[دلوعه وااايد]

,,,,,,,,,,,,,,,,,,,,,,,,,,,,,,,,,,,,,,,,,,,,,,,
الساعه 4 العصر

مسكت ميعاد جوالها وكتبت لديمه

ميعاد: ديوم

ديمه: هلا

ميعاد: اسمعي بدق عليك,,عندك احد؟

ديمه: ايه ماما وريما

ميعاد: طيب قومي لغرفتك

ديمه: اوكي

وقفت ديمه: يلا انا ابي اروح اخذ شور

ام ثامر: اشربي قهوتك وبعدين روحي

ديمه: لاخلاص يمه مابي قهوه

( طلعت ديمه لغرفتها ودقت عليها ميعاد)

ديمه: اهلين ,, وش فيه ميمو عسى خير ؟!!

ميعاد: ههههههههه وش فيك خفتي,,مافي الا كل خير

ديمه: اشوا

ميعاد: اسمعي ديوم بقولك شئ وهالموضوع بينا لاتخبرين احد

ديمه: اوكي

ميعاد: اخوي عزوز يبي يرتبط فيك,, بس يقول بالاول نتكلم

بالواتس عشان نعرف بعض اكثر,,واذا فيه توافق يتقدم رسمي

ديمه: ههههههههه والله احسك تستهبلين

ميعاد: والله العظيم مااستهبل ههههههه هاه وش قلتي؟ اعطيه رقمك

ديمه: اممممم طيب بس حدددي منحرجه

ميعاد: لاتحرجين ولا شئ ,,عادي سوالف بس

ديمه: الله يقطع ابليسك احس اني توهقت ههههههه

ميعاد: هههههههههه

،،،،،،،،،،،،،،،،،،،،،،،،، ،،،،،،،

في بيت جوج

جالسه جوج تتفرج عالتي في مع محمد

محمد: اقول جوجتي

جوج: هلا قلبي

محمد: وش رايك نطلع نتعشى في مطعم,,نغير جو

جوج: طيب حلو

محمد: لك اسبوع وانتي حايسه بالاتصالات والنت

جوج: ايوالله بجد يشغل البوتيك

محمد: يلا انا ابي اطلع مع طلال ,,وبعد المغرب امر عليك الاقيك

جاهزه

جوج: طيب ان شاء الله

,,,,,,,,,,,,,,,,,

( جوجو جالسه تتجهز اتصلت عليها ديمه)

جوج: هلا وغلا

ديمه: ياهلا فيك,, اسمعي

جوج: لبيه

ديمه: لقيت 3 بنات حابين يشتغلو بالبوتيك,,بعطيك ارقامهم وانتي

نسقي معهم

جوج: طيب زين,, خبريهم اني بكرا بكلمهم

ديمه بتعجب: وليه مو الحين؟

جوج: لا الحين جالسه اتجهز بنطلع نتعشى انا ومحمد برا

ديمه: بس لاتنسين بكرا الصباح دقي عليهم

جوج: طيب ,,ان شاء الله اول مااصحى اكلمهم

,,,,,,,,,,,,,,,,,,,,,

في بيت الخاله دلال

الخاله دلال تتفرج بالتي في وجمبها عبدالعزيز,,, عبدالعزيز جالس

يتفرج بمجله سيارات

عبدالعزيز: اقول يمه,,وش رايك بالسياره هذي؟ (ومد عليها المجله)

الخاله دلال: أي وحده البيضاء ولا الحمرا؟

عبدالعزيز: لا الحمراء

الخاله دلال: حلوه وغريبه,,,بس ليه؟

عبدالعزيز: ابي اغير سيارتي

الخاله دلال: مالك الا 3 شهور من يوم شريت سيارتك,,خل عنك

هالتبذير

عبدالعزيز: والله يايمه,, جايني هوس عالسيارات,,بس يلا اختاري

لي اللون

الخاله دلال: الحين كل ماجيت تشتري سياره ,,لازم اختار لك اللون!!!

عبدالعزيز: طبعاً يمه,,, انا اموت بذوقك

الخاله دلال: وانا ما امووت بالتبذير

عبدالعزيز: هههههههههه اقول يمه وينها ميعاد؟

الخاله دلال:والله مدري بس هالبنت طول الوقت بغرفتها

عبدالعزيز: يلا انا ابي اطلع لها

الخاله دلال: اشوفك مهتم بأختك هاليومين!!

تلخبط عبدالعزيز: ايه عشان ابيها تحمل لي برامج بجوالي

الخاله دلال: اهااااا

,,,,,,,,,,,,,,,,,,,,,,,,,,,

( في المطعم )

جوج: الله ,,,هالمطعم مرااا حلو وهادئ ورائق

محمد: ايه انا سألت اصحابي ومدحو لي هالمطعم

جوج: زين ,,والله طفشنا من المطاعم اللي دائم نروح لها

محمد: وش رح تسوين بحفلة الافتتاح لمحلك؟

جوج بحماس: عزمت كل صاحباتي ,,وطاقم العمل جايين ,,

بس باقي السكرتيره انسق معها وابيها تحضر,, وحجزت الحلا

وكلها كم يوم ويفتح البوتيك,,وسوينا اعلانات للي تبي تحضر

محمد وهو مبسوط: حلووو,, بالتوفيق ان شاء الله

جوج: ان شاء الله

محمد: شوفي ياجوج,,,,انا سعيت وتعتب وراء الترخيص

بس عشان اشوفك مبسوطه,,يسعدني انك بديتي بالمشروع ورح

يبدأ قريب,,,ويسعدني اكثر اني رح اوقف معك اذا صار صعوبات

في المستقبل وماقدرتي تتغلبين عليها,,بس فيه شئ مضيق خلقي

جوج بتعجب: وشهو؟؟

محمد: طول الوقت مشغوله عني ,,وطول الوقت مكالمات واتصالات

من اول ماتصحين الى ما تنامين !! طيب وانا ؟؟ مو مهتمه فيني خصصي لي وقت عالاقل

جوج بأحراج: ايوالله كلامك صح,, بس بجد مشروع البوتيك طلع

اصعب اكثر من ماتخيلته ,,بس اتحملني هاليومين وبعدين ابشر بعزك

محمد: انا ادري انه صعب,,وانه ياخذ اغلب الوقت,, بس اهتمي

شوي فيني

جوج بأبتسامه: اوكي,,من عيوني

,,,,,,,,,,,,,,,,,,,,,,

(جوج قفلت جوالاتها عشان مايزعجونها البنات اللي يستفسرون

عن موقع البوتيك ,,وعن يوم الافتتاح ,,,وتفرغت لمحمد لانها

كانت مهملته اولا بسبب اختبارات الجامعه وبعدها مشروعها

اللي خلاها طول الوقت مشغوله )

بعد ماتعشو طلعو من المطعم وراحو للبحر,,محمد وجوج واقفين

بالسياره عند البحر ويسمعون اغنية اليسا



جوايا ليك احساس بيكبر كل يوووم

العين تنام والقلب عمرو ماقالو نوم

من كثر شوقي ولهفتي شايل هموم

ارتحتلك احساس غريب بحسه لما ببصلك

وبحنلك لو حتى جمبي بحضن قلبي بحنلك

سلمتلك اغلى ماعندي حتى قلبي فتحتلك

عمري انا محتاجه منك كل نظره حنينه

روحي انا الثانيه في بعادك بكم مليون سنه

قلبي انا لما بتبعد عني بيبا مش هنا

,,,,,,,,,,,,,,,,,,,,,

جوج: الله هلاغنيه حلوه,,رغم انها قديمه

محمد: ايه ,,لها ذكريات هالاغنيه ,,يلا ننزل

جوج: يلا

جلسو محمد وجوج جلسه مطووووله عالبحر لان اثنينهم يعشقون

البحر,,واللي حلا الجلسه اكثر هو الجو ,,كان لطيف وهادئ

,,,,,,,,,,,,,,,,,,,,

في بيت الخاله دلال

فتحت ميعاد باب غرفتها: خير,,خير ليه جالس تدق الباب من

اول ازعجتني

عبدالعزيز: اقول لايكثر,, هاه كلمتي ديمه؟

ميعاد: كنت حاسه انك جاي عشانها ,,ايه كلمتها,, تعال ادخل

بعطيك رقمها

عبدالعزيز وهو مبتسم: بجد يعني وافقت؟

رفعت ميعاد حاجبها: وافقت عالفكره,, موعليك,,وبعدين لاتزعج

البنت سولف معها ساعه وحده بس باليوم

عبدالعزيز: هي قالت لك كذا؟؟

ميعاد: لاماقالت ,,بس حابه احط لكم قوانين

عبدالعزيز: ههههههههه وحسبالك هالقوانين بنمشي عليها

ميعاد: ههههههه خذ الرقم بس

,,,,,,,,,,,,,,,,,,,,,

اخذ الرقم عبدالعزيز وراح لغرفته

عبدالعزيز: مساء الخير

ديمه: هلا مساء النور

عبدالعزيز: انا عزوز

ديمه: ايه ادري,,اهلين

(بدأ عبدالعزيز يتعرف اكثر على ديمه من خلال سوالفهم اليوميه

كانت بينهم اهتمامات مشتركه,,يحب عبدالعزيز الشعر والخيل

والسفر والترفيه ,,ونفس الشئ ديمه)

,,,,,,,,,,,,,,,,,,,,,,,,,,,,,,,,,,,

بعد يومين ( حفلة الافتتاح )

صحت جوج من ساعه مبكره على شان حفلة افتتاح حلمها,,

راحت الصالون لتزيين الميك اب والشعر,,بعد ماخلصت من الصالون ,,راحت للبوتيك,, امتلا البوتيك بالبلونات ذات اللون

الموف والفضي مثل لون الديكورات,,

وضعت جوج في الاستقبال طاوله كبيره يملأها الحلا والقهوه

والمشروبات الاخرى بجانب بخور العود,,

حضرو الخياطات الفلبينيات بلبسهم الموحد اللي صممته جوج لهم

وحضرت موظفة الاستقبال (لما ),,وحضرو صديقات جوج,,

ومجموعه من الفتيات اللاتي وصلهن اعلان افتتاح البوتيك,,

كانت الحفله عباره عن تعارف وسوالف وضحك ,,

وفي نهاية الامر قامت جوج بالتعريف عن البوتيك وعن الازياء

التي ستصمم وعن نوعية الاقمشه وجودتها,,

سعدت جوج وهي تسمع عبارات المدح من الزبائن لاعجابهن

بموقع البوتيك وأناااااقته ,,,

امتلأ البوتيك ببوكيه الورد ,,الذي احضروه صديقات جوج,,

وانتهت الحفله الساعه 11 مساءً ,,خمس ساعات متواليه

لم يشعر بها احد ,, مرت كمرور الهواء ,,وبعد انصراف الحضور

لما: مدام جوج,,بسألك متى رح يبدأ الدوام

جوج: من بكرا ان شاء الله والساعه 4 العصر الحضور,,وبعدين

لاتقولين لي مدام مابينا رسميات (ابتسامه من جوج)

لما: ان شاء الله

جوج: دفتر التعليمات تلقينه على مكتبك,,اذا داومتي بكرا اقريه

وأي استفسار اتصلي علي

لما: اوكي

جوج: اذا سيارتك جات روحي

( طلعت جوج من البوتيك بعد ماراحو الحضور والموظفات ,,

كان محمد ينتظرها عند الباب) دخلت جوج السياره

جوج: مساء الخير

محمد: اهلين,,يامساء الحب

جوج: ابي اموووت من التعب

محمد: مالوومك من الساعه 8 الصبح وانتي تتجهزين

جوج: بس طلعت الحفله حلووه,, حضرو ناس كثير ,,عاد بكرا

اسولف لك بالتفصيل

محمد: هههههه اوكي استرخي لين نوصل للبيت

,,,,,,,,,,,,,,,,,,,,,

في بيت ام ثامر

ريما وديمه توهم راجعين بعد الحفله

ريما: تعرفت على وحده من الزبائن اسمها تغريد مره طيوبه

ديمه تناظر بجوالها: ايه كانو البنات بحماس

ريما: شفتي اللي لابسه كحلي؟

ديمه: شو فيها

ريما بصوت عالي: اقووول,,طالعي فيني لما اتكلم

ديمه: بسم الله,,وش فيك ؟ طيب انا معك

ريما: لا مو معاي لي نص ساعه اسولف وانتي عيونك بجوالك,,

وش سالفتك انتي هاليومين صايره انطوايئه

ديمه: هههههههه خفي علي ,,انا دائم على جوالي ,,

توك تنتبهين !!

ريما: والله مدري بس واضح ان عندك( ان) اختي وانا اعرفك

ديمه: لاحول ولاقوة الا بالله ,,اروح لغرفتي احسن

ريما: ايه ازين ,,مامنك فائده كأني اسولف مع نفسي

,,,,,,,,,,,,,,,,,,,,,

(ديمه صار وقتها كله مع عبدالعزيز,,انجذبو لبعض كثير)

عبدالعزيز: ديوم وين رحتي؟

ديمه: كنت اسولف مع ريما,,بس خلاص طلعت من غرفتها

عبدالعزيز:طيب اسمعي,,برسلك صورة السياره اللي ناوي اشتريها

ابيك تعطيني رايك

ديمه: اوكي

عبدالعزيز: السياره الحمراء اللي عاليسار

ديمه: الله نااايس,,احب السيارات السبورت

عبدالعزيز: تخيلي امي تهاوشني,,ماتبيني اغير سيارتي

ديمه: ههههههههه الله يهديها خالتي ,,دائما ناقده

,,,,,,,,,,,,,,,,,,,,,,,,,,,,,

بعد ثلاث ايام من حفلة الافتتاح

دخلت جوج ,,وقفت موظفة الاستقبال

لما: اهلين جوج,,نورتي المحل

جوج: هلا فيك,,النور نورك

لما: وش فيك ماجيتي الايام اللي راحت؟

جوج: ههههههه والله من بعد الحفله وانا تعباانه ومرهقه

لما: هههههه الله يعينك

جوج: هاه ,,كيف شغلك مبسوطه فيه؟

لما: الحمدلله الشغل مره مريح,,وكل يوم يجي زبائن

جوج: زين,,اجل بروح اسوي لي كابتشينو وبسوي لك معي

ونجلس نسولف

لما: اوكي

,,,,,,,,,,,,,,,,,,,,,,,,,,,,

جلست جوج بعد مااعطت الكوب للما

جوج: طيب يالمو ,,سولفي لي عنك

لما: ههههههه وش اقول

جوج: تكلمي عن حياتك

لما: اوكي,, انا عمري 26 اصغر وحده بالعائله ,,كلهم متزوجين

اللي اكبر مني بنتين وولد

جوج: طيب,,وكم لك متخرجه من الجامعه

لما: لي سنتين وطفشت من جلسة البيت,,وفرحت لما شفت هالاعلان في التويتر ,,وخصوصاً لانه بوتيك نسائئ ,,وعشان

كذا ماما وافقت

جوج: طيب حلو,, انا كثير مبسوطه لاني وظفت وحده متحمسه

لشغلها مثلك,,ومتفائله خير فيك ,,وان شاء الله بتصيرين مثل

اختي

لما: تسلمين,,الله يسعدك

جوج: كم وحده جات هاليومين

لما: كثير,,,بس اللي سجلت لهم فواتير 12 وحده

جوج: حلو بدايه جيده ,,يلا اخليك بروح اشوف الخياطات وش

سوو بشغلهم,,وانتي خليك عند التلفون للرد على الاتصالات

لما: اوكي

,,,,,,,,,,,,,,,,,,,,,,,,,,,,,,,,,,,,,,,,,,,,,,
ام ثامر تفتح الباب على ولدها ثامر
ام ثامر: ثامر قوم منبهك من اول يرن
ثامر وهو داخل بالنوم: طيب 5 دقائق بس واصحى
ام ثامر: وش فيك مو من عادتك تتأخر على دوامك ,,يلا قوم
صحى ثامر وهو طفشان: يمه,,سويلي فطور ابي اخذ شور وانزل
ام ثامر: طيب من عيوني
( ام ثامر جهزت فطور ولدها وحطته على الطاوله وجالسه تنتظره)
نزل ثامر وهو يكلم بجواله: طيب نص ساعه واوصل,, لا ان شاء الله ما اتأخر,,يلا مع السلامه ,,صباح الخير يمه
ام ثامر: ياهلا,, مابغيت تصحى
ثامر: افففف ولا ودي اصحى,,تعباااااان
ام ثامر: عسى ماشر يمه؟
ثامر وهو يشرب كوبه: والله يمه البارح كنت معزوم عند واحد
من اصحابي,,ومارجعت الا اذان الفجر,,ونمت بعد ماصليت والحين
الساعه 7 يعني كلها ثلاث ساعات ماتكفي !!
ام ثامر: الله يعينك ,,, اجل لاتروح لدوامك
ثامر: مقدر يمممه كل شئ على راسي ,, الله يسامح ابوي يسافر
شهر كامل والشغل يكثر علي
ام ثامر: وليه مايساعدونك محمد ونواف ؟
ثامر: محمد مشغول بحياته واموره ونواف تدرين مايحب الارتباطات
والاشياء الصعبه
ام ثامر: الله يعينك,,ويسهل امرك
ثامر: امين ,,يلا توصين على شئ
ام ثامر: طيب كمل فطورك
ثامر: لاخلاص,,الحمدلله
,,,,,,,,,,,,,,,,,,,,,,,,,,,
اتصلت ريما على جوج
جوج: هلا وغلا
ريما: كيفك جوجتي؟
جوج: الحمدلله بخير,,وشلونك انتي
ريما بتذمر: طفشاااااانه
جوج: هههههه وينها ديمه !
ريما: ديوم صار دمها ثقيل ,,طول الوقت ع جوالها
جوج:اجل تعالي عندي
ريما: طيب بقول لمامي واجي,,افطرتي ولاباقي؟
جوج: لاباقي
ريما: اجل ابي اجيب فطوري معي
جوج: اوكي,, انتظرك
,,,,,,,,,,,,,,,,,,,,,,,,,,
ديمه تتفرج على التي في ,,شافت ريما لابسه عبايتها وطالعه
ديمه: على وين؟؟!!
ريما: رايحه لجوج ,, بتروحين معي؟
ديمه: طبعاً بروح ,, وتوك تقولين لي !!
ريما: اقول لايكثررر,,البسي عبايتك ولاتتأخرين علي ,,انا
بالسياره
,,,,,,,,,,,,,,,,,,,,,
( في بيت جوج)

البنات يفطرون مع بعض
جوج: يابنات شفتو هالمسلسل؟ انا اتابعه
ريما: لا اول مره اشوفه شكله جديد
جوج: ايه جديد وحلو,,يجي الساعه9 الصباح كل يوم اتابعه هالوقت
اكون فاضيه
ديمه قفلت الجريده: وش رايكم يابنات بما انه ماسافرنا ولاشئ
نحجز شاليه
جوج: والله فكره حلوه,,ونجمع صديقاتنا
ريما: ايوالله ياليت ,اجل بقول لثامر يحجزلنا بنفس الشاليه
اللي حجزناه الصيفيه اللي راحت
(تحمسو البنات للفكره ,,وخبرو امهم عشان تقول لثامر)
,,,,,,,,,,,,,,,,,,,,,
في بيت ام ثامر,,الساعه 7 المساء
ثامر: طيب مو مشكله احجزلكم ,,بس لازم يكون معكم نواف
او محمد,,انا مااقدر اروح معكم,,وتدرين يايمه لازم احد ينتبه
للبنات
ام ثامر: البنات في الحفظ والصون,,انت ليه تخاف عليهم بزياده
ثامر:يمه انتي ماتعرفين الشباب وحركاتهم,,يقلون ادبهم اكثر
اذا كانو بمكان مثل هالشليهات لان ماعليهم رقابه
ام ثامر: والله اذا كانو الشباب قليلين ادب,,وش لنا دخل فيهم؟
يعني ماننبسط!!
ثامر: طيب كم يوم احجز؟
ام ثامر: احجزلنا اسبوعين,,لاني بعزم خواتي واخواني
ثامر: ان شاء الله
,,,,,,,,,,,,,,,,,,,,,,,,,,,,,,,,
بدأ الاستعداد للذهاب للشاليه,,البنات جهزو شنطهم وكلمو صاحباتهم
دخلت ام ثامر على بناتها
ام ثامر: مانمتو للحين؟ ترا من الصباح بنمشي للشاليه
ريما: ايه ندري,,بس جالسين نجهز الشنط خايفين ننسى شئ
بس بتأكد من كل اغراضي وانام
ام ثامر: كلمو جوج,,تجي هي ومحمد من بدري
ديمه: ايه قلنا لها
,,,,,,,,,,,,,,,,,,
(راحت ام ثامر للمطبخ عشان تشيك على اغراض الطبخ
اللي بتاخذها معها
ام ثامر: سوليتا جهزتي كل الاشياء اللي قلت لك عليها؟
سوليتا: ايوه مدام,,بس لازم شنطه ثانيه
ام ثامر: مو مشكله ,,خذي وحده من الشنط اللي بالمخزن
سوليتا: اوكي
ام ثامر: لاتنسين القهوه التركي والكابتشينو والنسكافه
سوليتا: كلها حطيتها في هذي الشنطه
,,,,,,,,,,,,,,,,,,,,,
جوج اتصلت على سكرتيرة البوتيك لما وخبرتها انها
ماتقدر تحضر لمدة اسبوعين
لما: ماتشيلين هم ياجوج ,,بكون منتبهه للمحل
جوج: الله يسلمك,,اذا احتجتي أي شئ اتصلي علي
لما: اوكي
جوج: ايه صح,,متى ماكنتي فاضيه تعالي عندنا,, رح
تبسطين معنا
لما: ان شاء الله رح اخبرك اذا بغيت اجي
جوج: اوكي,,منوره مقدما هههههه
لما: هههههه يسلمو
,,,,,,,,,,,,,,,,,,,,,,,,,,,

ام ثامر عزمت اختها دلال لتشاركهم في اول يوم لهم بالشاليه
دخلو البنات الشاليه وراحو لغرفهم عشان يرتبون الشنط,,
بينما ام ثامر توجهت للمطبخ لترتيب اغراض الطبخ,,
جاء مع البنات محمد ونواف ,,
البنات في الغرفه
جوج: شوفو يابنات جبت الدي جي,,ابي انزله تحت
ديمه: ايه ان شاء الله بنفلها الليله خالتي دلال جايه
............
بعد الترتيب نزلو البنات تحت بالصاله الكبيره فيها باب شفاف يخرجهم لبرا الشاليه وبجانبها
المطبخ التحضيري
ريما: ي الله ياماما ماخلصتي من الحوسه هذي !
ام ثامر: لاوالله باقي,, ماارتاح لما ارتب المطبخ
دخل محمد: يمه لاتطبخين ,,شوي بروح اجيب الغداء
ام ثامر: طيب يايمه
( فتحت ديمه التي في ورفعت في صوت الاغنيه الغربيه
وبدت ترقص بأستهبال)
جوج: ههههههه ديوم شكلك تحفه,,يبيلك تصوير فديو
ديمه: يلا تعالو نسسستهبل
ريما وجوج صارو يرقصون ويستهبلون على صوت
الميوزيق العآآآآلي ,,ام ثامر جالسه تطالع فيهم وتضحك
,,,,,,,,,,,,,,,,,,,,,,,,,,,,

محمد ونواف جالسين عند جلستهم المخصصه لهم امام
الشاليه,,جلسة الشباب عباره عن طاولات وكراسي يتوسطها
تي في كبير وامامهم البحر
نواف: الجو حلو,,اذا جونا الشباب بالليل نجلس هنا
محمد: ايه اكيد,, رح نتابع مباراة البرشا مع بعض
نواف: طيب اذا بغو البنات يطلعون كيف؟ واصحابنا موجودين
محمد: اليوم مارح يطلعون لان خالتي دلال بتجي,, وبعدين
فيه الباب الخلفي اذا بغو يطلعون
نواف: اوكي
,,,,,,,,,,,,,,,,,,,,,,,,,,,
من الساعه10 الى الساعه12 كانت تجهيزات للمكان داخل
الشاليه وخارجه,,وبعد الساعه 12 جاب محمد الغداء وتغدو
واخذو قيلوله,,استعداداً لسهره ممتعه
............

الساعه 6 المغرب( في بيت الخاله دلال)
دخلت ميعاد عند امها: يمه البس هذا الفستان ولا ذا؟
الخاله دلال: لاذا ولاذا اثنينهم قصيره مره
ميعاد: يوووه هذي اخر شئ شريتها
الخاله دلال: البسي أي شئ وخلاص,,اصلا محد رح يجيهم
اليوم بس حنا
ميعاد: اوكي
طلعت ميعاد لغرفتها عشان تتجهزاتصلت ريما عليها: هلا وغلا
ريما: وينكم تأخرتو؟
ميعاد: خلاص نجهز
ميعاد:يلا بسرعه تعالو,,ننتظركم
ميعاد: طيب,,طيب يلا مع السلامه
( لبست ميعاد عالسريع ونزلت لقيت امها تنتظر عبدالعزيز)
ميعاد بتعجب: وينه عزوز؟
الخاله دلال: والله مدري يقول ثواني وانزل وباقي مانزل
ميعاد: لزوم يتكشخ العريس
الخاله دلال: هااه وش قلتي؟
ميعاد: ولاشئ ,,يمه ترا ريما اتصلت تقول تاخرتو
نزل عبدالعزيز
الخاله دلال: بدرري
عبدالعزيز: والله غريبه جاهزين قبلي
الخاله دلال: انت اللي غريبه تتأخر
ميعاد: حرركات ,,ريحة العطر واصله للشارع,,امورك طيبه
ياعزوز
عبدالعزيز يغمز لميعاد: يلا نمشي,,تأخرنا
,,,,,,,,,,,,,,,,,,,,,
ديمه طلعت لاخوانها برا الشاليه: محمد اسمع
محمد التفت فيها: هلا
ديمه: خالتي دلال جات قريب,,روح جيبهم مو عارفين مكان
الشاليه
محمد: طيب
(ركب محمد سيارته وراح يجيب الخاله دلال)
...............
جهزت ام ثامر القهوه والشاي والحلا وحطتهم على الطاوله,,
بينما ريما وجوج جهزو الاغاني اللي يحبونها,,وديمه جالسه
تنتظرهم عند الباب
ام ثامر دخلت المطبخ: سوليتا شوفي الفحم جهز؟ ابي ابخر
سوليتا: خمس دقائق مدام
,,,,,,,,,,,,
ريما: انتي وش فيك واقفه هنا؟
ديمه: انتظر ميعاد تجي
( ابتسمت ديمه وهي تشوف سيارة عزوز جايه لجهة الشاليه)
نزل عبدالعزيز وامه وسلمو على محمد ونواف,, دخلت ميعاد
الشاليه: هااااااااي
ام ثامر: ياهلا,,هلا وغلا
سلمت ميعاد على خالتها والبنات
جوج: ميعاد وينها امك؟
ميعاد: شوفيها جالسه عند محمد ونواف
ديمه بصوت واطئ لميعاد: زين ان الباب شفاف نشوفهم
ومايشوفونا هههههه
ميعاد: ههههههههه
(دخلت الخاله دلال وسلمت على اختها وبناتها,,وصارو يتقهوون
ويسولفون)
,,,,,,,,,,,,,,,,,,,,,,
الساعه 8 مساءً (بدت مباراة البرشا)
حضر من اصحاب نواف3 ,,وطلال صاحب محمد,,وعبدالعزيز
جميعهم متعصبين للبرشا,, صوت صراخ الشباب وقت هجمات
فريقهم المفضل واصله لداخل الشاليه,,
ميعاد:ههههههههه شوفو اشكال الشباب يابنات تضحك,,
مدري وش يحببهم بالكوره,,استغفرالله
جوج: يوووه يابنات محمد طول الوقت عالمباريات ,,لدرجة
لي تي في وله تي في ثاني
الخاله دلال: اجل ماتجلسون مع بعض بسبة هالمباريات
البنات: ههههههههههه
ام ثامر: كل اولادي يحبون الكوره,,الا ثامر سبحان الله مايتابعها
ريما: ازين له,,مريح راسه
,,,,,,,,,,,
( مسكت ديمه جوالها وكتبت لعبدالعزيز: شوي ,,شوي هدو
الحماس اصواتكم واصله عندنا ههههه
عبدالعزيز: هههههه هذا الحكم رفع ضغطنا,,الله يعدي المباراه
على خير
ديمه: يلا ان شاء الله تفوزون
عبدالعزيز: ان شاء الله
ام ثامر: وش فيه عزوز ماجاء يسلم علي؟
ميعاد: كان يبي يجي ياخاله,,بس جو اصحاب نواف وجلس معهم
الخاله دلال: كيف محلك ياجوج؟
جوج: الحمدلله ماشي,,تمام
الخاله دلال: ميعاد انبسطت في الحفله
جوج بابتسامه: ايه الحمدلله كانت الحفله حلووه
,,,,,,,,,,,,,,,,,,,,,,,,
من الساعه 8 الى الساعه 11
سوالف وضحك واستهبال,,اما الاولاد فكان اغلب وقتهم عالمباراه
وبعد انتهاء المباراه الساعه 11 ونص ,,راحو اصحاب نواف
وبقي نواف وعبدالعزيز ومحمد,,
جاء محمد عند الشاليه: يمه
ام ثامر: هلا,,وش بغيت
محمد: نبي قهوه,,اللي عندنا خلصت
ام ثامر: سوليتا وش باقي عالقهوه ؟
سوليتا: 10 دقايق
ام ثامر: عشر دقائق وتكون عندكم
محمد: طيب انا ابي اروح واذا جهزت جيبوها
ديمه: يمه انا اوصلهم القهوه
ام ثامررفعت حاجبها: البسي شئ اذا طلعتي,,لاتروحين كذا
ديمه: من عيوني
(راحت ديمه عند المطبخ ومعها ميعاد)
ميعاد بتعجب: ديوم بجد انتي بتوصلين القهوه؟
ديمه: ايوه,,وش فيك
ميعاد: وكيف ومحمد ونواف موجودين؟
ديمه: عادي محمد ونواف فله,,مو معقدين مثل ثامر,,
الحمدلله انه ماجاء ههههههه
ميعاد: هههههههههههه
,,,,,,,,,,,,,,,,
كتبت ديمه لعبدالعزيز: انا ابي اجي بعد5 دقايق
عبدالعزيز: صادقه؟
ديمه: والله العظيم
عبدالعزيز: والله احسك تستهبلين
ديمه: هههههه نشوف
سوليتا: ديمه خلاص القهوه جاهزه
,,,,,,,,,,
اخذت ريما الشال وهي ترتجف ولفته على راسها وشالت القهوه
وطلعت,,كانت ميعاد واقفه عند الباب وتناظر بديمه,, محمد
ونواف كانو جالسين ومعطين ديمه ظهرهم ويتابعون التي في ,,
بينما عبدالعزيز جالس قدامهم ويناظر بديمه وهي تمشي ,,
وقفت ديمه بعد ماقربت من عندهم
ديمه: نواف
نواف التفت لورا وشاف ديمه وقام اخذ القهوه: ماشاء الله
طالعه كذا وينها عبايتك؟
ديمه: عبايتي فوق ومافيني اطلع اجيبها
نواف: زين مافي احد غريب,,يلا ادخلي
ديمه: ان شاء الله
,,,,,,,,,,,,,,,
رجعت ديمه وهي بتطير من الفرح ,,دخلت ديمه الشاليه
تضحك هي وميعاد,,
ام ثامر كانت نازله من الدرج ومعها الخاله دلال بعد مافرجتها
على باقي الشاليه
ام ثامر: ماشاء الله ,,طالعه كذا
ديمه: لايمه,,شوفيني لابسه هالشال
ام ثامر: ايه بس وجوده مثل عدمه,,زين ان ثامر موفيه
ولاكان قوم القيامه علينا
البنات: هههههههههه
,,,,,,,,,,,,,,,,,
ديمه اخذت جوالها لقيت عبدالعزيز كاتب لها: لبى هالزين
ديمه: هههههه,,هاه طلعت كذابه؟
عبدالعزيز: والله مو مصدق انك جيتي,,شكلي كل يوم انا عندكم
بالشاليه
ديمه: هههههههههه
,,,,,,,,,,,,,,,,,,,,,,,,,,,,,,,,,,,,,,,,,,,,,,,,