[لامارا]

ـــــــــــــــــــــــــ ــــــ

’،




.
.
.
صدق أو لا تصدق
كل ما تباعدت المسافة بين الرغيف والجوع ،، تلقى الفرح أصدق
تصدق أو لا تصدق
لامن غدت كل المشاكل جوع الصغار وسقفٍ يداريهم قبل يصحى النهار
تلقى الشعور أعمق
صدق أو لا تصدق
كل ما انقفل درب انفتحت أبواب
صدق أو لا تصدق
لو فيه احد طيب ،، للطيبة أسباب
صدق أو لا تصدق
قليل من يعفي ويسامح ،، كثير وده ينتقم بس ينتظر له وقت سانح
صدق أو لا تصدق
القناعة كنز يفنى
ولو كل من ياخذ قنع أ وكل من ياكل شبع
كان الفرح غطى شوارعنا
صدق أو لا تصدق
كل النهايات البداية ،، وأحلى البدايات النهاية
وكلنا رغم القساوة الظاهرة ،، نبكي قدام المرايه
.
.
.
#

لـِ الأمير عبدالرحمن بن مساعد






’،









][ البــآرت العــآشــــر ][






’،












بعد مارجعوا من حفل الشبكه

عائله ابو سامي رجعوا للشرقيه على طول طلعوا من الشبكه وتوجهوا للمطار .. اما باقي العائلات جالسين بالرياض ..


الحريم والبنآت مجتمعين بغرفه وحده وسوالف عن الشبكه ..

ام أحمد : بسم الله ماشاء الله عليها رغد طالعه قمر
ريمآ : ايه والله صدقتي يابسمة .. ماشاء الله بنات ام سعود كل وحده تقول الزين عندي ..
دينا : عآد عسى الأخلاق نفس الشكل مب مثل العمه الشكل ماعليه والاخلاق شينه استغفر الله
ماحست دينا الا وعلبه المنديل برآسها التفتت وهي معصبه على من اللي ضربها شافت الجده معصبه : دنيه ووجعه وش فيك تتكلمين عن مرت اخوك كذا
الحرمه ماشفنا منها شي
دينا بهمس : اوما ماشفنا شي هاللي بعد الزواج ماشفنا اخونا الا بعد شهرين وخلت اخونا يكتب لها عماره بإسمها وماخفي أعظم خلينا ساكتين بس يايمه ..
وبصوت عآلي : آسفين يايمه آسفين
اما عند البنات اللي فطسوا ضحك على دينا يوم ضربتها الجده وهم فعلا مع دينا بكل حرف نطقته ، عمهم محمد ماتزوج هبه الا يبيها تهتم بالتوأم بس هبه همها نفسها
غير المشاكل اللي تصير مع ليان الاعتياديه بين البنت ومرت ابوها وكيف ان عمهم محمد مايرد هبه بأي شي تطلبه لدرجه باني لها عماره بأسمها وحساب بالبنك
بمبلغ وقدره ينزل لها شهريا
ليآن : ليت بس اللي آخذها متعب رهف .. احسها حبوبة صحيح ان رغد احلى بس بعد رهف حلوة
لينآ : والله حتى رغد شكلها بعد حبوبة وحلوة .. الواحد مانحكم عليه كذا ,, لازم نعاشره وبعدها نحكم
ليآن : والله الشي واضح وبعدين وين بتروح ماهي برايحه بعيد عن عمتها
لينآ : ولو ماراح نحكم الا لين عاشرنآهآ .. وبعدين متعب عارف بسوآلف العمه فأكيد بيآخذ الحذر من البنت
ليآن : الله يعين بس








’،













كان يسمع اصوات وضجه شي غير طبيعي حاول يفتح عينه بس ماقدر يحس بألم برآسه لايطآق حآول حتى يتكلم بس ماقدر ورآح بعآلم ثآني بعيييييد عن عالم الحالي







’،










جلست معها على السرير : هآهـ تكلمي قولي
نزلت رسهآ بحزن : وش تبيني اقول يانورة
نورة بإستغرآب كل شي
تنهدت رغد : انتي عرفتي سالفه الملكه هذي الخبط لزق
هزت راسها نوره بالرفض وكملت : أمل لما كلمتني كل اللي قالته انها كانت مجبوره تخبي وموبيدها ، وقالت لي انك رافضه تتجهزين بس
نزلت رآسها رغد والدمع مالي عينها : اجبروني يانوره اجبروني ، تخيلي سعود صارخ علي ومد يده كل هذا لأني بس اعترضت وبالاخير "كملت بصوت يرتجف " يوم قلت له ليش رهف آخذين رآيها
قآل هذيك رهف وانتي رغد "شهقت" لاتقارنين نفسك فيها " وطآحت بحضن نورة تنتحب أخوهآ اللي ماتوقعته ولا تخيلت ولا بالأحلآم انه ممكن يسوي كذا لامن ناحيه الصراخ ولا من رفعه اليد اللي
شوي بس وتلطم خدها

كل هذا كآن تحت أسمآع سعود اللي كآن جآي بيآخذ بخآطر رغد ويرآضيها ومآكآن دآري ان عندهآ أحد الا لما سمعها تتكلم وشده الكلام

دار بجسمه وعود رجع للدرج بسرعه وهو ينزل بضيق حآس ان البيت خآنقه من بعد ماسمع كلام رغد وشهقاتها ونحيبها اللي آلمته حيييييييييل










’،







بمكان ثاني ..

خلاص ملت وصلت حدها من حياتها ومن هالعذاب اللي تتلقاه كل يوم وكل ساعه .. بتدخل الشهرين الحين وهي ماشافت اهلها الا مرتين او ثلاث .. قامت وفتحت الباب الغرفه اللي بالدور الثالث
وطلت شوي الوقت الحين الفجر ماسمعت صوت نزلت شوي شوي واخذت جلال الصلاة عليها وقامت تردد "وجعلنا من بين أيديهم سدآ ومن خلفهم سدآ فأغشينآهم فهم لايبصرون ، واعوذ بكلمات الله
التامات من شر ماخلق ومن الأدعية اللي حافظتها "
حتى وصلت للصاله ميلت نفسها شافت الشخص المسمى زوجها ومعه الخمه ربعه بأطرآف أصآبعها مشت حتى وصلت عنده ميلت عمرها له وشافت أحد جوالاته ابتسمت
وهي تحمد ربها لأن الجوال اللي حصلته من النوعيات القديمه شكله هذا مايستخدمه كثير يعني ماراح يفقده مدت يدها بشوي شوي وقلبها طبول ويدها ترتجف من الخوف
و مسكت الجوال ماحست الا يد مسكت يدها الممدوده جمدت بمكانها والتفتت بخوف شافت سالم صديق زوجها يبتسم بخبث وهو منسدح قريب من سامر يقرب منها ويسحبها ناحيته يحاول يعدل وضعه
حاولت تفك يده منها بس ماقدرت ويهمس لها بـ أششش
لا إرآديآ , رفسه برجلها مع وجهه بما انه تحت رجلها منسدح تأوه بصوت عالي وتركها وهي هربت بسرعه ناحيه غرفة الخدم المهجورة ..
حتى محد يشك بأنها موجوده وقفلتها وهي ترتجف من الخوف من الموقف ومن الغرفه نفسها ماتدري وشلون خطرت ببالها هالغرفه وقادتها رجلها لها ..







’،








ضمتها : حبيبتي انتي ، أسفه ياقلبي لأني فهمتك غلط
ابتسمت بحزن وهي تمسح دمعها : لا عادي وخبطتها مع راسها بخفه .. انتي ويا هالراس يعني متوقعه بخبي عنك شي مثل كذا يانوير
مسكت نورة رآسها وهي تمثل الألم : وجع ماهوب يد ذي ، الله يعين متعب عليك
حمرة كست خدودها ، ورجعت تخبطها مرة ثانيه على راسها بس أقوى شوي : وجعـ"ن" يوجعك يالزفته ، بسم الله علي من عينك ، وبطرف عينها قالت : لاتطرين هالاسم مرة ثانيه
ضحكت نورة : طيب طيب ، بس وش حسيتي وانتي معه
ابتسمت رغد : ابد مااحسيت بشي بس قلبي طبول وجريء
تعالت ضحكات نورة على رغد ، لأنها عارفه صديقتها على انها رجه بس خجولة حييييل
رغد : اضحكي اضحكي أشوف فيك يوم يانويرة ، الا تعالي وش صار معك بنقلك
ابتسمت بحزن نورة : خلاص هالاسبوع ان شاء الله بروح مع فواز "ورفعت عينها لها والدمع ماليها" :بفقدك يالدوبا
رغد وهي تقرب منها وتضمها ودمعها ينزل : حبيبتي وأنا بعد
ابتعدت نورة عن رغ وهي تمسح دمعها : يالله ننام الشمس بدت تشرق






’،









كان يدور بالشوارع بدون هدف من يوم سمع باللي قالته رغد وهو ضايقه فيه الدنيا هذي الغاليه ويسوي فيها كذا وقف عند البيت بعد ماعبا السيارة
بنزين وعيونه حمرا من التعب يعني صار له تقريبا يوم كامل مانام من امس اللي انشغل من بدري بتجهيزات الشبكه والحين الساعه بتجي الـ10 الصبح وهو
هلكاااان يدور السرير بس طفا السيارة ونزل راسه على الدركسون وغمض عينه شوي يريحها قبل ماينزل من السياره







’،











وآقف متوتر بعد ماخرج من صلاة العشاء وبيده الجوآل دق عليه بالليل بعد الشبكة والصبح ومقفل ، ورجع الظهر وكل الأوقات ونفس الشي والحين العشاء مقفل من امس من بعد الشبكه وهو مايدري
عنه بخبركان خايف حيييييييل عليه .. فكر بلينآ وركض بسرعه للغرفه ضرب الباب ضربات سريعه وتواليه

فتحت الباب دينا بعد عرفت اللي عند الباب : متعب ؟ ش فيك
متعب : دينا نادي لينا بسرعه
دينا بخوف : ليش صاير شي
متعب : لا لا بس نادي لينا
دينا بإستغراب من حاله متعب : طيب
ثوآني حاول متعب يهدي نفسه على ماتجي لينا حتى ماتخاف لما تشوف حالته
لينآ : هلا متعب ايش عندك
متعب بهدوء ويالله قدر يضبط توترخ حتى مايفجع لينا: لينو حبيبي دق عليك صقر
لينا : لا ليش
وقعت الصدمه على راس متعب : لا ولا شي بس أدق عليه ومايرد
لينا : لا لا تقلق تلاقيه انشغل بالدوآم أمس قال لي ان عنده مواعيد كثيره اليوم بسبب تأجيل أمس
ارتاح شوي متعب وقرر يدق على المستشفى : طيب خلاص
توجه متعب برى الجناح : ودق على المستشفى
..: مستشفى الـ ... كيف أقدر أخدمك
متعب : السلام عليكم .. عبدالسلام
..: وعليكم السلام .. ايوه عبدالسلام اخوي آمر؟!
متعب : عبدالسلام أنا الـ د. متعب ممكن توجهني لمكتب الـ د. صقر
عبدالسلام : هلا د. متعب الـ د . صقر موموجود حآليآ
متعب : موموجود ،، ليش هو إستأذن من الدوآم
عبدالسلام : لا مآإستأذن
متعب : طيب غريبه اليوم عنده ضغط مواعيد يعني المفروض ماينتهي دوامه الا بالوقت المحدد
عبدالسلام : أيوه بس الد.صقر حاليا له إجآزه
متعب بإستغراب أكبر : ليش
عبدالسلام : الـ د. صقر عمل أمس حآدث وهو الحين منوم
انصدم متعب : حـ . ـ . ـ . ـآدث
عبدالسلام : أيوه
متعب : ومن متى
عبدالسلام : أمس بحدود السآعه 12
متعب : يعني اول ماوصل للشرقيه .. طيب كيف حالته
عبدالسلام : والله ماادري د. متعب
متعب : طيب من المسؤول عن حالته
عبدالسلام : الـد. عزآم هو المسؤول عن حالته
متعب : طيب ناصر شكرا ، ويعطيك العافيه
عبدالسلام : العفو .. ويعافيك ربي

سكر وطيرآن على غرفته ورتب أغرآضه وبسرعه وخرج من الفندق متوجه لسيآرته ومآسك طريق الشرقيه وهو يدق على أبوهـ يعطيه خبر







’،









سكرت الجوال ودخلته بالشنطة وقامت تلبس عبايتها
رغد : نوري وش رايك تنامين اليوم بعد
نورة وهي تلبس عبايتها : لا ياقلبي اعذريني لازم اجهز اغراضي .. بكرة بنمشي للشرقيه ولا نسيتي
خيم الحزن على رغد : طيب حبيبتي الله يحفظك وطمنيني عنك
باست نورة رغد : من عيوني ، يالله تامرين على شي
رغد : لا ، الله يحفظك







’،













حس بأحد يهز كتفه وينادي بإسمه فتح عيونه وهو بمرحله اللا استيعاب .. تركز نظره على وجه الشخص وهو يناظر بدون تركز
رهف : سعود وش فيك
تنبه سعود وتعدل : هلا هلا رهف
لمست جبينه : وش فيك
سعود وهو يبعد يد رهف ويحط يده على جبينه ابد بس صداع ومانمت الا متأخر ، إلا كم الساعه
رهف : تو مخلصين من صلاة العشاء
فز سعود من السرير وقومته الفجآئية خلته يدوخ فرجع يجلس
رهف بخوف وهي تجلس عنده : سعود وش فيك
ابتسم : لا لا ولا شي بس لأنيي قمت فجأة حسيت بدوخه
رهف : الله يهديك ماكأنك عارف بهالشي
سعود وهو يوقف : عاد نسيت ،
مشت رهف متوجه للباب بتطلع وقفها صوت سعود وهو يقول لها : رهوف جهزي لي قهوه على مااخلص
رهف وهي عند باب الغرفه : ان شاء الله






’،







ماسكة الجوال بيدها وترتجف من الخوف وكل شوي تلتفت خلفها من أمس من أول مامسكت الجوال وهي متردده بالاتصال بنفس اليوم أو لا بالأخير قررت تتصل باليوم اللي بعده
المكان كله ظلام عدا الجوال اللي منور جزء بسيط من الغرفة شافت ساعه الجوال وكانت تشير لـ3 الفجر ابتسمت بخوف وفرحة يوم كامل تنتظر
يصير وقت الفجر حتى تدق لأنها عارفه ان كل الخمه اللي في الصاله ميتين هالوقت عقب السهرة وماراح يحسون فيها ،، بدت تدق الرقم اللي حافظته ومستحيل تنساه بأصابع مرتجفه واخيرا ضغطت زر الاتصال
وبدأ الاتصال طول ومارد وبدأ اليأس والخوف يدب قلبها وهي شوي وتبكي وتدعي انه يرد بس للأسف ناظرت الشاشه "لم يتم الرد " رجعت من جديد ودقت بس حست بصوت أقدآم تقترب من الغرفة ارتبكت وماعرفت ايش
تسوي عارفة ان لو المسمى زوجها مسكها ومعها الجوال بتكون نهايتها هي من غير الجوال وماسلمت منه ومن تحرشات ربعه ، حست براحه اول ماابتعدت الخطوات الى ان اختفت فتحت الباب بهدوء وميلت براسها

ومشت للدرج بتروح للدور الثاني بتروح لوحده من الغرف وتقفل الباب علييها بما انها بتدق على اخوها وبتنتظره اكيد بيجي وماراح يطول .. مشت بخطوات خفيفه سريعه حتى وصلت للصاله وهي محتاره
وين تروح لأي غرفه فكرت بغرفتها السابقه الي كانت فيها قبل بس تذكرت انهم كسروا الباب مشت للغرفه بالدور الثالث وهي تحط الجوال
على اذنها بعد مارجعت تدق الرقم من جديد وصلها صوت من الطرف الثاني حست بالعبرة تخنقها وهمست : سامي الحق علي








’،