آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
23-09-11, 12:43 PM
| #11 | ||||||||
| مراقبة عامة ومشرفة منتدى الروايات المنقولة  
|  دق الباب بقوه وضحى – بسم الله الرحمن الرحيم منهو اللي جاينا في ذا الوقت شيخه – لايكون وجهه النحس خالتس ساره بخوف وهي تركض للباب – طيب طيب كسرت بابنا ياللي تدقه حشا عارفين انك عبدالستار يعني من بتصير نوره وهند وقفن بيشوفون الهوشه اللي بتصير بين خالهن وبين شيخه فتحت الباب ساره دخل عليهن بكل جسمه ووقف في نص الحوش وبقواة عين – منهو عبدالستار هذه شيخه التفت بطرحتها اللي على رقبتها – هيه هيه انت على وين داخل وش قواة هالوجهه لك اذلف اذلف لاجمع عليك الحاره باللي فيها البنات ادخلن داخل يلتفن ابراقعهن وطراحهن وضحى بسرعه تعرج وركضت لأختها – ايه انت خير داخل علينا لآحم ولادستور وش تبي وش تبي محمد – اللي ابيه اني اشوفتسن اخذات راحتسن بالمره شيخه بعصبيه – قسم بالله ياانت لو ماتكلمت زين اني لأبلغ عليك الشرطه محمد عصب منها – انتي يام لسان انا محمد بن ضاحي بن فهيد آل قاسي ولد عمتسن يامحترمات البنات انصدمن بس شيخه لا ماتسكت – وطززززززززز وولد عمنا خير ياطير هاذا مو مبرر انك تهجم على بيوت الناس انت ماتستحي على وجهك ولا ماتستحي على وجهك وضحى قربت من شيخه تربت على كتفها – شيخه هدي اصبري خلينا نعرف ليش جاي محمد عجبه تصرفها .. بعكس إحتقاره للسان شيخه السليط وضحى بهدؤ – وانت ياللي محسوب علينا ولد عم وش تبي جاي هالساعه توكم تعرفون ان لكم بنات عم محمد هدى شوي – اسمعي انتي وإياها بالعربي الفصيح حنا مو عاجبتنا عيشتسن في هالقريه وبالحالتسن اللي ابيه منتس انتي وإياها تلمن حفيشتسن وتمشن معي شيخه بأمر – اسمع انت قسم بالله ان ماذلفت هالحين عن وجهي ورحت للسعه اني لشّوفك شي ماشفته انت من صدقك ولا من صدقك تبي نركب معك ولاصرت ولد عمنا تأخذنا معك غصب هاذا اللي ناقص بعد محمد انقهر منها وقام يهدد – اسمعي انتي ياام لسان ان ماقضبتيه ولا والله لاقصه شيخه بقهر – تخسي تقصه وضحى بقهر – بسسسسسسسسسس كلهم اسكتوا وضحى – شيخه نسيتي ان حنا هنا بالحالنا ولا يجوز يطلع حسنا وانت (وناظرت فيه ) اللي ماطلته بيدك اوصله برجلك انت تحسب وين عايشين تقول امشن انا ولد عمتسن نركب ونمشي معك ليه مهبل ولا مهبل ماحنا بطالعين من هنا وورنا وش بتسوي محمد بقهر ولو ان كلامها معقول – اوريتس اللي ابسويه بس اصبري علي بكره من غبشه عندتسن وراجع راجع الله لايعوقني بشر وابوي معي وهالمره بتركبن ورجلينتسن فوق روستسن بعد قال ايش بنات ويعيشن بالحالهن وضحى بصرخه وقهر – هاذا انت قلتها بنات ويعيشن بروحهن وينكم انتم عاد يوم مات ابوي وامي ترانا نعرف انكم عرفتوا انهم ماتوا وين هالمراجل عقب خمس سنين طلعت ياشيخ ضحكتني محمد عض على شفايفه بقهر .. وطلع ويوم وصل للباب لف عليهن - انا هنا ماني براد للرياض وابوي بكره بيوصل لمن عفيشتسن وخلني اشوف وحده معتبه برى هالباب شيخه ماتت قهر من كلامه وجت تعدي تبي تضربه .. وخواتها مسكنها شيخه بغبن وقهر – والله والله مااعدي اللي قلته واصبر وبتشوف محمد قرع بالباب بقوه وضحى تفلت – تفووووو الله لايردك نوره بقهر – وش بنسوي في هالمصيبه شيخه بقوه – يخسي هالتسلب انتن مصدقات انه من عيال عمتسن هه ( بسخريه ) نسيتوا ان الشيبه حالف عليهم مايعرفون لبنات ناصر طريق ( هالسالفه عرفنها عقب بصعوبه حصلن رقم عمهن سعد اللي بلغهن هالخبر بنفسه وقال انه بيرسل الهن فلوس .. البنات رفضن وغيرن رقم الجوال والسكن بعد من بعد الأهانه اللي صارت الهن ) جالس على السرير بالفندق ويزفر بقهر – ياصقر قلتلك هذلي حنش مب بنات قسم بالله ياعندهم وحده اسمها شيخه تصدق تبي تضربني لين ألزمنها خواتها ضحك صقر بقوه – خخخخخخخخخخخخخخخخ ياشيخ وراك ماطلعت العقال ومردغتها فيه محمد انقهر من سخرية صقر له – انت لها يارجال تعال علمها المراجل ومردغها بالعقال صقر بنخوه – وانا لها تخسي هاذي كيف فكرت بس تبي تضرب النقيب محمد بن ضاحي محمد ارتفعت معنوياته – والله ياصقر لو تشوفها مايقدر على ذا الجنيه غيرك صقر وقف من الكرسي – انا من غبشه جاي مع ابوي لاتنقهر وانا اخوك ودواها عندي محمد بتفكير خبيث – اقول صقر وش رايك تتزوجها مايقدر عليها غيرك صقر انصدم – ايششششششش الجمعه اليوم الثاني \ الساعه 7 صباحا في الدوادمي البست بشتها والبرقع وضحى – شيخه الفلوس بتكفي شيخه اللي تعدل الطرحه – ايه بتكفي ومن خردة اليوم بكمل الناقص من حق البيت وضحى – لا الباقي انا بوفيه لاتشيلين هم شيخه – على ماتبين البنات سرحن للمدارس وضحى – ايه بس سويره غايبه تقول بطنها يعورها شيخه – خلاص عندتس إياها اسمديها في البيت خليها تنظفه وضحى – اوريتس فيها ازهليها عند الباب وجالس في سيارته .. يوم طلعت شيخه ومن شافها نزل من السياره وهو معصب – هيه هيه انتي هييييييييييه ( وهي عارفته بس مطنشته ومعطيته ظهرها ) وقف في وجهها – على وين العزم إن شاءالله شيخه نفثت على صدرها – اف اف اف فففففففففففففف لا ياشيخ خوفتني ومن حضرتك عشان اخذ الإذن منه محمد قرص بعيونه – انتي يابنت وقفي زين وعدلي ذا اللسان ماتستحين على وجهتس شيخه انقهرت – لا مااستحي على وجهي ( دزته عن طريقها ومشت وخلته ) انقهر منها وعض شفايفه بقهر .. اتجهه على سيارته ودق على جوال صقر .. صقر اللي صحاه الإتصال من عز نومه وبصوت مبحوح وعيون نص مغمضه – آلو محمد بقهر وبعصبيه – قسم بالله لاتاخذها وتمردغ خشمها في الطين ياولد امي وابوي في السوق انشرت بسطتها .. وجابت بضاعتها من المحل اللي تحطه عنده كل يوم شكرت الهندي وحطت الكرسي وجلست عليه .. ومحمد من بعيد يراقبها وميت قهر منها .. اقتربت منها حرمه – السلام عليتس شيخه اللي مو حسه بمراقبة محمد لها – وعليتس السلام الحرمه – بنشدتس ياوخيه القى عندتس براقع إسلاميه شيخه – نعم ابشري بالخير عندي ( وطلعت براقعها ) قامت الحرمه تناظر في البراقع .. وبعدين كبتها في الارض قريب من البضاعه وعطت شيخه ظهرها – براقعتس قرومها طوال انا ماابيها شيخه اللي مطت عيونها بقهر .. وقمزت من البسطه ووقفت في وجهه الحرمه بقهر شيخه – انتي وراتس ترمين براقعي ماتبينها ومب عاجبتس عطيني إياها في يدي ومب تذبينها ليه وش شايفت بسطتي زباله الحرمه – اها الخلا يابنت اظاهر انتس ماتربيتي ماتستحين على وجهتس تهرجين اللي اكبر منتس بهالشكل شيخه خمت الحرمه بصدرها بيدينها الثنتين وقامت تلفلف فيها – اها مب انتي اللي تعلميني العيب والصح والخطأ والله اني مااعدي اللي سويتيه واني لاشكيتس اليوم ويانا ياانتي وصارت هوشه قويه .. والحريم ألتمن يفرقوهن .. ومحمد مط عيونه وركض عندهن .. وقف بينهن – بس بسسسسسسسسسس استحي انتي وإياها شيخه قامت تلم برقعها وتسوي البشت والطرحه – اها كملت الحرمه قعدت تبكي وتلم شوشتها .. وتستر صدر ثوبها المنشق محمد بعصبيه – ماتستحن انتن ماتستحن في الشارع وتهاوشن شيخه قامت تنفث الهواء بقوه الحرمه بعصبيه – والله اني لأشكيها في الشرطه محمد من سمع شرطه خاف على سمعة بنت عمه .. وبسرعه طلع بطاقته – انا من الشرطه وخلاص انا شفت كل شي بعيني الحرمه انبسطت وراحت تخر الأولي والتالي واكثره كذب عشان بس يسجل محضر ويسجن شيخه .. مادرت ان محمد قاعد يداري السالفه لاتكبر وتصير فضيحه – خلاص خلاص انتي بس روحي توكلي وهاذي اوريتس الشغل فيها شيخه مطت عيونها من ورى البرقع بقهر – ابك انت وش تقووووووووول تخسي وتقطع لانت ولذى الحرمه اللي وراك اللي تساند ابك رخمة مافيها خير لو فيه خير ماتسذبت وتجي تواجهني محمد عصب – بــــــــــــــــــــــــ ــــس | ||||||||
|  |
|
23-09-11, 12:47 PM
| #12 | ||||||||
| مراقبة عامة ومشرفة منتدى الروايات المنقولة
| في بيت سعد طق الباب قبل لايدخل وهو يتحنحن – احم احم تغطن يابنات عمتسن الشيخ فارس بيدخل موضي اللي كانت لابسه برقعها قعدت تضحك من كلامه .. اما ريم صعدت فوق تبي تلبس برقعها وتنزل موضي بضحك – عمي الشيخ فارس اقلط حياك البيت بيتك دخل فارس وهو يضحك – السلام عليكم ( ويستنشق ريحة العود اللي في البيت ) الله اللـــــــــــــــــه يازين ريحة بيتكم ياآل عمي ( ناظر في موضي وضحك ) نعنبو بس ياموضي لو انتي اصغر مني يحرمن علي بنات حواء غيرتس ضحكت موضي على كلام فارس اللي يحبها وتحبه – والله يافويرس انك بياع حكي وكلام فارس جلس وهو يضحك – افا من قال انا بقترح على الشعار لاجوا يتغزلون يشوفونتس ياموضي موضي اللي عارفه لأساليب ولد عمها – ماخذنا منك غير الحكي فارس ضحك – انتي تعرفين معزتس ياام نواف اجل وينهم عيالتس موضي – انت يافويرس بس تبي تفرس زايد حرام عليك دايم يسالني يمه انا الاكبر ولا نواف وإذا قلت انت قال اجل ليش فارس يقول ياام نواف فارس ضحك بقوه – هههههههههههههههههه كان قلتيله كلن ومقامه نواف اسم حلو وكشوخ ودلع اما اسمك نحبه من حبنا بس لزايد الله يرحمه ولا مافيه زود موضي وقفت وهي تضحك – بروح اجيب القهوه فارس – قبل لاتجيبين القهوه يقولون ان الشواب امس بقو عليكم بقه قويه والمصون وضحى بنت خزام ضاقت من فهيد آل قاسي موضي جلست وهي تضحك – والله فاتك دخلة جدتي علينا وهي تبكي والشيخ فهيد امس طلع ضبع عند وضحى قعد يراضيها ويحايلها لين رويمه صورتهم بجوالها فيديو وهات يضحك عليهم طول الليل فارس طاح على بطنه – ورويم ماتبطل علومها خخخخخخخخخخخخ ريم نزلت – وش فيها عمتك الشيخه ريم فارس ناظرها بنص عين – فيها ان سعيدان جاي وراي وان كنتي بنت ابوتس اقعدي معه ريم بققت عيونها ولفت ظهرها وفحطت فوق موضي ضحكت – حرام عليك احرجتها فارس – حرام عليها اهيه اخوي مسكين وهو ميت يبي يلمح زولها وهي بنت اللذين زابنه فوق موضي وقفت – اخوك دعله مايعرف الرومانسيه ولا كان يجيب الها باقة ورد شوكلاطه شي من هاذا القبيل فارس رافع صوته لان موضي خلاص وصلت المطبخ – وان كفشه ابوتس قسم لايعلقه مع كراعينه في مسلخكم اللي ورى البيت موضي أمرت الخدم يجيبون القهوه – إلا بسألك وينه عمي ضاحي ليش ماجاء معك فارس – علمي علمتس انا كبت علي امي جيك الماء وسبحتني فيه الساعه 11 ويادوب تروشت وخلصت سيده لموتري حتى مالمحت موتره في المسجد قلت يمكن سبقني عندكم بس ماشفت سيارته موضي – اها فارس يتلفت يمين ويسار – وين الربع موضي – ابوي في مجلسه يقول بيجيه رجال وجدي راح معه وجدتي زابنه بغرفتها من عقب احداث امس وامي راحت عند خالتي مريضه فارس – افا خالتس مزنه وش فيها موضي – ايه تعب بسيط زكام وما زكام فارس – اها ( ووقف ) اجل انا اسمحيلي بروح لجدتي وان جاء سعد خليه يجي لانه هو مكلمني وقلت له بجيكم وهو اتفق معي بعد واكيد على وصول ( قرب من موضي ) ولو تسوين فيه خير وتخلينه يشوف حبيبة القلب تصيرين اطيب من ابوتس ( ورفع يدينه بشكل تمثيلي ) الحمدالله الحمدالله اللي بس جاب بنتين عمي عشان مااتورط واحب منكم ويمنعني عمي من لمح زولها ضحكت موضي بقوه – والله انك خطيرررررررر فارس غمزلها – مو اخطر منك ياجميل موضي تضحك من حركاته – اقول رح لايشوفك زايد ثم قسم لايقلبك عجينه الليله فارس ضحك ومسك بطنه – انتي وشدراتس عاد ولدتس دعله على ابوه ( وراح وخلاها متجه لجناح جدته وجده ) موضي من راح عنها .. ومن طرى ابوه .. امسكت دمعتها .. تكره طاريه تكرهه ولو بيدها امحته من على الارض بكبرها في الشقه ازعجه الجوال اللي يرن كل شوي .. رفع راسه وناظر في الرقم .. طلع رقم البيت وعرف انها امه .. واكيد بتسويله سين جيم .. ضبط صوته .. وتحنحن وفتح الخط – هلا يمه منيره أم محمد – هلا يمه انت وينك ياابوي نايف يمثل – انت ماتشوف منيره – وش تقول نايف – لا بس واحد دزني وانا بركب سيارتي طالع من المسجد منيره بفرح لان هالولد متعبها – بارك الله فيك ياابوي ايه يابعدي خلاص وانا امك تعال انا مسويه لك الغداء اللي تحبه نايف رحم امه ووقف على حيله ويحس راسه دايخ – طيب يمه نص ساعه بالكثير واجي منيره بتساؤل – نص ساعه ياابوي ليه وين انت مصلي نايف اللي تورط – يمه انا سهرت عند الشباب ونمت عندهم وصلينا في المسجد اللي جنبهم وهذاني انتي بس يالغاليه جهزي الغداء وافرغيه على ماوصل منيره بحنان – ابشر ياابوي ابشر ياعيوني لاتسرع وانا امك نايف – إن شاءالله يمه منيره – يالله فديتك لاتبطي وفداعة الله نايف – هلا يمه سكر من امه وجلس على الكنبه .. وهو مهموم لمتى يشرب الزفت اللي يشربه .. المشكله انه دكتور ويعرف مضار الخمر ويشربه .. اجل الجاهل وش يقول عنه .. يبي يتغير بس مو عارف الطريقه والحل .. استغفر ربه .. لان الايمان في داخله كبير والاحساس بالذنب باللي قاعد يسويه يقتله .. اتجهه للحمام يتروش ويصلي الصلوات اللي طافته ويتجهز بسرعه عشان خاطر المسكينه اللي يرحمها كثير في بيت سعد بن فهيد دخل سعد ومعه ضاحي وهم يضحكون .. وقفوا عند الباب ضاحي – درب درب سعد بن ضاحي معي ريم من سمعت اسم سعد قمزت واقفه تركض .. وموضي وفارس والجده وضحى يضحكون منها موضي – اقربوا اقربوا حياكم دربكم سمح ضاحي وسعد يدخلون وسعد منقهر من تصرف ضاحي سعد بقهر – انا بعرف انت دعله مثل ابوك ماتخلون الواحد ياخذ راحته ضاحي خرها ضحك – هههههههههههههههههه نخليك تأخذ راحتك إن شاءالله يوم العرس سعد شاف الجميع يضحك – وانت وش مجلسك عند الحريم ومخلي عمك وجدك عند الريجيل هناك فارس – وش ابي بسوالف الشواب قسم بالله غثاء فلان سام الناقه الفلانيه بكذا وفلان شرى المزرعه الفلانيه بكذا سعد اتجهه على جدته يسلم عليه ويحب يدها – وشلونتس يابنت خزام ( يحبون ينادونها بهالاسم لانها هي لاتعزوت قالت انا بنت خزام وبكذا يحبون ينادونها ابنت خزام .. والعجوز عاد تنبسط ) الجده وضحى – الله يسلمك وانا امك تعال تعال ( وتجلسه جنبها ) اخوانك وينهم الكبار مااشوفهم مايجي عندي غير انت وذا النخله كلهم ضحكوا من كلمتها ( لان فارس طويل مره ونحيف ) فارس يسوي نفسه زعلان – الله يسامحتس يابنت خزام هاذي اخرتها اتعنى التس بالوصل وانت تصدني يازين صدتك تجرح القلب وتعله كلهم ضحكوا على كلامه سعد يناظر موضي – اسمحيلي ياام زايد ماوفيناتس حقتس وشلونتس عساتس بخير موضي – بخير زان حالك وشلونك انت وشلون الشغل معك سعد – اخخخخ لاتذكريني بالشغل اشهد بالله ان سواقة الطياره غثاء اخخ ياقهري ياسنين عمري اللي قضيتها في دراستها لواني مختصرها مثل اخواني وداخل العسكريه اطلع ضابط وننتهي بس محدثتس يحب الغثاء ضاحي – حوفك ننصحك لاتدخل الطيران لاتدخله وانت بالش عمرك بس والله ياسعد ان وظيفتك انت زينه وشيفتاتك كلها دول عربيه سعد اللي شاف ظل زول ريم تسمع فيهم وبخبث – انا عشان اختك ماطلبت الدول الاوربيه اشوف المشنقط والمحنقط بس ان استمريتوا يا آل سعد بن فهيد في قراركم التعسفي ان ادق الطياره لهيثرو في لندن واتبصر على كيف كيفي فارس فهم عليه ومات ضحك لانه شاف نظرات سعد وين متجهه كلهم ضحكوا على كلامه .. وسعد خقها ضحكه يوم شاف الظل اختفى عرف انها عصبت من كلامه ضاحي – والله انت تعرف سلومنا مافيه شوفه غير لين العرس سعد بشكل حزين – الله يصبرنا المشكله الوالده ماتعرس غير لين افرح باخوانك حشى انا اعرف البنات اللي يعنسن اخواني دقوا العنس وطافوه شيب صقر نضح ونايف في صدوغ راسه كلهم ضحكوا سعد وقف – يالله اجل انا استأذن ( وناظر في فارس ) يالله فارس وهو يضرب على كتف جدته – انا بنتظر الشايب يوم يجي ويلقاني راز بنت خزام هنيا كود اليوم ينولني كم وريقات زرق ( يقصد خمس مئة ريال ) سعد – بكيفك بس ترى امي مكلمتني تقول الغداء بارز موضي – افا ياسعد هذه كلام غدانا حنا بعد بارز سعد – تسلمين ياموضي بس امي جد ماعندها احد مدري عن نايف يمكن جاها موضي – ليه وعمي ومحمد وصقر وينهم سعد يصرف الموضوع – عندهم شغل ومدري متى يردون موضي – اها الله يحفظهم اجل سعد – يالله اجل فداعة الله الجميع – فداعة الله وقف السياره بعصبيه .. وابوه ناظر فيه – انجنيت انت صقر يناظر في محمد اللي متجه لهم – بنات اخوك خلن فينا عقل ( فتح صقر الشباك ) محمد ناظر فيهم – تأخرتوا صقر – انمسكنا في مسجد إمامه بغى مايفكنا خطبته قويه ضاحي وهو لابس النظاره الشمسيه – وين بيت بنات عمك محمد وهو يتجهه على سيارته – الحقوني صقر لبس النظاره ومشى ورى محمد .. لين وقفوا قدام البيت ووقف محمد .. واتجهه لباب ابوه وفتحله الباب .. واشر عليه – هاذا بيتهن يبه صقر ناظر البيت بنص عين وفتح الباب ونزل .. ونزل ضاحي من السياره . . ( عاد تعرفوني انا ام القفلات الخطيره .. نلتقي في البارت القادم ) | ||||||||
|
| |
|
23-09-11, 12:53 PM
| #13 | ||||||||
| مراقبة عامة ومشرفة منتدى الروايات المنقولة
| ( البـــــــــــــــارت الرابـــــــــ 4 ـع ) بيت ضاحي بن فهيد فتح الباب ودخل .. لقى امه تنتظره وعيال محمد اخوه ابتسم لهم – السلام عليكم منيره – وعليكم السلام يايمه وينك ابطيت نايف بتعب قرب من راس امه وباسه – اعذريني يمه كنت عند الربع وعلى مافكوني وقدرت اجي منيره – الله يعينك يمه يالله وانا امك رح غسل وبحط الغداء وسعد اخوك على وصول نايف يتلفت يسار ويمين – وين ابوي والباقين منيره بألم – رحوا يجيبون بنات عمك اللي الله يستر لايدري عنهم جدك صاح خالد بقوه – آآآآآآآآآآآآآآآآه منيره ونايف ركضوا لهم – وش فيكم خالد يبكي – خلود الوصخه ضربتني نايف ضحك – افا بطل وتبكي وبعدين عيب الرجال يبكي ( وشاله ونقزه في السماء ) خلود اغتارت وجلست تطالعهم وقوست شفايفها .. ناظر نايف فيها وضحك – لا انتي حبيبة عمو سعد انا حبيبي بس خالد صح يابطل خالد بوناسه – صح ياعمو ( وجلس يبوس خده ) وهااااااااااااات ياصياح ياخلود .. حاولوا يراضونها بكل الطرق مارضت .. لين وصل سعد وخبروه السالفه وقام يقرنشها ويلاعبها ومن الكلام الزين منيره حطت الغداء على السفره في الارض ( اللي المدنيه والتطور ماغير هالطبع فيهم ) – يالله تعالوا الغداء في بيت سلطان كان يأكل على الطاوله ومعه حمزه سلطان بهم جاثم على صدره .. وحمزه حاس فيه – عمي ليش ذبحك التفكير انته ذبحت عمرك عمي سلطان ناظر فيه – كم مره قلت لك لاتقول عمي انت اللي مشاركني وحدتي ومونسني ياعم حمزه وفي مقام الغالي المرحوم حمزه – العفو عمي كلن وله مقامه ( حمزه اخذ على الكلام السعودي وعرفه عشرة عمر بس برضوا يبان على كلامه ولهجته انه هندي ) ناظر سلطان فيه – انت ليه ماتزوجت لين هالحين اللي كبرك عندهم عيال قدي ضحك حمزه وبعدين رجع وسند ظهره على الكرسي وزفر بأنين – تدري عاد ياعمي لو قلت لك ان كل مشكل في الحياه هو الحب ابتسم سلطان – يعني كنت تحب حمزه ناظر فيه وبعيون مليانه دموع – كنت لوالله ياعمي لين هالحينه انا فيه يحب سلطان استغرب – ويومك تحب ياعم ليش خليتها وجيت حمزه بألم باين في عيونه – لان الحرمه كلو كذاب يكذب علي كثير لين جيت عند بابا الله يرحمه اشتغل واجمع فلوس عرفت ان هيه فيه يتزوج وباعت انا بالفلوس لان خطيب مالها عنده فلوس واجد سلطان بقهر وألم – وهي كل مصيبه في هالدنيا وراها حرمه الدوادمي انطق الباب على البنات اللي كانن ملتمات على الغداء يأكلن رز ابيض ولبن غنم وزبدة غنم وضحى – قومي هند افتحي الباب هند ناظرت فيها – وش معنى انا اللي افتح أبي أكل ( لان هي شوي مربربه وتحب الاكل ) وضحى – لانتس الصغيره ومشاءالله اللي يشوف الشكل يقول هاذي تحتاج لتمارين قاسيه مايدري انتس تزرطين الاولي والتالي هند قامت وهي تهاوش – الحمدالله والشكر تمن علي عشاني أذوق من عيشتها اللي تطبخها للناس وضحى وقفتها بعصبيه – لحظه لحظه وقفي هند وقفت وناظرت فيها بريعه – وش فيتس وضحى – بتطلعين بهالشكل الكشه تروع بلد ازرقي البسي برقعتس وحطي جلالتس عليتس هند انقهرت – وانتن إن شاءالله بعد مانتن لابسات براقعتسن افرضن افرضن ( وبفكره وطقت اصبعها عليها ) ولد عمتسن المصون شيخه اشرقت وكلهن ألتمن عليها .. ونوره ركضت تجيب الها مويه .. زرطته وبسرعه وقفت البست جلالها وبرقعها وناظرت فيهن – انتن بعد البسن براقعتسن بروح افتح انا بنفسي وان كان هو يتفل العافيه اليوم كلهن بسرعه قامن يلبسن وطلعن ورى شيخه اللي افتحت الباب وشافت رجالين وولد عمهن معهم محمد بتشفي وهو يدخل – اقلط اقلط ياابوي شيخه حطت يدها على الباب – للبيوت حرمتها انت وإياه خير داخلين علينا محمد وخر يدها وبقهر – استحي على وجهتس تردين عمتس ضاحي مايدخل كل هالشي تحت مراقبة ومتابعة صقر اللي لين هالحين مافصخ النظاره ويشوفها بنص عين .. ولو تعرف شي عن هالنظره لاتطين عيشته وتخلي يومه اسود ضاحي بوناسه لشوف بنات اخوه دخل وتبعه محمد وصقر – انتي من انتي وانا عمتس شيخه ناظرت فيهم بقهر .. ووضحى تولت هالدور – لو سمحت ياعم حنا بنحترم شيباتك ومابنبلغ الشرطه بس لم ولدك اللي كل شوي هاجدنا ويدق بابنا ضاحي ناظر فيها بعمق وتمعن في مشيتها وهي تعرج – انتي وضحى صح خواتها كلهم ناظروها بصدمه وهي انصدمت وماقدرت تتكلم تولى الكلام ضاحي اللي بعبره حزينه – جيت لابوتس وانتي عمرتس سنه وشوي وكنتي تعرجين وعلمني عن قصتس وبكا وبكاني معه ايه انتي سمية امي سمية الغاليه ( وضحى اللي انصدمت من كلامه هي تعرف انها سمية جدتها اللي تتمنى تشوفها بس ماتبين هالتمني عند خواتها وعند نفسها بسبب القرار الظالم بحقهم .. تتذكر يوم ابوها يدخل الغرفه على بناته ويتجهه يمها يحبها ويبكي ويشم ريحتها .. تسمعه يتمتم بكلام ماكانت تعرفه لين كبرت شوي وصارت تمثل تنتظر ابوها يوم يدخل ويبكي ويقول ياليتس ياوضحى تطلعين مثل سميتس ياليتس ياوضحى تصيرين مثل امي .. آآآآآآآآآآآآآآآه وتسمع ونينه طول الليل لين وقت التهجد .. تشوف ابوها يطلع ويصلي ويقرأ قرآن لين الفجر ثم صلى وطلع يدور رزقه .. من عقب هالكلام صارت تتمنى تشوف جدتها من كثر شوق ابوها لها شيخه بسلاطة لسان – ووينكم يوم تعرفون ان لكم بنات اخو وينك عنهن توك تعرفنا تفضل من غير مطرود حنا مانستقبل ناس حثاله مثلكم صقر اللي هالمره صرخ – هيييييييييييييييييييييييي ييييييييييييييييييييييييي ه الكل قمز من صرخته من ضمنهم شيخه بس مابينت .. مشى بسرعه لها ومطلع عقاله مسكه ابوه ومحمد شيخه عضت شفايفها بقهر وقامت تقهره – انت هيييييه وش شايفن نفسك مسويلي فيها ابو المراجل وانت تبي تلوح بعقالك لأنت ولاعشره من أشكالك يمد يده ويضربني الديره فيها أمن وأقدر اطلع حقي من بين عيونك انقهروا من كلامها وابتسم ضاحي لها – اها اجل انتي شيخه شيخه ناظرت فيه وحطت عيونها بعيونه بقوه – ايه انا شيخه وعارفه انك عمي زول ابوي يتراولي فيك وشبهه بس اخذ وراعينك ( مطوا عيونهم على هالكلمه ) ولمهم واركب موترك وتوكل مراح معك ماحنا برايحات انتم رفضتوا ابوي ورفضتونا عقب موته وابوك مانعك تأخذنا رح توكل ترانا ماحنا براعيات أمور رديه حنا بنات ناصر والكل يشهد بالحق فينا محمد وهو يتذكر كلام الشباب عنهم وبعصبيه – واضح والدشير اللي هنيا يوم قلت وين بيت ناصر كل واحد عطاني وصف التسن وخصا انتي ياراعية البسطه شيخه بقهر – اقطع اقطع عسى لسانك للقطع ماتستحي على وجهك صقر بعصبيه – اقطعي انتي ويالله ضفن هداميلتسن واركبن مع ابوي وضحى – ماحنا برايحات واللي في راسه عنتره يصفيه بعيد عنا ثم استحوا على وجيهكم خلوا لعمكم حشمه يوم تهجمون على بناته ماتستحون ضاحي – بس خلاص خلصتوا انتم وإياهن ( ناظر في بنات اخوه ) معتسن حق انتسن تزعلن مير انتن مانتن برادات عمتسن انا ماني بمخليتسن هنيا الا ان كانتسن تبن إلي الغثا وتغثني وضحى ناظرت فيه وهي اعقلهن اتجهت إله وحبت راسه .. وسط إستغراب خواتها وعيال عمها – عمي ماحنا برايحات مكان ممنوعات منه وابوك الله يحفظه إلكم مايبلع شوفتنا ضاحي بطيب لهالبنت حب راسها – وانا قلت تكفن عشان عنا عمتسن إلتسن والكلمه اللي تغثتسن تغثني واللي تبنه حاضرله بس والله اني مااقدر اترك محارمي بديره وانا بديره شيخه ناظرت في وضحى .. ووضحى ناظرت في شيخه وخواتها صقر بقهر يكلم محمد – مايكفيهن بعد ابوي متعني ويفكرن الهوانم وضحى بعقل – عمي وبأي اساس تبانا نروح معك وش يحدنا نرد لمكان انطرد ابونا منه شيخه بقهر وحرقه – ابوي مات وهو مغبون ومقهور على طردتكم إله وعقب كذا إلكم عين ترجعون لبناته بناته مثله المكان اللي ضم ابونا بيضمنا وماحنا براجعات معك ضاحي ناظر في صقر ومحمد – اطلعوا وصكروا الباب خلوني مع بنات عمكم بعد فتره طويله شوي طلع ضاحي وعيونه حمر وخشمه ,, وبهالشوفه ثار صقر وشد على يدينه ضاحي ناظر في محمد – محمد يابوي ادخل وشل الشناط اللي طلعنها بنات عمك محمد إبتسم بتشفي ,, وصقر إبتسم نص إبتسامه ولبس نظارته واتجهه على سيارته وفتح لأبوه الباب عشان يركب وينتظرون البنات بيت سعد بن فهيد فارس يقرنش العواده جده وجدته فهيد بعصبيه – انتسلع انتسلع يالنخله تبي تشيش بنت خزام علي كلهم ضحكوا فارس وهو يضحك وهمس لجدته – شفتي يابنت خزام شايبتس يحبتس ليت ينولنا من هالمحبه نصيب الجده وضحى وتهمسله مثل همسه .. والشايب يتحرقص يبي يعرف - والله انك منت بسهل مير اذلف عني وراك ( قالت اذلف عني وراك بصوت عالي ) كلهم قعدوا يضحكون فارس ضحك ووقف – والله انكم ياهشياب منتم بسيطين متفقين علي بغيت الزرق مير الله يعوضني ( بتمثيل سوى نفسه زعلان ) ومشى وهو معطيهم ظهره قعد يضحك يوم سمع جدته تناديه لانه يعرف انها تموت فيه ووقف الجده وضحى – يالنخله تعال جاي فارس لف راسه ووخر ضحكته ومكشر – هلا الجده وضحى ناظرت الشايب فهيد – فهيد فهيد ناظر فيهم – نعم الجده وضحى – ابك عطه سد عينه من اليوم يتحراك يبي دراهم كلهم ضحكوا وريم علقت – كاك كاك كاك عطوه عطوه سدوا عينه فارس انقهر – اقطعي انتي ( وناظر في جدته ) ماابي شي ماابي المنه هذا جزاي يابنت خزام اراضيتس على هالشيبه ويوم عطى كل واحدن فيكم ضحكه وغمزه للأخر خلاص رميتوني وصرت كخه الشايب فهيد – كخه تكخ وجهك اذلف اذلف والله ماتشم الريال موضي وريم طاحن على بطونهن فارس انقهر ومالقى نفسه غير انه يضحك وبعد فتره من الضحك – زين الله يسامحكم اقول الوضحي الشايب مطر يتخبر عنتس مانساتس جيت بناخيه ( بناخيه المقصود به حفيده ) ونشدني عنتس وقلت هي بخير وطيبه ورد فيتس قصيده بكيت منها انا وعزام هالمره فهيد وقف بعصاه .. وفارس اعطى رجلينه للباب .. وماسك شماغه لايطيح ويضحك .. والشايب يلحقه .. ماوصل للباب الداخلي غير يشوف غبار سيارة فارس الشايب فهيد – ماعليه يالمخنز وين تبي تذلف والله اني في قفاك ( تهديد ووعيد بالبدوي ) اما فارس في سيارته ويالله يسوق من الضحك .. دق جواله وهدت موجة الضحك ناظر في الرقم .. رقم ابوه .. خاف لايكون العلم وصل ابوه .. بس مستحيل يوصله بهالسرعه فتح الخط وتحنحن – هلا يبه ضاحي – انت وينك فارس – توني طالع من بيت عمي سعد ليه وش تبي طال عمرك ضاحي – انا في الدوادمي توني ظهرت منها ومعي بنات عمك ابيك تروح وتشتري خمس أسره وتحطها في الملاحق اللي تابعه للبيت فارس اللي استانس ان بيكون في البيت جو بنات .. لانه تمنى ان يكون عنده خوات والحمدالله ربي عطاه على قدر نيته .. ودائم يروح لبيت عمه سعد عشان جو البنات يحبه ويستانس فيه – ازهلها ياابو محمد ماطلبت متى بتاصلون انتم ضاحي – بعد ساعه ونص ساعتين بالكثير فارس – ابدن مايجن غير وكل شين زاهب ضاحي – فمان الله اجل فارس – فمان الله | ||||||||
|
| |
|
23-09-11, 12:56 PM
| #14 | ||||||||
| مراقبة عامة ومشرفة منتدى الروايات المنقولة
| في سيارة صقر اللي كانت جيب لكزس راكب ضاحي وصقر اللي يسوق .. والبنات ورى وضحى وشيخه ونوره اما ساره وهند في المرتبه الأخيره .. ومحمد معه الاغراض حقتهن ضاحي بوناسه لردتهن معه – يالله انك تحيي بنات اخوي ناصر الله يبيحه ويسكنه الجنه وضحى اللي ردت – الله يجزاك خير ضاحي ويحس اهمومه انزاحت بردتهن معه .. ناظر في صقر ولده اللي يسوق وهو ساكت ونظارته الشمسيه فيه .. وفي راسه تخطيطات وش كثر شيخه وتحس انها مربطه من عقب كلمة وضحى ولا هي ماتبي الرده – ومن هناك عايف رجعتنا بعد غير الشايب صقر رص يدينه بقوه على الدركسون .. وضاحي صكت فتره – انا عارف انتسن تحسن بالغبن والقهر ولاني بلايمتسن وانا عمتسن بس ابوي فتره ويرضى انتن تعرفن تفكير الكبير والأوليين قلوبهم قاسيه ماتلين غير لاشابوا وجدتسن صدقني بيرضى مير حنا اللي غلطنا والغلط مني انا اللي ماجبتسن من مات اخوي واحتريت هالسنين هاذي صقر بقهر – انت ماغلطت ياابوي شيخه انقهرت من كلامه – انت كل شي تحطله تبرير لاتحسب اني بسكت في الحق لا ابوك غلطان وعمك وجدك بعد صقر ضرب فرامل ووقف السياره على جنب .. والكل ارتاع غير شيخه .. وضاحي يدعي ان الله يستر مالقت ترنقش غير هالحمقي .. محمد سفط وراهم لانه كان يتبعهم صقر نزل وفتح الباب اللي عند شيخه بقوه وناظر فيها – دواتس عندي والله انتس تحرمين على الرجال غيري ولا تضوين بكره عندي وخلني اشوف هاللسان يوطوط شيخه بعصبيه وغبن وقهر – تخسي ثم تخسي ,, ونزلت من سيارته وجلست على الارض بقهر وبعناد – وهه وهاذي جلسه ولاني بقايمه غير لين تردوني للدوادمي ووالله ثم والله ماارجع معكم دخل على ضاحي بن سعد المكتب العسكري وهو يلهث – ياطويل العمر قدرنا نحصل صالح الواصل ضاحي بفرح وقف من كرسيه – فذمتك العسكري انبسط لبسطة نقيبه – ايوالله اني صادق والجماعه حقين الاستخبارات قالوا متى تبون تقبضون عليه ضاحي جلس وهو مبتسم – لا عاد متى نقبض عليه شغلنا مو شغلهم ( ناظر فيه) انت بس اخذ عنوانه بالضبط وكثفوا المراقبه عليه واعرفوا مع من يتعامل وكل شي عنه وبإذن الله مايمر هالاسبوع الا وهو مقيد في السجن عندي وانا اللي بتولى هالكلب وان ماشربت من دمه مااكون ضاحي محمد اقترب منهم – انتم وش فيكم وش صار ضاحي تعوذ من إبليس ونزل ونزلت وضحى والبنات وضحى بقهر – فيه ان اخوك هذه بيسوي علينا قوي وبيفرض عضلاته بس على من انت وإياه حنا بنات ناصر لحمنا مر واللي يرشنا بالماء نرشه دم محمد مسك ضحكته على كلامها .. قرب ضاحي ( ابو محمد ) منهم واتجهه لصقر وضربه كف .. الجميع كلهم استغربوا .. وببساطه هالكف مايأثر على واحد مثل صقر بس سكت إحترام لأبوه – انت بتضيم بنات اخوي وانا حي صقر اتجهه على السياره وركبها من دون كلام .. واللي في راسه يطبخ وبيسويه لو على قص رقبته .. بس وين بتروحين من صقر ضاحي ودمعته نزلت والكل استغربها – رجلي على رجلتس وانا ابوتس ويالله ارواح يم الدوادمي عوّدنا محمد مط عيونه – ابوي من صدقك ضاحي – ايه من صدقي ضيم بنات ناصر من ضيمي وانا علمتكم شيخه من سمعت كلام عمها وقفت ونفضت بشتها .. وقربت اله وحبت راسه وبوناسه من اللي سواه – خلاص ياعمي عشان علمك اللي رد كرامتنا برجع معك للرياض ولا انا حالفه ماارجع معه عقب إهانته إلي ضاحي – ماعليتس من صقيران هذه دمه حامي ومايحاسب على كلمته انا بوريتس الشغل فيه وضحى بدفاع – عمي بعد إذنك حنا محنا بحاجتكم ان كان ولدك كل شوي يبي يهينا ونسكت ضاحي – لاتخافن وانا عمتسن هذه مهبول ولا يدري عن اللي يقوله وانتن تبن تعيشن وتجلسن في بيت عمتسن مب بيته اتجهه لسيارة صقر وتكلم معه شوي .. ونزل صقر واذ مفتاح سيارة محمد ضاحي – يالله يامحمد روحنا انت اللي بتسوق فينا محمد بسخريه من اللي يصير – روحنا هه يالله اركبن بنات عمي ناصر تفضلن شيخه تمر من عنده وتناظره بنص عين .. وتركب وتصك الباب بقوه .. ومن زود القوه صقر سمع صكة بابه في سيارة محمد وسبها بقهر في سيارته وبصرخه – جعل ربي يكسر راسك محمد كاتم ضحكه على اللي قاعد يصير .. وعارف انها مستقصدتها تبي تأذي سيارة صقر في بيت ضاحي بن فهيد البيت كله ربكه .. وفارس واقف على راس العمال يدخلون الأسره والمفارش للملاحق اللي تتكون من غرفتين ومطبخ ودورة مياه نايف سمع الضجه وطلع يشوف وش صاير ناظر العمال بنص عين – وش صاير فارس بأمر للعامل – لا حطه على الجنب الثاني ( ناظر في نايف ) فيه ان بنات عمي ناصر بيجن وقاعد ارتب المكان لهن نايف ضحك بسخريه – ومالقى يرتب إلهن المكان غيرك فارس ناظره بنص عين – ليه وش فيني نايف – لا سلامتك مافيك شي فارس انقهر منه – تكلم كلام ينفهم موب تخشخش بكلامك مانعرف وش تقصد وبعدين اسمع بعطيك نصيحه لوجهه الله وبما انك محسوب علي اخو إذا بتقعد بهالاخلاق صدقني يا نايف لاتخلي العالم كلها تكرهك وتنفر منك اسمعها من اخوك اللي اصغر منك بس والله ان حتى الطب خساره فيك ( وطلع برى للعمال اللي خلصوا تركيب ويحاسبهم ) وقف نايف فتره من الوقت .. بعدين طلع للمستشفى وهو يفكر في كلام فارس طول اليوم كله المغرب \ بيت ضاحي بن فهيد وصلوا البنات وعمهن .. وكانت منيره وفارس وسعد والاطفال خلود وخالد في إستقبالهم نزلت شيخه من السياره وخواتها وراها .. مرها صقر وناظر فيها بنص عين ضاحي قرب منهم ومسك وضحى بيدها – ياحي الله بنات الغالي اقلطن اقلطن وانا عمتسن البيت بيتسن فارس كان يناظر في البنات ويبتسم إلهم .. وسعد نظراته جامده يتفحصهم .. منيره نزلت من درج المدخل وتوجهت لهم تهلي وترحب .. سلمت عليهم وحده وحده .. وكان سلامها حار .. حتى ان دمعتها نزلت يوم تتذكر ابوهم ناصر اللي كانت تحبه كأخ لها وولد عم .. ويحبها وتحبه ضمت البنات بقوه وخصوصا وضحى اللي مستغربه من سلامها القوي فارس يبتسم من امه – بس يمه لاتقلبين فلم هندي ضاحي يناظر فيهم ومثمن لمنيره إستقبالها الرائع والحلو إلهن ضاحي – حياتسن حياتسن يابناتي صقر ومحمد سبقوهم على داخل .. وفارس وسعد قربوا منهن سعد – اخباركم يابنات ردت عليه وضحى – بخير فارس بروح مرحه – اعرفتسن هاذا سعد ( ويأشر عليه ) العمر 27 سنه جامد شوي بس مشقلب طيارات ههههههههههههههههه ( ويضحك ) الكل ناظر فيه .. قام يرقع وأشر على نفسه - وانا محسوبتسن فارس بن ضاحي العمر 24 سنه اخر سنه في جامعة الملك سعود تخصص إدارة اعمال ابتسمن البنات على خفة دمه وناظر في وضحى – وانتي وش اسمتس وضحى ببلاهه – انا فارس بضحكه – لا جدي اللي وراتس كلهم التفتوا يدورون الجد .. وقعد فارس يضحك .. وابوه ناظر فيه بنص عين وضحى ابتسمت لخفة دمه وشافت ان عمها بيهاوشه وقطعت السالفه – اسمي وضحى ( وهاذي تأشر عليهن وحده حده ) هاذي شيخه وهاذي ساره وهاذي هند ناظر فيهن وحده وحده وهو يبتسم إلهن .. وبدورهن إبتسمن له عدى شيخه رفع حاجب يوم ماشافها إبتسمت له شيخه تناظر عمها – وين المكان اللي راح نرقد فيه انا تعبانه وابي ارقد ضاحي يكلم فارس اللي عينه على شيخه – جهزت اللي قلت لك عليه فارس ناظر في ابوه بعدين رد نظراته لشيخه – ايه يبه جاهز ضاحي – اجل يالله ناد بابو والشغالات ونزلوا الأغراض حقت بنات عمك معه وانتن يابناتي اقلطن وراتسن لين هالحين في الحوش كلهم دخلوا للبيت والشغالات وبابو يدخلون الأغراض في الملحق حق البنات صقر ومحمد كانوا جالسين على الجلسه الارضيه في مجمع الصالات حقت البيت وفي عيونهم كلام قوي منيره دخلت البنات في الصاله الثانيه وقدمت إلهن القهوه والمقاديع وترحب فيهن وباين انها مبسوطه فيهن بالحيل البنات حسن براحه لها خصوصا شيخه ووضحى اللي همست لأختها – شكلها اجوديه مرة عمتس شيخه بسخريه – والله مايندرى عنها يقولتس المثل لاتامن الحبل يصير حيه والله مدري وضحى – فكينا من خوفتس هالحين اهم شي ان الله يسهل إلنا الأمور شيخه ناظرت فيها بقهر – لوانتس رافضه انّا نرجع تسان يمدينا في بيتنا واخذين راحتنا ومفتكين من الغثا عيال عمتس اللي ولا واحد مرتاحتلهم وضحى بطيب – حرام عليتس فارس اجودي شيخه بقهر – اكره هالطيب اللي مدهورنا لو نسلم منه تسان ما أنكل حقنا نوره تهمس لهم – انتم وش تقولون فضّحتنا في الحرمه شيخه بصوت عالي – عجوز لاراحت ولاجت نوره ووضحى وهند وساره مطن عيونهن وإسكتن منيره بطيب تتغاضى عنها – يالله انك تحيي بنات المرحوم ناصر وضحى تولت الكلام – الله يحيتس ياعمه شيخه وقفت – انا ابي اروح ارقد على مقامي من غبشه والطريق اتعبني منيره وقفت – ابشري وانا امتس اروحتسن معي القسم حقتسن جاهز واخذن راحتسن فيه عيال عمتسن مايطبون هالمكان ولا يعرفونه شيخه تهمس لنوره اللي وقفت جنبها – بعد مابقى الا هيه تسان اكسر كراعينهم هاذا اللي ناقص نوره وهي شاده على براطمها – اششششششش خلي هالليله تعدي مشن وراها متجهات على القسم حقهن .. اللي فرجتهن عليه منيره .. واللي فيه ساره يوم شافت الأسره اللي متوزعه على الغرفتين والتسريحات اللي موجوده مثل ماتمنى شهقت من الوناسه شيخه مسكتها وقرصتها .. وهند انبسطت على المطبخ اللي باين ان فيه مالذ وطاب ومارضت تطلع منه .. ونوره ووضحى يتفرجن على المسخره اللي تصير من خواتهن منيره ناظرت فيهن بحب وطيب – وضحى وانا امتس انتي وخواتس هالمكان منتن بعايشات فيه يوم ويومين لا وانا امتس هاذا التسن وحقتسن واخذن فيه راحتسن وعيال عمتسن لاتحسسوهم انهم غريبين ولا انتن بغريبات عليهم البسن براقعتسن وشراشفتسن واجلسوا معنا عادي ترى هاذي سلومنا وعوايدنا ولد العم حساب الأخو .. ( وناظرت فيهن بحب ) الله مارزقني بنات مير الله يوم رزقني بالبنات رزقني بخمس عساتسن للعافيه وانا امتسن ويشهد الله اني انبسطت فيتسن وانا امتسن لاتعدني غريبه وضحى استانست على كلامها – حتى انا ويشهد الله علي ياعمه اني حبيتس والبنات سكتن يناظرن في كلامها وهن معجبهن غير شيخه اللي قلبها فيه شي ماتدري وش ولاهي بمرتاحه مثل خواتها في الصاله الثانيه .. كان العكس .. كانت فيه نار شابه صقر بعصبيه – بأخذها يعني بأخذها ضاحي بعصبيه – انت صاحي ولا مجنون بنات عمك يالله جن معنا انت تبي يرجعن من حيد ماجن محمد يهدي ابوه .. وسعد وفارس يتفرجون عليهم – يبه الله يهديك المفروض انك تنبسط وتستانس ولدك يبي يربط بنات اخوك عندك أكثر والمفروض انك انت اللي تطلب هالطلب منه بعد مو هو ليش مكبر السالفه الولد يبي يأخذها مافيها شي اصلا المفروض تستانس ولا والله ام لسان هاذي من بيجي يدورها عندك ويفكر يتزوجها ضاحي قعد يفكر في السالفه اكثر واكثر .. وشاف ان عياله هم الصح .. البنت باين عليها عوباء ماتصلح غير لصقر .. ( ناظر في صقر ) بس المشكله صقر نار وهي نار = إنفجار ضاحي – الله يوفق ويسهل الأمر اللي فيه خير صقر رفع حاجب بإنتصار ومحمد إبتسم له بغرور فارس وقف – ممكن اعرف وش سبب التصميم اللي في عيونك ياصقر والله ان هالنظره ماذكرتني غير بطير سطام اللي اشتريته منه ولعبت عليه صقر مط عيونه على فارس .. فارس حط عيونه بتصميم على صقر .. وبعد فتره طلع عنهم فوق ضاحي بتساؤل – وش يقصد اخوك ياصقر صقر يرقع السالفه – خلك من هالورع ماعنده سالفه ,, يبه ابيك بكره تكلم البنت ماابي هالأسبوع ينتهي الا وهي عندي ومانبي عرس ابي اتزوجها بعد قبل جدي لايدري وتصير مشكله ضاحي اتكى على المركى اكثر – نشوف سعد ضحك نص ضحكه وقام .. هالحين بس وضحتله السالفه .. السالفه فيها تحدي واضح بين محمد وصقر والضحيه بنات العم .. نفس سالفة صقر وسطام .. اللي محمد بعد تحدى صقر يلعب عليه ويشتريه منه برخيص وشراه بأرخص سعر .. بس بعد فتره عرف ان صقر مايرضى بالحرام .. وعطى سطام السعر الأصلي لانه مايرضى يغش أخوه المسلم ( من غشنا فليس منا ) .. عرف ان اخوه فيه بذرة خير .. بس بتطلع هالبذره على بنت عمه المسكينه اللي يوم طاحت طاحت في شخص ماشاف حد في حياته اكثر منه هيبه وقوه وعصبيه | ||||||||
|
| |
|
23-09-11, 01:01 PM
| #15 | ||||||||
| مراقبة عامة ومشرفة منتدى الروايات المنقولة
| في الملاحق وضحى دخلت الحمام .. وساره على التسريحه تناظر شكها ووتتدلع بمليون حركه .. وهند في المطبخ وتأكل .. ونوره تتفرج على الجناح أكثر وتفتش فيه.. اما شيخه كانت سرحانه ولبعيد نوره نفضت يدينها من التفتيش يوم ماحصلت غير غبار – اففففففف الله يعين على غبار الرياض ناظرت في شيخه اللي جالسه وهي سرحانه وجلست عندها – شيخه شفيتس شيخه إلتفتت إلها – مدري بس قلبي مقروص احس اني مااني مرتاحه هنيا ساره اللي نطت عليهم وهي فاتحه شعرها وبوناسه – بالعكسسسسسسسس آآآآآآآآآآآه يازينتس يالرياض والله انها تجنن وشبابها يجنن مو مثل شباب الدوادمي شيخه ناظرتها بنص عين مو رايقه إلها ,, نوره عصبت منها – وبعدين يااختي على المراهقه حقتس عيب استحي كلنا راهقنا مو مثلتس تبين تفشلينا ويوقلون بنات ناصر ماتربن شيخه وكأنها تذكرت ووقفت إلها ومطت شعرها وبعصبيه – حنا من يوم جينا هنيا ماشفنا غير عيال عمتس المصرقع إن شاءالله انهم هم عشان ادفنتس في محلتس وانتي حيه ساره نزلت دموعها بخوف – لالالالالالا اصلا من قال ماحبيت احد انا بس شدني الجمال بس شيخه وتنفضها – من فيهم زين محمد الشايب العايب وصقيران اللي وجهه كنه وجهه الحصني وكله مكاريش ومشوخ والباقين واحد طوله يروع ولاينتشاهد والثاني الله بالخير باين انه كمخه نوره وهي تكتم ضحكتها – حرام عليتس ياشويخ حطيتيهم كلهم ماينتشاهدون ومافيهم الزين ساره فكت نفسها من يدين شيخه .. وركضت بعيد عنها شيخه بعصبيه وهي تهاوش فيها – بس اطريهم واقسم بالله ياسويره اني لاخلي ليلتس غبره مثل وجهتس ساره قعدت تبكي اخذت برقعها وجلالها لبستهم وطلعت في الحوش .. هم كذا خواتها يحبون تكون المستضعفه في يدينهم انا .. فجأه مطت عيونها للي شافته .. اللي تشوفه حلم ولا علم .. سبحآن الله في بيت سعد بن فهيد موضي تلبس عيالها بجايمهم .. اندق الباب عليها – اتفضل دخلت عليها ريم وهي تبتسم – مانمتي انتي وعيالتس موضي ابتسمت لها – لا تعالي ,, وزين انتس جيتي ابيتس في موضوع ريم سكرت الباب وقمزت ع سريرها – يالله قولي شوقتيني موضي تلبس زايد بجامته وهو يتذمر منها عصبت موضي – ترى بضربك زايد – يمه مااحبها هاذي البجامه تجيبلي الحر موضي – لا احلف ياشيخ زايد بسؤال عفوي – يمه وينه ابوي ( وعينه بعينها ) .. انقهرت موضي وعصبت عليه – تبي تروح إله إذلف قلعتك مافيه حسوفه لاعليك ولا على ابوك ريم اقتربت من زايد وضمته – موضي الله يهداتس هذا كلام ينقال موضي – هالعيال ياريم شيبوا راسي اظاهر انهم يبون اقول حقيقة ابوهم ووين يكون وارتاح ريم بحنان لاختها ولعيال اختها – لا اصحي يريم حرام عليك وشذنبهم موضي وهي تدمع – الذنب ذنبي يوم انضربت على راسي وماحبيت غير ابوهم ولاتمنيت اتزوج غيره آآآآآآآآآآآه بس ريم تكلم زايد – حبيبي روح نام بس قول بسم الله وراك مدرسه زايد يناظر امه وبدموع ماليه عيونه – ماما سامحيني ماراح اسأل عن بابا مره ثانيه موضي اقتربت منه وضمته وهي تمسح دموعها ودموعه .. وسط حزن ريم عليهم – خلاص يمه لاتزعل روح نام عشان تصحى بكره بدري ونشيط زايد باس خد امه وراح ينام .. جنب اخوه اللي كان هادي ويناظر فيهم .. موضي ابتسمت لنواف – وانت مافيه بوسه حق الماما نواف ركض لها وباسها بقوه – احبك ماما موضي بحب لهم – وانا يمه احبكم بقووووووووه ريم ابتسمت لهم – لا كذا زعلتوني وانا مالي بوسه زايد ونواف بقوه هجموا عليها وهي تضحك لهم .. ويالله فككتهم موضي وخلتهم ينامون غصب وردت لريم – ريم ابي اسألتس ريم – اسألي موضي – اليوم كلمتني مريم اخت عيسى وتقول ابوهم يبي يشوف العيال ريم رفعت حاجب – عجيب وانتي وش قلتي إلها موضي بقهر – قلت وين إن شاءالله يبي يشوفهم يباني اودي عيالي سجون يعرفون حقيقة ابوهم ريم بقهر – آآآآآآآآآآآه الخايسه لو انا اللي مكلمتها موضي بعصبيه – لا يهمتس غسلت شراعها وقلت وانتي ماسألتي عن عيالتس بعد همزتها في العلم ريم بقهر وغبن – والله انها ماتستاهل ظفر محمد ولد عمي آآآآآآآآآآآآه يالقهر بس فيها يوم ابتلى فيها بس مساكين العيال اللي جو بينهم تورطوا ببغض محمد ومريموه لبعضهم موضي – ياعيني ياخالد ولود والله اني شفقانه عليهم الله يعوضهم بالعوض الزين والصالح بيت سلطان بن عيسى مريم بقهر وهي تكلم عيسى – ياعيسى والله انها حيه من تحت رفضت وش اوي إلها انا عيسى بقهر وغبن – طول عمرها كلـ ..........ه وبيظل قلبها أسود الله يسود ايامها هالتعبانه بس تصبر إن شاءالله بيجيني عفو واطلع واعلمها من يكون عيسى مريم وبألم نابع من حقد – عليك فيها وياليتك تطين عيشة آل قاسي واحد واحد من صغير لكبير اللي سواه لنا مو بسيط يحسبون عمرهم في برج ممشوق عالي هه بس وين بيرحون عنا عيسى يزفر هواء كاتمه – المهم انا بتصرف في هالسالفه بمعرفتي فمان الله مريم – فمان الله يااخوي وانتبه على عمرك سكرت الجوال من اخوه .. ورجعت تجلس عند امها ام عيسى – وشلونه عيسى مريم – مقهور ياحبة عيني عسى من قهره وضامه للقهر والضيم واليوم الأسود اللي نشمت عليهم فيها ام عيسى بغبن – انا بأخذهم وبوديهم لأبوهم وابي اشوف الحثاله وش بيقدرون يسوون مريم – وانا معتس بكره نبي نروح إلهم يطلعون عيالنا بالطيب ولا بالغصب اخذينهم لأبوهم اخذينهم يحمدون النعمه انهم لين هالحين عندها هالجربانه بيت ضاحي بن فهيد فجأه مطت عيونها للي شافته .. اللي تشوفه حلم ولا علم .. سبحآن الله .. وش هالجمال اللي مر عليها .. وقفت بلا شعور تتبعه بدون ماتحس في عمرها .. ومن دون هو بنفسه مايحس فيها .. وعيونها تتبعه ومو راضيه تفارقه ( المراهقه تلعب دور كبير ) دخل داخل البيت من دون مايعرف عنها أي شي نايف يناظر فيهم – السلآم عليكم الجميع – عليكم السلام مشى بإتجاهم وهو باين فيه التعب – وينه عشاكم تراني جوعان منيره قامت – حاضر يابعد عيني بقوم اخليهم يحطونه وبخليهم يحطون بعد عشاء يرسلونه يم البنات نايف رفع حاجب – وصلوا هه ,, صقر ناظر فيه بنص عين محمد اللي كانوا عياله حوله خالد – بابا الاستاذ يقول خل ابوك يجي محمد بعصبيه ناظر فيه – ليه وش مهبب ضاحي بعصبيه – محمد محمد يناظر ولده بعصبيه – ليش يبني اجي خالد بخوف من ابوه – عشاني ماحفظت القران محمد مسكه بإذنه – وليه ياحمار ماحفظت القران وإستاذك اللي يجيك كل يوم وش يسوي صقر – محمد خلاص عاد نايف قام واخذ خالد من ابوه اللي قعد يبكي – محمد خف حرام عليك اللي تسويه في عيالك خلود اقتربت من جدها ضاحي – جدو انا اخاف من بابا ضاحي بقهر – حسبي الله ونعم الوكيل ,, ماعليتس وانا جدتس ابوكم يحبكم مير فيه نعرة ياغلي لو تظهر محمد قام وهو يزفر بعصبيه صقر – تعال العشاء محمد – ماابي شي ولا زفت ابي انخمد بس اليوم الثاني \ الصباح .. بيت ضاحي الملاحق وضحى صحت وتجهز الفطور .. دخلت عليها شيخه المطبخ – اففففففف ماتعودت على الجلسه لواني في الدوادمي كان يمديني بسطت بسطتي وشفت رزقي وضحى بتريقه – انسي البسطه في الرياض عيال عمتس حنش وضبعان شيخه وكأن الفكره عجبتها – ابي ابسط هنا ولا شرايتس نقعد عاني عليهم ويذلونا في اللقمه وضحى تركت اللي بيدها وناظرت في اختها – اسكتي ياشيخه انا بعد افكر في هالأمر كل شي فجأه تركناه ورحنا من بيكد علينا شيخه اتجهت تأخذ لها كوب – اصبري ايام وبشوف حل لازم نبلغ عمي ماحنا بساكتات حنا مانرضى بالمهانه انطق الباب عليهن .. راحت شيخه تفتح الباب ,, شافت منيره داخله عليهن منيره – السلام عليتسن وانا امتسن البنات – عليكم السلام وضحى – حيتس ياعمه .. وشيخه واقفه عند الباب تحتريها وش تقول منيره – امس قلت انتسن جايات تعبنات ولا رضيت انتسن تجن وتعشن مير اليوم حتى عمتسن يحتريتسن للفطور شيخه – واخزياه وتبينا نأكل مع عيالتس منيره بحب – وش فيهم عيالي عيال عمتسن واخوانتسن وانا ماقلت اكلوا معهم مير ماانتن بحابسات عميراتسن بهالملحق تعالن داخل ابي أكل وإياتسن انا من زمان اتمنى ألتم مع حريم أكل الحريم إله طعم زمان كانت عندي مريم مير الله يصلح الحال وراحت الله يستر عليها وهالحين انا ابى اكل معتسن وضحى بطيب – إن شاءالله ياعمه بنجي ,, وانا بجي معتس بعد منيره – هاعجلن وانا امتس عمتسن يحتريتسن يبي يعلمتسن حتى بعلمن عنده قبل يروح لشغله بيت ضاحي بن فهيد \ البيت صحى فارس وشماغه على كتفه وملزمته في يده.. اتجهه لأبوه وحب راسه – صبحك الله بالخير يبه ضاحي اللي ترك الجريده وناظر فيه – صبحك الله بالرضى ,, قايم بدري فارس – عندي محاضره بعد ساعه بس قمت ابي افطر معكم اليوم ( ناظر يمين ويسار ) وين امي ضاحي – امك راحت تنادي بنات عمك وانت يالله افطر بسرعه قبل لأيجن ماابيك تقعد معهن انا طردت اخوانك قدمك فارس ضحك – ههههههههههههههههه من طردت ابوي اتخيل انه صدق وطردت صقر ضاحي عصب – ايه اطرده يالمخنز ليه وش فيه صقر فارس يسكت عن الضحك – لا مافيه شي ,, وينهن بنات عمي بصبح عليهن ضاحي – انت اكل واذلف اباهن يجن مايستحن منك فارس بإبتسامه – افا تطردني ياابو محمد وبنات عمي خواتي دخلت منيره ومعها وضحى اللي يوم شافت فارس استحت بس مابينت – السلام عليكم ضاحي وفارس – وعليكم السلام منيره – انت وراك هنيا مارحت فارس – افااااااا عاد هاه يرضيتس يابنت عمي ( قال بنت عمي لانه لين هالحين ماعرف اسمها ) من اليوم ابوي يطردني وانا بالعها وساكت تجي تكملها علي امي وضحى ابتسمت إله – حرام عليكم فارس مايستاهل فارس ضحك – يعيش الحق الشهاده لله اني مااعرف اسمتس وانتي تعرفيني واحرجتيني انا تراني انسى بسرعه وضحى تبتسم إله – انا وضحى فارس – انا شكيت انتس وضحى بس عاد مابغيت اغلط وافشل عمري ,, ( وقف ) يالله انا بروح تبون شي ضاحي – ماافطرت فارس – بخلي بنات عمي ياخذن راحتهن ابفطر في الجامعه وضحى زعلت عليه وبنخوه – والله ماتروح غير لين تفطر ولا بطلع اخذ راحتك انا بتقهوى قبل الفطور لاني ماافطر غير لين اتقهوى واكيف راسي فارس جلس وهو يبتسم – مدامتس حلفتي هاذي جلسه لان قرصان ام محمد ماتنتفوت ( وفطر ) منيره جلست هي ووضحى عند القهوه اللي قريبه من سفرة الفطور .. وفارس يفطر ويسمع لسوالفهن ضاحي – وين خواتس ياوضحى وضحى – جايات ياعمي شيخه تصحيهن وبيجن سوى وضحى خذت الترمس من مرة عمها وقعدت تقهويهم عمها ومرته .. وصبت لها فنجال فارس – الا بسألتس ياوضحى وضحى – اسأل فارس – فيه احد من خواتس يدرس وضحى – ايه انا ابي اتكلم مع عمي بهالخصوص نوره في الكليه وساره وهند في الثانوي ساره ثالث ثانوي وهاذي اخر سنه وهند ثاني ثانوي فارس – طيب سحبتوا ملفاتهن وضحى – لا ماسوينا شي انا كلمت مدرسة خواتي وعلمت المديره بالسالفه بس عاد نوره بيسجلون عليها غياب في الكليه ضاحي – ايه والله المشكله نسيت سالفة دراستهن وراتسن ماعلمتني وضحى بحزن – هم عيالك ياعمي خلوا فيها علم اخذونا بشراع ومجداف وغصب الا نروح معكم امس ضاحي – والله اني نسيت وانا عمتس العذر والسموحه دخلت شيخه ومعها نوره وهند وساره ,, هند وساره كانن معجبات في البيت حق عمهن فارس اول مشافهن وقف – يالله اسمحولي وشوي لارجعت ياوضحى ابشوف معتس هالموضوع لازم نسحب ملفاتهن شيخه اللي قربت منهم وتبي تعرف السالفه – السلام عليكم الجميع – عليكم السلام شيخه – وش السالفه فارس ناظر فيهن وحده وحده – صباح الخير يابنات عمي البنات بحياء – صباح النور فارس مشى وتاركهم وضحى – السالفه اني اعلم عمي بدراسة خواتي شيخه – صح نسينا امر الدراسه نوره تجلس – انا مانسيت كلمت وحده من البنات وعلمتها تعتذر عني ( ناظرت بعمها ) لازم انقل ضاحي – اكيد خلن لين فارس يجي وبنروح انا وإياه ونجيب ملفاتسن شيخه – مابسلمينكم إياها غير بحضور البنات ياعمي منيره – خلاص اخذ البنات ياضاحي ضاحي – خير إن شاءالله ,, المهم إجلسن بعلمتسن بعلم عندي وضحى – خير ياعمي شيخه ونوره وهند وساره يترقبن عمهن ضاحي ناظر في بنات اخوه وبالأخص شيخه – اسمعني وانا عمتسن انا ويشهد الله علي اني ابيتسن ماتفارقني ويوم المنى عندي يوم كل وحده تضوي بيت رجلها وتستانس معه ( ناظر في شيخه شوي ) شيخه يابنتي صقر خطبتس مني صدمه ,, والصدمه الأكبر كانت منيره اللي ماتعرف عن هالسالفه شي . . ( ترقبوا بإذن الله البارت القادم ,, مع مفأجاه من العيار الثقيل ) | ||||||||
|
| |
|
24-09-11, 01:35 PM
| #19 | |||||||||
| مراقبة عامة ومشرفة منتدى الروايات المنقولة
| اقتباس:
الشكر لك حبيبتي على مرورك وإن شاء الله راح أكمل نقلها | |||||||||
|
| |
|
24-09-11, 01:49 PM
| #20 | |||||||||
| مراقبة عامة ومشرفة منتدى الروايات المنقولة
| اقتباس:
الأروع تواجدك يسعد ربي المتحمسين ومن أجل هالحماس راح أنزل الفصلين الخامس والسادس | |||||||||
|
| |
|
| الكلمات الدلالية (Tags) |
| مبدعه سهومه, محمد وموضي .نايف وساره.سلطان ونوره, شبكة روايتي الثقافية, فارس وهند, فهيد ووضحى, قصة صقر وشيخة |
| أدوات الموضوع | |
| انواع عرض الموضوع | |
|
|
1611Likes
.png)
العرض العادي
