[اسطورة !]

البارت السادس.

مدخل:/
إذا أنت
عالي باحساسك
وكل إنسان
من حولك بليد شعور
لا تقعد
تفكر أو تلف وتدور
اصنع من امل عمرك
جناحات الخيال
.........وطير



بسيارة سعود
سعود : ليش طالعة بدري.؟
وعد : ابدا استاذتنا غايبة والمديرة قالت عادي نطلع.
سعود : ملاحظة إن السيارة ورانا حتى وأنتِ طالعة بدري ويش دراه انك طالعة بدري.؟
وعد : ياليل ما أطولك طلبت تجيبني عشان تحقق معاي.؟
سعود : فهميني طيب ليش يلحقك .. شلون عرف انك طالعة بدري ..
وعد : سعود ما ودي اتهاوش معاك حتى اليوم ماني رايقة للمهاوشات < واللي سويتيه بالمعهد ويش يتسمى.
سعود : ليش يلحقك..؟
وعد : ما ادري يا سعود لا تزعجني.؟
سعود : معنى كلامك انه انتِ عارفة انه يلحقك .. ليــــــش يا وعد.؟
وعد : لا ما اعرف يا سعود.
سعود بعصبية : وعد ماني اصغر عيالك ولاني حاطة الرضاعة بفمي تضحكين علي والا تسكتيني. قولي لي بس ويش علاقتك فيه.؟
وعد نزلت من السيارة بعد ما وصلوا البيت ولحقها سعود.
سحبها من ضدها ولفها جهته : وعد اكلمك أنا.
: ماني رادة عليك؟
: ماهو بكيفك غصبا عنك توقفين تكلميني.
: ولا هو بكيفك.
تجمعوا أم سعود و أم احمد و مشعل على صراخهم : خير ويش فيكم.
أم سعود : سعود اهدا ليش تصارخ على اختك.؟
سعود : يمه خلوني إن ما تكلمت بذبحها اليوم.
أم احمد : سعود استهدي بالله المشكلة ما تنحل بالصراخ بس يجي أبوك بيشوف ويش المشكلة.
سعود : أنتِ تبينه صح .؟هذا اللي عايفة عيال عمي عشانه..؟!
وعد : أنت شلون تفكر فيني بهالطريقة يا سعود اصحى تراني وعد.
سعود : والله هذا اللي اشوفه قدامي مين هذا يا وعد قسما إن ما قلتي لي لا اتصل با أبوي الحين لا اخليه يجي يشرف على ذبحك.
وعد : اتصل عليه يا سعود ما يهمني كلامك هذا إن مستنتجة من راسك مالك أي دليل علي.
سعود : وقفتة برا دليل ادانتك و قدام شباك غرفتك ولو يصبر يومين بس و وداك المعهد فيهم بيشوفه يلحقك وكل شيء بيثبت عليك من متى تعرفينه يا وعد.؟
وعد : افكارك خلها براسك لا تنفثها علي.
سعود : وعد يميناً بالله لو ما قلتي لي الحين ويش علاقتك فيه لا.
وعد قاطعتة : لا شنو ياسعود تبي تضربني يعني.
سعود: تخيلين اني ما اقدر اسويها.
وعد : لا ما تقدر يا سعود. وعمرك ما راح تقدر أنت مالك كلمة علي دام بابا عايش.
سعود مسكها من يدها : ويش هالبقعة اللي بوجهك رحتي له بعد ما وصلك أبوي ضحكتي على أبوي على أساس دخلتي المعهد و رحتي معاه.
وعد فلتت يدها من يده : يا متخلف اسلوبك هذا روح تعامل فيه مع مساجينك مو معاي.
سعود : طيب قولي لي ويش اللي دراه انك طالعة بدري لو استاذتكم غايبة كان طلعتكم المديرةمن بدري مو يوم باقي نص ساعة على الطلعة..
دخلت ميار .. سها .. نهى.. خالد : السلام عليكم.
وعد : إن كنت مو مصدق اللي قلت لك هاذي مشكلتك ماهي مشكلتي.
خالد : خير ويش فيكم.
مشعل : من دخلوا وهم يتهاوشون كل واحد يصارخ على الثاني.
سعود : وعد صبري عليك طال احسن لك اعترفي اعطيني دليل انك داومتي بالمعهد اليوم ولا طلعتي منه معاه.
وعد : قلت لك مالك دخل فيني يا سعود.
سعود كالمجنون يصرخ فا اعصابة تلفت مسك سها : قولي أنتِ تكلمي.
خالد مسك سعود : سعوود سها ويش دخلها.؟
سعود : أكيد تدري من اللي واقف برا .. تكلمي مين هو.؟
خالد : سعود ويش تقول أنت.
سعود : اختك المصون تكلم واحد عند المعهد وكل ما جبتها يلحقنا لحد البيت واليوم نفس الشيء رغم انها طالعة بدري غير كذا مرتز بسيارته برا. ما فارق مكانه قدام شباك غرفتها.
خالد انصدم ما اتوقع اخته تسويها وتكلم شاب : صح هالكلام ي وعد.
وعد اللي فقدت الصواب تماما : ما يخصك حتى أنت بعد .. طلعت تجري لغرفتها و قفلت الباب.
سعود يصارخ : وعد وعد احسن لك افتحي الباب لا اكسره على راسك.
خالد : أنت متاكد من اللي تقوله.
ما إن طلعوا فوق سها ايضا هربت لغرفتها لتغلق الباب عليها. سعود الاعصار الغاضب و خالد إن غضبوا و اجتمعوا سويا سوف يقتلونها قبل إن يأتي ابيها حتى.
سعود : متأكد مثل ما اشوفك قدامي. وكل ما سالتها تقولي مالك دخل. سها وينها أكيد تدري.؟
مشعل : راحت غرفتها.
سعود يصارخ : سهاااا .. سهاااا .. حاول يفتح الباب لكنه مقفل : شفت حتى هي قافلتة.
خالد : بس يجي أبوي بيطلعن غصباً عنهن وبنسمع منهن وقتها بنفهم السالفة.
مشعل : أنا بروح اتوضا الحين يقوم لصلاة.
بعد الصلاة جالسين تحت سعود و خالد ومشعل.
أم سعود : يا يمه استهدي بالله هدي اعصابك اللي تقوله ما يصير وعد بنت متربية ما تسويها.
سعود : شوف عيني يمه شوف عيني.
أم سعود : يا يمه يمكن أنت فاهم غلط اصبر لين تفهم السالفة منها بس يجي أبوك.
سعود : ماني متحملها يمه ماني متحمل استهتارها تكمل و تنزل روسنا بالارض عشان يقولون بنت ابراهيم تكلم شباب والله إن ما قرت و اعترفت مين هو اللي برا ويش علاقتها فيه لا اذبحها و اذبحه.
سكتت أم سعود عن ولدها تعرف قد ايش معصب هالحين ولا شيء راح يوقف بوجهة.
نهى كانت تناظر من فوق عليهم : بيذبحونهن وما احد درى عنهن.
ميار : أنا صكتني أم الركب يوم شفتهم كذا.
نهى : الله يستر من اللي بيصير لو جاء ياسر وعرف قبل لا أبوي يجي ما استبعد يكسر الباب ويدخل عليهن.
ميار : خلينا نكلم أبوي نخليه يستعجل بالجيه.
نهى : لا ما اقدر وان سالني عن السبب ويش بقوله وبعدين الكل على جيه الحين الساعة 1.30..
فعلا ما إن انهت كلمتها حتى بدوو يدخلون وراء بعضهم .
أم ندى ..احمد.. وليد.. ياسر..جود .. دانه ..
احمد : السلام عليكم.
مشعل : وعليكم السلام.
احمد انتبه لاشكالهم سعود يهز قدمية بقوة .. خالد رايح جاي بالصالة قابض على يده بقوه.. مشعل الضايع بينهم..
: خير ويش فيكم.
: ........................
ياسر : ويش فيكم أبوي فيه شي.؟
أم سعود : لا ما فيه إلا العافية.
احمد : طيب ويش فيكم ليش جالسين كذا.
: .......................
ندى طلعت فوق لنهى و ميار : ويش فيهم اخواني.؟
نهى : احسن لك ما تعرفين.
أم ندى : خير ويش فيهم.؟
نهى : اصبري يمه شوي وتعرفين
أم ندى : نهى انتِ تعرفين ويش فيهم.؟
نهى : ايه معصبين على وعد.
أم ندى : ويش مسوية.؟
نهى : الحين تسمعين السالفة منهم لا قالوها لأبوي.
أبو سعود : السلام عليكم.
: وعليكم السلام.
استغرب اشكالهم : ويش فيكم.؟
احمد : جينا لقيناهم على ذا الحالة.
أبو سعود : ويش فيه يا سعود.
سعود : قوله يا خالد.
خالد : خلنا نتأكد أول شي لا تتسرع.
أبو سعود : ويش اللي تأكدون منه علموني.
: .................
أبو سعود : سعود خالد انطقوا.
سعود : وعد.
أبو سعود تنهد : ويش مسوية بعد؟
ناظروا بعض اثنينهم ما يعرفون شلون يقولونها صعبة على الانسان يعرف إنه اعطى شخص ثقة ماهو قدها يخافون على أبوهم لا يرتفع معاه الضغط ويطيح عليهم.
واقفة على الدرج: ما سويت شي ولدك سعود يتوهم ويصدق اوهامه.
خالد : برري لنا طيب كل اللي قاله سعود. فهمينا كل شيء اعطينا الدليل على إن سعود يتوهم.
أبو سعود بحدة : فهموني ايش فيكم.
وعد : سعود يحسب اني متعرفة لي على واحد .
سعود : كذا تقولينها بكل برود.
وعد : لاني واثقة ما سويت شي غلط .. كل اللي شفته فهمته أنت من راسك.
سعود مسكها بصراخ : ويش قالك امس لما وقف معاك.
وعد نفضت يدها منه : سعود لا تصارخ علي.
سعود : أنتِ اللي تخلين الواحد يصارخ عليك ويش قالك يا وعد.؟
وعد : ما كلمني اساسا.
سعود : لسى ما نعميت يا وعد شفتة بعيوني واقف بسيارتة قدامك احسن لك قولي لي ويش قالك ويش قلتي له.
وعد : أنت ما تفهم أي صح كان واقف قدام المعهد بس يهددني ارد على اتصالاتة.
خالد : بس يهددك تردين .؟ وليش ما قلتي لنا لما أنت واثقة انك ما سويتي شي.؟
وليش ما قلتي لنا إن فيه واحد مزعجك.؟
وعد : هذا جوالي بتلاقي فيه رقمه بالسجلات وكل رسايلة وبتفهم اني ما رديت عليه وعشان اكون صادقة إلا مرتين.
ياسر : وليش تردين عليه ليش ما كلمتينا احنا نوقفة عند حده. ما قلت لك قبل إذا اتصل مره ثانية علميني اتفاهم معاه.
وعد : اولا مو نفس الرقم, ثانيا هاذي شريحتي أنا خربتها امس عشان اطلع رقم جديد.
سعود : طلع يتصل عليك بعد جديده علي اصلا إن كان واقف برا أكيد تعدا مرحلة الاتصالات. وليش واقف برا.؟
وعد : هذا السؤال ما توجهه لي أنا زي زيك ما اعرف ليش واقف برا.
خالد : ماشاء الله يعني عرف البيت من حاله وواقف قدام شباك غرفتك , ويلحقك للمعهد ويرجع وما تدرين ليش.
ياسر مسك وعد من عضدها : ويش اللي بينك وبينه.؟
وعد فلتت يدها من يده : قلت لكم بدل المره الف مابيني وبينه شيء.
احمد : شلون يا وعد ما بينك وبينه شيء كيف عرف بيتنا وعرف المعهد اللي تدرسين فيه كل ذا وتقولين ما بينك وبينه شيء حدث العاقل بما يعقل.
ياسر : هذا اللي عايفة الزواج عشانة ورادة شيوخ الرجال وكبارهم على حسابه عشان واحد حقة ينذبح ولا يندفن من رداه لو انه شهم ما رضى يكلم بنات الحمايل.
وعد : أنا ما اعرفه ولا ادري مين يكون هو يعرفني ويعرف كل شيء عني اسمي الكامل عمري ومتى تخرجت ومن أي تخصص يعرفكم كلكم و يعرف وين تشتغلون أنا ما ادري من وين جاب كل هالمعلومات ولا ادري ويش يبي مني اصلا.
خالد : وعد كلامك ماهو راكب على بعض كيف يعرفنا و انتِ تقولين ما تعرفينه.
وعد : يعني أنت متوقع اني اعرفه وانا اللي علمته بكل شيء.؟
خالد : مالها إلا هالتفسير.
وعد : لو غيرك قالي هالكلام كنت رديت عليه لكن إذا انتم شايفين انكم ما ربيتوني ولا واثقين فيني هذا شيء ثاني.
أبو سعود : مالك أي مبرر يا وعد ليش ما اخذتيها من قاصرها وعلمتينا بالسالفة من اولها من أول يوم اتصل فيك . ليش ما قلت لي تبين الحين اقولك والله ما أنتِ غلطانة و اوقف معاك.
وعد : خفت لما اتصل أول مره و ناداني باسمي قالي اسمي الكامل ارتبكت ولا عرفت ويش اسوي .. خفت اقولكم وتتهاوشون معاه وهو مبين انه مو قليل شر.
سعود : لو استخدمتي عقلك شوي كان عرفتي ان فيه اكثر من طريقة نستخدمها معاه.
أبو سعود : ويش اللي يضمن لي انك صادقة يا وعد.
انصدمت وعد شلون يشك فيها : تشك فيني ..!! أنا وعد تربيتك تتوقع اني اخون ثقتك.
أبو سعود : لو كانت تهمك ثقتي فيك ما كان سكتي من أول ما عرفتي انه يلاحقك. (تحول اسلوبة للحدة) قسماً بالله يا وعد وما احلف بالله كذب لو اتاكد إنك تكذبين علي ما بيردني عن ذبحك شيء. وطلع فوق .. تعلقت عيونها فيه ماهي مصدقة اللي قاله.
خالد : ارتاح قلبك الحين.
طنشتة وطلعت غرفتها.
احمد : استغفر الله والله ما اصدق إن وعد تسويها او أي وحده من خواتي.
سعود : روح ناظر مع الشباك بتلاقيه واقف للحين.
ياسر : أنا بطلع اذبحه.
احمد : قسما تعتب الباب يا ويلك لا تعرض له بنشوف له دبرة.
مشعل : يعني شلون نخليه يراقبها ولا كأن فيه شيء. ليش رخوم احنا.
احمد : مو رخوم بس بتروح تذبحه و يضيع باقي عمرك بالسجن ليش ويش بتستفيد.؟
ياسر : يعني ويش تبينا نسوي له إن شاء الله نحيه على فعايلة معنا.
أحمد : اهدووا العصبية ما تخليكم تفكرون بالحلول الصح أول شيء لازم نعرف هو ليش واقف برا وليش يلحقها ما تعرفون ويش هي اسبابة.
وليد : قصدك انه يبيها؟
احمد : يمكن ليش لا.؟
سعود : ويومة يبيها يدل الدرب من وين, يدخل من الباب مو ينط مع الدريشة.
ياسر : وبعدين شلون بتعرف اسبابة.؟
احمد : نكلمة.
مشعل : ما أنت صاحي.
احمد : اجل انتوا الصاحين يومكم بتذبحونة نروح له ونوقف معاه ونقولة إننا دايم نشوفك واقف هنا ومن هالكلام.
وليد : بس وعد تقول يعرفنا كلنا يعني لا رحنا بيعرفنا.
ياسر اللي جوال وعد يدق بيده : رقم غريب شكله هو.
خالد : لا ترد.
أبو سعود اللي نزل بعد ما طلع فوق : هات.
اعطاه ياسر الجوال ورد وحط سبيكر: هلااا بالزين واهل الزين ادري ما راح تردين علي بس ماهو مشكلة اهم شيء تطمنت انك دخلتي بيتكم عساك تغديتي.. تراني اخاف عليك.. و اخوك سعود إن شاء الله ما عصب عليك شكله حمقان يوم جاك ما يقدر إن عنده اخت مثلك لو إنك اختي كنت حبستك بقفص عشان ما احد يوصل لك بس زين انك ما انتِ اختي عشان اخذك ... ويش رايك أنا اوصلك المعهد كل يوم بداله على الاقل تشوفين وجيه تفتح النفس مو مثل اخوانك.. ليش ما تردين علي لا تخافين راح اخطبك من أبوك واخوانك وعمانك كلهم و جدك وكل كبار قبيلتكم ما راح ارخص فيك... وعد ردي علي ما كني امس مهددك إن ما رديتي على اتصالاتي بنقفك و طنشتيني و غيرتي رقمك على بالك ما راح احصله لا يا وعد ما عرفتيني والله انكبك انتِ وكل عيلتك لا بغيت بس احسن لك اسمعي كلامي.. ردي يا حيوانة على بالك كل مره بتطنشيني والله لا أجيب راسك يالكلبة... وقفل الخط..
سعود موللللع : بروح ادفنه بارضة.
أبو سعود : سعوووود.
سعود : يبه تكفى خلني اطلع حرتي فيه.
أبو سعود : ما ابي أي احد فيكم يتعرض له والله إن دريت انكم معطينه وجه يا ويلكم.
ياسر : و وعد يبه نخليه يراقبها ماهي زينة.
وليد : اصلا وقفته قدام بيتنا ماهي زينة بحقنا.
أبو سعود : كل شيء وله حل بس الصبر زين الموضوع ماهو هين عشان على طول خذني جيتك. لو طلعت له الحين و دبغته لين مات بتدخل السجن والا بس تضاربتوا ويش القضية ويش بقول للشرطة ويش اسبابك ناسي انك عسكري و ما راح يرحمونك ما أنت شخص عادي و بعدين بتقولهم والله يلاحق اختي و تبي الفضيحة تنتشر بدل ما تلملم الموضوع وتدفنة تقوم تفضحة بنفسك. ولا احد فيكم يتصرف ربع تصرف تكملون ولا كنكم تشوفونه تطلعون وتدخلون عادي مثل قبل.
احمد : استغفر الله العظيم هذا من وين طلع لنا.
خالد : الغريب ليش يلاحق وعد ايش معنى هي مو أي وحده ثانية من خواتي.؟
أبو سعود : روح وليد نادها.
وليد : إن شاء الله.
جلسوا كلهم في الصالة.
نهى تبي تلطف الجو : شكلكم ما انتم مغدينا اليوم.؟
أبو سعود : تعالي اجلسي ابيك.
نهى أنا غبية ويش نزلني كلهم قعدن فوق حتى امي ويش خلاني انزل.
أبو سعود : قلت لك تعالي اجلسي.
تقدمت لهم وجلست.
أبو سعود : كنت تدرين.؟
نهى : عن.؟
أبو سعود : ويش نتكلم فيه من الصبح عن اللي واقف برا.؟
نهى : لا .. دريت مثلكم أول.
وعد : نعم.!
أبو سعود : ويش يبي يا وعد.؟
وعد : بابا قلت لك ما ادري ما اعرف ليش يلحقني.
أبو سعود : متى دق عليك أول مره.؟
وعد : اول يوم داومت فيه بالمعهد.
أبو سعود : شلون جاب رقمك.؟
وعد : ما ادري.
أبو سعود : ما تدرين. اهااا ويش كان يقولك.؟
وعد : كلام كثير.
أبو سعود : و امس واقفة معاه بالشارع وطاقتها سوالف نسيتي إن وراك اهل مولوده في الشارع.
وعد : أنا ما وقفت معاه برضاي المشرفة طلعتني برا قالت ماهم مسؤولين عن أي وحده يتأخرون عنها اهلها لاكثر من ساعة وانا دقيت عليكم كلكم وكلكم مو فاضين لي ثم تسالوني ليش واقفة معاه ما كان فيه احد في الشارع لو خطفني ما احد داري عني ما كان قدامي إلا اجاريه بالحكي.
أبو سعود : وتقولينها قدامي اجاريه بالحكي ويش تبيني اسوي فيك.؟
وعد : طيب أنت قولي ويش اسوي وقتها والشارع خالي.
سعود : ويش قالك وليش يلحقك.؟
وعد : ما ادري ليش يلحقني اما ايش قالي يبيني ارد على اتصالاتة ورسايلة.
أم سعود وقفت جنب وعد : أبو سعود الله يهديك ما تثق في بنتك وعد والله ما تسويها.
سعود : يمه الله يخليك لا تدخلين.
أم سعود : وشلون ما اتدخل وانتم كلكم هابين فيها وهي مالها ذنب.
أبو سعود : لا تسمعينها هالحكي وتحسسينها انها ماهي غلطانة الغلط راكبها.
أم سعود : يا أبو سعود تكفى أنت تعرف انها ماهي ملقيتة بال مالها ذنب انه يلاحقها.
أبو سعود : كان المفروض تقولي تعلمني مو تخليه يتمادى هالكثر ثم تقولين مالقته بال ومالها ذنب.
أم سعود : صغيرة يا أبو سعود ما تعرف تصرف زين والبنت خافت عليكم لا تسون شيء تندمون عليه هو مبين انه رخيص ولا هي هامته حياتة والا ما وقف قدام بيتنا.
ياسر : رخيص و ترخص نفسها له يومها ترد عليه.
وعد : ما رديت عليه إلا مرتين يا ياسر أول مره اتصل فيها ومره بعدها هددته فيها وبس.
احمد : وعد انتِ غلطانة كان قلتي لواحد فينا على الاقل كنا وقفنا معاك هالحين لكنك طنشتينا كلنا ولا اعطتينا أي اهتمام.
خالد : وكأن سمعتنا ما تهمك ولا يهمك حكي الناس فينا.
وعد : بس أنا ما كلمته عشان تقول سمعتكم وما ادري شنو.
مشعل : بس واقف قدام البيت وهذا بس يجيب لنا الحكي.
وعد : مو أنا اللي قلته له يوقف قدام البيت عشان تلوموني.
أبو سعود بحده : أنا بعرف الى متى كنتِ بتسكتين الين ما يسوي فيك شيء ويرميك علي بس علميني الى متى كنتِ بتنطمين بعدها بتجيني تعلميني وتقولين لي ليتني قلت لكم.
سعود : لما تجيبين لنا العار و دفن الرووس بالتراب.
وعد : ليش يعني غبية أنا امشي وراه ليش هذا اللي ربيتوني عليه.
خالد : البنت ما تحمل الكلام الحلو بكلمتين اقوى بنت تغرق فيها.
وعد : والله إذا أنت كلمت مجموعة بنات و غرقوا بكلامك ما يعني كل بنات حواء طينة وحدة.
خالد : أنا اكلم.؟
وعد : اشوفك افتيت إن اقوى بنت تغرق بكلمتين يعني مجرب.
خالد : وعــــــــــد هالكلام ما يتوجه لي.
وعد : مثل ما أنت توجه لي كلامك.
أبو سعود : لا تقلين ادبك فوق غلطك عشان ما ادفنك مكانك.
وعد : يكون ازين بعد عشان ارتاح من سجنكم.
تعدت بتطلع بس لحقها شدها من شعرها : ترفعين صوتك يا وعد و تردين علي.
كانت ضاغطة على يده اللي شاد شعرها فيه : كلكم تتهموني بشرفي وتبوني اسكت.
رفع راسها له بقوة : قسما بايات الله يا وعد واللي خلقني لو ادري انك مكلمته والا راسلة له بس رسالة ورب الكون لا ادفنك من غير لا اصلي عليك.
وعد : ما سويتها من وراك تظن اني اسويها بعلمك.
أبو سعود : ما ابغى زيادة كلام عن كلامي تفهمين.
وعد : ايه افهم.
تركها بقوة وطلعت هي فوق من غير لا تلتفت لاحد وسكرت باب غرفتها بقوة ووصلهم صوت الباب تحت.
ندى : هاذي ماهي صاحية.
أم احمد : الله يهديك يا أم ندى ساكتة ولا كنها بنتك.
أم ندى : بنتي غلطت ومن حق أبوها يعاقبها خليها عشان تعرف المره الثانية مين نوراها.
جود : بس ماكان مستبعد انه يذبحها أنا خفت عليها. كان لازم ياخالة تدخلين على الاقل تهدين أبوي عشان ما يسوي شيء فيها وهو معصب يندم عليه بعدين حتى اخواني كلهم معصبين عليها و احمد الهادي بعد منقهر.
أم ندى : اولا هي اللي جنت على نفسها باهمالها صح بنتي واخاف عليها بس ما يرضيني تطنش كل اللي وراها وتسكت وكان الموضوع شيء عادي لو خطفها وسوا فيها شيء ويش بنسوي حزتها .. وبعدين أنا ماخذه على نفسي عهد مشكلة بين وعد وابوها ما اتدخل فيها هو عصبي وحاد وهي ماخذة طبعة تدخلي ما راح يجيب نتيجة هو بنته يتفاهمون.
نهى : اوووف ريقي نشف لما قالي اجلسي بغيت اطق صكتني أم الركب.
دانه : ليش يبيك.؟
نهى : بيشوف إن كنت ادري عنه من قبل شكله حتى سها بتأكل جزء من كيكة الهوشة.
أم ندى : وسها ويش دخلها.
ميار : تدري عنه وما تكلمت أكيد هذا هو السبب.
أم ندى : الحمد لله والشكر ويش هالعقول اللي عندهم ما يعرفن عواقب عمايلهن.
نهى : أبوي موووولللللعععع واخواني كلهم حتى هي وخالد تهاوشوا قدام أبوي.
ندى : فيها شدة تهاوش مع احد فيهم بعد عملتها.
نهى : ما تعرفين اختك إذا ما ردت على كل كلمة تنقال فيها ما ترتاح.
أم احمد : والله ما كانت كذا ويش اللي قلبها كذا كانت تسمع كلام ابيها و اميتها صح انها احيان تزعل بس تاخذ يومين وترضى ولا كنه شيء صار بس من تخرجت انقلبت.
دانه : الفراغ يا يمه يخليها تقعد على الحبة الفراغ يذبح.
أم احمد : الله يهديه أبو سعود لو مخليها تكمل دراستها ما كان هذا حالها.
جود : على أساس أبوي بيوافق تكمل دراستها برا هو ما راح يرضى إلا هنا.
ندى : ويش هالجو الكئيب طرى علي ايام الطب واللي سوته.
ميار : أنا تعبت اليوم بروح انام.. نهى امي تحت.
نهى : ايه ما طلعت تحاول تهدي أبوي واخواني خايفة لا يذبحون وعد يعني تحاول تمتص غضبهم شوي.
ميار : اهم شيء ينتبهون إن اللي قدامهم امي مو احد ثاني لا يحطون حرتهم فيها.
نهى : لا تخافين عليها خالتي يتهديهم كلهم.
أم سعود جلست معهم : الله يصلحهم معصبين ما ينقدر عليهم.
ميار : اهم شيء ما عصبوا عليك.
أم سعود : وليش يعصبون علي. اهم شيء ما يسون للبنية شيء يندمون عليه.
أم ندى : أم سعود لا تدخلين بين وعد وابوها والله غير تتعبين ولا راح تستفيدين شيء هي غلطت وخليها تحمل نتيجة غلطها.
أم سعود : يا أم ندى البنت مظلومة ما تعرف هاللي يلاحقها وهم معصبين ما راح يحسون باللي يسونه والله اني اخاف يضربونها و يسببون لها شيء ويتندمون عليها بعدين.
أم احمد : الله يستر.
أم سعود : سعود ما ينطاق ولا ينتحاكى طالع على ابوه لا عصب. احرقوا اعصابهم واعصابنا.
ندى : خالة لا توقفين مع وعد وتخلينها تحس انها ماهي غلطانة.
أم سعود : ادري انها غلطانة بس يتفاهمون معها بالهدوء مو كذا والمشكلة انهم ناوين على سها هالحين.
سعود : سهــــا ..
أم سعود اعترضت طريقة : وين رايح.؟
سعود : أبوي يبي سها.
أم سعود : يا امي هذا بدل ما تهدي أبوك تعاونة على خواتك الضعيفات.
سعود : خواتي ضعيفات هذلي يقومن دولة ولا يقعدنها ... سهــــا.
فتحت الباب : خير.
سعود : انزلي كلمي أبوي.
سها : بس أنا مالي دخل.
سعود : هالكلام قوليه لأبوي لا تقولينه لي.
سها : ماما.
أم ندى : ما راح اتدخل بالموضوع لا من قريب ولا من بعيد دامه مع ابوكن.
سها : بس أنا ما سويت شيء.
أم ندى : ليش تقولين لي انزلي وشوفي أبوك ويش يبي.
سها : يارب اني اودعتك روحي.
ونزلت. ونزل وراها سعود.
أم سعود : يا عوينتي خايفة والله إن قاموا عليها ما يخلونها.
ندى : خالة انتِ ليش حارقة عمرك.؟
أم سعود : ماني مرتاحة بلحقها لا يذبحونها. ونزلت.
ميار : بلحق امي لا يسون فيها شيء.
أبو سعود بصراخ : يعني تدرين.؟
سها : والله قلت لها تعلمك بس هي خافت.
أبو سعود : خافت مني وما خافت على نفسها وسمعتها منه.
سها : أنا مالي ذنب بابا والله كلمتها بس هي ما طاعتني.
أبو سعود : ويوم هي ما طاعتك ليش ما قلتي لي ليش ما قلتي لامك او أي احد من اخوانك.
سها : الموضوع ما يخصني عشان اقوله.
أبو سعود : والله ما يخصك سمعة اختك بتقتصر عليها هي بس إن صار لها شيء ماهو كلنا بنتدمر ويلحقنا الحكي.
سها : اقصد ماهو أنا اللي يلاحقني عشان اتكلم و وعد ما كانت تبي تقولكم تدري ما راح تصدقونها.
أبو سعود : عذر اقبح من ذنب. مسكها من عضدها وشدها له : فيه شيء ثاني ما ادري عنه يا سها.
سها ترجف عنده من الخوف ودموعها ملت عيونها : شيء زي ايش.؟
أبو سعود : أي شيء يا سها أي شيء سوتنه من وراي والا مخبياتة عني.؟
سها هزت راسها بلا..
أبو سعود : وعد تكلمت مع الزفت ويش قالت له.؟
سها : متى.؟
أبو سعود : فيها متى بعد يوم ترد عليه بالجوال.
سها : ما ردت غير مره عليه وهددته انها تعلمكم بس.
أبو سعود : وهو ويش يقولها.؟
سها بلعت ريقها ودموعها انزلت على خدها : انه يحبها ويبيها.
سعود : كفووو كفووو هذا اللي كان ناقصنا.
خالد : وان شاء الله هو من وين يعرفها عشان يحبها.؟
سها : ما ادري والله ما ادري.
أم سعود : تكفى يا أبو سعود اتركها سها مالها دخل.
أبو سعود نفض يده من سها : لا ما لها دخل بسم الله عليها ما اخطت تشوف أختها تخطي وتوقف معاها.
أم سعود : خايفة عليها يا أبو سعود لا تلومها.
أبو سعود : لو هي تحبها صدق وخايفة عليها كان جات وعلمتني ماهو خلتها تطلع كل يوم من البيت و هذا يمشي وراها لو خافت عليها ما كان خبت علينا عشان نحميها.
سها : بس هي حلفتني ما اقول لاحد.
أبو سعود : حتى لو حلفتك لما تدرين إنه يتخبى عنا ماهو في مصلحتها تجين تقولين لي.
سها : بس والله تزعل.
أبو سعود : بالطقاق اهون زعلها والا تروح فيها.
سكتت ما تدري ويش ترد.
أبو سعود : قسما بايات الله يا سها واللي رفع سبع و بسط سبع لو ادري انكن مخبيات عني شيء بعد كذا ما تلومن إلا انفسكن.
: ..................
أبو سعود بصراخ : فاهمة والا افهمك بطريقتي.
سها : فاهمة.
أبو سعود : والحين انقلعي لغرفتك.
طلعت جري لغرفتها قبل لا يجيها كفين من أبوها اللي عيونه حمراء من كثر العصبية وعروقة كلها تنبض ومستغربة اصلا إن بس هذا اللي سواه هواش توقعت يمسكهن ويدبغهن لين يطلع كل حرته فيهن.
سعود يناظر ميار اللي واقفة على الدرج : وانتِ خير ويش عندك.؟
ميار ناظرتة باستغراب : جاية احمي امي اخاف تسون فيها شيء من وراء عصبيتكم.
سعود : نععععم.
ميار : والله من يشوف وجيهكم يخاف أنا مستغربةمن نفسي اصلا شلون واقفة للحين وما طلعت فوق.
مشعل : طيب اطلعي قبل لا يحوشك طشار.
ميار : عساكم ناوين تحطون حرتكم فيني.؟
أبو سعود يردد مع الأذان : بــــس ما ابي اسمع صوت احد ... الله اكبر الله اكبر.
وسكت الكل احتراما للاذان و الترديد وراء المؤذن.
..
..

لا اله إلا الله سبحانك اني كنت من الظالمين.

لا احلل نقل الرواية دون ذكر اسمي.

ضحكة قهر