[اسطورة !]

أدري أن البارت قصير حيل بس إن شاء الله بكره بحاول أكتب 20 صفحة لأني والله عجزت لأكتب أكثر من كذا .
وبعدين كتبت ذا البارت وقفل اللاب توب وأنا ماحفظته وأنقهرت وحاولت أكتب كثير وهذا اللي قدرت عليه .
وسامحوني ياقلبي .

البارت الثاني ....
البر....,
سماحه تجلس بجنب همام قدام النار وتقول : هاه ياهمام وشلون أهل القصيم ؟
همام بابتسامه : طيبين الحمدلله وترا اليوم اخوي مبارك يبي يجي هو وعايلته .
سماحه : هي جت العطله يومنهم يبون يجون من الرياض ؟
همام : لا مير يبون يجون يسلمون علينا ويرجعون قبل الاختبارات تبدأ .
سماحه : الله يوفقهم ويسلمهم .
همام : وبعد تبين تشوفين عهود اليوم ان شاء الله .
شهقت سماحه وهي ماهي مصدقته : ياخي لاتكذب علي هلون تراني والله مأتحمل .
همام : والله صحيح اليوم جايين ان شاء الله علمني حمود .
انبسطت سماحه وقالت بإستفسار : مارحت لأبو أحمد ؟
همام بهدوء : لا....وماني رايحن له .
سماحه بصدمه : ليه يأبو هدى ؟
همام : والله ماني رايح أشحذ خلق الله ورزقي يبي يجيني إن شاء الله.....وأبشرتس يأم هدى شريت من مكأفئة هدى حول 50 بطيخه .
سماحه بفضول : وش تبي تسوي فيهن * وضحكت * ثنتين يكفنك ويشبعنك أسبوع بعد .
ضحك همام : ياصغر عقلتس صغراه.........يالمهبوله 50 بطيخه شريت الوحده بـ 15 وأبيعهن بـ 30 ريال .
سماحه : ياويلي غاليات والله محد يشري منك .
همام : لا ياسماحه أنا أختار المكان المناسب اللي يشرون منه البطيخ الواجد .
سماحه : والله يأبو هدى لونك شاري تمر وبايعه أنه أزين لك .
همام : التمر هو اللي مقدر عليه الشمس تغير طعمه وتعرفين أنا اببيعهن بصندوق سيارتي .
سماحه وقف وهي تقول : والله لونك مخليني أخيط الخلاقين وأبيعهن بالبسطات أزين .
همام : يازينتس ساكته يابنت عمي .
دخلت سماحه عند هدى اللي ماسكه كتابها وتذاكر إختبار الفاينل اللي عليها بكره .
سماحه بذهول : أنتي ماسويتي الغداء ؟
هدى بغصه : يمه مافيه بصل ومافيه رز .
سماحه بلعت ريقها : الله يرزقنا......ووش ناكل هلحين ؟
هدى مسحت دموعها وقالت وهي توقف : مادري يمه بروح أسأل أبوي يمكن عنده فلوس يجيب لنا من المطعم .
وراحت عند أبوها اللي قال : ياهلا والله بأم غرام ياهلا ببنيتي .
هدى حبت راسه وجلست بجنبه : يبه معك فلوس ؟
همام بحزن : لا والله يابنيتي مامعي فلوسن واجد مير يجيب الله خير....بس أنتي وش تبغين ؟
هدى : يبه حنا ماعندنا شي نسويه على الغداء وكانك تقدر جب لنا غداء من المطعم .
همام : معي أربع مية ريال باقي مكافئتس وش تبيني أشري لتس غير الغداء ؟
هدى : أبي رز 10 كيلو وبصل وزيت قلي......إيه ويابي دور لي بطاطس جاهز للقلي لأن عبير وعهود يحبن البطاطس .
همام : أبشري .
ومشى همام وهدى راحت تعلم أمها اللي انبسطت بذا الخبر .

--

بسيارة مبارك بالخط السريع ( القصيم - الرياض ) .
جيب لكزس 2014 لونها أبيض .
متوجهين للقصيم قدام راكب فهد ويسوق السيارة وعلى يمينه أبوه مبارك .
ووراء راكبين بدريه زوجة مبارك وبالنص بنتها وجدان وعلى يمين وجدان أخوها اللي أكبر منها يوسف .
مبارك وهو يأشر لفهد : وقف وقف على البقالة هذي اللي قدامنا .
فهد طلع جواله وهو يقول لأبوه : وش أقول للعمال يكملون طريقهم ولا يحترونا ؟
مبارك : لا لا خلهم ورانا لين نوصل .
فهد كلم العمال اللي بالشاحنه المحلمه بالغنم وقالهم يوقفون وراه .
بدريه : أبوفهد نبي ماء وعصير وجيب فرايح لأبو هدى وأهله .
مبارك وهو ينزل : تبشرون بالخير .
ونزل ودخل البقالة وقالت وجدان : ليه ماخليتونا نروح لهم بعد الإختبارات أخاف إني أشوف عبير وعهود واقعد عندهم وأترك إختباراتي .
ضحك يوسف اللي بثاني جامعة ومخلص إختباراته لأن ماعنده إلا مادة وحده وأختبرها وخلص : والله تسوينها .
فهد اللي عمره 26 بالسلك العسكري برتبة رقيب : حنا لو ناقلينتس للقصيم أزين كان مفتكين منتس من زمان .
بدريه بغموض : فهد وش قلت على الموضوع اللي كلمتك به أمس .
فهد بإبتسامه : توكلي على الله يالغاليه .
وجدان بلقافتها المعتاده : وشو يمه وشو ؟
بدريه : ياحبتس للقافه .
وجدان برجاء : لا يمه تكفين علمين وش السالفه .
بدريه بإنزعاج : وجدان والله لو تحبين السماء ماني قايلتن لتس .
وجدان سكتت وهي زعلانه من أمها .
وقال فهد : وجدان .
وجدان بدون نفس : هاه .
فهد : ودتس تشوفين حايل والجوف .
وجدان بفرحه : أي والله تكفى .
ضحك فهد ثم قال : أبشري بذا الأسبوع اللي بنقضيه عند أهل القصيم بوريتس حايل وليامنا جينا عقب الإختبارات أبشحذ عماني نروح للجوف .

__

البر---> الساعه 2 ونص الظهر ,
خلصو غداهم وقالت سماحه وهي تمسح يدها بالمنديل : الله يغنيك يأبو هدى .
همام : عافيه.....إلا الله يغني هدى هذي من فلوسها الله يزيدها من فضله....هدى يأبوتس كان ودتس تروحين لبيتس تراتس مرخوصه .
هدى بفزع: أروح وأخليكم الله لا يقولها....لا إن شاء الله أنا أبجلس عندكم لين ربي يرزقكم ببيت .
همام بفخر : أنا أشهد أن حمود رجال وعن مية رجال والله أن فزعته معي تنومسني .
هدى بإبتسامه : الله يخليك لنا يايبه وأبد والله حمود ماسوى إلا الواجب .
همام : الله يغنيه يارب.......أنتم رتبتم البيت مبارك يبي يجي هلحين على وصول .
هدى بإبتسامه : والله إني مستانسه بلمت عماني وجمعتهم .
همام : الله يونستس بجنات النعيم .
هدى : امين يارب العالمين........إلا يبه ماتقدر تخلي عهود تجي وتسكن عندنا ؟
همام : لا والله ياهدى مأقدر مدرستها بعيد .
هدى قامت وراحت لأمها اللي تحطب : يمه ادخلي وأنا ابحطب عنتس .
سماحه : لا يأمي هذا شغلي وأنا أبكمله لحالي .
هدى : خلاص يمه أنا ابروح أسوي القهوه والشاهي هو فيه ولا لا ؟
سماحه : إيه إيه فيه وسوي بس قهوة الحريم لأن أبوتس هو اللي يبي يسوي قهوة الرجال .
راحت هدى لبيت الشعر وفتحت الصندوق وطلعت الشاهي والسكر والهيل والقرنفل والبن .
وبدأت تطبخهم .
وماخلصت القهوه إلا وأهل عمها مبارك واصلين راحت بسرعه وأخذت طرحتها ولفتها على راسها .
وربطت نقابها بإحكام ولبست جلالها لأنها تستحي تطلع قدام عيال عمها بدون جلال أو عباه .
طلعت وسلمت على عمها مبارك وزوجته وردت بحيا على فهد ولد عمها اللي يقول : مساتس الله بالخير يأم غرام .
هدى : هلا مساك الله بالنور وشلونك يأبو مبارك عساك طيب ؟
فهد : الحمدلله بخير .
وسلمت على وجدان بنت عمها وهي تقول : هددى وشلونك ؟
هدى : الحمدلله بخير.....وشلونتس ياوجدان ووشلون الجامعه معتس ؟
وجدان : زينه الله يستر والله احس إني أبسقط .
هدى : تعوذي من الشيطان وترا التحضيري سهل بالحيل .
وجدان : لا والله ماهو سهل إنه صعبن بالحيل .

--

بيت العمه نشميه.......>>
نشيمه بصوت عالي : حنااااان.....حنااااااان.
نزلت حنان تركض مع الدرج : هلا هلا يمه .
نشميه : تبين تروحين معي لأهلي ولا لا ؟
حنان اللي بيدها كتابها حق الجامعه : لا يمه أبذاكر .
نشميه وهي تلبس نقابها : أسمعي حنو ترا أخوي مبارك هناك ويبي يجي نشمي بكره إن شاء الله .