? العضوٌ???
» 62057 | ? التسِجيلٌ
» Nov 2008 | ? مشَارَ?اتْي » 6,430 | ?
نُقآطِيْ
» | | | | | | اكثر من اربع ساعات قضاها نايف وهو مع صبا... بس كل واحد كان بعالمه ومابينهم غير الصمت والصمت القاتل!!! كل ماحاول يكلمها بكلمة لقى نفسه عاجز يقول أي شي او يبرر أي تصرف... كان صدها عنه معذبه ومقطعه,,,,طول الوقت لافة وجهها للجهة الثانية وعيونها مغمضة ودموعها تسيل وكل ماحاول يتكلم رفعت يدها واشرت له يسكت,,, اصلا وش كان بيقول؟؟؟ هو بنفسه حاس بتاءنيب الضمير...يمكن انه جاءه ها الاحساس متاْخر بس قاعد يعذبه...يعذبه كثير,,,,, ظل معها لين انتهت الزيارة واستاْذن ووقف على راسها يسالها اذا كانت تبي شي ومالقى غير الصمت,,, كان كل شوي يمسح دموعه لايفضحونه قدامها بس هي ماكانت معها اصلا..هي يكفيها بذاك الوقت عذابها والمها,,,, نايف بصوت مبحوح/صبا انا ماشي الزيارة انتهت تبين شي؟ صبا كانت في صمت مطبق,,,, نايف والندم باين عليه/صبا..اسمعيني بس اسمعي اللي بقوله؟ صبا بحدة وبدون ماتفتح عيونها/سمعت الزيارة انتهت!!!ياليت ماتكلف على نفسك وتجي مرة ثانية وتضيع وقتك؟؟؟عطي زيد خبر يجي ياخذني من هنا لو سمحت؟ تنهد بقوة وظل يناظرها باخر ثواني وبعدها طلع,,,, لوين..مايدري....لااي مكان يتنفس فيه ويطلع ضيقه اللي ذابحه؟ جاسر /يالله نزلنا؟ ليالي/ماابي انزل؟ جاسر/ليه؟ ليالي/...مافي سبب محدد... جاسر/توك تقولين جوعانة وتعبانة وتبين تصلين,,,يوم لقينا مكان ننزل فيه غيرتي رايك؟ ليالي/انا ماقلت لك تعال جيبني فندق!!!توقعتك توديني البيت؟ جاسر/ماانتي يوم طلعتي من البيت رحتي مع متعب للفندق اللي هو فيه ماقلتي شي؟ ليالي/متعب شي وانت شي ثاني؟ جاسر بقهر/شنو يعني هو شي وانا شي ثاني!!! ليالي/يعني خلك واقعي متعب خالي واكثر بعد وطول عمرنا عايشين ومتربين سوا وماافترقنا الا قبل مدة بسيطة والحمد الله رجعنا,,,يعني حياتنا مفتوحة كل واحد للثاني,,,بس انت ياجاسر؟ جاسر /انا شنو؟ ليالي/انت غريب عني؟؟؟ جاسر بضيق/انا ولد عمك وزوجك كيف غريب عنك بالله!!! ليالي/وضعنا فارض علينا نكون اغراب؟ جاسر/انتي اللي فارضة ها الشي مو الواقع؟ ليالي/لا ياجاسر بالبداية انت اخترته...وماصار لك كم يوم من غيرت رايك فيه,,,يعني مو معقولة انا بحياتي لاشفتك ولااعرف عنك أي شي تبيني ابسط العلاقة بيني وبينك مثل ماهي مبسوطة مع متعب؟ جاسر/ولمتى بتظلين حاطة حواجز بينا ان شاءالله؟؟؟ ليالي/مدري... جاسر بهدوء/ليال...هاذي فرصتنا نتقرب من بعض وكل واحد يحكي عن نفسه للثاني ويفهم الثاني شنو وشنو طلباته؟ ليالي/بس في سؤال مهم ياجاسر؟ جاسر/اللي هو؟ ليالي/ليه؟ جاسر ناظرها بتعجب/شنو اللي ليه؟ ليالي/ليه غيرت رايك وشلت سالفة ان زواجنا يكون على الورق بس وتبي تبدي حياة جديدة معي!!!!ليه وش اللي صار وتغير ابي افهم؟ومن حقي اعرف؟ جاسر تنهد بقوة وهو يناظرها وظلت تناظره بثبات.. جاسر بتلعثم/قلت لك...يعني انا يوم شفتك ماحسبتك انتي.....يعني صورتك في بالي شي ثاني.... ليالي/بس انا مااحسه سبب مقنع...وعلشان ارضخ لك ونفتح صفحة جديدة لازم تقنعني؟ جاسر بحدة /معناته قومي ندخل علشان اقنعك؟؟؟ لف للجهة اللي ورى واخذ منها كيس كان موجود ونزل من السيارة وفتح بابها ومد يده لها وسحبها علشان تنزل بدون أي تفاهم,,,, عبير/تصدق يبى لها وحشة اصايل...يمكن انا مااشوفها كل يوم بس تعودت اسمع صوتها وضحكتها,,,, ابو عبدالرحمان/هناك احسن لها من هني؟ عبير/في شنو ياحسرة؟ ابو عبدالرحمان/البنت ماتنترك غير عند اهلها ياعبير..... عبير/أي بس اذا كانوا اهلها فيهم خير؟؟؟وانت تعرف اخوي زين؟ ابو عبدالرحمان/تظل بنته ويظل مسؤل عنها..... عبير/يمكن لو قعدت شوي بس كان جاها نصيبها وتيسرت مع زوجها.... ابو عبدالرحمان/وفكرك ابوها بيوافق على معرس هو مايعرف منو؟ عبير/وليه مايوافق ان شاءالله!!!كلنا نعرف ها المعرس منو ومن ولده؟ ابو عبدالرحمان/بس اخوك عقليته متحجرة وماتقدرين تقنعينه بشي هو مو مخطط له؟ عبير تنهدت/انا نهاية الاسبوع بروح لهم؟ ابو عبدالرحمان/ولاتروحين ولاتذلين نفسك؟؟يعني ماتعرفين اخوك لايحب يستقبل احد عنده ولايقوم بضيافته؟ عبير/انا مو رايحة عنده ولاابيه يضيفني!!انا رايحة اشوفها هي....وافهم شسالفة الروحة المفاجئة اللي صارت وماقال لااحد عنها؟ ابو عبدالرحمان/كلميه على التلفون بدل ماتروحين وتبهدلين حالك؟ عبير/يعني ماتعرف ولدك...مايبي يرد ولاانا ذبحت حالي مع اختي من اول يوم ومارد علينا ولو ماهي عندها جوالها ماكنا تطمنا عليها.... ابو عبدالرحمان/........... عبير/سمعت يبى...جاسر يبي يسوي عرس؟ ابو عبدالرحمان/لمنو؟ عبير/له...هو وليالي؟ ابو عبدالرحمان/غريبة وش الطاري يعني؟ عبير/والله مدري...ها الجاسر قلب مرة وحدة والله يستر من قلبته؟ ابو عبدالرحمان/يمكن الله هداه... عبير/الله يسمع منك...البنت ماتستاهل غير الخير والله..ويكفي ان امه وخواته ناصبين لها الكراهية والعداوة وماهم طايقينها,,, ابو عبدالرحمان/يعني ماهم حاضرين عرسه؟ عبير/والله مدري..هو حدده بعد اسبوعين وحجز كل شي بس الظاهر ان ليالي مااتدري عن شي مااشوفها تكلمت... ابو عبدالرحمان/وانتوا شعرفكم؟ عبير/ولدك اتصل يشره ويعتب يقول ان ام جاسر ماهي بحاضرة لانها زعلانة من ولدها؟ ابو عبدالرحمان/تزعل من ولدها وترمي الزعل عليكم؟؟؟ماتروح تتفاهم مع ولدها؟ ابو عبدالله/انتي شمقعدك لها الحزة بالله؟؟؟قومي انقلعي نامي؟ اصايل بفتور/ماني نعسانة ومافيني النوم؟ ابو عبدالله بعصبية/مصيعة هناك تنسينها هنا يابنت ال.. ام عبدالله/هدي شوي يارجال ماهي مستاهلة منك....خلها وقت ماتنعس هي بتقوم بروحها تنام ماهي صغيرة؟ ابو عبدالله/وانا مااعرف انام ووحدة من البنات صاحية مارقدت!! اصايل/اوووف ياربي,,,يعني بشرد من البيت لاسمح الله!!!منت قافل الباب الف قفلة وفوقهم حاط قفل والمفتاح عندك؟بالله كيف بطلع بنط السور وبكسر عظامي!!! ابو عبدالله/شوف قليلة الحيا ترفع صوتها عليّ شلون؟تعالي هنا خلني ااءدبك؟ اصايل/انا ماقلت شي..... ام عبدالله/استسمحي من ابوك يالله... اصايل/انتي اخر وحدة تتكلمين يالفتانة؟ ام عبدالله بمسكنة/شفت...كل تعبي ضايع مع بنياتك اخرتها اطلع فتانة؟؟؟؟حسبي الله ونعم الوكيل؟لوجه الله ماابي منك ولامن اختك شي؟ اصايل/على اصايل ياام عبدالله!!! ابو عبدالله بصراخ/بنت!!!حاكي خالتك عدل وعدلي لسانك مو رحتي يومين صعتي على كيفك ورجعتي بعد مانسيتي الاداب شلون صايرة؟ اصايل قامت وهي تكلم نفسها/انا فاهمة كيف الاداب صايرة وخل اللي مو فاهم يفهم؟ ام عبدالله/من تقصدين يابنت الناس؟ اصايل/بشنو؟ ام عبدالله/بللي مو فاهم؟ اصايل/ماقصدت احد..وبعدين يكفي اني ماذكرت أي اسم علشان تسووا لي فيها؟ قالتها ودخلت غرفتها وسكرت الباب وراها.. ام عبدالله بعصبية/عاجبك لسانها الطويل عليّ!!ماتحترمني ماكاني حسبة امها؟ ابو عبدالله/انا محد بيوديني بداهية غيرها؟ ام عبدالله/هذا اللي اخذته منك ومن حنتك؟كان ادبتها قبل شوي ... ابو عبدالله/انا مو متعب حالي معها بعد اليوم.. ام عبدالله/شلون يعني بتتركها على كيفها ترمي علينا بكلامها اللي يعل القلب؟ ابو عبدالله/لا...من بكرة بروح ادور لها على معرس يكفيني شرها وشر لسانها ويفكني منها؟ من ورى الباب فتحت اصايل عيونها بقوة,,,,, عريس!!!!لي انا!!!!لا..مو هذا اللي ابيه ولاحلمت فيه ولابنيت حياتي انتظره؟؟؟؟ لو يسويها اذبح حالي ولااخذه؟؟؟هذا من صدقه يشوف لي عريس من واحد من معارفه اللي من نفس طقته؟ غمضت عيونها وهي تستعرض أي اسم تدق له وتخبره بها الخبر...ليالي ولامتعب ولاعمتها ام احمد ولاعمتها عبير ولاتهاني؟ منو فيهم ممكن يفهمها وهي بها الوضع؟ اخر الليل بالفندق,,,, جاسر/وش قاعدة تسوين؟ كانت ماسكة لها بيبسي وواقفة قبال النافذة تشربه,,, ليالي بدون اهتمام/ولاشي..اناظر بالشارع,,, جاسر تمدد على الفراش/ليش فيه شي مميز ها الشارع؟ ليالي/لا...بس جوه غير عن ها الجو؟ جاسر/ليالي...انتي عاجبتك حياة التشتت اللي احنا عايشينها وماكانه زوجين؟ ليالي تنهدت/لاتعيد وتزيد بنفس الموضوع ياجاسر...تكلمنا وانتهينا.. جاسر بهدوء/طيب قربي خلنا نتكلم اكثر ونفهم بعض اكثر... ليالي وهي تناظر/وش تبي تفهم؟ جاسر/كل شي.... ليالي/وليش ماتبدي انت وتتكلم عن حياتك؟ جاسر تنهد/وليش واقفة بعيدة...قربي هنا وتعالي نسولف.... ليالي/. جاسر/صحيح..انا اسف....انا دخلت الملحق وجبت لك من غرفتك بيجاما.... اشر للكيس اللي كان شايله معه من السيارة؟ ليالي بهدوء/ومن سمح لك تدخل غرفتي بدون اذني؟ جاسر/فكرتها غرفتنا اثنينا وانصدمت انها لك بروحك؟ ليالي/انت عارف انها لي بروحي فلاتقعد تلف وتدور... غمضت عيونها وعقلها الباطن يقولها معناته اليوم فتح الدولاب وقولب بكل شي وشاف كل الثياب الموجودة,,,, فتحت عينها على همس قريب منها ويوم فتحتها كان جاسر متقرب منها لدرجة كبيرة,,, ليالي بارتباك/في شي؟ جاسر بخبث/ضايقك اني ادخل غرفتك وافتح دولابك؟ ليالي/لا... جاسر/يعني كلها اسبوع ولااسبوعين وبتكون لنا غرفتنا المشتركة وانا بشوف اغراضك وانتي بتشوفي اغراضي وين المشكلة؟ ليالي/انا ماقلت لك ان في مشكلة من الاساس؟ جاسر بهمس/قومي بدلي....تاْخر الوقت؟ لياليبرواق/تاْخر على شنو؟ جاسر بضيق/واللي كانت تعبانة بالسيارة وين راحت ولاتعبها راح؟ ليالي/بالضبط....مافيني شي وحابة اسهر...وبعدين انا بيني وبينك مااحب انام بفنادق ماارتاح ابدا ومايجيني نوم؟ جاسر بتاْفف وهمس/انتي تبين تجننيني؟ ليالي ببراْة/ليه؟ جاسر بنرفزة/شيلي ها البيبسي من يدك وتعالي انا انتظرك؟ ليالي/لا... جاسر/شنو اللي لا انا زوجك؟ ليالي/ادري انك زوجي بس اذا انت مفكر اني بتجاوب معك وبعطيك شي فاانت غلطان؟؟؟ جاسر/نعم!!!!تهدديني بعد!! ليالي تنهدت/جاسر افهمني...مو قبل مانكون صريحين مع بعض بكل شي ووضعنا يستقر ويتسكر علينا باب واحد؟ جاسر/الباب ومتسكر ومن ناحيتي صريح وماعندي أي شي اضيفه ووضعي مستقر ..الظاهر ها الاشياء انتي تواجهينها بنفسك؟ ليالي بهمس/ليش مستعجل؟ جاسر بضيق/لانك زوجتي!! ليالي بهدوء/وبظل زوجتك الليلة وبكرة ماراح اكون؟ جاسر/ليالي.. ليالي/اذا انا زوجتك بظل زوجتك على طول الا اذا في بالك نية ثانية قولها من اللحين وخلنا على بر؟ جاسر/انتي ليه مو مصدقتني؟ ليالي بثبات وهي تناظر بعيونه/في شي بعيونك يقولي وياكد ان في شي منت راضي تعترف فيه...وانا حابة كثير اعرفه قبل لاابتدي حياتي معك ياجاسر؟ /////////////////////////////////////////////////////////////////////////////////////اصايل بذهول/يتزوجني؟؟؟ تهاني/أي هي قالت كذا!!! اصايل/ضاري قال لها انه بيتزوجني؟ تهاني/علامك؟؟؟أي قال كذا مو بس لها لاامه بعد!! اصايل/يعني حتى امه عرفت اني بنت عمه؟ تهاني/أي....تقول رانيا مثل ماانصدمنا امي انصدمت... اصايل/طيب وماقالت لك اذا كانت امه معارضة ها الزواج ولالا؟ تهاني/ماقالت كل اللي قالته ان ضاري قال بياخذك حتى غصبا عنك انتي!! اصايل/حلو حلو...يعني اذاخلصت من العريس اللي بيجيبه ابوي ماراح اخلص من ضويري؟ تهاني/ماشكلك فرحانة؟ اصايل/هاذي اكبر مصيبة ياتهاني...اني اتزوج ضاري؟ تهاني/بالعكس خلي المواجهة تكون بينكم اكبر؟ اصايل/افهميني بيكون زوجي وبيكون له الحق عليّ بكل شي وانا بكون تحته ضعيفة.... بدون ها الزواج معادلتنا وحدة.... تهاني/تتزوجين ضاري وتكونين بينا ولاتتزوجين اللي بيجيبه ابوك؟ اصايل/بس انا اكره ضاري كيف اتزوجه بالله!!! تهاني/شبتسوين يعني؟ اصايل/مدري....متعب قال انه بيمر يكلم ابوي ..وانا واثقة مليون في المية ابوي ماراح يرضى...بس بهرب مع متعب؟ تهاني/جنيتي ؟؟؟ اصايل/هذا خياري الوحيد...يا اني اهرب معه ولااتزوج واحد مدري وش بيكون ولااتزوج ضاري؟ تهاني/تزوجي ضاري؟ اصايل/لاحووول...شلون اتزوجه وهو اهاني وذلني ؟ تهاني/انتي بعد ذليتيه واهنتيه؟ اصايل/ماابيه...انا مااطيقه؟ تهاني/والحل؟ اصايل/مدري.....ليالي مارجعت؟ تهاني/انتي وش عرفك انها طالعة؟ اصايل/قالت لي انها مع جاسر كانوا يتعشون بالفندق؟ تهاني/ماشكلها بترجع.....المهم خلنا منها.. اصايل/ان شاءالله يكون مجرد كلام ومايسويها؟ تهاني/غبية مثلك ماصادفت!!كيف تدعين بها الدعوة؟ اصايل/وش فيها. تهاني/مافيها شي بس افرضي انه ماجاء تتوقعين ابوك بيزوجك امير يعني!!يمكن يزوجك واحد اصغر عياله اكبر منك وبينه وبين القبر شعرة وماخذ ثلاث غيرك غير اللي مطلقهم؟؟مايسويها ابوك؟ اصايل/.......................اذا اخذت ضاري بطلع عينه كل يوم هوشة؟ تهاني/يبى ان شاءالله تطلعين روحه مو بس عينه بس اخذيه؟ /اليوم الثاني الصباح ,,, جاسر/علامك...شكلك مو نايم؟ نايف/وين اشوف النوم بس ياجاسر؟ ضاري بلامبالاة/ليه شفيك؟ نايف بتنهيدة/بالامس كان المفروض انتظر تسعة شهور ويجيني اللي يحمل اسمي...واليوم مافي غير العذاب اللي انا عايشه؟ ضاري/انت مو قاصد تنزله فلاتحمل نفسك مسؤلية كبيرة..بعدين باول الايام يكون بعده ماتكون ونزلته مايبي لها شي؟ جاسر/وانت بتساعده وبتشجعه بعد!! ضاري/هذا الواقع... جاسر/لامو هذا الواقع!!لو ماتعودت يدك تضربها وتنمد عليها ماكنت خسرتها هي واللي في بطنها؟ نايف بخوف/يعني..انا خسرت صبا؟ ضاري/كيف يخسرها وهي زوجته؟ جاسر/فكرك بترد لك مثل الاول؟كلام الحب واعترافها لك بيرجع!!انسى يانايف... نايف تنهد تنهيدة عذاب وقال/طول الامس وانا ابي منها كلمة وحدة وماعبرتني...كل اللي قالته انها تبي ترجع بيتهم وبس؟؟ ضاري/انت لاتسمع لها ولاترجعها بيتهم ومصيرها بتنسى اذا رجعت معك... جاسر/انت بس وش اللي حادك على الضرب ابي افهم؟ ضاري/ليش ماتسوي مثله يانايف تسحبها معك الفندق وتجيب راسها؟مو عدل ياجاسر؟ جاسر/بالاول وبالاخير هي مرتي... ضاري/بس ماقدرت عليها يارجال ؟؟ جاسر/انا ماابي منها شي غصبا عنها؟ نايف/أي بس هي مرتك وغصبا عنها تسلم نفسها؟ جاسر/ومن قال لك اني برضى اخذها غصبا عنها؟؟؟خلها تطول وتعرض بس بالنهاية تجيني برضاها ماابيها تكرهني من اول ليلة بينا!! ضاري/والله شاطرة بنت العم اللي غيرت كل المفاهيم؟ جاسر/والله ثنتينهم بنات العم شطار؟؟؟واللي اشتاقوا لها ودقوا عليها بالامس علشان يسمعون صوتها ماهي شطارة فيها؟ ضاري/انا ماكنت مشتاق لها؟ نايف/وليش دقيت لها اجل؟ ضاري/بس...اتشمت فيها؟ جاسر/طيب وليه تبي تتزوجها؟ ضاري/علشان اكسر راسها؟ نايف/انا قلت كذا عن صبا...بس ماكانت هاذي نيتي؟ جاسر/يالله اعترفوا اثنينكم ليش قالبينها عليّ انا بس!!!قول انك غرقان بااصايل لين القاع ومتن متحمل فراقها؟؟؟وانت قول منت قادر تتخيل حياتك بعيد عن صبا وكيف بتكون؟ نايف/انا ابي حل؟اليوم بيرخصونها وانا مو عارف شسوي؟ ضاري/ردها معك؟ جاسر/اتركها على راحتها تفكر واطلب رضاها مرة ثانية وشوف؟ نايف/واذا رفضت تجي معي من جديد؟ جاسر/تظل زوجها وانت بيدك كل شي وقضية اخوها تفتحها من جديد؟ ضاري/بس اذا بعدت ممكن... جاسر/انت صاحب كل شي يانايف وبالاول وبالاخير ماراح تطلقها لو شيصير ليش تعند معها وهي بظرف مرض...خلها ترتاح وتبتعد عنك وتغير جو...زورها كل يوم وترجاها كل يوم بس خليها تصفي شوي من الشحنات اللي انت مليتهم عليها قبل؟ نور/ماتشوفين شر ياعمري؟ صبا كانت تبكي..... نور/خلاص ياصبا خلاص...لاتبكين؟ صبا وهي تمسح دموعها/ليش قلت له اني احبه يانور ليش؟؟؟هذا وحش ماهو بانسان؟تعبت جسمي كله انهلك من ضربه؟ نور/لاتقعدين معه منتي مجبورة؟ صبا/واذا مارضى يردني لااهلي ولامارضوا هم يستقبلوني؟ نور/اهلك ماراح يرفضونك بس اهم شي هو يقتنع ويوافق انه يردك لهم؟ صبا/انا تعبانة يانور تعبانة... نور/زين انك دقيتي عليه....بالاول يوم تكلمي تخرعت من صوتك مافهمت ولاشي بس شوي شوي استوعبت كلامك... صبا بتنهيدة/خسرت كل شي معاه...دراستي...شبابي...ولدي... مابقى لي شي؟ نور/ليش تقولين ها الحكي ياصبا...انتي ماخسرتي شي؟ صبا/........ نور/كل شي قدامك..المستقبل بكبره قدامك...بترجعين تداومين السنة هاذي وبتعيدين كل شي وحياتك بتمشي طبيعي لين يجي ولد الحلال اللي.. قاطعتها صبا/انتي وش قاعدة تقولين؟أي ولد حلال وانا على ذمة نايف؟ نور/ليش ماهو مطلقك؟ صبا/والله مدري..... نور/اذا مارضى يطلقك هدديه انك بتفضحينه عند اهله واذا قال لك مابتوصلين لهم قولي له انك خبرتيني واني انا اللي بقول لهم وهو مابيوصل لي وعلى مايوصل اكون بلغت اهله؟ صبا/نايف مايجي ابدا كذا انا اعرفه؟ نور/وشلون يجي بالله!!!بااحبك؟؟؟؟مااشوفها سوت شي غير انها نزلت اللي في بطنك؟ صبا تنهدت/احسن له مايعيش...حرام ينحبس معي بحياتي اللي انجبرت عليها,,,, نور/انتي هدي اللحين وسمي باسم الله مسوية لك سلطة مكرونة اللي تحبينها... صبا/أي والله ميتة جوع خبرك انا مااكل اكل مستشفيات؟ نور/هههه انتي كل شي ماتاكلينه مو بس المستشفيات؟ صبا وهي تمسح دموعها/احس عمري صار اربعين ومابعد دخلت العشرين؟؟؟ نور/خلاص صبا..اذا بنقعد نحاتي همومنا ونركض وراها تراها ماتخلص... صبا/منو جابك؟ نور/اخوي محمد... صبا/شلونه مالقى له وظيفة للحين؟ نور/الله يسمع منك.....لالقى له وظيفة ولاهو قادر يشوف عياله اللي اخذتهم مرته ومايدرون وينها فيه,,,, صبا/صدق محد خالي بها العالم بس مصيبة عن مصيبة تفرق....الله يمون بعونه.... نور/صبا...قومي بالسلامة ترى اشتقت لك ولسوالفنا.. نايف دخل بها اللحظة وكانت صبا توها بتحط الملعقة بفمها وبس شافته شالتها بسرعة وتنهدت بقوة,, نايف/عفوا؟ نور وهي قايمة/انا بمرك بكرة.....اذا بغيتي شي اتصلي فيني؟ صبا/بلغي امي اني هنا طيب... نور/يالله...ماتشوفين شر؟ بعد ماطلعت.. نايف/منو هاذي؟ صبا/............. نايف/سالتك منو هاذي؟ صبا/.... نايف/طيب شلونك اليوم؟ صبا/.............. تقرب منها وجلس على حافة سريرها ومسك الملعقة بياْكلها بنفسه وصدت عنه للجهة الثانية... نايف بحسرة/صبا... صبا وهي مغمضة عيونها/لاتنطق اسمي لاني اكرهه كل ماسمعته منك؟ ترك الملعقة وتنهد وطلع جواله... نايف/امك تي تكلمك... لفت له بسرعة... وعطاها الجوال.. نايف/دقي على زيد انا قايل لهم بس اوصل لك بخليك تكلمينهم؟ مسكت جواله اللي بيده واول مالامست مسك يدها وسحبتها هي بسرعة منه باشمئزاز.. تنهد وتركها... دقت على رقم زيد وجاوبتها امها اللي من سمعت صوتها قامت تبكي وماتكلمت ولاكلمة,,,, اخذ منها الجوال وهو يمسح على شعرها وهي مسكرة وجهها بيدينها وتبكي.. نايف/لا بس تعبانة شوي......لا...ماله داعي اليوم بيرخصونها وانا بشوف الاجراءات وبس تخلص بعطيكم خبر....... سكر وضمها لصدره وهي تبعده.. نايف بهمس/خلاص ياصبا خلاص... صبا ببكي/بعد عني...انت اكثر انسان اكرهه بها العالم!!ياليتك موتني معه وفكيتني من شوفتك مرة ثانية؟؟؟ باقي ربع ساعة ويجي جاسر... لازم تبدين معه سياسة جديدة ياليالي,,, سياسية تقربينه وتبعدينه على كيفك وبمزاجك..لين يعترف ويقولها... وش عندك من ثياب حلوة يابنت عمتي..... شالت لها تنورة قصيرة سودة مع قميص كريمي ستاني بياقة وبدون اكمام...واخذت لها بوت ولبسته.... اليوم يومي بما ان عمتي طالعة ومافي غير تهاني وبسمة هنا... خله يجي ويرتاح وبعدها نطلع على شنو مستعجلين,,, تهاني دخلت/ها..اشوف ناس سراقة تبوق اغراضي!! ليالي/شنسوي مالنا غيرك؟ تهاني/تعالي انتي اللحين منتي متزوجة الرجال وبتنتقلين معه؟ ليالي/أي... تهاني/ماناوية تجهزين لك ثياب جديدة وحلوة وحركات؟ ليالي بحزن/بدون اصايل؟ تهاني/هذيك بنجيبها لو من شعرها... ابتسمت لها..... تهاني/يالله عاد ودي اتسوق من زمان عن الطلعة؟ ليالي/اصايل ماراحت غير من يومين يعني صار لك يومين بس ماطلعتي؟ تهاني/الله يذكرها بالخير ها البنت اللي تجنن دوم نطلع ونستانس مو مثل بعض الناس صاكين يدهم بيد ها الزوج ولايدرون عن احد؟ ليالي/حرام عليك؟؟؟بس ولايهمك بكرة نطلع من الضهر بعد المعهد ومانرجع؟ تهاني/وجويسر؟ ليالي/خله يولي... تهاني/هههه أي كذا تعجبيني خلك ثقيلة؟ ليالي رفعت جوالها اللي يدق.... ليالي/هلا جاسر......اي ادخل شوي..بس لان عندي شغلة مع تهاني وماابي اتركك بالسيارة؟ تهاني/ليش تكذبينه عليه؟ ليالي ابتسمت ووقفت/مالك شغل؟ تهاني وهي تناظرها/على شان يشوفك كذا صح؟بالسيارة عليك عبايتك بس هنا...اممم.. ليالي/انتي كل شي تعرفينه؟ تهاني/تحسينها مشكلة صح؟ ليالي/الا مشكلة ونص؟ دخلت له المجلس بعد خمس دقايق من وصوله وانتظاره ولقته يناظر صوب الباب اللي هي بتكون جاية منه... توقفت عينه عليها وعلى لبسها,,,,تقربت منه ومدت يدها تسلم عليه وهذي اول مرة تسلم عليه مصافحة .. مد يده لاشعوريا وهو يناظرها ومايدري اذا كان رد السلام ولاقال شي ثاني.... ليالي/معليش انا اسفة اخرتك جاسر/مالبستي للحين...قالها وهو بعده يناظرها... ليالي/وباْخرك شويتين اذا ماعندك مانع؟ جاسر/في شي؟ ليالي/سلامتك بس سالفة بيني وبين تهاني ولازم نخلصها اللحين... جاسر/اممم...ضرورية يعني؟ ليالي/عطيني بس عشر دقايق...ولو حبيت ناْجل موعدنا لغير يوم؟ جاسر تسند/لالا ماعندي مشكلة بظل انتظرك هنا....عمتي ماهي هنا؟ ليالي/لا ..طلعت.... تنهد بقوة يوم وقفت وقال اسمها بهمس واستغرب كيف لفت عليه لانه ماكان سامع نفسه وهو يناديها/ليالي.. ليالي/خير... جاسر باهتمام وبغيرة/انتي تتجولين بالبيت بها اللبس؟؟؟ ليالي ناظرت نفسها ورفعت راسها وقالت له /مافهمت عليك وش تقصد بالضبط؟ جاسر بتنهيدة/يعني زوج عمتي واحمد.... ليالي/لاتطمن انا طول وقتي بالعباية بس لاني عارفة ان زوج عمتي بالبحرين اليوم وماهو راد الا اخر الليل عنده عرس معزوم عليه وماخذ احمد معاه....تطمنت ولافي شي ثاني؟؟؟ جاسر/............. ليالي/اقدر اروح اخلص شغلي ولابعده التحقيق جاري؟ جاسر/ليش عادته تحقيق عاد!!زوجك ولي الحق اسالك على مااظن؟ ليالي/بس مو باللهجة ذي اللي تحسس الطرف الثاني انه مجرم؟ جاسر ببراْة/انا حسستك كذا!!! ليالي/ليش متصور انك حسستني بشي ثاني؟ جاسر/لاعاد...يمكن اكون غلطان بتصوير مشاعري بس مو معناته ان هذا قصدي... ليالي لفت عنه واكبر ابتسامة على وجهها وقالت بلااهتمام وهي تمشي صوب الباب/صار خير...بخلص وبجيب عبايتي؟ //////////////////////////////////////////////////////////////////// طول الطريق من المستشفى للشقة وهي ساكتة وسرحانة بعالم ثاني... اول سؤال سالته نفسها ليش بيوصلني بنفسه ماخلى السايق؟وليش مجلسني جنبه معقولة ماهو خايف يشوفه احد ولايبي يكسب رضاي مثل مايقولون؟؟ اتركي عنك نايف ياصبا وكل شي يتعلق فيه.....وفكري هل بيحقق لك طلبك وبيوصلك عند اهلك ولالا...لانك ماراح تكلمينه ولابنص كلمة بعد اليوم؟حط يده على يدها وظل ماسكها طول الطريق.. نايف/خاطرك بشي اخذ لك اياه؟ صبا/............... نايف/ودك تاكلين شي معين؟ صبا/............. نايف/تبين شي ...قولي انا مو فاهم شي من سكوتك؟تعبانة تبين تردين المستشفى ولاتروحين مستشفى ثاني؟ صبا/............. تنهد بقوة وهو يناظرها...كان وضعه معها اشبه لو كان قاعد يكلم تمثال من صخر ماينطق!!!! كانت مارة عليه ها الحال من قبل مع صبا وجرب حقرانها وصدها.... بس مو بها الطريقة ...صحيح كانت زعلانة منه بالمرة اللي فاتت بس ها المرة غير...ها المرة جت بعد اعترافها بحبه والاكيد انها خبرت حبه وشوقه اللي فاضحه لها ومو بعيد ان اعترف لها بلحظة من لحظاتهم الخاصة وماانتبه على نفسه!! ها المرة جاية بعد تعب صبا ومعاناتها....ماهو قادر يشوفها كذا وهو يحس انه المذنبوكان بيموتها هي بعد بهمجيته وضربه.... تنهد بقوة يوم وصلوا للعمارة اللي هم ساكنين فيها... رفعت راسها وناظرت المكان بحزن..... وقالت بنفسها يعني ماتغير شي ولابيتغير ياصبا بترجعين لنفس الوضع ولنفس الذل والمهانة.... تنهدت بقوة ونزلت يوم فتح لها الباب ومشت بدون ماتناظره... ركبت وهي حافظة المكان بقلبها وتمشي وعيونها مغمضة,,, متى ربي بيخلصني من ها السجن اللي تتمناها الف وحدة متى؟؟؟؟ فتح لها الباب ودخلت ولقت ثنتين هناك تقربوا منها...وحدة كانت تشيل عبايتها....ومبين عليها الشغالة اللي جايبها نايف...والثانية كانت ممرضة ...اللي اخذتها من يدها وودتها على فراشها علشان ترتاح.. كانت عيونها قبال عيون نايف ذيك اللحظة وهي تقوله بلغة العيون موهذا اللي ابيه يانايف صدقني!!!! نايف/ليلي ديري بالك على مدام صبا؟ ليالي/من عيوني استاز ...بدي جيب لك شوربة تشربيها... قامت وتركتهم بروحهم وتقرب منها وقعد على طرف فراشها... كانت الدموع بدت تنزل منها وقالت بهدوء وهي تمسح دموعها/تقدر تبعد لان قربك صار يخنقني!!!!! غمض عيونه بالقوة...اول مرة يحس بالجرح بكرامته,,,,,يمكن يسمعها باي موقف ومن أي انسان ومايهتم بس من صبا وبها الوضع كان لها تاْثير ثاني...حتى دموعه تجمعت بعيونه بس ماكان فيه مفر هو اللي ابتدى المعركة وخسارته باينة وواضحة.؟ نايف/صبا... صبا/...... نايف/صبا انا كلمت زيد وهو جايب امك واختك بيقعدون معك كم يوم لين تطيبين..... قالها وتمنى يشوف منها أي انفعال بس ظلت مثل ماهي تمثال مايتكلم..تنهد بقوة وهو يرفع يدها الباردة لعنده ويقول برجى/قولي أي شي ياصبا بس لاتظلين ساكتة؟ //////////////////////////////////////////////////////////////////////////متعب/يعني شلون ياام عبدالله؟ ام عبدالله/ابوها مايتفاهم من رجعت وانا مدري ليش رجعها يعني انها ترد من جديد هاذي سامحني فيها؟ متعب/انا اقولك بتقعد معي شاري لها بيت بنقعد فيه بروحنا؟ ام عبدالله/وبكم شريت البيت؟ متعب/يعني اللحين أي الاهم بكم شريت البيت ولاانها تقعد معك هنا وتضيق عليك؟ ام عبدالله/مدام انك صريح معي يامتعب خلني اكون صريحة معك ياولدي هي مضيقة عليّ نعم مضيقة عليّ!! وودي بطلعتها من البيت اليوم قبل بكرة بس شسوي في ابوها اخليه يذبحها ويفكنا منها؟ متعب تنهد/حاولي..اقنعيه بقد مافيك انتي املي الوحيد؟ ام عبدالله/متعب بسالك وجاوبني.. متعب/خير.. ام عبدالله/باعت ذهبها هي واختها اللي من عند امهم؟ متعب/أي؟ ام عبدالله/انا قايلة ماهو بالبيت قلبت عليه الدنيا؟وين كان؟ متعب/عند عمتهم عبير... ام عبدالله/اووووف....وكم عندها اللحين ووين راحت فلوسها؟ متعب/فلوسها موجودة ماراحت مكان؟ ام عبدالله/يعني اذا ماتت اللحين بيورثها ابوها صح؟ متعب/لا...الظاهر انها موصية مايجوون لاابوها؟ ام عبدالله/شفت هاذي مافي مثلها بنكران الجميل......حتى ماتبي ترد الحقوق.. متعب/يابنت الناس البنت عايشة الله يطول بعمرها وانتي تتكلمين بورث وماورث؟شها الحكي عاد!!! ام عبدالله/اقول متعب يمه وش ها الاغراض اللي جايبهم معك؟ متعب/ابد والله شوية اغراض لك وللبنات...مو من مقامكم..بس ماعليه... اخذت الاغراض وماعلق.. متعب/اقول ام عبدالله اقدر اشوف اصايل ولالا؟ ام عبدالله/اللحين بناديها بس لاتطول ابوها قربت جيته قوم اطلع قبل لايجي؟ متعب/وانتي لاتنسين تقنعينه ترى الحلوان كله لك؟ /////////////////////////////////////////////////////////////////////////// في السيارة,,, ليالي/بكرة بتوصل غرفة النوم صح؟ جاسر/أي... ليالي/بكرة ماراح نطلع ياجاسر.. جاسر باعتراض/ليه؟؟ ليالي/بطلع السوق مع تهاني..... جاسر/ومايصير اجي معكم؟ ليالي/............. جاسر/وش بتاخذون من السوق؟ ليالي/بس شوية ثياب وشوية اغراض يعني وش بناخذ؟ جاسر/الثياب لك ولالها؟ ليالي/لي ولها... جاسر/مدام لك يعني جيتي ضرورية؟ ليالي/ليه....قالتها بتعمد.... جاسر بهمس/علشان اشوف وش بتلبسين لي اذا صرنا في بيت بروحنا مثل اليوم مثلا؟ ليالي/...................... حط يده فوق يدها وسكتوا اثنينهم.... جاسر/ليالي... ليالي/نعم.... جاسر/وين سرحتي؟ ليالي/موجودة؟ جاسر/طيب وكم بتاخذين بالسوق؟ ليالي/بعد مااخلص بروح البيت وبرتب اغراضي فيه واغراض متعب... جاسر/وانا اغراضي من بيرتبهم؟ ليالي/انت وديتهم البيت؟ جاسر/لا... ليالي/اذا بتوديهم برتبهم لك مافي مشكلة؟ جاسر/يعني بكرة بعد ماتخلصين من السوق بتروحين البيت؟ ليالي/أي.... جاسر/حلو.....معناته الاربعاء بنطلع على بيتكم... ليالي/صدق!!!! جاسر/جربتني قبل وعدتك وماوفيت؟ ليالي/أي.. جاسر/أي!!! ليالي/يعني قلت ان عرسنا بيكون على ورق وبس!!!وغيرت رايك اللحين؟ جاسر بتنهيدة طويلة/مابتنتهين من ها السالفة؟ ليالي/لين اعرف وش اللي غير كل الامور.... ///////////////////////////////////////////////////////////////////////////نايف/هذا صوت الباب اكيد وصلوا... تمنى ترفع راسها ولاتقول بشي بس ظلت مثل ماهي...... صاحبت فتحة الباب ضجة واصوات تبين اصحابها... لف نايف لعند الباب واول من دخل زيد... زيد/السلام عليكم... نايف/وعليكم السلام...قالها بدون نفس.. زيد باحرات/شلونك عم نايف؟ هني بس رفعت راسها تناظر بزيد بكره وحقد عم نايف عاد!!!ليه!!!!بس ماقالت أي شي...وماغاب ها الشي عن نايف اللي كان يراقبها.. نايف/حمد اختك السلامة... زيد مسوي مهتم/سلامات صبوي ماتشوفين شر؟ زين انها قدرت تقوله/الشر مايجيك؟ ام زيد/وينها صبا يمه.. زيد/تعالي يمه صبا هنا... ام زيد/وانت تركتني واقفة مع اختك ودخلت عنا......يمه صبا شفيك يمه..... اول ماوقفت امها عند الباب وهي تلهث من التعب شالت الغطاء من عليها بتروح لها وماانتبهت انها كانت تبكي...بس انتبهت على يد نايف اللي كانت مانعتها من القومة.. نايف بهمس/شوي شوي على نفسك توك طالعة من المستشفى؟ رمت عليه نظرة حقد اكبر من اللي ناظرتها بزيد ولانها تبكي كانت نظرتها اشد تاْثير...شال يده من عليه وقامت لاامها ورمت نفسها بحضنها وقامت تبكي بصوت عالي... ام زيد/ماتشوفين شر يايمه....قولي الحمد الله على كل حال؟ صبا وهي تشاهق/يمه لاتتركيني؟ ام زيد/هذا انا جنبك يمه....تعالي ارتاحي لاتبكين مو زين لك توك طالعة من المستشفى وتعبانة..... وصلتها لعند فراشها وجلست جنبها من الجهة الثانية لان نايف ماغير مكانه..... ام زيد/هدي يمه هدي.......يو سامحني ياولدي ماشفتك...شلونك؟ نايف باقتضاب/بخير.... ام زيد/اكلتي شي؟ صبا/لا.... ام زيد/انا مسوية لك عصيدة خل اقوم اجيبها لك... صبا/انتي قعدي...خلي زيد يجيبها وش عنده... زيد/أي وش عليه قعدي تدلعي علينا...بس ولايهمك اجيبها... نايف/اسمعني زيد..انا طالع اللحين وبترك صبا بامانتك وعهدتك...وش ماتبي سوي لها....وجيب لها...برد الليل..واذا تعبت دق لي تلفون...والممرضة هنا موجودة..... زيد/سم طال عمرك؟ اول ماطلع نايف من الباب سمعها تقول لزيد بحقد وعصبية/سم الله بدنك ان شاءالله قول امين!!!! زيد/ها صبا مصدقة حالك؟ صبا بعصبية/انا قعدة هنا مو قاعدة سامعني؟؟؟تنطق انت وياه ماتهموني؟؟؟خلاص اكثر من كذا مااتحمل سمعتني مافيني اتحمل أي شي... ام زيد/سمي بالرحمان يايمه وهدي.... دق قلبه بقوة وهو يقفل باب الشقة...معقولة تطلع؟؟؟؟لامستحيل زيد هنا وهو عارف اني اذا قلت سويت ماراح يطلعها؟؟؟؟ليش ياصبا تكرهيني ليش؟؟؟؟ صدقيني انا غرقان فيك...عطيني فرصة اقولك واشرح لك؟ ////////////////////////////////////////////////////////////////////// منى/صدق مو وجه نعمة ابدا!!! صبا/......... منى/اللحين عايشة بها المكان الفخم اللي يرد الروح وتبين تردين بيتنا المكسر؟ صبا/جربي عيشي بها السجن يوم واحد واحكمي وش تختارين؟ زيد/مايبيلها كلام هنا طبعا!!! صبا بنرفزة/اصلا انتوا اثنينكم الكلام ضايع معكم؟ منى/بعدين انتي كيف سقطتي!!! صبا/وليش تبين تعرفين؟ زيد/لانك مجنونة تحملين من نايف التميمي وتسقطين الولد؟يبى هذا بيورث الخير كله بعدين كيف تخلينه يروح؟ منى/هذا من غباء اختك اللي ماتفهم شي بها الدنيا؟ ام زيد/خلوا اختكم تعبانة ولاتضيقون خلقها؟ صبا/يوم اني ماافهم شي بالدنيا ليش رميتوني عليه؟ زيد/رجعنا لنفس الموال...هاذي الشغالة شقالت اسمها؟ منى/تينا... زيد/ياتينا...ياتينا وصمخ... الشغالة/نعم بابا.. زيد حط رجل على الثانية /سوي لي شاي... الشغالة/ان شاءالله بابا... زيد/تعالي وين رايحة ؟سالتيني وش ابيه انا؟؟؟يمكن احمر ويمكن اخضر؟علطول بتروحين ماتدرين؟ الشغالة وقفت منحرجة... منى/زين تسوي فيها تاخذ فلوس على قعدتها....من زمان وهي عندك ياصبا.. صبا بتعب/لا...اليوم جابهم هي والممرضة؟ زيد/أي زيد ذكرتوني قايل بروح اتفلسف عليها ذيك الثانية شوي؟ ام زيد بقهر/يمه..عن الطياشة اللي مالها داعي وخل بنت الاوادم بحالها؟ماهي هنا علشان تلعب زوج اختك جايبها تداري اختك؟ منة/وش فيها اختي عاد!!كاهي شزينها وش حلاوتها مافيها الا العافية؟ صبا/................. ام زيد/تتوجعين يمه؟ منى/يمه لاتدلعينها انتي كل مادلعتيها كبر راسها وقالت بترك ها البيت وبرد معكم!! صبا باصرار/وها المرة انا عند كلمتي!!برد يعني برد مو منتظرة يذبحني حضرته؟ ام زيد بحسرة/يضربك ياصبا؟ تنهدت صبا وقالت بقهر/وش اللي نزل اللي في بطني غير ضربه عاد يايمه؟ سكتوا ثلاثتهم وماحد علق بشي... زيد/يمكن انتي تعاندين وترفعين صوتك عليه؟؟يعني لو انتي مرتي وتسوين كذا اكيد بتنرفز منك وبمد يدي عليك؟ منى بتاْييد/أي صادق زيد اكيد انتي السبب؟ صبا باصرار/لو شيكون السبب...انا مع ولد ها الناس مو قاعدة لو شيصير بالعالم واذا اجبرتوني لاتلومون الا نفسكم ؟؟؟ ///////////////////////////////////////////////////////////////////// اليوم الثاني,,,,, في بيت الرميجي.. كانت ام جاسر وبناتها قاعدين.... نزل جاسر وبيده شنطة ثيابه... شمايل/مسافر؟ جاسر ابتسم/لا... ام جاسر/وين شايل اغراضك اجل؟ جاسر/بخلي السايق يطرشهم....وينه مادخل؟ ثامر/كاهو عند الباب ينتظرك خل الشغالة تطلعهم له... جت الشغالة وشالت الشنطة منه وقعد جاسر جنبهم وبيده مظاريف حطهم على الطاولة.... ام جاسر باهامام/ماقلت وين مودي اغراضك؟الجمعية؟ جاسر/أي جمعية يمه؟ هتون/اجل وين موديهم؟ جاسر/بيتي؟ ام جاسر/بيتك؟أي بيت؟ جاسر/يمه شفيك..البيت اللي شريته انا ومتعب...انا قايل لكم؟ ام جاسر/وليش موديهم هناك؟ شمايل/مايبيلها كلام يمه...معناته خلاص بينتقل هناك... جاسر/أي بنتقل... ام جاسر بعصبية/شنو؟؟؟تنتقل؟؟؟وليش بالله!!! جاسر/يعني ليش يمه؟بروح اسكن مع زوجتي ولاانتي عاجبك كل واحد فينا ببيت؟ هتون بعصبية/يعني هذا شورها بنت الاصول؟انها تطلعك من عندنا وتتفرغ لك بروحها؟ جاسر/وش ها الحكي الماصخ؟ ام جاسر/انا مو موافقة؟ جاسر/يمه انتي ماتبينها هنا صح ولالا؟ ام جاسر بعناد/جيبها هنا...بس لاتقعد معها هناك بذاك البيت؟ جاسر/ليش غيرتي رايك؟انتي ماكنتي تبينها... هتون/خلاص كاهي غيرت رايها امي وروح جيبها وتعالوا.... جاسر بنرفزة/هاذي بطايق العرس بيكون الاسبوع الجاس لاتقولون بعد ماتدرون؟ طلع وتركهم...... ام جاسر/هذا اللي قاصر بعد...علشان يقولون لو مايبيها ماحط لها بيت بروحها؟ شمايل وهي تقراْ البطايق/وازيدك من الشعر بيت يمه...العرس بقاعة السيف؟ هتون/جاسر جن....اكيد مسوية له شي ها الساحرة انا اعرفها ام سحور من يوم يومها؟ ام جاسر/انا شقول للعالم اللحين؟الله يصلحك بس ياجاسر على ها المصاايب... هتون/دق على السايق ياثامر وقول له تقولك هتون بس توصل الاغراض ترجع لها....انا بقوم البس عبايتي؟ شمايل/وين بتروحين؟ هتون بحقد/بروح ااءدب ها البدوية....على بالها ساكتين وراضين بللي تبيه وتقرره؟ //////////////////////////////////////////////////////////////// ام نايف/انت تعال انا بيني وبينك سالفة؟ نايف وهو يطفي سيجارته/في شي... ام نايف قعدت قباله/انت مو ملاحظ انك ها اليومين زعلان ودايم شارد وها السيجارة ماتفارقك؟وابوك يقول حتى الشركة ماتروح؟ نايف بضيق/مالي نفس شي يمه... ام نايف/علامك يمه...كلمني ..صارحني انا امك؟ نايف بتنهيدة طويلة/شتبيني اقولك يعني يايمه؟ ام نايف/شفيك؟ نايف/ولاشي.. ام نايف/وش اللي مضايقك؟ نايف بشرود/ولاشي... ام نايف/مايصير....حالتك ماهي بعاجبتني يمه...وانا قايلة اليوم بتفرغ لك لاني طالعة ولاني رايحة اهم شي اعرف شفيك؟ نايف/يمه....وبدون مقدمات انا متزوج؟ ام نايف بصدمة/متزوج!!!!يعني البنت اللي بالمستشفى ماكانت مجنونة يانايف؟ نايف/............ ام نايف/واذا منت حاطها بشقتك وين حاطها؟ نايف/في بيت اهلها؟ ام نايف/حلو حلو..عاش ولدي والله!!انت تقعد عند نسباك يانايف؟انت ولد العز والخير...ولد التميمي تسكن عندهم؟ نايف/ماعندي خيار ثاني؟ ام نايف/ياسلالااااام؟وش اللي مضايقك اللحين؟ نايف بضيق/تعبانة... ام نايف/زوجتك..اقصد طليقتك؟ ناظرها بدون مايرد عليها... ام نايف/وشنو فيها بالله؟ نايف بتنهيدة/سقطت!!!!كانت حامل وسقطت؟ ام نايف/........باي شهر؟ نايف/توها ماكملت حتى الاول..... ام نايف/من زمان انت متزوجها؟ نايف/صار لي شهرين ونص.... ام نايف/وليش كذبت عليّ يوم سالتك وجيتك الشقة؟ نايف/........... ام نايف/متى بتطلقها؟ رفع عيونه وقال بذهول/اطلقها!!!منو قال اني بطلقها عاد!!! ام نايف/ياسلااااام...تبي تخليها على ذمتك لمتى ان شاءالله!!!لين يعرف ابوك بها السالفة؟ نايف/خله يعرف....وش فيها..انا متزوجها بالحلال؟ ام نايف بصرامة/نايف... نايف بعصبية/سمعي يمه...انا ماقلت لك علشان تقولين لي طلق....انا قلت لك علشان تعرفين ان في وحدة بحياتي,,,,واني ظالمها معي كثير علشانكم؟بس مافيني اظلمها اكثر بعد؟ ام نايف/وش ها الحكي؟انت عارف ابوك اذا عرف وش بيسوي..اول شي روحة الشركة مابتروح ...و قاطعها نايف/انا بقوله ومن قال لك اني بسكت!!!انا ابي اطلع من ها الشركة؟ابي اطلع من عالمكم؟ابي اطلع من ها البرستيج اللي خنقني!!!!تعبت....خسرتها...ذليت� �ا واهنتها كثير وانا احبها بس علشان برستيجكم انتوا اللي عيشتوني فيه وخليتوني احسب له حساب وانا ماابيه!!! ام نايف/اسمعني زين... نايف/ساعة المنى اللي انفصل بحياتي عن شركة ابوي...وبعدين من قال لك انه بيتخلى عني...كل الشركة انبت بتعبي انا ولاهو غرقان مايدري هو اللي عليه يمول المشاريع ويطلع برى السعودية وانا اللي عليّ كل شي؟ابوي مايقدر يستغني عنه وهذي انا ضامنها... ام نايف/وش القصد من ها الحكي؟ نايف/انتوا تبوني اتزوج وحدة ثانية...بس لاتنتظرون اني اطلق زوجتي علشانها ولاانها تقعد معي بالسر اكثر من كذا!!!!بتكون الاولية بحياتي وبقلبي الوحيدة.واذا بسوي شي ثاني علشانكم بس طلاق ماراح اطلقها؟؟؟ ////////////////////////////////////////////////////////////////////////////كانوا بالحديقة ذيك اللحظة يرتبون فيها الكراسي .. تهاني/انا بدخل اجيب لي شي اشربه...تعبت وانا اساعدك؟ ليالي/مشاءالله...تعبك مايبيله شي؟ تهاني/انا عطيني الثياب وابتعدي عني...بس رتبي هنا وجيبي وحطي مو من خصوصايتي؟مشاءالله شغالتنا ماهي مقصرة؟ ليالي/درينا عاد لاتقعدي تعايرينا كل شوي بشغالتكم؟ تهاني/هههه للتذكير ليس الا.... ليالي/جيبي لي شي انا بعد اشربه مت من العطش؟ تهاني/خلي خالك يروح يجيب لنا عشى؟ ليالي/يكون يعني مستحية تقولين له؟والله محد مستحي الا هو مسكين...ماغير سوي وجيب وحط...وهو مايدري عنك نحيسة؟ تهاني/الله يسامحك......مت وانا اقنع في امي تتركني اروح معك بكرة لااصايل مارضت تقولي المرة رايحة مع زوجها انتي ليش بعد بالنص؟ ليالي/صادقة عليك عمتي مغثة مرة؟ تهاني/زين لكن؟قالت لي اذا مااقتنع خالك من ليالي وزوجها بتروح هي وبتحاول تقنعه... ليالي/والله اني خايفة ابوي مايرضى بس جاسر طمني ووعدني خير.. تهاني بخبث/جاسر وجاسر ...نشوف وش النهاية؟ قالتها ودخلت...وليالي قامت تفرش المفرش فوق الطاول,,وسمعت جرس الباب بس ماراحت له لانه متعب موجود والشغالة موجودة وجاسر عنده مفتاح ولو وحدة من عماتها بتكلم قبل.... جاها صوت هتون من وراها بقوة/هذا اللي تبينه؟بيت بروحك؟ لفت لها وماقالت شي...... هتون بحقد/اكرهك....وماكرهت احد بالعالم كثرك؟ ليالي/أي... هتون/حتى اختك ماهي مثلك...دايم تدعين الطيبة ومغطية وجهك بها القناع وانتي اصلا عقرب سام؟ ليالي/خلصيني وش بغيتي؟ هتون/ليش قلتيلي انه ارتبط بوحدة ثانية؟تبين تقطعين عني كل امل؟ ليالي/ليش انتي للحين عايشة على الامل؟ هتون/حياتي انا ومتعب انتي مالك شغل فيها؟ ليالي/لي....متعب اخوي وماارضى احد يذله ولايكذب عليه ويعلقه وبالنهاية يرميه...وبعدها يجي يبي يرده من جديد....متعب ماهو لعبة بيدك ياهتون؟انتي رفضتيه من البداية لااسباب محد يعرفها غيرك ولااحنا مستعدين نسمعها بعد!!!خلاص اتركيه يكمل حياته بعيد عنك ولا حلى بعينك اللحين؟ هتون/طول عمرنا نحب بعض لاتوقفين انتي بالنص بينا!! ليالي/يمكن انتي تحبين...بس هو شالك من تفكيره خلاص؟ هتون بتهديد/ليالي انتي مالك شغل؟ولاتحلمين تقعدين مع جاسر هنا بترجعين البيت وبنتصافى من جديد؟ ليالي/وبامر منو ارد بيتكم ان شاءالله؟بامرك ولابامر امك ولاخالتك؟انا امشي ورى زوجي...وهو اللي طلب مني نكون هنا؟ هتون/واذا زوجك غير رايه وقال لك تعالي نروح هناك بتمشين معه صح؟ ليالي/بس انا ماجاني منه خبر...اصلا توه جايب لي اغراضه ارتبهم....ليش بيتعب نفسه وبينقل وبيحوس.... هتون/بتندمين ياليالي صدقيني.... متعب من وراهم/اقول ليالي....تبون شي انا طالع؟ وقف قلب هتون اللي ماتوقعت وجوده هنا.... ظلت ليالي تناظر بمتعب وبهتون.... متعب/اسالك تبين شي انا بطلع مشوار وبعدين برد؟ ليالي/....... متعب/تهاني تبين شي؟ هتون حست بضيق وتغيرت ملامح وجهها...... ليالي/متعب انا بندم؟ متعب/تندمين؟ليش بتندمين؟ ليالي/مدري اسال هتون هي تقول اني بندم؟ متعب/هتون؟؟؟هتون وش يدخلها بالسالفة؟ قعدت ليالي على الكرسي اللي جنبها وهي تناظر بمتعب اللي ماتحرك من مكانه وهو مو فاهم عليها وبين هتون اللي جمدت بمكانها... طلعت تهاني بها الوقت ومعاها اثنين بيبسي... تهاني بصدمة/هتون؟وش تبين؟يعني اقصد وش جايبك لنا؟ متعب بصدمة/هتون؟؟؟؟؟؟؟ ليالي/تيسر مانبي شي واذا بغينا دقينا عليك بس لاتبطي ولاتسرع؟ مايدري أي موقف انحط فيه ولاوش ممكن يسوي...بس زين انه قدر ياخذ نفسه ويمشي قبل لايسمع صوتها ولايشوفها؟؟؟؟ نايف/مبسوطة ان اهلك معك؟ صبا/................ نايف بهمس/صبا لاتجننيني...ابي اسمع صوتك؟ صبا/............... نايف/انا جايبهم هنا علشانك وقلت بيغيرون نفسيتك؟ صبا/..... نايف بتنهيدة/وش تبين...تبين صاحبتك تجيك...بروح اجيبها لك بنفسي؟ صبا/................. نايف بتذلل/صبا مايصير كذا...انا صاير مثل الذليل تحتك..كل اللي ابيه اني اسمع صوتك ولك يومين من طلعتي ماتكلميني؟ صبا/.............. نايف بتنهيدة/قولي لي وش اللي تبينه..وش اللي بيريحك؟ اخذت ورقة وقلم كانوا جنبها وكتبت له(ابي اروح عند اهلي ماابي اقعد معك) وعطتها اياها.... نايف بضيق/حتى ماتقدرين تتكلمين معي تكتبين لي اللي تبينه بورقة؟ صبا/............ نايف/طيب اهلك وعندك ليش تبين تروحين هناك؟ صبا/...................... نايف/في كلام كثير ابي اقوله لك وابي نتفاهم عليه؟ صبا بحدة/اضربني منو ماسكك؟.لاوجود اهلي ولاوجود أي شي يمنعك من ها الشي؟ نايف/انا...انا ماقلت ها الشي؟ صبا بنفس الحدة/انت قلت نبي نتفاهم!!وانا من عرفتك بغير الضرب ماتتفاهم؟؟؟؟ تنهد بقوة وحس ان الجدار اللي بينهم كل ماجاه يكبر اكثر واكثر.... نايف/صبا....اذا مفكرة اني بتخلى عنك فاانتي غلطانة؟ صبا/.............. نايف/عارف اني تعبتك معي كثير بس معليش....انا عارف غلطتي بس اتركينا نتفاهم؟ صبا/.............. نايف/وش رايك نسافر يومين نغير جو فيهم....ونتفاهم ونرد بعدها...وين تبين تروحين؟ اليوم اللي بعده في بيت ابو عبدالله.... جاسر/يعني انت عارف ياعمي... ابو عبدالله/لا ياجاسر البنت مكانها هنا؟ جاسر/وانا قايل لك باخذها عندي!!!انا ابيها تساعد اختها بالبيت وبعدين انت الاسبوع الجاي بتنزل علشان تحضر العرس وبتشيلها معك مرة وحدة ولامنت ضامني يعني؟ ابو عبدالله/السالفة ماهي كذا ياجاسر...وبعدين وش له العرس بتسوونه؟ جاسر/كنا مشغولين شوي وماقدرنا نسويه من البداية...بس مو معقولة مانسوي عرس...... ابو عبدالله/....... جاسر/هي كلها اربع ليالي بتكون عندنا وانت اذا جيت بتاخذها.... ***************************عند الحريم... ام عبدالله/حتى العباية تغير ت ياليالي؟ ليالي/......... ام عبدالله وهي تقولب بالشنطة/وش ذي بعد؟ اصايل بهمس/ان شاءالله جويسر يسوي نتيجة لاني بختنق؟ ليالي/هو وعدني خير.... ام عبدالله/اقول ليالي....احنا بنجي العرس بعد؟ ليالي/اكيد ياخالتي بدونكم ماراح يتم؟ ام عبدالله/صدق؟ ليالي/انا جايبة للبنات كل وحدة ثوب تلبسه ماابيهم يطلعون اقل من غيرهم هناك؟ ام عبدالله/وي عساني مااعدمك ان شاءالله اثمرت فيك تربيتي وجيتي تردين الجميل مو مثل غيرك؟ اصايل/أي جميل؟؟مصدقة حالك انتي مربيتنا؟ ام عبدالله/اصلا خواتك دايم يسالون عنك وينها ليالي ووين ليالي..وليش ليالي نستنا وليش ليالي ماتسال فينا؟وانا دايم اقول لهم هي تسال عنكم ولاليالي ماتنسى احد بس اكيد منشغلة؟ ليالي ابتسمت لها/واضح ياخالتي بكمل ساعة من جيت ماشفتهم حتى سلموا عليّ!! ام عبدالله/ها...راحوا يقايسون الثياب اللي جبتيهم فرحانين فيهم؟ اصايل/أي عاد خواتي كل شي يفرحهم؟ ام عبدالله/وانتي بتنظرينهم؟ اصايل/شعليه ياحسرة؟الحمد الله.... ام عبدالله/اقول ليالي البيت اللي بتقعدين فيه كبير؟ ليالي/الحمد الله..ز ام عبدالله/كم غرفة فيه؟ اصايل/مافينا نتكلم بروحنا؟ ام عبدالله/يعني اشيل شيلتي واقوم؟ اصايل/روحي انتي بعد قيسي ثوبك علشان لو ماناسبك تدبر لك ليالي غيره مني للعرس؟ ام عبدالله/أي وانتي الصادقة؟اقول ليالي انتي وزوجك قاعدين هنا لمتى؟ ليالي/ليش تسالين؟ ام عبدالله/يعني خبرك ابوك مايحب يستقبل احد عنده ولايبي يسوي ضيفة...انتي عارفة ابوك؟ ليالي/لا من ها الناحية تطمني اصلا جاسر يبيه بكلمتين بس وبس يخلصونهم بنروح الرياض وبكرة بنرجع الشرقية؟ اصايل بهمس/والله مالكم امل اذا وافق ابوي ارد معكم تروحون الرياض واصير انا مثل العواذل بالنص؟ابي اشوف اخبار الشرقية؟ ليالي بنفس الهمس/تمويه يابابا؟ على الساعة عشر بالليل..... كان ضاري قاعد بالبيت وجاه مسج من جاسر وقام مرة وحدة... ام ضاري/يون يمه... ضاري/طالع؟ ابو ضاري/وين بتروح؟ ضاري بعجلة/عندي مشوار بخلصه وبرد...لاتنتظروني اذا بتتعشون؟ اخذ سيارته وعلى الكورنيش لان جاسر قال له انهم وصلوا وتهاني واصايل مثل المشفوحين وراحوا الكورنيش علطول.. ضاري بنفسهزين قدرت تقنع عمك وتجيبها......تدرين اني اشتقت لك ياالبدوية؟ كل افكاره راحت انه بيشوفها... وقف سيارته قريب من الموقف اللي قاله جاسر انهم فيه ..ونزل يمشي يدورهم...لقى جاسر وليالي يتمشون بروحهم وليالي ماانتبهت لضاري وجاسر اشر له بعيونه انهم قدام شوي وراح هناك... كان الجو ضحك وووناسة لاسيما انهم ماشافوا بعض من كم يوم.... اصايل/الحب عجب...الحب لهب...الحب هو راحة وتعب... الحب لو ماهو حلو ماغنى فيه اهل الطرب,,, تهاني/الله الله الله على الحب الكبير...الله الله الله على الحب الكبير.. اصايل بشماتة/تكفين سكتي؟صوتك ماينبلع؟ تهاني/من زين صوتك عاد!!! اصايل بثقة وهي نافخة حالها/صوتي الملايين ودهم يسمعونه ومنحرمين منه؟احمدي ربك انك تسمعينه؟ تهاني/أي من حق بعد!!وش مفكرة نفسك بالله!!! اصايل/ولامفكرة ولاشي عارفة نفسي زين وعارفة قدري...انا اصايل يابنت العالم اصايل.... كل الكلام كان يدور وضاري وراهم علطول وكان ورى تهاني بكم خطوة...وهو في بالها يتنهد مع كل كلمة تقولها... رفعت راسها والتقت عيونهم في بعض... اصايل بفزع/ضاري؟؟؟؟؟؟ | | | | | |