[لامارا]

مــــرت اربع اشهر واسبوعين ونوف بتطير من الفرحه وقعت على موافقتها وطالعت عامر وابتسمت : آآآه ماتتخيل قد ايش فرحانه .
عامر : جعله اليوم ودوم فرحتك هذي .
نوف : امين .
عامر : يله تعالي معاي اسامه بيشوفك .
مشت نوف مع عامر ودخلو بالصاله ووقف اسامه وابتسم لنوف وطلع عامر واسامه ضم نوف : واخيرآ صرتي حليلتي .
نوف : مو مصدقه يا اسامه اني صرت لك .
اسامه وهو يبوس خدودها ويدها : اشتقت لك .
جلست نوف ع الكنبه وهي تقول : وانا اكثر .
ابتسم اسامه وهو يجلس جنبها : تذكرت ملكتنا قبل 9 سنوات بس كنتي مستحيه مو مثل الحين .
نوف : بالعكس تو حسيت بطعم الفرح ملكتنا اليوم تسوى سنين عمري اللي مضت كلها .
اسامه : حتى يوم كنت موجود .
نوف : اسامه خلاص ايامنا اللي راحت كلها شقا وهموم احنا مانبي نكدر على انفسنا اكثر من كذا .. قولي اش سبب طلاقي وبنبدا بحياه جديده .
تنهد اسامه : كنت مو صاحي يوم طلقتك كنت مجنون مو بعقلي .
نوف : طيب قولي بالتفصيل انا ابي اعرف .
اسامه : جالنا سنه كامله من زواجنا وانتي لسه ماحملتي رحت الدكتور وحللت وقالي اني عقيم ولا يمكن انه يجيني عيال وبالصباح رحت للمحكمه وطلقتك ويوم رجعت للبيت وشفتك بغيت انتحر ما ابي اضيق خلقك ما ابي اجرحك وقلت لك ان خويي مات وبعدها وديتك بيت اهلك ودخلتي المستشفى اكثر من مره وانا السبب وانا رحت لألمانيا وبعد اربع سنوات من غربتي تعالجت والحمدلله رجعت لكم .
طالعته نوف : انت كنت تعرف عنا شي ؟
اسامه : كل اخباركم واصلتني متعب ماخبى علي شي إلا زواجـــك .
نوف : وليش ماقال لنا وريحنا الناس ينامون ويرتاحون وانا اسهر الليالي ابكيك خلتني ابكيك وانت حي .
ضمها اسامه : ياجعلني ما ابكيك .
نوف : والله لو قلت لي انك عقيم ما اتركك لحظه وحده واعيش معاك العمر كله مهما كانت ظروفك مافيه شي يفرقنا .
اسامه : حبي هذا درس لنا عشان مانفترق .
نوف وهي تغمض عيونها : آآآه ياصعبه من درس والله حسيت انه 16 سنه مو 8 سنوات انا ماكنت عايشه مع الناس كل شي فيني انت .
اسامه : يالبئ قلبك يانوف .
نوف : لبئ روحك .
اسامه : بس انا عندي سؤال واحد وراح ينتهي ماضينا المر بهاللحظه .
نوف : اسأل .
اسامه : انتي ليش تزوجتي ؟
نوف : من كثر ماني متعذبه بغيابك وافقت على بندر قلت يمكن يقدر يحل مشكلتي وزاد الجرح جرح صارت حياتي كلها مشاكل .
اسامه : بس هو شكله يحبك .
نوف : انا كل ماجبت طاريك قام يضربني .
اسامه : يابعد عمري من اليوم وطالع محد يقدر يمد يده عليك .
نوف : من اليوم وطالع راح انسى شي اسمه حزن وهم ودموع .
اسامه : وتنسين كل الناس ومايصير عندك إلا انا .
ضحكت نوف : هههههه والله لو فاقده الذاكره .

**

**

**

بندر وهو يطالع لينا : انتي مــتأكده من الكلام اللي تقولينه ؟
لينا بابتسامه : ماتصدقون ان هذي نوف اللي نعرفها يمه نوف تغيرت صارت تختلف عنها اول .
ام بندر : الله يديم عليها سعادتها عطيني جوالي ببارك لها وابارك لأمها .
وقف بندر : لا اكيد هذا مقلب نوف تتزوج ؟
لينا : لا تنسى انها تحب اسامه ولا تصير نفسك بينها وبين زوجها تعوذ من الشيطان واتركها بحالها .
بندر : بس انا احب نوف لو حبت 100 رجال ماراح اكرهها .
لينا : خلاص نوف صارت زوجة اسامه والحمدلله اني شفتها فرحانه دايم وهي تبكي .
ام بندر : يابنت روحي جيبي لي جوالي .
راحت لينا وجابت جوال امها واتصلت على نوف : الوو .
نوف : هلا خالتي .
ام بندر : هلا بك اش اخبارك حبيبتي ؟
نوف : الحمدلله بخير .
ام بندر : الف الف مبروك ياقلبي مـــــنك العيال ومنه المال .
نوف بابتسامه : الله يبارك فيك .
ام بندر : ان شاء الله نفرح فيك عروس .
نوف : ان شاء الله وزواجي بعد ثلاث اسابيع واتمنى تحضرونه .
ام بندر : ان شاء الله نحضره .. مع السلامه حبيبتي والله يتمم لك على خير وسلمي لي على امك .
نوف : يوصل ان شاء الله .

**

**

**

ابو اسامه بابتسامه : الحمدلله اني شفتك فرحان والحمدلله انك رجعت لنوف .
ام اسامه : بس ابيك تسكن عندي يا اسامه كل عيالي طلعو من البيت مابقى لي إلا انت .
اسامه : ان شاء الله اسكن عندكم بس ببني جناحنا ابيه يجهز قبل ثلاث اسابيع .
ابو اسامه : ان شاء الله اسبوع وهو جاهز .
دخل مهند : سلام عليكم .
الكل : عليكم السلام .
مهند وهو يجلس جنب ابوه : يبه وين جدتي لايكون راحت للديره ؟
ابو اسامه : لا امي راحت عند العزوف ان شاء الله بكره تجي عندنا هي قالت لي انا ابي امر على عيالي كلهم .
مهند : يبه ترا اذا تزوجت بسكن عند جدتي واحلمو انها تطلع من الديره .
ام اسامه : واشلون نشوف عمتي ونجلس معاها ؟
ضحك مهند : اللي يبيها يروح لها ببيتها انا اشوف ان جدتي تجي عندكم اكثر من انكم تروحون لها .
اسامه : ايه جد من يوم جيت ولا مره رحنا للديره وجدتي يوم هناك وشهر هنا .
ابو اسامه : خلاص بعد زواجك نروح للديره ونجلس هناك الين تنتهي الاجازه .
مهند : اهم شي نصوم رمضان بالديره والله الجو احلى من هنا الرياض زحمه وكل يوم وهي زايده الزحمه .
رن جوال ام اسامه : هلا حبيبتي .
اسيل : هلا خالتي وينك ؟
ام اسامه : ببيتي بغيتي شي ياقلبي .
اسيل : عندك احد من البنات سعاد ونوف مايردون على جوالاتهم .
ام اسامه : لا والله ياقلبي ماعندي احد بس عيالي واسماء جايه بالطريق .
اسيل : طيب مهند موجود ؟
ضحكت ام اسامه : ايه قولي كذا من اول .
اسيل : لا والله ما قصدي اذا كان موجود ماراح اجي .
ام اسامه : ولا يهمك الحين اطرده وحياك الله .. إلا انتي وينك ؟
اسيل : عند عمتي امال دقايق وانا عندكم .
ام اسامه : مع السلامه حبيبتي .
اسيل : مع السلامه .
قفلت منها ام اسامه : مهند البنات بيجون وبتجي اسيل وابيــك تطلع من البيت روح لأي مكان .
مهند : وين اروح ماجد مشغول الحين .
ام اسامه : روح لأي مكان روح لمشعل ولد خالتك اطلعو انت واسامه روحو لأي مكان .
مهند وهو يطالع اسامه : اش ريك نروح للشباب بالاستراحه ؟
اسامه : لا انا ابي اتصل على متعب وبنطلع اي مكان .
مهند : وانا مالي إلا ماجد .

**

**

**

ام عبدالله : والله يالعزوف انك اغلى بناتي .
ابتسمت العزوف : الله لايحرمني منك ياجدتي ويخليك ذخر لنا .
ام عبدالله : كم الساعه الحين ؟
العزوف وهي تطالع الساعه المعلقه على الجدار : الساعه 11 ونص .
ام عبدالله : ورجلك وينه ؟ ما ابي انام واخليك بروحك ؟
العزوف : راح لأمه شوي ويرجع .
ام عبدالله : إلآ انتي بأي شهر الله ييسر لك .
العزوف : بالشهر الخامس واذا جبت بنت بسميها عذبه على اسمك .
ام عبدالله : لا ان شاء الله خلي البنت اسمها حلو .
العزوف : وعذبه والله حلو دامه اسمك ياجدتي .
ام عبدالله : لا سمي فاطمه خديجه من اسماء الصحابيات رضي الله عنهن .
العزوف : مافيه احلى من اسماءهم واحنا نتمنى ان بناتنا فيهم صفه من صفات الصحابيات بس اسماء قديمه .
طالعتها جدتها : وعذبه مو قديم ولا انتي قاعده تجامليني .
ضحكت العزوف : خلاص ياجدتي انتي اللي تسمين بنتي والاسم اللي تبين .
ام عبدالله : الله يخليك لي .
رن التليفون وقامت العزوف وردت بـ : الو .
الماس : هلا وغلا .
قفلت العزوف السماعه ورجعت جلست جنب جدتها : وش فيك ؟
العزوف : هذي الماس بنت عمي .
ام عبدالله : واذا كان بنت عمك تسكرين السماعه بوجهها كذا انا ما الوم لولوه لو قالت الحرب قايمه بينك وبين الماس .
العزوف : جدتي والله هي اللي تغلط علي .
ام عبدالله : وش دراك ياحبيبتي لو بتعتذر منك انتي مو معطيتها وجه قفلتي بوجهها مايمديها تقول كلمه وحده .
العزوف : جدتي هي معجبه فيني وانا ما ابي ارد عليها ولا ابي اكلمها .
ام عبدالله : يعني هي بنت عمك اكيد بتعجبينها .
العزوف : ياجدتي اشلون افهمك .. هي مسويه نفسها ولد وتحبني .
ام عبدالله بذهول : انتي وش تقولين وش اللي صار ببنات ولدي وحده تنتحر والثانيه مسويه نفسها ولد .
العزوف : والله ياجدتي من التربيه .. بس انا اقدر اعدل الماس واخليها تعيش حياتها مثل غيرها من البنات .
ام عبدالله : فيك الخير .. بس مثل الوقت هذا والله انه يخوف البنات يحبون البنات يارب لاتسخط علينا انتي تعرفين فاحشة قوم لوط كانو الرجال يميلون للرجال والحريم يميلون للحريم خالفو الفطره والوقت هذا فيه ناس كذا
العزوف : ياليت الماس تسمعك ياجدتي والله هي واقفه لي ببلعومي انا ما ادري اشلون اتعامل معاها .
ام عبدالله : تكفين يالعزوف دامك تعرفين تغيرينها ابدي من الحين لاتضيع بنت عمك وانتي تتفرجين .
العزوف : بس المشكله بأمها مو بالماس مستحيل تخليني اكلمها او اجلس معاها .
ام عبدالله : ماعليك منها هذي .
العزوف : خلاص بكره اجيب الماس هنا واجيب لها داعيه توجهها وترشدها واجيب لها كتيبات توعيه وراح تغير ان شاء الله .

**

**

**

صحت نوف على آذان العصر وقامت وخذت لها شور ولبست بنطلون اسود وبلوزه كاروهات ابيض وزهري ولبست صندل ابيض وشعرها لفته ذيل حصان وخذت شرشف صلاته ولفته على جسمه وصلت صلاة العصر وخلصت مـن الصلاه وسفطت الشرشف ورفعته ونزلت تحت : سلام
عليكم .
عامر وسعاد : عليكم السلام .
نوف وهي تجلس : اخباركم ؟
عامر : تمام .. انتي وينك من اليوم ماتردين على جوالك ؟
نوف بابتسامه : كنت نايمه .
عامر : طيب انتي وزوجك اش فيكم مستعجلين على الزواج ؟
نوف : لو سمحت مالك دخل .
ضحكت سعاد : هههههههههههه حلو لو سمحت مالك دخل .
عامر : حلوه بس لاتعيدينها .
نوف : وين بنتكم يمكن جالي اسبوع ماشفتها .
سعاد : اسم الله عليك امس كانت عندك .. بعد كانت بحضنك .
نوف بابتسامه : سوري انا انسى كثير .
سعاد : ايه من يوم رجع اسامه ماتعرفين إلا هو ولا تذكرين إلا هو .
نوف : ومين لي غيره عشان اتذكره او اعرفه .
طالعها عامر : لك ابوك واخوانك وخواتك .
نوف : على عيني وراسي بس اسامه غير وانتم تعرفون معزته وغلاه عندي .
سعاد : احمدي ربك انك شفتيه مره ثانيه ولا كان تموتين علينا .
نوف : والله نفذ صبر ثمان سنوات وانا انتظره بس كان عندي امل كبير انه يرجع .
رن جوال نوف وقامت وردت بـ : هلا وغلا .
اسامه : وهـ فديت هالصوت .
نوف : فديت قلبك .
اسامه : اش اخبارك حبيبتي ؟
نوف : تمام .. انت اش اخبارك ؟
اسامه : بخير دامني اسمع صوتك .
ابتسمت نوف : الله لايحرمني منك .
اسامه : ولا منك ياقلبي .

**

**

**

العزوف : الماس انتي بنت عمي واخت زوجي وعزيزه وغاليه .
ابتسمت الماس : يابعد عمري يالعزوف والله عارفه انك طيبه وماراح تخليني مهما سويتي راح تحبيني .
العزوف : وعشان كذا انا ابي اخذك معي لبيتي .
الماس مو مصدقه اللي تسمعه : العزوف انتي تتكلمين جد ؟
العزوف : يله ياقلبي روحي جيبي اغراضك كلها لأنك احتمال تجلسين عندي ثلاث اشهر .
الماس : لا الله يخليك بجلس عندك الين ماتولدين .
العزوف : اوك بقى ل اربع اشهر واولد وابيك بجنبي .
الماس : العزوف انا كلي لك كلي فداك انتي لو طلبتي دمي ما رفضت .
العزوف : بعد عمري يا الماس .. يله بسرعه جيبي اغراضك قبل خالتي تجي .
الماس : اوك .

**

**

**

زواج نــــوف واســــامه ..

بعد الزفه دخلو نوف واسامه بجناحهم ونزلت نوف عبايتها وطالعت باسامه وهي تبتسم وراح لها وضمها .. ضمها شوق وضمها حب وضمها دواء لجروحه .. واخيرا حبيبته بين يدينه : الف الف مبروك ياعمري .
نوف بابتسامه : الله يبارك فيك ويخليك لي ولا يحرمني منك .
اسامه وهو يبوس يد نوف : ماتتخيلين قد ايش مشتاق لك .
نوف : وانا اشتقت لك اكثر .
اسامه بحب : احبــــك .. جعلني فدوه لك .
نوف : وانا اكثر .
اسامه : عن اذنك حبيبتي بروح اصلي ركعتين وانتي بعد صلي .
نوف : اوك .
وراحت نوف ونزلت فستانها وخذت لها شور ولبست قميص نوف قصير وظهرها مفتوح وصدرها مفتوح وشعرها رفعته بتسريحه ناعمه وحلوه وحطت كحل اسود وحطت ميك اب خفيف وتعطرت وصلت لها ركعتين ودخل اسامه وشاف نوف جالسه ع التسريحه وتحط روج وحضنها : احبك
نوف وهي تضحك : حرام عليك خوفتني .
اسامه : هههههههه .
نوف : اسامه اذا فيه اي شي يربطك بالماضي افتحه الحين لأن هذي اخر ليله نذكر فيها شي بماضينا الاليم .
اسامه : انا عندي دفتر اكتب فيه كل شي عن الماضي خذيه واقريه وراح تعرفين قد ايش متعذب .
نوف : يابعد عمري والله ماتستاهل العذاب هذا بس كل شي قضا وقدر .
اسامه : خلاص صفحة الماضي طويناها .

**

**

**
طالعة الماس بوليد : ايــــــش ؟
وليد : ماجد طلقك خلاص ماعاد يبيك .
الماس وهي تبكي : والله حرام يوم التزمت وهو يطلقني ياااربي اش هالاقدار .
العزوف : الماس ياقلبي ارضي بالقدر وربي يعوضك خير منه ان شاء الله وربي اذا حب عبد ابتلاه .
الماس : ما ادري اش اقولك يالعزوف كل شده لي انتي سبب زوالها بعد ربي .


**

**
بـــعد مــــــرور اشــــــهر مــــن زواج نوف واســــــــــامه
جلست نوف ع الارض وتركت ع الشجره وقرأت الورقه اللي اعطاها اسامه .

غابت شمسي وابتدت رحلتي مع الظلام
غابت شمسي وبدا جرحي وحزن الايام
غابت شمسي انتظر رجوعها من اعوام
عندي امل برجوعها لو شارفت بالغروب

انتظرت شروقها ومليت من قسوة الليالي
ياقلبي الدنيا ماترحم مع فقد اغلى الغوالي
يارب تكتب لنا اقرب لقا يالله ياذا الجلالي
ومثل ماقالو هذا المقسوم لنا مقدر مكتوب

من اللي يصبر على فقدان اقرب الاحباب
متى ترجع ورجوعك صار اشبه بالسراب
يكفي الم واوهام واحزان وسراب وعذاب
وامشي لوحدي تايه ولا لي وجهه ودروب

جعل الغياب اللي فيه كل عذابي مايطول
ارجع لك واعانقك والفرح بيننا موصول
واقول رجعت لك والشوق باقي ولايزول
واسمعك اعذب كلامي كل ماهبت الهبوب
( شاعره بقلمي )

باست نوف خد اسامه : ارجوك بنمسح الماضي هذا الكئيب من حياتنا .
اسامه : غاليه والطلب رخيص .
نوف : يارب لاتحرمني منه .
اسامه : ولا يحرمني منك يا اغلى انسانه بالكون كله .


****


****


****


****

تـــــمـــت رواية غـــابت شــمسي وابتدت رحلتي مع الظلام

03:15 م

10 / 6 / 1434 هـ
19 / ابريـل / 2013 م
يوم الســـــبت

اتمنى ان الروايه عجبتكم .
ولا تنسوني من دعائكم اخـــتكم / reem

انتظروني في رواياتي القادمه

سبحانك اللهم لا اله الا انت استغفرك واتوب اليك
اللهم صلي وسلم على محمد .
والسلام عليكم ورحمة الله وبركاته .....