الفصل الرابع
جوليا-حشومة عليك والله كنت معولة عليك انسرين !
نسرين -سمحي ليا احبيبة ولكن والله منقدر نمشي معاك
جوليا-واشنو دبا غادي نمشي بوحدي?حتى ماما مبغاتش تمشي معايا كالت ليك ممسالياش!!
نسرين-شفتي انا والله مكرهت ولكن بابا هاد الايام غير على سبة
جوليا-واقيلا ندير بناقص من هاد التسافيرة كاع!
نسرين-وعلاش غادي تحرمي راسك على قبلنا حنا?!سيري فوجي على قلبك واخا تجلسي غير شي يومين
جوليا فكرت عميقا -داكشي اللي غادي ندير
نسرين-ايوة بالصحة والراحة هههه ومتنسايش تجيبي معاك شي راجل هههه
جوليا ضرباتها على كتفها وهي كتضحك من هبالها-الله يمسخك اهاد الحمقة انا غادية غير نفوج اش بغيت شي رجال
نسرين-دبا نشوفو...اجي اش قررتي فالموضوع ديال عثمان ولد خالتي ?
جوليا-راه قلت ليك انا هاذاك ول خالتك مداخلش ليا لراسي
نسرين- والله حتى عيب عليك السيد مسكين كيموت ويحيى على قبلك وانت كاعما معبراه هههه
جوليا-عرفتي اش غادي ديري زيدي نوصلك لداركوم باش نرجع لدارنا نجمع حوايجي
نسرين وهي تابعاها فاش ناضت من مكانها واتجهات لسيارتها-اجي جوليا ياكما تقلقتي راه غير كنضحك معاك هههه
فعلا وصلات جوليا صاحبتها ومشات لدارهوم باش توجد راسها للسفر ديال غدا
دخلات جوليا للدار اللي كانت فيها غير فاطمة كتمسح الارض
جوليا-خالتي فاطمة ماما مكايناش
فاطمة-لا ابنتي مازال ماجات من الشركة
جوليا-واخا الى جات هاني الفوق كنوجد حوايجي للسفر ديال غدا
فاطمة-واخا ابنتي-وشافت فوجه جوليا بتمعن وقالت-مالك ابنتي بنتي ليا ماشي على برجك
جوليا-لا والو ...انا اصلا خاطري هربانة ليا من هاد التسافيرة
فاطمة-لاواه ابنيتي سيري فوجي شوية ...انت العام كولو محبوسة
جوليا-عندك الحق..يلاه الى جات ماما هاني الفوق
طلعات نسمة باتجاه بيتها وهي قلبها هربانة ليها من هاد السفر ولكن ضغطات على نفسها ووجدات حوايجها ...
فالصباح فاقت جوليا بكري ولبسات حوايجها ولكن كاعما سلمات على ماماها حيت كانت مازال ناعسة ...خذات سيارتها وشدات الطريق اللي كتادي لمدينة الناضور الريفية
الطريق كانت طويلة ولكن اللي ساعد جوليا باش تخفف على راسها هو المناظر الرائعة اللي مرات عليها ...وكل مرة كانت كتوقف تاخذ صورة لشي منظر عجبها لانها هي اصلا كتهوى التصوير الفوتوغرافي
وصلات من بعد طريق طويلة للفندق اللي غادي تجلس فيه الايام اللي غادي تبقى فيهوم للمدينة المقصودة
دخلات للفندق وتوجهات مباشرة لللاستقبال
جوليا-السلام!
الموظف-السلام ...اش حب الخاطر اانسة
جوليا-عافاك شوف ليا حجز باسم جوليا بناني
الموظف قلب فالحاسوب ديالو وقال ليها فابتسامة-انسة جوليا ايه كاينة ...تفضلي ها السيد غادي يوصلك للجناح ديالك
جوليا-جناح?! ولكن انا حجزت غير لغرفة
الموظف-ولكن انا هنا عندي جناح ومخلص سابقا
جوليا ابتسمت بعد مافكرات باللي ماماها منساتهاش وحجزات ليها على الاقل تعوض ليها غيابها
وصلات جوليا للجناح ديالها وحلاتو ...واااو جناح ملكي رائع
خذات دوش وقررات تاخذ قيلولة باش ترتاح ....
فالدار اللي كان فيها سلطان ورباعتو ...
سلطان-انا كيبان ليا نبداو اولا بهادوك البنات اللي كيتعراو وكيخرجو للزنقة بلا حشمة بلا حيا!
مجد-لا اصاحبي حنا خاصنا شي ضربة صحيحة تخلينا كنعومو فالفلوس
سلطان-اصاحبي الفلوس ماشي مهمين ...اللي مهم هو انك تفرض ذاتك فالمجتمع
مجد قال ليه بامتعاض-واخا ...-ورجع قال مع نفسو-كتقول هكدا حيت شبعان فلوس ....دبا نشوفو السي سلطان !!
اما سمير ماقال والو وبقا غير كيسجل فاللي كيقولوه ....
فاقت جوليا ولبسات حوايجها وخذات الكاميرا ديالها...كانت لابسة فستان نص كم فالغوز بارد فايت الركبة غير بشوية ومعاه حذاء ربيعي مريح فالابيض اللامع وحطات اكسسوار ناعم على شعرها جا منظرها رائع
خرجات وبقات كدور فازقة وشوارع المدينة بحال شي فراشة وكتاخذ صورة لاي حاجة عجباتها ....
فهاذاك الوقت كان سمير كيدور حتى هو فالمدينة بسيارة سلطان ...حتى طاحت عينو بالصدفة على جوليا ,بمجرد ماشافها تذكر كاع الكلام اللي سمع قبيلة من سلطان ومجد وبقات افكار جهنمية كتمشي وتجي ليه فعقلو
يتبع...