الفصل السابع
دخل سلطان مع الصباح وهو حامل معاه الفطور وواحد الصاك معرفت اش كاين فيه ...
توجه مباشرة للكوزينة ووجد الفطور....من بعد ماكمل خرج منها وهو حامل معا صينية الفطور ومتوجه بيه الفوق فالبيت اللي فيه جوليا..ولكن قاطعو مجد وهو كيسولو
مجد-فين غادي بهادشي اسلطان?
سلطان سكت مدة عاد جاوبو-غادي بيه للبنت اللي اللي الفوق
مجد تصدم وقال ليه وهو كيصرخ-كيفاااااش?!!
سلطان-مالك كتغوت امجد غير بشوية,اشنو فيها كاع الى ديت ليها الفطور?
مجد-لا علاش انت مدخلهاش معانا فالجماعة احسن....واش كتسطى عليا اسلطان ,قلت ليك البارح خلينا نقتلوها ونتهناو منها
سلطان-لا مغاديش نخليك
مجد-وعلاش بالسلامة?
سلطان تحرج من هاد السؤال اللي حتى هو معرفش راسو كيفاش غادي يجاب عليه ...وعلاش مبغاش يخليهوم ياديو هاديك البنت
مجد شاف فيه واحد الشوفة ديال الاحتقار وقال-ااااه ولا قول ليا الشطاح عمرو مينسى هزة الكتف ,ياك?
سلطان فضل ميجاوبوش وطلع عند جوليا يعطيها الفطور...اما مجد بقى كيلعن ويسب وكيقول-ياربي انا حطني الله غير مع رباعة ديال الاغبياء ...واحد جاب ليا بنت قال ليك قتلها والاخر بدا كيبغيها...
سمير خرج من واحد الغرفة وهو ميت بالنعاس وكيمسح فعينيه (صراحة منظرو كان كيقتل بالضحك ههه)
سمير-مالك اخويا مجد علاش مقلق هاكدا على الصباح?
مجد وهو معصب -اويييلي ومازال كيسولني مالي معصب...ناري انا اليوم غادي نقتل شي واحد هاد النهار
سمير وهو ميت بالخوف-صافي اخويا عافاك متعصبش عاوتاني
مجد-حيد من قدامي قبل منرتكب فيك شي جريمة
سمير مسكين مشا كيجري يتخبى قبل ميضربو مجد عوتاني هههه
فالغرفة اللي كانت فيها جوليا:
كانت جوليا مازال ناعسة ..دخل سلطان بهدوء كيحاول ميفيقهاش,حط صينية الفطور على الطابلة اللي كانت حدا السرير ...كان غادي يخرج ولكن معرفش اشنو منعو...خذا كرسي وجلس حداها
بقى كيشوف فيها وهي مازال ناعسة بحال شي طفلة ....ملامحها اللي عمرو ماشافهوم عند شي بنت بحالها مخلاوش ليه العقل,حس باللي شي حورية حداه دبا
شعرها ....عينيها ...بشرتها الصافية ...ولكن من غير هادشي كولو كاينة شي حاجة فيها ,كتخلي قلبو يدق بزاف ملي كيشوفها
طبعا سلطان قبل مينضم للجماعة الملعونة ديال مجد...كان شاب مفشش بزاف ووقتو كولو كان غير فالخوا الخاوي والبنات والقصاير...وهدا هو المشكل الكبير ماشي غير سلطان ولكن بزاف الشباب بحالو
عندهوم نفس المشكل,علاش حتى حنا ميكونوش عندنا شباب معتدلين بلا افراط ولا تفريط,حيت خاصهوم يعرفو باللي البلاد بلا بيهوم مكتسوى والو ..هوما عمادها وصمام امانها
فهاديك الاثناء جوليا بدات كتحل عينيها...غير شافت سلطان حداها وهي تقفز من مكانها مخلوعة...
جوليا-اش كدير انت هنا ?
سلطان-متخافيش انا جيت غير نجيب ليك الفطور هاهو-ونعت ليها فالصينية اللي كانت حداها وعاود قال ليها-صافي انا دبا غادي نمشي -وتاجه بخطوات بطيئة للباب..حتى سمع الصوت ديال جوليا
وهي كتناديه,بسرعة وقف بحال الى كان كينتظرها تكلمو ...وقف والتفت عندها هي بدورها نزلات من السرير ومشات عندو...وقفات حداه وشافت فيه بطريقة زوباتو
جوليا-شكرا بزاف على الفطور
سلطان-لاشكر على واجب
جوليا-شوف ا...
سلطان-سلطان..سميتي سلطان
جوليا-متشرفين اخويا سلطان سميتك زوينة
سلطان وقلبو كيخفق بشدة-شكرا
جوليا-انت كيبان عليك ولد الناس...عافاك اخويا تكلم معاهوم يخليوني نمشي فحالي راه انا مدرت والو علاش غادي تشدوني
سلطان وهو كيبتسم للبراءة ديالها-انا راه كنتفاهم معاهوم كوني هانية غادي تخرجي من هنا سالمة غانمة غير كوني هانية
جوليا ابتسمت من بعد مسمعات هاد الكلام اللي ريحها على الاقل نسبيا
سلطان-ولكن قولي ليا انت باينة فيك ماشي بنت هنا,وسمحي ليا الى كنت فضولي
جوليا-لا بالعكس...انا من الرباط جيت هنا باش ندوز العطلة حتى وقع ليا هادشي هانتا كتشوف
يتبع...