[لامارا]

بمجلس الحريم

نوف : قلت لكم اسامه ماراح يخليني .
كانت ام عامر تبكي : خلاص نوف ارحمي حالك والله لو يعرف بندر انك تحبين اسامه كذا ليطلقك .
نوف بابتسامه : خلاص يمه انا ابيه يطلقني .. اسامه رجع انا ابي اسامه ما ابي بندر والله اكرهه من كل قلبي .
ام بندر وهي توقف : انا اترخص .
وطلعت وطلعت معاها لينا وطالعت ام عبدالله بنوف : لايكون زعلت عليك عمتك .
نوف : خلاص كلهم ماعاد يهموني .. انتم لاتنكدون علي خلونا نتشارك الفرحه .
ام عامر : سبحان الله اللي يغير وهو مايتغير قبل ساعات كنتي حزينه نفسك دايم والحين تقولين انك فرحانه .
نوف : خلاص ماله داعي الحزن وماراح احزن واسامه موجود .
عبير بابتسامه : واخيرآ يانوف سمعت منك الكلمه هذي ماراح تحزنين الله يجعل كل ايامك سعاده .
اسماء : قرت عيونكم يايمه ويانوف برجعت اسامه .
فتحت اسماء الدريشه وطالعت باسامه ومتعب اللي واقفين بالحوش : نوف تعالي كحلي عينك بشوفة اسامه .
راحت نوف وطالعت باسامه اللي ماتغير كثير بس انه نحف وشعره صاير طويل " الله لايحرمني منك "
ام اسامه بابتسامه : والله محد فرحان باسامه اكثر من نوف .
رن جوال نوف وكان المتصل بندر : نعم .
بندر : خليك جاهزه بحط امي بالبيت وبرجع لك .
نوف : لا ما ابي اجي خلاص انتهت حياتي معاك .
انقهر بندر : نوف انتي ماتحسين على دمك والله حرام تفكرين بالرجال وانتي متزوجه .
نوف : بنام عند اهلي اليوم .
بندر : اوك .. مع السلامه .
نوف بعد ماقفلت منه : اسماء تعالي ابيك بموضوع مهم .
طلعت معاها اسماء : انا خلاص ابي اتطلق من بندر بس اش الطريقه ؟
اسماء : واذا تطلقتي من بندر تضمنين ان اسامه بيتزوجك .
نوف : اتوقع لأنه مازال يحبني .
اسماء : اش دراك ؟
نوف : هو قالي قبل شوي .
اسماء : ياقلبي يانوف والله قطعتي قلبي يوم شفتك انتي واسامه هو يبيك وانتي تبينه بس القدر حال بينكم .
نوف : الحمدلله انه رجع بالسلامه وكحلت عيني بشوفته وسمعت صوته .
اسماء : نوف والله انتي تغيرتي رجعتي نوف بنت عمي اللي اعرفها .. بندر اذا شاف فرحتك هذي اش راح يسوي ؟
نوف : ان شاء الله يطلقني والله يا اسماء عشت معاه خمس سنوات اول سنه حياتنا عاديه ووبعد ماجبت اسامه صرنا مثل الاغراب مانشوف بعض إلا بالصدف .
اسماء : اشلون قدرتي تحملينه ؟
نوف : بنطوي الصفحه هذي وانا ماعندي بحياتي ماضي كل حياتي الآن .
اسماء : لا لا مو مصدقه ان هذي نوف اللي تتكلم اللي تقول انا حياتي كلها ماضي حاضري كئيب .
نوف : خلاص من اليوم تغيرت حياتي كلها .
اسماء : جعلها دوم متغيره كذا
رن جوال اسماء : هلا متعب .
متعب : اسماء يله بنمشي قولي لأمي تجي .
اسماء : لا متعب بنام عند اهلي اخوي تو رجع بجلس معاه بشوف اخباره .
ابتسم متعب : انا اقولك كل اخباره بس تعالي ترا لي ثلاث ايام انام بروحي خلاص اهلك طفشو منك وانا مشتاق لجنى .
اسماء : اوك .. وقفلت منه .. نوف انا بروح وبكره ان شاء الله يوم اصحى وانتي تقولين لي انك متطلقه واسامه خاطبك .
نوف : والعده وين تروح ؟
اسماء : ما اعتقد انك بتنتظرينها .
نوف وهي تسلم على اسماء : مع السلامه ياقلبي .

**

**

**

بندر بقهر : يمه هي نامت عند اهلها نوف ماتبيني نوف تبي اسامه ويوم كنت بطلقها تقولون اسامه مات .
ام بندر وهي تبكي : والله لو شفت فرحتها بشوفته كان ماقلت كذا نوف محتاجه لولد عمها .
بندر : الله يهنيها فيه .. انا ما ادري اش فيها البنت تغيرت اول كنت اقول عادي مجنونه وهذا شي طبيعي اللي مثل نوف تحب واحد مختفي مجنونه بس تو عرفت ان نوف اوفى انسان على وجه الارض .
ام بندر : لاتوقف بطريقها ياولدي طلقها وخلها تشوف حياتها مع ولد عمها اسامه يبيها وهي تبيه .
بندر : بطلقها بس الين ما اعذبها واخذ حقي منها اخليها تبوس رجولي بس عشان اطلقها .
ام بندر : ماظنتي تقدر تسويها بنوف .. نوف محد يقدر يعذبها طيبة قلبها مغطيه على الكل .
بندر : يمه هي عله على قلبي الحين وانا بتحملها كثير بس عشان اعذبها هي وولد عمها اللي طلع لنا فجأه .
ام بندر : والله ياولدي انهم تعذبو بما فيه الكفايه اسامه لسه يحب بنت عمه ويبيها وماراح يرضى انك تعذبها .
بندر : يمه نوف صايعه نوف احتمال تكلم اسامه وهي على ذمتي .
ام بندر : احترم نفسك ولاتقول انها صايعه نوف تبي ولد عمها وانا اقولك لاتوقف بطريقهم .
بندر : آآآه ياقهري اكبر من الجبال يوم قدرت اتزوج نوف طلع لي اسامه انا ما ادري اش النحس هذا اللي يلاحقني .
ام بندر تهديه : خلاص يابندر طلق نوف وتزوج وانا بخطب لك احلى بنت بالعالم .
بندر : يمه مافيه بنت بالعالم احلى من نوف .. نوف كل شي فيها حلو اخلاقها وكلامها وتعاملها مع الناس نوف هي الوفاء اذا كان فيه شي اسمه وفاء بين الناس انتظرت اسامه 8 سنوات وهي ماملت ولا قالت انه مات مثل امه وابوه واخوانه يمه انا ما راح القى مثل نوف عشان القى احسن منها وماراح القى وحده تقدر تربي عيالي مثل نوف يمه نوف ماتنعوض وانا ما الوم اسامه فيها وهي تكرهني محترمتني عاد اشلون لو تحبني مثل اسامه انا اتمنى بس القى وحده فيها من صفات نوف مع اني ماراح القى .
ام بندر : حبيبي بندر لا تعذب نفسك خلاص طلق نوف وريحها .
بندر : يمه نوف جوهره ماراح اعوضها انا ابي نوف ما ابي اضيعها بين يديني .
ام بندر : الله يهديك ويصلحك اذا طلقت نوف راح يتعذب ولدها بينكم احسن لك ولها خله معاها .
بندر : لا يمه انا ما اقدر اطلقها خلاص طلاق نوف مستحيل وماراح اطلقها هذي جوهره ماراح افرط فيها مثل ماسوى اسامه .

**

**

**

كان اسامه متمد ع الكنبه وراسه ع رجل امه : يمه والله تعبت بغربتي ومتعب الله يهديه ماقالي ان نوف تزوجت ولا كان مارجعت .. نوف صح ان اللي جاها مني كثير بس ليش تزوجت وخلتني .
ام اسامه وهي تسمح شعره : نوف تحبك والله يشهد على كلامي انك مافارقت قلبها دقيقه وحده .
اسامه : بس يمه هي تزوجت يعني نستني خلاص انا اعني لها ماضي .
ام اسامه : ياولدي انت ماشفتها يوم راحت لك وسلمت عليك نوف متعلقه فيك كثير والله انها تعذبت ابتسامتها وضحكتها اختفت من بعدك واليوم اشوف نوف تضحك رجعت نوف اللي اعرفها .
اسامه : بس يايمه نـــوف ما اقدر ارجعها لي خلاص نوف راحت من يدي .
ام اسامه : طيب لو طلقها بندر تتزوجها ولا لا ؟
اسامه : ايـــه يمه انا اتمنى نوف ترجع لي .. إلا ولدها اش اسمه .
ام اسامه بابتسامه : اسمه اسامه من حبها لك سمت اكبر عيالها على اسمك .
ابتسم اسامه : يعني هي كانت تحبني وهي متزوجه .
ام اسامه : والحين هي تحبك وتبيك .
اسامه : يمه اعطيني رقم نوف انا دايم اتصل على رقمها مغلق شكلها غيرت رقمها .
طالعة ام اسامه بولدها باستغراب : انت صاحي ولا مجنون اش قاعد تقول بنت عمك هذي وعلى ذمة رجال .
اسامه : بنت عمي بس هي طليقتي ياما جلست معاها وكلمتها وانا حافظ شكلها وصوتها وكل شي فيها انا اذكره الى اليوم .
ام اسامه : بالوقت هذاك كانت حليلتك بس الحين ماتحل لك ولا انت تحل لها .
اسامه : آآآه يايمه من زمان عنك وعن صوتك بس ماغبتي عن بالي يوم واحد .
ام اسامه وهي يبوس يده : يابعد عمري ياولدي والله اني اشتقت لك حييل بس قلت انك ميت لأنا دورنا عليك ومالقيناك .. إلا انت وين كنت ؟
اسامه : انا كنت بالمانيا .
ام اسامه : انت اكيد تعبان وتو جاي من السفر اطلع لغرفتك ارتاح .
اسامه : لا يمه بنام هنا بحضنك انا مشتاق لك .
ابتسمت ام اسامه : والله يا اسامه ان فرحتي يوم شفتك اكبر من فرحتي يوم زواجك وزواج اخوانك والاعياد انت فرحت شوفتك مالها ووصف .
دخلت ام عبدالله : سلام عليكم .
اسامه وامه : عليكم السلام .
ام عبدالله وهي تجلس جنب ام اسامه : والله تو مانورت الرياض ياحبيبي .
اسامه : منوره بوجودكم الله لايحرمني منكم .
ام عبدالله : نوره ام عامر ونوف وعبير يقولون روحي تقهوي معاهم .
رفع اسامه راسه وقامت امه وجلس جنب جدته : اش اخبارك ياجدتي والله من زمان عنك .
سالت دموع ام عبدالله وحضنت اسامه : بعد عمري ياولدي والله انك من يوم غبت وانت ونوف مقطعين قلبي وللحين وانتم مقطعين قلبي .
باس اسامه راسها : ان شاء الله بتزوج نوف وتفرحين بعيالنا .
ام عبدالله : ياجعلني ما افقدك ياولدي .. والله انا تعذبنا بغيابك ونوف اكثر ماتعذب منا والله اكثر من عذاب امك وابوك .
لاحظ اسامه كلام جدته كله مرتبط بنوف : جدتي نوف للحين تبيني ولا لا ؟
ام عبدالله : مع انها متزوجه ومايجوز لها تفكر فيك الا انك ماغبت عن بالها ثانيه وحده نوف لك وانت لها ومالكم غنى عن بعض .
ابتسم اسامه : طيب متى تطلق انا ابيها جنبي بأقرب وقت ووعد لأحقق لها كل شي تبيه واعوضها عن كل ثانيه نزلت فيها دمعتها وانا السبب .
ام عبدالله : والله حرام اللي قاعدين تسوونه نوف فرحانه فيك وزوجها زعلان عليها وانت تفكر فيها وهي على ذمة رجال .
اسامه : آآه ياجدتي ياقساة قلوبكم تقولون لاتفكرون ببعض وانا ما تغربت ثمان سنوات إلا عشانها .
ام عبدالله : هذا حكم ربي ياولدي مايجوز لك تحبها وهي على ذمة رجال .
اسامه : ونعم بالله بس هذا الشي غصب عني وعنها انا احبها وهــي تحبني .

**

**

**

جلست اسماء جنب متعب : طيب هو وين كان عايش ؟
متعب : كان بالمانيا من ثمان سنوات وهو هناك .
اسماء : طـــيب يوم كنا بالمانيا هو كان موجود ؟
متعب بابتسامه : تذكري بالمستشفى يوم بغيت اجيب العيد جبت اسم اسامه بالغلط وقلت لك اسامه ماقصر .
اسماء : والله بذاك الوقت شكيت انه اسامه اخوي بس قلت لو كان متعب يعرف شي عن اسامه كان ماخبى على ابوي .
متعب : امــي عرفت اني اكلم اسامه بس ماعرفت اني كل شهرين اروح له .
اسماء : يممه منك اشلون اقنعت خالتي انها ماتقول لأمي .
ابتسم متعب : قلت لها لو احد يدري والله لأروح عند اسامه وماعاد تشوفيني .
حطت اسماء يدها على خصرها : ولو تغربت انا وين اروح ؟
متعب : اطلقك واروح عند اسامه .
اسماء : يسلاااام يعني اسامه اغلى مني وتخاف عليه اكثر من خوفك علي .
متعب بيزعلها : اكيد هذا خويي من الطفوله ولا انتي ماعرفتك إلا قبل 7 سنوات .
قامت اسماء من عنده : انا بروح لخالتي انتبه لجنى .
ضحك متعب : اش فيك بتروحين لايكون بس زعلتي من الحق والحقيقه .
اسماء وهي تطالعه : لا اش دعوه ازعل ع العموم الله يهنيك فيه .. ورجعت جلست جنب متعب .. إلا هو متى قالك انه بيجي وانت لي ماقلت لي؟
متعب : ههههه مو مصدق ان هذي اسماء اللي قبل شوي .
اسماء بغنج : ليش هو انا اقدر اشيل عليك .
باس متعب خدها : يالبئ اللي تحبني .
ابتسمت اسماء : إلا متى قالك انه بيجي تو عرفت انك تخبي علي .
متعب : قالي انه بيرجع قبل اسبوعين وقالي اختار لي الوقت المناسب وانا اخترت له انسب وقت .
اسماء : وكل هــذا وتخبي علي .
متعب بمزح : تعرفين زوجك كتوم .
اسماء : اسم الله عليه الكتوم اللي مافيه شي مايقوله لأمه .
ضحك متعب : عاد هذي امي غير .
اسماء بابتسامه : الله يرزقك برها .
طالع متعب بساعته ووقف : مع السلامه حبي بروح لأسامه والله اني مشتاق له ومشتاق لسواليفه .
اسماء : هذا وانت تكلمه وتروح له بالمانيا وانا اخته ماشفته إلا عشر دقايق من رجع وماتبيني اجلس عنده ؟
متعب : انا ابي اسولف معاه لايف .
اسماء : طيب اعزمه هنا عشان نسولف معاه لايف ونشوفه ونسمع اخباره .
متعب : خلاص بتصل عليه بس انتي سوي لنا القهوه .
اسماء وهي تطالع متعب : مافيه احد يشرب قهوه الساعه 8 الصباح .
متعب : سوي قهوه انا بشربها واسامه مسكين من زمان عن القهاوي وعلوم الرجال .
اسماء : اش تقصد .
متعب : قصدي انه من زمان عن السعوديه والقهوه ومجالس الرجال .
اسماء : طيب يله اتصل عليه قوله .
طلع متعب جواله واتصل على اسامه : الوو .
اسامه : هلا والله بصاحبي صباح الخير .
متعب : صباح النور .. اسامه تجي تقهوى عندي الحين ؟
اسامه : لا .. خله بكره .
متعب : اسامه تعال تقهوى عندي ترا اختك مشتاقه لك وانا بعد من زمان عنك .
اسامه : خلاص مسافة الطريق وانا عندكم .
متعب : حياك الله .
قفل متعب من اسامه : يله اخوك بيجي لاتأخرين بالقهوه وانا بروح للديوانيه .

**

**

**

ام وليد وهي تصرخ : ياويلي ياويلي مجوهراااتي وينها انا انسرقت مجوهراتي مو هنا .
ابو وليد : صلي على محمد .
ام وليد وهي تطلع لغرفة وليد والعزوف : وليــــــــد الحق علي مجوهراتي انسرقت حسبي الله على اللي سرقها .
فتح وليد الباب : يمه اش اللي تقولينه ؟ مين اللي سرقهم ؟
ام وليد وهي تمثل البكاء : اكيد انها العزوف او الخدامه مافيه احد غيرهم .
وليد : لااا العزوف مستحيل تسويها .
ام وليد وهي تدخل : انا بشوف الغرفه اش دراني عنها لو هي اللي سرقت مجوهراتي .
فتحت الدرج اللي حاطه فيه مجوهراتها واخذت الصندوق وطالعت بالعزوف والوليد : هذي مجوهراتي عندها اش بتقول الحين ؟
وليد وهو يطالع العزوف : وصلت فيك الحقاره لهالدرجه تسرقين مجوهرات امي .
وقفت العزوف : خالتي قولي لولدك انه انتي اللي حاطتهم هنا لأنك عرفتي مكان الدرج اللي هم فيه من اول مافتحتيه ومارحتي للخدامه تشوفين اغراضها لعبتك حلوه بس انتي خربتيها بالنهايه .
طلعت ام وليد " ايه كلامها صح "
وليد : انتي من جدك امي اللي حاطتهم هنا .
العزوف : لو مو هي كان ماجات تدور عليهم عندي .
وليد : احس انكم اعداء مو اهل .
العزوف : ايه صح انا وامك اعداء وياليت اطلع من البيت هذا باسرع وقت لأني مليت طفشت ثلاث سنوات وانا متحمله امك خلاص نفذ الصبر عندي بطلع ببيت بروحي واذا انت ماتقدر اقول لأبوي مو مقصر معاي .

**

**

**

نوف : يمه والله ماتتخيلين قد ايش فرحانه .
ام عامر بابتسامه : جعلها دوم فرحتك ان شاء الله .
نوف : حسيت ان كل الحزن اللي انا فيه راح بلحظه وحده اسامه هو سر سعادتي .
ام عامر : يابنت حرام عليك انتي متزوجه ومايصير تقولين كذا .
نوف : يمه مصيري بتطلق وانا احب اسامه وبندر يعرف بالشي هذا .
ام عامر : الله يهديك لو بتطلقين ماتقولين كذا لآنه حرام وحبك هذا مو على الشرف انتي كذا تغضبين ربي عليك .
نوف : يمه القلب وماهوى .. انا قلبي ماهوى إلا اسامه ولا راح احب غيره .
ام عامر : وتتوقعين ان بندر بيطلقك ؟
نوف : اذا ماطلقني برضاه يطلقني غصب عنه .
ام عامر : ماراح تتطلقين على كيفك اذا هو مو موافق .
نوف : يمه لاتنسين ان انا كل ما اقوله اطوله وشوفي اتطلق ولا لا ؟
ام عامر : حبيبتي هو يحبك وماراح يفرط فيك ولا راح يكرر غلطة اسامه .. اسامه يقول لأمه انه ندم على طلاقك .
نوف : انا لازم اعرف اش سبب طلاقي اسامه لسه يحبني .
ام عامر : وانتي اش دراك انه يحبك ؟
نوف : يمه هو قالي .
ام عامر وهي تحط يدينها على راسها : حتى ولد عمك مثلك انتم اش جاكم اش فيكم ؟
نزلت سعاد مع الدرج : نــــووف هنا ؟
وقفت نوف وسلمت على سعاد : انتي اش جايبك المفروض تجلسين عند اخوك توه راجع من غربته .
ابتسمت سعاد : زوجي اهم من اخوي .
نوف : صدق انه ماعندك ذوق .
ام عامر : لا والله سعاد ذوقها عالي والدليل انها تحب عامر احلى ماخلق ربي .
نوف : يمه ترا عندك عيال وبنات غيره مو وحيدك .
ام عامر : الله يخليكم لي بس عامر هو اول من عرفت .
رن جوال نوف : الوو .
بندر : هلا نوف .. خليك جاهزه بعد صلاة العصر بمر عليك واخذك .
نوف : لا عمي بيسوي حفله لاسامه وانا لازم احضرها .
بندر : ايه عارف انه عنده حفله وانا بحضرها بس بخذك العصر وبالليل تروحين لهم .
نوف : لا انا ابي اجلس مع اهلي .
بندر بعصبيه : نوف ليش انتي تحبين العناد .. خلاص الى متى واحنا كذا .
نوف : انت اللي تنرفزني .
بندر : انتي من يوم رجع اسامه واسلوبك جاف .
نوف وهي تدخل بغرفتها : بندر اكون صريحه معاك انا ما احبك .
بندر : ايه اكيد تحبين اسامه ولا اش خلاك تجلسين عند اهلك .
نوف : ايه احب اسامه وهذا من ربي حبيت اسامه من صغري مستحيل اكرهه او احب غيره .
بندر : طيب يانوف دواك عندي اخليك تنسين اسامه وطوايفه .
نوف : انا احب اسامه طول عمري واعلى مابخيلك اركبه .. وابيك تطلقني .
بندر : اذا طلقتك ترا انا ابي ولدي يعيش معاي .
نوف : حلال عليك ولا راح اسألك عنه .
بندر : حتى ولدك مستغنيه عنه .
نوف : بندر انت اش تبي مني ياما هنتني وذليتني وجرحتني وتبيني احبك ولا اعيش معاك ؟
بندر : انا احبك يانــــوف اسامه باعك وحبيتيه ولا انا شاريك وانتي تكرهيني .
نوف : ولا راح احبك واسامه هو الوحيد اللي حبيته ولا راح احب غيره .
بندر : وتقولينها قدامي انك تحبينه صدق انك ماتربيتي .
نوف : حدك هنا لاتتكلم على تربيتي انا متربيه واحسن تربيه واللي مو متربي هو اللي يتكلم علي .
بندر : اعصابك ياشيخه لاتزعلين من الحقيقه انتي قليلة حيا وماتحسين على دمك كم مره اقولك لاتتكلمين باسامه قدامي بس انتي متبلده ماعندك مشاعر ولا احاسيس انا ما ادري اشلون اهلك قدرو يربونك عندهم لو انا مكانهم ارميك بالشارع .
نوف : اهلي يحطون بنتهم بعيونهم ويحفظونها بعد الله الين ماتتزوج وزوجها اما يضيعها ولا يسعدها .
بندر : بس للاسف اهلك دلوعك وماعرفو يربونك .
نوف : بندر لاتتكلم بتربيتي لأنك قاعد تسيئني والاساءه هذي يمكن توديك بـ 60 داهيه انا نوف ال ...
بندر : اش قصدك الاساءه هذي توديني ب 60 داهيه ؟
نوف بابتسامه : لا تنسى انه لي عزوه اخواني وعمامي وعيالهم .
بندر : اها يعني انتي بتروحين لعمامك واخوانك وتقولين لهم اني قلت انك ماتربيتي .
نوف : ايه .
بندر : وانا احتمال اقولهم انك تحبين اسامه وانتي على ذمتي وتتغزلين بالرجال وانتي على ذمتي .. اش بتصير ردة فعلهم .
نوف : يعني اش راح يسوون بيقتلوني لسواد عيونك ولا بيقولون لك مالك فيها نصيب وطلقها ؟
بندر : نوف انتي تخططين لتدمير حياتي ولا لآيش بالضبط انا مافهمتك .
نوف : انا ما ادمر احد بس ابيك تطلقني بشوف حياتي مع غيرك يمكن يقدر يسعدني واستقر معاه ولا انت من 7 سنوات من زواجنا مافيه لا استقرار ولا سعاده ولا حياه مثل خلق الله .
بندر : وانا اش راح يصير لي اذا طلقتك ؟
نوف : تزوج الله يهنيك اكثر ماحط ربي بنات الحلال روح تزوج لك وحده منهم .
بندر : وبوجهة نظرك كمجربه فيه وحده بترضى بواحد مطلق زوجته بعد سبع سنوات ؟
نوف : ايه ترضى ليش لا .
بندر : اوك انا بتزوج الحين واذا مالقيت السعاده مع زوجتي الثانيه ماراح اطلقك .
نوف : لا لا طلقني وبعدين تزوج انا ما ابي اسبب مشاكل لبنات خلق الله .
بندر : نوف انا احبك .
نوف بصراخ : وانا اكرهك لاتحاول اني في يوم من الايام راح احبك هذي مستحيل تصير إلا باحلامك الورديه .

**

**

**

اسامه وهو يطالع جنى بنت اسماء : ما شاء الله قمر طالعه على امها .
ابتسمت اسماء : ياقلبي يا اسامه جعلني اشوف عيالك ان شاء الله .
اسامه " قريب ان شاء الله " : وعيالي بيطلعون احلى من عيالكم كلهم .
اسماء : اش المناسبه احلى من عيالنا كلنا جنى مستحيل يصير فيه احد احلى منها .
اسامه : لأن عيالي ان شاء الله يصيرون عيال نوف وماراح يصير فيه احد احلى منهم .
طالعته اسماء بذهول : نعم اش قلت ؟ تفكر بنوف وهي متزوجه خاف ربك لاتصير مثلها ترا هي اقولها حرام تفكرين باسامه وانتي متزوجه تقولي القلب ومايهوى .
اسامه : ايه كلام نوف صدق اش اسوي القلب ومايهوى .. ثمان سنواات وانا عايش بغربه كله عشان نوف وعشان ما اجرحها وتقولين لي لاتفكر فيها اي من الحق انتي ؟
اسماء : اسامه انت من جدك بتتزوج نوف ؟
اسامه : ولا راح اتزوج غيرها .
اسماء : طيب هي متزوجه .
اسامه : والمتزوجه اذا كان تحبني تتطلق عشاني .
اسماء : تتطلق عشانك تخلي الناس كلهم يسولفون ويتكلمون فيها عشااانك ؟
اسامه : اذا كان تحبني تسوي المستحيل عشاني مثل ماضحيت عشانها .
اسماء : اسامه اصحى من الغيبوبه اللي انت فيها وين عقلك ؟ اشلون تخلي البنت تتطلق عشانك والله حرام انت ماتدري اشلون نظرة المجتمع للمطلقه .
اسامه : بلا مجتمع بلا بطيخ نوف اذا تطلقت انا راح اتزوجها وانا اعرف ان نوف تحبني انتي لو سمعتي كلامها البارح كان ماقلتي كذا .
اسماء : اسامه ابوي لو يعرف انك تفكر بنوف راح يقتلك ؟
اسامه : اسماء والله لو يقتلوني عشان نوف ما اتخلى عنها دقيقه وحده نوف تحبني وانا احبها اش اللي يمنعنا مانتزوج ؟
اسماء : انت من الاساس ودامك تحبها ليش طلقتها ؟
اسامه : طلقتها عشان شي خاص فيني وما ابي احد يفتح الموضوع هذا .
اسماء : اسفه اذا كان فتحت مواضيع انت ماتبيها .
اسامه وهو يطالع باسماء : انتي اش فيك لايكون زعلتي علي .
اسماء بابتسامه : اش دعوه ازعل على اخوي حبيب قلبي .
دخل متعب : سلام عليكم .
اسماء واسامه : عليكم السلام .
متعب وهو يجلس جنب اسماء : اسومه امي تبيك .
وقفت اسماء : خالتي تبيني ولا تصريفه .
ضحك متعب : لا والله امي تبيك .
طلعت اسماء من عندهم وطالع اسامه بمتعب : وينك من اليوم ؟
متعب : رحت عند امي لازم تاخذ راحتك مع اختك .
اسامه : ياعيني ع المؤدب .

**

**

**
يتبع....