الجزء الواحد والعشرون
يوم السبت
في مدرسة العيال..
سليمان:تروك دريت باللي صار..
تركي: لا ..وش صار..
سليمان: ما عندك خبر ان فيصل خطب..
تركي: مشا الله خطب!!
سليمان حب يلعب بأعصابه:بس يا تركي انت ما تدري من اللي خطبها صح..باين عليك..
تركي خاف:لا ...مين...بسرعه تكلم؟؟
سليمان:مثل ما انت عارف ان اهلها اكيد راح يوافقون عليه وانه هو اولى من الغريب وما راح يردونه لو أيش..وخصوصا ولاحظ خصوصا ان فيصل والنعم فيه ما ينعاف..
تركي بعصبيه: تراك حرقت اعصابي..
سليمان بكل برود: طفها.
تركي وصلت معه ومسك سليمان من ثوبه: بتتكلم ولا شلون..
سليمان: خلاص خلاص بتكلم بس فكني..
تركي ترك سليمان: أنطق بسرعه..
سليمان: لهدرجه تخلي بنت تفرق بينا..بصراحه ما توقعت اني رخيص عندك لهدرجه..
تركي حس ان عيونه بتطلع منها نار:سليمان لا تخلي اليوم اخر يوم بحياتك..
سليمان: يعني من بتكون واضحه..فيصل كان واضح عليه انه يحب فجر..
تركي هدى وحس انه خلااااص ارتاح: فجر!!
سليمان: ايه ما لاحظت فيصل كيف يطالع فجر وفجر ساحبه عليه<<مسكين هالفيصل كل الناس حسوا الا هي..
تركي: الا صادق ..والله يستاهل فصول..
سليمان: فصول..هو اصغر عيالك..
شوي واكتملت الشله..
نواف: هلا بالشباب وينكم تعبنا وانا ندور عليكم..
تركي: يا اخي احس ان في مخك وش ..يسأل وينكم واحنا قدامه..
سعود: تركي يا الله صباح خير وش فيك علينا.
تركي: كيفي كارهكم ..ما اشتهي اصبح بوجيهكم..والله حاله..
سليمان: تروك وش فيك عيهم ..صح انهم ثقلين دم وما ينبلعون بس عادي اضغط على نفسك..
نواف: سعود ما تحس ان تهزئنا كثير..
سعود: الا ملاحظ ..خلنا نمشي بكرامتنا احسن..
تركي: اوقل اقعدوا بلا دلع ..نمزح والله نمزح..
نواف: اهم شي انك داري ان زعلنا لا يطاق..
تركي: والله اللي اعرفه ان وجهك لا يطاق قم قم لا بارك الله فيك..
سليمان: تركي تصدق ذكرتني بالشياب ايام الشاليه..
تركي: والله صدق ايام بصراحه شي..
نواف: والله من النذاله رحتوا ولا اخذتونا معاكم..
سعود: صدق من جد ليش ما اخذتونا معاكم..
سليمان: انا والله صديقي مشاري عازمني..
تركي: والله انا اختي عازمتها صديقتها اللي هي اخت صديقي مشاري اللي هي اخت هذيك اللي جات في المدرسه..
سليمان دف تركي دفه لما بغى يطيح منها بس مسكه نواف..
سعود: الحين انتوا راحيين مع اهل البنت..
نواف: مع ذيك المزيونه ولا قلتوا لنا..
سليمان من حقده على تركي لانه قالهم قام وطا رجله ودفه وهو واطي رجله عشان اذا طاح يعوره ظهره بس تركي طلع ذكي وتمسك فيه..
سليمان وهو معصب: وش نقول لكم تعالوا معنا صعبه..
تركي: خلاص حبايبي المره الثانيه..
سعود: صح يعني اخت البنت تطلع صديقة اختك..
نواف: ايه حتى اختها مزيووووونه..
تركي طلع له قرون..مسكهم من رقبتهم ودفهم: ممكن تمشون وانتوا ساكتين..
سليمان ميت ضحك: احسن تستاهل..شف شف يتكلمون عن حرمتك وانت ساكت.ازواج اخر زمن..
تركي مشى عنهم وراح..
نواف: وش فيه هذا..
سعود: ما عليك منه تراه قاضي ومنتهي..
سليمان: بس لو قعد هذا القاضي كان ذبحكم..
نواف: ليش ما سوينا له شي..
سليمان: امشوا امشوا ترى علينا فيزيا النشبه..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&&&&&&&&&&&&&&&&&&&&&&&&&&&&&&
مرت الايام بسرعه وما بقى على الاختبارات الا اسبوعين..اللي هي اسبوعين المراجعه..
رغد والهونف وتركي وسليمان كلهم غايبين اسبوعين عشان الاختبارات..
اما ريم فهي فالتها يوم تروح المدرسه ويوم تغيب ولا همها لا مذاكره ولا غيره لانها تمشي تحت قوانين اللي طلعتها العنود فا ما يحتاج تعب عمرها..
العنود نفس الحاله طول الايام غايبه الا اذا صديقاتها اعزموها عزيمه على المدرسه راحت وبالقوه بعد..
عبير في الجامعه فا اختبارتها كل يومين في الاسبوع او يوم واحد..واهم شي عندها انها تخلص قبلهم وتقهرهم..
نوف وشجون شادين حيلهم شوي خايفين يرسبون وبعدها ما راح يكون فيه سفره..
فجر مسكينه مره تذاكر ومره تفكر ومحتاره وتحس ودها تحول انتساب (منازل)بس نوف قالت لها ما يحتاج ياما بنات درسوا وحملوا وهم يدرسون وما حولوا انتساب واقتنعت بالفكره وصارت تذاكر على اساس تنجح لو بدرجه وحده..
العيال اللي بالجامعه وليد وطلال ومشاري فالينها على الاخر لانهم عارفين انهم راح يحملون المواد عشان دكاترتهم حاقدين عليهم ومستحيل ينجحونهم..
مشعل ما ننساه كان يذاكر والمسكين شاد حيله عشان بلاي ستيشن3..تجي لين عنده..مشعل ما فهمت هذا ويشرحه لها تروح..بعدين ترجع مره ثانيه وهكذا ..لما عصب منها وراح لامه قالها تدرسها بس بدون ماتقول لها انه هو اللي قايله وراحت ام مشاري وخذت لين ودرستها وصات فاهمه بس كذا تبي مشعل..
وخلصت الاسبوعين سريعه على ناس وبطيئه على ناس ودخلوا جو الاختبارات وكان بكره اول يوم..
ريم فكرت انه ترسل لسيلمان مسج..بس كانت متردده..واتوكلت على الله وارسلت له..
اهلين سليمان..
ا نشا الله شاد حيلك عشان تجيب نسبه ترفع راس امك فيها وراسنا<<تقصد نفسها..
واهم شي لا تضغط على عمرك ونام كويس عشان تعرف تحل زين وسم بالله قبل كل شي..
رورو..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
سليمان وصله المسج وقراه بس ما صدق عمره قراه مره مرتين وثلاث واربع ويقرى الاسم رورو ..طار من الفرحه وقعد ينطط وينطط ودخل عليه اخوه محمد..
محمد: اقول سلمي
سليمان فرحان ويده فيها الموبايل وينطط وعايش الجو..
محمد: لالا الولد اثرت عليه ثالث والمعادلات..
وقعد يطالعه وهومطير عيونه اول مره يشوف واحد من الخوف فرحان..
التفت عليه سليمان وشافه انصدم وتفشل..
سليمان: محمد انت هنا..؟؟؟؟؟
محمد: الحمدلله والشكر وش فيك..سليمان كم هذا"ورفع له اصبعين السبابه"
سليمان: تستهبل 2..
محمد: اشوا ما طارت المعلومات..
سليمان: عصب: وش تبي الحين؟؟
محمد: كنت جاي اتطمن عليك لكن الحين تأكدت ان عقلك ما عاد نقدر نلحق عليه لانه طار....
سليمان: اقول ما ودك تنقلع برى..
محمد: بنقلع بس بسألك سؤال..
سليمان: اخلص..
محمد: وش اللي فرحك..نجحت قبل لا تختبر..
سليمان نسى نفسه: شي احسن من النجاح..
محمد حس ان اخوه بيخق عنده كل شي: وشو يا قلبي اللي احسن من النجاح
..
سليمان: اللي احسن من النجاح ان مسج يجيك من رو..........."وانتبه لعمره" انت للحين ما طلعت..
محمد: من هي؟؟خويتك قل قل انك تكلم بنات ومسوي نفسك عاقل..
سليمان يصرف: اصلا كنت اقول رويشد..
محمد يستهبل: صح صح رويشد ذاك اللي..عرفته عرفته..
سليمان: ما دامك عرفتاه اطلع برى..
محمد: بس شكل رويشدك شي..شكله عذاااب..
سليمان دف محمد وطلعه برى ورجع يقرى المسج..وقرر يرسل لها..
معزتك عندي ترى مالها نوع..
ومكانتك بالقلب ماحد لقاها..
وغلاك بالقلب صار مزوروع..
حتى المشاعر ترجمتلك غلاها..
وانا وقلبي والاحاسيس له طوع..
والروح لو راحت من اجلك فداها..
تصدقين رورو مسجك هذا رفع من معنوياتي وانشا الله اجيب نسبه حلوه لخاطر عيونك وانتي كمان شدي حيلك...سلوم على قولتك..
ريم وصلها مسج سليمان وفرحت فيه فرح مو طبيعي بعكس الاول..لان الاول ما كانت تدري انه يحبها لكن الحين الوضع تغير وغير هذا كله عرفت سليمان زين بالفتره اللي راحت انه مو راعي حركات..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
يوم السبت
كان رعب على كل طالب وطالبه ..نشوفهم واحد واحد..
رغد كانت رايحه جايه ..جايه رايحه..
ريم: رغد اقعدي في مكان ترى راسي عورني..خليني اذاكر..
رغد وهي تقرى المعوذات عشان تهدى:خايفه والله خايفه..
دخلت ام مشاري: هاه خلصتوا عشان السايق ينطركم برى..
رغد: يمه ما راح اختبر خلاص هونت..
ام مشاري حست في بنتها: يمه وش خايفه منه تراها اسئلة مدرسات مو وزاره عشات تخافين وان شا الله بتكون سهله..
رغد تطمنت شوي: ا نشا الله..انشا الله..
ريم: انا نازله لا تتأخرين..
ونزلوا كلهم وركبوا السياره ورغد تدعي ان الله يذكرها بالمعلومات ويطمن قلبها..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
الهنوف كانت حايسه البيت فوق تحت: يمه وين الملزمه وقلمي الازرق ووين العبايه..
كان كل شي قدامها بس من الخوف ما تشوف شي.
ام تركي: شوفيهم قدامك..
الهنوف: ايه صح ما شفتها..طيب وين تركي...
تركي وهويراجع رياضيات: شوفيني قدامك يله بسرعه..
وركبت الهنوف مع تركي..
الهنوف: يا رب يا رب...خليني اتصل على رغد تطمن قلبي قبل الاختبار..
تركي سمع اسم رغد حس ان المعلومات طارت وما بقى الا رغد..
الهنوف: الوو.
رغد في السياره: هلا والله..
الهنوف: قلبي والله اني خايفه..
رغد: وانا اكثر منك بس انشا االله كل شي تمام..
ريم: بصراحه احس انكم تبالغون..
رغد: انتي اسكتي ماحد كلمك..
الهنوف: اسمعي خليك عند الباب اوكي..
رغد: اوكي..
تركي: هاه وش اخبارها..
الهنوف: بخير بس خايفه..
تركي: الله يهداها...وهذا وانتم ادبي وخايفيين اجل حنا وش نقول..
الهنوف: اول شي قل لا اله الا الله..ثاني شي محد ضربكم على ايديكم وقال لكم ادخلوا علمي..
تركي: المهم اذا طلعتي طمنيني عليكم..
الهنوف تستهبل: عليكم..مين..مافي الا انا مين الثاني..
تركي: بلا عباطه المهم لا تنسين..
الهوف: ابشر<<نست الاختبار..
تركي يبي يخوفها: ذاكري.. ذاكري بسرعه لا يفوتك الوقت يا غبيه..
الهنوف بروعه: صح صح "وقعدت تذاكر"
وتركي ميت ضحك:صدقت المخفه..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
عبير نايمه وما عندها شي.. والعنود لاهيه تحط كحل وجلوس وتزين شعرها وتعدل شكلها ..وتلبس اساور وبعدها الحلق..
دخات ام ماجد: هاه العنود ما خلصتي مراجعه ..
العنود: هاه مراجعه..الا الا خلصت من زمان..
ام ماجد: بسم الله عليك لا تعلمين احد اخاف يصكك بعين..
العنود: ابشري من عيوني ونزلت...وراحت للمدرسه وهي مستعده بكومه من البراشيم ملزقتها في اكمامها من داخل وفي اماكن اخرى..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
نوف وفجر كانوا خايفين بس كل وحده تهدي الثانيه..وفجر ما خلت من البراشيم طبعا من تعاليم ودروس العنود الراس المدبر..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
شجون مسكينه ما عندها احد فكانت شابكه السماعات وهي وصديقاتها تسألهم ويسألونها وتشرح لهم ويشرحون لها..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
سليمان يراجع وهوخايف بس يحس بفرحه من بعد مسج ريم.
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
دخل الكل قاعته وبدوا يحلون....الثلاثي ريم والعنود وفجر في البراشيم الحلول...والباقي يدورونها في عقولهم..
وخلصت الفتره الاولى رغد والهنوف مبسوطات كانت الاسئله مره سهله غير التغشيش من الطالبات.صح ان ما كان ودهم بس غصب عليهم..
سليمان و تركي حلّو وانشالله يكون صح لان العلمي كل واحد عنده اجابه فما كانوا يعرفون وش الصح من الغلط..
نوف وشجون حلّو وكان حلهم ما عليه..
ريم الحمدلله طلعت سليمه وكمان فجر بس العنود بغت تروح فيها وتنكشف بس ربي ستر وعدّت وطلعت مبسوطه لان كل البراشيم كانت نفس الاسئله<<خبره..
مشعل ومحمد كمان حلّوزين..
واخيرا لين اللي كانت تصيح في القاعه وتقول ابي مشعل..صح معلماتها بغوا يصفقونها بس سكتوا وعدوها وعلومها وطلعوها..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
عدى اول يوم في الاختبارات وتبعه الاسبوع الاول ونص الاسبوع الثاني وباقي ثلاث ايام..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
بيت ابو مشاري
ريم: بابا ما قلت انا وش نجاحتنا؟؟
ابو مشاري: اذا شفت درجات ترفع الراس لكم اللي تبون..
رغد: بابا نبي نسافر..
ريم: نبي نروح دبي..
مشعل: والله دبي حلوه..
مشاري:وانا من المؤيدين للموضوع..
ابو مشاري:مدام الكل راضي نسافر ليش لا ..بس بشرط الدرجات الزينه..
ريم ورغد يبسون راس ابوهم..:الله يخليك يبه ولا يحرمنا منك..
ريم :اجل بروح اقول للعنود..
رغد: بسم الله الرحمن الرحيم تو من شوي ابوي قايله على طول تروحين تقولين لهم ..اصبري دقيقه وحده مو ساعه دقيقه..
ريم: خلال بربرتك هاذي طافت دقيقه ..بروح اكلمها..
اتصلت ريم على العنود..
ريم: الووو..
وليد: الووو..
ريم: وانت مافي غيرك يرد عل التليفون..
وليد: بسم الله هذي انتي على بالي زينة البنات..
ريم: اخلص وين ريم..
وليد: وش تبين فيها ؟؟؟
ريم:اقول بسرعه عندي موضوع ضروري..
وليد: العنود تذاكر..
ريم: كذاب العنود تذاكر العب غيرها..
وليد: عاد انتي لا تفهميني غلط يعني تبرشم..
ريم: قل كذا اصدقك طيب روح نادها..
وليد: طيب قولي لي وش تبين فيها وبعدين اعطيك ايها..
ريم: يا لليل ما اطولك..وبعدين..
وليد: ولا قبلين مافي يعني مافي وش بتسوين..
الا العنود جايه:وليد من تكلم؟؟
وليد ارتبك: هذي ..هذي..
العنود: بنت..قاعد تكلم صديقاتي.....يمه ..يمه..يمه..
وليد : اسكتي اسكتي خلاص خلاص يا ام لسانين..
العنود: يمه..يمه..
وليد حط يده على فمها: اقولك اسكتي..
العنود توخر ايده: وووع وخر ايدك مالحه...
وخرها وليد: وجع يا طول لسانها ذا الدبى..
العنود: ترى بنادي امي..
وليد: اوووف اطلع احسن لي..
العنود: يكون احسن..
خذت العنود السماعه: الووو..
ريم: اهلين وينك..
العنود:قعدت احل مع وليد القضيه اللي بيني وبينه..
ريم: اخوك هذا لا عاد يرد على التليفون سامعه..
العنود: طيب وش اسوي فيه من يوم يشوف رقم بيتكم يحلف انه ما يرد الا هو..
ريم: المهم ما علينا منه ..عندي لك خبر بكنوز الدنيا..
العنود: وشو انخطبتي..
ريم: لا وش انخطب..
العنود: لا ذا الايام موضه..
ريم: عندي شي احسن من الخطبه..
العنود تحمست: قولي يله بسرعه.
ريم: بنسافر لدبي..
العنود: كذااااااااااااااااااااااا به..
ريم: والله تو ابوي من شوي قايله..
العنود: الله يبشرك بالخير..
ريم: بس شارط درجات زينه..
العنود: انشا الله درجاتنا زينه..
ريم: ان شالله بس اسمعي انشبي في ابوك لما يوافق سامعه..
العنود: اكيد مدام ابوك وافق ابوي مع ابوك..
ريم: اجل يله مع السلامه خليني اتصل على فجر..
العنود: اوكي باي.
سكرت ريم من العنود وبعدها قعدت تدق رقم بيت فجر..
رغد: من بتكلمين بعد..؟
ريم: ابكلم فجر ما يصير ما نقول لهم بعدين يزعلون..
رغد: والله من اللقافه انتي وياهم.
ريم: الووووو..
طلال: الووو
ريم في نفسها"وش في هالعيال متسلطين علي"
طلال: الووو..
ريم: هلا واالله كيفك طلال..
طلال: مين...ريم ..الحمد لله بخير وشلونكم..
ريم: الحمدلله..طلال ممكن فجر..
طلال: ليش في شي..
ريم: لا سلامتك بس ابيها شوي.
طلال: الحين فجر عروس ما يصلح تكلم أي احد..
ريم"لا صدق اليوم متسلطين علي":طلال ممكن فجر بس خمس دقايق..
طلال: طيب قولي لي وانا اقول لها..
ريم: يا اخي ما يصلح كلام بنات..
طلال: اها...طيب خليني افكر..
فجر: طلال من على التليفون..
طلال: هذي ريم تبيني في سالفه..
ريم: اه يا الكذاب نادها بسرعه..
فجر:يا نصبك ريم تبيك في سالفه اقول هات السماعه..
طلال: خذي جعل اذنيك تخفس..
فجر: الاذنين تفقع مو تخفس ..العيون تخفس يا الغبي..
طلال قعد جنب فجر عشان يسمع: كلمي كلمي وانتي ساكته..
ريم: الووو.
فجر: هلا والله معليش النشبه ما يخليني اكلم احد يقول عروس..
ريم: وليش العروس محكوم عليها بالاعدام..
فجر: ايه ما عليك منه امري وش بغيتي..
ريم: ايه عندي لك خبر يسوى فيصل زوجك كله..
فجر: مسكينه وش اللي يسوى فيصل..
ريم: بنسافر لدبي..
فجر: بس هذا اللي عندك اصلا انا ناويه اسافر عشان اتجهز من هناك..
ريم: صدق اجل وناااسه..
فجر: وخالي ابو ماجد بيرحون.
ريم: اكيد هم معنا..
فجر: حلو اجل بيطلع فله..
طلال قاطعهم: والله صدق فله..
فجر لفت عليه: انت هنا!!
طلال:لا هناك..
فجر: ريم خلاص مع السلامه..
ريم: مع السلامه..
فجر: ما تلاحظ نفسك انك منغص علي عيشتي حاشر نفسك في كل شي..
طلال: اختي واخاف عليها من نسمة الهوا..
فجر: أي واضح..اقوم اذاكر ابرك لي..
ريم سكرت من فجر وحطت السماعه وبعدها ذكرت شجون واخذت السماعه واتصلت عليها..
رغد: بعد من بقى ما علمتيه اشك ان الرياض كلها درت وانهم شوي يقولونه في الاخبار..
ريم:وانتي وش عليك اقول اسكتي رن..
ريم: الوو..
فيصل:هلا..
ريم"لا كملت":اهلين فيصل اخبارك..
فيصل: ريم هلا والله ..الحمدلله بخير وشلون خالتي..
ريم: الحمد لله كلنا بخير الا ممكن تعطيني شجون..
فيصل: شجون الحين مشغوله شوي..
ريم: طيب بس خمس دقايق..
فيصل: خمس دقايق!!!الا ما قلتي لي وش اخبار عمك وعمتك بخير..
ريم فهمت عليه: والله كلهم بخير ويسلمون عليك وذبحونا فيك..
فيصل انبسط: هههه ثواني وشجون عندك وكلميها ساعه اذا بغيتي..
ريم: هههه والله هالناس مصالح...
رغد: مين..
ريم: بعدين ..بعدين..الووو..
شجون: هلا واالله وغلا حيا الله هالصوت..
ريم: الله يحيك وش اخبارك..
شجون: الحمدلله بخير وش عندك متصله..
ريم: والله عندي خبر يسوى كريماتك كلها..
شجون: ما اظن ان في شي يسواها بس وشو..
ريم: ولا بدال هذي اللي عندك بتاخذين دبلهم..
شجون تحمست: ايه وشو..
ريم بنسافر لدبي..
شجون: احلفي ما اصدق...
ريم: والله ما اكذب تجهزي بس..
شجون: صدق طيب قلتي لعمك وعمتك..
ريم: ايوه اكيد..
شجون: اجل بيطلع وناسه..
ريم: المهم انشبي في امك..
شجون: ما يحتاج اذا امك بتروح امي رايحه رايحه.. وفيصل اذا عرف ان عمتك بيرحون طاير معنا..
ريم: اجل ما اطول عليك وسلمي لي على خالتي.
شجون: يوصل وسلمي على خالتي بعد..
ريم: يوصل مع السلامه...
شجون: مع السلامه..
فيصل: بيرحون لدبي..؟
شجون: انت هنا..ايه بنروح كلنا هناك..والله وناسه واقعد مع نوف فله..
فيصل: وفجر ليش ما تقعدين معها..
شجون: اقعد معها بس نوف نفس شخصيتي..
فيصل: اجل ربي رحمني ان زوجتي ماهي مثلك..
شجون: ايه بس انت حصل وحده مثلي..
ريم سكرت السماعه وقعدت تتذكر من بقى ما قالت له:اقول رغد..
رغد: خير؟ما خلصتي جولتك..
ريم: لا باقي..
رغد: ليه من بقى؟؟
ريم: باقي الهنوف ومها وهذولا اهم شي..
رغد: صادقه انا بدون صديقتي ما اعيش..
ريم حتى انا بدون مها ما اعيش...
رغد: عاد انتي كثري منها..
ريم: المهم بتكلمين الهنوف ولا انا اكلمها..
رغد: انتي اتصلي عليها واذا ردت عليك عطيني ايها..
ريم: طيب"واتصلت"
رغد: حافظه رقمهم..
ريم: اكيد عشان الضروره..
رغد: والله من اللقافه..
ريم:الووو..
تركي: هلا والله وغلا<<يحسبها رغد..
ريم: اهلين..
تركي عرف الصوت وقال من دون نفس:هلا..
ريم:" وش فيهم علي كلهم كأني ماكله حلالهم":لو سمحت ممكن الهنوف..
تركي: انا اعرف ان الهنوف صديقه رغد مو صديقتك.
ريم: انا واختي واحد بسرعه نادها..
تركي: وليش رغد ما اتصلت على صديقتها..
ريم: وانت وش عليك..
تركي: اسأل..
ريم تبي تصرفه: رغد تعبانه..
رغد كانت تطالعها وميته قهر انها ما تصلت هي..
تركي: سلامات وش فيها.
ريم: راسها يعورها وبطنها وتبي الهنوف عشان تسألها عن الامتحان بس صوتها رايح وأذنها ما تسمع منها وعيونها ما تشوف فا قلت اتصل انا احسن..
تركي كسرت خاطره رغد: مشا االله كل هذا فيها لايكون نفس اقروا عليها..
ريم وفيها الضحكه: شكلها عين ما صلت على النبي بس ممكن تعطيني الهنوف ..
تركي: ثواني وهي جايه..
ريم: اوووف هالعله..
رغد: جعل كل اللي قلتيه فيك ان شالله وش فيك تفاولين علي..
ريم: اسكتي اسكتي بعدين اقولك..
رغد: كل ما قلت لها شي قالت بعدين..
الهنوف وهي مرتاعه: الوو هلا وش فيها رغد عسى ما شر..عسى ماهي تعبانه مررره..
ريم: ما فيها الا العافيه بس اخوك نشبه مالقيت حل احسن من هذا..
الهنوف: اشوى طمنتيني..امري في شي..
ريم كانت بتعطي السماعه رغد بس هونت:كنت بقولك خبر يسوى روعتك ويقلبها فرحه..
الهنوف:بشري..
ريم: بنسافر دبي..
الهنوف: صدق!! احلفي..
ريم: والله وما اوصيك خلك عود في بلعوم امك لما توافق..
الهنوف: ولا يهمك ولا توصين حريص من الحين بنشب لما استلم الموافقه..
ريم: اوكيه بااي,,
الهنوف:باااي..
تركي: هاه وش صار فيها..
الهنوف: ما فيها شي بس بطنها يعورها شوي<<خافت بعصب..
تركي: طيب وش فيك فرحانه ولا شمتانه في صديقتك..
الهنوف: وش فيك انت كذا انا فرحانه لانهم بيسافرون دبي وانشا الله حنا وراهم..
تركي: صدق والله فله بس ما توقع امي بتوافق..
الهنوف: اذا انا وياك عليها بتوافق..
تركي: اجل يله قومي..
الهنوف: يله..
سكرت ريم السماعه وقعدت تفكر..
رغد: وانتي ما تعبتي من كثر ما تكلمين..
ريم: لا بس باقي شخص وهو اهم شي..
رغد: مين...
ريم: سليمان اقصد مها..
رغد: قولي كذا من زمان عشان بعدها تقولين لي وش صار في كل مكالمه لاني كل ما قلت لك شي قلتي بعدين..
ريم: طيب طيب..
وشالت السماعه وتمنت هالمره يرد سليمان مثل اللي قبل واتصلت.
ريم: الووو..
محمد: الوو.
ريم"اووووف":ممكن مها..
محمد: من اقول لها..
ريم: قل لها ريم..
محمد: اول مره اسمع هالاسم..
ريم: طيب هذا انت سمعته روح نادها..
محمد: اها عرفتك انت اللي كنتوا معنا بالشاليه..
ريم: عليك نور يله رح نادها..
محمد: لا احنا مطفين النور من شغله..
ريم: يا رببييييه على هاليوم روح نادها بسرعه يا اخوي تراني تعبانه من جد ارحمني..
محمد في نفسه "وش فيها هذي":طيب الحين مها مشغوله..
ريم: ادري قلها خمس دقايق..
محمد: واذا طولتي.
ريم: سكر السماعه في وجهي..
محمد: الا بسألك وش اخبار اخوك مشعل..
ريم: اخباره الساعه تسع شفها..
محمد:تنكتين حضرتك..
ريم:لا ما نكت استظرف..
محمد:اجل مها من المستحيلات..
ريم: محمد لو سمحت نادها ابيها في شي ضروري فيه حياة او موت..
محمد:لا وش الشي وبعدين اناديها..
ريم"اليوم ما راح يعدي على خير":اسمع انا بقول لها بعدين تقول لك وش رايك حمود..بسرعه نادها بأعد لك واحد واثنين...
محمد:ليه اصغر عيالك..
ريم: انت ما بعد رحت ياربيه ترى صدق بأصيح والله تعبت روح نادها..
سليمان: محمد من تكلم وناشب في حلقه..
محمد: هذي ريم صديقة مها..
سليمان: ريم وناشب لها هات السماعه..
محمد: نعم نعم وش هات السماعه خل السماعه بأروح انادي مها واجي سامع..
ريم من يوم سمعت صوت سليمان وعاشت جوو...
سليمان كان يناظر السماعه ووده يرفعها بس خاف محمد يفتن ويتنيذل عليه..
جات مها:الوووو...الوووو..
ريم: هلا هلا والله كيفك وش اخبارك واخبار الوالده..
مها: الحمد لله كلنا بخير وش اخبارك انتي..
ريم: الحمد لله بخير..حبيت اقولك ان بروح لدبي في الاجازه واني متمنيه من كل قلبي انكم تكونون معانا وش رايك..
مها:دبي من راح يفوتها ا نشا الله اشاور امي وارد لك وهي واعدتنا بسفره..
ريم: المهم ما اوصيك ما اوصيك لازم لااااازم تكنون معنا..
مها: بأذن الله ما في شي بيمنعنا..
ريم: سلمي لي على اللي عندك..
مها: يوصل..
ريم: مع السلامه..
مها: مع السلامه..
سليمان: من هذي<<يتميلح الاخ..
مها: هذي ريم اخت مشاري..
سليمان: اها وش عندها..
مها: تقول انهم بيرحون دبي وتبغانا معاهم..
سليمان:فديتها والله.
مها بصدمه: من هي؟؟؟
سليمان يصرف: هاه...دبي ايه دبي..
مها: ايه..
سليمان: ولا يهمكم انا اللي راح اوديكم انشا الله بس ناخذ شور امي..
مها: تسلم والله يا اخوي هذا الاخو ولا بلاش...
ريم من يوم سكرت السماعه وهي في عالم ثاني..
رغد: ريم ريم وين وصلتي انشا الله في السينما وهو جنبك..
ريم: ههههههه تصدقين ماهي شينه..
رغد: يله تعالي قولي لي كل اللي صار..
وقعدت ريم زين وقامت تسولف..
كل العوائل اخذت الموافقه وقرروا يسافرون.. بس فيه شي لازم يصير قبل السفر..
ام فوازتكلم:انا اقول الملكه قبل السفر..
ام فيصل: ونعم الراي..
ام فواز: اجل بكره.
ام فيصل: شورك وهداية الله..
وقرروا ان بكره ملكة فجر على فيصل اللي هو يوم الاربعاء اخر يوم من ايام الاختبارات..
فجر معصبه: على كيفكم طيب خليتوه يوم الخميس..
ام فواز: نسيتي دبي يوم الجمعه والخميس تستعدين لها..
فجر: طيب احس اني ما استعديت..
ام فواز: عندك من اليوم لما بكره العصر استعدي..
نوف: فجر هونيها وتهون عادي تراها ملكه..
فجر: اكيد بيتنادون العائله كلها صح..
ام فواز: انهبلتي اكيد كلهم بيحضرون ملكتك ولا وش رايك..
فجر: طيب ما عندي لبس..
ام فواز: فجر انتي وش فيك تدورين عذر..الحين اخلي طلال ولا فواز يوديك..
فجروفيها العبره: يا ربييييييه...
ام فواز: وش فيها اختك..
نوف: يمه من حقها خايفه ومتوتره..
ام فواز: روحي معها واشتروا اللي تبون و الله الله بالشي الزين..
نوف: افا ما تثقين بذوق نوف..
ام فواز: الا انا ما اثق الا فيك..
&&&&&&&&&&&&&&&&&&&&&&&&&&&&&
ريم: بكره ملكة فجر..؟؟؟
العنود: ايه وش اقولك من الصبح..
ريم: طيب انتي عندك لبس..
العنود: لا والله وش رايك نروح السوق حتى عبير ما عندها..
ريم: حتى رغد..بصراحه ما توقعتها قبل السفر..
العنود: اجل يا الغبيه وشلون يعطونها المهر وهي ما تملكت..
ريم: صح نسيت..
العنود: يله تعالي مرينا مع السواق..
ريم: طيب مع السلامه..
العنود:مع السلامه..
ريم: رغد يله البسي بنروح السوق باقول لامي.
رغد: بسرعه عشان يمدينا..
وبعدها خذوا الموافقه من امهم وراحوا بيت عمهم واخذوهم وطلعوا للسوق..
وهم ماشين في السوق..
العنودوقفت في مكانها وجنبها عبير..
رغد وريم لفوا عليهم:خير وش فيكم..
عبير: مو هذا طلال واللي معه نوف وفجر.
العنود: الا ...الا..
رغد: والله صدق هم..بروح اسلم عليهم..
ريم: وانا جايه معك..
عبير والعنود ميتين على طلال اللي لابس برمودا بيج وتيشرت بني مبين جسمه وشعره الاسود مسويه سبايكي والساعه والشوز السبورت طالع شي خطيييير...
رغد: هلا والله نوف وفجر..
نوف: هلا والله رغوده..
فجر: اهلين..
ريم: هلا والله ببنات عمتي وبالعروسه خصوصا اللي بكره ملكتها..
فجر: واللي يخليك لا تذكريني خليني الهى شوي..
رغد:ا هلين طلال وشلونك..
طلال: الحمد لله بخير..
ريم تناظر طلال بحقد:اهلين طلال..
طلال يبادلها نفس النظرات وكان في نفس الوقت كاتم الضحكه :أهلين ريم وشلونك
ريم : بخير ما دامك بعيد عني
طلال : أفااا وش جايك مني
ريم : سلامتك ما جاء منك إلا كل الشر
فجر :خلاص انتوا والله ماني ناقصه..الا وين عبير والعنود ما جوا معاكم؟
رغد: الا والله وينهم ..هم جايين معانا.
ولفوا عليهم لقوهم مطيرين عيونهم في شي بس ما عرفوا وش هذا الشي..
طلال كان يطالعهم وحس انهم يطالعونه بس بعدّ هالافكار من راسه..
رغد راحت لهم: العنود ..عبير خير وش فيكم واقفين..
العنود: هاه ابد سلامتك بس قلبي يعورني شوي..
عبير: انا مو قلبي بس كل جسمي..احس اني بموت في مكاني..
رغد اللي ما فهمت شي: يله امشوا بس البنات يسألون عنكم فشلتونا قدام طلال..بالله مطيرين عيونكم في مين..
العنود انتبهت ان عبير معاها وتطالع اللي تطالعه على طول لفت عليها تبي تتأكد من تطالع..بس يوم لفت لقت عبير تطالع رغد..
عبير: شفت واحد مزيون مر من عندكم..اقول يله مشينا..
العنود ناغزها قلبها بس ما عطت الموضوع اهميه وراحوا عند البنات..وسلموا عليهم..
العنود: اهلين طلال كيفك بشرني عنك..
البنات يطالعون العنود وهي منزله عيونها ومستغربين اكثر من اسلوبها..
طلال: الحمدلله بخير ما دامك بخير..وانتي يا عبير وشلونك..
عبير: انا بخير تسلم..
العنود لفت على عبير وبعدها على طلال"مو لازم اضعف اذا شفته..مولازم يحسون فيني":اقول ترى ما تنعطون وجه يله كل وحده تدور لها لبس تلبسه..وانتي ما لقيتي تحطين ملكتك الا بكره ضاقت يعني ولا ايش...
البنات طيروا عيونهم اكثر من تغير اسلوبها فجأه وحسوا انها رجعت لطبيعتها اللي تعودوا عليها..
رغد: يله يا بنات تفرقوا كل وحده تروح لجهه واللي تلقى شي يناسب الثانيه تتصل عليها اوكي..
البنات: اوكي"وافترقوا"
ماطلعوا من السوق الا الساعه عشره وهم من العصر رايحين..
رجعت كل وحده على بيتها..
صح ان العنود اصرت على ريم تنام عندهم بس ريم قالت بكره اذا طلعت من المدرسه راح تروح عندهم او هم يجونها..
&&&&&&&&&&&&&&&&&&&&&&&&&&&&&&&&&&&&&&&&&&&&&&& &&& &&&&&&&&
يوم الاربعاء
هو يوم فرح كل العائله الا وحده ..اللي هي فجر كان يوم خوف ورعب وتوتر وعلى اعصابها طول الوقت ..
طلعت ريم ورغد من مدارسهم وراحوا بيتهم وخذوا اغراضهم بعدها راحوا بيت عمهم..
عبير: حرام والله فجر ما تستاهل ..روعوها قالوا لها بكره ملكتك.
ريم: مسكينه ما استعدت نفسيه..
رغد: عاد يقولون اهم شي الاستعداد النفسي..لانها اذا ما استعدت نفسيا بيخرب كل شي..
العنود: تخلي عنها الدلع..من يوم انخطبت وهي صايره دلوعه ودمعتها على خدها..
عبير: عاد انتي ما تحسين مافي قلبك رحمه ..خفّي عليها شوي..
العنود: دلع بنات لا تهمكم..
وجاتهم كوافيره وسوت لهم تسريحات وميك اب وطلعوا الاربعه شي فوق الخيال..صح العنود سوت صيحه لان ميك اب حقها اوفر بس البنات اقنعوها انه حلو وعدّتها..
رغد: لو نقوم نلبس يكون احسن..
ولبسوا البنات..
عبير: رغد اتصلي على موبايلي ماني محصلته..
رغد: موبايلي تحت..
ريم: خلاص انا بتصل..
رغد: انا نازله تحت بروح اجيبه اخاف امي تتصل..
ريم: روحي ولا تطولين عشان تحطين لي المنكير..
رغد: اوكي..
كانت لابسه رغد فستان نعوم بالمره كان ابيض على لؤلؤي توب من عند الصدر ومخصر على جسمها ولحد الركبه وكان فيه موجات الاسود.. وشريطه من الخصر واطراف الفستان دانتيل اسود..ولابسه حلق اسود ومسويه شعرها"بف" وحاطه شريطه ابيض واسود..وحاطه شدو اسود مبين عيونها الوساع العسليه..ورج احمر وعليه جلوس احمر..ولابسه سندل ربط اسود..طالعه البنت ولا ملكة جمال بصراحه ما اقدر اوصفها لكم..
نزلت تحت في الصاله تدور موبايلها في الشنطه الا وليد نازل من الدرج ووقف في نص الدرج كان يشوف قدامه ملاك ما قدر يشيل عيونه من عليها ورغد ما نتبهت له..لقت رغد موبايلها..وليد تحرك من مكانها يبي يطلع فوق بسرعه عشان ما تنحرج منه بس ما امداها لان رغد شافته وهي عند اول درجه من السلم وهومنزل عيونه عنها..ما قدر اقول لكم موقف رغد في ذاك الوقت كانت واقفه وكأن رجلها لزقت في اول درجه ووجها احمر لان فستانها عاري شوي<<شوي بس..
حتى وليد نفسه ثبت في مكانه رفع عينه عليها حصلها تطالعه وعيونها مغرقه عيونها دموع..
وليد كسرت خاطره:انا ....انا اسف ماكان قصدي..
رغد لما كلمها وليد وكأنه صحاها من جمدتها ونزلت بسرعه وهو دخل غرفته..
وليد فرحان: البنت تبي تذبحني اليوم طالعه ملاك يا ناس ملاااااك في بيتنا..ولا عيونها تدوخ تموت...تجلط..
كان مبسوط وصار يروح ويجي في غرفته والابتسامه شاقه الوجه..
رغد كانت تدراي دموعها لا تنزل ويخرب الميك اب..وتكلم نفسها: مو لازم ابكي خلاص يارغد سيطري على نفسك ما صار شي شافك بالغلط وماكان يقصد ولا انا اقصد خلاص حصل خير الحين اطلع فوق واقعد عند البنات ولا كأن صاير شي..
مرت الخدامه عند رغد..
الخدامه: مدام رغد انتي فيه كلم انا...
رغد: اوقول تعالي ....فستاني حلو..
الخدامه: ايوه مدام انتي واااااجد حلو..
رغد: مشكوره طيب تحسين انه عاري شوي..
الخدامه: هو فيه أري(عاري)شوي بس تمام..تمام والله تمام..
رغد: طيب تقلعي عن وجهي..
الخدامه: زين زين..
رغد: اطلع عند البنات قبل لا يحسون علي..
ودخلت غرفة البنات..
ريم: حشى ما صار وهذا وانا اقول لك لا تتأخرين..
رغد مقفله معها:.................
ريم: تراني اكلمك مو الجدار اللي وراك..
رغد وهي كاتمه العبره: ممكن تسكتين شوي بس شوي لو سمحتي..
ريم حست ان اختها بتبكي لانها ما تصير مؤدبه الا اذا ما حبت تبكي:رغد فيك شي..
رغد: اقول لك اسكتي عشان ما اخرب على نفسي كشختي..
ريم: اذا رجعنا بيتنا تقولين لي فاهمه..
رغد: فاهمه بس اسكتي..
العنود: وش فيكم تتساسرون علموني..
ريم: اخت واختها.انتي وش دخلك..
العنود تسوي نفسها زعلانه:افا وانا اعدكم خواتي..
ريم: اقول روحي زين مسويه بتأثرين فيني ما يليق عليك الهدوؤ..
العنود: ادري والله ادري بس خلينا نتعلم يمكن نحتاج الهدوء والركاده يوم من الايام..
عبير: رغد لقيتي موبايلك..
رغد: ايه ويا ليتني ما نزلت..
عبير: ليش.؟؟؟
رغد توهقت: هاه..........ايه بغيت اطيح من الدرج..
العنود: هههههههه والله بيطلع شكلك تحفه..
عبير: ما عليك منها عسى ما تعورتي..
رغد: لا الحمد لله..
ريم والعنود يطالعون بعض منصدمين من التغير المفاجئ اللي طرا على عبير..
ريم: عبير انتي اليوم بخير..ما فيك حراره..
عبير: ليش..؟؟
العنود: لا لا اختي مو طبيعيه وش الثقل هذا ..وش ذا الهدوء..
عبير: هاه وش رايكم يصلح علي احسن منك..
ريم: هو مو مره بس احسن من العنود..
عبير: لا زين في تقدم..
رغد: ليش تبين تتغيرين..
عبير: بصراحه تفشلت كله عربجيه حتى صديقاتي يقولون ودنا نشوفك يوم وانتي كلك انوثه فا حبيت ا جرب والحمدلله تمت العمليه بنجاح..
ريم: الله يتممك بعقلك اقول مشينا...
العنود: اقول عبير اتصلي على وليد خليه يجهز عشان يودينا...
رغد تفاجئت: وليد هو اللي بيودينا"كملت"
عبير: ماني مكلمه احد اولا موبايلي بعيد ثانيا مالي خلق ثالثا ما اشتهيت..
العنود: رابعا بيجي ذا الكعب اللي ما عرفت امشي فيه على راسك يالسودانيه..
واتصلت على وليد..
العنود: الووو..
وليد: هلا والله وغلا <<مروق على الاخر..
العنود: هلا بس وش عندك مروق..
وليد: انتي وش تبين..
العنود: كنت بقولك تودينا بيت عمتي احنا وبنات عمي..
وليد: ابشري يله انزلوا..
العنود: ان شالله"وسكرت منه"
العنود: اليوم وليد مو طبيعي..
رغد بخوف: ليش وش فيه..قال شي..
العنود: لالا ما قال شي بس اسلوبه باين عليه مروق..
رغد ارتاحت: اهااا..
ريم اللي حست ان في شي صاير بين الوليد ورغد بس مصيرها راح تعرف: يلا بنات لا يعصب علينا..
البنات: يله....
@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@
" نهاية البارت "
|