[اسطورة !]

يسعد لي مسائكم يارب
متابعاتي الجميلات اسعدني تواجدكم ودعمكم
وان شاء الله لي رجعه لأعلق عليكم
وكلها ساعه وراح تبدأ سنة جديدة

(1436 )

ياعساها كلها فرح وسعادة ويكتب
لنا من الأقدار ماتطمن وتستريح بس انفسنا
لن اطيل عليكم
بحفظ الله ورعايته..




البـارت 26 ..

مابين نيران ونيران ****

مشاعر واحاسيس غريبه تزورني
بوسط هذه المدينة..بوسط هذه الغربة
وكأن من زج بي بالسجن مدى الحياة!!
الشمس لاتشرق ولاتغرب..القمر لايظهر؟
الرياح لاتجري..الأمواج لاتصطدم
توقفت خطوات الناس
كل شيء مبهم
كل شيء محير ..
من انـا؟

"رفع عينه للشباك نزله بتعب"

انني مقيد الآن ليست الحبال هي السبب
بل امرأة حلت علي كاللعنة
استعذت منها مرار وتكرارا ولكنها
لازالت توشم لها مكان ما بقلبي الذي يملاؤه
السواد والحقد
الذي لم يعرف يوما حبا عذريا طاهرا


كان يؤمن بأن النساء الساذجات
لايجب ان يسلم قلب كل آدم لهم

"بلع ريقه وبانت تفاحة آدم"

ولكنني اصطدمت مع موجة قوية
قوية جدا كنت انا الصخر مارست طقوس
ديكتاتوريتي وتسلطي
تلك العينان المليئة بالحنان
تغلبني كل مره عندما تذرف تلك الكرات المالحه
لتتهاوى على خدها الطفولي وجهها لوحة يعجز عن رسمها أي فنان..
ولكن لم احسب
حساب بأن الزمن كفيل بأن يرد ضربتي
وهالآن "الصخرة" المسمى
(بالضبع الأسود)
يخسر امام فتاة غجرية بكل شرف !!








**هذا البارت اهداء
لمن علمني ان الغربة ليست غربة سفر
فقط بل (غربة روح)
منذ الصبا وانا اجتهد لأبني اوطان بداخلي له رغم ذلك
اختار الهجره والأبتعاد,شكرا لرحيلك....

"مـس ميلانو"



من انواع الابتلاء
شخص ليس من نصيبك..
ليس قدرك,ولكنه يسكن بداخلك..



بموسكـو..
جالسه على الكنبه وعينها على المرأة العجوز
تحرك الحطب لتدخله النيران
الأجواء باردة تميل للقروسه الثلج لايتوقف بالخارج
منظره من الشباك يسحر من يراه ومع فتنة الارياف
ازداد جمالا انه يشبه قلوبنا عندما نحب ونعشق من قلب ,تضحية للأخر من اجل ان ننال على اعجاب محبوبينا ننسى انفسنا ننسى قاعدة
"من يحبك سيحبك لذاتك بمزاياك بعيوبك"
سقطت دمعة لاذعه لم تستطيع ان تسيطر عليها
تلتها كرات ورى بعضها قبطت حاجبيها وعبست
ملامحها التي كانت تبدو اجمل عندما تضحك
مسحتها دموع بعنف للحظات نست انها ليست لوحدها
بهذا المكان بل اعين مسلطه عليها


وانني حزمت ذكرياتك مع حقيبة سفري"
ولكن لا استطيع ان ارميها بعيدا ..احببت مرتان
حب المراهقة الزائل والآن حب النضج
الذي لن استطيع ان اتخطاه وعندما اقنع نفسي
بالنهوض اسقط كما يحبو الطفل ويستقيم بأول
خطواته ليسقط بسرعه"

قرب منها وبيده المفتاح :احمم
رفعت عينها المدمعه لصقر اللي تكلم
بأدب وهدوء:هذا مفتاج غرفتك روحي ارتاحي
كلها ساعات والامير سعود بيكون هنا

طالعته بعين خائفه وعين اخرى على جرح
السكين بكتفه حط يده بسرعه:لاتخافين سطحي

بحركة غير متوقعه جلس على ركبه اشاح نظره
لبعيد وبصوت مطمئن:ضيعناهم ولاراح يخطر ببالهم
اننا بالأرياف راح اكون جالس باللوبي طول الوقت لاتخافين همم ..

هزت راسها مسحت انفها بالمنديل اخذت المفاتيح
قرت رقم الغرفه 7
مشت خطوات هادئه التفت ونطقت اسمه
:صقر
التفت وعينه عليها ابتسمت بلطف:شكرا على كل شيء
لولاك كان "غصت" صرت جث
قاطعها بسرعه:ماسويت غير واجبي
هزت راسها وطلعت الدرج وعينه تراقبها
اهتزاز الجوال بيده صحاه من تفكيره قرأ الاسم

تمتم:والله لو تفكر لاياخذون روحك..رد
:الو

فتحت الباب ودخلت قفلته بالمفتاح مرتين سحبت
الكومدينه بتعب مسكت ظهرها الخوف بيذبحها
فسخت حجابها رمته على السرير وعينها
تتنقل على الغرفه اللي تميل للكلاسيكيه ابتداء
من اثاثها الخشبي والارضيه الباركيه ومطله على الخارج


وقفت قدام المراية وجهها بدأ بالذبول
اصفر والهالات السوداء اصبحت تحت محاجرها
ارتخت ملامحها لتعلن عن سيل من البكاء
كتمت شهقاتها بيدها وتتذكر احداث الصباح


صقر بأستعجال ويتلفت حوله:فيه مشاكل صايره والامير
سعود وصاني على سلامتك
ندى بتردد:بس مضاوي مو موجده


صقر بسرعه:لاتخافين هي بأمان مع الامير سعود
بسرعه ماعندنا وقت

هزت راسها دخلت بدون ماتعلق او تعترض اخذت
شوية ملابس بالشنطه جاها مغص قوي تألمت
:آآآه ..سندت يدها لحافة التسريحة

اختفى الألم زفرت بتعب خرجت نزلوا من العماره
مشوا جهة الرصيف
رفع عينه لقدام حط يده قدامها يمنعها:لحظه !!
بلع ريقه وعينه للشخص الواقف بزواية واجهة
الكوفي وعينه عليهم


لف عليها مسك يدها بتتكلم ماناقشها سحب يدها
وغير اتجاههم
رفع جواله وبسرعه:رجال صالح يلحقوني
محمد بعجله:حاول تضيعهم لاتقفل سمعتني
عشان نعرف مكانك
هز راسه وكأنه قدامه سحبها من يدها وقطعوا الشارع
دخلوا مقهى استقبلهم النادل بسرعه سأله
:اين المطبخ؟
اشر النادل بأستغراب دخله وسط نظرات الموظفين
ما اهتم خرج من الباب الخلفي

بدخول 2 من رجال صالح ضخام البنيه وبتساؤل
:ارأيت رجل وفتاة متحجبه؟
اشر بيده دخلوا للمطبخ ..

محمد بقلق:وينك؟
صقر ويتلفت وراه:قاعد الهيهم
سعود بتوتر:وينهم؟
محمد حط سبيكر :صقر وينك بالظبط؟
صقر بسرعه يمشي وماسك يدها وكأنها
طفله يخشى فقدانها:قربت من المترو
سعود بسرعه اخذ الجوال:اركبه لابعد منطقه

دخل ساحة المتر قطع التذاكر ويراقبهم بخوف

اخذها بسرعه ويستعجلها يمشي بعجله
والماره انزعجوا تكلم بسرعه:راح ينقطع الارسال
بمجرد ما ادخل الانفاق
محمد بهدوء:لاتخاف نراقب احداثياتكم من الجوال
"التفت وبهمس" البنت بأمانتك ياصقر لاتخيب املي
صقر بسرعه:لاتخاف املك مابيخيب مع السلامه
محمد بخوف عليه:الله يحفظك

ركبوا القطار المزدحم مشى والرجال يطردونه
ابتسم بتشفي لهم رفع اسلحتهم لكن القطار دخل
النفق
واقفه بتعب ومتمسكه بيدها العمود المكان مزدحم
لف عليها لاحظ تعبها انحنى لوجهها:انتي بخير؟
بلعت ريقها واكتفت بهز راسها
صقر بهدوء:صرنا بأمان..

ماكمل كلمته لمح واحد ضخم البنيه داخل للمقصوره
ويتلفت حوله وماسك بيده صورة بسرعه لف لها:افصخي حجابك
طلعت عينها كمل بتوتر:فيه واحد منهم معنا انتي
الوحيدة المتحجبه
ندى بقوه:لو على موتي مافصخته الموت ارحم
لي من كل من هب ودب يطالعني
قرب الرجال طالعها بعجز :انا آسف
استغربت اسفه بسرعه سحب حجابها ومسكه بيده
شهقت بفجع من حركته طالعته بنظرات حاقده
نزل لورى ظهره تقدم وخلاها وراه بحيث يحجب
الرؤيه عنها

تلفت الرجال بعدم رضا وخرج زفر بقوة
ضربته بالشنطة على ظهره لف بفجع
حطت حرتها وقهرها فيه نطت بوجهه ورصت على اسنانها:من سمح
لك تتعدى حدودك معي يامحترم شايفني من هالشقر
والا خويتك تسحب حجابي لاتطق الميانه "رفعت سبابتها" احذرك لو اصبعك هذا يطولني مره ثانيه
لأقطعه وتندم ماعرفتني زين فلا تختبر صبري وعطني
حجابي

فتح فمه من كلامها وعصبيتها رفع يده
بهدوء سحبته بقوه لبست لفت وعطته ظهره
:صبرك يارحيم اووووف

سكت نزل عينه بعد شوي عنها جات عينه بعينها
لفتها بسرعه
وصل القطار للوجهه المطلوبه نزلوا وهو يمشي قبلها
يتلفت عدته وتمشي قبله تمتم:هاذي بارود مو بنت
وقف تاكسي دق على الرقم

رد سعود بخوف:وين صرتوا؟
صقر :كان معنا واحد بالمترو لكن الحمدلله
ماقدر يتعرف علينا

"سكت تخيل لو ندى تعلمه
بالحركه اللي سواها لينهي نفسه"

سعود بأستغراب:الووو صقر
فاق من سرحانه:هنا
سعود :عطني ندى
مد لها الجوال من ورى اخذته :الامير سعود
بسرعه خذته ردت بلهفه وبصوت مخنوق:الوو عمي

سعود بعد عن محمد وبأبتسامه:شلونك يابنتي؟
بكت بهدوء:ماني بخير تعال بموت من خوفي
خلنا نرجع للرياض ماعاد ابي هالقعده
سعود بحب يخفف عليها:ماعليك خوف اعرف بنتي
عن 70 رجال طمنيني عنك؟
ندى بهدوء نطقت:ماني بخير يبه

نزل راسه بعجز عن مواساتها او تهدئتها
بهدوء:هاذي مو بنتي ندى اللي اعرفها
وين القويه ياجبل مايهزك ريح هذا مو عشمي فيك
صيري بخير عشان امك واللي ببطنك و "بينطق اسم سلمان سكت" واللي يحبونك وصقر كفو ينشد
فيه الظهر
ضحكت بسخرية :واضح
سعود بشك:سوا لك شيء؟
عينها عليه:لا بس متخلف وغبي وحيوان
ضحك من قلب سعود:هههههههههههه هو ثقيل دم
ماعليه المهم سلامتك

فرك يده بقهر صقر ويسمع هالكلمات اللي كانت
موجهه له ..قفلت بعد ماودعها ويوصيها على نفسها
مدت الجوال له بدون نفس
صقر بغيظ:العفو
رفعت حاجب:عفوا
صقر بغيظ:العفو
ندى بقهر:ما احد شكرك نظف طبلتك زين
ماشكرتي بس ردينا عليك العفو استغفرك يارب..

بعد مسافه دخلوا الارياف عينها على قطيع البقر
والماعز والبرك الخضراء والاشجار والاكواخ
الخشبيه تكلم بهدوء:هذا المكان آمن لنا زرته اكثر
من مره

هالمره التزمت الصمت نزلوا اخذت شنطتها
دخلوا رحبت فيه راعية الفندق امرأة عجوز جميله
بالنسبه لسنها وتكلمه بفرحه وحرارة وكأنها تعرفه
من قبل تكلم:اكثر من مره سوينا حفل لنا هنا


طالع فيها مبين عليها التعب:روحي ارتاحي لين اخلص
هالاوراق
هزت راسها جلست على الكرسي اللي مقابل
المدفئه دقائق حتى دخلت بمرحلة سرحان عميقه
لفت عينها على الشباك وتراقب الثلج الذي يتساقط
كانت عندها معلومه ان الثلج مايتساقط على الارياف
ماعرفت هي صحيحه والا خاطئه لكن اللي تعرفه
ان الثلج يزور هذه الارياف ..


"عودة للواقع"

بتلف حست بلسعة بظهرها صاحت بتوجع
:آآآآآ
لكن هالألم يتزايد بكت بخوف اكيد هذا الطلق
لكن بدري كثيييييير عليه عضت يدها لكن
الألم مستمر
بلعت ريقها بخوف نزلت للارض محتضنه نفسها وتبكي بتوجع الالم يزيد صرخت بقوة

يشرب شاهي ويفرك يده من البرد
رفع صوته من صوت الصرخه بسرعه نط
لحقته المره العجوز دق الباب بقوة تبكي وتصيح


تمنت امها وخواتها جنبها تمنت لو سلمان جنبها هاللحظه
صقر لف بسرعه:الديك المفتاح الأحتياطي؟
هزت راسها:سأجلبه فورا

بعد دقيقه جابته حطه زفر:حاطه المفتاح
العجوز مافهمت عليه التفت عليه:سأخلع الباب وسأدفع من اجله
العجوز :بالطبع

بعد يحاول يكسر الباب انكسر بس في شيء يمنع
من انه ينفتح كسره رفعت راسها خافت وحست بالخجل من نفسها قدر يكسره ويدخل عينه عليها
صنم مكانه كرهت نفسها الف مره

العجوز:عجبا يا الهي انها بمرحلة المخاض
لفت عليه بسرعه:احملها معي
تصنم مكانه اول مره ينحط بهالموقف خاف كثير
:لا استطيع...نزل بسرعه للوبي
زفرت بحمق:يا للرجال الحمقى لاتخافي عزيزتي
ستنجبين مولودك وستصبحين اما فقط استندي
علي

مافهمت كلامها اشرت لها بيدها وقفت معها للسرير
سدحتها وتمسح على شعرها وباطمئنان:
سيكون كل شيء على مايرام لاتقلقي ..

نزلت تحت وعينها على صقر اللي راح لها
بسرعه:ماذا بها؟

العجوز بعصبيه:انها بمرحلة المخاض ياغبي ستلد

انفجع تكلم بالعربي:بتولد!!

مشت من جنبه دخلت المطبخ لحقها:ولكن لامستشفيات
هنا
فورت المويه :سألدها بنفسي
صقر بتعجب:انتي؟

العجوز بنظرة:الديك شك لقد ولدت نساء هذه القريه
ابتعد عني هيا لا اريد رؤيتك ابدا
:
:


بحائل""

سميره بقهر:رجال طول وعرض مو قادر ينتبه
للأمانه اللي عطيناه اياها

نزل راسه سلمان :الغلط من بنتكم اللي ماعرفتم تربونها

وقفت رفعت حاجب تكلم بسرعه:انا آسف ما اق

اشرت للباب:شفت الباب اللي دخلت منه راح
تطلع وبتجيب لي بنتي بنفسك والا ماراح يحصل لك خير "بحمق"
لو ماعرفت اربي بنتي ماكان عماتك
المصونات خطبوها يحصل لكم تاخذون من تربيتي
انا خلفت وربيت وكبرت مو عشان يجي واحد مثلك
رافع خشمه على بنتي يقولي ماعرفت اربي ربيت ياولد سعود ربيت لكن اللي معروف منهو اللي ماتربى اللي يرفع يده على مره ضعيفه بنتي راح ترجعها
وراح تحرم عليك شوفتها بعدها عطني مقفاك ياولد
ابوك

سلمان بقهر:تطرديني ياعمه وتشككين بتربيتي؟

سميره بقهر نيران تشعل بصدرها:ماعمري طردت احد
لكن اللي مايحشم بنتي ماله حشيمه مثل ماخرجتها
من البيت وكرهتها راح اخرجك مو من بيتنا بس من حياتنا بعد اما تربيتك فما بشرهه عليك يكفي ان عادله
اللي مربيتك هه "نطقتها بسخرية"

قام وبحمق:خير ان شاء الله لكن سالفة ان
بنتك بترجع لك انسيها لأن هالكلبه راح اخليها
معلقه لاهي متزوجه ولامطلقه ومثل ماحرقت قلبي
لأحرق قلبها

سميرة بعصبيه:احشم نفسك ياولد سعود تراك
باقي ببيتي وماعاش من يضيم بناتي ويحرق قلوبهم
وانا حيه ايه ابوهم مات لكن خوالهم الحمدلله عايشين
ورجال لهم صيتهم بحائل كلها ومستعدين ياخذون الحق مو من ابوك بس من اهلكم كلهم اللحين راح
اجيب عبايتي وراح اروح معك للرياض لين ماتجيب
بنتي وقتها راح ارجع بتردني خايبه مثل مارديت بنتي؟

سلمان افتشل من عديله سامي اللي جالس
ومتعجب من قوة عمته وكلامها كان جاي يشكي لها
من بنتها لكن تراجع من بعد هالاصطدام اللي صار

نطقت سميه :والا بتخلي عديلك احسن منك ويوديني
بنفسه؟

سلمان بخجل منها عرف انه تمادى بالكلام
ولا احترم سنها وانها ام زوجته وبمقام امه وانها
كانت توقف مع ضد بنتها




نطق:حياك الله اذا ماشالتك
السياره تشيلك عيني

قامت سميرة وبأستخفاف:تسلم ما ابي عينك خلها
لمرتك الثانيه اللي فضلتها على اللي بتجيب اللي يشيل اسمك



سلمان كأن من هوى فيه كلمتها جمدته )
"اللي بتجيب اللي يشيل اسمك"
ام عيالك ياسلمان شلون طاوعت قلبك تقول بحقها
هالكلام ,بس هي طلعت ولاضربت حساب لأحد
باقي قلبها عند ذاك الحقير ثامر اكييد)


التفت لسامي اللي شاف سميره خرجت
تنفس بقوة:ما اقول الله يعينك على ما ابتلاك

ضحك بداخله

"هل انتي بلاء وامتحان لي بهذها الدنيا؟
لأثاب عليه بالأخرة...
ام جيناتك حملت القوة الممزوجة بالجنون
قيل هذاك الشبل من ذاك الأسد
اليوم عرفت معنى هذه المقوله!!


تلبس عبايتها وتدعي من جهه على سلمان
ضحكت ناديه:رحمته
لفت وعطتها نظره سكتت تكلمت بسرعه:قومي
حطي لي ملابس حقت يومين
وانتي "توجه كلامها لسميه" اقعدي عن خواتك
كلها يومين وبرجع

فنجلت عينها سميه:يمه وين رايحه؟
سميره:بروح لأختك ندى
سميه بقهر:هالحيوانه قولي لها ماعليه شافت نفسها
الله ياخذ العدو
سميره بسرعه:اختتس مدري وين ارضها هجت
من بينها زوجها من شهرين

شهقوا البنات طالعت بعادل:انتبهوا له زين
ناديه بخوف على ندى:يمه وش في ندى
لاتخبين علينا؟

سميرة بأستعجال تمثل القوه قدامهم وبداخله تدمي
وجع على فلذة كبدها:مافيها الا العافيه

سميه بسرعه تكلمت:انا اعرف وين مكانها

لفوا عليها نزلت راسها وبندم:هي تكلمني دائما
بس حلفتني

قاطعتها صرخة سميره:وين اختك؟
سميه بتعترض صاحت:ولاتعلميني الله ياخذكم يابنات
خالد مثل مابتجيبون لي الجلطه استغفرك يارب اللي يحدون الواحد يدعي عليهم وين اختك ياملعونة الجدف؟

سميه بغصه وخوف:بموسكو بروسيا مع عمها سعود

شهقت ناديه:العععن خيرها ماهي هينه ههه

لفت سميرة وبنظرة:سوي سواتها قسم لأ افصج جلدك
عن عظمك حسابها عندي وانتي طيب خليني ارجع بس

خرجت وناديه مسكت سميه وبضحكة:وانا اقول
وش هالرقم الدولي اللي يجيك وتكذبين تقولين انه
ازعاج

سميه بتصريف:شفتيه مرتين بس بلا كذب

نادية:المهم شفته هالأخت والله اللي عاشت حياتها
بالطول والعرض

خرجت لسلمان اللي ركب السيارة وينتظرها
ركبت قدام ومشى طول الوقت تسبح وتهلل
دق جواله رفعه :هلا
روز بغنج:حبيبي وينك؟
سلمان بخجل:بحائل
شهقت بقوة:بحائل رايح لها ياسلمان رحت للي باعتك
ومادرت عنك "بصرخه" لكن الشرهه علي انا
اللي وثقت بكلامك مو قلت ماراح ترجعها

سلمان بخجل من صوتها اللي طلع:جاي للرياض ومعي ضيوف عطي عماتي خبر
روز ببكيه:بس
قاطعها:فكيني واللي يرحم والديك اللي فيني مكفيني
يلا مع السلامه

قفل بوجهها بهتت وعينها على عادله:قال انه جاي
من حائل ومعه ضيوف
عادله بشك:من معه؟
روز :مدري "بخنقه" راح لها
عادله بأستبعاد لهالشيء:ماظنتي والا كان قالها
اكيد عنده شغل عطيهم خبر انتي يجهزون العشاء

قامت وهي تفكر معقوله راح لها؟
معقوله تكون هي الضيف؟

اما عادله اخذت حبوبها وتمسك كتوفها
وبتعب:آآه وينك ياعائشه الالم بيذبحني


بجهه ثانيه...

خديجه بشماته:كلها شهور بالكثيره وهي مودعه
مها وعينها على هيا:ليه هي مريضه؟

خديجه بقهر:مريضه بالعضال الله لايعطيها العافيه
نواياها السوداء اللي سوته بندى رجع لها

هيا برفعة حاجب:وش اللي سوته؟
خديجه بسرعه قامت:ولاشيء يلا مع السلامه

حرجت بسرعه لفت مها على هيا:وش اللي سوته
عادله بندى؟
:
:

بعيدا عن ضجيج المدن والى القرية...

فاطمة بهدوء:بس خالي انت لازم تراعي البنت

دليم بطفش:اراعيها بوشو بنت ابوها تحسب السعودية مثل امريكا ودها تخرج وماعليها عبايه

ضحكت بخفيف فاطمة:تحمل ماعليه بعدين اذا كانت
تبيها من الأساس ليه تزوجتها

دليم بتهرب:اخبارك انتي وش مسويه كيف الضب معك؟

فاطمة عرفت تصريفته:بخير ماعلي خلاف الحمدلله
مرتاحه ولاتقول عنه ضب لو سمحت هو شيخ الرجال
صفر دليم:اوووووووب اوووب قدنا نحامي عليهم
يافطيم
فاطمة بغرور:طبعا مو زوجي وحبيبي وابو عيالي
دليم ضخم صوته:بنت استحي على وجهك
ضحكت من قلب:ههههههههههههههههه
ههههههههههههههههههههههههه ههههه

دليم ابتسم لا اراديا عرف انها مرتاحه :تعالي زوري
خالك يالقاطعه والا خلاص من شفتي خشته سحبتي
علينا
فاطمة بتردد:امي عندي
دليم بأستغراب:زياره؟
فاطمة بتردد:لا بتسكن معي الكلب ضربها وطلقها
والخايسين عيالها ولا واحد منهم استقلبها

حس الدم يغلي بعروقه:ومن متى هالكلام؟
فاطمة بتردد:من فترة كنت اتصل عليك بس جوالك
مقفل
دليم بغبن على اخته:العن ابوهم من رجال زوجها
السكار مابشره عليه عارف طينته لكن عيالها الرخمه
يرمون امهم
فاطمة بدقه:رموا اختهم عاجزين يرمون امهم!
دليم بقهر:انا جاي بكره
فاطمة بسرعه:لاتتعب نفسك توك امس واصل
دليم بسرعه:اتعب نفسي بأختي صاحيه اذا ماشليتها
فوق راسي وكنت سندها من بيسندها
فاطمة بحب له:الله يخليك ذخر لنا مالنا غيرك انت
ابونا واخونا

حس بمسؤولية وثقلها من كلامها ابتسم:وانا لكم
دام فيني نفس سلمي على اللي عندك ويلا منها
تشوفون هاللي عندي

فاطمة بضحكة :يوصل ههههه حرام عليك انتبه لنفسك
يلا ودعتك الله

قفلت الجوال وعينها على الليمون المزروع لفت
صدمت فيه صاحت بفجع:اعوذ بالله من الشيطان
حطت يدها على صدرها:فجعتني الله يسامحك
من متى وانت هنا؟

متعب بلكاعه:من قلتي زوجي وحبيبي وابو عيالي

تشرب خدها لون الحمره تلعب بطرف شعرها
وبتصريفه:خذ الاخبار الجديده خالي تزوج وحده
حضريه وبكره بيجي هنا ويسلم عليك

ضحك من تصريفها وسردها الغلط:ههههههههه
مفروض تقولين خالي يسلم عليك وبيجي بكره
يزورنا والمفاجأه انه تزوج حضريه وصل الله وسلم

رفعت حاجب:لاياشيخ احلف



رقص حواجبه:قسم اقول يالغاليه ماودتس تسوين
لحبيبتس ورجلتس وابو عيالتس دلة قهوة راسي
يضرب علي

فاطمة بسرعه:سلامتك تعال اسوي لك مساج

متعب بخبث:وين؟

فاطمة ببرآة:بالغرفه

متعب بلكاعه:تعرفين؟

فاطمة :همم عندي خبره

رفع حاجب:بعد عندك خبره ماشاء الله

عرفت قصده ضربته بقوة على كتفه:احسن النية
متعب بلكاعه:ليه وين راح تفكيرتس؟

حطت يدها ورى رقبتها من الخجل:هاا ولاشيء
متعب قرب:اعترفي



طارت عيونها:متعب بعد لاتشوفنا خالتي والا وحده
من البنات

متعب بطناخه:خليهم يشوفون حلالي فيها شيء؟
فاطمة بسرعه وخوف:لا بس مو هنا

متعب بأستقعاد:وين؟

فاطمة لا اراديا:بالغرفة

ضحك بقوة:ههههههههههههههاي آآآه يابطني
ياشين نواياتس يالمروحه صفيها

تمنت الأرض تنشق وتبلعها ولايصير فيها كل
هذا دفته بعصبيه:مانيته شينه غيرك بعد بس

بتمشي مسكها من يدها ويضحك جمع كفوفها
وباسها:ههه ابوي انتي حقتس علي ايه خالتس بيجي باكر اجل؟

فاطمة:ايه ..
وبنظرة توسل:طلبتك

متعب بجدية:آمري يانظر عيوني

فاطمة ابتسمت:ودي بكره تتصافى النفوس
ابتسم:ابشرتس مابخاطري شيء على خالتس ولا احد
بهالدنيا بالي وسيع

فاطمة بحب:قل آميين
متعب:آميين

رفعت يدها:بحزة هالساعة المستجابه ان يخليك
لي ومن تحب عينه شوفتك

ابتسم حط يدها على كتفها ويمشي معها:والله وصرتي
تهرجين مثلنا

عقدت حواجبها:كلامكم احيانا غريب بس انت والجازي
وعمتي افهم عليكم يعني فيه مصطلحات ما اعرفها

متعب بضحكة:بتتعودين الا وش بغيت اقولتس
بيت عمتس مثل ماهو وش ناويه عليه؟

ترددت وبأحتيار:ودي اسكن فيه

وقف لاحظت سكوته حك ذقنه خافت من ردة فعله
:يعني مو معناته مو مرتاحه هنا والله عمتي شايلتني
على كفوف الراحه بس مو قادره اخذ راحتي لا بالطلعه ولا بالخرجة لازم جلال الصلاة علي ابي
بيت اتحرك فيه براحتي البس اللي ودي يعني


نزلت راسها رفعه بطرف يده:ومن قالتس بنسكن هنا
للأبد راح ننتقل للرياض

طلعت عيونها:من جدك؟

متعب بسرعه:أي والله جاتني وظيفة بمستشفى
الملك فيصل ولاني برادها وبيكون لنا هنا بيت
مستقل نجي وقت الاجازات والا المناسبات كلها
كم شهرين وانتي بترجعين للمدينة يالخكريه

رفعت حاجب:انا خكريه وانت بدوي

متعب:ينقال بدوِي شدي على الحرف
ماعليه انا بدوي وافتخر وانتي افتخري بنفستس

دخلوا وهم يسولفون وعين شافت من بعيد
تراقب ضحكاتهم نطقت بحقد:الله لايخليني اذا
خليتك تتهنون وتحرقون قلبي

:
:

عودة لموسكـو

5 صبـاحـا ..



زفر بأرتياح لما:انها تمر بتقلصات لا اكثر

حس شوي بيغمى عليه من القلق :وكيف هي؟
العجوز:لاتقلق انها بخير تركتها لتاخذ قسطا
من الراحه

"تركته ومشت جلس على الكرسي مقدم جلسته
خلخل اصابعه بشعره هاليوم كان
حافل بكل ماتعنيه الكله كان ثقييل وصعب كثير
شاب شعر راسه من اللي مر فيه
اولها رجال صالح
واخرتها "اشتباه ولادتها"

اما هي

منسدحه على السرير وجنبها كوب حليب دافىء
راسها راح ينفجر من الصداع ومن التفكير
اليوم حست بخوف فظيييع تخيلت ولادتها تصير
بهالغربه وبهالمكان لكن طلعت مجرد
تقلصات توها دخلت الثامن رجعت ظهرها لورى
غمضت عينها محاولة للنوم لكن
باتت محاولاتها بالفشل!!





بالجهه الثانيــه..

عينه تراقبها
لؤي بتفحص:نحفانه
ابتسمت بكره:بالله بشر امك
قدم جلسته :لو ماعيوني تشوف زين كان
قلت اللي قدامي جسار امداه يغير اطباعك بهالشهرين؟
ابتسمت بخبث:ماسمعت من اللي غير اطباعي
لؤي:جسار
ابتسمت بحالميه وبأستفزاز:يازين هالاسم بس ياشينه على لسانك

دق الجرس

طالعها بشك تردد يفتح طل بالعين السحرية
انصدم ابدا ماتوقع وجوده دق الباب وبصوته
:لؤي اعرف انك داخل افتح هالباب احسن
ما اكسره فوق راسه مو فاظي لك

فتحه بعد تردد دفه على الجدار مسكه من ياقة


بلوزته:شسوي فيك بالظبط اعطيك لجسار
واخليه يفصخ جلدك عن عظمك انت غبي معتوه
النفي ماخلاك تسترجل ولاعقلك
تتفق مع رجال صالح وتطعن بظهر اخوك

لؤي بفجع حرك راسه:ابدا !

سعود بحمق:شوف تراها موصله معي اعترف
احسن ما امسح فيك هالارض

لؤي بصدق:والله مابيني وبين صالح شيء

سعود بشك:اجل ليشم اخذ زوجة اخوك بهالطريقه؟

لؤي بتشجع:لأنه خذاها مني

عطاها نظره كمل:بعقلك شيء انت صاحي؟

لؤي بصرخة استهجان:طبيعي بتوقفون معه موج سار
المفضل وانا تاركيني ولا كأني واحد منكم

سكته الكف الحار رفع سبابته:احذر ماني بأصغر عيالك حتى تكلمني بهالطريقه احمد ربك اللي عرفت مكانك يالمريض وبفكك من قهر جسار اللي لو وصلك
مادري وش بيسوي فيك

نزلت راسها وتفرك يدها بتوتر
:لاتخافين يابنتي هالمعتوه عقله طار وخلص


لؤي بقهر وعينه عليه:بس عمـ

قاطعه:ما ابغى اسمع حرف واحد الدنيا قايمه قاعده
برا اخوك ماخذه هالكلب صالح ولانعرف عنه أي خبر
وانت مسوي حركات اطفال

شهقت بقوة نزلت راسها بسرعه تجمعت العبر
بعيونها

هل حان الوقت ؟
هل ستكون تلك نظرتك الخاوية اخر ما استذكره؟
لا احببك نعم..ولكن لا ابغضك
لقد قطعت لي وعدا يجب عليك ايفائه
لكن اؤمن بأنك لن تكون فريسة سهله
فمن اراني الموت مرات فسيري اعدائه
ارجوك اصمد لتبقى من
.....
.....
.....
(لا اعرف لأجل من بالظبط)


نثر عليه سطل المويه مسكه من شعره
:اصحى يالضبع الأسود


عينه تتفحص وجهه المليء بالكدمات اللي يترواح
لونها بين الاخضر والازرق وشفاته المشققه
ودماء انفه المتجمدة وشعره الغرق

فتح الموية قربها من شفايفه بسرعه قدم نفسه
صالح بلعانه:آآ افتح فمك حبيبي يلا

يشعر بعطش شديد فهو محروم من الماء من 3 ايام
بلع ريقه صب بعد يضحك:آسف حبيبي
صب المويه بالأرض قدام عينه اللي تراقبه ضحك
بقوة:ههههههههههه "حط يده على قلبه" بس
تدري مايهون علي اشوف الضبع الاسود عطشان

اخذ علبه ثانيه :افتح فمك
لا اراديا فتح فمه من التعب صبها بسرعه تفلها
كان بنزين كح بقوة همس بتعب:والله لاخذ روحك يالكلب
صالح:هههههههههههههه شلون تاخذ روحي
وانت مربط وفيك مليون عله؟

ابتسم بسخرية استخدم اساليب تدريب
عمه سعود رفع راسه وبتشفي:مصير الحي يتلاقى


صالح بغضب:ماراح تطلع من هنا الا جثه لا شرب
ولا اكل خلال ايام بتتعفن هذا يكفيني

ماقدر يتحمل طاقته بدأت تنفذ نزل راسه
قرب منه صالحه ضرب وجهه بقوة:جهز نفسك
الليله انا بستلمك

جسار بسخرية:ضربك ولاضرب حريم ياصالح خل
رجالك احسن ماتتفشل

عصب ضربه بكوعه على انفه بقوه
وبحقد نزل لمستواه:كون واثق اني راح اوريك ضرب
الرجال على اصوله

رفع راسه يتجاهل الوجع من اجل ان لايبين ضعفه
لعدوه:من الرجال ياصالح؟

صالح صرخ بوجهه:انا رجال غصب عنك

جسار:شكلك ملخبط بينك وبين زوجتك

قبض يده بقوه رفع سبابته بتهديد:راح تندم
ياولد سعود وراح تشوف

خرج وعين جسار تتفحص المكان تعب بشدة
هاليومين صمد 3 ايام يوم اخر وسينهار
التدريبات القاسية فادته كثير تذكر كيف كان يغيب
بالصحراء اشهر حتى يتحملون
تمتم بتعب:لا اله الا انت سبحانك ان كنت من الظالمين

فبها انتشل يونس من ظلمات بطن الحوت
عندما ناجى ربه ....

بالعاصمـة..

"الجازي"


الوضع وصل لحده معي فوق مو هالخكري
اللي نايم داخل ولاهمه جعت مت اهم شيء ينام
ياجعلها نومه اهل الكهف تاركني يومين هنا بالصاله
ولافكر يسأل عني اعوذ بالله وش هالنوم لو انه
دجاجة يومين نايم احس ماهو مزبوط ابد وراه
بلاوي ..

من دخلت هالشقه اللي تشرح الصدر من اثاثها اللي مبين انه غالي ماشفت وجهه المهم خلوني
اعلمكم عن هالشقه فيها غرفتين نوم الاساسية
خذاها هالبريعصي الله ياخذ روحه والثانيه مقفله
وفيه دورتين مياه "وانتم بكرامه" ومطبخ وبلكونه
ياكرهي لجو هالمدينة يخنق وعووه
دخلت المطبخ ابغى ادور لي لقمه على لحم بطني
من وقف وخذا مويه وفطائر الله يكثر النعمه
ودي بكبسه اضرب بها الخمس والا مصقع ياونتي
عليتس يالجيز مابوه شيء بهالمطبخ غير طاوتين
وقدر ودله
وش بلاهم هالناس مايطبخون ابدا؟
ياوجه الله لو اني بدال هالمره كان عرفت اتقضى
للبيت شكلهم حطوا فلوسهم بهالاثاث
خرجت من المطبخ جلست بطفش
التلفزيون ملل جداا لاحوول ولا شبكه نت طقت روحي
غمضت عيني الا اشم لكم ذاك الريح اللي يبرد
الخاطر نزلت سعابيلي منه طليت من البلكونه
تحتنا مطاعم وبوفيهات ياسلااااااام لو معي فلوس


خطرت لي فكرة طالعت بالبوك اللي حاطه على الكومدينه فتحته والقى 500 ابتسمت
:والله انك ولد نعمه

مشيت بأصابع رجولي والله باقي شكله نائم بنزل
هاللحين بسرعه منها اخذ لي اكل واقضي للمطبخ

لبست عبايتي وبرقعي وانزل انفتح اللفت وطلعت
بوجهي مره شقرا وعيونها زرق شكلها امريكيه
ابتسمت:مساتس الله بالخير شلونتس انا جارتكم؟

المره عقدت حواجبها ورطنت بهرج ما اعرفه
سحبت نفسي ونزلت حتى الجيران ماعندهم
الله المستعان من هالعيشه

دخلت البوفيه اللي كانت محشره شباب طار عقلي
ياوجه الله لو يشوفني سالم والا متعب كان ادفنوني
هنيا بس الجوع كافر وصيت على سندوشتين فلافل
مع بيبسي "طعميه" وخرجت للسوبر ماركت
وادخل واقضي لي شبسات وشوكولاتات ومكسرات
وعصيرات واطق لي بشحن 100 افعل النت ياسلام
عليتس يالجيز خل هالخكري ينجلط لما مايلقى
فلوسه ههههههه جيت بحاسب رفعت عيني
شهقت بأعلى صوتي:اعوذ بالله من الشيطان
وبلمحة البصر تركت الاغراض وافرك برجلي للعماره
دخلت الشقه رميت عبايتي وبقيت ببرقعي جالسه


وقلبي يطق طبووول ياوجه الله والشبهه كان نائم
شفته بعيني الثنتين يحاسب بلعت ريقي
شوي انفتح الباب جمدت مكاني دخل
وسلم:السلام عليكم

صرخت بأعلى صوتي ذا جني متلبس بصورته
:يماااااااااااااااااااااا� �اااااااااااااااه
نقزت للكنبه واقرأ المعوذات بصوت عالي وارفع يدي
واشر له بيدي:اخرج اخرج تف تف قل اعوذ برب الفلق
من شر ماخلق
لا اله لا اله ..وارجف شوي بسويها على نفسي

بهت مكانه فتح فمه بعدم استعياب رجع لورى
من شكلها اولا ومن صياحها


"فواز"

صحيت الساعه 5 الفجر استدعوني الدوام
اللي احس بثقله مسؤولية كبيييرة وانا ابدا
مو قدها ماشاء الله على جسار كيف تحمله
وضيت وصليت خرجت للصاله شفت الكائن اللي لابس
برقع منسدحه على الكنبه ونايمه ببرقعها وعبايتها
هزيت راسي بأسف انا اللي كنت بين الشقر والحمر
نهايتي مع هالجنيه مدري وين ضيعت بوكي
خرجت وانا متحسر على عمري وشبابي وخايف
من ردة فعل ابوي وعماتي لو عرفوا بهالزواج
رحت للدوام وتأخرت فيه الامور متعقده جماعة صالح
مسكوا جسار وللحين مو عارفين وين مكانه
صح ماربطتني فيه علاقه لكن كان انسان سيده ومحترم له ثقله بمجالسنا حزنت عليه وبنفس الوقت
زاد الثقل ثقلين علي
تذكرتها رجعت للشقه تذكرت ان مافي المطبخ شيء
تو الشقه مشطبه وجديدة وخويي ماقصر عطاني
اياها لين مايرجع من شهر عسله
مريت السوبر ماركت اخذت فطائر وعصيرات وشكلت
شبيسات لبنت القرية لكن وقت ماحاسبت لمحت برقع
والله هالبرقع اعرفه جيت بتأكد اختفى شكلي بديت
اتوهم من هالبرقع الله يعله واعوذ بالله من اللي تحته
العيون تفجع دبسوا بنتهم فيني الله يسامحهم بس
طلعت الشقه دخلت فجأة شفت فيلم كوميدي عجيب
من اخراج "اوم البرقع"
نقزت للكنبه وبدت تصيح
وتقرأ المعوذات لو اني جني ماسوت ربع اللي سوته
فيني
بلعت ريقي وتراجعت لورى لكن تصنمت مكانها لما

طالعته بطرف عين:انت كافر والا مسلم؟
ضحكت لا اراديا من السؤال:لا ملحد
زغلت عيونها:ياحبيبي قد فيه جن ملحدين

حط الاكياس على الارض وبسخرية:والله مالجنيه غيرك انتي وهالبرقع الخايس

بنص عين:هالبرقع ستر للمره وش عرفك به يالملحد وش تبي مني عندي لك واحد تقدر تدخل فيه
عان الغرفه اللي على يسارك تراه نايم من يومين
ولاهو يصلي روح ادخله اما انا فالله يستر عليك
ايماني قوي

تكتف وبضحكة:مطولة على هالحاله يالأخت
بعدين تعالي انتي نزلتي تحت؟

بتشكيك وتلهيه عن السؤال:انت مو جني؟

فواز بسخرية حرك خصره ورقص:لاجني رقاص ههاي "قلد صوت الحريم"

ضحكت بسخرية:تبيني انقط لك وهز ياوز ههههههه

عبس وكشر:ياسماجتك "وبجديه" انتي نزلتي تحت؟



جلست على الكنبه حطت رجل على رجل:وراه
انزل قالوا لك امتر هالشوارع

وده يصفقها على هالرد والنبرة تحمل :جبت لك
اكل
لفت وجهها وبغرور:ماني مشتهيته

طلع بطنها صوت قوي افتشلت مسكت بطنها

ضحك بخفه:أي واضح انا بدخل انام تعبان
ولو سمحتي وتكرمتي افصخي هالبرقع ترا جاب لي
حاله نفسيه

الجازي بسخرية:روح افتح لك ملف بشهار يمدحونه

فواز بشرهه:والله ماشهار الا لك ولأمثالك يقطع
هاللسان انتي بنت متأكده ؟

الجازي بعصبيه رفعت حاجب طلعت عيونها
:وانت متأكد انك رجال؟

طلعت عينه وقف مذهول تخصر ضرب كفوفه
ببعض:لاحول ولا قوة الا بالله صبرك يارب
"وبلعانه" تبيني اثبت لك مستعد؟


الجازي بغباء:ايه اثبت لي

فواز بلعانه: ابشري ماطلبتي شيء الحقيني الغرفه ومابقصر بتشوفين
بعينك اذا انا رجال والا لا؟

قطمت العافيه بلعت ريقها ضحك:ايووه اشوف القط
بلع لسانك يا اوم برقع

لفت وجهها وبحقد:متخلف غبي حيوان لئييم خكري
يارب وش هالبلوه اللي بليتني فيها

فواز بصوت عالي:طولي صوتك سمعينا معك

الجازي رصت على اسنانها:قالوا لك
Fm

ضحك بهدوء:الله يشفيك هاللي بقوله ..


دخل الغرفه فصخ بدلته العسكرية لبس له
سروال البجامه رفع على التكييف اخر شيء
ورمى نفسه على السرير بتعب متجاهل الكائن
اللي برا

طفشت زفرت بقوة :ياشين هالمدن وياشينك
ياليابس طويل ويابس عظمه لاصق بلحمه
كأنه عمود كهرباء

خطرت ببالها فكرة ضحكت:ماوراي شيء

دخلت المطبخ اخذت مناشف وممسحة السيراميك
عبت ملى قدر موية حاره اخذت منظف وديتول
فصخت عبايتها وبرقعها خلته للاحتياط لايطلع عليها

وبدأت تمسح الارض وتدندن شيله:عقب غيبته قلبي تضايق
وصدري غلق تمكن غلاه بقلبي اللي يبيه وعلى حبه
ضلوعي منغلقه كساه الجمال اليوسفي وحلا الخلق
وانا ماجذبني كون ميزاته وخلقه


تقلب بطفش على امل ان تسكت لكن رافعه صوتها"
وتصفق شك انها مو صاحيه وصللت معاه للأخر"

خرج وبنفخه:خييييييييير وووجع ان شاء الله ماتعرفين
توطين صوتك ولاتحترمين الناس النائمه ؟



تركت الممسحه مبلمه انفجعت بلعت ريقها :امسح البلاط

فواز بعصبيه:لاتخلين امسحك فيه الارض بدال هالمنشفه لو يطلع لك حس لألعن ابو جدفك سمعتيني؟

رفعت حاجب وقفت تخصرت

طلع شعرها وبسرعه
:لا والله ماعاش منهو يلعن جدفي بعدين وراك
قايمن علي هالقومه تقول ذابحتن وحده من اهلك
احمد ربك امسح لك هالشقه المروحه اللي ملاها غبار
فعلا جزاء المعروف سبع كفوف

عصب صرخ:ياااااااااااارب رحمتك من هالبدوية

حطت يدها على برقعها والثانيه على خصرها
:وش بلاهم البدو ماهم مالين عينك ياوجه
الله اللي يسمعك يقول مرتكبه ذنب كلها مسحة سيراميك لاحول ولاقوة الا بالله

عض لسانه جمع يده وقدمها لقدام:بحررريقه
سوي اللي تبين لكن انا ابغى انام صاحي من فجر
الله وانتي مندفسه على هالكنب وصوت شخيرك واصل
لحارس العماره



توها تنتبه انه عاري صدت عنه:الله لايبلانا بدال
ماتوقف وتصارخ روح استر عمرك طالعن متفصخ
وتبربر يالله لك الحمد

عبس معط شعره وبكره:يالله نسألك الثبات والصبر
يارب ارحمني برحمتك الوسيعه وعيني على ما ابتليتني

دخل الغرفه وهو يبربر ويسب ويشتم


كشته :هه جعل مالت فوق ماهو قليل حياء وواقف
قدامي متفصخ يشره علي هالخكري

كملت تنظيفها ونقلت الأثاث لعبت بالدنيا
زفرت :هه طلع الحين منظرها احسن والله اني
تحيفه مادروا عني ...شمت نفسها
كشرت:اووف يبغالي ترويشه معتبره بعد هالكرف

طرفت لها بجامه طويله ومنشفتها دخلت
الحمام "وانتم بكرامه" فتحت الدش دخلت
تحت وتغني لسيرين "لو بص في عيني مره بس"

صوتها كان نشاااااااااز وترفعه دفن نفسه
تحت المخده مافيه فايدة حط اللحاف فوقه مافيه
فائدة زفر بقوة صرخ بعجز وتعب :الله يااااااااخذك قولي آميين


وقفت فجأة وتسمع صوت صرخه
رفعت كتفها:يتهيأ لي

ورجعت تغني وهو بيموت من النوم من التعب
نام غصب عنه على الانغام المزعجه

خرجت من الحمام لفت شعرها بالفوطه
حست بأنتعاش:يازين النظافه زينااه
راحت على التلفزيون قلبت ثبتت على فيلم
بزي افلام لشاروخان كوميدي

انبسطت اكلت فطيرتين وببسي من الجوع
ونست تماما ان معها واحد نائم داخل
رفعت صوت التلفزيون على اعلاه



وصوت ضحكها ملأ الشقه
بضحكة هستيريه:ههههههههههههههههه� �هههههاااااي
ههههههه ككككاككك
ركعت قامت سجدت شهقت
زفرت بكت صفقت بقوة
ضربت فخذها وتنطط
من الضحك مسحت دموعها:ههههههه بسويها بنفسي

فتح عينه من الأرق جلس على الفراش
كأنه مؤمياء

حطت يدها على صدرها تفركه مسحت دموعها
:آآه حسبي على بليسك ياشاروخاني

بعد اللحاف طلع للصاله وقف قدام التلفزيون
وبعيون محمره ونبرة ترجي:ممكن تخليني انام
واللي يرحم والديك

اشرت يبعد كأنها تهش الغنم وبعدم اهتمام:روح
نام وش علي منك لايكون تبين اسوي لك دوهه
يادوه بعد يارجال خل اشوف وش بيسوي هالمزيون

التفت للفيلم شاف شاروخان هز راسه بأسف


مشى رجع لها:على فكرة ترا بنات القرى صاروا
اللحين احسن من بنات البدو منين جايه مدري
لكن اللحين حسيت بالمعاناة اللي مروا فيها اهلك طول
هذا الوقت كله

"بخنقه ذابحه النوم"
:ممكن لو سمحتي توطين صوت التلفزيون وتضحكين
على الصامت والله صاحي من 5 الفجر

ابتسمت حطت يدها على فمها وتحرك راسها
:هيييهييي
فواز بتعجب:وش تسوين؟
الجازي برفعة حاجب:الصامت عندي يقلب هزاز
هههههههههههههههههههههههه "ضحكت بقوة"

اخذ الخدادية وضربها بقوة على وجهها
دخل صفق بالباب عيونه تدمع من النوم
رمى نفسه على السرير ثواني حتى تخدر تلقائيا
وماعاد حس بشيء نهائيا..

حكت شعرها:شافني هاليابس بدون برقع
اكيد خق علي افكوورس انا الجيز ..


:
:



"بموسكـو"

سرحت بعيييد وسعود يتكلم عينها على تحريكه
لشفايفه لكن هي بعالم اخر حاضره معه جسديا
وغائبه روحيا

فلتذهب انت وقيس الملوح
وعنتره الى النسيان لقد حزنت لأجلك
اكثر مما يليق بأنسانيتي وانانيتي!!
فلم اعرف يوما طعم الأمان في حبك..
كنت دوما وحيدة ومتحفزة
مثل حارس مرمى لحظة( ضربة الجزاء)
كنت كالمراهقة الطائشه متمسكه بكتلة
من الأوهام والسراب
كنت ارى حبك كقطعة حلوى داخل صندوق
مغلف بالمخمل تجذب الأنظار
نعم
ولكن عندما تذوقت قطعة من حلواك
وجدتها مرة, مبتذله.. اكثر من اضعها بفمي
مع ذلك احتفظت بالصندوق امام الناس

حتى ارضي غروري وكبريائي القبيح!!
ولكن مع كل قطعة اقضمها اكبر يوما تلو يوم
وجدت نساء يشاركنني اياها
عندها ندمت على كل قطعه نزلت لجوفي!!
عزائي على نفسي التي لم تتدارك نفسها
الا متأخرا
وياحسرتي على عمري الذي مضى منه كل ساعه
ودقيقه وثانيه بجانبك ..
عزائــي عـلــى نفســـي!!


سعود بشك:ندى انتي معي؟

فاقت من سرحانها وبهدوء:متى راح يوصل؟

سعود عينه على ساعته:كلها ساعتين وهو هنا
بأذن الله لازم تتفاهمون مع بعضكم لاتنسون فيه
طفل جاي بالطريق راح يعصب ويمكن يرمي عليك
كلام بس تحملي

ضحكت بأستخفاف:من اللي بيتحمل الذل يايبه؟

"نطقتها بسخرية"



نزل راسه:قلبك كبير بيسامح
ندى بأستخفاف:ولاحقد قلبي حقد
رفع عينه كملت:موافقه اتكلم معه لازم هالوضع
ننهيه على خير

استبشر من كلامها ابتسم:الله يحنن قلوبكم

بالمطــار

نزل من الطياره وكان بأستقباله اسماعيل
عرف انه موصله معه فتح له الباب
ركب السيارة وماعلق براكييييين بصدره ينتظر
وقت اللقاء
وقت المواجهه

عض على شفايفه
"ليت الايام اللي جمعتنا تشفع لك ياندى
على هالحركه لكن مافي واحد بالمئة يشفع لك"


بالريــف..

محمد بهدوء:راح يوصل سلمان ولد الامير سعود

فتح عينه عدل جلسته وبسرعه:زوج ندى؟
محمد بشك:ايه ليه وجهك انقلب
رجع انسدح على السرير:لا ولاشيء
محمد:انا بنزل تحت للامير سعود تجي معي
قام لبس جاكيته:لا انا بروح اتمشى هنا كتمه

اخذ جاكيته بينزل مع طلعتها بتصدم فيه رفعت
راسها وبسرعه:آسفه

سكت وبعد ثواني:سمعت زوجك راح يجي
هزت راسها وبأستخفاف:ماقدر على الفرقى

كشر وبسرعه:عن اذنك ..نزل

وبباله"وش متوقع منها ياغبي ماشفت فرحتها
انا وش علي منها يارب رحمتك"

طلعت الغرفه سكرت الباب

"ندى"

اخر خبر كنت اتمنى اسمعه هو خبر جيته
من جاء عمي سعود وتطمن علينا اصر
الا نقعد نتكلم وليتني ماقعدت عطاني كاش

"سلمان جاي"
هربت منه واللحين راح اواجهه
ومتيقنه بداخلي ان هاليوم مابيعدي على خير ابدا
اخر شيء اتمناه اليوم هو شوفته
احن له ايه لكن بداخلي شيء يصرخ
ابعدي عنه ,لاتوقفين قدامه,لاتشوفين عيونه
حاسه بعجز وكأن من قيد يدي ورجولي بسلاسل
فيني غصه ,فيني وجع
لو المح ظله راح اضعف اعرف نفسي
وانا بمرحله مستحيل ابين له ضعفي
لو تموت ياسلمان بن سعود ماراح تلمح ضعفي
ولابتشمه !!

دخلت الحمام واخذت شور طويل دافىء
كل خلية بجسمي تذكرني بهاللقاء اللي
بيصير خلال ساعتين
الله يجمل على هالنفس
ويكون بعونها ..من بعد الفرقى
جاء وقت اللقاء"

خرجت من الحمام رفعت جوالها شافت الساعه
8 مساء
زفرت بقوة وتتساقط قطرات الماء من على شعرها


لتصطدم بكتوفها العارية هبت نسمة باردة
لمت ذراعيها سكرت الستارة فقط
هي بحاجة للهواء رغم برودته ولكن ليخفف عليها
قليلا مما ستواجهه
نشفت شعرها وقفت بأحتيار وش تلبس؟





وقف اسماعيل عند الريف
نزل سلمان بدخول صقر سلم عليه ودخلوا سوا
كان سعود يجري اتصالات عشان جسار اللي مايعرف
وينه وهالشيء اللي مقلقه 4 ايام لاحس ولاخبر
شافه اشر له ويكلم

محمد بأبتسامة:الحمدلله على السلامه
سلمان بجمود:الله يسلمك هه المنطقه بعيده
شكلكم ماخذين استجمام

سكت صقر تبعته نظرات سلمان المستغربه
من وجوده والخافي اعظم لو يعلم المشاعر
اللي يحملها صقر لندى!!


قفل التفت:الحمدلله على السلامه
سلمان بأدب رغم ضجره من اللي سواه ابوه
:الله يسلمك..

التفت حوله تكلم سعود:عرفت عن جسار؟

سلمان بضيق:علمني فواز لقيتوه؟

سعود بيأس:نحاول لعلى وعسى لكن املنا
بالله كبير تعال اجلس

سلمان بضيق:يبه انا مو جاي اجلس لي حساب
وبصفيه
سعود بحده:حقك لكن حط ببالك لو يتحول هالحساب
لشيء ثاني وقتها مابرضى عليك وبيكون لي تصرف
ثاني

سلمان بضحكة وبتعجب:3 شهور ونص وتبي هالحساب مايتحول شيء ثاني بحاول بس مابوعدك

سعود وعينه عليه تفشل من محمد اللي يتشغل
نفسه بالجوال:تلقاهم بغرفة ...

ابتسم:يقولون انه يجيب الحظ اتمنى ذلك
واتمنى هالليلة تعدي على خير لأن وااااااصله معي
لدرجة الغضب معميني وممكن اضحي باحد

سعود بقهر:والله الذي لا اله الا هو يايكون اليوم
اخر يوم تشوفني فيه بحياتك وانا عند كلمتي

ضحكك بخفه وطلع الدرج ونظرات سعود تراقبه
وقف قدام باب الغرفة دقه مره ومرتين

واقفه قدام الشباك وعلى كتوفها الشال الصوف
المخرم بلون اللؤلؤ

طرقه
تلتها
طرقه

حان الوقت لأستعيد هويتي..
حان الوقت لأستجمع شجاعتي
لن ابكي..
لن انهار..
لن احضنه..

مشت بخطوات هادئه ترددت تفتحته طلت من العين السحرية اخذت نفس عميييق
وبسرعه عطته ظهرها مشت لناحية الشباك

بلعت ريقها شدت على يدها عضت على شفايفها
تشجع نفسها

بصوته الجهوري الذي يزلزل كيانها من الداخل
:هذا استقبال وحده لزوجها مافي الحمدلله
على السلامه على الاقل

لفت ببطء تعلقت عينها بعينه هي مرتعبه
من هذا اللقاء هو ارادها قتيله لفعلتها ولكن
بروز بطنها بهذا الشكل جعلت كل خططه تذهب سدى
عينه متعلقه ببطنها رفعت كتوفها
رجعت خصلات
من شعرها متمرده على عيناها المرسومتين بالكحل
الأسود نطقت بشفايفها المطليه باللون الاحمر

بهدوء تحاول استجماعه:الحمدلله على السلامه




قبض يده بقهر مرت اشهر حرمته من رؤية طفله"
يكبر بأحشائها
حرمته من ان يسمع رفاسه بداخلها
قهره برودها وقوتها باقي مثل ماهي ماتغيرت
نفس الوقفه
نفس رفعة الكتف
نفس لمعة العين الخبيثه
والأدهى قوة الحضور اللي يشعر بها غصبا عنه"

طاح شالها بالارض انحنت تاخذه ارتفع فستانها
وتناثر شعرها ليبين نحرها المزين بقلادة خفيفه

حطته على كتوفها تكتفت :اسمعك


التفت قفل الباب بالمفتاح واخذه حطه بجيبه
راقبت حركته تغيرت ابتسامتها الساخرة من سكوته
الى عبوس من حركته تقدم لها بخطوات تسمع
صداها بسبب الارضيه الخشبيه


وبنظرات تنبعث منها شرار:ليش طلعتي بهاذي الطريقة؟

بعدت لورى عطته ظهرها وعينها على الشباك
وبتوتر:انت اللي حديتني

لفها من ذراعها بقوه له وبفحيح قرب وجهه المقبط
لوجهها وبصوت اعلى:لييييييش طلعتي بهاذي الطريقه؟

صدرها يطلع وينزل:لاتصرخ علي

صرخ بقوة:لاتحدين الواحد على اقصاه يابنت خالد
ليش طلعتي بهاذيك الطريقه؟

فجرتها بوجهه وبحده:لأني كرهت العيشه معك ماصرت اتحمل وجودك يخنقني واحد مثلك تنعاف
معاه الحياة

نزلت راسها ماتوقعت بيوم انها بتنطق هالكلام
القااااااسي والمؤلم له
ردها الجمه عن الكلام مصدووم مذهوول!!


ابتسم:مبين بعتي من مبطي يابنت خالد اعترف
غلطت بحقك كثير بس ماوقفت هالوقفه اللي وقفتيها
وقلت لك هالكلام الصريح ما اقول الا عظم الله اجري
فيك اللي كانت بحياتي ماتت من 3 شهور

ضحكت بأستخفاف:عليك نور لما مات ابوي
وين كنت؟

سلمان بغضب:كنت موجود كنت ابغى اعزيك
واقولك انا ابوك اخوك زوجك سندك بس ماعطيتني فرصه مثل اللي صار بالمزرعه

ضحكت بأستخفاف:الله يخليك لاتعيد هالسالفه
عشان ما اذكرك باللي ارتكبته بحقي

سلمان بقهر:لأنك ماسمعتيني بس تسمعين لنفسك

ندى ببرود:عيوني شافتك وش تبي اكثر من كذا؟

سلمان بأستخفاف:عيونك ماتبي تشوف الا اللي تبيه
جحدتي ايام جمعتنا تتوقعين انا نذل لهالدرجة!

دفته بخفيف وبسخرية:سويتها يالنذل وخذيت اللي ماتتسمى

سلمان بهدوء من استفزازها:اسمها روز
صبت لها مويه رفعت الكأس قبطت حواجبها
:هالاسم مر علي يمكن شغالتنا هه لاتتكلم عنها
اكرم انا عن كتلة القذارة حقتك

سلمان بغضب:خليك بحالك

جلست على الكرسي الهزاز :الا تعال قلي
شلون هاللي ماتتسمى مع جناحنا؟

سلمان بأستغراب:انتي وش تقصدين؟

رفعت كتوفها:تعرف مو انتقلتوا لجناحي ان شاء
الله عجبكم

سلمان بصدمه:جناحك مقفل من رحتي

قلبت عيونها بغرور اخذت رشفة من الموية
:اتمنى اصدق بس "بهمس" قووويه شوي همم
"غمزت"

سلمان بهدوء تخشاه:ليش هربتي كانت اثبتي
نفسك اذا كان كل السبب زواجي من روز

ضحكت بثقه:مايهمني اللي ياخذ مكاني من بعدي
بقايا الذئاب ماياخذها الا الكلاب لأن


قامت وقفت قدام المراية حركت شعرها بدلع
وغنج حركت القلادة وتلعب فيها
الحمل زادها فتنة بلع ريقه

لابسه فستان حمل نيلي ساده مزين من الصدر
بفصوص صغيرة شعرها تركته على طبيعته وراسمه
عينها وروج احمر بالمختصر كان شكلها غير
180 درررجة
لكن في شيء يقلب حاله اكثر
كل ماشمه كل خليه بجسمه ترتعد

عــــطـــرهـــا ****

بقهر رفع سبابته:انتي خبيثه شيطان رجيم يمشي
على هالارض لكن انا العنك منك وماشفتي وجهي
الثاني واللي رفع سبع وطوى سبع لأخليك تكرهين
اليوم اللي هربتي فيه

بلعت ريقها وتشوف وجهه المجهم:ماهربت

قربت منها بنظرات غاضبه لصق فيها مايفصلهم
الا بطنها وانفاسهم

رفع ذقنها بقوة ومسك بيده الثانيه شنبه:اتفلي بهالشنب
اذا عديتها لك على خير وحركتك ذي لأطلعها من روحك وراح ترجعين غصب عن هالخشم شفتي
وبتكون قدامك روز وغير روز وراح تجلسين بذاك
القصر لامطلقه ولامعلقه برتبين ولدك وبس وخذيها
مني اللحين حقوقي معك متنازل عنها لأني كارهه
القرب منك فما بالك لمسك

ترك ذقنها بتقرف وبصوت جهوري خلاها تبلع ريقها
اكثر من مره:جهزي نفسك بكره راجعين للرياض
وافتحي فمك بكلمه عند ابوي وقتها راح ادفنك
صح وبطلي هالقوه تراك هشه من داخل تنكسرين
بسهوله وخلي غرورك وهالعزه تنفعك من بعد
هاليوم تحدين الواحد على اقصاه وهو كارهه

"خرج من الغرفه صفق الباب بقوة
فزت معاه ارتجف فكيها بقوة
تشعر بالنفظة والبرد دقات قلبها بتسارع تكاد
ان تسمعها شربت مويه تناثرت نصها مسحتها بقوه
وعينها لقدام مو مستوعبه
مو مصدقه الكلام اللي بدر منه
اول مره تحس بالتهديد
اول مره تشوف سلمان المعروف عنه بالحلم والهدوء

حامق وغاضب لهالدرجة ثواني وكان بيقتلها
تجزم من نظراته انه بالعامي "ناوي عليها
نيه شينه"

نزل بسرعه ومبين عليه العصبيه شافه سعود
ناداه:سلمان


ماسمع أي احد من الغضب والعصبيه خرج
يبغى يبعد قد مايقدر والا بيرتكب بحقه وبحقها
جريمة

زفر بهدوء:يارب رحمتك الاب يطلعون عقلي
محمد وين هالزفت لؤي؟
محمد سكت
لف سعود وبتساؤل:وينه؟
محمد بهدوء:يعني تعرف ب "سكت متردد"

سعود بتكشيره:خلاص لاتكمل ماراح يتوب
الا يجيب سمعتنا بالارض ومرت جسار؟

محمد بسرعه:هي والخدامه بالحفظ والصون
حجزنا لهم غرفه بالفندق وعندهم من يحميهم

سكت وهز راسه جلس على الكرسي وبتعب
وبنبرة مليئه بالحيره:وين مكانه يامحمد خايف
عليه من هالجماعه ماترحم

محمد بهدوء:الله يحفظه ودعه الله
ردد سعود وراه:استودعته الله



بالغرفــة..

رايحه جايه بتوتر من الحديث اللي دار بينهم
ماقدرت تنام من التوتر
سمعت صوت البومه المعلن عن حظ سيء
ربما سيواجهها هذا اليوم
ربمــا؟
اكييد سيواجهها وبطله سلمان الحامق!


دق الباب بسرعه نطت للفراش واختبئت
تحته وكأنه سيراها
سلمان بهدوء:ندى نمتي؟
قامت على حيلها تترقب كلامه كمل:نعسان ابي
ارتاح ممكن تفتحين الباب

ابتسمت بتشفي هزت راسها بالنفي وكأنه قدامها

سلمان بهدوء:راح اصحي الناس النايمه افتحي
ابغى اريح عارف مانمتي النور مفتوح وانتي
مستحيل تنامين الا بظلام

سلمان بضجر:يعني ماراح تفتحين؟

هزت راسها للمره الثانيه زفر بقوة:بحريقه عساك
مافتحتي ماوقفت الدنيا على غرفتك بحجز لي

مشى بطفش نزل وحجز له مقابل غرفته اخذ المفاتيح
عرف انها سوت هالحركة حتى ترد اعتبارها

غبيه حتى بتصرفاتها حط المفتاح بالقفل فتحت الباب
تسندت عليه مطنشه وجود أي احد:صرنا جيران

التفت لمح الخبث واللعانه بعيونها اللي تلمع كالقطط
الشيرازيه عند عتمة الليل

رفع حاجب يحاول
يمتص غضبه قدر الأمكان:ممكن تدخلين وتندفسين
وتنامين تفكيني من شرك "وبتكهم" بعدين مو ناقص
الا تطلعين بهاللبس قدام الخلق

غمزت:اهم شيء عجبك؟
زفر بقوة رفع سبابته:نددددى
بدلع مطت الكلمه:عيوووونها تصبح على خير

ارسلت بوسه بالهواء غمزت قفلت الباب
كتمت ضحكتها حطت يدها على فمها وتخمن
ردة فعله

بقهر:وقحححه ..
دخل صفق الباب بقوة ضحكت بقوة:هههههه
هههههههههه

:
:

بالجهه الثانية
وبالفندق تحديدا

رايحه جايه:ساندي قفلتي الباب زين
ساندى بطفش:يس مدام
فركت يدها:وحطيتي الكنبه على الباب
ساندي:يييس مدام مافي خوف خلاص بوليس
هوتيل برا
ليلى بتوتر:لو صار لك اللي صار لي مع ذاك الحيوان
ماكان قلتي هالكلام وجسار مختفي للحين معقوله
مافقدنا لهالدرجه احنا مانسوى شيء عنده


لفت لقت ساندي تشخر رفعت حاجب تخصرت
:ياقو قلبك ماشاء الله نمتي وان امو قادره
اغمض عيوني اتخيل هذاك الله ياخذه

جلست تحوس بالغرفه رايحه وجايه طفشت
جلست جنب ساندي سمعت صوت دق الباب
انتفظت انكمشت على نفسها وبهلع ضربت ساندي
على فخذها بقوة وعينها على الباب بلعت ريقها
:ساندي قومي ساندي

فتحت عين ومغمضه عين:مدام انا يبغى نوم بلييز
ليلى بهلع شوي بتبكي:الباب يدق قومي افتحي
ساندي بجبن:نو يو مدام
ارخت اطرافها وبجبن:ماراح نفتح سوا اوكي

دق الباب بقوة انتفظوا سوا
بصوته المتعب:ليلى
صاحت ساندي:سير جسار
اعتلتها ابتسامة غريبه كشرت:يمكن مو هو
خلينا نطل ..قامت وساندي جالسه
لفت عليها وبأستفهام:
مفروض تشجعيني مو انا اشجعك



طلت من العين السحرية شافته ابتسمت بفرحه
طلت على شكلها بالمراية ظبطت شعرها رتبت
غرتها مسحت على ملابسها طالعتها ساندي اللي تضحك
رفعت كتفها:عادي يعني "بتشكيك" شكلي تمام
ساندي؟
رفعت ابهامها تشجعت فتحت الباب رفعت عينها
عليه ابتسمت بفرحه سرعان ماتلاشت الفرحه
لما طاح عند رجولها صرخت بأعلى صوتها
:جساااااااااااااااااااااا� �اااااااااااااااار