ عليها يبا يخوفها ): شعندج ,, قولي الله يحفظك
روضه (استحقرت): الله يحفظك ,, بس ليش ما خبرتني قبل لا تسير
راشد: راعيهن .. اشاورج تبيني ؟!
روضه: لا محشوم بو سنيده ,, بس تخبرني
راشد: وان ما خبرتج شو بيستوي !!
روضه: ما بيستوي شي ,, خلاص برايك الله يحفظك
راشد:برايج ,, يلا باي
وسكر قبل ما ترد عليه ,, استحقرت روضه منه وااايد ..
شو مشكلته ها الريال !! مره يرمس عدل ومره يصارخ .. وليش يصارخ اصلا ؟! ها يزايه اني اتخبر عنه يعني ,, لا ويسكر في ويهي بعد
ونزلت دمعتها ,, مب متعوده بنت محمد حد يواجعها والا يقولها شي او يرمسها بعوافه ويسكر في ويها
شوي ونشت تغسل ويها وتتكشخ ونزلت ولقت عمتها وعمها بيسيرون العزبه وقالتها عمتها ان امها وابوها بعد بيسيرون اذا بتسير وياهم
لقتها فرصه روضه انها تطلع وتغير جو هي وميره عقب ما كدرها راشد وهاذيج كدرها سالم << مستوين سخيفين اليوم
سارت تلبس عباتها وتزقر ميره ونزلن بسرعه .. طبعا قالن للطيفه بس ما بغت تسير وياهم ..
نزلن وان بوسلطان وام سلطان يتريونهن
روضه: عمي انا بسوق عنك
بوسلطان: اتروع عليج يا بنتي ,, اخافج تتعبين
روضه: ما فيه باس يا عمي ,, انا الحمدلله بخير اللحين .. خلني اسوق عنك
ام سلطان: لا لا لا ,, عن الخبال ما ترومين
روضه بدلع : عموووه والله عادي ,, ( وتطالع عمها بنظره تبا تكسر خاطره)
بوسلطان: يلا انزين ,, بس شوي شوي والا بنزلج وبفرج فالدبه وانا بسوق عنج
روضه: هههههه اوكي
ساروا شوابنا ومعاهم البنات للعزبه ,..
وصلوا هناك وشافت روضه سياره راشد واقفه وقبل لا تنزل شافته ياي صوب سيارتهم ,..
قالت في خاطرها : ها يستهبل عليه والا شو !!
نزلت ويوم شافها استغرب
راشد يرمس ابوه : انا اتحرا الدريول يايبنكم ,, اشوفك يالس معيوني .. ثرها بنت محم دريولكم
ولا كنها تسمعه .. سكرت الباب وخطفت عنه جان ايودها ويلوي عليها
راشد: ههههههه بلاج
روضه: ماشي ,, فجني
بوسلطان: ثركم متناطبين ؟!
راشد يسحبها السياره: ماعليك منا ,, شوي ونرضى
ميره: لانك سخيف
راشد: ول .. مشيشتنج عليه بعد .. ماعليه انتي براويج بس خليني ارد
ركب روضه السياره وركب هو وحرك
وطلع سالم من الخيمه : مرحباااااااا الساااع ,, اقربووو
ام سلطان : المرحب لا هان ,, فديت ويهك يا الغالي .. يوم بتسير عاد ما بنسمعها ها الترحيبه وهالملتقى
سالم: بسجلج صوتي
بوسلطان: ما يسد الصوت عن الصوره يابويه
سالم: ولا يهمك يا عمي .. بصور وبكبرها وبعلقها لكم عند الخيمه وعدالها المسجل

بوسلطان: ههههههه يعلني افداك .. ومنو بيسولف علينا عاد
سالم: لا تخليني اهون يا عمي
ام سلطان: ماعليك منه ,, الله يحفظك انشا الله .. فتره بسيطه وبتطوف وبترد بالشهاده الغاويه
سالم: انشا الله (ودخلوا الخيمه ) مياري شحالج
ميره تطالعه بطرف عينها: بخير
قرب سالم الدله لعمه وام سلطان طلعت بتشوف هوشها وتطمن على حلالها
وميره تمت يالسه ويا ابوها وسالم .. هم يسولفون وهي يالسه تشوف سالم وهي ساكته ,, طبعا هو منتبهلها بس اونه ما يدري لانه يدري لو لف عليها بتشل نظرها عنه .. هو مستانس عليها ويسولف ويا عمه
شوي ونشت ميره بتطلع
بوسلطان: وين بتسيرين امايه ؟!
ميره: بمشي شوي
وطلعت عنهم وهي مروحه صوب شبج البوش يو راشد وروضه وسارت روضه صوبها وراشد دخل عندهم في الخيمه
ميره: رضيتي ؟!
روضه: امممم ,, تقريبا
ميره: ياحيج
روضه: قالي والله اني امزح وياج
ميره: ويجذب عليج
روضه: لا ,, اونه انا ما قلت ساير دبي .. قلت على خط العين دبي .. نفس الشارع اللي يودي للعزبه
ميره: ياربي منه ,, مكااااار
روضه: وااايد ,, وانتي ؟!
ميره: وانا شو فيه بعد ؟!
روضه: رضيتي ؟!
ميره: مب مهم ,, ولا افتكر اصلا .. ولا يدري عني اذا زعلانه والا راضيه
روضه: لا حرام عليج ,, والله انه يحسبج بس ما يروم .. امج وابوج هنيه كيف يرمسج قدامهم
ميره: حتى لو وراهم .. ماهمه
روضه: انزين هو ما قالج جيه الا من غلاج ,, ودليل انه يبا يشوفج لكنج قهرتيه يوم ركضتي عنه
ميره: والعتاب يكون جيه عاد ,, عفان الله .. يعقهن كبار كبار
روضه: ههههه افا عليج يا بنت احمد ..العتاب من المحبه
ميره: خلاص رويض دخيلج سكتي عني ,, اوني يايه العزبه اغير جو وانه قدامي
روضه: وين بتشردين يعني ؟! مالج مفر من بوغنيم
قبل ما ترد على روضه وصلها مسج ( فديت الزعلانين )
وراوت روضه المسج
روضه: ما قلتج انه يحسبج ,, لكن انتي الله يهديج
ميره: وايد متلوم اونه
روضه: ههههه ما ادري شو اقولج
ميره: لا تقولين شي ,, غيري السالفه
ووصلها مسج ثاني ( ليش عاقده حياتج !! اللي يتفداها حبيبها تستانس .. وماله داعي كل مسج تراوينه رويض )
لفت حلوها تبا تشوفه وين .. ما لقته ؟!
روضه: بلااج تدورين ؟!
ميره: هاا .. لا ماشي
( بعيونج ما بتلقيني ,, لو دورتي بقلبج بتشوفيني )
ميره لفت مره ثانيه : ووووووينه ؟!
روضه: منوو ؟!
ميره: ااااه ياربي منه ,, بينني
روضه: بسم الله عليج
بعد مسج بس هالمره لروضه ( فديت رويض اللي بتفارج شوي وبتخلينا على راحتنا بدون ما تحسبها ميره )
روضه: هههههههههههه
ميره: بلاج انتي بعد
روضه: ماشي ,, بس بسير الخيمه شوي راشد يباني
ميره: بسير وياج
روضه: لا فديتج ما نبا عواذل .. قلتلج شوي وبرد
ميره: انا عذول !! والا هناك ؟!
روضه: محد هناك ,, كلهم روحوا
ميره: انزين يلا بسرعه .. لا تخليني روحي
روضه: انشا الله
روحت روضه الخيمه وصدق محد كان فيها ,, راشد وابوه ركبوا السياره وما ادري وين ساروا وام سلطان لفت ام خادم وسارت وياها عزبتها اللي عدالهم محد فالعزبه غير سالم والبنات .. سالم قالهم انه بييلس عند البنات لين ما يردون عشان ما يتمن رواحهن مع العمال ,, شغلت روضه التلفزون وصبتلها شاي وقعدت

شو بيصير بين سالم وميره !!
في البارت الياي