[شمالية الهوى]

~ آلُبَآرَتُ آلَسَآدٌسَ وَآلُعِشَرْوُنَ ~




• اِقَتُنْعَتُ بْكَلِمُةَ هَذَاُ قِسَمُةّ وَنِصَيُبْ



• لآنَكُ اَحّلِىَ نَصْيَبُ وَاَغّلَىُ حَبُيْبَ




تقدم فهد للرجال وهو يحس ان رجوله مشلوله : ســ سامي وش فيك ؟
سامي وهو يروح لفهد : استاذ فــهد .
حضنو بعض وبعد ثواني طالع فهد بسامي اللي دموعه متحجره بعيونه : سامي وش فيك وش صار لك ؟
سامي : من 83 يوم وانا معتقل ماقدرت انقذك واقولك ان القاتل هو نايف اخوك .. بس صقر قالي انه هو بيتصرف واظن انه تصرف .
فهد بصدمه : نايف اخوي هو القاتل ؟ طيب وانت وش صار لك وليش وجهك كله جروح كذا ؟
سامي : من الضرب اللي تعرضت له .
فهد : طيب ليش انت بايع البيت وامك واختك وابوك كلهم مو موجودين .
سالت دمعة سامي : المافيا قتلو امي واختي .. وابوي الحين بالمستشفى .. انا اعتذر منك ياطويل العمر ماقدرت اساعدك .
ربت فهد بيده على كتف سامي : انا اللي اعتذر منك لأنه كل اللي صار لك بسببي بس والله راح اعوضك عن كل اللي صار لك .
سامي بحزن : امي واختي مايتعوضون .
فهد : عارف ان الارواح ماتتعوض بس غيرها يتعوض .
سامي : عن اذنك بروح لأبوي بالمستشفى وتوصل بالسلامه ان شاء الله .
فهد : مع السلامه .
ورجع فهد لغيداء اللي جالسه بكراسي الانتظار : يله رحلتنا باقي عليها دقيقين .
مشت غيداء معاه وركبو بالطياره وجلست غيداء جنب فهد : حبيبتي اذا بتنزلين العبايه عادي مافيه احد هنا .
نزلت غيداء عبايتها وجات المضيفه وخذتها وحطتها بالمكان المخصص وطالعت غيداء بفهد : مين اللي كان عندك بالمطار ؟
فهد وهو يمسك يدها : هذا مدير اعمالي سامي اللي اتهمناه انه هو ممكن يكون القاتل .. معتقل له 83 يوم من صارت الجريمه وهو عند المافيا وقتلو امه واخته .
غيداء : الله يكون بعونه .
فهد : اميين .. احس انه انا السبب باللي صار لسامي .
غيداء : لا حتى انت كنت بتنقتل ومالك ذنب باللي صار له .



***


جلست مدى جنب اماني : ملك بنت الهنوف قليلة حيا .
طالعتها اماني : وش فيها ؟
مدى : من جد ماتستحي ولا تجلس مع رويد وهي بس لابسه حجاب .
اماني : ميدو ترا مافيها شي وهي تربت مع رويد ودرست معاه وعاشت معاه صعبه عليها تتغطى عنه وبعدين احنا بغربه يعني رويد وملك مثل الاخوان .
مدى : طيب ليش تقولون عن وريف قليلة حيا لأنها ماتتغطى عن فهد وهذي عادي عندكم ؟
اماني : لأن وريف كبيره وهي عايشه بالسعوديه وهذي عاده عند اهل السعوديه .
مدى : لا مو عاده هذي عباده وحرام البنت تكشف وجهها قدام الاجانب عنها .
اماني : ميدو لا تكبرين الموضوع ترا رويد يعتبرها اخته عادي .
مدى بعصبيه : وهذي المشكله انه يعتبرها اخته وهي شكلها تحبه ولا ماشفتيها اشلون تتلصق فيه شوي وتجلس بحضنه .
ضحكت اماني : طيب وش فيك معصبه كل هذا كره لملك .
مدى : ما اكرها ولا قلت اكرها بس قهرتني .
اماني : والله عادي هي بحسبة ماريا و رويد اخوها .
مدى : بس شرعآ مو اخته ولا من محارمه .
اماني : هههههههه لبئ قلبك والله عادي عندنا ورويد عايش هنا كل البنات مايتغطون عنه وبعدين هم صغار .
مدى بعصبيه : اي صغار بيبلغون 20 سنه وهم صغار .
اماني بابتسامه : اقول ميدو اش اخبار بسام ؟
انحرجت مدى ونزلت راسها للارض .
ضحكت اماني : واخيرآ قدرت اسكتك .
طلعت مدى تركض لغرفتها .
ابتسمت اماني " الله يوفقك ياميدو "
طالعت اماني بساعتها تشير الى 12 ونص ليلآ .
وقفت وسمعت صوت رويد يضحك بالمجلس طقت الباب ودخلت وهو يقول : اكلمك بعدين .
اماني : رويد من تكلم الحين ؟
رويد بخوف : اا .. هااا .. اكلم وليد ولد عمي .
اماني : انت عارف كم الساعه بالسعوديه عشان تكلم ولد عمك ؟
رويد : الساعه 2 ونص بالليل .
اماني : وانت شايف الوقت مناسب تكلمه ؟
رويد : ايه عادي دايم الوقت هذا وهو صاحي .
اماني : هو اكيد عنده دراسه بكره لاتشغله .
ابتسم رويد : لا عادي ماراح ازعجه واحنا متعودين بالوقت هذا نكون صاحين .
اماني : فيه احد ينام بدري ويصحى 2 ونص ؟
رويد " اتوقع مافيه إلا انا وديم " : ايه بالقريه احنا كذا بس انا ووليد .
اماني : طيب حبيبي انا بروح انام اذا احتجت شي صحيني .
رويد : اوكي .
مشت اماني من عنده ودخلت غرفتها اللي بالدور الارضي لأنها حامل والدرج يتعبها .
جلست ع السرير وهي تفكر برويد " مو معقوله انه يكلم وليد بالوقت هذا .. وليش ارتبك يوم دخلت ؟ لا لا استغفر الله هذا ولدي ما ابي اشك فيه "



***


دخلت غيداء بغرفة النوم وانبهرت منها لون المفارش ابيض ومنثور على الزوايا ورد الجوري لونه احمر والفواحات العطريه تشتغل والجو رومنسي .. والتسريحه مزينه بالشموع ابتسمت غيداء " والله انك ذوق يافهد "
دخلت غيداء بالحمام ( وانتو بكرامه ) وخذت لها شور ولبست قميص نوم لونه ابيض ولبست صندل ابيض وشعرها سوته كيرلي وحطت كحل اسود ومسكرا لونها اسود وبلاشر وردي وتعطرت وطالعة بالقميص نص ظهرها طالع وصدرها مفتوح وهو بنص ركبتها حست برعشه وهي تسمع صوت فهد يناديها .
وقفت ودخل فهد وتسمر بمكانه وهو يشوف الملاك اللي قدامه ابتسم لها : ياحلاتك اليوم .
ابتسمت له غيداء وحاولت انها تكون جريئه وراحت لفهد وهو حاوط خصرها بيده ومسك يدها بيده الثانيه وباسها : الله لايحرمني منك يالغلا .
غيداء بعد ماباست خده : ولا منك .
سحبها فهد وجلس ع السرير وهي جنبه ومطوقه رقبته بيدها .
همست له : فهد لك جنب مجرى الدم عرق ثاني .
ابتسم لها فهد : آآآه حبك يجري فيني مجرى الدم .
حضنها فهد وهي تحس انه خلاص ماعاد فيها اكسجين .
باس كل جزء من وجهها وهمس لها : احبك .


***

الجوهره : منصور الله يخليك ولدي مافيه شي لا توديه المستشفى .
منصور : مافيه شي وهو موب صاحي يقتل ويرمي الجريمه على اخوه ؟
الجوهره : يمكن مو هو القاتل تأكد انت مين القاتل وبعدين عاقبه .
منصور : اللي عامر يسوي كأنه نايف اللي مسويه ومابينهم فرق كلهم خطيه وحده ومو معترفين مين القاتل .
الجوهره وهي تبكي : تكفى يا ابو فهد بس ابي اسلم على ولدي لي شهرين ونص ماشفته .
منصور : والله هو اللي اختار الطريق هذا بنفسه ومو لازم تشوفينه تعودنا على غيابه وهو كان بيجلس بألمانيا ست سنوات .
مسحت الجوهره دموعها : طيب مو لازم اسلم عليه ابي اشوفه لو كان من بعيد .
منصور : لا والف لا نايف ماراح تشوفينه الحين يجون الاطباء وياخذونه واحتمال مايطلع من المستشفى قبل ثلاث سنوات .
الجوهره : وبعد بتمنعني من شوفته بالمستشفى .
منصور : اكيد زوجة منصور اليحيى ماتدخل مستشفيات المدمنين .
الجوهره : واذا كان ولدي هناك ؟
منصور : نفس الشي ولدك ولا غيره انا ما ابي احد يعرف بالسالفه هذي ما ابي راسي ينزل للارض فهد وسلطان رفعو راسي بس هذا سود الله وجهه ماعرفت اربيه بس والله ما اخليه .
الجوهره : ليش انت قاسي كذا ؟ من يوم عرفتك اكثر من 45 سنه ولا مره شفتك بالقسوه هذي .
منصور : انا ماقسيت على احد بس بربي ولدك هذا اللي عودناه على الترف والرفاهيه ولا مره جرب الضرب او القسوه .
الجوهره : ابو فهد طلبتك لا تردني ابي اشوف نايف لو من بعيد والله اشتقت له .
منصور : تشوفينه الحين اذا خذوه للمستشفى .
الجوهره : حرام عليك حابسه له ثلاث ايام ما اكل ولا شاف احد ماندري هو حي ولا ميت .
منصور : لا مامات وهو عنده الاكل اللي يكيفه لا تظنين انه اذا رجع الاكل بحن عليه واطلعه .. رحمه من ربي انه بيطلع للمستشفى .
الجوهره : وعامر بعد بيروح للمستشفى ؟
منصور : بيروح للمستشفى واللي يصير بنايف يصير لعامر كلهم خطيه وحده بس مو بنفس المستشفى .
الجوهره : بعد بتحرمهم من بعض وهم ماتفرقو لو دقيقه .
منصور : المؤمن لا يلدغ من الجحر مرتين واحنا مانبي نكرر خطانا ونخليهم مع بعض احنا نبيهم يتعالجون وكل واحد بمستشفى .. يله قومي داخل الحين بيجون ياخذون ولدك .
وقفت الجوهره : انا بوقف على الدرج بس عشان اشوف نايف .
منصور : خلاص اوقفي على الدرج بس والله لو نزلتي ولا طلع لك حس لأطلقك .. سمعتي ؟
الجوهره وهي تطلع مع الدرج : لا بس بشوفه - دخلت بغرفتها وخذت طرحتها وحطتها على راسها وغطت وجهها ووقفت ومسكت سور الدرج وهي تشوف نايف لابس ثوب ابيض ونحفان حيل وشعره الكدش الحين قصير شهقت وهي تشوف الهالات السوداء تحت عيونه وشفايفه اللي مايله للسواد " ياربي اصلحه " دخلت بغرفتها مو متحمله تشوف ولدها وهم يسحبونه بقوه عشان يطلع معاهم رمت نفسها على السرير " ياويل قلبي عليك يا نايف .. ياربي رجعه لي بالسلامه "
دخلت ساره بغرفة امها وبدلع : ماماتي .
رفعت الجوهره راسها ومسحت دموعها : هلا سارونتي .
ساره وهي تجلس جنب امها وبصدمه : مامي ليش تبكين ؟
الجوهره بغصه : نايف نقلوه للمستشفى وابوك منعني من شوفته .. وتو شفته متغير حيل .
ساره بصدمه : نايف اخوي كان هنا ؟
الجوهره : انتي مو عارفه الدنيا وين .. ماكنتي عارفه ان نايف وعامر رجعو ؟
ساره : لا والله ماكنت اعرف .. طيب ليش رجعو ؟
الجوهره : سالفة المافيا اللي هم قالو كلها كذب وهم اللي مخططين لها وقتلو جارح وطلعو لألمانيا وقبل موعد القصاص بعشر ساعات رجعو .
شهقت ساره : ويسوون كذا بفهد ؟
الجوهره : ماكانو عارفين انه فهد اللي تورط بالجريمه .
ساره بابتسامه : ماعلينا منهم .. يمه كلمت غيداء مبسوطه مره .
الجوهره : انا وين وانتي وين ؟
ساره : ماما مو انتي اللي قلتي اعتبري غيداء احد صديقاتك .. والله هي احلى صديقه عسل تهبل .
الجوهره : خلاص سارونه اطلعي والله فيني ضيقه .
ساره وهي توقف : دادي هنا ؟
الجوهره : ايه .
نزلت ساره مع الدرج وراحت تركض لأبوها : بابا .
حضنها ابوها : هلا بغلاتي هلا بسارونتي .
ساره : بابا كل اخواني سافرو إلا انا اش رايك نروح انا وانت ومامتي لأمريكا او هولندا والله جو هولندا الايام هذي مايتفوت .
منصور : من عيوني الثنتين بس مو الحين .
ساره بدلع وهي تبعد عن حضن ابوها : طيب متى ؟
منصور : الصيفيه الجايه ان شاء الله .
ساره : لا دادي ابي اليوم او بكره والله البيت طفش الحين .
منصور : اش رايك تروحين عند وريف بنت عمك .
ساره : اوك اروح عند وريف بس بدر ولد عمي اعيش معاه ؟
منصور : ايه عادي انتي بجناح وريف وهو بجناحه .
ساره : اممم اوك بروح لها بس بكلمها قبل .
منصور : خلاص اذا رحتي عند وريف خبريني .
ساره : لا دادي انت وصلني لها .
ابتسم منصور : والله ما ارد لك طلب بس الحين ما اقدر بروح الوزاره تأخرت كثير .


***

فــي الصباح بمدينة روما بحديقه خضراء ومع اصوات العصافير التي تغرد بأعذب الالحان ونسمات الهوا البارده على طاوله خشب مستديره لونها بني كانو جالسين غيداء وفهد على كراسي من نفس الطاوله كانت غيداء لابسه برمودا ابيض وتيشيرت زهري والهوا تلفح بشعرها : وين تبينا نتمشى ؟
غيداء " اي مكان اهم شي اني معاك " : ما اعرف شي هنا .
فهد : خلاص بنروح لمكان يسمونه صباح الرومانسيه .
غيداء بقرف : لا وع اكيد بنلقى هناك الناس اللي لبسهم مايسترهم .
ضحك فهد : يالبئ قلبك .. طيب وين نروح ؟
غيداء : عادي اي مكان .
فهد : خلاص نروح لبرج بيزا .
غيداء : مدينة بيزا قريبة من هنا ؟
فهد : ايه تقريبآ 220 كيلو .
غيداء : 220 قريبه ؟
فهد : ايه قريبه نروح بباخره يمكن 3 ساعات واحنا واصلين .
غيداء : اوك .. ووقفت .. بروح اجهز اغراضي اللي احتاجها .
فهد : انتظرك هنا .
غيداء بتردد : البس عبايـه ولا حجاب يكفي .
فهد : لا لازم العبايه مستحيل وحده من خواتي او انتي تطلعون معاي بدون عبايه .
دخلت غيداء بالقصر وراحت لجناحها ولبست بنطلون وبلوزه ولبست عبايتها وخذت طرحتها وخذت كاميرتها كانون وشنطتها ونزلت تحت ولفت طرحتها وطالعت بفهد اللي جالس بالحديقه ينتظرها : حبيبي انا جاهزه .
ابتسم فهد ومسك يدها وركبو بالسياره وسكر فهد الستاير وطلعو للبحر ووقفت سيارتهم بالباركنق .
ونزلو وخذو التذاكر وراحو للسفينه الفخمه وتقريبآ افخم سفن اوروبا : وااو السفينه شكلها روعه . قالته غيداء وهي تطالع السفينه .
فهد : هذي السفينه كانت لجدي وبعد وفاته انا اخذتها .. تقريبآ كلفت جدي 500 مليون .
غيداء : والله تخقق ماشاء الله .
ابتسم فهد وهو يشوف السعاده بعيون غيداء وبكلامها " الحمدلله اني قدرت اسعدها "
ركبو بالباخره وهي عباره عن دورين الدور الارضي من زجاج والدور الثاني صاله متكامله وغرفة نوم كبيره وفخمه .
فهد : تبين نجلس فوق ولا تحت ؟
غيداء : لا اخاف اجلس تحت بنروح فوق .
طلعو مع المصعد الخشبي الصغير للدور الثاني وجلسو بالصاله وامر فهد السايق يمشي .



***


وريف : ياهلا بسارونه واخيرآ جيتي لك مده مادخلتي بيتنا .
ساره : انتي عارفه اللي صار لفهد والله انشغلنا كثير ويوم ماما بالمستشفى ويوم غيداء والله تعبنا كثير .
وريف : بعد عمري فهد .. إلا غيدوه راحت معاه لروما ؟
ساره : ايه اكيد رايحه معاه اعتقد السفره هذي كلها بس عشان غيداء .
وريف : وع ياكرهي لها .
ساره : خلاص وريف اتركيها فحالها .
وريف بحقد : تاخذ مني فهد واتركها بحالها ؟
ساره : ومتى صار فهد ملك لك عشان تقولين تاخذ مني فهد ؟
وريف : لا قصدي تكرهه فيني .
ساره : لا ما اعتقد غيداء كذا وفهد يحبها يعني مستحيل تكلمه عنك .
وريف : ومين اللي قالك انه يحبها .. وهو متزوجه غصب عنه .
ساره : صار لهم اربع اشهر من زواجهم اشوفهم عسل على سمن .
وريف : لا يمكن تمثيل قدامكم ولا فهد يكرهها .
ساره : اي تمثيل ؟ فهد يحب غيداء ومايشوف غيرها وانا متأكده ولو مايبيها من الاول كان ماتزوجها ولا نسيتي انه رفضك ورفض العنود بنت خالتي وكان يقدر يرفض غيداء بس حبه لها اكبر من انه يرفضها .. يابنت اتركيهم بحالهم وفكري بنفسك .
وريف بابتسامه : تصدقين ساره جاء يمكن شهر ونص من ملكتي ولا مره شفت ابو بندر ولا كلمته ولا طلعت معاه .
ساره : والله احسن لك شوفي مدى كل يوم وهي ترفض تطلع مع بسام وهو مايمل يجي للبيت بس عشان يشوفها .
وريف : ياليت ابو بندر كذا .. والله حتى اسمه ما اعرفه ولا ادري كيف شكله اللي اعرفه اسمه ابو بندر ههههههههههههه اول مره اشوف وحده كذا.
ساره : طيب اسألي باباتك او بدر عن اسم ابو بندر مو حلوه ماتعرفين اسم خطيبك .
وريف : لا مستحيل خلاص بدر مابيني وبينه اي شي ولاهو اخوي ولا اعرفه وباباتي انا زعلانه منه .
ساره : طيب ليش كل هذا ؟
وريف : اكره بدر هو اللي زوجني .. وباباتي يحاول يراضيني كل يوم بس انا اتغلا .
ساره : تعرفين غلاتك عند عمي ليش تتغلين ؟
وريف : يمكن يحن علي ويلغي الزواج هذا .. إلا مدى متى زواجها ؟
ساره : اتوقع بشهر 8 الجاي .
وريف : انا زواجي بـ 21/ 7 .
ساره : ياقلبي ياوريف ليش توافــــقين على هذا ؟
وريف : ما ادري والله شي حلو انه وحده تتزوج واحد اقل منها بكل شي يصير خاتم بيدي فلوسي تمشيه باللي ابي .


***

رن جوال ديم : الوو .
وسام : هلا ديوم .. وينك يالقاطعه لي يوم كامل ماشفتك ولا حتى فكرتي تتصلين علي .
ديم : والله مشغوله بأختباراتي .
وسام : الله يوفقك ياقلبي .. بس وش اختباراته باقي اسبوع على اجازة العيد .
ديم : ايه بكره اخر اختبار كيمياء والله صعب حيل .
وسام : طيب وليد عنده اختبارات ؟
ديم : ايه بعد بكره اخر يوم عنده .
وسام : يعني حتى رويد عنده اختبارات وساحب عليهم .
ديم : لا رويد اختبر كل اختباراته وراح لألمانيا .
وسام : وانتي وش دراك عنه ؟
بلعت ديم ريقها : وليد قالي يعني اشلون بعرف عنه .
وسام : اها .. طيب تعالي والله البيت من بعد رويد طفش .
ديم : اوك بس براجع واجيك .. نص ساعه وانا عندك سوي لي نعناع .
وسام : من عيوني الثنتين .
ديم : تسلم عيونك .
وسام : يله ديم بسرعه راجعي وتعالي .
ديم : اوك .. تشاو براجع .
وسام : تششاو .
نزلت ديم جوالها وخذت كتابها وراجعت الفصل اللي عليهم اختبار " اووف حتى الاختبارات الشهريه تتعب "
خلصت من المذاكره وراحت لأمها اللي بالصاله : مساء الخير يمه .
شيخه : مساء النور .
ديم : يمه بروح لوسام تبين شي ؟
شيخه : ايه حبيبتي غسلي ملابس اخوانك قبل لا تروحين واكويهم .
ديم : طيب بعد ما ارجع .
شيخه : ديييم وش قلت لك انا .. غسليهم الحين واكويهم وروحي كلهم ثوبين .
ديم بقهر : طيب .


***

مــر اســبوعين

جهزت اماني اغراض رويد وهي تبكي : خلاص بتروح ؟
رويد : ايه لازم اروح الحين .
اماني : باقي اسبوعين من اجازتك ليش ماتجلس .
رويد بعد ماباس يد امه : والله ما اقدر اجلس هنا اكثر من كذا .. اعذريني يمه وخالتي مدى راحت قبل ثلاث ايام رحلتي كانت معاها بس اجلتها عشانك .
مسحت اماني دموعها : الله معاك قلبي .. ان شاء الله شهرين واروح عند اهلي وانقل ملفك بالرياض .
رويد : لا لا يمه انا ابي اعيش بالقريه خلاص تعودت عليهم وتعرفت على نص شباب القريه .
اماني : على راحتك حبيبي بس اهم شي تنتبه لنفسك .
باس رويد يدينها وراسها : مع السلامه .. راح اشتاق لك .
اماني وهي تحضن رويد : وانا بعد راح اشتاق لك كثير .
اخذ رويد شنطته بعد ماسلم على ماريا وعمته وجهاد وإياد وطلع مع ابوه للمطار .
وصلو مطار ميونخ ورويد على قد ماهو حزين على فراق اهله سعيد لأنه بيروح للقريه وبيشوف ديم اللي اشتاق لها كثير .
عبدالمجيد : انتبه على نفس ياولدي .
رويد : مع السلامه دادي .
عبدالمجيد : فمان الله .
راح رويد للطياره طياره سياحيه بس بالفرست كلاس .
اقلعت الطياره الى الرياض .
وبعد رحله متعبه دامت 10 ساعات هبطت الطياره بمطار الملك خالد الدولي بالرياض .
كان رويد يمشي ويسحب شنطته وراه وشاف خاله سلطان وجده منصور وراح لهم وسلم عليهم .
منصور : الحمدلله على سلامتك يالغالي .
رويد بعد ماباس راس جده : الله يسلمك يا ابوي .
سلطان : تو مانورت الرياض .
ابتسم رويد وركبو بالسياره مرسيدس مايباخ 2013 .
وصلو البيت ونزلو .
ودخل رويد وراء منصور ووقفت الجوهره : ياهلا بولدي .
راح لها رويد وحضنته : هلا بالغالي .. الحمدلله على سلامتك .
رويد : الله يسلمك .
وجلس رويد جنب الجوهره بعد ماخذت اخباره واخبار اهله .
منصور : الليله بسوي احلى عشاء واحلى عزيمه لرويد .
الجوهره : يستاهل ولدي .
مدى وهي تنزل مع الدرج : ياسلام يعني امس مسوين عشاء لفهد واليوم رويد وانا يوم جيت ماسويتو لي .
منصور : والله زوجك اللي كان بيسوي عشاء بس انتي اللي رفضتي .
انحرجت مدى و نزلت تحت وسلمت على رويد ورجعت لغرفتها .
ضحك سلطان : هههههههههه ياحلوها وهي مستحيه .
الجوهره : حرام عليك يامنصور والله مايصير تحرجها كذا .
سلطان وهو يوقف : عن اذنكم بروح للدوام .
الجوهره : الله معاك حبيبي .
طلع سلطان وطلع منصور لجناحه هو والجوهره .
وقف رويد : عن اذنك يمه بروح انام .
الجوهره : بس ما ادري لو كان جناحك فيه غبار .. روح نام بجناح نايف .
رويد : طيب .. بس ابي المفتاح .
طلعت الجوهره المفتاح من الفازه اللي ع الطاوله : هذا مفتاح جناح نايف .
اخذ رويد المفتاح وطلع لجناح نايف فتح الباب وفتح الانوار وراح للغرفه وفتح الباب وهو اول مره يشوف غرفة نايف اللي مستحيل احد يدخلها ومايسمح لأي شخص يدخل غرفته .
طالع رويد بالغرفه لونها اسود " يمكن لون غرفته اللي جايبه له الكأبه "
دخل بالغرفه وجلس ع السرير " احس بخوف ما ادري وش فيني "
تمدد ع السرير وهو يتعوذ من الشيطان .
واستسلم للنوم .


***

غيداء وهي تجلس ع السرير جنب فهد اللي غارق بنومه : فــهد .. فهود اصحى .
تحرك فهد منزعج : هممم .
غيداء : يله اصحى طفشت وانا جالسه بروحي .
جلس فهد : صباح الخير .
ابتسمت غيداء : صباح الليل .
فهد : كم الساعه ؟
غيداء : 10 .
فز فهد من مكانه ووقف : الساعه عشر ليش ماصحيتيني على الصلاه .
غيداء : والله صحيتك بس عجزت فيك نومك ثقيل .. لسه ماراح وقت الصلاه .
ابتسم فهد : والله نومي مو ثقيل بس لي يوم مانمت .
دخل فهد بدورة المياه .
وغيداء طلعت للصاله " الحمدلله ياربي اكرمتني بعد ماكنت عايشه بذل "
طلع فهد وهو لابس ثوب ابيض وشماغ : غيود انا بروح لسامي ويمكن اتأخر .
غيداء : يعني متى ترجع ؟
فهد : يمكن الفجر .
غيداء : الله معاك حبيبي .
باس فهد جبينها وطلع .
وغيداء نزلت تحت : سلام عليكم .
الجوهره : عليكم السلام ياهلا وغلا .
جلست غيداء : وين البنات ؟
الجوهره : ساره راحت مع رفيف للسوق ومدى اظن انها نايمه .. عزمت امك وهي الحين جايه .
ابتسمت غيداء : انا بسوي حلا الماني اسمه كيزه كوخن .
الجوهره بابتسامه : انا بنتظر امك .
راحت غيداء للمطبخ وسوت الحلا وحطته بالثلاجه ورجعت للصاله وشافت امها وسلمت عليها : صغيرتي كيف حالك ؟
غيداء بابتسامه : تمام .. مامتي انا سويت لك حلا كيزه كوخن بروح اجيبه .
انبسطت كرستينا : دانكي ( شكرآ )
غيداء : بيتا ( عفوا )
الجوهره : ماشاء الله غيود تعرفين تتلكمين الماني .
غيداء : ههههههه ايه عايشه بألمانيا عشر سنوات .
الجوهره بابتسامه : من جد مايناسب فهد إلا انتي ماشاء الله اناقه وجمال وثقافه وتتكلمين كم لغه .
غيداء : هههههه بس مؤهلي الدراسي مايناسب مركز فهد الاجتماعي .
الجوهره : ان شاء الله تكملين الجامعه وتجيبين اعلى الشهادات .
غيداء : امين يارب .
الجوهره : انتي مأجله الكورس هذا صح ؟
غيداء : ايه .
كرستينا : غيداء ستذهبين معي إلى موديلاتشند ( المانيا ) لكي تكملي دراستكي .
غيداء : لا انا ابي بجامعة الامام .
كرستينا : ولاكن هناك الشهاده اعلى وتناسب مركز زوجكي الاجتماعي .
غيداء : لا عادي انا ابي ادرس هنا مع ميدو .



***


بالقريه ..
وسام : ياهلا وغلا .
رويد : هلا بك اكثر .. والله اشتقت لكم .
وسام بابتسامه : وانا والله اشتقت لك البيت بدونك مايصلح .
رويد : احس اني من اهل القريه ما قدرت على فراق القريه اسبوعين .
وسام : يابعد عمري .. جعلني ما افقدك .
رويد : وين جدتي والله مشتاااق لها .
وسام : امي نايمه .. انتظرتك يوم جات الساعه عشر قالت انا ما اقدر اسهر .
رويد وهو يجلس ع الكنبه : والله مشتاق لكم كأنه شهر ما شفتكم .
وسام : سبحان اللي غيرك انا مو مستوعبه انه اللي جالس قدامي رويد اللي كان بالموت يطلع من الرياض .
رويد : ههههههههه خلاص كبرت وتغيرت .
وسام : وان شاء الله تكبر وتحب وحده من بنات الديره .
ضحك رويد : تبيني احب وحده من بنات الديره ؟
وسام : ايه بس عشان تستقر هنا .. مو تروح لألمانيا .
رويد : لا ما اعتقد اني راح استقر بالديره كلها كم سنه وانا عايش مع اهلي اذا رجعو من المانيا .
وسام : اممم طيب وانا مين اللي يعيش معاي ارجع للوحده مره ثانيه ؟ والله انت غيرت كثير بحياتي .
رويد بابتسامه : لا طبعآ بتتزوجين واللي ترجع للوحده جدتي الله يكون بعونها .
وسام : لا انا ما ابي اتزوج لسه صغيره ع الزواج .
رويد : صح انك صغيره بس لازم تفكرين بمستقبلك .. يعني سنتين وبتصيرين بعمر الزواج اذا صار عمرك 22 هذا سن مناسب بوجهة نظري .
وسام : بس بالقريه والناس اللي مو ذاك الزود بالثقافه والاطلاع على العالم عمر 18 وهي ما انخطبت هذي عانس خلاص .
رويد بإستغراب : وش هالتفكير ؟
وسام : فيه ناس إلا الان بالتفكير ذا وامي من الناس هذولا .


***


سامي : استاذ فهد انا بقولك على كل اللي صار من يوم اعتقلوني .
فهد : تفضل يا سامي كلي اذان صاغيه .
سامي : طلعنا انا وانت من الشركه الساعه 9 بالليل ورجعت للبيت ونمت وصحوني على صلاة الفجر ورحت للمسجد وصليت ويوم طلعت جو رجالين متلثمين واحد اسمه صقر وواحد اسمه احمد ومسكوني ودخلوني بسجن تحت الارض ثلاث امتار ظلام ما اشوف شي كل يوم يجي هذا اللي اسمه صقر ويضربني يقول ليش فهد هانني وشغلني عنده سكرتير وابوه ذل ابوي وهانه انا مو عارف السالفه ولا ادري متى اشتغل عندك الشخص هذا وجاني خبر انه صقر قتل امي واختي اميره وجوالي ضايع للحين ما ادري وينه وابوي بالمستشفى ماشفته إلا مره وحده .
فهد : وانت متأكد ان امك واختك ماتو ؟
سامي : ايه متأكد صقر جاء وقالي انهم ماتو .
فهد : ورحت لبيتكم ؟
سامي : لا ماحبيت اروح للبيت وامي واختي مو فيه وسألت ابوي وقالي ابوي انه مايعرف عنهم شي لأن ابوي دخل المستشفى بأخر ايام رمضان .
فهد : طيب اش رايك نروح للبيت ونشوف اذا امك واختك موجودين ولا لا .. لأن اختي مدى تقول اميره كلمتها قبل اسبوع .
سامي بذهول : يعني اميره عايشه ؟ طيب وينها ؟ وامي وينها ؟
فهد : تعال معاي نروح لبيتكم واذا مو موجودين بالبيت نسأل الجيران اشلون تصدق واحد مثل صقر ؟
سامي : هو حلف بالله انه قتلهم .
فهد : ولا قابلت احد من عائلتك عمامك او اخوالك ؟
سامي : لا .
فهد : طيب فكر مين اللي استلم الجثث ودفنوهم ؟
سامي : يمكن خوالي او واحد من عمامي .
فهد : خلنا نروح ونشوف اذا اهلك موجودين ولا ماتو .
سامي : شورك وهداية الله .
طلعو من الكوفي .
وركب فهد بسيارته ومعاه سامي وطلع فهد من الحي اللي هم فيه واتصل على البودي قارد ومشو معاه بسياره ثانيه .
بعد مسافات طويله قطعها فهد بدقايق وصلو قدام بيت سامي .. نزل سامي وطالع بالبيت اللي احتضنه من صغره وله الآن اكثر من ثلاث اشهر ما شافه .
طق سامي الباب وبلا مجيب !
طالع بفهد : انزرع عندي امل وتخيلت انه في يوم من الايام راح اعيش مع امي مره ثانيه بس للاسف هي ميته .
طلع فهد جواله : اتصل على خوالك واسالهم عن امك واختك مو معقوله اللي قاعد يصير مو عارف اذا اهلك عايشين ولا ميتين .
اخذ سامي جوال فهد واتصل على خاله الكبير صلاح : الوو .
صلاح : اهلآ .
سامي : خالي انا سامي .
صلاح بفرحه : ياهلا والله بولدي وينك مختفي اكثر من ثلاث اشهر ماشفناك ؟
سامي : والله معتقل ياخالي وما ادري وش صار على الدنيا .. خالي ماتدري امي واميره وين راحو ؟
صلاح : إلا عندي الحين اتصلت علي امك بالعيد الثالث وقالت لي البيت مافيه رجال وجيت وخذيتها وهي الحين عندي بالاحساء .
ابتسم سامي : واميره عندك ؟
صلاح : ايه عندي .. امك بتكلمك مو مصدقه انك عايش إلا اليوم .



***


صحت على صوت النار اللي هشم الابواب الخشبيه واهلك الستائر وحرارة النار التي لا تطاق .
قامت بخوف وهلع وهي تشوف البيت كله نار ودخان حست انها مخنوقه ومحتاجه اكسجين .
رجلينها مو شايلتها ولا تقدر توقف .. حست بسعير النار اللي لفح وجهها .