[شمالية الهوى]

~ آلَبِآرّتُ آلٌسَآبُعْ عُشَرْ ~



• جَفّ حُبْرَيُ وَ سِقّطً قَلِمَيُ



• وَآصِبَحُتَ بُيْنَ حُزْنِيَ وَ آِلًمِيُ





فهد بحنان بالغ : يعني اش تبيني اسوي ؟
غيداء وهي تبكي : ما ادري خليك كذا وبس .
فهد : لاااا الحياه هذي ماتنطاق ولا احد يعيشها .
غيداء : خلاص انت مو بتطلقني بعد كم شهر تحملني وبتحملك .
فهد : الله يصبرنا الى اليوم هذاك قولي امين .
غيداء بين شهقاتها : اشلون دخلت حياتي انت ؟
فهد يتعذب اذا شاف دموعها : خلاص ياغيداء اطوي صفحة الماضي خلاص .
غيداء : اشلون اطويها والماضي كله انت فهد انا شريفه افهم وربي مامسني مخلوق .
انفطر قلب فهد عليها وباس راسها : خلاص لاتبكين .



***


عبدالمحسن وهو يوقف : طمني عن بنتي يادكتور .
سمير: ماتخافيش يا باشا هي حالتها النفسيه مش كويسه وهتتحسن خلال 5 ايام ان شاء الله .
عبدالمحسن : طيب عندها كسور .
سمير: لا ربنا ستر عليها وماقهاش كسور رضوض وهتروح .
عبدالمحسن : يعطيك العافيه .
سمير: ربنا يسلمك .
ومشى سمير ودخلت نوره بغرفة بنتها وجلست ع السرير وسمعت انين بنتها : وريف يمه فيك شي ؟
وريف بتعب وصوت مبحوح : يمه ليش سويتو فيني كذا .
سالت دموع نوره : ماكنت ادري انهم سوو فيك كذا يوم دخلت وبدر يضربك .
وريف وهي تبكي : والله مو انا اللي اعطيت رقم غيداء للشباب اللي هم يقولون ولاء هي اللي راحت توزع الرقم .
نوره : حسبي الله على من كان السبب .
وريف بصوت مخنوق : فهد هو السبب باللي صار حسبي الله عليك اكرهك يافهد اكرهك .
نوره : بس انتي قلت له كلام ماينقال وهذي قلة حيا وياما نصحتك عن الشي هذا بس انتي عنيده .
وريف : يمه ابوي زعلان مني ؟
تنهدت نوره : ايه زعلان منك كثير حتى مادخل يتطمن عليك .. اللي سويتيه مو قليل .
وريف بين شهقاتها : والله ولاء اللي سوت كل هذا انا ما لي دخل .
نوره بعصبيه : بس مين اللي امر ولاء مين اللي اعطاها رقم غيداء والكلام اللي قلتيه لولد عمك ماراح ينسونه لاعمامك ولا ابوك .
وريف : يمه حبي لفهد هو اللي اعماني وخلاني اقول اللي قلته وانا الحين اكرهه خلاص .
نوره : ليش هو اللي يحب يكره ؟
بلعت وريف غصتها : عمر اللي حب ماكره .
نوره : يعني الى الحين تحبين فهد .
وريف : الى يومك وهو الوحيد اللي سكن قلبي ولا راح يطلع منه .
نوره : ومع كل اللي سواه تقولين كذا ؟
وريف : لأني احبه .. آآآه يمه جسمي يألمني احس نار شابه بصدري محد دافع عني .
نوره : يابعد عمري طهور ان شاء الله وهذي رضوض شوي وتخف ومع الكريمات والادويه راح تخف ان شاء الله .
وريف بألم : ظهري ويديني احس انهم مكسورات آآه ما اقدر اتحرك .
نوره : خلاص ياوريف لاتبكين جعلني ما ابكيك .
وريف : جعل يدينه للكسر .
نوره وهي تبكي : خلاص يكفي انا طردت بدر من البيت .
وريف : وياليت يطلع من حياتنا كلها اكرهه يايمه اكرهه .
نوره : هذا اخوك ياوريف .
وريف : والتراب .. عمر الاخو ماسوى كذا بأخته وسوا فيني كذا عشان فهد .
نوره : لا مو عشان فهد عشان الشباب اللي انتي تعرفين .. انت عارفه ان هذي فضيحه .
وريف : وربي انه مو انا اللي معطيتهم الرقم وانا ما اعرفهم .


***

ناصر بعصبيه : اشلون تسوي فيها كذا هذي اختك حرام تسوي فيها كذا .
بدر : والله من غيرتي عليها مديت يدي عليها انا ما ادري اشلون اعطتهم الرقم .
ناصر : وريف مستحيل تسوي كذا .
بدر : هههههههه خلاص هي سوت اللي سوته وانتهت السالفه .
ناصر : صدق انه مابقلوبكم رحمه هذي بنت ضعيفه ليش تضربها بالطريقه البشعه هذي .
بدر : ابي اربيها هي ماتربت زين .
ناصر بذهول : انت وش قاعد تقول .. اخـــتك هذي اختك .
بدر : عارف انها اختي وياليتها مو اختي .
ناصر : انت انهبلت مهما كانت غلطتها ماتسوي لها كذا .
بدر : نــــاصر انت ماعندك غيره على محارمك ولا اش سالفتك ؟
ناصر : الغيره غير والعنف غير .. وهذي فيها اجرام ويمكن لو تنقلونها للمستشفى يحكمون عليك بمحاولة القتل .
دخل فهد : سلام عليكم .
ناصر وبدر : عليكم السلام .
جلس فهد جنب بدر : بدر انا مالي وجه اقابلك بعد اللـ...
قاطعه بدر بابتسامه : ماصار الا الخير والحمدلله انك قلت لنا على حقيقة اختي قبل لايطيح الفاس بالراس .
فهد : انا اقصد اني مديت يدي عليها .
بدر : وريف تستاهل وحقها وماجاها .
ناصر : ترا والله مطولين السالفه خلاص .
فهد : خلاص انا انتهت السالفه من عندي .
بدر : وانا بعد تو انهيتها .
ناصر : اخيرآ .
رن جوال ناصر : هلا وريف .
وريف وهي تبكي : عمي تكفى ساعدني طلبتك .
ناصر : امريني .
وريف : تسلم ياعمي محد حاس فيني غيرك .. ابيك تقول لهم انه مو انا اللي نشرت رقم غيداء مع الشباب وربي ماكنت ادري .
ناصر : طيب مين اللي سوا كذا ؟
وريف بصوت مخنوق من البكاء : ما ادري مين حتى ولاء بنت خالتي تقول مو هي .
ناصر بشك : يعني من بيصير ؟ رقم غيداء يتغير مافيه مشكله .. بس المشكله فيك انتي .. انتي اشلون تعرفين الشباب هذولا تكلمي ياوريف .
وريف : ليش ما فيه احد يصدقني والله مو عارفه مين وع بالي بنت خالتي بس هي ما اعطت احد رقم غيداء .
ناصر : والله ما ادري اشلون اقنعهم بس الله يسلط على الظالم اظلم منه واللي ظلمك راح ينكشف .
وريف بين شهقاتها : غيداء هي اللي ظالمتني .
ناصر : عاشر مره اسم غيداء يتكرر قدامي كل هذا يدل على انه انتي اللي معطيه الشباب رقمها .
وريف : انا اكرهها صح بس ما اعطي احد رقمها .
ناصر : والله ما ادري وش اسوي لك ياوريف كل الابواب مقفله بوجهك ما احد راح يصدقك .
وريف : طيب ليش انا اللي صار معي كذا ؟ لييييش ؟
ناصر : مع السلامه .
وريف وهي تبكي : مع السلامه .
نزل ناصر جواله وطالع بدر : انا شفت اختك بعد ماجنيت عليها ؟
بدر : لا .. صحت ؟
ناصر : ايه .. وريف شكلها تعبانه صوتها مو عاجبني مره انا بروح اشوفها .
بدر : حالها ان شاء الله من كذا واردى .
ناصر بعصبيه : بدر وش هالكلام .
بدر : قاهرتني يا ناصر مدللينها ومدلعينها وعلى كيفها وهي الوحيده من بنات العايله اللي مخلينها تسافر بروحها وين ماتبي وتسوي فينا كذا ؟
ناصر : هي تستاهل القسوه بس مو كذااا هذا عنف اجرام مو معاقبه .. وطلع من عندهم ناصر .


***

خذت غيداء لها شور ولبست بنطلون تيفاني وبلوزه ابيض من ماركه فرساتشي وتعطرت من عطرها الور ولبست سلسالها الالماس هديتها من فهد
حطت روج وردي وحطت مسكره لونها اسود وجعدت شعرها ( بإختصار كانت ملكة جمال )
لبست كعب لونه ابيض ونزلت مع الدرج تمشي بمهل وطالعت بالجوهره ومدى واماني وابتسمت لاماني اللي تبتسم لها .
قالت وهي بطريقها بتجلس على الكنبه : سلام عليكم .
الكل : عليكم السلام .
الجوهره بابتسامه : هلا والله بالزين كله .
ابتسمت غيداء ,, واختفت ابتسامتها وهي تشوف فهد يدخل .
نزلت عيونها للارض تخاف تنزل دمعتها وهي بين اهله صعبه تخفي دموعها بعد اللي صار معاه البارح واللي زاد رجفتها ودقات قلبها يوم جلس فهد جنبها : مامي اكيد انتي اللي مسويه الفطور اليوم ؟
ابتسمت الجوهره : ايه انا مسويته لك .. هااا تفطر عندنا؟
فهد : ايه ان شاء الله افطر عندكم .
جات ساره تمشي وطالعت بغيداء : يمه الملائكه والشيطان ما يجتمعون بمكان واحد .. إذا هذي .. ( وتأشر على غيداء ) بتفطر هنا انا ابي فطوري بجناحي ما ابي اشوفها .
فهد : وش قصدك بالشياطين ؟
ساره وهي تتوجه لغيداء اللي تطالع : انتي يالحقيره يالواطيه جايه هنا بس عشان تفرقين بين عمامي ياحيــ...
قطع كلامها الكف اللي علم على خدها وألمها كثير .
وقف فهد من الصدمه : يمه ماله داعي تضربينها عشان كلامها هي جاهله .
صرخت ساره : انا مو جاااهله الجاهل انت اللي تتزوج بنت الشوارع .
الجوهره بعصبيه : خــلاص يا ساره انقلعي لغرفتك ولا عاد اشوفك .
ساره : يمه تمدين يدك على عشان هذي اللي ماتنسمى .. بس والله لأخليها تتطلق .
فهد بسخريه : لا يكون انا امشي على امرك وانا ما ادري ؟
ساره : لا بس تمشي على امر ابوي .
فهد : ابوي مازوجني غيداء وهو يبيني اطلقها .
وقفت غيداء : عن اذنكم .
مسك فهد يدها : خليك ياغيداء .. بزر نقدر نسكتها .
ساره : فهــد اش هالكلام ترخص فيني عشان الرخيصه هذي انا اختك .. اختك يافهد ولا هذي غريبه .
فهد : اختي على عيني وراسي .. بس حتى زوجتي انا مسؤول عنها وما اسمح لاي شخص يتكلم عليها كذا .
ساره : ههههههههههه وانت وش كنت تقول عنها يوم جبتها من الشارع .
فهد : يوم جبتها من الشارع ماكانت زوجتي .. يله يا ساره اقصري الشر واعتذري لغيداء .
ساره بغرور : انا ساره اليحيى اعتذر من احد .. هههههه من مين من غيداء .. والله نجوم السماء اقرب من اعتذاري .
اماني : والله عيب عليك يا ساره وش هالكلام .
ساره : عمري ما اعتذرت من احد .. تبوني اعتذر لغيداء ؟
اماني : الاعتذار شجاعه مو مثل ماتتصورين انه مذله .. وعمر الذليل ما اعتذر .
طالعت ساره بغيداء جالسه جنب فهد وتطقطق على جوالها ولا كأن الموضوع يعنيها ,, انقهرت ساره ومشت لغرفتها .
ونزلت غيداء جوالها ع الطاوله وطالعت بعمتها اللي تطالعها : انا اسفه ياعمتي .
الجوهره : ههههههه وش سويتي عشان تتأسفين .
غيداء : م..م مادري الموضوع كله يعنيني .
الجوهره : والله رفعتي راسي يازوجة ولدي فعلآ عقلك يوزن بلد ما شاء الله .. ما الوم اللي يحسدوني فيك .



***

جلس رويد جنب ابوه : يبه .
عبدالمجيد : هلا والله بولدي .. وش فيك ماتجلس مع الرجال اربعه وعشرين ساعه انت وجهاد عند الحريم ترا عيب كذا .
رويد : خلاص بجلس عند الرجال بس عمتي وسام تقول عيب يشوفوني الرجال بالبنطلون .
عبدالمجيد : لا عادي لو تطلع لهم ببنطلون بس كبار السن ما راح يتقبلون شكلك كذا لازم تحلق شعرك وتلبس ثوب وشماغ .
رويد : لا وع ما ابي .. يبه انا بقولك شي بس متردد .
عبدالمجيد : قول وش عندك ؟
رويد : انا تراجعت عن قراري ما ابي ارجع معاكم لألمانيا بعيش هنا طول حياتي .
عبدالمجيد : لا لا مو مصدق ان اللي يتكلم ولدي رويد .. سلامات وش صاير فيك ليش بتجلس هنا .
رويد : يبه احب الناس اللي هنا .. ناس بسيطين مره احب الحياه هذي .
عبدالمجيد : غريبه والله الى الحين وانا مصدوم منك ياولدي وش قاعد تقول انت ؟
رويد : عمتي وسام حببتني بالحياه هنا .. الله يايبه يامحلا قومة الصباح برمضان انا اول يوم اجربها .
عبدالمجيد : الله يثبتك بعقلك ياولدي ويصلح حالك .. والله ياليت تجلس هنا .
رويد : ان شاء الله بجلس هنا .
عبدالمجيد : خلاص ماعدت تخاف من الغنم والحشرات ؟
رويد : إلا اخاف اكيد وخوفي كل ماله يزيد بس راح اتعود .
عبدالمجيد : ههههههههه ان شاء الله بالاجازه الجايه ارجع والقاك راعي بر .
رويد : يعني كيف راعي بر ؟
عبدالمجيد : يعني تحب الكشتات وتنام بالبر وتقنص مع عمامك وعيالهم .
رويد : انا اقتل عصافير لا لا حرام .
عبدالمجيد : والله اشك انك خكري .. متى تعلم علوم المرجله وتصير رجال تهز المجلس .
رويد : قريب ان شاء الله الين اعرف شباب القريه كلهم انا ما اعرف الحين إلا عيال عمامي وليد و رائد وراشد.
عبدالمجيد : خلاص بتعرف الشباب كلهم ان شاء الله وتدرس هنا وتتعرف عليهم اكثر .
رويد : والجامعه لازم بالمانيا .
عبدالمجيد : بـــاقي سنه كامله وتدخل الجامعه وذاك الوقت لنا كلام ثاني .
رويد : ان شاء الله اقدر ادرس هنا .. اشلون الدراسه فيه عربي وانقليزي ؟
عبدالمجيد : هههههههه لا مافيه الا عربي .. فيه يمكن اربع حصص بالاسبوع انقليزي .
رويد : طيب اشلون بدرس هنا وانا ما اعرف اكتب عربي .
عبدالمجيد : والله هذي غلطتك ميرو خذت لها دوره ولحين تكتب عربي وانقليزي .
رويد : طيب سهل تعلم العربيه ولا صعب ؟
عبدالمجيد : لا ان شاء الله سهل خصوصا انك تتكلم عربي بطلاقه .


***

السـاعه 4 العصر كانت غيداء جالسه بالصاله وتتابع كليب عيون الشوق اللي يعرض على قناة SHABAB4 .
سمعت صوت الاغاني اللي اذاءها كثير طلعت من جناحها وصوت الموسيقى العالي طالع من غرفة ساره ترددت غيداء تروح لها ولا " لازم انصحها والله حرام اشوف منكر وما انهى عنه "
طقت غيداء الباب وجاها صوت ساره : ادخــل .
فتحت غيداء الباب : ساره .
ساره وهي تسكر الدي جي : نعم .
غيداء : حرام عليك ياساره تسمعين اغاني ترا اللي يسمع اغاني برمضان ماتقبل شهادته إذا مات.
ساره : ههههههههه اسمعو مين اللي تنصحني بنت الشوارع .
غيداء : انا مو بنت شوارع .. وجيت انصحك خايفه عليك من الهلاك .
ساره : خلاص نصحتيني وصلت النصيحه يله انقلعي .
غيداء : طيب قصري الاغاني والله اذيتيني .
ساره : اسم الله عليك بتقنعيني انك ملتزمه وماتسمعين اغاني وانتي لك سوابق واشياء انزه لساني عن ذكرها .
غيداء : لا حول ولا قوة الا بالله .
ومشت من عندها غيداء ودخلت بجناحها وطالعت بفهد اللي يقول : اش كنتي تبين من ساره ؟
غيداء وهي تجلس ع الكنبه اللي قدام فهد : كانت مشغله اغاني ورحت اقولها تسكرها لأنها ازعجتني .
فهد : اهاا .
غيداء : فهد انا اضايق ساره كثير دور لي حل ما ابي كل يوم يصير نفس اللي امس .
فهد : الحل انك تتجاهلينها ولا تردين عليها .
غيداء : هي مهما كان كلامها مايجرحني ولا يهمني بس انا ما ابيها تتكلم علي كذا .
فهد : طيب وين المشكله اذا كلامها مايهمك ؟
غيداء : خالتي ضربتها واكيد انها كرهتني كثير واكثر من قبل .
فهد : والله عدوانك كل مالهم يكثرون ما ادري ليش .
غيداء : والله من الحظ النحس اللي يلاحقني بكل مكان .
فهد بابتسامه : يعني حظك نحس ؟ وانتي متزوجه فهد اليحيى .
غيداء : ونعم بفهد اليحيى .. بس مثله مثل غيره .
فهد : اول مره اشوف ردك علي محترم .
غيداء : طول عمري محترمتك .
فهد : وش السبب لآحترامك لي ؟
ابتسمت غيداء : يمكن عشان انت اكبر مني بـ 6 سنوات .
فهد : ههههههههههه ليش لا .. غيداء ابيك تسوين لي فطور .
غيداء : حاضر بس اش تبي ؟
فهد : اهم شي سمبوسه وشوربه .
غيداء : بس لازم انزل للمطبخ الرئيسي .
فهد : روحي للمطبخ الرئيسي ترا سلطان رايح انتداب بالقصيم الى العيد الثاني ونايف مايدخل البيت ومافيه احد غريب .
غيداء : اوك بروح الحين بس بتصل على ميدو تساعدني .
فهد : لا مدى والله ماتعرف شي بالطبخ .
غيداء : عادي تتعلم .
خذت غيداء جوالها بلاك بيري z10 ونزلت تحت واتصلت على مدى : الوو .
مدى : اهلين .
غيداء : مساء الخير .
مدى : مساء النور .
غيداء : ميدو ياقلبي ابيك تجين معاي للمطبخ بسوي فطور لفهد .
مدى بابتسامه : اوك ثواني وانا عندك .
دخلت غيداء بالمطبخ وشافت الخدم يشتغلون وكأنهم خلية نحل .
دخلت مدى وبدأت هي وغيداء بالطبخ .


***

دخلت اماني ببيت عمتها وبجنبها بنتها ماريا جاء رويد : ياهلا وغلا تو مانورت الديره .
سلمت عليه اماني : ااه تو مارجعت لي روحي .
رويد : والله اشتقت لك يا مامي .
وسلم على ماريا وهي تطالعه بإستغراب : وش فيه شكلك كذا ليش لابس ثوب ؟
رويد : هذي عادات اهلي .
ماريا : اهاا .. وين عمتي الهنوف ؟
رويد : إياد .
جاهم إياد يركض وسلم على اماني وصافح ماريا .
جات الهنوف ووراها ملك : ياهلا والله حيالله من جانا .
اماني وهي تسلم على الهنوف : هلا بك اكثر .. والله مشتاقه لك مره .
الهنوف : والله جد انتي نصفي الثاني .
اماني : ههههه نصفك الثاني ؟ وين عمتي ووسام ؟
الهنوف : امي بغرفتها تصلي ووسام جالسه تجهز الحلا .
ملك بعد ماسلمت على ماريا : اووه ياعمتي متى تتغطى ماريا تراها كبرت وإياد مايصير يجلس عندها .
اماني بابتسامه : اذا تغطيتي عن رويد ساعتها ماريا تتغطى عن إياد .
ضحك جهاد : هههههههههه والله قويه ياعمتي اعطيتيها بنص الجبهه .
ملك بضحكه : اصلآ انا نسيت اني ما اتغطى عن رويد .. ميلكاااا .
جات الخدامه : خذي الشنط وحطيهم بجناح مدام اماني اوكي .
الخدامه : اوكي ليدي .
الهنوف : حياك الله تعالي للمجلس .
دخلت اماني ونزلت طرحتها : اوووه يالطريق من الرياض الى هنا طويل مـــره انكسر ظهري وانا بالسياره .
الهنوف : الله يعننا .. والله تعب .. شخبار امك واخوانك ؟
اماني : الحمدلله بخير .
دخلت وسام : سلام عليكم .
وقفت اماني وسلمت عليها : ياهلا وغلا حيالله من جانا .. من جد تو مانورت الديره .
اماني بابتسامه : منوره بوجودك ياقلبي .
وسام وهي تنزل صينية القهوه ع الطاوله : حياكم الله البيت بيتكم .
اماني : الله يبارك فيك .. وسام حبيبتي اذا خلصت عمتي من الصلاه قولي لي .
وسام : امي تقريبآ تخلص الساعه 10 يعني باقي نص ساعه .
اماني : الله يتقبل منا ومنها .
خذت الهنوف ترمس القهوه وصبت لاماني فنجال ومدته لها واخذته اماني : الله القهوه ريحتها تهبل تسلم يدين اللي مسويتها .
ابتسمت وسام : الله يسلمك .


***

خلصت غيداء من الطبخ الساعه 6 ونص ورتبت كل الاطباق بـ 4 صياني : شيلوهم ورتبوهم بصالة الطعام .
شالوهم الخدم مثل ما امرتهم وطلعت لجناحها وشافت فهد يقرأ جريده نزل الجريده : تعالي وين رايحه ؟
غيداء : بغير لبسي كله ريحة طبخ .
ودخلت غيداء بغرفتها وخذت لها شور ولبست جلابيه ناعمه لونها وردي ماسكه من صدرها والباقي كلوش وماسكه على معصمها خيوط لونها اسود جففت شعرها الناعم وخلته مسدول وابتسمت على شكلها من زواجها اول مره تلبس جلابيه .
تعطرت وحطت كريم على يدينها وطلعت لفهد اللي بالصاله .
وجلست جنبه : ترا كل السفره طبخي انا وميدو .
فهد وهو يتحاشى النظر لها ويطالع بالجريده اللي بيده : ماشاء الله وعرفت تطبخ اختي ؟
غيداء : هههههههه صارت تعرف تطبخ احسن مني ماشاء الله عليها .
وقف فهد وتنهد : انا بنزل تحت ابوي اكيد رجع من الشغل .. بقى عشر دقايق على الفطور لاتتأخرين .
غيداء : اوك .
طلع فهد وطالعت غيداء بجوال فهد منحوت عليه اسمه " اش قصته هذا لازم اسال ميدو "
نزلت غيداء تحت وشافت عمها جالس وسلمت على راسه وعلى راس الجوهره .
وجلست جنب مدى وبهمس : عندي سؤال مهم بالمره .
مدى بابتسامه : عن ايـــش ؟
غيداء : عن فهد .
مدى : يله اسألي .
غيداء : لا بعد الفطور بسألك مو الحين .
ومشو غيداء ومدى وراء فهد اللي قالهم يجون يفطرون دخلو بصالة الطعام وشافت غيداء ساره وحست انه بتصير مصيبه من نظرات ساره لها والنظرات هذي ماتبشر بخير .
جلسو وطالعت ساره بغيداء بحقد وكره : يمه مافيه فطور غير هذا ؟
الجوهره : لا والله حبيبتي مافيه روحي للطباخه وقولي لها تسوي لك اللي تبين .
ساره وهي توقف : اخاف بنت اللذين حاطه بالاكل سم .
ضحكت مدى : حاطه سم ؟ ليش اش السبب .
ساره : لأنها ماتزوجت فهد ومادخلت حياتنا إلا على طمع وبتاخذ فلوسنا .. بس اشكالها مايكفيهم إلا التراب .
دخل منصور وطلعت ساره بسرعه .
جلس منصور جنب زوجته : وش فيها هذي معصبه ؟
الجوهره : من اللي صار لوريف قبل امس وهي مو راضيه تكلمنا مثل الناس معصبه علينا كلنا .
منصور : الله يهديها .
بعد الفطور جلسو مدى وغيداء بالصاله
مدى : وش السؤال اللي بتسأليني عن فهد ؟
غيداء بابتسامه : انا استحيت اسأل فهد .. هو ليش كل شي يخصه منحوت عليه اسمه .
مدى : اي شي منحوت عليه اسم فهد شي يخصه واحتمال لو احد فكر ياخذ شي من اغراض فهد الخاصه ينقتل ولو مد يده عليه راح يبترها - وبمزح - وبعد مده يمكن ينحت على جبهتك فهد اليحيى .
غيداء : هههههههههههه لا عاد مو لهالدرجه .


***

فـــي يـوم العيد .

صحت غيداء الساعه 4 ونص وخذت لها شور بعد ماصلت الفجر ولبست فستان فخم حيل لونه سكري تحت الركبه وجاليه ذهبي ولبست كعب عالي لونه ذهبي وجات الكوفيرا الخاصه فيها وسوت لها مناكير ابيض وميك اب وشعرها سوته كيرلي وطلعت الكوفيرا وخذت غيداء سلسالها ولبسته ولبست ساعه لونها ذهبي واسوارات لونها ذهبي وتعطرت وطالعت بنفسها بالمرايه حلوه وبالمره وجمالها زايد عن اول جلست ع السرير : فـــهـــد .. فــهد .
صحى فهد وطالع غيداء وماقدر يشيل عيونه عنها وهي قامت وطلعت من الغرفه راح فهد واخذ له شور ولبس ثوب ابيض وشماغ وتعطر من عطره ريتشي ونادى غيداء ودخلت : هـلا.
فهد بابتسامه : كل عام وانتي بخير .
غيداء : وانت بخير .
فهد : وش هالزين ما شاء الله تو اعرف انك ملكة جمال العالم .
ضحكت غيداء : ملكة جمال العالم ؟
فهد : والله تستاهلين اللقب هذا .
لبس فهد ساعته الالماس وطالع بغيداء : متى بتروحين لأهلك ؟
غيداء : بأي وقت عادي .
فهد : عادي العصر .
غيداء : ايه .
فهد : طيب جهزي حالك ترا بنروح من بيت اهلك لخوالي .
هزت غيداء راسها : ان شاء الله .
طلع فهد من عندها وغيداء نزلت تحت وشافت مدى وساره : كل عام وانتم بخير .
مدى وهي تحضن غيداء : وانتي بخير .
ساره بدون نفس : وانتي بخير .
غيداء : وين عمتي ؟
مدى : راحت معاهم للصلاه .
جلست ساره على الكنبه وبحزن : مدى اليوم يسافر نايف .
شهقت مدى : اليوم ؟
بلعت غيداء ريقها : لا فهد قالي اجلو سفرهم الى بكره العصر .
ساره وهي توقف : مـتأكده انه قال كذا ؟
غيداء : ايه متأكده .
خذت ساره جوالها واتصلت على نايف ومارد وطالعت بغيداء ومدى : نايف مايرد .
مدى : ايه اكيد بالصلاه .. ترا الساعه الحين 6 .
ساره وهي تطالع مدى : ومن متى نايف صلى مع الناس ؟
رن جوال غيداء : هلا صبا .
صبا : كل عام وانتي بخير يابنت عمي القاطعه .
غيداء : وانتي بخير حبيبتي .
صبا : اش اخبارك واخبار اهل زوجك ؟
غيداء : الحمدلله بخير .. شخباركم ؟
صبا : عالي العال .
غيداء : دوم يارب .. رجعتو من دبي ؟
صبا : لا بكره ان شاء الله نرجع .
غيداء : مع السلامه حبيبتي سلمي لي على امك .
صبا : يوصل ياقلبي مع السلامه .
سكرت غيداء جوالها وطالعت بمدى : خوالك وين ساكنين ؟
مدى بابتسامه : بالقصيم لايكون فهد قالك تروحين لهم ؟
غيداء : إلا بروح .
ساره : ليش تروحين مالك داعي انتي غريبه بيننا يكفي انك عايشه هنا على خيرنا .
غيداء : والله فهد امرني بشي اسويه يعني اسويه .
ساره وهي تحط يدها على خصرها : يعني تتحديني ؟
غيداء : لا ماقلت اتحداك روحي انتي وقولي لفهد الكلام اللي قلتي لي يمكن تقنعينه .
ساره : يصير خير ياغيداء .
مدى : سااااره خلاص حتى بالعيد مو راضيه تكفين الشر الناس فرحانين وانتي تخانقين خلاص والله مصختيها .
دخلو الجوهره ومنصور وفهد وسلمو على البنات وجاء فهد ومسك يد غيداء وسلم على خدودها : كل عام وانتي بخير .
غيداء بحيا : وانت بخير .



***

كانت وريف بغرفتها تبكي دخلت امها : وريف يمه وش فيك ؟
وريف : آآه يمه ما اقدر اتحرك خلاص احس اني مشلوله .
نوره : حبيبتي ان شاء الله ايام ويخف الالم .
وريف وهي تبكي : اليوم الناس بفرح ويوم عيد وانا بغرفتي ما اقدر اتحرك ؟
نوره بحزن : انتي غلطتي وهم صلحو غلطتك بغلطه .
وريف : يمه خذي لي حقي منهم الله يخليك يمه لاتخليني .
نوره : من مين اخذ حقك ؟
وريف : من غيداء وبدر .
نوره : غيداء الحين وش دخلها بالموضوع تراها مسكينه ماسوت لك شي .
وريف : والله انا المسكينه اللي حتى بعز ضيقتي والمي تقولون اني ظالمه غيداء .. آآآه متى تحسون فيني .
نوره : يابعد عمري ياجعلني ما ابكيك .
انفتح الباب ودخل بدر : سلام عليكم .
نوره : عليكم السلام .
كانت وريف مسنده ظهرها ع السرير وتطالع بدر من فوق لتحت : كل عام وانتي بخير وريف .
وريف : انقلع من هنا لا عاد اشوفك بغرفتي .
بدر بسخريه : وش مسوي لك ياسمو الاميره ؟
وريف بعصبيه : وتسأل وش مسوي لي شين وقوات عين .
بدر وهو بطريقه بيطلع : مافيها شي اني امد يدي عليك .
سالت دموع وريف : يمه تسمعين ولدك اش يقول .. اش الغلط اللي سويته عشان يسوي كذا ؟
نوره : غلطتك كبيره ياوريف تكلمين شباب ويمكن تطلعين معاهـ..
قاطعتها وريف : وربي انه ولا مره كلمت شاب كل هذا عشان حبي لفهد .
نوره : عشان حبك لفهد ولا عشانك خايفه من ربك .
وريف وهي تبكي : يمه لي اربع ايام ماشفت ابوي ولا سمعت صوته كل هذا عشانه واقف بصف غيداء والله حرام انا بنته ليش مايحس فيني .
نوره : انتي سودتي وجه ابوك واخوك .. وابوك يقول مايبي يشوفك .
وريف : طيب ليش ؟
نوره : انتي طولتي لسانك على فهد وفعلتك الشينه اللي ماراح يغفرونها لك .
وريف وهي تبكي وبألم : يمه الله يخليك انقلوني للمستشفى والله احس اني بمووت .
نوره وهي تمسح على شعرها : اسم الله عليك حبيبتي .
وريف : آآه يمه مو قادره اتحمل التعب خلاص .
نوره : والله ما نقدر ننقلك للمستشفى الموضوع مو سهل لازم فيه تحقيق .. وهذي القضيه اعتداء ومحاولة قتل .
وريف : لهالدرجه رخيصه عندكم ؟
نوره : لا مو رخيصه عندي بس خايفه من المشاكل .
وريف بعد ماتأوهت من التعب : طيب دوري لي على علاج .
نوره : حااضر ادور لك على علاج .

***

فـي ثاني ايام العيد ..
كانو كل العائله مجتمعين ببيت منصور .
سهى : والله راح اشتاق لعامر 6 سنوات صعبه .
الجوهره : آآه انا ابعدت عني اماني والحين نايف الله يصبرني على فراقهم .
فاتن : طيب ليش تبكون ان شاء الله بيرجعون .
الجوهره : بس ننتظرهم 6 سنوات وش بيصبرني عن ولدي 6 سنوات .
فاتن : يعني ماراح تروحون لألمانيا وتشوفون عيالكم ؟
الجوهره : إلا ان شاء الله .. بس غير اذا كانو هنا وبيننا واذا كانو بغربتهم .
غيداء : اماني خلاص رجعت لألمانيا ؟
الجوهره : ايه رجعت عشان نايف وعامر .
شهقت مدى : لايكون خلت رويد بالقريه ؟
الجوهره : إلا هو مارضى يسافر معاهم يقول عجبته الجلسه بين عماته واعمامه .
مدى : انهبلت هذي ولا اش فيها اشلون تخلي ولدها وتروح لألمانيا ؟
الجوهره : حتى انا والله مستغربه منها .
رن جوال مدى : هلا ناصر .. اوك .
ونزلت جوالها ووقفت : غيود تغطي عمي ناصر بيجي .
وقفت غيداء : خلاص انا بروح لغرفتي .
مدى : لا لا هو يقول لازم غيداء تكون موجوده .
خذت غيداء عباية وطرحة فاتن وتغطت فيهم .
دخل ناصر ووقف عند الجوهره وهي تطالعه : ناصر وش فيك وش صاير ؟
ناصر وهو منزل راسه للارض : فهد متهم بقضية قتل وحكم عليه سجن 80 يوم .