[لامارا]

نداء التي تتساقط عليها الاخبار كالصواعق قالت بمهاودة لألاء : هدي شوي الاء , اكيد ما حد قاصد هيك ..

بينما قالت غيداء بغضب متصاعد : لا خليها نداء , خليها , هي طول عمرها عازله حالها عنا , و شايفه انه امي ظلمت ابوي , و شايفه انه احنا حقيرات عاقات لابوهن , خليها تحكي , خليها قبل ما تندم و تلوم العالم على ظروفها و طلاقها , تلومنا احنا و تنسى الطريقة الغلط يلي تصرفت فيها ..

فتعالى صوت صراخ الاء قائلة : ايوه انا حره , و انا ما بتذكر الا لما امي كانت تعامل ابوي بكره , كان ابوي ضعيف و بحاجة اي كلمة حلوه منها و ..

قاطعتها غيداء المنفعلة : هو بالله تخرسي , انا مو عارفه انت وين عايشه ؟؟!! انت ناسية شو عمل فينا ؟؟!! انت ناسية انه امي كانت تأمن علينا بالشارع اكثر من البيت ؟؟! انت ناسية انه كنا ننام بالمطبخ بعد ما امي تسكره بالمفتاح و تحط مية الف شغله ورا الباب ؟؟!! انت ..

صرخت الاء : بـــــــــــــــــس , بس بكفي , انا ما بدي اعرف شي , انا .. انا ..

خاطبتها رجاء بشفقة : متذكره الاب يلي حضنك , الاب يلي شفتي باخر سنتين قبل ما يموت ؟؟!! متعلقة بشبح صورة اب حبك , صح ؟؟!!

قالت الاء بانهزام ضعيف : مو شبح ..

فردت عليها غيداء بسخرية : بس عمي احمد وحش , صح ؟؟ هو يلي سرق امي , و هي يلي خانت بابا و تزوجت بعده . صح ؟؟!!

الاء بقهر : انت ليش مصره تشوهي كل شي ؟؟!! انت ليش بتتهمني اني بكره امي او عمي ؟؟!!

غيداء بعنف صادم : لكان شو بتسمي حالتك لما كنت ساكنه معهم ؟؟!! شو بتسمي تحديك عمي و زواجك من مجدي ؟؟!! شو بتسمي كل الاغلاط يلي عملتيها ؟؟!! ناسية و لا اذكرك ..

قاطعتها رجاء زاجره : خلص غيداء , مو هيك الناس بتتفاهم , و بعدين اكيد الاء ما بتكره حد , هي ..

قاطعتها الاء بحزن شديد : ما تبريري عني رجاء ... انا بعرف اغلاطي غيداء , و صدقيني ندمانة , بس اكيد مو ندمانة لأني حاولت اثبت حالي او ما اعتمد على حد , ما كنت بدي عمي يقرر نصيبي , و لا بدي حد يتزوجني بالإجبار ...

غيداء بحزن : انا ما بعرف كيف بتفكري , و الشي الواضح عند الكل , و الحقيقة التي لا جدال فيها , بنسبة الك اوهام , و العكس صحيح , احيانا يا اختي بنحتاج نغمض عيونا و نخلي الناس يلي بحبونا يوصلونا لبر الامان ...