صغيرات على الحياة / للكاتبة المبدعة أم وسن ، مكتملة

[بلازا]

أم تركي// يابنتي وش ها النومة
وداد//يمه مانمت إلا الساعة سبع الصباح بنتي مسهرتني
أم تركي//طيب فيه ناس جايينك خطاب
وداد//يمه ماصار لي شهر من خلصت عدتي ،بعدين أنا شايلة ها الفكرة من بالي نهائي وبنتي عندي بالدنيا كلها.
أم تركي//يابنتي أنتي توك صغيرة ولو معك ثلاثة وإلا أربعه كان عذرناك أبي اطمن عليك قبل ماتغيب عيني عن ها الدنيا وأشوفك عند رجال يصونك ويحافظ عليك.
وداد//بسم الله عليك إن شاء الله تزوجين عيال ريومتي وعيال عيالها.
ام تركي//خل نزوج أمها أول..بعدين اللي متقدم لك توه ولد ما بعد حبه إلا أمه.
وداد//هه ياسلااااام كملت والله،عشان لاتزاعلنا يقعد يعايرني أنا ماخذك وأنتي مطلقة وأنا توني بكراتيني.
أم تركي//هههههه الكراتين للبنت مهوب للولد ،وريم خليها عندي باربيها أنا
..وقطع كلامهم تركي اللي دخل،
تركي//السلام عليكم
أم تركي وداد//عليكم السلام.
أم تركي//تعال شف أختك رفعت ضغطي.
تركي وهو ياخذ ريم من يد أمها ويلاعبها//أفا أم الريم رافعة ضغط الوالدة؟
عطيت أمي ريوم وسحبت وداد من يدها ورحت لغرفتها

[بلازا]

وداد//رجاءا أبو سعد كان بتكلمني بالموضوع اللي قالت لي أمي بلاش ها السيرة أنا رافضة النقاش فيها نهائي.
أنا تكفيني دراستي وبنتي وبعدها بدور وظيفة وأكفي نفسي وبنتي.
تركي//اسمعي وجهة نظري بس،أول شي لو سويتي كذا أول من بيحاسبك ويلومك هي بنتك لا كبرت بتشوف الكل عنده أخوان وخوات وأهي لا ،لحالها هذا شي والشي الثاني الولد سألت عنه ممتاز جدا والكل مدح فيه مديره زملاءه جماعته وهو متمسك فيك حيل وبصراحة الرجال ماينرد تدرين من هو؟
وداد//ما أدري ولا أبي أدري.
تركي//هذا مطلق أخو عناد رجال ونعم
والله ما يتفوت حتى البنات اللي مابعد تزوجن ما يحصل لهن مثله،أنا ماودي أجبرك لكن أنتي أوزنيها بعقلك وفكري،أمي وأبوي الله يطول بأعمارهم، ماهم بدايمين لك العمر كله،وأنا ما أضمن لك نفسي أخاف الدنيا تغيرني محد يضمن نفسه لكن لا تزوجتي جا للريم أخوان وجا لك أنتي سند وأحنا مانبي إلا الخير لك وإلا جلستك عندنا تسوا الدنيا وما فيها نشيلك بعيونا وقلوبنا،لا تستعجلين خوذي راحتك واستخيري.
وحطي أمي وأبوي وريم قدام عيونك هم أكثر من بيفرحهم موافقتك.
‏*‏**
وافي//اليوم عندي عشاء لأخوي عساف مختصر مثل ماطلب عساف بس أحنا وبيت عمي سعد
،مريت المطبخ بآكل أي حاجة خفيفة جوعاان شفت حنين تحوس بالحلا ومنشغلة قربت منها وهمست بأذنها:تسمحين لي آكلك.
حنين فزت:بسم الله خوفتني ياأخي كم مرة قلت لك لا تدخل فجأه تنحنح استأذن تكلم سوو شي.
وافي بضيق/طيب هدي أعصابك والله أنتي اللي بغيتي تاكليني.
حنين/أوف إحراج تو انتبهت إني منفعلة زيادة عن اللزوم بس معي حق خوفني،شفته تضايق حبيت أقلبها مزح غمست يدي ببقية خلطة الشوكولا وطبعتها بوجهه وانحشت وأنا أقول هذا عقاب اللي يخوفني.
وافي//ههههه طيب ياالبطة بشويش لاتركضين ناسية الكرشة ولدي جاه رجة بمخه
عساف//الله يهديه وافي أصر على العشا وحلف أنا ماودي بها الرسميات يكفيني عشا البيت العادي.
دخلت وسلمت وسلم تركي ببرود وأول ماجلست شفت نظراته لي باين فيها القهر ،وأنا محرج فعلا منه يحق له يزعل بالرغم من اعتذاري له .
وداد//بعد ماتعشينا عند حنين دق علي أبوي عشان نطلع أنا وأمي أخذت بنتي ونزلت.
تركي//حبيت أقهر عساف قلت لأبوي يقول لعمي عن سالفة خطبة وداد وزدت من عندي أنها موافقة بس ينتظرون أبوي يحدد موعد الخطبة
شفت أبوي يطالعني باستغراب بس مشيت الموضوع،وابتسمت لما شفت علامات القهر بانت بوجهه وحواجبه انعقدت ولون وجهه تغير،أنا ما أحب أتشمت بأحد الحمد لله بس مع عساف ماقدرت أضبط أعصابي.
عساف//انقهرت من سمعت عن خطبة وداد،الله بها السرعة لا وبعد توه ولد ماقد تزوج من قبل،والأخت موافقة وأكيد مبسوطة.
استأذنت ماأقدر أجلس أكثر من كذا وطلعت من المجلس وأنا مفول على الآخر وقبل لا أوصل لباب الفيلا اللي مدخله مشترك للنسا والرجال شفت زول لا يمكن أنساه قربت منها لا آرادي ومسكت يدها.
وداد//كنت شايلة بنتي اللي سحبت لثمتي،نزلتها عشان أضبط غطاي وأول مارفعت شفت عساف مسكني بيدي وسحبني له،وبعد مااستوعبت الموقف بسرعة حطيت يديني على صدره عشان أبعده عني :عساف أنا مو محرم لك،بعد عني،ما أحل لك.
عساف//صدمني كلامها ورجعني لواقعي تركتها وأنا محرج وقلت:آسف وداد نسيت نفسي وتركتها وطلعت

[بلازا]

~ا نتهى البارت أتمنى لكم المتعه~

[هبة]

تسلمى بلازا على نقل البارتات ...



عساف ... ربى يهديك هيك أمور مفروض ما نتسرع فيها و نرمى الإتهامات ... هلأ شو إستفدت ؟؟؟ الله يستر و وداد ما توافق على العريس و إن شاء الله ترجع لك و تربوا بنتكم سوا ...





بلازا متابعاكى و شكراً لك

[زهرةالياسمين]

شكراااااااااااااااااااااا اااااااااااااا روعه

[maharim]

بلازا اتابع الرواية منذ البداية منذ مدة لم تكتبي فصل جديد ارجو ان يكون المانع خيرا انا في انتظارك

[سناالروح]

القصة حلووووووووووووووة يسلموا

[بلازا]

البار ت جديد


جواااهر // طلبت من مطلق أروح زياااره لأهلي بما أني ماعندي جامعة ولانزلي وظيفة .. وبعد عشاان أشوف موضوع وداد ومطلق أش صار عليها ؟
عناااد // جوجو طيب أسبوع كثير .. خلك نهاية الأسبوع والسبت آجي آخذك ..
جواهر // دودي أنا من زمان مارحت لأهلي .. ويومين مايمدي أشوفهم وآخذ أخبارهم .. بعدين أمي وأبوي زعلانين علي عشان ما أجيهم كثير .. وبعد تكون نقاهة نبعد عن بعض شوي .. ونغير جو ونفسياتنا بعد تتغير .. وأشوف موضوع مطلق أخوك ..
عناد // يمه منك ومن لسانك ماحد يقدر عليك ، الشكوى لله نتحمل ها الأسبوع بالطول وإلا بالعرض
جواهر // ثانكس عناااادي ماقصرت ..
عناد // ثانكس حاف ماتوكل عيش أنا رجل عملي بزنس أز بزنس ..
جواهر بخجل ممزوج بدلع // عناااااااادي
عناد بابتسامة خبث //لبى عنونك أنا كلي لك ها الليلة ..


*‏***

وداد // من جتنا جوجو وأحنا كل يووم جمعة .. وسهرات .. وسوالف .. ذكرتني لما كنا صبايا بيت أبوي وماندري عن الدنيا .. ياالله كيف سوت فينا الدنيا ..

جواهر نفتها لجدة .. وسن خارج الحدود .. وأنا تطلقت وحنين بغى مصيرها يلحق مصيري ..
انتبهت من سرحاني على صوت بنتي تصرررخ من قلب .. فزيت وشلتها .. وصرخت يمه شوفي بنتي ؟؟وش فيها لا يكون قرصها شي ؟؟
وبديت أشيل ملابسها عنها ..
التفت لأمي وجوجو أبي مساعدتهم شفتهم ميتين ضحك ..
قلت باستغراب: وش فيكم ..

أم تركي // ماغير ها السوسة عاضتها ..
التفت شفت جودي تاكل بأظافرها .. رجعت لبنتي وشفت مكان سنيها الأمامية معلمة ببنتي ..
لحقتها تعالي ياأم كشة والله ماأخليك ..
ضحكت جوجو وخذت بنتها وانحاشت وأنا الحقها ..

دخل أبوي علينا بعد مارجع من الصلاة هو ووليد ..

أبوتركي // هههههه وش تسوون يا المهبل ..
راحت جواهر ورا أبوي وهي تقول بتمثيل : دخيلك يا أبو تركي .. تراي دخيلتك أنا وبنتي ..

[بلازا]

ضحك أبوي وحاوطني بيدينه عشان ماأجي جواهر .. وبنتها
وداد // بعد ماشرحت لأبوي وش صار .. قلت يرضيك يرضيك يا أبو تركي ..
أبوتركي // هههههه لا مايرضيني ماآخذ حق الريم بس خوذيه من جواهر مهوب هاالضعيفة..
وبغفلة من جواهر غمزلي وليد وعض يد بنتها اللي لافتها على ظهر أمها وفرك وهو ميت ضحك .. ههههههه وبنتها فحطت من البكي
جواهر // أوريك ياالدب ..
طلعت أمي على ضحكنا وصراخنا..وبعد ماهدينا التفتت وقالت :تركي أخوكم عازمكم برا ..
أنا وجواهر ووليد بأصوات متفاوتة وصراخ :عاش .. عاش .. أبو سعد عاش ..
وطلعنا بعد مامرنا تركي أنا وجواهر وحنين ونوره ورا بعد ما مريناهم ببيوتهم.. وتركي ووليد قدام ..وأمي وأبوي مارضو يطلعون .. قطينا على أمي كم تعليق أخجلها .. وخلاها تعصب علينا .. عكس أبوي اللي كان مستمتع بخجلها وعصبيتها ..
ومحمد وعبدالعزيز سبقونا .. جلسنا على طاولتنا اللي كان تركي حاجزها مسبقا ..
وأحلى حاجة أن الطلعة خاصة .. بس أخواني وخواتي بدون عيالهم .. وأزواجهم ..
وليد // توتو لو دارين كل ماجتنا أم الجود بتعزمنا بها المطعم التووب .. كان كل ويك آند وأنا فاحط لجدة أجيبها ..
تركي // توتو بعينك ..تستاهل أم الجود ..
حنين بلكاعة // لنا الله .. تفرقة عنصرية .. عيني عينك .
جواهر // مااا تقصر أبو سعد الطلعة حلوة بوجودك .. وغمزت بعينها .. وعضت على لسانها :عاد لاتصدق ..
مسكها تركي من رقبتها..أجل ماأصدق هاااااه ..
جواهر // كح .. كح .. امزح ..أمزح
‏ تركي // أي خلك كذا مؤدبة ..
جواهر // هذي عينك حنو ..
حنين // ههههههه ألا قولي دعوة مظلوم .. حيلهم بينهم ..
نورة // والله ما ناقص جمعتنا إلا أبو تركي .. وأبو تركي .. ووسون .
‏ ****



وسن :من حملت لحد الآن وأنا متوووحمة على زقاير جوادوه ..تعجبني ريحتها .. نادرا مايدخن عندي .. شفته يدخن في البلكونة انتظرته يدخل دورة المياة..لأنه ياخذ شور بعد الدخان إذا دخن بالبيت ..
طلعت للبلكونة شفت زقارته في طفاية السجاير .. بعد ما طفاها أخذتها وقعدت أشم ريحتها باستمتاع ..
جواد // أوف نسيت الشامبوو .. طلعت بجيبه .. مالقيته .. رحت بسأل وسون كان فيه شامبو وألا خلص ..
دورتها مالقيتها .. خمنت أنها بالبلكونة .. قلت بهبل بها..لأن شكلها سرحانة وعاطيتني قفاها ..
بوووووووووووو..
وسن بشهقه وربكة // هئ وجع إن شاء الله بغيت أخرر ورعي من الخووف ..
ورجعت يدي ورا ظهري وبان علي الإرتباك .. ومن غبائي مارميتها ..
جواد // ليش خفتي وش مخبية وراك ؟
وسن // مخرعني وتقول ليش تخافين .. وحاولت أتجاهل باقي سؤاله ..
جواد // طيب وش في يدك ورا ..
وسن بثقة مصطنعة وقلبها يرجف من الخوف .. مافيها شي ..
جواد // متأكد مخبية شي قربت أبغى أحاوطها .. وأشوف وش وراها ..
وسن // من شفته يقرب عرفت أنه بيكشفني .. بسرعة عطيته ظهري وحطيت الزقارة بفمي وسكرته .. لفني له بسرعة نزلت راسي .. وفتحت يديني له ..
جواد // رفعت راسها .. وأنا متأكد أن اللي مخبيته بفمها لأني ماسمعت صوت شي طاح ..
مسكت دقنها بيد وبيدي الثانية دخلت أصبعي بفمها ..فغصتها وطلعت اللي مخبيته ..
جواد بصدمه // تدخنين !! تدخنين يا وسن !! من متى ؟؟
وبعصبية الناس يدخنون زقاير .. مو يبلعونها ياالخبلة ..
وسن // حاولت أبلعها بس ماقدرت .. وبقواة عين وفي بالها قابل الصياح بصياح تسلم ..
بسم الله علي أنا ما أدخن .. كل الحكاية إني توحمت على ريحتها .. وكنت أشمها .. ولمن شفتك خفت تظن أني أدخن .. وهذي كل السالفة .. وعطته ظهرها ومشت بسرعة قبل لايلحقها .. ويلطشها كف ..
جواد //أخذت بكت الزقاير .. ورميته من البلكونة .. وبعصبيه"الله يلعني كان دخنت مرة ثانية"
هذي الأم ..أجل عيالي بكرة وش بيسوون

[بلازا]

//‏ البارت الخامس والعشرين //




وسن : أكيد راح يتفاجأون أهلي بكرشتي بجلس عند أهلي ها الصيفية مابقى على موعد ولادتي إلا شهرين ..
جواد : ها وسون جهزتي شنطتك ؟
وسن : أي بس بجهز للبيبي من هنا ..
جواد : لا تكفين سكري عليه بعد زيادة شهرين عشان أحضر ولادتك ..وإلا ارجعي معي ..
وسن : لايكثر بس..وش عليك لاشلت ولاتعبت ..
جواد : أوف من لسانك .. المهم ذكريني الصباح أجيب نتيجتك ..
وسن : ياأخي خلها عندهم ترا ماضيقت عليهم ..
جواد : هآ .. خل أشوف كان فيه طماطة حمرا نكنسل السفرة .. ونجلس ناكل طماطنا أبرك .. ألبسي وبلا هذرة خل ننزل للسوق ..
‏ * * *


وافي : جيت من بيت أبوي .. وعيالي معي اللي بدو يخطون .. شلت جسار وتركي مسكته بيدي الثانية عشان أساعده يمشي ..
قابلتنا حنين أول مادخلنا وشالت تركي ..
:حنوو لاتشيلينه بيعورك دبدوب ماشاء الله ..
حنين بزعل:ياسلام وها اللي على كتفك مايعور.
وافي .. لاحظ أنك تفرق بينهم في المعامله .. وها الشي يأثر فيني أنا .. مو بس هم ..
وافي : نزلت جسار وقبل لا أرد عليها .. ناديت المربية تاخذ العيال تعشيهم وتنومهم ..
وسحبت حنو بيدها ودخلنا قسمنا..
حنين بقهر وانفعال : وافي بصراحة انت تقهر تفرق بينهم وها الشي يسبب حزازيات بينهم .. وحتى اللحين ترا يحسون وبيأثر على شخصياتهم
وافي : طيب هدي هدي .. وكمل بعد ماقرب وجهه لوجهها وحط عيونه بعيونها .. وبصوت كله رقة وأقرب للهمس : تدرين ليش أفضل جسار لأنه كوبي منك في كل شي شكله .. خفة دمه .. ضحكته .. دلعه ..ما أقدر أمسك نفسي لا شفته يسوي أي حركه تذكرني فيك ..
حنين انصبغ وجها بالأحمر .. ونشف ريقها .. وحست بحرارة في وجهها وجسمها .. وعشان تغطي حرجها..وقفت بسرعة..وقالت : شتبي العشا !!
وافي :سحبها بيدها عشان تجلس غصب عنها ..
وبقهر .. حط يدينه على رقبتها .. بذبحك أنا .. أجيك شرق تجيني غرب ..
حنين بضحك وهي تبعد يدينها عنه :هههههههه
خنقتني ياالدب .. خلصت نفسها منه وقبل لاتحط رجلها وتهرب مالت عليه وطبعت بوسة من قلبها على جبينه وفركت وتركته يتنهد ..
*‏ * *