[لامارا]

البـــــــــــــــــــ (21) ـــــــــــــــــــــــار ت



ابقى بجواري ...

حلمي بان اصبح بين احضانك الدافئه
واغفو على نغمات صوتك الهامسه
دعك من تلك الكلمات الجارحه
ولاتفكر باحدٍ سواي
عند رحيلهم اصبحت وحيده لكن لم اشعر باليتم
وعند رحيلك انت غادرتني روحي لالتقي بهم

.. بحة الم تناديك يا امي ..





سحبت القلم من يد سهاد بهدوء رفعت عينها لابوها اللي ماسك الكتاب وينتظرها توقع
حست بألم وهي تشوف اسمه
.طلال علي السرحي..
مدت يدها ووقعت بارتجاف وهي متجاهله كل الم بقلبها
نزلت عيونها اللي تجمعت فيها الدموع وزغاريط سهاد ذكرتها بالماضي
غمضت عيونها من بوسة ابوها لها



اسف لحالها بس ماراح يلقى احد احسن منه لبنته
نظراتها الهاربه عن نظراته اكدت له مدى المها
تقدم منها وطبع قبلته على راسها هذي بكره واول فرحه له مستحيل يسوي لها شي الا انه واثق بانه يسعدها
همس لها: مبروك يابنتي الله يسعدك
قفل الكتاب ومشى طالع من الغرفه وفرحة بنته بالماضي كلها اختفت الان




اصتطدم بسطام اللي فتح عيونه على وسعها
رفع حاجبه دليل على الاستفهام من نظرات سطام له
سطام: وش جابك انت
عادل بضحكه: ومين حضرتك
سطام وكلام عمه يتردد باذنه: قلت وش جابك هنا
عادل باستغراب من حال سطام: جاي احضر ملكة اخوي ..مين انت .. تعرفني؟
سطام بعصبيه حاول يخفيها : ايه اعرفك مين اللي مايعرف عادل
عادل بضحكه: والله وطلعت مشهور المهم اللحين بادخل ممكن ولا لا
ابتعد سطام من الباب وهو يمد له يده بمسخره: تفضل
ناظر لسطام بطريقه استفزازيه واتجهت عينه على اخوه اللي جالس بجنب عمه يحيى

عادل: السلام عليكم
اللي بمجلس: وعليكم السلام
ناظر له طلال والماضي يرجع له



قبل سبع سنين يوم ملكته على هدى
قام من عند الشيخ وابتسامته مافارقته توجهه لابوه وعمه وحبهم على روسهم رد على المباركين بفرحه
مشى لاخر المجلس عند سعد وخالد وعمه ناصر اللي يسون له حركات بيديهم
ضحك بنفسه على حركاتهم: الله يخلف علي
لف براسه على اللي نادى باسمه
تراجع للخلف من الضربه اللي جاته
رفع كفه وهو يتلمس خده بالم قال باستنكار وعدم فهم: مـــحمد وش فيك
هجم عليه مره ثانيه وهو يغرقه بكل الشتايم
هرعوا المعازيم لجل يفكونهم من بعض
خالد: محمد وش فيه فهمنا
عدل ثوبه وهو يقول بغضب معميه:تفرح بنفسك وتهدم بنات الناس يالخسيس
وقف طلال اللي كان مرمي على الارض : وش تقول انت
ابو طلال: استهدى بالله وفهمنا وش مسويلك طلال
نفض محمد يد خالد اللي ماسكته وهو يتفل عند رجول طلال: ياخسارة المرجله فيك ولا انت اصلا مانت برجال
لكمه طلال بغضب : مارديت لك الضربه الا لاني رجال واذا جاي تشكك في رجولتي فتراك منت بقدي

: تخســــي وتهبي الرجوله ماهي بيمك ولا انت بصوبها
لف راسه على اللي دخل وسكت احتراما لكبره
دخل عادل ومعاه ابو محمد جارهم
تقدم ابو محمد من طلال وكل غضب الدنيا متجمع فيه مسك طلال من ثوبه : ياخسيس وش سويت لك انا لجل تسود وجهي
تطعني ياحثاله في بنتي
طلال وهو يحاول يهدي نفسه : اهدى ياعم وخلني افهم السالفه
ابو محمد: عمت عليك دنيتك
ابو طلال وهو يحاول يسحب ابو محمد من ولده: علامك ياسعيد فهمنى وش صار
فك طلال منه بقوه : افهمك بايش تبغى تسمع ان ولدك العاقل الدكتور يخوني في بنتي
العم يحيى: وش هالحكي
ابو محمد تهاوى على الكنبه بعد ماحس بدوخه
طلع الجوال من جيبه ويفتح على الرسايل
مد الجوال لابو طلال : شوف اقرا فعايل ولدك المؤدب
سحب الجوال منه وجلس يقرا ناظر لرقم وهو يدعي انه مو رقم ولده لكن خاب ظنه لما شاف رقم طلال اللي حافظه من قلب
رفع عينه لطلال بصدمه
طلال وهو يقرا ملامح ابوه : يبه ولي يطولي بعمرك فهمني وش السالفه
تقدم ابوه منه وعطاه كف : ياخسارة تربيتي فيك ياطلال
ناظر لابوه بصدمه :يبه
ابو طلال: انــــــــــطم ولا كلمه
جلس بجنب ابو محمد اللي ماسك على راسه : لايضيق لك خاطر ولاتزعل انا ماعرفت اربي وياسواد وجهي منك
الخسيس اللحين باملك له على بنتك
رفع ابو ومحمد راسه :شلون بتملك له وهو توه مالك
ابو طلال وهو يتماسك : الشرع محلل 4 يابو محمد
ابو محمد : وتهقى بيفلح بزواجه منها ولا بيعذبها
ابو طلال: ماعاش من يعذبها
ابو محمد: اجل يملك عليها اللحين ويقلعها لبيته لا ابي اشوفها ولا اشوفه
طلال بحال يرثى له: يبه والله مـا
قاطعه ابو طلال: سودت وجهي الله يسود وجهك تملك اللحين وغصبا عليك بعد
لف راسه لاخوه يحيى اللي غارق بهمه وتفكيره عند بنته: يابو رائد
رفع العم يحيى راسه بوهن:عطنا رايك
العم يحيى : الراي مهوب عندي
فهم ابو طلال عليه وسكت
قاموا للمأذون لجل يملك لهم تحت انظار المعازيم المفزوعه
طلب المأذون شهود
طلع عادل بطاقته وهو يقول بضحكه:انا بشهد لزواج اخوي
رفع طلال عينه له وعرف ان ورا السالفه ان
ناوله الشيخ الكتاب: وقع ياولدي
ناظر باسم العروس
تغريد..
يعني جد ذا مو حلم طيب وهدى
الشيخ: وقع ياطلال
ناظر لشيخ بمتاهه: يصير اطلق
سكوووووووون ملى المكان من سؤاله
الشيخ بتعقيده: ياولدي توك مملك وتبي تطلق
طلال بغصة: ماراح اوقع لهالزواج لين ما اطلق
العم يحيى بنبره مكسوره: بتكسر فرحة بنتي وتوها مابدت
حسبي الله ونعم الوكيل
الشيخ: ان ابغض الحلال عند الله هو الطلاق فكر بالامر هذا زواج ماهو بلعب
طلال: لجل انه زواج انا ابي اطلق
ابوه: طلال خل هالليله تعدي على خير
طلال وهو متفادي الكل وعينه على عادل اللي يبتسم له بسخريه: ياشيخ انا باطلق

عاد للحاضر اللي هو فيه تنسا الماضي ياطلال لجل تتم الليله على خير

وقف وهو يمد يده لاخوه ومتناسي كل شي صار بالماضي : الحمدلله على سلامتك
رفع عادل حاجبه وابتسامه خفيفه على شفاه:الله يسلمك .. ومبرووك ياعريس
طلال بهدوء: الله يبارك فيك عقابلك يارب
عادل بهمس مستفز: هي وحده اللي ابيها بس حسافه اخذتها مني
طلال وهو يبلع غضبه و عارف ان عادل عمره مافكر بهدى :الدنيا حظوظ وهي من حظي
عادل: ايه انت حظوظك في البنات واجد من وانت صغير
عقد طلال جبينه بعدم فهم لكنه سكت



لفت براسها على اللي نادت باسمها عقدت جبينها من هالبنت اللي ماتعرفها
شيماء : حــياة ياقلبي ..نطت تحضنها .. وربي فقدتك
فكتها وهي تشوف ملامح حياة البارده الخاليه من أي تعبير
: حياة ياقلبي ماعرفتيني انا شيماء
عقدت حياة جبينها: معليش اختي شكلك غلطانه
خف حماس شيماء وهي تبتعد عنها: انتي مو حياة كريم السرحي
حياة : ايه انا حياة كريم السرحي انتي مين
شيماء وهي تبتسم : افا لهالدرجه نسيتيني انا شيماء المروي ماذكرتيني جيرانكم القدامه كنا نلعب مع بعض
حياة وهي تحاول تتذكر شي بس ماقدرت قالت وهي تحس بصداع: اسفه ما اذكرك
نزلت الصحن من يدها وطلعت على طول لصاله
شيماء بتفكير: وش فيها
عذاري: تعرفينها
حركت شيماء راسها: ايه اعرفها ..ابتسمت.. كانت احب وحده لي بس من وقت ما نقلنا ماعاد تواصلنا ابد
عذاري : اهااا
راحت تلبي نداء سهاد لها تاركه شيماء اللي غارقه بافكارها في حياة





مشى للباب الخاجي للمطبخ وباله مع عادل: اخيرا طلعت وشفتك ياعادل
خل هالليله تعدي على خير ياسطام وبعدها راح تفضى له
فتح باب المطبخ ودنق يسحب ثلاجات القهوه اللي جهزتها له الخدامه عند الباب
رفع عينه على الشخص اللي واقف وعاطي الباب ظهره جذبه شعرها البني المنسدل بحريه على ظهرها وفستانها العودي اللي مبين تفاصيل جسمها


نفثت بتعب من التفكير : غريب امرها هالحياة كيف ماعرفتني
لفت على الطاوله وهي تسحب صحون المعجنات وتطلع من المطبخ بهدوء من غير ماتحس بوجود اللي رسمها رسم


اخذ القهوه وطلع بسرعه من المطبخ وهو ينعل شيطانه : اعوذ بالله منك يا بليس اللهم لا تواخذني بما نظرت له عيني
لف على نور السياره اللي دخلت لقسم الحريم وابتسم لما شاف نايف







: نعم ست سهاد
سهاد :نعم الله عليك ..ناولتها شريط.. شغليه
عذاري : جعلك للعافيه مناديتني ومتعبتني عشان اشغل الشريط وليه مانزلتي انتي يا ستي ولا فالحه بس تمشوريني
حطت الشريط بكف عذاري وهي تدفها لبرا الغرفه : يلا شغليه بلا كلام فاضي
وقفت عذاري بقهر وهي تتخصر : حمـــــــــــــــــــــــ ــــاره
فتحت سهاد عيونها على وسعها : انا حماره
ضحكت عذاري : ايه للاسف
دنقت بتخلع كعبها لكن مالحقت لان عذاري انحاشت منها




نزلت مسرعه من الدرج وهي تضحك على سهاد وتوعداتها اللي واصله لتحت اصدمت في شهد
شهد:علامك مطيوره كذا
عذاري بضحكه:ابد منحاشه من سهاد
طلت براسها من ورا شهد وكلام نايف يتردد ببالها:هلوووو
تجمدت ملامح عذاري للحظه لكن سرعان ما ابدلتها بابتسامه: هلا قلبي
تقدمت ندى وسلمت عليها: اخبارك
عذاري: نحمد الله انتي اخبارك
ندى: الحمدلله عال العال
عذاري : يدوم حالك
ندى : وياك غلاي
شهد: ذا شريط الزفه
عذاري : ايه بانزل اشغله لانهم بيزفون هدى
شهد: اوك عجلي
نزلت عذاري : ان شاء الله






تقهقه راكان من سوالف ناصر :والله انك نكته
ناصر بعد سكوت: ماشاء الله من متى ماخذين حنا على بعض
راكان: ياخي بيعها انت اللحين حسبت خالي
ناصر : كيف خالك فهمني يافهيم
راكان:مو اللحين خالي يحيى يصير اخو امي وانت اخو خالي يحيى يعني انت بحسبة خالي
ناصر باستهبال يجاري به راكان: يعني يصير اكشف على امك
راكان باستهبال: وانا ولد ولد عبدالعزيز كيف تكشف على امي تبي شايبنا يموت
ناصر : ههههههههههههههههههههههههه هههههههه
راكان : لا لا ياخوي انا من اللحين ما اعترف فيك ابد كله ولا شايبنا
الجد: راكــــــــــــــــــــــ ــــــــــــــان
انتفض من مكانه : اشهد ان لا اله الا الله ..ســـــــــــم يبه
الجد : تعال ابيك
قام من مكانه وهو يتشهد بداخله من نظرات جده



دخلت لصاله تدور ورا لمى لمحت بعيونها جدة ندى تبتسم لها
طلعت من الصاله وهي تحس بنفس الخوف اللي راودها منذ لحظات


طلعت جوالها وضغطت على رقمه جاها صوته المرحب على غير العاده
عذاري: الو
سطام وعينه على نايف اللي قدامه وتغير ملامحه بعد ماسمع صوت عذاري المسموع من الجوال: هلا بقلبــــــي
عذاري : هلا فيك وينك
سطام : قريب امري وش بغيتي
عذاري: مايامر عليك ظالم حبيبي
نزل نظراته لكف نايف اللي حمر من كثر مايضغط عليه
عذاري : بغيتك تساعدني في سماعات الاستريو ماهي راضيه تركب معي
سطام: اوك حبيبي شوي واجيك خليك عند المدخل
عذاري : اوك لاتبطي علي
سطام : يلا دقايق وجايك
قفل منها

رفع عينه لوجه نايف وشاف كومة غضب مرسوم فيه : تفضل يانسيب
نايف وهو يلا يتماسك : زاد فضلك بس والله مستعجل معاي شغل لين راسي
سطام : افا والله ماتروح لين ماتتعشى معنا
نايف وشوي وينفجر : تسلم بس والله مستعجل
سطام : انا حلفت وادري فيك منت برادني
نايف: مادريت اني غالي
سطام : غلاك من غلا الغوالي ولو
نايف : هي اللي كلمتك
ابتسم سطام لان السؤال اللي يبيه اخيرا طلع : خصوصياتي ما احب اكشفها للملا
نايف بغضب : بس هي زووجتي
سطام : بعيد تصير زوجتك
نايف وهو ينفث بغضب : طيب لو قلنا ان مالي مكانه عندكم ربي ماتخاف منه ولا كيف
سطام : وانت شايفني مسوي شي غلط
نايف باستهزاء : لا ابد كل اللي تسويه صــــــح
سطام بطريقه استفزازيه : الحمدلله .. يلا تفضل ابوي منتظرك
مشى نايف من غير مايعترض وهو وده يمشي معاه للمدخل مو لمجلس الرجاجيل





جلست مشاعل بجنب عبير اللي معصبه من صياح بنتها
مشاعل: وش فيها
عبير: ما ادري شكلها ممغوصه
مشاعل: عبير بأسألك تعرفين البنت اللي لابسه اصفر
عبير بتفكير : أي وحده فيهم
مشاعل بتحمس :اللي مسويه بف ولافه شعرها كله
عبير : اها ايه هذي بنت عمة هدى
مشاعل : ماشاء الله عليها تهبل بس طبعا مو مثلي
عبير من طرف عيونها : اخ على الغيره بس
مشاعل : هاهاها ومين قال اني اغار
عبير : ههههههه ابد ولا احد
مشاعل : ناظري امي كيف تناظر لها ياخوفي تخطبها لسعد
رفعت عبير عيونها لخالتها اللي مانزلت عيونها عن راعية الاصفر





هدى بربكه : ما ابي زفه مالها داعي انزل واجلس وانتهت السالفه
سهاد وهو متخصره : لا حبيبتي بتنزفين وغصبا عنك
عصبت هدى وسكتت وهي بداخلها توتر وخوووووووف جاهله سببه
ساره من عند الباب : هدى اجهزي دقايق وتنزلين
سهاد: طيب عذاري ليه تاخرت كذا
ساره: سماعات الاستريو خربت واللحين سطام يصلح فيها
شدت هدى على يديها ومغصها كل ماله يزيد ...يارب الطف بحالي...





وصل لين المدخل الريئسي وهو متقصد هالشي
لف براسه على نايف اللي مستغرب من وقوفه المفاجئ
سطام وهو يأشر على مجلس الرجاجيل : اسبقني لين ما اخلص شغلتي والحقك
ناظر نايف لثلاجات القهوه اللي بيد سطام : تبيني اخذها معي ولا لا
ابتسم سطام على تريقة نايف الواضحه : والله ودي اعطيك بس فشله لي انا
قاطعه راكان اللي ينادي عليه: سطــــــــــــــام
لف على راكان : هلا
تقدم راكان منهم وعينه على نايف
مد يده لنايف : السلام عليكم
ناظر نايف ليد راكان الممدوده له وبادله المصافحه:وعليكم السلام
سحب راكان يده وهو يوجه كلامه لسطام : ليه تاخرت بالقهوه
سطام يناوله ثلاجات القهوه : خذها معك لين ما اساعد عذوور واجيكم وخذ معك نايف
ناظر راكان لنايف اللي عينه على شي وراه ولاهو معاهم ابد
راكان : نـــــايف
نايف وهو مركز عينه على الشخص اللي ورا راكان وغضبه كل ماله يزيد : وش جاب عادل هنا
سطام :العريس اخوه
شاف عادل يقترب منهم لف على سطام وقال بسرعه : عذاري لاتطلع من هالجهه خذها لجهه الثانيه
سطام باستغراب : وليه
نايف بغضب : نفذ اللي قلته ومن غير ليه
سطام : هيييييييه وش مفكرني انت لايكون واحد من خدمك بس
راكان : كملو نقاشكم لين ما اوصل القهوه لجدي وراجع لكم


سحبتها مع الخدامه لين ماوصلتها عند المدخل الرئيسي فتحت الباب وهي تشوف سطام وراكان المغادر : سطاااااااامي
سكتت لما تبين ان معاهم شخص غريب واللي زاد خوفها شكل سطام الغاضب
سطام : اوامرك لا تملأها علي
نايف وعينه على عذاري اللي طلعت همس لسطام: عادل لايشوفها
سطام باستغراب من حاله ونبرة صوته لف لشي اللي يناظر له نايف وشاف عـــــذاري

عادل باستفزاز : هوهو نايـــــــــــــــــف هنا
ناظروا له سطام ونايف بصدمه وتفكيرهم في عذاري المتصنمه عند الباب ولاهي راضيه تتحرك
اشر نايف بعينه لسطام على عذاري قبل ما يقترب عادل اكثر ويشوفها
تحرك سطام بسرعه لعذاري ودفها لداخل البيت ونظراته على نايف اللي نفث براحه



ضربت خدها : حماره ليه مابعدت بسرعه وش بيقول عني سطام اللحين
لمى : ياهووووو علامك تسولفي مع نفسك
علمتها عذاري بسالفه كامله
لمى : ههههههههههه تستاهلين اهم شي الدفه اللي اخذتيها
عذاري : انقلعي
مشت من عندها وتفكيرها مشغول بنظرات الرجال الغريب






ارتاح بعد مادخلت عذاري مشى للمجلس متجاهل كلمات عادل المستفزه له
رفع كفه لقلبه اللي يدق بسرعه وابتسامه حلوه زينت شفاه من طيف عذاري اللي مر قدامه


سطام : وش جابك هنا
عادل باستغراب من تطنيش نايف له: ابي مدخل النساء
سطام بتعقيده: وش تبي فيه
عادل بابتسامه : ابي اغازل عندك مانع
سطام بغضب: والله الخسيس ماتجي منه الا الاعمال الخسيسه
عادل: احترم نفسك احسن لك
سطام: محترمين انفسنا لكن العيب في اللي مايعرف العيب ابد
عادل وهو منزعج من رنات جواله : مقبوله يا ..الا وش اسمك
سطام : اسمي ابراهيم
عادل وهو يرد على عبير : هلا .. ايه ايه .. بس وين مدخل الحريم .. اوك دقايق وانا عندك
رفع يده لسطام : سلام يا ابراهيم





ركضت هنادي لعذاري وهي تحط يدها على عيونها : مييييييين انا
عذاري بفرحه لانها ميزت الصوت : هنوووووده
ابعدت هنادي يديها : واه يابعد روحي فديت اللي ماتنسى صوتي
ضمتها عذاري بفرح وخذت علومها : متى جيتي
هنادي : قبل 20 دقيقه بالضبط
عذاري : هههه حياتي والله حياك ربي
هنادي : ربي يحيك حبيبتي
سحبتها هنادي لصاله اللي فيها المعازيم ووصلتها لعند امها
:يمه هذي عذاري صديقتي
عذاري بابتسامه حرجه: هلا خالتي شلونك
ام بدر : هلا حبيبتي الحمدلله انتي شلونك
عذاري : زينه الحمدلله
هنادي : وهذي سمر اختي
عذاري تمد يدها تصافحها : هلا سمر شلونك
سمر بنظرات اعجاب : الحمدلله
هنادي :شفتي اللي جالسه هناك
ناظرت عذاري للمكان اللي تاشر له هنادي : ايه اعرفها هذي ندى
هنادي : ايه صديقة شهد بنت خالك تصير بنت خالي
عذاري : ماشاء الله وانا اقول فيها شبه منك
هنادي :تعالي تعالي سلمي على جدتي
تقدمت مع هنادي للجده وهي تحس بربكه من نظراتها لها باست راسها باحترام :شخبارك ياجده
الجده هيا : الحمدلله انتي اخبارك
عذاري: الحمدلله بخير
هنادي بضحكه : يمه هذي عذاري اللي لقيتي لها معرس
ضربت ساق هنادي بالعصا من غير ماحد يحس
هنادي : ااااااي
الجده هيا : وجعتك ولاتبي ازود منها
هنادي: لا لا خلي عصاك لندى انا ما ابيها
عذاري : ههههههههههه
ناظرت لها الجده وابتسمت لضحكها






طفت اللمبات ومابقت الا اناره خفيفه توضح للمعازيم شكل العروس
نزلت هدى بربكه وخوف على انغام موسيقى هادية تتناغم مع هدوء خطواتها
بفستانها الهادئ


وطوق الورد المزين شعرها

ومكياجها البارز لملامحها الجميله


خطت خطواتها للمره الثانيه ولكن في كل خطوه خوف اعمق من الخوف الذي قبله
تلامس حذاؤها الارض مشت بثقه مخفيه كل خوف وتوتر اجتاحها
فرحة امها وابوها كافيه عن كل فرحه قد تناستها


تقربت ام طلال منها وهي تحضنها بعيون مدمعه
ابتعدت عنها : الف مبرووك حبيبتي
هدى : الله يبارك فيك خالتي
جلست في المكان المخصص لها بروح كيئبه غير الروح اللي كانت في الماضي





رن جوالها ابتعدت عن شهد المشغوله بترتيب العشا مع الخدم
ردت: نعم
نايف : كيف شفتي عذاري
ندى بابتسامه : تهبل
نايف بضحكه : اخلصي وقولي
ندى: مابينت شي انت متأكد انها سمعتنا
نايف بتنهيده : العلم عند الله
ندى : هونها وتهون ان شاء الله ماسمعت شي
نايف :ان شاء الله
ندى بتغير للموضوع: لابسه فستان اصفر قصير و
قاطعها نايف: شفتها
ندى بصراخ: ياحمار وين شفتها
نايف: جعل هالصوت بلي ماني قايل يلا انقلعي الرجال منتظرني
ندى : خخخخ اوك باي
قفلت منه ورجعت لشهد تساعدها





انتهـــــــــــــــــــــ ى.........