مناير من طرف خشمها:جايه شوي
الجازي دخلت المطبخ رمت الاواني بالمجلى من القهر:لا هاذي ماعاد تنطاق
اولها تقول انها سوت وفعلت وتطلع بالجماله قدامهم واللحين تكلمني من طرف خشمها
الافطس جعله الكسر
صالحه بنهر:فكينا من مشاكلتس
بدخولها وبطرف خشمها:ليه ماتسوون له انتم مو خواته بعدين انا عروس
يعني استحوا على وجيهكم شوي
سكتت صالحه اما هي وصل حدها منها شمرت يدها وبقهر
:نستحي على وجيهنا ها ايه هالقريه طريقها مازلفتوه بس انا
بزلفت وجهتس وبسوي فيه شوارع المملكه اللحين
"طمرت عليها وتشد شعرها ومناير تصيح صالحه تحاول تفصل بينهم
ماقدرت بدخول العنود اللي سكرت باب المطبخ لايسمعهم احد وفكتهم"
وشعر مناير بيد الجازي اللي تحاول تهجم عليها
العنود بنهر:اقطعوا واخسوا الناس برا
وانتم تتضاربون هنا تقولن وغدان
مناير ببكاء مفتعل:خالتي يرضيتس انهان وتمد يدها علي
العنود بقهر وعينها على الجازي:وانتي مابتفكينا من مشاكلتس؟
مناير:اهىى شوفي وجهي كيف مخشته
الجازي بقوة:وبفقعه لتس
صاحت العنود:بسس انتي غسلي وجهتس واقعدي شوي واطلعي لأهلتس
ولاتعلمينهم وانتي"توجه كلامها للجازي" حسابتس بعدين
:
:
بمكــان اخر وتحديدا بقصر الامير سعود
جالسه بمكتبه وتتكلم بخوف ويدها ترجف
وسعود ساكت ويسمع لها وكل كلمة يحسها مثل الجمره تغلي بداخله
بجناح ندى
لبست لها جلابيه بيت سماويه بتطريز خفيف على الاكمام اليوم كل عيال
سعود بحريمهم كلهم وعيالهم وعماته راح يجتمعون ويفطرون مع بعض
تمنت ان سلمان معها على الاقل يشجعها لكن خاب املها
سعود مو مستوعب اللي يسمعه حط يده على راسه
خديجه بدموع تتكلم رفع يده تسكت سكتت اشر لها تطلع وقفت
وانحنت وخرجت
لبست عبايتها وتغطت نزلت قبل الآذان بدقائق شافتهم مجتمعين
بالمجلس اللي كان جالسين على امتداده فيه وجيه اول مره تشوفها من
حريم عيال سعود وكانوا"الاميرات" اللي كانوا ساكنين بقصور ثانيه
اما زوجاتهم العاديات فكانوا يحشرونهم بعيالهم بهالقصر
هيا بأبتسامه:ياهلا بندى تعالي حبيبتي
وقفت وعينها عليهم اللي عيونهم عليها وبقرارة نفسها
"ماراح تكون مهمتي سهله 11 امير بحريمهم راح يوقفون بوجهي"
دخلت سلمت على هيا ومها لفت على الاميرات اللي اول مره تشوفهم
رافعين خشومهم وببالهم هي تروح وتسلم عليهم سحبت عليهم وجلست
مكان عادله جنب سعود الكل استغرب من حركتها بدخول عادله طالعتها بقهر
بتتكلم بدخول سعود وقفوا كلهم كان وجهه مخطوف ومبين عليه الضيق
راحوا جلسوا على الطاولة بتجلس عادله رفع صوته وبأمر:
عادله قومي من هالمكان ندى تعالي مكانها
طلعت عينهم من حركته وندى جمدت مكانها عينه على ندى وبأستفسار
:سمعتي كلامي والا ماسمعتيه؟
ندى هزت راسها وقفت وعادله راحت مكان ندى
بلعت ريقها ندى وجلست وتشوف نظرات الكل لها غبط على حسد على حب
اذن المغرب سموا بالله وافطروا وعادله عينها عليها
وندى ترجف بداخلها ماتمنت ان الامير سعود يسوي كذا تمنت يجي ه
الشيء
على دفعات بلعت ريقها شربت مويه كأس ورى كأس ورى كأس
هيا بأستغراب:بسم الله عليك عطشانه لهالدرجه
مها:مو زين لك ياندى بيردك عن الفطور
سعود عينه بندى اللي قلبها طاح ببطنها من نظراته لها شكت بنفسها
رفعت عينها وجات بعينه لمحت النار فيها تشجعت ومانزلتها
الكل مستغرب من الوضع ابتسم سعود ونزل راسه يعرف انه اربكها
بس اكتشف انها ماتستسلم بسهوله بعد صحن الشوربه من قدامه:الحمدلله
انا عندي لكم بعض القرارات وبما ان الكل مجتمع ماعدا سلمان واخوه الله
يحفظهم راح اقولها
محمد ولدك تدرسه برا ويكون اختصاصه سياسه
تكلم ولده:بس ياجدي انا ما ابغى الا
قاطعه:ولا كلمه هالعائلة السياسة تجري بدمهم ابوي كان بالسياسه وانا
بالسياسه وعمك بالسياسه ماتبغى تكون مثلنا
ابوه محمد تكلم بسرعه:لا يبه محشوم هو يحصله يصير مثلكم راح يدخل
قسم سياسه واقتصاد ولايهمك
جات عينه بهيا:وهيا زواجها بالعيد ومها الطلاق ممنوع
نزلوا راسهم قهر من قراره كمل:عادله القسم الغربي تفظينه كله وراح يصير
لسلمان وندى
رفعت راسها توسعت ابتسامتها حريم عياله سكتوا كمل:ندى ادري جات متأخره
اطلبي اللي تبغينه مني راح يجي حفيدي من سلمان اخيرا
ندى بلعانه:أي طلب؟
سعود اشر على عيونه كملت:تسلم عيونك ابيك تكون سالم وغانم لنا والله
يديمك فوق راسنا وطلبي ان الله رزقني ربي بولد ان يشيل اسمك وان تأذن بأذنه
ويكون مثلك حكيم وطيب وقلبه وسيع
سعود بداخله ماينكر انها ارضت غروره بكلامها ابتسم وكمل فطوره
هيا غاصتها العبره قامت بسرعه مها بتلحقها نهرها:اتركيها ماتعرف
مصلحتها
اما ندى فكرهت هالجمعه اللي كانت تلمح شرار الحقد والكره كلن شايل بقلبه
وافتقدت لمتها مع اهلها امها وخواتها السنة اللي راحت كانت البنت العادية
البسيطه اللي كان اكبر همها يومها بالمطبخ
اما اللحين صارت تشيل بداخلها روح من ضمن السلاله الملكيه
وزوجة وكل الحيات والثعابين محاصرتها ابتداءا من يمين الطاولة الى نهاية يسارها
وحتى ماتكون الحمل الضائع قررت هالمره تكسب زوجات عيال سعود
وحده ورى الثانيه حتى تحمي نفسها من كيدهم وغدرهم
وقفت :الحمدلله دائمه
مها:ما افطرتي
ندى بهمس:لا الحمدلله عن اذنكم
مشت وطلعت للحديقه متأكده ان هيا موجوده فيها شافتها من بعيد
قربت كانت جلسه بالارجوحه وعينها بالعشب
جلست جنبها وبعد سكوت طويل تكلمت:اللي قاعده تسوينه ماراح يغير شيء
هيا بأستخفاف:حتى الواحد يحزن على نفسه حرام !
ندى تجاهلت نبرتها كملت:لا بس انتي بهالطريقه قاعده تعذبين نفسك
يعني انتي مو عارفه يمكن هالشيء خيره لك
لفت هيا وبقوة:راح يجبرني اتزوج وتقولين خيره انا وعدت المرحوم
ما اتزوج بعده
ندى بهدوء:لو تبدلت الادوار وكنتي انتي مكان زوجك من غير شر
وطولة العمر يارب وهو كبر بالعمر تظنينه مايبغى عيال وماراح يتزوج
ويبقى على ذكراك لاطبعا
هيا بخنقه:بس انا ما ابغى اتزوج ولابعد ابعد من ديرتي واهلي
ندى بأبتسامه:فرصه نجي نزورك بدبي وترا الطيارات توصل البعيد
ثانيا يمكن خيره لك ماتعرفين انا اول ماقالت لي امي ان سلمان خطبني
كنت خائفه وشيء بداخلي يقول لي لاتاخذينه
هيا بهمس:لأنك كنتي تحبين؟
رفعت حاجب وحكته بيدها:تقريبا لكن صليت واستخرت أي وكنت
اشوف حلم من فترة طويلة ولما فسرته كان زوج منصبه رفيع وكلام
وطلع سلمان انا ما انكر اني حسيت بخوف اول ما اجتمعت معه بمكان واحد
وحكمت عليه انهم مثل غيره راح ياخذ اللي يبيه ويرميني لكن مع العشره
اكتشفت اني كنت غلطانه وان مو لازم يكون الحب فيه اذا كان فيه الاحترام والتقدير
بين الطرفين راح يجي بعده كل شيء ياما ناس حبوا واخذوا عن حب وفشلوا
والعكس صحيح بالمختصر انتي ماتقدرين تعترضين على قدرك ابدا
هيا بخنقه:بس انا دفنت قلبي مع حسين ياندى تعرفين وش دفنت
قلبي معه ما انسى مسكة يده لي بالحادث كان يتشهد قدام عيوني
شفته لما ودع وطاح راسه على صدري وماكنت اقدر احرك رجوله او يدي
قعدت 3 شهور مكذبتهم واقول مامات 3 شهور تخيلي
ندى حست بخنقه اعتصر قلبها حزن من كلامها شدت على يدها
:اذا كذا كوني واثقه ماراح نتركك انا وسلمان وماراح تاخذين
احد بعد حسين همم
هزت راسها ودموعها تنزل حضنتها ندى
^^^^^^
اليــوم الثاني من شهر رمضان
كانت ليلى بالمطبخ مع لميس يجهزون الفطور وريان بالصاله يلعب
دخلت امها شافته صدت وجهها عنه وتكلمه:من انت ولده ياولد
ليش ساكت بعدين وش هالشعر معك ليه ابوك مايحلق لك
ليلى كانت بتروح تتفقده سمعت كلام امها ابتسمت ورجعت للمطبخ
تطمنت وهو معها
حطت امها على قناة دينيه وتتابع البرنامج وريان يلعب بالمكعبات الصغيرة
شوي شافت الولد نزل وراح لها رفع راسه ووجهه كان مزرق
صاحت بخوف:وش فيك ياولد؟ "طالعت بالمكعبات طار عقلها تحسبه
بلعها"
صاحت :ياليلى ياليلى تعالي شوفي ولدك اختنق
لميش شهقت اما ليلى رمت اللي بيدها وجرت له مسكته وتشوف وجهه خلاص
مزرق كأن بيودع ماعرفت وش تسوي خانتها يدها وقفت بعيد متصنمه
امها بسرعه دخلت اصبعها بفمه وخرجت هالمره ماكانت مكعبات لا تمرة
غص فيها كح ريان بقوة مسحت على ظهره وشلته بحضنها
:لميس جيبي مويه بسرعه
فزت لميس وراحت جابت له مويه شربته وخذت شوي من الموية مسحت على
وجهه وسمت عليه "شافت ليلى متصنمه رحمتها"
امها بأعراض:لاتخافين مافيه الا العافيه شوفيه
ليلى رجولها ثقلت عليها حست الدنيا تدور فيها رجفت بقوة لاحظت لميس
اللي خافت عليها بس ليلى هالمره خافت خوف الام على ولدها
قربت منه وشلته بحضنها وتبوس فيه ودموعها تنزل بصمت
حضنتها بقوة وكأنها خايفه تخسره مره ثانيه
^^^^^^^
بالقرية..
الجازي ماسكه الجوال من جهه وتقلي من جهه
الجازي بضحكة:ههههههه قسم انتس تسذوبه اجل ما احد
يشتاق للزين"تقصد نفسها"
فاطمة بغرور:مالت بس من الزين يابابا انا لو اجي محلك اخذ الزين كله
الجازي انتهت من القلي وحطت السمبوسه بالحافظة قفلتها عشان ماتبرد
:ايووه وش علومتس يالخكريه؟
فاطمة بغضب مصطنع:اقول لاتناديني خكريه رجاءا الا جرح المشاعر
الجازي:هههههههههه وانتي تحسين يافطيم
بدخول متعب ومعه اكياس جايبها من البقاله شكله تغير ذبل
وطلع له عارض عشوائي وحالته حاله
لفت الجازي:دقيقه فطوم
ابتسمت له:يعطيك العافيه ماقصرت
متعب باله مو معها مع اللي ضحكتها طالعه من الجوال
وتقول:قولي قسم تعرفين الذوق انتي
الجازي:اقول فطيم طمي طمتس بحر
متعب نزل راسه وخرج
تنهدت الجازي:قسم انه يكسر خاطري من جهه ويرفع ضغطي من جهه
فاطمه بأستغراب:ليييش؟
الجازي بصوت واطي:اسكتي ساكته مو كان عندنا اول يوم فطور
فاطمة:أي
الجازي:ماتهنينا فيه هالفطور صار بين متعب ورجل صالحه مهاوشه
المجلس قام وقعد كسروا الفناجيل واصواتهم ملأت المجلس بغوا يتذابحون
لولا لطف ربي
فاطمة بأستغراب:غريبه ليش طيب؟
تنهدت الجازي:والله ما اعلم لكن اللي صار عقبها ان متعب حرم على صالحه
تعتب الباب مع رجلها وخيرها يابين اخوها يابين رجلها
فاطمة برفعة حاجب:ياسلام وهو وشدخله الحمدلله والشكر بينها وبين
زوجها مايتدخل اخوك مع احترامي لك عقله قفل
فاطمة بدفاع:حرام عليتس بلاتس ماتدرين وش اللي صاير اصلا بعد ماطلعوا
الرجال متعب مسك صالحه بالحوش وقام يتكلم معها وشد على يدها
ولما دخلت بكت عندنا وقالت ماعاد تبي ترجع لزوجها وان متعب سنايدها
ماهي بحاجته ومتعب تكفل بعيال صالحه اصلا هو اللي يوديهم ويمشيهم
ويجلسهم على حضنه وقت الفطور
سكت فاطمة وبداخلها "ربي خلق وفرق فيه بنات مايخافون من هالدنيا
لأن وراهم ظهر اخوان يكونون سند لهم وعزوه وقت الحاجه والضيق
وفيه اخوان يكسرون الظهر نصين ولاكأنهم من بطن واحد"
الجازي:الووو وين شردتي؟
فاطمة بهمس:معاك
الجازي:وازدتس من الشعر بيت ان رجل صالحه رمى عليها اليمين
وقال عنها كلام ماهوب زين بغى يذبحه متعب واخواني لولا ابوي
لحق عليهم ونهاهم وحلفهم بربي مايمسونه
فاطمة بحزن:ياحرام حليلها والله ماتستاهل
الجازي :أي والله "بدخول مناير متكشخه على اخر شيء"
الجازي بأستغراب:ماشاء الله وش عندتس ؟
مناير تعرف انها تكلم فاطمة رفعت صوتها تقهرها:بروح عند حبيبي
تعووبي اصلا الزين زين من يومه
الجازي فشلتها:انا اقول وش في الطحين الكويتي مخلص اثاريتس
خلصتيه بوجهتس "من كثر بودرة وجهها"
فقعت فاطمة ضحك:هههههههههههههههههههه
هههههههههههههههه آآه بطني يلعنتس
ابتسمت الجازي ولازالت تكلم مناير:خير وش عندتس جايه هنا ؟
مناير بكرهه:هه ماتضحكين اباخذ لتعوبي كاسة موية
الجازي بأستغراب:ماهوب صايم؟
مناير بدلع:لا حبيبي اليوم اغمى عليه وفطر
الجازي بخوف:بس توه جاء ومعه اغراض مافيه الا العافيه
مناير برفعة حاجب:والله كله منكم هلكتوا الرجال تراه مو مكلف فيكم
صبت كاسة مويه بتخرج رفعت صوتها عشان تسمعها فاطمة
:أي صحيح ترا حتى انا فاطره
الجازي بكره:وش اسوي لتس؟
مناير بمصاخه:لا احد يزعجنا اووكي "وخرجت"
فاطمة سمعت والا ماسمعت طرطعت وصلت معها ردت على
الجازي بنفخه:مكرونتي احترقت تبين شيء؟
الجازي بأستغراب:لاسلامتس
فاطمة بقهر:الله يسلمك اقول الجازي لاتزعجونهم طيب
باي ..وقفلت
الجازي رفعت كتفها:جاتني متعب الثاني مزاجيه الاخت
ماتدري ليش حست بقهر رفعت صوتها:وانا وش علي منهم
بحريقه اووف
^^^^^^^^
بجهه ثانيه..
جالسه تقلب التلفزيون طفشت مو مصدقه متى تروح عند اهلها
قربت الساعه 5 ونص العصر
قامت لبست لها بنطلون جلد اسود من لويس
وبلوزة رماديه عارية الاكمام ساده لبست سلسال طويل اسود
وساعة سوداء ..اكتفت بمسكره وقلوس بينك ..استشورت شعرها
رفعت غرتها ونفختها شيء بسيط بالبنس وتركت باقي شعرها سايح
لبست صندل رمادي ربط واطي
اخذت عطرها المفضل بربري بخت شوي اخذت عبايتها ولبست
ونزلت
كان بالصاله حريم اخوان سلمان مجتمعين
نزلت وبأبتسامة:السلام عليكم
الكل:وعليكم السلام
ندى بأبتسامة:بما انكم مجتمعين عازمتكم اليوم على السمره والسحور عندنا
تكلمت فوزية مرت محمد :حبيبتي ماله داعي هالكلافه
ندى بسرعه:اعوذ بالله وش كلافته اصلا الوالدة بلغتني اكلمكم وحده وحده
وتبغى تتعرف عليكم من كثر ما اسولف عن طيبتكم عندها
"خلونا نتعرف على اربع من حريم عيال سعود هم تقريبا الاغلبيه
بيكونون معنا "
فوزية:زوجة محمد من طبقة العاديه مثل ندى اكبر وحده بينهم
عمرها 38 ماشاء الله عليها اكييله ووزنها مره مرتفع احب شيء عندها الكنافه
سحر:اخت فوزية اكبر همها السوق
منال:من الطبقة العاديه كلها هاجسها المجوهرات
منى:نفس الطريقة من الطبقه العاديه واكبر همها انها تخلف
امراء
بهذاك اليوم كنت اغبط ندى كثير تدرون ليش لأن كل شيء كانت تسويه
كانت تفكر فيه وعلى قولة المثل الذيب مايهرول عبث خلونا نرجع
شوي قبل مالبست ندى ونزلت لهم..
ندى بأستغراب:فيه شيء قاعد يصير بالقصر الامير سعود
ماصار يضيق عادله اللي ماعاد خرجت من غرفتها
سعاد :ممكن اقولك شيء؟
ندى:قبل ماتقولين ممكن لو سمحتي تجلسين لأنك حسستيني
اني من هالعائلة ترا انا مجرد زوجة ولد ولا احب هالمعامله الرسميه
ابتسمت سعاد وجلست جنبها:ليشم اتستغلين الوضع لصالحك؟
ندى بأستغراب:مافهمت شلون؟
سعاد:انا اقولك زوجات عيال الامير سعود الاميرات ماراح يتركونك
بحالك خصوصا بعد ماصرتي زوجة الابن المفضله بهالقصر وهم مع
الامير عادله ليش ماتكسبين الزوجات العاديات اللي من هالقصر
مثلا فوزية تقديرت تكسبينها بعشى مرتب
وسحر تقدرين تكسبينها بهدية معتبره..ومنال بمجوهرات
اما منى فهي مسكينه الكلمه الطيبه تمشي معها
ندى ابتسمت:والله مانتي هينه بس لحظه ليش قلتي اسمائهم حاف
والاحظ ماينادونهم هنا اميرات رغم انهم جابوا جيش ماشاء الله
سعاد تنهدت:الاميره عادله هي اللي مخليتهم ولاشيء بهالقصر حالهم
حال الوصيفات لأن ازواجهم مهتمين بس بالاميرات وهم يجونهم حقين
فراش وبس
ندى بقهر:يلعن استغفر الله بفجر صيامي انا والله انا شفت هالاميرات
بس مايوصولن ربع جمالهم وتواضعهم امحق بس
نرجع للواقع..
ندى وعينها مركزه على منال اللي خجلت تكلمت:حلويتي منووله
منال وردت خدودها:صدق
هزت راسها ندى ..
فوزيه بهباله:اقول ندى الله الله بالحلا والكنافه
ندى اشرت على عيونها ..ابتسمت فوزية:فديت هالعيون انا
ندى بسرعه:باقي نص ساعه يادوب اقدر اوصل من الزحمه بنا
امانه عليكم تجون خلونا نغير جو من هالقصر"همست" ونفتك من عادله
البنات:هههههههههههه
اشرت لهم :يلا باي
البنات:الله معك
فوزيه بأرتياح:والله هالبنت تنحب
منال:أي والله الاميره هيا عرفت تختار هالمره
منى:صحيح ما احتكينا فيها كثير بس بنفس الوقت ماهي هينه ترا
سحر:عشانها كسبت قلب الامير سعود قبل الامير سلمان
انتوا تشوفون كيف يعاملها صحيح عمي طيب معنا بس مهتم فيها كثير
منى:رغم ان جمالها عادي جدا بس بردت خاطري بالمؤمياء"عادله"
فوزيه:بنات ليشم انكسبها بصفنا انتوا شفتوا كيف حقرت اميرات
ازواجنا
ضحكت سحر وتشوف كيف اختها تتكلم بقهر:ههههههه
جد والله عدتهم ولاكأنهم موجودين
بدخول عادله بنفخه:جالسين هنا وعيالكم برا تلوثوا بالطين
حريم فاسدات وضيعات اصلا حرام تكونون بهالقصر مكانكم شارع
وبس
سكتوا مو خوف منها من اللي راح يصير لهم اذا ردوا عليها
لفت وجهها وخرجت عادله:جيبوا فطوري فوق ما افطر مع هالاشكال
فوزية بقهر لفت عليهم:اسمعوا انتو اوياها هالبنت تنحب
غير كذا كاسره خشم عادله لازم نوقف معها
منى:وانا معك
منال:وانا بعد
سحر:وانا معكم
فوزية:هيين ياعادله يا احنا يا انتي
جزئية بسيطه لعيونكم..اذا تبوني انزل بارت عطوني خبر ووو فديتكمم
|