[فيتامين سي]

بسم الله الرحمن الرحيم
السلام عليكم ورحمة الله وبركاته
ماشاء الله تبارك الله
ولاحول ولاقوة إلا بالله

البارت العاشر

لمْ أَزَلْ أمشي
وقد ضاقَتْ بِعَيْـنَيَّ المسالِكْ .
الدُّجـى داجٍ
وَوَجْـهُ الفَجْـرِ حالِكْ !
والمَهالِكْ
تَتَبـدّى لي بأبوابِ المَمالِكْ :
" أنتَ هالِكْ
أنتَ هالِكْ " .
غيرَ أنّي لم أَزَلْ أمشي
وجُرحـي ضِحكَـةٌ تبكـي،
ودمعـي
مِـنْ بُكاءِ الجُـرْحِ ضاحِـكْ !

~احمد مطر~



__________


خاطبت مجد شيلاء -:
على منو تطقطقين بهـ الازرار
-: ارسل رسالة للجازي لا وصلت ان شاء الله
وفتحت الواتس تلقاها
-: يصير اعرفها
-: ايه اكيد .. وتقرأ نص الرسالة
سلام يا الدب عساك بخير ترا ماوحشتيني حيل
يا الخايسة لكن الصراحة وحشتيني عاد فسريها بكيفك
وادري انك الحين حزينة ووحيدة لأنك بعيدة عنّا
" فيس ماد لسانه" وادري ان مشاعرك تنوصف
في هالبيت الحين .. ع قولة سلاف
أبين العقل والقلب احتراب .. لعمري إن ذاك الاغتراب
لكنه ترا يقول في آخر ابياته ..
وقل يارب انت رجاء قلبي .. فمنك إليك بدئي والإياب
صفرت -: ياااااهووووووو دوووووووس
اطلقت ضحكتها الطويلة -: احم ادري اني ذوق
الله يحفظك يا انا
-: احلفي أي ذوق وانتِ تسبين الآدمية في الرسالة
-: يقولك ومن الحب ماقتل يعني سبي لها مباح
-: استغفر الله ايه باقي تحللين وتحرمين بعد
-: لا استغفر الله حاشـ ...
والدتهما مقاطعة -: يلا حبيباتي صلاة العصر
بتخرج عن وقتها
-: على امرك يمه ..



*

بعد الانتهاء من صلاة العصر
وخروج صفوف المصلين من المسجد
عاد ذلك الرجل الذي احترق شعر رأسه شيباً
من الغم والهم .. عاد وفي قسمات وجهه كثيرٌ من الغضب
فتح الباب بمفاتيحه ليصرخ -: أيـــــمـــــــــن ويــــــــــــن فــــــــيـــه
فايزة خرجت من المطبخ..-: علامك يابو ايمن
-: ولدك هذا بيجنني
اقتربت منه بقلق -: وش مسوي
-: يافايزة الصلاة ..الصلاة مايصليها
ولا تدافعين عنه تراك تكسبين اثمه
بتلعثم -: ء ء ااا ايه بس
-: اش بدون بس الحين ولدك وينه فيه
قالت في نفسها .. حسبي الله بس ، مايناديه الا " ولدك "
ما كأنه هو ولده بعد .. -: اا بغرفته
توجه الى غرفة ايمن الصغيرة وفتحها دون طرقٍ حتى
وجده مستلقياً على السرير
والغرفة مظلمة تماماً خالية من اي نورمن الخارج..
إثر اللاصق الاسود
الملصق على النافذة وفوقه ستارة ايضاً
فتح نور الغرفة واطفأ جهاز التبريد
وذهب ناحيته -: ايمن .. ايمن .. ايمن .. ياولد قم
والله ماهوب عيب الا بحرام ينحط هالشارب تحت خشمك
فتح عين واحدة -: همممممم
-: مسرع ما امداك تنام وتونا جايين من بيت جدك
ببحه -: يبه تعبان
-: ياسلام يعني التعب مايجي الا وقت الصلاة
قم قم لا بارك الله فيك من ولد
العابرة بالصدفة سمعت تلك الدعوه لتشهق
مهما كانت عداوتها لأيمن الا ان هذه الدعوه
لديها في قائمة المحظورات ..
ايمن اصبح يستغفر بقوة وضيق وهو يحاول النهوض
قاطعه والده -: كويس وانت عارف ربك وتسغفر
وعيناه مغمضة -: وش قالوا كافر
-: ما احمل بذمتي لكن حديث صحيح عن الرسول
- صلى الله عليه وسلم - العهد الذي بيننا وبينهم الصلاة
فمن تركها فقد كفر
نهض من السرير ليسمع حديث والده الحاد والغاضب -:
ذي المرة آخر مرة ما اشوفك في المسجد
لكن المرة الجاية صدقني العقال لا يرقص في ظهرك
اذا ماعرفنا نربيك زمان
مافي اشكالية نعيد التربية ونربّيك من جديد ..
اكمل ايمن طريقه ليصادف الجوهرة
الواقفة على يمين الوصيد وتنظر له بشفقة
من تلك الدعوه وقليل من الانتصار ..
رفع حاجبه بغبن -: مضيعه شيء بوجهي
لفت ذاهبه لغرفتها -: لا ابد سلامتك
ابو ايمن عندما سمع صوت الجوهرة نادى عليها -:
الجوهرة !
هرولت اليه -: سم يبه
-: سم الله عدوك .. بغيت يايبه تصلحي لي قهوه
-: حاضر .... وذهبت الى المطبخ




*



-: الو هلا .. لحظة ممكن تصبري شوي
اردفت للجالسة بجانبها .. وين بتروحين
-: بروح المكتبه محتاجة شيء ؟
-: لا حبي مشكورة
-: العفو .. وخرجت بعد ان اقفلت الباب خلفها
واستلقت تلك الاخرى على السرير
والسماعات محتضنة اذنيها ، تنهدت -:
خلاص راحت واخيراً الحين آخذ راحتي
-: ايه بلاش اسلوب مؤنث والله تفقعين لي المرارة
-: معليش مؤيد بس تدري لأني مابي مشاكل ..
بهمس يذيبها به -: يعني صار الحين حبّنا مشاكل
بخجل صمتت ليردف ..-: متى بيجي اليوم اللي
راح يجمعنا تحت سقف واحد ..
تولين تبخر وجهها حمرةً لتقول بهمس -:
الحل بإيدك بعد الله ..
-: احم ياقلبي بعدني ابي اكوّن نفسي
-: هاو مؤيد عمرك صاك الثلاثين
وباقي منت مكوّن نفسك ..
ضحك ضحكة رجولية بحته -: هاو !!
والله كنك عجوز اعترفي مع من قعدتي
-: تضيع السالفة اجل .. وبعدين ما العجوز الا انت يا الشايب
-: اذا انا شايب فانتِ بزر يا بنت الثنوي
احمر وجهها غيضاً -: الحين انا بزر !!
وانت يا الشايب وش تقول على نفسك
-: انا لو يكون عمري 40 ماكنت شايب تدرين ليه
وهي تهز رجلها بقلة صبر -: ليه
-: لأني اكون رجال بكامل قواي العقلية والجسمية
-: ياشيخ خف عليناا بس
-: ايه صح وش رايك تنتظرين حتى اصير بالأربعين
وانتِ يكون عمرك ان ما خاب ظني 27
تكونين عاقلة ورزينة ..
-: يعني وش شايفني الحين هبلة وغبية
بضحكة -: ههههههههه لا يابعد قلبي انتِ بس وقتها
تقدرين تتحملين مسؤولية الزواج اكثر من الحين
-: اممم الفكرة جيدة لكن مايصير اكملك 13 سنة
اصلاً بتمل مني يا انك تتقدم لي الحين
يا ننقطع عن بعض ونعتبر هذا وعد وميثاق حبنا
ننفذه ان شاء الله بعد 13 سنة ..
مؤيد بورطة لا يعلم ماذا يجيب ولكن قال -: انتِ مجنونة
تبين تحرميني منك ؟ ..
كانت سعيدة ومستمتعه بمحاصرة مؤيد
وترى بأنها راضية بالذي تقوله -: اجل تقدّم خطبة بس
-: بس انا ماني بمستعد ياروحي
-: طيب عادي الزواج نأجله الى ان تكوّن نفسك
انا راضية ..
-: طيب الحين وش دخل الهرج ذا
-: لأني احبك واحب انسان عزيز في حياتي
فلازم اسوي شيء يرضي الطرفين
-: وش قلتي ؟
-: وش قلت
-: يابخيلة شهر اترجاك تقولين احبك
والحين بكل دم بارد تقولينها لا انتِ بتجنيني
-: اسم الله عليك من الجنون ونرجع لموضوعنا .. وضحكت
-: لأول مرة ادري انك نشبة
-: يووه عاد انا نشبة وغثة واشياء كثير شينة
-: لاا من قال انتِ الزين كله
تنحنحت -: طيب اختر يا تتقدم يا ننقطع فترة الى ما شاء الله
-: يعني يهون عليك تنقطع اخبارنا عن بعض
-: هو صح الاشواق جمرها بيحرقنا لا وبيشوينا بعد
لكن اللي بيصبرنا بعدها اننا راح نجتمع بالحلال ان شاء الله ..
-: طيب اعطيني مهلة افكر
-: ok خذ راحتك
-: يلا الحين عن اذنك مشغول شوي
بتردد -: زعلت ؟
-: افا وشوله
ابتسمت -: ok انتبه لنفسك
-: ان شاء الله وانتِ بعد
-: حاضر يلا باي
-: مع السلامه .. واغلقه
حذف الهاتف الخلوي بعيداً
بعد ان نزع منه بطاريته -: هه هه
شكلي انا اللي الحين بنقطع منك فترة
اخذ هاتف غرفته ليحجز الى نيويورك
يتفقد صفقته التي اوكلها الى اخيه ...


*



-: اف اف وش ذا قسم اذوب انا
-: لا لا تذوبين علينا ورانا اسواق نيويورك
-: معقولة هذا مطار لا هذا عالم ثاني
اطلق شيء سووه هنا هالأسواق ..
بهمس -: تصدقين خفت يرفضون نروح
لوحدنا نتمشى ونشتري
-: لا شوفي المحترم محترم وحنا الحمدلله فليه يعيوون
علينا الا اذا كل واحد يبي مرته ذا شيء ثاني
-: الا قولي يبون الفكة منّا
-: والله اني ارحم نايف اتوقع لو يقولون له
تبيع رزان بكم يقول خذوها بلاش
بضحكه -: اف اف وش مسويه له
لا تكونين مكربه عليه حياته
-: لا حرام عليك وين بس انا انسانة مسرفة الله يهديني
-: ايه والرجال ازفت شيء عندهم يوم يحصل مره كذا
-: اما انت الله يحفظك ماشاء الله عليك ما احسك مسرفة
حتى احس ان بينك وبين رجلك تفاهم عكس بعض العرسان
بألا شعور -: من جواد !!!؟؟
قاطعتها -: لحظة لحظة رجلك اسمه جواد وانتِ الجازي
وش هالصدفة العجيبة
ضحكت وهي تقلدها -: لحظة لحظة رجلك اسمه نايف
وانت رزان وش هالصدفة العجيبة
بغرابة -: أي صدفة !! .. عاد انتو حرفكم الأول سوا اذا حذفنا الـ
( ال ) من اسمك لكن حنا لا وش من صدفة ياحظي ..
-: انتِ الحرف الأخير من اسمك يكون اول حرف
من حروف اسم رجلك ..
شهقت -: اي والله صدفة غريبة عجيبة ما قد انتبهت ابد
-: مشكلتك ماتلاحظين سريع
ابتسمت -: خلصت السوالف علشان نمسك اسمائنا
ضحكت -: مادري عنك انتِ اللي فتحتي هالسالفة
ضحكت هي الأخرى -: خلاص ماعلينا
الا وش رايك ندخل هالمحل
-: ok
دخلتا واذا بفستان يشد انتباه رزان ولأنه كان معلقاً
في الاعلى نادت على العامل -:
اخوي ممكن تجيب ذا الفستان
-: أي واحَد
-: الليموني
-: حازر
واعاطها اياه لتقلبه وترى السعر -:
ءءء جزوش تعالي اقرئي السعر يمكن انا غلطانة
قرأت السعر -: اووف وش ذا بـ 400 دينار
امشي امشي طلعنا
وضعت الفستان بحذر على الطاولة لكي لاينتبه لها احد
وريداً وريداً حتى خرجت
وخلفها الجازي ضحكت عليها -: وش فيك
-: لا فشلة ارجعه دون ما اشتريه
-: طيب تروحين معاي الحمامات الله يكرمك
ولا تنتظريني هنا
-: لا يلا معك بس خلينا نسأل ذي
البنت اللي قدامنا وين مكانها ..
-: ايه لحظة انا بروح لها
... السلام عليك اختي بغيت اسألك
وين دورات المياه وانتِ بكرامه ..
-: اهلاً خيتو وعليك السلام
تعي وراي خيتو وانا بوصلك إلها
-: مشكورة والله تسوين فينا خير
بس اهم شيء مانعطلك
-: لا شو ماعندي أي شغلي تعي معي
-: طيب ثواني .. ذهبت لرزان ..
يلا هي بتودينا ...
وسارتا بجانب الفتاة التي هي من اصول لبنانية
وعندما وصلن ..
قالت رزان -: مشكورة اتعبناك معنا
-: العفو .. ليه شو هالحكي وهلأ صار لازم اروح
تامروني على اِشي ..
الجازي -: لا سلامتك حبيبتي
لفت ذاهبه ولوحت بيدها بعلامة الوداع " مع السلامة "
رزان -: يووووه تخبل اسلوب وجمال الخايسة
لو تعطينا شوي ..
-: قولي ماشاء الله حرام عليك
-: اي والله ماشاء الله عليها
ودخلتا دورات المياه كانت شبه فارغه
الجازي حمدت الله فهي لا تحب الازدحام
بعكس رزان -: اف الحمام فاضي عبالي مليان
وكل واحدةٍ فيهما نزعت الغطاء عن وجهها
رزان لفت للجازي لتفتح فمها من هول الصدمة
اما الجازي فلم تكن معها بل كانت تنظر للأمام
وتفكر بأمرٍ ما ..
وقفت رزان امامها -: هيه سؤال
متأكدة ان اصلك سعودي
الجازي جُرحت ولكن لم تظهر ذلك -: ان شاء الله
-: ليه منتي واثقة !!
-: احم رزان ترا انا بنت ملجأ
رزان شهقت ووضعت باطن كفها بفمها -: آ ..آسفة
-: لا عادي اصلاً مالي الا شهرين بالملجأ ثم تزوجت
-: شلون ! .. تراك حستي بمخي
ابتسمت -: احكي لك السالفة ان شاء الله في نيويورك
بس انتِ ذكريني ..
-: من عيوني .. امم ماشاء الله عليك ابداً ماتوقعتك كذا
-: لا عاد لاتبالغين يمكن بس هي عيوني
اللي مختلفة اما ملامحي عربية بحته لا وسعودية بعد
-: تصدقين لو كشفتي بإمريكا بيحسبونك منهم
-: شدعوه عاد .. جد انك مسرفة
يعني حتى بالكلام مسرفة
ضحكت بعمق -: اهانه حرام عليك
-: طيب انتِ ليه مستهينه بجمالك
ع الاقل انتِ عندك غمازة علامة الفتنه لكن انا لي الله
-: ايا الظالمة والرماد ذا اللي في عيونك
-: اعوذ بالله أي رماد انتِ
اقول خشي الحمام قبل لا اهفك بذي الشنطة
وهي تدخل -: طيب يا ماما
جلست الجازي بالكرسي المركون بالزاوية
وبدأت تتلمس النقاب المفتوح وهي تسترجع موقف سابق
-: لحظة يابنت صعبة تمشين بالرمية
اخاف تصدمين بأول عمود
-: لا مو عاد لهدرجة
-: اي والله صادقة صالحة
-: طيب و السواة !
اخرجت عبير من حقيبتها اليد -: هذا انا عندي نقاب
مفتوح البسيه وان شاء الله ماعليك حرج
لأنك مضطرة يا تكشفي يا تتبرقعي
-: لا هذا حقك مايصير
-: لا هذا حاطته بشنطتي احتياط ما احتاجه
-: متأكده
-: ايه والله خذيه انتِ بحاجه له
واذا ما ارتحتي وعيونك مكشوفة غطيها بالشيلة
مثل بعض البنات ..
صمتت لتفكر قالت لها شيلاء ..-:
خذيه وغصباً عنك بعد
ابتسمت .. اشتقت لكم رغم اني مالي وقت من رحت عنكم
جد قلوبهم صافية ونقية مو بمثل لمن كنت بالدار
كل يوم هوشة وبين البنات غلّ وحقد وكراهية
وكل وحدة لها عالمها الخاص ..
وبدأت تسرد المقارنات بين بنات الدار وبين قريبات جواد ..
قاطعتها رزان التي تعدل نقابها -: تصدقين يمكن ما انزل
الشيلة على عيوني ..
-: وتصدقين انا بعد الحين بلبس نقاب
-: ايه احسن لك علشان تشوفين عدل
لمن نكمل تسوق ..
-: ايه ان شاء الله
.. يارب اني اجد مكان عباءات هنا
أعجبني حجاب لجين الذي يُرى منها شيء
فلماذا لا اعتز بالحجاب الكامل وارتديه هناك ..



*


وكالعادة تحب ان ترسم الابتسامة على ثغر الاخريات
تأخذ كل ثانية منديلاً وتمثل البكاء -:
اهئ اهئ البيت صار ظلام اهئ اهئ
ووضعت المنديل في انفها لتصدر صوتها مقززاً
اهــــئ اهــــئ
ركلتها التي تقابلها -: يا وصخة دون قرف
اوكيه ابكي بس مهو بكذا
-: اصلاً انتِ كيف تكونين بنت
مستحيل قلبك قلب انثى اهئ اهئ
تالا ببتسامة شقية همست في اذن رشيدة -:
ماما رؤى ماتعرف تمتل تمتيلها مرا عبي
رشيدة ضحكت على طريقة تالا البريئة في الحديث
-: ترا في ناس يحشون عليك يارؤى
-: من .. عساهم الجنة يخففون ذنوبي
-: بس تراهم ماعندهم ذنوب
شهقت وهي تنظر للطفلة
التي تزين ثغرها بذلك المبسم الشقي
-: تلّو معقوولة تطلع منك
وانقضت عليها لتدغدغها في بطنها وهي تضحك
الهنوف ابتسمت -: حلو ان سطام مخليكم في بيت واحد
سامية ومشاعرها المنتشية بفرح الأمل -: ليه حلو
ماتسمعين المضاربات والهواشات اللي تصير
-: طيب وهذا اللي يزين الجلسات والجمعات ويجمّلها
رشيدة -: اي والله صدقت بنيتي يا ان كلامها درر
باستحياء -: شكراً
-: عفواً ياحلوة .. هاه ماقلتوا وش تبون ناكل بالعشا
سامية -: خلونا نطلب من برا
رؤى لفت عليهن وفمها ممتلئ بالمناديل اثر
معركتها مع تالا .. وكانت تالا تضحك بغنج وانتصار
لتقول رؤى كلاماً لم يفهم من هذه المناديل
اشارت الهنوف لفمها -: هذا هذا ابعديه
ابعدت المنديل الأول ثم الثاني وحتى اخرجته جميعه -:
كح كح انا اوريك يا تالا ..
احم ايه اقولكم اطلبوا دام سطام مهاجر
تالا حضنتها من الخلف -: ماما اسفة ..
اخذتها من يدها واجلستها بحجرها -: لا عادي ياحبيبة ماما
بشقاوة -: طعم المناديل زين ثح
ودغدغتها -: يا السوسة ..
سامية -: خلاص نطلب بيتزا وهذا هو عشانا
الهنوف -: تمام بس ينتهون من الصلاة ونطلب
رشيدة -: يالله كويس ذكرتوني ما قلت اذكار المساء
سامية -: زين وانا بعد بقولها
الهنوف -: لا انا الحمدلله قلتها
رؤى من اخر الصالة -: ياناس وين سطام
يجي ويكفخ ذي السوسة
الهنوف ذهبت اليها -: يخي حرام عليك
وش فيك على توتي الجميلة
-: جميلة في عينك ترا يركب عليها
من برا هالله هالله ومن داخل يعلم الله
-: لا حرام عليك مو لهدرجة عاد
-: طيب خذيها واحكمي
سامية لرشيدة -: والله يحزني سطام جد ارامكو
شيء متعب الحين يروحون بالباخرة ويرجعون فيها بعد
بلاه مايحس بدوخه في هالبحر ..
-: لا خلاص متعود مانقول الا ربنا يحفظه
-: امين يارب .. ونظرت لناحية الهنوف ..
ايه هنوفا ماقلتي متى بتداومين
لفت عليها -: وع وش ذا هنوفا
-: اجل وش اناديك
-: اممم ناديني نوفا
-: وش ذا هنوفا احلى عاد نوفا ذي اسم مويا
ردت عليها ببتسامة -: بس انا عاجبني
دلعي نوفا ودلع اختي نوفي
-: يا سلام صلحتو ..
اتسعت ابتسامتها لتتضح جميع ضروسها -:
ايه وش كنتي تقولين قبل شوي
-: لا بس اسألك متى بتداومين ؟
-: سطّام قدّم اوراقي وملفي
ويصير لو من بكرة اداوم لكن انا قلت اداوم من يوم الأحد
من بداية الاسبوع الجاي يكون احسن
-: ايه داومي خلاص كافي دلع ياعروس
احمرت وجنتيها بخجل .....
رشيدة -: خلاص ياسامية خفي على البنت ..

*

في صالات الانتظار فقط هي دقائق بسيطة
وسيصعدون الطائرة ..
قُطعت التذاكر واصبح المبتعثين
يسيرون وفي داخلهم اصرار وحماسة لدراسة
لهم من نوعٍ جديد ..
في الطـــــائــــــرة ....
نظرت اليه بتردد وقالت -: ء ء نايف
نظر اليها ببتسامة -: هلا قلبي
تنحنحت -: تسلم آ آ طيب الحين روقت ولا باقي
اتسعت ابتسامته حتى بانت ضروسه -:
افا اجلس يم رزان بعد تسبدي وما اروق لا ذي مصيبة
-: ايه واضح من اول ماد البوز شبرين وعاقد هالحاجب
-: بس بس اكلتيني بقشوري ..
-: آسفة حقك علي طيب يعني ممكن طلب صغيرون
بصوت خفيض -: ايه عدل صغيرون يعني كبيرون
لم تسمع ما قال -: ويش ؟!
-: لا سلامتك كنت احك يدي
ضحكت -: يا سلام جايتك فلوس
-: بسك خرافات الا قولي طلبك وشهو
بلعت ريقها -: اممم يعني يصير نبادل خويك بالمقاعد
هو يجي مكاني ونا اروح مكانه
رفع حاجبه -: وليه ان شاء الله
هففف غبي ذا مايفهم ! ..-: يعني الرحلة طويلة
اربع تاعش ساعه وانا مقابلة وجهك بتزهق مني
اعرف نفسي مغثة ومهو احسن يكون خويك معك
تتونسون سوالفكم ويا بعض مشتركة
وانا اقعد مع مرته نستانس ويا بعض
-: ايه قوليها من الآخر انا بالطقاق لكن اهم شيء انتِ
-: ليه يا نف نف ماهقيتها منك ينقص لساني
قبل لا اقول شيء مثل هيكا
-: ترا كنت امزح ونف نف ذي خليها لك مشكورة مانبي دلع
-: وش اسوي عجزت وانا ادور لك دلع يروقك
ناديتك نايفوه قلت اصغر عيالك انا
ناديتك نيفو قلت خليه للشغالة
قلت لك نيوفي قلت وش شايفتني بزر قبالك
ناديتك ...
وضع يدعه امام وجهها -: بس بس خلاص وياكلمة ردي مكانك
والحين اكلم جواد وتضفين ..
بتحلطم وسخرية -: ياربي ماعنده اسلوب
اصلاً الاسلوب يقوطر منه عسل
سمعها -: عفيه يا ام اسلوب لا يرتفع صوتك
فينقص لسانك .. وعندما ذهب ابتسمت ثم ضحكت
تبن لكن شسوي احبه ! ..
نايف ذهب لمقعد جواد الذي يفصله عن مقعده
ثلاث مقاعد فقط -: جواد
نظر اليه -: هلا محتاج شيء
-: ايه وانا اخوك ودي .. ويهمس ..
النسوان يجلسن مع بعض
-: شكله خطاب رسمي من الامم المتحدة
ضحك بصوت مرتفع -: يقطع ابليسك ايه
ويلا وقّع عليه وانت ساكت
-: اقول محنا في الاستراحة تضحك كذا
خلك ذرب ياشيخ ..
-: اقول امش امش وانت ساكت
-: طيب روح والحين لاحقك .. لف للجازي
نظر اليها ولم ينطق بحرف ثم ذهب ..
تخطّى الثلاث مقاعد ووصل لمقعد نايف
ووجد مقعد زوجة نايف فارغ -: ماشاء الله الأمم المتحدة مستعجلة
-: يخي احترم وجودي تسب في الامم المتحدة عيني عينك
ضحك -: هذا وانا ماسبيتها صدق اجل لو سبيتها ..
قاطعه -: اقوول !
-: خلاص وياكلمة ردي مكانك
-: ايه ياوحش ثمن كلامك علشان لانغلط
حنا بعد على الوزارات الداخلية ..
بحدة صوته المعتادة -: جرب لو انت كفو
بسخرية -: ولو غلطت لا سمح الله
بتحذفني من الطيارة مثلا
-: ميبي ليه لا
-: يااهووو يا غيور اقول لاحد يسمعك
-: هذا انت سمعتني ياشيخ
-: ياسمجك الا تعال قولي
-: ويش
-: مارديت على جوابي
-: والله بعد تفكير انا اقول خلنا في المبنى اللي حاجزينه لنا
-: بس العيشة ياخي في نيويورك غالية
وبالذات هم حجزوا لنا في مانهاتن .. وبسخرية ..
ياحبيبي طارت المكافأة ..
-: طيب خلنا نقول سكنا في نيوجيرسي
كم بيفرق خمس دولارات ولا عشر
مو الميترو والتكاسي بتاخذ ..
-: حنا المشكلة لمن قدمنا اوراقنا للابتعاث
كان مافي الا نيويورك وفرنسا وانجلترا
وجانا الحظ في نيويورك ..
-: وتصدق حظ جميل بس على الأقل انت رحتها مرة
يعني عارف فيها اما انا خبري خبر جدي مطلق
ابتسم حتى بانت ضروسه العلوية -: لو يسمعك الحين
بخفة دمه وبرجته السابقة -: لا ارجوك ماتقوله ارجوك لا تتهور
-: اظن انك عقلت يا المتزوج
-: بالمشمش
في جهة اخرى ... نغزتها -: جزو شوفي ذي اللبنانية
اللي دلتنا على الحمامات ..
-: اي والله هي .. معقولة مبتعثة
-: اي شكلها
بس ماجت معنا من السعودية
-: لا ياشطورة لو كانت من مطار الدمام
كان هي الحين ابتعاث ماجستير بس حنا التقينا فيها
بمطار ابو ظبي فبالتالي هي ممكن تكون رايحة سياحة مهو ابتعاث
-: صح تحليل منطقي بعد
الا الجازي ممكن تحكين لي ذيك السالفة نضيّع وقتنا
وانتِ ادرى شلون الرحلة طويلة
-: وانا قلت بنيويورك
-: طيب يصير هنا !
ابتسمت -: مصرة ؟
-: لا عادي براحتك
-: طيب اسمعي يا جميلة .. السالفة تقولك
قبل كم شهر جيت دار الايتام واللي جابوني
رجل ومره وانا كنت ومازلت فاقدة الذاكرة
بصدمة -: فاقدة الذاكرة !!
اغمضت عينيها -: ايه والحمدلله على كل حال
اهم شيء العافية ..
-: صدقتي وآسفة اني فتحت هالسالفة
فتحت عينيها ببطء -: لا عادي الكون باقي بخير
المهم اللي صار اني جلست في الدار شهرين
وفي هالشهرين طلعوا لي اوراق واحتاسوا بالعمر
وكل شيء الا الاسم المره هذي قالت لهم ان اسمي الجازي
واختفت بعدها هي والرجل ..
قالوا عمري عشرين والله العالم كم عمري الصحيح
واسمي هل هو صحيح ام لا الله اعلم بعد
هالاثنين ما افصحوا عني أي شيء
وكأنهم حذفوني من منفى لدار الأيتام
ويقدر الله في يوم من الايام في ذي الشهرين
تجي ام جواد ومعها كم مَرَه وعندهم مشروع خيري
من اكل وصدقة واشياء الله يعطيهم اجرها
وكنت انا ووحدة من البنات اللي يستقبلونهن
وكانت هي تناظر لي كثير حتى انا خفت ماني بمتعوده
على ناس غُرب لكن الحمدلله هذاني متزوجه على ولدها
ومنجد ياحظ جواد على امه حيل
طيبة الله يحفظها ويرزقها الجنة ..
-: انتِ شلون كاتمة كل ذا في قلبك
ومع كل هذا تبتسمين ولا كأنه صاير شيء
-: وليه احزن دام الله معنا
وانا راضية باللي مكتوب لي من رب العباد
-: الله يثبتك ويوفقك جد كبرتي في عيني يا الجازي
-: وش دعوه انتِ بعد
-: لا جد ماشاء الله عليك وعلى خصوص ذاكرتك
راح اساعدك ان شاء الله في استرجاعها
-: ادعي لي وماتقصرين ..
-: من عيوني
-: تسلم عيونك الا وش رايك نهجد شوي
-: شكله معك نوم
-: مرهقة شوي ..
-: ok استريحي واسترخي
-: ان شاء الله
هدأتا الاثنتان لتقرأ رزان مجلةً امامها
والجازي من شدة الارهاق لم تستطع النوم
وحبذت ان تبحر في يمِّ افكارها وخيالها
لتعود بما تبقى من ذاكرتها الى ذلك اليوم
الذي جلباها الرجل والمرأة
كانت سيارة سوداء مظللة النوافذ
وكانت هي مستلقية بالخلف ورأت المرأة
لتقول لها -: كويس انك قمتي مابقى علينا شوي ونصل
بهدوء -: ويني انا من انتم من انتِ ومن هو بعد
-: حنا فاعلين خير ارجعي نامي الين نوصل
نهضت وعينيها الشاحبتين تذبل شيئاً فشيئاً -:
ابي ماء ..
الرجل -: مافي اصبري قلنا شوي وتوصلين بيتك
بضياع -: بيتي !! انا ما اعرف احد هنا
من انا اصلاً من انتم ووين حنا
بنهيار .. ابعدوهم عني ابي عمر ابي عمر وينهم
من هم من انتم يبه ابعدهم ولا راح اموت ابعدهم يباااااه
الرجل -: اعطيها حبة منومة بسرعه
بربكة -: ء ء حاضر
وبعدها لم استيقظ الا وانا في ذلك الدار الموحش
بالنسبة لي حينها .. وبعدها بدأت بالتعرف على الموجودات
ولكن بحذر شديد .. والآن ماذا !؟ انا ذاهبة لبلاد غريبة عني
اشعر بالخوف يفتت كياني ويحرقه كشظايا تبعثرت في الهواء
فلا احد احتمي به حتى جواد !
سأحاول ان افتح معه صفحة جديدة ولكن ما هذا
ان الصحف والصفحات الجديدة ليست اضحوكة لـ العب بها
مثل ماشئت ولكن الغربة والاغتراب من اقرب الاشخاص
لديّ حالياً شيءٌ صعب وعلاوةً على ذلك
جواد لن يرضى ولن يرضى ثم لن يرضى
ان يوقّع على عقدي المزيف وعلى صفحاتي البالية
فهو شديد الكبرياء كطبيعة الرجل الشرقي الذي لا يرضى بالقليل
يبدو اني سأمشي بصمت في تلك المسالك الضيقة
والمظلمة حتى اتجنب الاحتكاك بجواد ..



*

اقفل الجوال وفتح اول ازارير قميصه
فهو يشعر بالاختناق رغم اتساع المكان
وكثرة الاكسجين -: يارب مايكون كلامه صحيح
جلست بجانبه وهي تصب له القهوة -: علامه ابو عبير متضايق
حضنها من الجانب -: لا تاخذين ببالك يبه اهتمي بدروسك وجامعتك
-: لا يبه تخبي علي وانا اكبر بناتك كذا تخليني اقلق عليك
قبلها بخدها -: ماعاش من يخلي عبورتي تقلق ..
اشتعل وجهها بحمرة الحياء -: كافي يبه والله استحي
-: ايه علشان ماتسألين ثاني
نهضت -: خلاص توبه اسألك ثاني ..انا الحين رايحة
دخل سلطان وسمع آخر الحديث -: ايه الحين تشرد هالدلوعه الحياوية
-: يبه شف ولدك يحب يغيظني
مد لسانه -: بزر
تخصرت -: وانت وش الحين
-: ابد رجال طول بعرض الله يحفظني
والدهم وهو يخفي ضيقه ابتسم -: ايه هين
يا ابو طول وعرض لو انت رجال مامديت لسانك وحطيت دوبك من دوبها
عبير بخجل وهي مقهورة -: عفواً يبه شتقصد يعني انا بزر
وهو الحين ياخذني على قد عقلي
-: افاا من قاله لا تفهمي من عندك يابنيتي
-: لا يابو سلطان قولها لاتخليها بخاطرك
قول ان عبير بزر ترا يليق عليها
نظرت اليه وتخصرت ثانيةً -: اولاً يا الابن الثاني محد
ينادي بابا ابو سلطان الا انت فلا تفشل روحك اكثر من كذا
بسخرية -: ايه صح يا بابا بس دام سطام مب هنا
انا الأوْلى وش تبون ينادونه يابو عبير
والدهما -: وياسلام ماحشمتوا وجودي بعد
سلطان تقدم لوالده ليقبّل رأسه -: شدعوه يبه
ترا حنا نمزح صح عبره
-: ويـع وش ذي عبره !
بنظرة -: اقولك صح ؟
ابتسمت ببلاهة -: وش صح ؟! اقصد على وشو
صك جبهته -: ياليل البعارين ماجت تناحتها الا الحين
ماعليك يبه امسحها بوجهي
الجودي دخلت وقد لقطت معها آخر 3 كلمات -:
طيب واذا مافي كلينكس بوشو يمسح
-: هه هه ظريفة
-: شكراً من يومي اصلاً وانا ظريفة
.. وانتبهت لوالدها .. ياهلا وحيّ الله ابو الجودي
اجل سلّمت الحين من الدوام ؟
وذهبت اليه لتقبل ظاهر كفه وشعر رأسه
عبير وهي تجلس على احدى الكنبات تمتمت -:
عائلة غريبة ذاك يقول بو سلطان وذي تقول بو الجودي
اجل ويني انا ووين مكاني من الاعراب !!

*

مرّ على الرحلة زمنٌ طويل ولم يتبقى الا القليل
القليل فقط ...
صحت من النوم وهي تمد ذراعيها للأمام وتثاوبت
وعندما بدأت تضح لها الرؤية لفت يمينها -: رز ...
لم تكمل من الفجيعه .!
الشخص الذي كان بجانبها لم تخفى عليه تلك الشهقة العشوائية
التي خرجت دون سابق ميعاد ولكنه حافظ على هدوئه
واسترخائه ومازالت عيناه تحتضن بعضهما البعض بشده
خشية ان يفتحهما فتتفارق رموش عينيه ..
تمتمت -: هذا وش جابه هنا خبري عند خويه !!
اعوذ بالله لا اكون اتخيل
زفرت .. ربِّ أعوذ بك من همزات الشياطين وأعوذ بك ربِّ أن يحضرون
ترك الحرية لعينه اليمنى بالفراق لينظر بها اليها -:
وش قالوا لك شيطان انا تستعيذين مني
ارتبكت -: حسبالي اتخيل .. لفت يمنة ويسرة
ء ء ء وين وينها رزان
اغمض عينه ثانيةً -: عند زوجها بغيتي شيء !
بهمس -: لا ولاشيء
-: ok اجل اخمدي
فتحت عيناها باتساع كبير .. يبدو انه ليس صادق فيما يقول
اشعر اني مللت النوم حتى ! ..
وكأنه قرأ افكارها -: ايه صح مراح تخمدين وانتِ نايمة 11 ساعه
شهقت بقوة وقد نست هواء الزفير لشهيقها
ولفت عليه بكامل جسدها -: احــداعــش !!
اعتدل بجلسته بعد ان كان شبه مستلقي ولف ناحيتها
لينظر اليها ولا يفصل بينهما الا قليل من الأكسجين المتطفل ..
رفع حاجبه .. " بمعنى .. خير ويعني احداعش ! .."
تحمحمت واعتدلت بجلستها بعد ان فضحتها الربكة
المترسبة في عينيها .. ياربي احسني بالنقاب مفضوحة
مهو مثل اول كان ولا شيء يبان مني ! ..
-: ع العموم بقى ثلاث ساعات ونصل
اذا تبين تبدلين عباتك ببالطو براحتك
-: لا بس ابي ابدل عباية الكتف بالراس
نظر اليها بتعجب وهو يعي تماماً بمدى تفكير
بعض فتيات بلده الخرقاوات وانتظارهن لمثل هذه اللحظات ..
اما هذه فقد كان جوابها لجاماً ...
تحدثت بثقة نزلت عليها هبةً من السماء -: ترا حجابي
مايهمني فيه رأيك حتى لو كنت ولي امري
اهم شيء ربي يرضى عني في حجابي وحتى لو كنت
في دولة الحجاب فيها شيء غريب ..
-: No No بالعكس هذا شيء يشرف وذا شيء راجع فيك
منتي صغيرة علشان ابيّن لك هذا حلال وهذا حرام
بعفوية -: طيب لو كشفت ماتغار ؟
لف عليها بكامل جسده وهو متعجب منها بقوة
لم يعد يعلم كيف يتصرف معها .. انعقد جاجبيه تلقائياً -:
وش قلتِ !!؟
خافت عندما لمحت عقدة حاجبيه لتصبح ملامحه حاده -:
ء ء لا ولا شيء ممكن اروح الحمام ابي ابدل العباية
-: لا اول قولي وش قلتِ
-: انا ماقلت شيء مهم
-: يعني مُصرّة
-: احم ايه
هز رأسه -: روحي
ونهضت هي لتتجه الى الحمام وفي يدها كيس
لماركة عبايات قد اشترتها سابقاً من المطار ..
وقد تركت خلفها جواداً يعوم في لجًّ لأفكاره ..
اغار !! وبأي صفةٍ لها اغار
ما الذي تقصده بقولها ذلك والى ماذا ترمي اليه
وماهو هدفها ؟
لو تعود ذاكرتها فقط لَنحلّت عقدٌ كثيرة
والغازٌ كبيرة ..
الجازي هي في حياتي احجيّة
لا اعلم متى الله سيأذن لي بحلها !
هل اتجاهل الذي حدث ؟
ولكن ان كنت سأتجاهل فالواجب عليّ حينها
ان انتقم لنفسي والانتقام هو ....... !


_____________

انتهى..

اعتذر عن قصر البارت
وبإذن الله موعدنا راح يصير كل جمعه..
ولا تبخلون عليّ بتوقعاتكم وتحليلاتكم للشخصيات
تراها اشياء بسيطة لكنها تسعد ..

*
لمحات من ملامح البارت القادم ..

لمحة مبعثرة ..: نظرت اليه سريعاً وعقلها مشوش
ماذا يقصد بأم سعود !!

لمحة خجولة ..: نايف بس .. ترا حنا بمكان عام

لمحة احتقار ..: لسنا بعيد الهالوين لترعبي الاطفال

لمحة خلقت بلا ملامح ..: صعد العربة وساعده
السائق بحمل اخيه ليقول السائل بلكنة انجليزية متقنه -:
يبدو انه مخمور ..




*

سبحان الله وبحمده سبحان الله العظيم

كفارة المجلس ..
سبحانك اللهم وبحمدك
اشهد ان لا اله الا انت استغفرك واتوب اليك