البارت الخامس عشر(15)
"الإعتراف..هو من أصعب الأمور في هذهِ الحياة..صُعب أن تعترف إنكَ كَاذب صُعب أن تعترف إنكَ مُخطئ...صُعب أن تعترف إنكَ تَحب!"
دخلت وهي مجروحة .. تحس بضعف ... تحس بوهن ولا مرة حست فيه بهالكثر .. دخلت وثوبها اقصد ثوب فارس الي عليها مفتوح ازاريره الي فوق وكم مرفوع وكم لا .. حاملة الغترة بيدها وشعرها معفوس ..
أول مادخلت شافت رانيا وملاك وغرام يناظرونها
غرام بخوف : فاااتن !
رانيا بخوف : حبيبتي وش سوا لك الملعون ؟
ملاك اخترعت من شكل فاتن ! وش سوا فيها راشد!!!
فاتن منزلة راسها وماتتكلم لهم ..
غرام وقفت ومسكت كتف فاتن : فات...
بعدت يدها بقوة رفعت عينها النمرية لها ومتجمعة فيها الدموع بهمس حقد : انقلعي عني
غرام انصدمت من شكل فاتن وتصرفها! خاصة عينها الي مدمعة!
اخذت لها مكان تنسدح فيه على الأرض اخذت عباتها تغطي نفسها ولمت ركبها لحضنها ..
غرام تناظر فاتن بخوف عليها : وش سوا فيها راشد الكلب؟
ملاك بعصبية : وانت بعد ليش تحديتيها وحطيتيها في هذا الموقف
رانيا تهدي الوضع : هيه يابنات غرام وفاتن ثنتينهم غلطانات وحدة تتحدى والثانيه تصدق وتطبق ..بس في النهاية راشد ماله دخل في فاتن ..ياكون ضربها؟!
غرام بعصبيه شدت حواجبها : اختي ماتنضرب من مخلوق يخلق!
"عند الشباب"
الغرفة ظلمة وبررررررد .. فارس عند زاوية ويحوس في جواله .. مشعل ووليد يلعبون اونو وعيونهم مبققة عليها عشان يشوفون الألوان زين وياكلون من الايس كريم الي جابه راشد .. فيصل ماسك القهوة الي بردت وهو ناسيها وسرحان يفكر بهموم الدنيا الي فوق راسه
فهد منسدح على الكنبة وفي سبات عمييق .. فزاع على الأرض منسدح متغطي ببطاننية ونايم رجل طالعة من تحت الغطاء ونظارته عليه نازله من عيونه مع النوم والجوال بيده
.. وهو .....ماسك جواله ومستغرب مين راسل له هالرسالة!
"ممكن تقابلني عند البحر اللي وراء مكان الحريم
ضروري "
كل الشباب موجودين معه في الغرفة راشد كان طالع بس اللحين رجع .. يعني مستحيل واحد من الشباب مسوي له مقلب .. الي زاد فضوله ورغبته في ان يروح للبحر .. كلمة ضروري!
توكل على الله ولبس جاكيته الأسود الطويل بما ان الجو بارد في الليل ..وتوجه للباب
فارس بفضول: على وين ان شاء الله ؟
يوسف : شويات بتمشى
فارس يغمزله: تتمشى لوحدك او مع الحب
يوسف ابتسم : تفكيرك خايس مثلك
وطلع
يمشي ويمشي لين وصل للبحر كان مايحجزه بينه وبين المزرعة شي ... الي استغرب منه انه شاف شموع عند البحر ..وورود حمراء منتثرة على التراب .. تقرب اكثر ...انصدم !!! نزل راسه بسرعة!!
كانت واقفة بلبس غير لائق كعادتها ولا تعبر انه موب من محارمها وفاسخة العباية قدامه ...لابسة فستان اسود ضييييق على جسمها الخطير ..وقصير جدا يبين كل فخدها .. عاري بدون اكمام وفي الصدر فتحة طوويلة .. لابسة اكسسوارات فضية وشوز فضي كعب .. حاطة لها ميك آب فرنسي .. وفاتحة شعرها الي صابغته اشقر الطويل .. ولنكن واقعيين طالعة مغرية لأي شاب!
بدون أي حياء... مسكت ذقنه ورفعت راسه .. بنعومة ودلع: يوسف ناظرني!
هي رفعت راسه وهو نزل عينه بسرعة ..
مسكت خده وبدلع : يوسف حبيبي..ليش ماتناظرني ؟ هذا كله عشانك عشانك انت وبس ...يوسف ناظرني ناظر شكلي وجسمـ..
نفذ صبره رفع عينه وصرخ عليها : فرررررررح !!! وش هالوقاحة الي انت عايشة فيها!!! أناااو لد عمك موب زوجك !! ولا اخوك ولا ابوك انا ما احل عليكِ عشان تكلميني كذا او تلبسين قدامي كذا!!! تفهمين وش قاعد اقولك انا موب زوووجـ..
قاطعته حطت صبعها السبابة على شفته برقة .. وضمته :يوسف أنا أحبــــــــــــــــك... أعـــشــقــك...وأهـــــواك!
بعدها بقوة عنه وبعصبيه صرخ فيها : احترمي نفسك يابنت!!! معدوم عندك الحياء انت؟؟ كيف تضميني كذا وانا ولد عمك !! ارفــــعــــي عـــلـــومك شــووووووي!!
بكت بقوة صرخت فيه : كيييييف كذاااا؟؟!! لأني أحــبـــك !! يوسف أنا احبــــك من لما كان عمري 15 !! يعني احبك من 6 سنواات! احبك !! بس انت تحب جواااااااااااااااهر!!! تحب جووااااهر!!!!
انصدم من كلامها ! لا ماانصدم من انها تحبه لانه يدري .. بس انصدم من كلامها عن جواهر ..
يوسف مصدوم : مين قااال اني احب جوااهر؟؟ فرح اتركي عنك هالكلام الفاضي واتستري والله عيب توقفين قدامي كذا!! "صد عنها "
ضمته بقوة وهي تبكي وهو صاد عنها : يووسف تكفى ! تكفى تكفى أفهمني انا احبك واهواك وابوس التراب الي انت تمشي عليها ! تزوجني لا تعاملني كزوجتك اضربني اقتلني عذبني شغلني عندك خدامة بس يكفي اني أكون بقربك ! والله أحبــك!
بعدها عنه بهدوء وهي تبكي .. فسخ جاكيته الأسود الطويل .. ولبسه أياها .. ورفع القبعة على شعرها عشان يغطيه .. بهدوءوبرود : ادخلي بهذا عشان تكوني مسترة ..ادخلي لا تموتين برد !!
تركها وهي تبكي بصمت .. حط يديه في جيبه ومشى عنها
في باله : معقولــة؟! معقولة كلام فرح صحيح ؟؟ أنا أحب جواهر؟!
في الزاوية الثانيه .. متخبية وراء العمود ..فتحت الكاميرا .. ابتسمت برضا ... صور يوسف وفرح!
.....................................
" الصبـــآح .. تحديدا عند البنات"
درعمت بسرعة طفت المكيف وشغلت الأنوار وصرخت : يلاااا يأهل الكهف اصحو من هالسبااات!
كانت حالتهم لله .. يُرثــى لها .. نص نايمات على الكنب ونص على الأرض ومتغطيات بعباياتهم
جوري تغطي عينها بيدها ..وبصوت كله نوم : يمه وش ذا الهجوم باللهِ؟!
شوق تغطي نفسها كاامل بالعباية بإنزعاج : وووووجع!
شيخة طلعت عينها من مكانها : توووجعك ان شاء الله ! كذا تقولين لزوجة عمك وجع هاه؟
شوق شالت العباة عنها بسرعه بتلعثم : هاه .. شيـ..شيوخ!
شيخة تسوي لها مالت : شيوخ بعينك يالي ماتستحي ! قوووومو انتو اصحو افطرو لا تفقعون مرارتي عاد مافي الا انا متحملتنكم وصابرة عليكم واجي واطمن عليكم !
الي جلست وهي منزعجة والي أصلا كانت جالسه والي راسها صخرة ماتحركت ابد
شيخة توجهت لغرام : عاد ذي وش يصحيها استغفر الله لازم احد يوقف فوق راسها يصيحها او ماتجلس ليوم الدين استغفر الله
كانت نايمة على الأرض رجل رافعتها على الكنبة ورجل على الأرض العباية مغطية صدرها وجزء من رجلها الي على الأرض بس .. شعرها منكوش وريقها ينزل من فمها حالتها حالة تقولون تصارع موب نايمة!
شيخة :يووووه فشلتينا وش ذا الشكل ! غراااام غرااااموه يامال فقع المرارة قوووومي ! اصحي من نومك يابنت !
غرام ولا كأن احد يناديها على نفس الحالة..
شيخة تضرب غرام بقوة عشان تصحى : غراااااام قومي يابنتي اصحي !! غرااااموووه قووومي لا تجننيني قومي اصحي وراك صلاة وراك دنيا قوووومي يابنت ! غراااااااام غراااام "بح صوتها وهي تنادي ولا من سميع "
جميلة تضحك : ههههه يمه اتركيها بتفقع كبدك وهي ماصحت !
شيخة اتنرفزت وتركتها : اففف ياربي ليش بليتني ببنت مثلها تعبتني والله تعبتني أقوم اصحي فاتن ام الراس الصخرة الثانيه!
توجهت لفاتن .... ملاك تذكرت فجأة ان فاتن نامت بثوب فارس
صرخت : لااااا !
شيخة لفت لها بصدمة : وش فيك تصارخين كذا يالمهبولة!
ملاك ترقع :لو تصحينها اللحين بتصير لناا نار خليها شوي وانا اصحيها !
شيخة : ليش يعني انا اصحيها وانتو قومو صلو وافطرو
ملاك : لا لا لا مثل مانصحي غرام بنصحيها !
شيخة توجهت للباب:يلا احسن بدل مااهدر طاقتي على شي مامنه فايدة واخر شي م اراح تصحى انتم صحوها !
طلعت ...
ناظرتها رانيا نظرة ان نفذنا منها .. هزت راسها بالإيجاب
ملاك صرخت : يلاااا يابنات نجلس فاتن وغرام !!
ملاك وقفت وراحت عند راس فاتن : فاتن اصحي من النوم يلا !
لا رد .. ملاك صرخت : فاااااااااااااااتن اصحي من النوووووم !! فااااااتن فااااااتن فااااااتن فااااااتن فااااااتن فااااااتن فااااااتن ..جلست تردد اسمها لين مابح صوتها وهي ماصحيت
رانيا : نجلس غرامو اول بعدين فاتنو؟
ملاك هزت راسها بلا : هاذيك اعظم من ذي خلنا نخلص من ذي ونروح للمسألة المعقدة بعدين
شوق وسارة وقفو عند فاتن وجلسو يضربونها : فااااااااتن اصحييييييييي!
فاتن صحت مرعوبة : بسم الله !!! وش فيكم واقفين عندي مثل العسكر!
البنات سوو حركة كفك بوناااسه يحسون بإنجاز ..
البنات : يلا اللحين غرام
ملاك همست لفاتن : اذا قامو البنات يجيبون الفطور قومي عشان لايشوفونك بالفستان ااااقصد الثوب !
فاتن بدون تعابير هزت راسها بأوك .. وانسدحت
وقفو عند غرام كأنهم يخططون على جريمة ...
شوق : يلا بنات واحد اثنين ثلاثة!
البنات بصوت عالي:غراااااااااااااااااا� �ااااااااااام !
انزعجت لفت راسها وحطت يديها على اذنيها وهي نايمة ...
رانيا بالغلط داست على شنطة سارة وطلع صوت كسر!
سارة بصراخ رمت المخدة على رانيا : رااااانيا يااااحمااارة شنطتي!!
المخدة لحسن حظ رانيا ماجات عليها ..بس لسوء حظ غرام جات على وجهها !
تطاير شعرها من قوة الضربة .. توقعوها ماصحت .. مدت يدها بتثاقل وشالت عنها المخدة ... بوجه مخيس حده وأسلوب زفت وبصوت مبحوح بقوة : يا كلبات وش جالسين تسوون فيني!
البنات بلعو ريقهم لما شافو شكلها وكلامها وصوتها مثل السفاحين ..
غرام رمت عليهم المخدة بسرعة وبصراخ بصوتها المبحوح : مزعجاااااااااااات!
جات المخدة عليهم وبسرعة بعدو عن المكان برركض وصرااخ ...
جواهرتنقز من الوناسه : هههههههه ماجات علينا ماجات هههههه
غرام تبتسم ابتسامة مخيسة : احلفي والله ؟! لا بالله اترجاك تحلفين ...
ورمت عليها المخدة بقوووة ... ضربت راس جواهر ... جواهر بنرفزة : يا ثوووووورة!!!
اخذت المخدة ورمتها على غرام بس انصابت فيها جميلة ..
جميلة وهي تبعد عنها المخدة صرخت : هيه هيه انا وش دخلني مالت عليكم !!
ورمتها على جواهر الي كانت وراها سارة تشوف وش الي انكسر داخل شنطتها .. بعدت جواهر عن مكانها بسرعة وانصابت فيها سااارة
سااارة بقهر: اااااااي يامال الوجع اكرهكم يامتوحشاااات !! اووريكم يا سمكات ياخايسات يامعفنات ..
رمت بقوة المخدة على جميلة .. انصابت فيها فااتن !
سارة حطت يدها على فمها بخوف ..
رمت المخدة من وجهها وناظرتها بعيونها النمرية بقهر .. لا اراديا اخذت المخدة ووقفت بسرعة تضربها فيها :ياااحيوانه!
على هالموقف دخلت هديل "زوجة جسار أم رانيا"
هديل بصدمة من المكان الي معفوس فوق تحت ومن لبس فاتن : وش هذا !!
فاتن انتبهت انها تناظرها ناظرت لبسها وفي داخلها " لا!
جواهربعفوية وبأسلوب توقع : كانو يستهبلون ان فاتن ولد واحنا نايمات!
غرام ناظرت جواهر وبداخلها تشكرها على التسليك الغير مقصود هوع
هديل هزت راسها : أها بس عاد لدرجة انها تلبس ثوب ولد قوية يابنات .. ثوب مين هذا ؟
فاتن بلعت ريقها وش تقول يا مدام يامحترمة هذا ثوب ولدك العزيز فريس!
رانيا بتدخل : ثوب فارس!
هديل رفعت حاجبها : يااسلااام!
رانيا تكذب : مو مشكلة انا استأذنت منه !
هديل هزت راسها ان ولو الحركة مو عدله : يلا تعدلو عشان تفطرون ..وجوري تعالي اخذي هالظرف امك عطتني إياه وقالت لي اعطيك إياه وانه من فيصل
ناظرتها بإستغراب وفضول:شكرا يا خالة
وسكرت الباب...
فاتن طيرت بوسه لجواهر في الهواء: احبك واحب عفويتك الي تنقذ!
جواهر موب فاهمة بتناحة:هاه؟!
فتحت الظرف .. كان رقم جديد ... ومعه نوتة صفراء .. مكتوبة بخط تعرفه
" جوري .. بصراحة انا مشغول بالي وقلبي ناغزني عليك مدري ليش..جلست اليوم الصباح واشتريت لك هالرقم .. عشان لايزعجك الخبل ذاك مرة ثانية .. ياليت مرة ثانيه بعيد الشر أي مشكلة تواجهك تخبريني .. سندك :فيصل"
تنهدت بعمق ... احبك اخوي فصييل .. مدري ليش ماتوجهت لك اول مابدأت المشكلة .. وأخيرا راح ارتاح منك يافارس !
......................................
"عند الحريم"
شيخة بإزعاج : هيفاااء سكتي ولدك قسم بط لي اذني وازعج الناس معنا
ام فزاع بطيبة : لا عادي يا أم فيصل هو طفل والأطفال دايم كذا
في هالأثناء دخلت ملاك للحريم عشان تطر شاحن ..
ام فزاع بطيبة : بس تصدقين اذكر ولدي فزاع لما كان طفل كان غير كله يتبوسم وينام ماغير هالابتسامة شاقة حلقه وبس ما شاء الله عليه بس اذا بكى ويييييه ماتدري ليش يبكي
ملاك ابتسمت .. فزاع دائما مبتسم وشاق الحلق ومبسوط .. ما شاء الله يبني الفرح بيده مايستناه !
وهي تفكر وتتبوسم مثل المجنونة قبال الشاحن ...
شيخة بصوت عالي: ملاااك وش فيك واقفة قبال شاحني تتبوسمين له مثل الهبلة الي يشوفك يقول الشاحن يعترف لك بحبه !
ملاك تفشللللللت وسط ضحكات الحريم من حولها " الله يهديك ياخالة يعني لازم تتكلمين بلسانك الطويل ذا قدام الكل بصوت عالي! "
ام فزاع تضحك : ههههههه يا ام فيصل خلي البنت براحتها فشلتيها الله يهديك .. يا " ماما " وش فيك تبين الشاحن ؟
نبضت نبضة قوية في قلبها .. ماما ؟ كلمة من زماان ماقالتها ولا سمعت احد يقولها لها
هزت راسها بإيجاب وهي في عالم ثاني مع الكلمة ..
شيخة بتحرطم : اشحني اشحني ماغير تبوقين في هالشاحن حقي هالمسكين
ام فزاع : ماما ملاك اقدر اطلب منك شي؟
كلمتها خلتها تفز لها : آمري؟!
ام فزاع ابتسمت بطيبة وحنية : ما يآمر عليك عدو .. الله يخليك لأحبابك ويوسع صدرك ويحقق لك آمانيك اذا ماعليك كلافة يابنيتي تروحين للاسطبل تودين للخيول الماي والعلف مساكين خلص عنهم و...
شقت الحلق على دعاويها الي تشرح الصدر .. ضربت صدرها بيدها : ابــشــري!
ام فزاع وهي تقرب لها الاكل والماي للخيول : يالبى هالقلب الحنون والله ماكنت ابي اتعبك معي بس اتصل لولدي فزاع اتصل ولا يرد الله يكفيه من الشر وبيني وبينك يابنيتي فزاع شاري لي هالجوال الجديد ومتوهقة في هالبونتي ولا اعرف استخدم الوتسوب ولا كان كلمته فيه !
ملاك تكتم ضحكتها " ههههه اجل بونتي ياخاله جالكسي الله يصلحك ووتسوب" : لا ماعليه شر بإذن الله ولا يهمك ولا يضيق صدرك اللحين اوديهم
شيخة بلقافه كالعادة : وش بونتي ذا يا ام فزاع ؟
ملاك تغمز لشيخة ان ماتتكلم ..
شخية مستغربة: وش فيك تغمزين لي؟!
ملاك تنهدت : تكلمي تكلمي الله يهديك
ام فزاع ابتسمت : جوالي ..
شيخة فقعت ضحك : ههههههههههه الله يهديك يا مره هذا اسمه جالكسي وش بونتي هههههههه
استغربت ملاك من ردت فعل ام فزاع .. ضحكت : ههههه عادي غير كله مسمى المهم انه جوال
ملاك : يلا استئذن
حملت السطل الأول كان مالي بالأكل .. كان ثقيل بس كابرت عشان الكلام الي سمعته من ام فزاع
وصلت للاسطبل وحطته .. رجعت بدون ماتناظر الاسطبل
اخذت السطل الثاني الي مليان اكل ونفس الشي
اخذت السطل الي مالي ماي .. وصاير ثقيل بقوة .. تحمله بأقصى ماعندها ووجها احمر وعروق وجهها طافرة .. بس شكلها معاشرة فاتن قوتها!
تمشي بتثاقل وهي مسكرة عينها من كثر مالسطل ثقيل .. فجأة رمت السطل بدون قصد من كثر ماهو ثقيل .. سمعت شهقة قوية!
رفعت راسها بصدمة .. كان فزاع واقف قبالها وملابسه التيشيرت الأخضر من بولو والشورت الأبيض ونظارته مليانين ماي وحتى شعره .. واقف يستوعب الي صارله
ملاك بفشلة وتوتر تقربت لفزاع : يووه يووه اسفة اسفة اسفة ..
وبالغلط شاتت السطل برجلها وضرب في رجل فزاع ..
فزاع وهو يمسك رجله ويصرخ بألم :آآآآآآآآآآآآآآآى
ملاك حطت يدها على فمها بخوف وصدمة ..
رفع عينه لها وهو قابض حواجبه وعين مسكرها وعين فاتحها وشاد على اسنانه : ملاك !
ملاك وهي تتقرب لرجله تدلكها من التوتر موب عارفة وش تسوي : يوه والله اسفة اسفه ماكان قصدي ياربييي يا اني غبيـ..
صرخ بألم لأنها مسكت رجله بقوة : آآآآآآآآآآآآ بعدي بعدي الله يصلحك كل ماتحاولين تكحلينها تعمينها اوووف
ملاك وقفت بخوف وتوتر وهبال: اسفة اسفة اسفة اسفة والله ماكان قصدي اسفة ياااربي اسفه اسفه جد انا غبية ياربي وش ذا المخ الا عندي اسفـ...
صرخ فيها فزاع: خلاااااااص!
نقزت مصدومة .. تصنمت في مكانها
تنهد بقوة : آسف ملاك ماكان قصدي بس انزعجت من كثر ماتقولين اسفة ما احب احد يتأسف لي .. بعدين انتي كيف تحملين هالاشياء ثقال عليك انت بنت !
ملاك : اسفـ.. احم احممممم.. امك قالت لي لانها تتصل لك على موبايلك بس انت ماترد!
فزاع طلعت عينه من مكانها : كنت في الحمام اتروش فأكيد مارديت الله يصلحها عاد كان اتصلت لأبوي شي او فاتن قوية مادورت الا انت " مسكينة البنت صارت ولد هووع " يالله النظافة زينة اتروشت واللحين انت تروشيني للمرة الثانيه!
ملاك نزلت راسها بخجل ..
ومشت تكمل حمل اثقالها .. ركض وراها
حملت السطل الثاني بتثاقل .. سحبه من عندها : هيه هيه مايحتاج تحملين هالاشياء تضرك ! انت بنت تحطين رجل على رجل وترتاحين عندنا لاتحملين شي ولا تثقلين على نفسك ! ثانيا اذا حملتي هالاثقال راح تتربى لك عضلات !
حمل ال4 سطول مرة وحدة ثنين في يد وثنين في يد ثانية ..
ناظرته وهي فاتحة فمها على الآخر .. كسر بخاطرها بللته وكل ملابسه لازقة في جسمه وشعره يقطر ماي ونظارته توسخت وفوق ذلك يحمل عنها هالاثقال .. أقدر أقول للمرة الالف انه شهم؟!
لحقته .. حطهم داخل الاسطبل ..
ملاك اول مرة تشوف الاسطبل بوناسة واندهاش : ياااااااي ! وش ذااااا ياحليلكم احس نفسي في مسابقة خيل !
فزاع التفت لها : حلوين صح ؟
ملاك تهز راسها بحماس : يجننووووون .. شف كيف اشكالهم احس بالشهامة لما اشوفهم مدري ليش
فزاع يناظرهم بسعادة : انا اعشق الخيول للنخااااع .. شفتي الخيل الأسود هذا ..
ملاك اشرت على واحد : مين هذا ؟
فزاع هز راسه : ايوووه هذا ... هذا اسمه الأدهم اسرع الخيول على الاطلاق " الخيل الي ركبته فاتن" هذا خيلي وانا فارسه .. اعشقه لدرجة اني اسميه صديقي الادهم .. بصراحة قصته قصة انا طبعا من انا صغير وعندنا مزرعة وابوي يعتني بخيول وغنم واشياء مثل كذا بس في هالمزرعة بس عندنا خيول وحمام وش زي كذا .. الزبدة وانا صغير قال لي ابوي انه جاب خيل جديد وكذاوطبعا محسوبك مجنون خيول جيت ركض اشوفه .. كان حزيين لا تسأليني كيف عرفت من معاشرة الخيول .. ابوي قال ليي ان المزرعة الي كان فيها احترقت ومات فيها ابوه .. بعدها تعلقت فيه مدري ليش مع انه كان مايعطيني وجه ومن اركب عليه يطيحي وما الى ذلك .. بس حسيت شي فيه يشدني.. بعد مرور أسبوع الا ابوي جايب ذاك الطبيب البيطري طبعا ابوي رحيم جدا يعني لو يشوف نملة مايقتلها يعتني بالحيوانات بشدة .. الزبدة ان الطبيب كان جاي عشان ام الادهم .. اكتشف ان الحريق ترك لها اثر في جسمها ضررها وهم مايدرون ..كانت تعبانه بقوة والادهم يتقرب جنبها ومايتركها ...ماتت وثار الخيل هنا حسيت انه انسان ..مدري حسيت ان له مشاعر .. هاج وركض في المزرعة .. عاد انا رحت سويت نفسي الفارس النبيل واركض وراه واضربه بحجرة ويوقف واركب عليه ويهج فيني بسرعة لدرجة ماتتصورينها اذكر يومها طيحني وانضريت كثير لدرجة اني نمت في المشفى ..بعدها صار يثير اهتمامي اكثر واكثر وكل مااركب عليه يطيحني ويضرني .. لين ماتعود عليي وصار خيلي .. سالفة مملة وطويلة ادري بس لازم كل ما اشوف شخص يشوف خيلي لازم أقوله هالكلام
ملاك بحسره: يوووه كسر بخاطري..عادي أأكله ؟
فزاع ابتسم :ايه عادي بس أخاف يهجم عليك تراه متعجرف ههههه
ملاك بإصرار:عادي عادي تعودت على المتعجرفين من رشيد هذا خيل غغير
اخذت جزرة وتقربت له ..بهبل عفوية: هلا هلا بالوسيييييم يووو يؤبرني هالأسود السريع لبى قلبك بسسس .. خذ طال عمرك
فزاع يناظرها بذهول ويضحك :ههههههه من جدك انتي تتكلمين معه كذا!!!ههههه
قربت الجزرة من فمه صهل في وجهها بقوة .. انفجعت ورجعت نفسها لورا بسرعة .. اصتدمت في حضن فزاع
فرق الطول هو العملاق وهي القزمة .. بعدو عن بعض بسرعة:احمم احمم احم
وجهه صاااار احمر استحى من الموقف .. تقرب للأدهم بتوتر:احم صديقي الادهم اعرفك عليها هاذي ملاك ..
صهل وحرك ارجله بقوووة ...
فزاع اخترع : ول شكله كرهك ملاك !
ملاك :افااا يا أدهوم يا قميل انت ياوسيم يالمتعجرف يالمغرور كذا تكرهنـ .. رن جوالها رفعته :الو هلا
شوق بعصبية :الى متى يا آنسة ملاك الناس فطرو وتزوجو وحملو وخلفو وانت بعدك مارجعتي !!
ملاك بلعت ريقها : الخيل!
شوق: ادري قالولي عن ام فزاع ارسلتك للاسطبل بس تراك طولتي كثييير!
ملاك:طيب طيب اللحين جاية يالمحكمة!
وسكرت..
فزاع ابتسم وهو مركز نظره على الادهم : المحكمة!
ملاك بتناحة : هاه ؟!
فزاع تنهد :هانت هانت كم سنة واتخرج !
ملاك بفضول رفعت حاجبها : وش تقصد ؟
فزاع لف وجهه لها وابتسم : أنا أدرس محاماة !
ملاك بصدمة ثلاثية الابعاد : تمززززززززح؟!!
فزاع ضحك بإستغراب: هههههههههههه لا والله!
ملاك تمسك راسها مو مصدقة : احلف انك بتصير محامي؟!
فزاع : ههههه ان شاء الله اذا اتخرجت !!
ملاك تأشر عليه بدون تصديق: انت انت ... انت .. فزاع انت محامي!
فزاع رفع حاجبه وضحك : ههههه يابنت وشفيك مستغربة؟
ملاك منصدمة : لأن مايلبق عليك!
فزاع رافع حاجبه : ليش يعني؟
ملاك : مدري احسك مرح وكذا وطيوب مايناسبك المحاماة
فزاع : أتوقع شفتي الوجه الشرير حقي!
ملاك فهت للحظة بعدين تذكرت موقفها مع الشباب الثلاثة : آآه جون سينا !
فزاع : ههههههههههه انفع محامي ولا ؟
ملاك ابتسمت وهزت كتفها : مدري اذا مسكت اول قضية لك قول لي وبشوف .. عن اذنك
ومشت .. نزل راسه وابتسم .. حبوبة هالبنت .. الله يحميها!
................................
عند الشباب..الظهر
يمشي بإتجاه فيصل الي جالس لوحده وباله موب معه ..طربان : يا صاحبي وش فيك جالس لحالك...ليش انت متغير ومشغول بالك..صارحني قاسمني عنائك وهمومك...ما أطيق اشوفك متعب القلب حااالك
ابتسم فيصل قال في باله " اااه يا مشعل لو اقدر افضفض لك بس وش أقول بنت عمك الي معجب فيها انا مجبور فيها؟"رد عليه:
انا ضايق وبالي ضايق وجوي ضايق ضييييقـ(ن) كاااايد ..نفسي ملت وروحي ولت وعيني هلت دمعـ(ن) واااايد
مشعل ابتسم وجلس بجنبه : جد وش فيك افتح لي صدرك ..
فيصل سند راسه على الجدار بضيق وألم :فوق راسي هموم الدنيا ومافيها ... أمي تبي تجبرني على الزواج
مشعل رفع حاجبه : مو جديدة!
فيصل على نفس الحالة: أدري .. بس هالمرة تبي تجبرني صدق رضيت أو أبيت
مشعل : ماااشااااء الله وين جالسين احنا وابوك وش موقفه؟
فيصل هز كتفه : مدري .. الزبدة ان جوري بعد
مشعل رفع حاجبه : وش فيها ؟
فيصل تنهد : واحد كلب مزعجها من زمان المشكلة انها خايفة منه
مشعل:بسيطة .. تشتري لها رقم جديد وانتهت المشكلة!
فيصل : سويت كذا
مشعل حط يده على كتف فيصل : شوف انت شاور نفسك زين اذا جد ماتبي تزوج او تبي .. واذا تبي توكل وتزوجها .. واذا ماتبي تناقش مع امك وخلها تفهم انك بتزوج بعدين ومو وقته اللحين
قام عنه .. وفيصل يضحك بإستهزاء على نفسه : ههههه لو تدري يامشعل ... ياصديقي ... جواهر الي تبيها أمي لي!
............................................
في الحديقة .. واقفة تناظر الورود بأشكالها وألوانها .. جد المزرعة معتنين فيهااا حييييييل .. الورود الوانها تهبل اصفر وورودي واحممر وبنفسجي ممزوجين مع بعض مشكلين شي خيااال .. بإبتسامة تناظرهم وتتأمل فيهم
يتأملها من بعيد..ايه هاذي جواهر! . . كعادتها واقفة عند الورود وتناظر فيهم تتأملهم وتتبوسم .. عشقها شي اسمه ورود!
تقرب لها من وراها بخطوات خفيفة وبهدوء.. فزعها: بووووووووووووووووو!!!!!
لفت له وهي حاطة يدها على قلبها من الخرعة : بـــــســـم الله!!! وووووووجع خرعتني !
قطف وردة حمراء من الورود وبإستهزاء: نه نه نه ياحرااااام بسم الله عليك ان شاء الله في عدوينك يالدوبه
ومدها لها ببإبتسامة : لك عشانك تحبين الورد مايحتاج تناظرينهم وتتبوسمين مدي هاليد الخشنة واقطفي لك هالورد !
جواهر وعيونها مفتوحة على الاخر: وش سووويت!! ليش قطفتها ماتدري انها ممتلكات خاصة!؟
مشعل ناظرها بإستهزاء: أي ممتلكات خاصة مع وجهك ترا كلها وردة ..خذيها يلاا بس!
جواهر بقهر تخصرت : لا والله! كيفي مابيهاا!
حطها داخل حجابها وضحك : ههههههههههه شوفي شكلك تفقعين ضحك كأنك من الباكستانيات الكاشخات هههههه!
جواهر بقهر :هه هه هه ياربي ما اقدر على الظرافة تقطر منك خفة الدم !
مشعل غمزلها : اعجبك موو؟!! الزبدة والله تشبهين الباكستانيات خلاص وش رايك تصيرين خدامتنا الباكستانية ؟
جواهر تجاريه : اييه ايه ايه وبعدين اقولك بابا مشأل ايش تبقى فتور ايش تبقى قداء ايش تبقى أشاء .. تبقى مسح ندف شيل حط رتب ..
"الترجمة: بابا مشعل ايش تبغى فطور غداء عشاء.. تبغى مسح نظف شيل حط رتب"
مشعل بإنقراف: مالت عليك جد باكستانية تتكلمين مثل الشغالات عدل!
جواهر تكمل ترمش بقوة :بعدين اقولك .. باابا مشأل صير زوج مال أنا وسافر باكستان انت صير راجو وانا ميري صير انا شقالة صير انت سواق أشان هياة في باكستان واااجد صؤوب مافي زي هينا سؤودية راهة مافي شقل
"الترجمة : بابا مشعل صير زوجي ونسافر باكستان انت تصير راجو وانا اصير ميري انا شغالة وانت سواق عشان حياة في باكستان واجد صعبة..مافي زي حياة هنا سعودية راحة مافي شغل"
مشعل يناظرها وفاتح فمه على الآخر :متأكدة انك بنت عمي موب شغالتنا ؟
جواهر ضحكت من قلب على شكله :هههههههههههههههههههههههه� �ههههه
مشعل في باله " يالبى هالضحكـ .. نعم! لا وش جالس أقول انا!" بعكس الي داخله بأسلوب زفت: يلعن هالضحكة المخيسة ! انقلعي داخل بس واقفة لي تتأمل في هالورود مع هالشمس! جد حمارة القايلة!
جواهر فتحت عينها على الآخر وشهقت : أناااحمارة القايلة يامشعلوه ؟!!!! من جمال ضحكتك ماغير تطلع لي ذي صفة الاسنان الصفراء مع امطار غزيرة تخرج من فمك !
مشعل جته الضحكة بس كتمها بأسلوب زفت: شف ذي! أقول لها انقلعي داخل لحد الآن واقفة قدامي! ماعليك شره ماتفهمين عربي باكستانية!
جواهر فار دمها من القهر .. ناظرته نظرة ليزرية ومشت وهي تطق برجلها بقوة من العصبية
دخلت للبنات وهي منقهرة حدها ...
فجأة عم الهدوء المكان .. الكل يناظرها بإستغراب
جواهر بعصبية :شفيكم ؟!
شوق تأشر على راسها بتناحة ... جواهر بعصبية تمسك راسها تتحسسه .. الوردة الي حطها مشعل! تفشلت وانقهرت في نفس الوقت
رانيا ماسكة بطنها وتضحك : هههههههههههههههه جوج ههههههه طالعة مثل الباكستانيات هههههه
هنا جواهر تذكرت كلام مشعل الي يغث وفار دمها واتفجرت عروقها من العصبية صارت ماتشوف قدامها الا نار وتهجم على رانيا بالمخدة تبي تكوفخها ..
رانيا تهرب من جواهر وتركض وتدووس على البنات المهم ماتنضرب من قبل الثور الهايج الي يبي يضربها : يا ماما هدي انت يالحب روقي وشفي الحلو زعلان ها..
قاطعتها وهي ترمي المخدة عليها .. نزلت رانيا راسها بسرعة وماصابتها جواهر .. فقعت رانيا ضحك : ههههههههههههههههه ماصبتيني ياباكسـ.. " انتبهت لنفسها وحطت يدها على فمها تسكت نفسها"
جواهر انقهرت ازيد وتركض وراها تبي تموتها .. ورانيا من الهبل الزايد طلعت من مكان الحريم بكبره للمزرعة بدون عباة ..
وقفت وحيلها منهد من كثر الركض ..لفت وراها تتفقد الوضع ضحكت بإنجاز وضحكة خبث ونذالة في نفس الوقت .. مشت على القدام وهي تناظر وراء ..
رانيا تمسك قبعتها لا تطيح اصتدمت : آآآآآآي وجع!
بدون ماينزل عينه ولا شي بالعكس يخز فيها : اسف ياقمر ماكان قصدي روني !
رانيا وهي ماسكة قبعتها وتناظر فيه بتناحة : روني ! قمر!
فجأة تذكرت انها بدون عباءة وتبي تطلق رجلها وتهرب للمكان الحريم .. مسكها بسرعة لناحيته
رانيا بدهشة ممزوجة بخوف : هيه فهد اتركني ماتشوفني بدون عباءة!
غمز لها وبصوت زفت ومغازلجي ومقزز: وهذا المطلوب ! خليني اشبع منك آآآه وش ذا الفم الخطير الي..
دفت صدره بقوة عنها ..وبإشمئزاز: الله يقرفك!! وش هالنخوة الي فيك اقولك بدون عباءة تتغزل فيني !
مسكها من يديها مرة ثانيه : روني وش رايك نكون علاقة مع سوا تكلميني وكذا!
رانيا بإشمئزاز ونرفزة : يااااسلااام! لا ماحزرت ولا فزرت ياولد بدور .. تبي علاقة الله يخلي الزواج .. بس عاد حتى لو تقدمت لي تحلم أوافق .. اخس عليك وين المرجلة!
فهد وهو يتفحصها بنظره .. حست بقشعريرة وش ذا الحيوان الي قدامها .. فهد بصوت لهوف: تؤمنين بالحب من أول نظرة ؟ أنا أحبك !
رانيا تناظره من فوق لتحت وتفك نفسها منه : لا طبعا ! الحب من أول نظرة يعني انك تحب شكلها جسمها مو تحب شخصيتها ! هذا مايعتبر حب ! بعد عني ياغبي !
فهد بكل وقاحة : طيب انا احب شكلك وجسمك !
فجأة بعدت عنه بقوة وطاحت من عليها القبعة ..
بصوت عاااالي يسمعه الي في آخر الدنيا وبعصبية : يا أني اللحين افلقع لك هالوجه المسود حقك ذا يالتبن ..
مثل المجنون جلس يضربه بكل ماعنده من قوة .. لطخ راسه توطى في بطنه .. صارت حال فهد لا تحسد عليها فمه وانفه ينزفون دم ومبكس وحالته لله ..
رانيا طبعا بسرعه استغلت الموقف وهربت ..
يتبع~
|