[فيتامين سي]

بسم الله الرحمن الرحيم
السلام عليكم ورحمة الله وبركاته
ماشاء الله تبارك الله
ولاحول ولاقوة إلا بالله

" اتمنى من الكل ماينسى موعد تنزيل البارتات
دايم اعيد وازيد فيه اللي هو يوم الجمعه ~> تعبت نفسياً =( "

البارت السادس عشر

" قراءة ممتعه "








تصْرخين.. وتخترقينَ صُفوفَ الجُنودْ.

نتعانقُ في اللحظاتِ الأخيرةِ,..

في الدرجاتِ الأخيرةِ.. من سلّم المِقصلَهْ.

أتحسَّسُ وجهَكِ!

(هل أنت طِفلتيَ المستحيلةُ أم أمِّيَ الأرملةْ?)

أتحسسُ وجهَكِ!

(لمْ أكُ أعمى;.

ولكنَّهم أرفقُوا مقلتي ويدي بمَلَفِّ اعترافي

لتنظرَه السلُطاتُ..

فتعرفَ أنِّيَ راجعتهُ كلمةً.. كلمةً..

ثم وَقَّعتُهُ بيدي..

- ربما دسَّ هذا المحقِّقُ لي جملةً تنتهي بي الى الموتِ!

لكنهمْ وعدوا أن يُعيدوا اليَّ يديَّ وعينيَّ بعدَ

انتهاءِ المحاكمة العادِلهْ!)

زمنُ الموتِ لا ينتهي يا ابنتي الثاكلهْ

..امل دنقل ..




____________







اقفلت السماعه وعوض اعتدل في جلسته
وبلع ريقه بألا شعور -: وش فيها المار ووش اللي مادري عنه
بتردد -: سمعت كلامي يا قليل الحيا
-: يمه سمعته لأني جالس يعني اغطي اذوني
وانا جالس شلون تجي ذي
-: آآخخخ منك كان قمت سوالف نسوان مايصير
-: ماعليه وش صاير الحين
-: لا بس هذي جارتنا ام عمرو خطبت ألمار لوليدها وم..
قاطعها -: ووافقت !!
-: هاو وش فيك ماخليتني اكمل كلامي
-: طيب وافقت ولا لا
-: لا ماصار بينهم نصيب علشان عمرو يبي وحدة
ماتدرس بالجامعه وهذي تبي تدرس لا وتقول طب مع رجاجيل
تنهد بأريحية وضحك شبه ضحكة -: لا من قالك
مع رجاجيل الحين فيه عيادات خاصة بالنساء
تشتغل فيها بعيد عن الرجاجيل ..
-: صدز يمه
-: بالعقل هو اهلها مراح يخلونها
-: اي والله انا استغربت عاد الله يهدي ام عمرو
تحب تقول من راسها
-: آمين .. الا يمه دام ماصار بينهم نصيب
يصير تخطبينها لي ...
هذا الشيء الذي لم يكن بالحسبان بالنسبة لأم عوض -: هاااو يمه
يعني حاط عينك ع البنية
باحراج -: لا مهو بكذا لكن البنت نسب وشرف
-: اشوى اذا على كذا ترا خطبت لك اللي اكبر منها
بصدمة -: وشششش !!!!!!
-: اللي سمعته يمه الجوهرة زينة البنات وانت سواقهن وعارفهن زين
-: بس يمه انا ابي المار
-: يعني حاط عينك عليها
-: تبين ترتاحين ايه ومن هي صغيرة
-: وانت الحين تقولي لو قلت من اول ماترددت اخطبها لك
-: يمه والله ما يصير اظلم البنت لو وافقت
قولي لهم نبي البنت الصغيرة دامها رفضت عمرو
-: واذا وافقت الجوهرة مهو بحرام نكسر بخاطرها يكفي عمرو
تقولي امه حزنان وخاطره مكسور
عوض شعر بفوضى عارمة تطوف حوله -: يمه مافي حل يعني
-: والله مادري يمه انا غلطت يوم سمعت كلام ام عمرو
يوم انها قالت نخلي الخطوبة مفاجآة
-: يمه الله يهديك عمر الزواج ماكان مفاجآة
هذي عشرة عمر مهي لعب عيال وانتِ ادرى يمه
بندم نظرت للأسفل -: والله اني ندمانه حيل ياوليدي
نظرت له .. شسوي الحين ؟
-: قولي لهم اللي قلت لك عليه
-: لا فشلة بيقولون وش شافت بالبنية
نهض -: انا طالع
بخوف على ولدها الذي تغيّرت ملامح وجهه -: وين
-: اشم هوا ربي احسني مخنوق
-: لا تخاف انا من عندي ادعي انهم يرفضون من انفسهم
-: الله يسمع منك
ولف بظهره خارجاً .. تمسكت عهد برجله -: ابي معك
انحنى لها -: بعدين شاطرة .. طيب ؟
ونظرات عينيها البريئة تتلألأ حزناً-: طيب .. مع الثلامة
قبّلها بخدها وهمس لها -: ولا اقولك تعالي
" ورفع صوته ".. يمه عهد معي
براحة -: طيب انتبهوا لأنفسكم
-: ان شاء الله .. حملها فوق رقبته
وش رايك نمشي احسن من السيارة
-: عادي اهم ثيء ما اجلث بالبيت
ابتسم -: طيب
وسار بها حتى ابتعد عن بيته
-: عهود يصير اسألك سؤال
-: هممم !
-: يعني بقولك شيء عادي
-: ايوا عادي
-: المار تعرفيها صح ؟
-: ايه المار احبها حيل ..
وصمتا الاثنان ثم اردفت عهد عندما تذكرت
ايه ثح تذكرت اول قالت لي عوض يبي يزّوج بس مافهمت
فقالت لي يعني يجيب عيال العب معهم وانا قلت لها ماثمعته
يقول كذا وبعدين قالت ولا قال يمه اخطبي لي قلت لها لا
ضحك بفرحة مع بصيص امل -: يعني تفكر فيني هي بعد
بس اهم شيء تفهيمها للزواج قال اجيب عيال قال
لا وليه علشان عهد تلعب معهم
بغرابه -: عود انت مجنون تحكي مع نفسك
-: ايه مجنون ياقلب اختك مجنون .. وضحك
لم تفهم -: ايوا وبعدين قالت جوجو لـ لمو خفي ع البنية
" تنح " ..-: من ذولي بعد
-: جوجو الجوهرة ولمو ألمار هم يقولون لي نادينا كذا
-: شكلهم يحبونك
-: ايه واجد دايم اجي عندهم ويثوون لي كيك وحلاوة
-: ويسوون لك حلاوة بعد ؟
-: ايه جوجو تقولي انا اعرف اثوي حلاو مثاثة وتعرف تثويهم
-: والله يا انهم لاعبين على مخك
-: ويث قلت
-: لا ولاشيء ووش تسوي ألمار بعد
-: امممم ويث تثوي
-: انا اسألك
-: مادري ويــث
وبنزوة -: طيب كيف شكلها
-: من المار !
-: ايه
-: حلوة
-: بلاه ! طيب كيف عيونها ووجهها وخشمها
-: عادي مثلك ومثلي ومثلنا كلنا
بقهر -: ياذي العبيطة اقولك اوصفي لي شكلها
-: يعني شلون !
-: يعني عيونها وساع ولا صغار وشعرها لين وين
وخشمها طويل ولا اطفس
بنذالة وذكاء -: بس ماما تقول حرام احكي عن شكل الحرمة عند الرجال
-: آفااا انا اخوك
-: طيب يعني انت رجال علثان كذا مايثير
-: افف نذلة
وهرول بشدة وهي على رقبته تضحك ..





*




الساعه العاشرة والنصف بتوقيت نيويورك
ملل ! .. يداهمها الملل كثيراً وجواد نائم واتصلت برزان ولم تجب
وتنقلت في جميع قنوات التلفاز ولم تجد مايستحق المتابعة
حتى برامج المسابقات الكوميدية بها لقطات لاترضي العقل المسلم
تناولت هاتفها الخلوي ..فتحت الواتس
وجدت رسالة من شيلاء " تكفين أي وقت تكونين فيه فاضية ارسلي "
كتبت لها -:هلا
دخلت شيلاء عندما رأت رسالة الجازي -:
ياهلا واخيراً اشتقت لك حيل
ابتسمت -: وانا اكثر وحشتوني كلكم اخبار الكل
-: كلهم بخير ويسلمون عليك
اخبار اخوي المصفوق
-: نايم بالعسل
-: الا انتِ ليه منتي نايمة معه
فهمت مقصدها لتكتب صكوكاً
شيلاء عندما رأت " جاري الكتابة ..." واطالت
-: هيه ترا امزح والله امزح
ابتسمت ومسحت ماكتبته -:شطورة ترا مسحت اللي كتبته لك
-: اشوى عاد قلت اجهز لي الكفن
-: اعوذ بالله فال الله ولافالك
الا اخبار عبورة وصلوح والثلاثي المجنون بعد
ضحكت بصوت مرتفع وكتبت -: كلهم بخير الحمدلله
تخيلي عبير اليوم زواجها
بصدمة -: زواج !!
-: ايه لا وبعد من واحد شايب بس تقول انه تاجر
-: اهاا يعني الدب وافقت علشان الفلوس =)
لكن لحظة شلون زواجها اليوم وهي حتى ماكانت مخطوبة من قبل
-: يخي هي كتومة ما اتوقع تقول شيء
وبعدين عبير الفلوس آخر اهتماماتها
-: اجل ؟!!
-: شوفي انا لمن سألتها ..
قالت كل شيء صار بسرعه وانا استخرت وارتحت
-: دامها مرتاحة الله يوفقها ويسعدها
-: آمين الا انتِ اخبارك بشريني عنك وكيف الجميلة نيويورك
-: خايسة الخبر احلى
شيلاء ارسلت فيسات مصدومة -: منجدك انتِ احمدي ربك
غيرك يتمنى يكون مكانك
-: ومن يتمنى الغربة !
-: صح في هذي محد
-: الحمدلله .. سرحت قليلاً
هه هه عاد انا مني متغربة وطنياً بس الا جسدياّ ونفسياّ ومعنوياّ
وحتى عائلياً وحياتياً بعد وفي كل شيء تقريباً تغربت ..
انتبهت لرسالة شيلاء التي تقول فيها -: ايه الحمدلله
الا تعرفتي على رزان زوجة نايف ؟
-: ايه ماشاء الله عليها حبوبة تدخل القلب بسرعه
-: ايه هي فرفوشة وطيبة
-: تعرفيها انتِ؟
-: ايه جت عندنا كم مرة
-: ماشاء الله حلو
-: معليش جزوش لازم الحين اروح عند عبورتي
علشان تزينها الكوفيرا وابي اكون معها
-: ok سلمي لي عليها وقولي لها تقولك الجازي
مبروك منك العيال ومنه المال والله يوفقك ويسعدك
-: يوصل ياقلبي يوصل ..
يلا توصيني على شيء
-: ابد ماغير سلامتك ياعمري
-: تسلمي يابعد حيي
في حفظ الله
-: الله يسلمك .. استودعتك الله الذي لاتضيع ودائعه
وخرجت شيلاء من الواتس والجازي هي الاخرى خرجت ايضاً
مر على بالها طيف تولين
تمتمت بـ .. يااارب ابعد ذلك الرجل عنها
واهدِ بصيرتها ..

*

مسحت دموعها -: لا مابي
صالحة -: يلا عبورتي علشاني قومي
الاخرى بهبال -: يلا علشان تخبلين الآدمي
-: وانا قلت مابي
دخل محمد عليهن بالقميص وطاق الشخصية ويضخم صوته -:
السلام عليكم
ابتسمت عبير -: يازين الرزة
-: احم اكيد طالع على نفسي
فهد من خلفه -: وانا علبالي بتقول طالع على عبير
ونظر لهم بإحراج .. يصير ادخل
الجوري -: لا عيب كلنا بنات
نظر لأخته بنظرات تعني " وش دخلك " ..-:
انا استأذن من الكبار مهو بانتِ
شهقت -: ايا الملسون
في حينها دخلتا شيلاء ومجدلين -: السلام عليكم
الجميع رد السلام
شيلاء بفهاوة نظرت لعبير -: ماصلحتِ شيء والرجال جاي بعد العشا
صالحة -: يخي معيه وش اسوي
فهد -: ايه ذكرتوني انا جيت مع محمد نقول لعبير
تجي لذيك المره ام عيون مسحوبة
محمد ضربه على رأسه -: ذيك اسمها كوفيرا مهي بأم عيون مسحوبة
-: والله مهو شغلي وهي انخلقت عيونها مسحوبة تقل صينية
شيلاء بحزم -: يلا برا
فهد بخفة دم -: كم تعطينا
الجوري بأخلاق صفرية -: فهههههههد قسسسم بالله ان ماتطلع ...
لم تكمل لأنه لم يعد واقفاً داخل حدود الغرفة ..
الجودي -: اووخص ياقوية
-: ترا البزارين وبالذات اخوي ماينفع لهم الا العين الحمرا
صالحة -: مسكين حتى اخوي انخرع وهج معه
شيلاء -: خلاص انتن اقعدن هنا وانا بآخذ عبير
للغرفة اللي فيها الكوفيرا
الكل -: طيب
عقدت حاجبيها -: ومن قال اني بروح
بعين حادة -: امشي قدامي
نظرت لها وهي مكتفة يديها وتهز رجلها
شيلاء اتسعت عينيها لعبير وبصوت حاد -: مراح تمشين يعني !!
نهضت بتثاقل وهي تتأفف وسارت خلف شيلاء
الجودي -: اف كان جبنا شيلاء من اول
كلمتين بس خلتها تقوم
الجوري -: هذي شيلاء مهي حي الله جود ولا صويلح
-: ووش فينا ان شاء الله ترا انتِ بعد كنتِ معنا
في جهة اخرى ...
-: ترا امي بهية تبيك بعد ماتخلصين
-: ان شاء الله
بهدوء -: ابي افهم ليه كنتي معيه لهدرجة خوف
بتوتر -: ماقد تزوجت من قبل
اتسعت ابتسامتها -: وتراه زواج واحد في العمر
بهدوء -: لا في غيره اذا تطلقت او خلعت نفسي
او صرت ارملة ..
-: فالك في سروالك ارمله وطلاق وخلع الله لايقوله
صمتت .. لايحق لها ان تقول آمين على شيء لاتتمناه
-: ايه تذكرت جزوش تسلم عليك
وتقولك مبروك والله يوفقك ويسعدك
لحظة لحظة اشوف كذا قالت ولا
فتحت جوالها على المحادثة .. واردفت ببتسامة عريضة
وبعد قالت منك العيال ومنه المال
ابتسمت بسعه -: يازينها شخبارها لها وحشة
-: تخيلي تقول نيويورك خايسة
-: صادقة الواحد مايشوف احسن من ديرته


*




جلست بالصالة وهي مرتدية العباءة ومائلة قليلاً على كتفها
لأنها لم ترفعها على رأسها
خرجت من الغرفة الجوهرة وبغرابة -: وين رايحة !
-: بيت خالتك فاطمة اليوم زواج بنتها عبير
جلست وبتعجب كبير -: زواجها ؟!
ماظنتي كانت مخطوبة او متملكة
-: والله مادري كل شيء صار بسرعه
-: وييه لا يكون مسوية لهم مصيبة وزوجوها يفتكون منها
-: اعوذ بالله وش ذا الكلام يا الجوهرة
عبير مايطلع منها حرف شين بالغلط تبينها تجيب لهم مصيبة
ألمار قدمت إليهما وسمعت آخر الحديث من الجوهرة -:
ماتدرين ياما تحت السواهي دواهي
فقالت المار -: ليه وش صاير
والدتهن -: اليوم زواج بنت عمك مقرن
-: مين منهن
-: عبير
وهي تتذكر -: اممم عبير عبير عبير ايه عبير
ذيك ايه ايه عرفتها .. ماشاء الله على مين
-: مادري مافهمت السالفة عدل
بس اللي فهمته من امي ان الرجال عنده راس مال كبير
وعمره بعد كبير عنها ..
الجوهرة -: غريبة واخو ابوي وافق لبنته تتزوج واحد كبير عنها
بحدة -: اخو ابوك هذا عمك
-: طيب آسفه ماما وكيف وافق عمو
-: اقولك مافهمت السالفة عدل ذالحين منتظرة ابوك وبروح
-: آها يعني الزواج في بيت مهو بقاعه
-: لا حتى مهم عازمين ناس بس رجاجيل القبيلة ونسوان العيلة
حتى جماعة العريس ولا احد فيهم جاي
تقولي امي اهله مهم هنا بالرياض
المار -: اهاا الله يوفقهم
الجوهرة -: جميل
-: تبون تجون الحقنني ماتبون اجلسن
بصوت واحد -: لا بنجلس
المار ذهبت لغرفتها اما الجوهرة قالت لأمها
-: قلتي لأم عوض
-: لا فشلة اتصل عليها قلت لمن تجي تبيع شيء
بقولها ماصار نصيب
-: طيب وشلون قلتِ لأم عمرو
-: ذي عادي مهي بمثل ام عوض لها افضال كثيرة علينا
-: اهاا بس اهم شيء لاتطولين عليها بالرد
ان ماجت اتصلي عليها وقولي لها
-: ان شاء الله
" صوت بوري " ..
اكيد هذا ابوك .. قفلوا عليكم الباب بالمفتاح
-: ان شاء الله
وتحجبت فايزة وخرجت فأقفلت الجوهرة الباب بالمفتاح ..





*





نزل من غرفته الخاصة التي لا تشاركه بها أي انثى
توجه إلى الصالة ..
ابنته ركضت اليه -: بــــــــااابــــاااا
ببتسامة مغتصبة .. حملها -: ياحبيبة بابا
واكمل سيره -: السلام عليكم ورحمة الله وبركاته
بحث عنها بعينه -: وين سامية
خرجت من المطبخ وهي بعبائتها -: نعم
-: جاهزة ؟!
-: ايه يلا
ذهب لرشيدة وانزل تالا بحضنها -: انا الحين طالع انتبهن لأنفسكن
رؤى بهمس للهنوف -: وش ذا يطلع مع سامية وحنا ننثبر هنا
-: عادي لأن شكلها متضايقة والظاهر سطام
يبي يغيّر من مودها ..
-: تصدقي حاولت اعرف وش فيها بس سامية كتومة واجد
رشيدة -: وش فيكن تتساسرن
ابتسمتا -: لا ولاشيء مهم
بالسيارة ..
هدوء يحيط المكان والتوتر يفترس عقرب الثواني
سامية بداخلها تدعو
وسطام بداخله يدعو
مامزق هذا السكون كان رنين الهاتف الخلوي لسطام
سطام رد سريعاً -: هلا وعليكم السلام ... هالحين حنا بالطريق
... متى تبدأ الجلسة ... اووه حلو الحين الساعه ست ونصف
وهي تبدأ سبعة تمام لا يمدي بالراحة ...
شاكر لك تعبك ياعبدالعزيز
.... اجل ما اطول عليك يلا فمان الله
اقفل ولفت عليه سامية بقلق -: هاه وش قال
-: لا بس يقول لازم اجي الحين وقلت له انا بالطريق
والجلسة تبدأ سبعة تمام
-: اشوه الحمدلله
بعد لحظات ....
بقلق -: وش فيه السير متوقف
نظرت للأمام وبلعت ريقها -: يمكن حادث ولا هواشة
-: هي كلها معنا نصف ساعه شلون الحين
-: طيب مافي طريق ثاني
-: شلون طريق ثاني شوفي وراك
لفت واذا بها ترى سيارات كثيرة فأصبحت سيارة سطام
محاصرة من جميع الجهات
من الأمام والخلف واليمين واليسار
-: لا يارب لاا سطام تكفى سو شيء
-: استهدي بالله ذالحين ننتظر عشر دقايق ولا ربع ساعه
شدت على فخذيها بتوتر -: ياسطام الوقت سريع وان مارحت اشهد
اخوي يمكن يحكمون عليه قصاص
بتوتر فقد اعصابه واعتلا صوته -: وش شايفتني العب
ولا حاط رجل على رجل مثلي مثلك ويمكن انا متوتر اكثر منك
صوته المرتفع اطبق شفتيها عن الكلام
نادراً مايعتلي صوت سطام عليها او على أي امرآة
من نسائه او حتى اخواته ..
سكنت ولكن مابداخلها لم يسكن
فالذي بداخلها فوضى عارمة وضجيج كبير
لاتعلم شيئاً سوى انها موقنه بأن الله لن يدعها ولن يدع اخاها
نظرت لسطام ..
كنت اريد في هذه اللحظة كلمة حانية منك كالعادة
ولكن بماذا قابلتني بعلو صوتك الذي جعلني
لا اشتهي الكلام بل اشتهي البكاء والدعاء فحسب ..
ياارب .. ياارب .. ياارب
انت تعلم مافي نفسي ولا اعلم مافي نفسك
يارب انت تعلم ماذا احلّ بي ولا اعلم ماذا سيحلّ بي لاحقاً
اللهم فوضت امري إليك
فلا ملجأ ولا منجى منك إلا إليك ..
سطام فتح النافذة -: السلام عليكم يا الاخو معليش وش صاير
هذا الرجل ذهب إلى هناك مشياً على الاقدام ثم عاد -:
وعليكم السلام .. سيارتين انقلبت وفيه وفاة
انا لله وانا اليه راجعون
-: انا لله وانا اليه راجعون الله يصبر اهلهم
الا مادريت متى بيمشي السير
-: والله شكله بيطول لين الحين والاسعاف ماجاء
-: مشكور مشكور يا الاخو
-: العفو ماسويت شيء
واقفل النافذة ثم لف على سامية -: الحين مرت عشر دقايق
اسمعي بقفل السيارة ونروح للمحكمة مشي
بهدوء وصوت منخفض -: بس هي بعيده
-: مافي الا هذا الحل بس المشكلة هنا السيارة لو مشى السير
وفي لحظة تفكير اغمض عينيه
واصبح لسان سامية يلهج بالدعاء بقوة وهي تبكي
فتح سطام عينيه -: اقول اسمعي بقفلها واللي بيصير يصير
لمح احد السيارات ويعرف من بها جيداً ..
لحظة لحظة ، نزل من السيارة
وذهب لسيارة " كومارو كحلية اللون "
طرق على النافذة -: هلا السلام عليكم ابو محمد
فتح النافذة -: آهلين وعليكم السلام
-: اخباركم ان شاء الله طيبين
-: ايه الحمدلله عاد انت وينك مختفي طمنا عن اخبارك
-: الحمدلله الا بقولكم ابي واحد منكم يستلم سيارتي مكاني
-: ليه وش صاير عسا ماشر
-: السالفة طويلة بس اهم شيء اني ابي اروح لمكان ضروري
ومعي الاهل وصعبة اترك السيارة بوسط هالزحام
نزل احدهم -: مايهمك يابو تالا انا اخذها عنك
انت ذا الحين رح الحق موعدك
-: مشكور يابو اسامة ماتقصر
-: العفو واجبنا ومابين الاخوان شكر
عاد سطام لسامية -: يلا انزلي هذا واحد من الربع بيجلس بالسيارة
-: طيب .. نزلت هي ودخل ذك الرجل السيارة ليبقى فيها
سطام توجه ناحية سامية التي كانت بالجهة الأخرى
امسك يدها -: آسف على رفع صوتي
بهدوء -: لا عادي المهم الحين نلحق عليهم
-: الحين مرت 14 دقيقة تعالي من ورا هالشجر
علشان نسرع بالمشي
ذهبا كما قال سطام واسرعا في المشي
سامية رفعت عبائتها لئلا تتسخ بالرمال
..الحمدلله الحمدلله الحمدلك يارب كما يليق لجلال وجهك وعظيم سلطانك
تسهلت لنا الدروب فيارب امطرني فرحاَ ببراءة اخي ..