[فيتامين سي]

بعد ما سارت روضه عن ميره وفضت الجو لـ سالم ,, يا سالم عند ميره بدون ما تنتبه ووقف قدامها
ميره فزت وهو تم يضحك عليها
ميره: انت من وين طلعت ,, بسم الله ,, روعتني
سالم: بسم الله عليج .. ههههه
ميره قامت بتروح : ما يضحك
سالم: انزين خلاص انا اسف ,, ما يضحك .. بس لا تسيرين .. اصبري ابا ارمسج
وقفت ميره : نعم ... شو تبا ؟!
سالم: اتكلم وانتي مالج نفس !!
ميره: لا عادي .. تكلم
سالم: ليش زعلانه ؟!
ميره: هب زعلانه
سالم: لااااه ,, وها كله هب زعلانه ,, لو زعلانه كيف عيل
ميره.. لا تــــــعليق
سالم: ما بترمسين ؟!
ميره: كل كلمه والثانيه نغزتني بالسفره وما تباني ازعل
سالم: ما تبيني اسافر ؟!
ميره: ولا اباك تضيع دراسه كم سنه عشان شهرين
سالم: ما همني السنين اللي طافن ,, اللي تبينه بسويه
ميره : برايك الله يحفظك انشا الله ,, بس مب كل كلمه والثانيه قلتلي تراني بسافر .. والله ما اتحمل
سالم: هههه فدييييييت روحج ,, خلاص هب قايللج حتى بسير وانتي ما تدرين
شهقت ميره: ياويلك والله
سالم: ههههههههههههههههه
ميره انحرجت وعضت على شفايفها
سالم: فديت اللي يستحون ياربي
ميره: ساااااااالم
سالم: عيون سالم وقلبه
ميره: خلاص عاد
سالم: خلاص ,, خلاص ولا تزعلين
ميره: متى بتسير ؟!
سالم: ههه هب قايللج
ميره: يلااا عاد
سالم: قبل لا اسير المطار بتعرفين
اتصلت روضه بـ سالم
سالم: نعم يا العذول
روضه: هههههه حرام عليك ,, اولا انا مليت وثانيا ردوا بسرعه لان راشد وعمي ياين .. ما فينا للفضايح
سالم: يلا انزين
سكر عن روضه وقال لميره وساروا صوب الخيمه .. توهم قاعدين ان بوسلطان وراشد رادين
روضه تهمس لسالم: جان رحت وطي
سالم: هههه جب انزين عن الفضايح
وعقب اليلسه والسوالف ردوا البيت ..
مرت الايام وميره كل ما ترمس سالم وتسكر عنه صاحت ,, تعودت عليه خلاص وما تقدر تصبر عنه شهرين ما ترمسه وتشوفه لكن شو تسوي ..
اليوم سفر سالم .. والمناحه شغاله من الصبح
روضه تسير وترد على ميره تهديها و تباها تسكت عن حد يحسبها وهي ولا عليها
سالم لازم يكون في المطار قبل المغرب ..
عقب ما صلى العصر نزل شنطه تحت ونزل دموع امه معاهن ..
سالم يلوي على امه : الله يهديج يا امايه .. جني اول مره اسافر
ام خلفان: عاد انا ام .. ولا اصبر عنكم .. اباكم دوم حولي
سالم: شهرين وانا عندج انشا الله
بوخلفان: ماعليك منها يا بوغنيم .. سير والله يحفظك ان شا الله
وايه ام وابوه وخلفان ركب الشنط السياره ويتريا اخوه برع في السياره .. حب عيال اخوه ووادعهم وطلع
ركب السياره وهو ساكت وقلبه معورنه .. ليش هالمره يحس بهالاحساس ؟! كل مره يكون عادي
يسير ويرد ولا يزعل .. صح انه يتوله عليهم بس مب مثل هالمره
لف خلفان بيت عمه ويوم انتبه سالم يود السكان عن يلف
خلفان: ليش ؟!
سالم: ماروم دخيلك
خلفان: واختك؟!
سالم: بتصلها
خلفان: افاا يا بوغنيم ,, ما يصير تسير ولا تمر عليهم
سالم: صدق يا خلفان ما اروم
خلفان: بس لازم تمر .. قو قلبك
سالم: لازم؟!
خلفان: لازم لازم
تنهد سالم وخلفان طالعه وابتسم .. ولف بيت عمه

اتصل سالم بروضه يقولها انه تحت .. خطفت على ميره تخبرها ونزلت تحت بسرعه
نزل سالم وخلفان تم في السياره ..
تلقت روضه لاخوها وايهته ولوت عليه وما يخلى الموقف من دموع روضه طبعا
سالم: وين عمي وحرمته وراشد ؟!
راشد يتسبح .. زقرت عليه بي اللحين وعمي يمكن طلع اذا سيارته هب موجوده وعمتيه احيدها هنيه
سالم: عيل ردي السلام عليهم .. انا مروح خلاص ما اروم اتريا
سمعه راشد وهو نازل : وين يا بوغنيم ( ومشى صوبه يوايهه) .. ليش مستعيل ؟!
سالم: الا قول وين شارد ؟!
راشد: ههههههه افاا ,, شرده بعد ؟!
هز سالم راسه بمعنى انه ما يدري او محتار ولا عنده رد .. روضه تطالع راشد وتترجاه بنظراته يزقر ميره تسلم على سالم قبل ما يروح وفهم عليها راشد .. وعقب لحظه صمت قالهم سالم انه خلاص بيروح
راشد: اصبر بو غنيم شوي
سالم: وين بو سنيده ؟!
راشد : ياينك لا تسير
سار راشد بسرعه فوق ودق على ميره الباب فتحتله وعيونها حمرا مبين انه كانت تصيح
راشد: شو بلاج مياري ؟!
ميره بصوت مبحوح : ماشي ,, تعبانه شوي
راشد: انزين يلا غسلي ويهج ونزلي بسرعه .. سالم تحت .. سسلمي عليه قبل لا يسير
نزلت دموع ميره غصب عنها : ماباا
راشد: يلا عاد ,, عشان خاطريه
ميره : لا تعليق بس دموع تنزل على خدها
راشد: مالي خاطر عندج
ميره: طبعا لك .. شوي وبنزل
راشد: انزين يلا لا تبطين .. تراه مستعيل
ميره: انشا الله
نزل راشد وحاول يأخر سالم وميره دخلت الحمام وغسلت ويها وبدلت ثيابها بسرعه .. حاولت تكون طبيعيه قد ما تقدر عشان ما يتم سالم يحاتيها .. تشجعت ونزلت وهي تتصنع الابتسامه
يوم شافها سالم وقف قلبه وراشد سحب روضه وساروا الصاله الثانيه


يتبع ...