ضاعت حياتي بلحظة قصة واقعية / للكاتبة ReRez ، مكتملة

[لامارا]

	بسم الله الرحمن الرحيم السلام عليكم ورحمة الله وبركاته قوه بنات والله ولهت عليكم واااااايد وااااايد .. ... وكل عام وانتوا بخير ... بشكر كل اللي تابعوني بقصتي الأولى ( الفتاة الهاربه ) مشكورين حبايب قلبي و لو ماشفت منكم التشجيع جان مافكرت انزل قصة ثانية .. واشكر بعد اللي تابعوني بصمت وحابه اشوف تعليقاتهم الحلوه اذا تابعوني بهالقصه بعد .. وهي بعنوان ...(( ضاعت حياتي بلحظة )) ... قصة واقعية قصتي الثانيه غير عن الأولى .. واهي صارت حق وحده من رفيجاتي وقصتها وايد مأثره فيني وحازه بخاطري فقلت اكتبها لكم .. ( طبعا فيها وايد اشياء انا راح ازيدها بس فكرتها واكثر المواقف صارت صج ) ومابي ينعاد معاي اللي صار بقصتي الأولى فبحذر من الحين .. ما أحلل اي احد ينقل قصتي سواء هذي أو اللي قبلها ومايكتب عليها اسمي ReRez واللي ينقلها من غير اسمي مو محلل وربي ماراح يوفقه واهو يبوق تعب وأفكار غيره .. هالرواية اهداء الى M (( بطلة القصه وبسميها روان )) وبقولج اذا بهالدنيا في ناس مرتاحين تره نسبتهم قليله ونسبة 90 % ناس عندهم هموم ..بس الشاطر اللي يعرف يتعايش معاها .. و ماعلينا الا انقول الف حمدلله على كل حال .. نبدي ... ------------------------------------ أي حوارات بالانجليزي لا تدققون عليها لأن انا تخصصي كمبيوتر مو انجليزي بس الانجليزي لغة احبها لا اكثر ولا اقل وتره كتبت الترجمه حق اللي مايعرف انجليزي بس عاد لاتظحكون .. لأن الحوارات الانجليزيه لو حولناها عربي تطلع تظحك يللا نبدي ...

[لامارا]

** البارت الأول **

- بريطانيا : جامعة كامبريدج-
( ممر من ممرات الجامعة )

بدر : زين كلمي امج قوليلها تسوي مقدمات حق ابوج وبالعطله بحيل الله نروح الكويت واطلبج منهم ونرجع اهني نكمل الدراسه واحنا متزوجين وبشقتنا وتطلعين من مغثة السكن
روان : لا بدر والله لو قلت حق امي او حتى لمحت لها بتحط في بالها اشياء انا في غنى عنها .. خل نرجع وانت قول شفتني اهني وخطبتني عادي .. مابي المح لها

(Matt) :
( يركض ياي لهم ) wait Bad I wanna talk to you
//مات : لحظه باد انطر بكلمك//

بدر :
why do you insists on make me a bad person for thousand time .. my name is Bader , not bad
//بدر : انت ليش مصر انك تطلعني انسان سيء؟؟ للمرة الألف اسمي بدر مو باد//

روان : ( تظحك ) قاعد يدلعك اشفيك
(Matt) :
come on , Bad
//مات : يللا عاد باد//

بدر :
If you know the meaning of your name in my language you will be miserable
//بدر: بس لو عرفت معنى اسمك عندنا جان صرت تعيس//

روان : ( تظحك ) اي والله مسكين من اول ما انولد مات

(Matt) :
please talk in English
//مات : تكلمي انجليزي لو سمحتي//

بدر :
My fiancee talk in any language she want .. Ok
//بدر : خطيبتي تتكلم بأي لغة تبيها فاهم؟؟//

(Matt) :
ok .. ok I'll talk to you latter
//مات : خلاص خلاص أكملك بعدين// ( راح وخلاهم )

روان : مسكين كسر خاطري جان خليته يقول اللي يبيه اول
بدر : خيولي .. يكلمج بهالاسلوب وتبيني اظحك معاه؟؟
روان : ماقال شي مسكين
بدر : بلى قال .. وبعدين مابيه يطيح الميانه تره احنا عرب وانغار
روان : ( تبتسم ) زين دام غيره ماقدر اقول شي .. الحين لازم اروح محاضرتي اشوفك بالبريك
بدر : روانووو .. لا تعطين الشباب ويه أي احد يسألج سؤال قولي ماعرف كسلانه مادرست زين؟؟
روان : ( تظحك ) زين و خل يقولون العرب نحس .. جنه احنا ناقصين تعليقاتهم يللا باي ( تدخل الكلاس )

( -روان- بنت حلوه عمرها 24 شعرها اسود لي جتفها حنطاويه وعيونها كبار وحلوين لونهم عسلي .. تدرس طب وهذي ثالث سنه لها بالجامعه.. -بدر- شاب عمره 26 هم حنطاوي بس اهي افتح منه .. حنجه فيه شقه (مقسوم) مخليه ملامحه احلى ودايما لحيته ديرتي بس يحددها .. هذي هم ثالث سنة له وبنفس تخصص روان وتعرف عليها بالبدايه لمدة سنة كان زميلها بعدين صار يحس بغيره اذا احد قرب منها وكلمها حتى لو عن الدراسه .. فاعترف لها ان يحبها واهي بعد كانت تحس انها تحبه بس قالتله ماتقدر تخون ثقة اهلها واذا يبيها خل يخطبها )

- بالقاعه روان كل شوي تطالع الساعه ملت من المحاضره –
روان : ( بقلبها ) يللا باقي شوي وتخلص المحاضره بطلع لاعت جبدي

(Dr David) :
Tomorrow I want to see a summary for chapter 6 .. I don’t accept any excuses
//د . ديفيد : باجر أبي منكم ملخص للفصل السادس .. وما اقبل أي عذر//

( خلصت المحاضره اطلعت من القاعه ولقت بدر ينطرها )

روان : مابغى يخلص قرقه .. قطيعه اشكثر اكره هالدكتور
بدر : ( يبتسم ) وانتي كله بس تتحلطمين .. اشفيه بعد اشسوه
روان : يقرق قرقه موطبيعيه والماده تلوع الجبد وهم يبينا نقرى فصل كامل يمكن 200 اورقه ونسلمه التلخيص باجر .. جنه ماعندي الا مادته
بدر : ( يظحك ) اهم شي انج ماخذه راحتج وتتكلمين كويتي وطايحه حش بالدكتور لو يفهمونج جان افصلوج
روان : اسم الله علي .. ان شاءالله عدويني
بدر : آمييين وعسى كل واحد يكرهج يموت
روان : لا حرام مساكين خلاص خل نسامحهم
بدر : ( يظحك ) فديت قلبج الطيب
روان : ( تبتسم ) بروح اكلم امي وعدتها ادق اليوم
بدر : بيي معاج بسمع شتقولون
روان : بكلمها بغرفة النت مايرضون تسوي ازعاج
بدر : لا ماراح اسوي شي بس بقعد عاجل واسمع
روان : اي عفيه خلك خوش ولد
بدر : ان شاءالله
( راحو غرفة النت بالجامعه ودقت على اهلها )
روان : ( تأشر حق بدر وتبتسم ) قعد يرن
ام مشاري : الو؟
روان : الو .. هلا يمه .. هلا حبيبتي .. اشتقت لج وايد
ام مشاري : هلا روونتي حبيبتي اشلونج يمه اشلون الدراسه معاج ؟؟
روان : ( عيونها دمعت بس ماسكه بجيتها ) اشتقت لكم كلكم .. اشلون ابوي؟؟ اشلون منول ومشيري والعسل فروس والله ولهت عليهم كلهم
ام مشاري : والله الحمدلله كلهم بخير منول كانت تبي تكلمج بس اهي نايمه الحين .. وفروس صار يمشي
روان : صج؟؟؟ متى؟؟
ام مشاري : من جم يوم يحليله
روان : ( بجت ) والله ودي اشوفه
بدر : ( يعطيها كلينكس )
ام مشاري : يمه لاتبجين كلها جم شهر وتصير عطلتج وتشوفينه ان شاءالله
روان : زين ابوي ومشيري وينهم؟
ام مشاري : مشيري بعد نايم وراهم مدارس .. و ابوج بالحمام بس يطلع يكلمج
روان : ماقدر اطول .. بس بوسيلي الكل وخصوصا ابوي قوليله اني ولهانه عليه وايد .. يللا انا لازم اروح عندي محاضرات
ام مشاري : مع السلامه حبيبتي موفقه يمه
( روان قامت وطلع معاها بدر )
روان : ( دموعها تنزل موقادره توقفهم ) والله ولهت عليهم حيل متى اتصير العطله
بدر : حياتي انتي بس تكلمين اهلج تبجين يعني للحين ماتعودتي ؟؟
روان : ( تمسح دموعها ) لا ماتعودت وماعتقد بتعود ..
بدر : افا.. انا معاج واتقولين ماعتقد بتعود ؟؟
روان : ( ساكته )
بدر : خلاص ماباقي شي عالعطله و ان شاءالله بتروحين وتشوفينهم ونرجع اهني متزوجين و اصيرلج زوجج واهلج وكل شي
روان : ( تبتسم ) ان شاءالله
----
- بالكويت –

ام مشاري : توه سكرته منها عندها محاضرات وماقدرت تطول اكثر .. بس اتسلم عليك وايد وتبوسك ( اقعدت تبجي )
ابو مشاري : زين اشفيج تبجين؟؟ البنت فيها شي ؟؟
ام مشاري : لا مافيها شي الله يحميها .. بس بجت اتقول اولهت علينا .. شكلها تعبت من الغربه
ابو مشاري : ميخالف اهي قدها دام قررت تروح وتصير دكتوره خليها تتحمل الغربه وترجع رافعه راسنا.. متى ايي هاليوم عشان اخذ شهادتها واحطها بعين اخوي أخليه يسكت
ام مشاري : واهو للحين معارض
ابو مشاري : عارض ولا طق راسه بالطوف .. اخاف برد عليه .. البنت بنتي وسفرتها وانا واثق انها بترد رافعه راسي بشهادتها .. ما ارد على احد حتى لو كان اخوي العود
ام مشاري : انا بعد خواتي اشكثر كلموني بس طنشتهم .. خايفه على هالبنت من عيونهم
ابو مشاري : ماعليج منهم .. الله يوفقها يارب ويسهل دربها
ام مشاري : آمين يارب
------
- بريطانيا : جامعة كامبردج-
( اليوم الثاني )

بدر : ها اشلون التلخيص ؟
روان : طلّع عييني .. شوفهم اشلون صايرين؟؟ والله مانمت الا جم ساعه
بدر : ( يطالع عينها ) مافيهم شي حلوين
روان : ( تبتسم ) وين حلوين لونهم احمر يفشلون
بدر : مافيهم شي .. زين عطيني اشوف تلخيصج؟؟
روان : لا مابي يفشل
بدر : وانتي كل شي عندج يفشل؟؟!!
روان : ( تظحك واتطوف السالفه ) وناسه الحين محاضرة التشريح
بدر : الله يعيني بتزوج مجرمه
روان : بدور اشفيك ؟؟ عيل اشلون بصير دكتوره خلني اقوي قلبي
بدر : عيل شربي (ماونتن ديو) أسهل؟؟
روان : شكو؟
بدر : ماتعرفينه؟؟ ماونتن ديو أوي البك؟؟؟
روان : ( تظحك ) اييي عرفته شخبااري منزمان ماشفت الدعاية
بدر : ( يظحك ) زين زين امشي ولاتظحكين بصوت عالي مابي احد يسمع ظحكتج
روان : ( تظحك ) زين
بدر : هي منصجي والله قصري صوتج وانتي تظحكين
روان : ( تحبس ظحكتها ) اوكي
بدر : أهم شي انج معاي بهالمحاضرة عشان اذا طحت غشيان تسويلي قبلة الحياة
روان : ( تطقه على جتفه ) ويعه شنو قبلة الحياة .. وبعدين المفروض انا اللي اطيح غشيانه مو انت
بدر : لا والله؟؟ انتي اللي حدج مستانسه انج بتروحين تشرحين بني آدم حشى ريال
روان : بدر عااد حرام عليك
بدر : ( يظحك ) اتغشمر معاج حياتي .. ادري كلج رقه و أنوثه.. فديتج

- دشو القاعه و اقعدت الدكتوره تعلمهم اشلون يشقون صدر جثة متبرعين فيها من الهند-
(Dr Helena) :
Be careful when you cut the skin .. your hand must be strong and gentle at the same time .. like this .. who wants to try
//د.هيلينا : ديرو بالكم وانتو تشقون الجلد .. ايدكم لازم تكون قويه وبنفس الوقت رقيقة .. بهالطريقة .. منو يبي يجرب؟//

روان :
I do .. please
//روان : انا لو سمحتي//

بدر : ( يبتسم ويطالعها ماسكه المشرط وبتشق صدر الجثه )
روان : ( طالعت بدر وابتسمت ) بسم الله
( بهاللحظه انطق باب القاعه ودش بروفيسور من الادراه )

(Professor Peter) :
Hi ms Browne can I talk to miss al rashed?
// بروفيسور بيتر : اهلا سيدة براون .. ممكن اكلم الآنسة الراشد؟//

- ملاحظه : بره ينادون الناس بأسماء عايلتهم مو باسمهم الأول-

(Dr Helena) :
Sure no problem.. you can go miss al rashed
//د. هيلينا : اكيد ممكن .. تقدرين تروحين آنسة الراشد//

روان : ( اتطالع بدر ) Ok
بدر : ( يبتسم لها ) لاتحاتين شي روحي Good luck.. // بالتوفيق//
بدر كان يطمنها بس بنفس الوقت مستغرب ليش ناداها البروفيسور
بدر : ( بقلبه ) ان شاءالله خير
----
- بمكتب رئيس الشؤون الطلابيه و النفسيه ( البروفيسور بيتر)-
(Professor Peter) :
Have a seat please
// البروفيسور بيتر : تفضلي لو سمحتي//

روان :
( تقعد وقلبها يرقع ) Is there something wrong?
// روان : في شي صاير؟//

(Professor Peter) :
Am afraid there is
// بروفيسور بيتر : اي للأسف //

روان : ( اتطالعه و موقادره تقول شي )

(Professor Peter) :
miss al rashed I have bad news
// بروفيسور بيتر : آنسة الراشد عندي اخبار سيئة//

-------------------------------

[لامارا]

** البارت الثاني **

- بمستشفى يم حرم الجامعة-

روان : ( تحس انها ماتقدر ترفع راسها ) لااا أكيد يجذب .. طلعوني من اهني
بدر : ( يمسك ايدها ) عطوج مخدر هدي نفسج
روان : ( تبجي واهي مغمضه ) بدر انت ماسمعته شنو قال
بدر : ( متقطع قلبه عليها ) حياتي الله يخليج هدي نفسج
روان : ( نامت واهي اتدمع )
بدر : ( يطالع الممرضة )
الممرضة : Don’t worry she will be ok
//الممرضة : لا تحاتي راح تصير زينه//
بدر : ( قعد يمها ماسك ايدها ويمسح على شعرها ) والله ماتستاهلين اللي صارلج اللهم لا اعتراض
بدر : ( دمعت عينه ومسحهم بسرعه ) الله يكون بعونج
الممرضة :
sir you must leave now .. she won't wake up until 6 hour
//الممرضة : لو سمحت يا سيد لازم تروح الحين اهي ماراح تقوم الا بعد 6 ساعات//

بدر : ( تذكر ان عنده امتحان )
ok .. I'll come later .. please call me if she woke up
//بدر : اوكي .. راح ارجع بعدين .. عفيه دقي علي اذا قامت ( سجل لها الرقم على اورقه وعطاها اياها )//
---
( بدر يمشي بالجامعة و يتذكر اللي صار توه )

( كان يحاتي روان لأن طول فترة المحاضرة كان منشغل باله واهي ماردت فراح يدورها بمكتب البروفيسور بس مالقاها اهناك سأل عنها البروفيسور وبكتب الحوار بالعربي )
بدر : السلام بروفيسور .. بغيت اسألك عن الآنسه روان ما ارجعت المحاضرة ماتدري وين راحت؟
البروفيسور بيتر : تفضل اقعد لو سمحت
بدر : ( حس ان في شي صاير وقلبه مو مطمنه ) خير؟
البروفيسور : من شوي اوصلتني اخبار سيئة من الكويت .. وبكل أسف اقولك امها وابوها توفو بحادث سيارة
بدر : ( منصدم ) اشلون؟؟ متى؟
البروفيسور : ما ادري متى صار هالشي بس اول ما كلموني رحت بنفسي وطلبتها وقلت لها الخبر
بدر : زين وينها الحين ؟؟
البروفيسور : للأسف انهارت ووديناها المستشفى التابعة للجامعة
بدر : ( قام ) شكرا بروفيسور
البروفيسور : لحظه .. في شي ماقدرت اقوله لها .. انهارت قبل لا اكمل
بدر : ( يهز راسه مو مصدق ) بعد اكو شي أكثر من جذي؟؟
البروفيسور : للأسف كان معاهم طفل وحالته خطره .. واخوانها الصغار بحالة نفسية صعبة
بدر : ( يحك لحيته من التوتر ) اوكي مشكور انا لازم امشي
----
دش بدر الامتحان وكان مو قادر يركز فيه .. حل أي كلام وسلم الورقة وطلع رايح حق منار .. أول ماوصل لقى الممرضة توها طالعة من غرفتها
الممرضة : she's still sleeping sir
// الممرضة : اهي للحين نايمه //
بدر : ( حقرها ودش الغرفه )
قعد يم روان و مسك ايدها
بدر : الله يرحمهم و يصبرج
تم قاعد يمها لين قامت
روان : ( افتحت عينها ) انا وين؟
بدر : ( ماسك ايدها ) انتي بالمستشفى
روان : ( اتطالعه وماكو بويهها أي تعبير ) اشكثر صارلي اهني؟
بدر : حوالي 5 ساعات
روان : ( قامت ) ودني بحجز تذكره
بدر : ( منصدم لأنها تتكلم بهدوء ويبي يواسيها بس خايف تنهار ) اوكي بس اكلم الدكتور اول نطري شوي
روان : مابي انطر اذا ماتبي اتيي معاي كيفك انا رايحه ( اطلعت من الغرفه )
بدر : ( لحقها ) خلاص مشينا
( ركب معاها تاكسي وراحو مكتب حجز تذاكر )
روان : ( تكلم الموظف )
I want a ticket to Kuwait .. on any air lines.. It is important to get there as soon as possible
// روان : ابي تذكره حق الكويت على أي خطوط جوية .. المهم اوصل اهناك بأسرع وقت ممكن //

بدر : Make it tow tickets
// بدر : خلها تذكرتين //

روان : No.. just one please
// روان : لا لو سمحت بس تذكرة وحده//

بدر : روان خليني ارجع معاج
روان : لا برجع بروحي .. انت خلك اهني الامتحانات قربت .. واغلب المحاضرات عملية .. وماراح تستفيد لو رجعت معاي لأني ماراح اطلع من البيت
بدر : ميخالف راضي اروح معاج عالاقل اسبوع وارجع
روان : ( اسكتت )
الموظف : ok now one or two tickets??
// الموظف : المهم الحين تذكره وحده ولا ثنتين؟؟ //

بدر : two please
// بدر : ثنتين لو سمحت //

الموظف :
ok.. let me check .. the flight will be tomorrow at 4 pm
//الموظف : اوكي .. خل اشوف ( يشوف الشاشة يدور لهم اقرب وقت ) .. الرحله بتكون باجر الساعه 4 مساءً //

روان : ( طالعت بدر بعصبيه )
بدر : ( حط ايده على ايدها عشان تهدى )
please check a gain if there is a flight today or tomorrow morning..
//بدر : لو سمحت شوف مره ثانيه اذا في رحله اليوم او باجر الصبح//

الموظف :
am sorry sir this is the earliest flight to Kuwait
// الموظف : آسف يا سيد بس هذي ابجر رحله للكويت //

بدر : ok thanks
// بدر : اوكي مشكور .. ( دفع الحساب وخذه التذاكر ) //

- بالتاكسي كانت روان ساكته طول الطريج وبدر خايف عليها لأنها مابجت من أول ماقامت من الصدمه –
بدر : روان ؟؟ ..... ردي علي حبيبتي
روان : ( تطالعه )
بدر : انا اليوم ماراح اخليج بروحج لاتروحين السكن تعالي معاي
روان : لا مابي بروح ارتب اغراضي وارتاح ورانا سفر باجر
بدر : الرحله الساعه 4 العصر عندج وقت وايد .. والصبح انا بروح الجامعه اخذ اجازه عرضية لنا
روان : اخذلك بروحك .. انا ماراح ارجع
بدر : ( مسك ايدها ) لا كلها كورس بتوقفين قيدج وترجعين لا تتخلين عن حلمج .. ابوج وامج الله يرحمهم كانو يبونج تصيرين دكتوره
روان : ( اسحبت ايدها منه وخزته ) لا تتكلم عن امي وابوي
بدر : ( انصدم من نظرتها واسلوبها ) روان عمري .. انا بدر
روان : أدري و لا تتكلم عنهم
( اوصلو عند البيت اللي ساكن فيه بدر – بيت عيوزه مأجر عندها غرفه وحمام - )
بدر : يللا نزلي معاي
روان : قلتلك بروح السكن
بدر : حياتي نزلي عشان خاطري ماقدر اخليج بروحج
روان : ( بصراخ ) وليش ماتخليني بروحي شايفني ينيت ولا قاعده انتف بشعري ؟؟؟
بدر : والله اللي شايفه اقوى من اللي قلتيه .. نزلي معاي يللا
روان : ( بصوت عالي ) مابي انزل خلاص عاد فكني
بدر : ( نزل من السياره وراح صوب بابها وبطله ونزلها غصب )
روان : ( تصرخ ) هد ايدي ماتفهم ؟؟ ماابي اروح معاك مو غصب
بدر دفع حساب التاكسي وماسكها وقعدها على كرسي خشب – بو شخصين – موجود عند البيت
بدر : ( يهز روان من جتفها ) اللي انتي فيه موطبيعي .. روان لا تخشين بقلبج طلعي اللي فيه ابجي صرخي بس لا تسكتين .. هالشي راح يأذيج اكثر
روان : ( بصوت هادي ) هدني
بدر : ماراح اهدج
روان : بدر هدني
بدر : حبيبتي ..
روان : ( اتصرخ عليه واتدز ايده ) لاتقول حبيبتي .. ماني حبيبتك وبرجع الكويت ولا اتيي معاي خلك اهني ادرس كمل تخرج لا تلحقني .. انا خلاص حياتي صارت حق اخواني من اليوم انساني فاهم؟؟؟
بدر : لا ماراح اخليج بنطرج وبتزوجج وبنرجع اهني واخليج تكملين و..
روان : ( تسكر اذنها ) خلااااص اسكت من اليوم كل شي تغير وروح بطريجك وخلني
بدر : ادري انج تقولين جذي من الصدمه مقدر الوضع اللي انتي فيه
روان : أي وضع؟ مافيني شي .. ليش تتكلم جني مينونه؟؟
بدر : ( صرخ عليها ) اشفيج اصحي .. امج وابوج ماتو .. لا تتصرفين جنج روبوت طلعي مشاعرج
روان : ( ويهها بدى يتغير لونه وصار احمر بس مابجت ) بقوم اروح السكن
بدر : ( مسك ايدها ) ماراح تروحين
بدر : ( بصوت هادي ) روان اللي انتي فيه مو قوه انتي بصدمه الحين وراح يأثر عليج هالشي بعدين.. واخوانج محتاجين لج مايبونج تنهارين عليهم فجأه .. طلعي اللي بقلبج والله بترتاحين .. لاتشيلين كل هالحمل وتكبتينه داخلج
روان : ( قاعده تطالعه و بدت عيونها تغورق وحنجها يرجف )
بدر : ( قلبه يعوره عليها .. قربها منه جان تلمه وتقعد تبجي حييل )
روان : امس كلمتها .. امس قالتلي بتشوفني بالعطله .. ( تشاهق ودافنه ويهها بصدره )
بدر : ( يمسح على شعرها ) الله يرحمهم
روان : ليش ماكلمت ابوي .. ماقدرت انطر جم ثانيه ليش؟؟
بدر : مثواهم الجنه ان شاءالله ..
روان : ( تشاهق وغصب ينفهم كلامها ) اشلون عاليهال .. امهم وابوهم راحو منو عندهم الحين .. لازم اكون عندهم
بدر : باجر بتكوينين عندهم وانا ماراح اخليج
روان : ( تبجي وتلمه حيل ) أحبك بدر
بدر : ( يمسح على شعرها ) ابجي لين ترتاحين
( تمت تبجي مده على صدره واهم قاعدين عالكرسي لين هدت شوي )
بدر : نطريني شوي ماراح اطول
روان : وين رايح؟
بدر : ثواني وراجع والله ما اتأخر
- راح البيت وطلب من العيوز اللي ساكن عندها تخليه يدخل روان وشرح لها حالتها وان اهلها متوفين وقالتله يدخلها-
( بدر راح حق روان وقالها تقوم معاه ودشو البيت رحبت فيها العيوز وقالت لها تروح الغرفه مع بدر وبتييب لها شوربه تهدي اعصابها )
روان دشت الغرفه ومبين انها متردده
بدر : ارتاحي اهني انا راح انام بره بالصاله
روان : لا خلك معاي شوي
بدر : ( ابتسم لها ) اوكي
- اقعدت عالسرير وقعد يمها شوي ودشت العيوز ومعاها شوربه وبحط الحوار بالعربي –
العيوز : تفضلي حبيبتي
روان : مشكوره خالتي ..
العيوز : ( تكلم بدر ) السرير فيه مخده وحده خل اييبلك ثانيه
بدر : لا انا راح انام بالصاله
العيوز : اشفيك؟؟ نام عندها الريال لازم ما يخلي البنت واهي محتاجته؟؟
بدر : ( ابتسم لها ) لا بس عاداتنا غير .. اذا مو متزوجين ما ننام في نفس الغرفه
العيوز : اوكي اللي تشوفونه أستأذن الحين .. وبحطلك اللي تحتاجه بالصاله ( اطلعت وخلتهم )
بدر : شربي شوربتج
روان : ( اشربت شوي بعدين حطتها عالميز يمها ) اشراح اسوي؟؟
بدر : راح تروحين توقفين مع اخوانج
روان : ( اتحس ودها تنفجر من البجي ) راسي يعورني ودي انام شوي
بدر : نامي انا بقوم اول ماتغفين
روان : لا عفيه محتاجه اكون بروحي شوي .. وبعدها بنام لأني وايد تعبانه
بدر : اوكي انا اهني بالصالة يمج .. أي شي محتاجته ناديني
روان : اوكي
- طلع وسكر الباب وراه واهي انسدحت واقعدت تبجي بصوت عالي وتتذكر المره الأخيره اللي كلمت فيها امها و اشلون كانت اتسولف وماكان فيها أي شي سبحان الله –
( بدر بالصاله يسمعها تبجي وده يروح لها بس بيحترم رغبتها وبيخليها اتطلع اللي بقلبها كله لين تنام )
مر وقت طويل واهو يسمعها وكانت تسكت شوي وترد تبجي فتره لين اسكتت مده طويله راح الغرفه بطل الباب شوي شوي لقاها نايمه
بدر : ( بقلبه ) تمنيت اني ريلج بهاللحظه عشان تفرغين كل هالدموع على صدري لين تنامين .. ( سكر عليها الليت وطلع نام عالقنفه )
بعد ساعتين تقريبا سمع صوت روان تصارخ وتنادي امها.. قام بسرعه وبطل عليها الباب
بدر : ( قعد يمها ومسح على شعرها ) اهدي حبيبتي كاني يمج لا تخافين
روان : ( دزت ايده واهي تبجي ) مابيك ابي اهلي .. ردلي امي وابوي
بدر : ( مسكها يبي يلمها ) الله يرحمهم
روان : ( دزته ) اطلع بره خلني بروحي ابي امووت ما اتخيل حياتي من غيرهم
بدر : لا تقولين جذي .. اخوانج صغار ومحتاجينج
روان : ماقدر والله صعب ماقدر
بدر : بلى تقدرين
( دشت العيوزه وبطلت الليت عليهم – بكتب بالكويتي - )
العيوز : اشفيكم قعدتوني من النوم
بدر : آسفين .. بس نفسيتها تعبانه واحلمت بكوابيس
العيوز : قلتلك لا تخليها
بدر : روحي نامي راح ابقى معاها وماراح نزعجج
العيوز : اي لو سمحت لأن عندي اشغال الصبح واحتاج انام وقت كافي
بدر : تصبحين على خير
( اطلعت وخلتهم )
روان : ( تمسح دموعها ) خلاص روح نام
بدر : ماراح اطلع الا اذا نمتي
( روان ماحبت اتجادله لأنها تعبانه نفسيا .. انسدحت وعطته ظهرها وتم قاعد على طرف السرير يشوفها تبجي بصوت واطي وموعارف يواسيها عدل .. وتمت تبجي لين نامت جان يروح الصاله )
- الصبح الساعه 10 قام بدر وبسرعه راح الغرفه عشان يقعد روان بس لقاها قايمه وتوها طالعه من الحمام ومبين عليها انها باجيه –
بدر : صباح الخير .. انا بس اغسل واطلع نمشي على طول اوكي؟
روان : اوكي
( بدر راح الحمام – عزكم الله – و اول ماخلص طلع معاها واركبو تاكسي )
بدر : بوصلج السكن شيلي كل أغراضج كل شي تحتاجينه اخذيه معاج .. عندج جنطه كبيره؟
روان : اي عندي
بدر : اوكي .. شيلي كل شي تحتاجينه واخذيلج شور عشان تصحصحين .. وانا بروح الجامعه اخذ اجازه عرضيه وارجعلج
روان : ( اسكتت ماردت عليه )
- وصلها السكن وراح الجامعه .. انزلت دشت غرفتها وماكان في احد غيرها اقعدت عالسرير وطلعت صور امها وابوها من الدرج واقعدت تلمهم وتبجي مثل اليهال –
روان : ليش اثنينهم .. ليش ما عاش واحد فيهم عالأقل .. اشلون بربي اخواني من بعدكم .. اشلون ؟؟ يارب اصحى يارب اكون قاعده احلم
روان : ( تبجي وتطق ويهها ) ابي اقووم خلااااص تعبت يارب يكون كااابوس ماقدر افقدكم اثنينكم صعبه يارب رجعلياهم
( دشت عليها بنت من اللي بالسكن وشافتها مهستره وتبجي جان تروح تركض وتنادي وحده من الاداره اللي بالسكن واسمها مس آرثر واهي مره طيبه حيل – بكتب الحوار بالكويتي - )
مس آرثر : ( اركضت حق روان وامسكت ايدها ) حبيبتي روان اهدي اهدي ..
روان : ( تصرخ ) خليني بروحي طلعو بره
مس آرثر : ( لمتها غصب ) سمعت الخبر من ادارة الجامعه امس وبلغتهم انج مارجعتي السكن كنت خايفه عليج .. الحمدلله انج بخير
روان : ( مادزتها ولمتها حيل واهي تبجي ) امي وابوي ماتو ماراح اشوفهم .. اشلون بربي اخواني الصغار .. انا خايفه ماراح اقدر اعيش بدونهم
مس آرثر : تقدرين روان .. عرفتج 3 سنين .. و بذكائج وقوتج صدقيني بتقدرين .. وهذي الدنيا تاخذ منا وتعوضنا بعدين
روان : بشنو راح تعوضني عن امي وابوي؟؟ في شي تقدر تعطيني اياه وينسيني اياهم؟
مس آرثر : ( تمسح على شعر روان ) اهدي حبيبتي .. الحين انسدحي ارتاحي بقوم اييبلج حبوب مهدئة
روان : لا ماقدر بسبح و بشيل اغراضي لأني بعد شوي بسافر
مس آرثر : خلاص انا اساعدج انتي روحي اخذي شور ريحي اعصابج
روان : شكرا ( خلتها و دشت تسبح )
- تمت روان فترة تحت الماي الدافي تبجي بدون صوت وتتذكر امها وابوها .. سبحان الله محد يدري متى يومه –
-------------------------------------------

[لامارا]

** البارت الثالث **

اطلعت روان من الحمام لقت جنطة السفر عالسرير مبطله وفيها كل ملابسها اللي كانت بالكبت .. خذت منها نفنوف اسود ( لي تحت الركبه وجمه لي الكوع ) والبست صندل اسود ونشفت شعرها بالفوطه ومشطته وسوته عنقوص ( ذيل حصان )
اقعدت اتلم الاغراض اللي احتمال تنكسر ومن بينهم صورة أهلها و لفتهم بقطعة خام وحطتهم داخل هاند باق صغيره .. شوي جان ينطق الباب ودشت رفيجتها بالسكن واهي بحرينيه اسمها منى ..
منى : جاهزه ؟؟ بدر تحت ناطرج يقول استعيلي عشان تلحقون عالقطار
روان : ( اوقفت اتطالع الغرفه وحست انها اختنقت اكثر ) منى .. أي شي من اغراضي تركته اهني اخذيه لج
منى : لا بخشهم لج وان شاءالله بترجعين
روان : ( اتطالع منى بحزن ) لا ماراح ارجع .. منى انا خلاص حياتي الحين حق اخواني مالهم غيري من بعد الله
منى : ( عيونها دمعت ماقدرت تمسك نفسها ) يعني ماراح اشوفج مره ثانيه
( روان شافت دموع منى ماقدرت تسيطر على نفسها وخصوصا انها كانت ماسكه دموعها غصب )
منى : ( لمتها حيل ) مادري شقولج ... ادري كلمة عظم الله أجرج ماتهوّن عليج بس الله يصبرج
روان : ( وخرت عنها ) شدي حيلج لا تتكيسلين
منى : ربي يوفقج .. عطيني اساعدج بالشنط
روان : لا ماكو الا الهاند باق والجنطه العوده بخلي الفراش يشيلها .. سلمي عالكل قوليلهم راح اوله عليهم .. ( لمتها حيل ) مع السلامه

( اطلعت من الغرفه و نادت فراش يشيل معاها الجنطه .. وراحت حق بدر ودخلو الجنطه بالتاكسي ومشو )
بدر : عسى مانسيتي شي
روان : مو مهم .. ما احتاج شي
بدر : انا بعدين اشوف اذا ناسيه شي اييبه لج اذا رجعت بالعطله
روان : ( اسكتت )
بدر : الحين بنروح بالقطار اسرع شي حق مطار لندن
روان : ( ساكته )
بدر : روان معاي؟
روان : اي معاك
بدر : يبتي جوازج اهم شي ؟
روان : اي
( اوصلو المحطة واحجزو تذاكر واركبو القطار وكانت روان طول الطريج ساكته وبعد ساعه الا ربع اوصلو لندن وبعدين اركبو تاكسي وصلهم لي المطار )
بعد ما خلصوا سوالف الشحن اقعدوا بكوفي شوب و ياب لها قهوه ..
بدر : تفضلي شربي
روان : ( خذته منه ) مشكور
بدر : يللا كلها نص ساعه ونركب الطياره
روان : ( ساكته وتشرب قهوتها )
بدر : ( وده يقولها عن اخوها الصغير بس خايف عليها ) روان ..
روان : ( طالعته )
بدر : ادري الشي اللي بقوله مو وقته بس انا أتمنى اكون واقف يمج أكثر..
روان : اشلون يعني مافهمت ؟؟
بدر : بخطبج من عمج
روان : ( طالعت بدر واهي منصدمه ) من صجك؟؟
بدر : ادري مو وقته بس ..
روان : ( بعصبيه ) انت اشفيك امي وابوي ميتين وتتكلم عن خطبه؟؟
بدر : اللي قصدته اني مابي اخليج بروحج ودي اقوف يمج حتى وانتي بين اهلج .. مابيج تنهارين يم اخوانج الصغار ومابيج تضعفين وماقدر اكون عندج واخفف عنج
روان : بدر امي وابوي توهم متوفين حتى لو قصدك انك توقف معاي هم مايصير اتييب طاري خطبه بجذي وقت
بدر : ( حط ايده على ايدها ) آسف حقج علي بس اهدي شوي ..
( روان اسحبت ايدها واقعدت اتطالع الناس اللي بالمطار ومبين عليها انها شوي وتبجي )
( شوي جان يسمعون نداء حق ركاب رحلتهم وقاموا دشو الطياره.. و بعد فترة طارو )
بدر : كلمتي احد من اهلج عشان يستقبلونج بالمطار ؟
روان : لا
بدر : زين وين بتروحين اذا وصلنا ؟
روان : بيتنا
بدر : يمكن ماتلقين احد
روان : ( اسكتت )
بدر : أول مانوصل المطار كلمي عمج او أي احد عشان تشوفين وين اخوانج
روان : ( سندت راسها عالكرسي وغمضت عينها ) خلاص بدر الرحله طويله وانا تعبانه بنام
بدر : اوكي .. ارتاحي
( تمت مغمضه عيونها مده لين غفت .. وبدر بعد نام .. بعدين قامو وقعد يسولف معاها واهي اترد عليه كلمة ورد غطاها )
- طولت رحلتهم 6 ساعات ونص تقريبا وانزلت الطياره مطار الكويت –
روان : جم الساعه الحين بتوقيت الكويت؟
بدر : ( يطالع ساعته ) ثنتين الا ربع
روان : ( بقلبها ) الوقت متأخر وماقلت حق احد اني بوصل اليوم
- انزلو من الطياره –
بدر : بتدقين على عمج؟
روان : ماعرف رقم بيتهم
بدر : اشبتسوين؟ اخاف تروحين بيتكم ماتلقين احد
روان : بدق على فجر
- فجر هذي بنت خالة روان وحييل يحبون بعض من واهم صغار متعلقين ببعض –
بدر : اوكي ان شاءالله ترد عليج
( راحوا عند تلفون عمومي بالمطار ودقت على فجر جان ترد عليها )
روان : الو فجر؟
فجر : منو؟
روان : انا روان
فجر : ( مو مصدقه ) روان؟؟؟ انتي وين ؟
روان : ( صوتها بدى يتغير بس تحاول ماتبجي ) بالمطار .. توني واصله
فجر : حياتي خليج مكانج الحين اقعد ابوي وانمرج
روان : لا مايحتاي بس قوليلي وين اخواني عشان اعرف وين اروح
فجر : عند عمج حمد
روان : زين انا مادل بيتهم عدل و..
فجر : روان الوقت متأخر واكيد نايمين .. خلينا انمرج ماراح اطول دقي علي كل شوي عشان اذا قربت تطلعين عند البوابه
روان : اوكي
فجر : يللا باي ( سكرت التلفون )
--
بدر : ها اشصار؟
روان : الحين اتيي مع ابوها ياخذوني
بدر : ( خذاها عند كافيه ) تعالي قعدي شوي بقولج شي مهم
روان : ( اقعدت )
بدر : ( مسك ايدها وضغط عليها ) انتي راح تسمعين الموضوع منهم واخاف تنهارين يم اخوانج والحاله اللي اهم فيها ماتسمح ولازم يشوفونج قويه عشان يتخطون اللي اهم فيه
روان : ( قاعده ترجف ) بدر الله يخليك قولي شنو صار بعد؟؟
بدر : فروس كان معاهم بالسياره و..
روان : ( اشهقت وحطت ايدها على حلجها ) مات؟؟
بدر : ( يهديها ) لا بعيد الشر عنه .. بس اهو بالمستشفى وقلت لازم يكون عندج خبر عشـ..
روان : ( انزلت ادموعها ) وليش ماقلتلي اول مادريت ؟
بدر : ماكنت بزيد عليج همج
روان : ومتأكد ان بخير ؟
بدر : ان شاءالله يكون بخير
روان : ( سندت اكواعها عالطاوله وامسكت راسها واقعدت تبجي من غير صوت ) انا خلاص تعبت ماقدر اتحمل اكثر
بدر : حياتي خلاص اهدي الله يخليج
روان : ( امسحت دموعها وقامت ) بروح الحمام
- خلصت من الحمام واطلعت دقت على فجر قالت لها انهم قراب وخل تطلع بره لهم –
روان : يللا بدر انا رايحه .. دير بالك على نفسك .. ماكان له داعي اتيي معاي .. لأنك ماراح تشوفني
بدر : ميخالف المهم اكون يمج مو بعيد
روان : ( تطالعه وفيها غصه ) الله يوفقك .. دير بالك على نفسك وعلى دراستك
بدر : راح ايي واخذج بالوقت المناسب
روان : ( طالعته وماعلقت عاللي قاله )
بدر : دقي على رقمي الكويتي باخذه من اخوي اول ما اوصل البيت .. عفيه طمنيني انج بخير .. ناطرج
روان : احاول .. مع السلامه
- اطلعت وماسلمت عليه عدل ولحقها الهندي يدز جنطتها وبدر تم واقف يطالعها–
( اول ماشافتها فجر طالعه من باب المطار انزلت من السياره واركضت لها و لمتها )
فجر : عظم الله اجرج حبيبتي
روان : اجرنا واجرج ان شاءالله
- اركبوا السياره –
ابو محمد : هلا يبه .. عظم الله اجرج والحمدلله عالسلامه
روان : الله يسلمك اجرنا واجرك .. عمي أقدر اشوف فراس الحين ؟
ابو محمد : لا يبه مايصير باجر تشوفينه ان شاءالله ..
روان : اشلونه؟
ابو محمد : ان شاءالله بخير
روان : ( تبلع ريجها ) ومشاري ومنال ؟
ابو محمد : الله يعينهم .. قاعدين عند عمج حمد
روان : تقدر اتوديني لهم؟
ابو محمد : انا اقول رجعي معانا البيت ارتاحي وباجر اتروحين لهم
روان : يمكن مو قادرين ينامون .. ودني لهم الله يخليك
ابو محمد : ( يطالع فجر عشان تقول شي )
فجر : ( لفت عليها ) روان حياتي عفيه خليج اليوم عندي وباجر بتشوفينهم .. والوقت متأخر الحين
روان : ( اسكتت اتخاف لو تكلمت اكثر تبجي )
----
اوصلو البيت اول مادشت ولا تلمها خالتها وتقعد تبجي جان تبجي روان معاها
ابو محمد : ام محمد بدل لا تهدين البنت زدتي عليها
ام محمد : يعني اللي راحت مو اختي؟؟
ابو محمد : انا لله وانا اليه راجعون .. ( يطالع فجر ) فهمي امج ( دش غرفته وسكر الباب )
فجر : يمه بنروح الغرفه عن اذنج
ام محمد : لا خليها معاي فيها ريحة الغالية
فجر : يمه؟؟!!
روان : ( ميته بجي ولمت خالتها ) الله يرحمهم
- بعد فتره هدت شوي واصعدت مع فجر الغرفه –
فجر : ( طلعت لها بيجاما ) يللا بدلي وعقب نامي عالسرير انا افرشلي عالأرض
روان : لا نامي يمي سريرج كبير
فجر : ( ابتسمت ) اوكي
( روان بدلت ملابسها وانسدحت ويت فجر يمها وتلحفت )
روان : ( متردده ) ماتدرين اشلون صار الحادث
فجر : لا
روان : احس انج تدرين وماتبين تقولين
فجر : ( ارتبكت ) لا مادري .. وخلاص نامي الحين
( روان اسكتت وفجر غمضت عينها )
روان : فجر؟
فجر : ( طالعتها ) هلا
روان : ماقدر انام .. عفيه قوليلي اللي صار
فجر : ( ماتدري شتقولها ) خلاص روان الله يرحمهم ليش تبين تعورين قلبج؟ ماراح اقول شي وبنام ( عطتها ظهر )
روان : فجر امانه قوليلي .. عالاقل اشلون صار الحادث وين كانو رايحين
فجر : ( وهي ماعطيتها ظهر ) شنو بتستفيدين غير عوار القلب؟؟ مابي اقول شي
روان : ( اتحس انها مختنقه ) عيل بسأل خالتي
فجر : ( لفت عليها ) لا خلاص بقولج
روان : ( ساكته تسمعها )
فجر : اللي اعرفه ان توهم وصلو منال ومشاري حق مدارسهم .. ومادري اشلون حدتهم شاحنه وانقلبت السياره من فوق
روان : ( انزلت ادموعها ) وفراس؟
فجر : لقوه بكرسي اليهال واشوه رابطين له الحزام بس متعور والحين بالمستشفى ان شاءالله يتشافى
روان : ( تبجي من غير صوت ) واشسوو حق اللي دعمهم
فجر : اسجنوه
روان : ( عطتها ظهر واقعدت تبجي ) ماراح اقدر اربيهم بروحي
فجر : ( انزلت ادموعها ) الله بيكون معاج تحملي .. نامي الحين الله يفرجها
روان : آمين .. ( اقعدت عالسرير وامسحت دموعها ) اقدر اتكلم بتلفونج شوي؟
فجر : بتكلمين بدر؟
- روان مسولفه كل شي حق فجر حتى واهي بره كانت تشبك مسنجر وتكلمها –
روان : اي اهو رجع معاي و بقوله اني بخير
فجر : ( عطتها التلفون ) هاج
- خذته منها و دقت على بدر وقالتله انها عند فجر وباجر اتشوف اخوانها تم يسولف معاها شوي وسكر التلفون -
روان : ( ردت لها التلفون ) تصبحين على خير
فجر : وانتي من اهله
----
اليوم الثاني روان قامت الساعه 11 الظهر لقت فجر للحين نايمه
روان : فجر قومي انا بروح الحين
فجر : ( قامت ) صباح الخير
روان : عفيه انا بروح اغسل وابيج اتطلعيلي عباية من اللي عندج
فجر : اوكي
- راحت روان غسلت وارجعت لقت فجر مطلعتلها عباية البسبتها وعدلت شعرها –
فجر : احنا مسوين عزا امج الله يرحمها في بيت خالتي فاطمة ماتيين؟
روان : لا ... كافي علي العزا اللي عند عمي .. ولازم اكون يم اخواني
فجر : ييبيهم معاج عيشو عندنا
روان : لا ماراح اهد بيتنا واخواني راح يرجعون البيت معاي
فجر : بروحكم؟؟
روان : اي .. ويللا عفيه بسرعه قولي حق ابوج خل يوديني
فجر : اوكي
- راحت روان مع ريل خالتها ابو محمد ووصلها لي بيت عمها –
( روان حست قلبها بيوقف وريلها ماتشيلها خايفه تنزل وتشوف اخوانها بجذي موقف )
ابو محمد : توكلي على الله يابنيتي قولي اللهم لا سهل الا ماجعلته سهلا وانت تجعل الحزن اذا شئت سهلا
روان : ( رددت اللي قاله وانزلت ) مشكور عمي مع السلامه
---
دشت البيت لقت حريم ماتعرفهم قاعدين مع ( ام جاسم ) – مرت عمها حمد – اول ماشافتها قامت لها وسلمت عليها ببرود كعادتها .. ام جاسم دايما ماتحب احد ولا تحب اتخالط الناس كله بعالم بروحها
روان : ( اتطالع الموجودين ) السلام .. عمتي وين اخواني؟؟
ام جاسم : فوق .. ثاني غرفه عاليمين
روان : عن اذنكم .. ( خلتهم واصعدت )
- طقت الباب ودشت لقت منال منسدحه عالسرير ومشاري قاعد يمها أول ماشافوها قامو واركضو لها –
(( منال 12 سنه , مشاري 9 سنين , فراس سنه وشهرين ))
روان : ( لمتهم وماقدرت تمسك نفسها واقعدت تبجي وتبوسهم ) اشتقت لكم وايد الحمدلله انكم بخير
منال : ( تبجي بصوت عالي ) روان لا تخلينا ماعندنا احد امي وابوي ماتو
روان : ( تلمهم اكثر ) كاني رجعت و ماراح اخليكم
مشاري : ( يبجي ) امي وابوي صج ماراح يرجعون كلش؟؟
روان : ( اسكتت ماعرفت شتقوله ماتبي تكسر بخاطره )
منال : اي ماراح يرجعون جم مره اقولك
مشاري : ( زاد بجي ) روان صج ؟؟
روان : ( ادموعها تنزل ) منال خلاص حبيبتي لا تضايقينه
منال : ( تبجي وتصرخ ) وليش مانقوله الصج ؟؟ امي وابوي ماتو وفروس بعد راح يموت
روان : الله يحفظه لا تقولين جذي
منال : بلى انا سمعت عمي يقول حق خالتي ( ام جاسم ) ان فروس حالته خطره ويمكن مايعيش
روان : ( تعض شفتها ودموعها تنزل ) لا اذا كلنا دعيناله راح يصير زين صدقوني
مشاري : انا بدعي بعد حق امي وابوي عشان يرجعون
منال : ( دزت مشاري ) انت غبي؟؟ اقولك ماتو اللي يموت مايرجع
مشاري : ( مات من البجي وراح قط نفسه عالسرير )
روان : ( اتطالعهم و موعارفه تهديهم اهي بروحها يبيلها احد يهديها )
- تمت معاهم مده لين نامو من التعب وبعدين صلت العصر وانزلت حق العزا-
عقب العزا رجع عمها مع ولده جاسم ( العم حمد مطوع – لحيته طويله – و جاسم عمره 23 سنه )
ابو جاسم : ( سلم على روان ) عظم الله اجرج صبري ان الله مع الصابرين
روان : ( ويهها اصفر وعيونها حمر من البجي ) اللهم لا اعتراض
ابو جاسم : الحمدلله على كل حال
روان : عمي .. تقدر توديني اشوف فراس؟
ابو جاسم : اي اكيد .. يللا نمشي عيل
---
- اوصلوا المستشفى وراحوا عند وحدة العناية المركزة كان في جام يفصل المرضى عن الناس ومن اهني يقدرون الاهل يشوفون المريض -
روان شافت فراس كان وايد صغير بالنسبة لحجم السرير وفي انابيب طالعه من خشمه وراسه ملفوف.. اول ماشافت هالمنظر اقعدت تبجي وتحط ايدها عالجام
ابو جاسم : لا تحاتين ادعيله بس والله راح ينجيه
روان : بس جسمه صغير مايتحمل اللي صار
ابو جاسم : مافي شي بعيد عن ربج اذا اراد شيئا فإنما يقول له كن فيكون
روان : ونعم بالله .. يارب شافيه .. والله اني تعبت مابي افقده اهو بعد .. يارب رده لنا سالم
ابو جاسم : آمين ( خذا قرآن وقعد يقرا بترتيل وروان قاعده تدعي حق فراس وحق امها وابوها بالرحمه )
- مر الدكتور من يمهم وقفته روان و اسألته عن حالة فراس –
الدكتور : احنا سوينا اللي علينا والباجي على الله سبحانه .. خليكم مستعدين حق أي شي .. ومالكم الا الدعاء

------------------------------------------------

[لامارا]

** البارت الرابع **

- روان ارجعت بيت عمها لقت اخوانها للحين نايمين –
روان : ( اتطالعهم واهم نايمين ) يارب صبرني عشانهم
- انطق باب الغرفه –
روان : تفضل
ابو جاسم : يبه روان تقدرين تنزلين الصاله في موضوع بكلمج فيه
روان : اي اكيد كاني لاحقتك
- لحفت اخوانها عدل وانزلت حق عمها –
ابو جاسم : قعدي
روان : ( اقعدت يمه وقلبها يرقع صارت اتخاف من هالمواقف )
ابو جاسم : يبه البقى براسكم .. انتو الحين بروحكم مالكم ولي الا انا لازم تقعدون عندي من اليوم ورايح
روان : ( منصدمه ) بس يا عمي بيتنا موجود و..
ابو جاسم : بيتكم راح يتم مثل ما اهو .. واذا تبينه ينباع راح ابيعه واحط فلوسه بحسابكم
روان : ( اتطالعه مصدومه من كلامه ) عمي العفو بس اشقاعد تقول؟؟ مافهمت
ابو جاسم : يعني انتي قرري بخصوص البيت يا نبيعه او تأجرينه أو تخلينه مثل ما اهو .. بس عيشتكم راح تكون بهالبيت من اليوم ورايح
روان : ( تهز راسها ) لا .. آسفه بس راح نرجع بيتنا
ابو جاسم : ادري انتي الحين بصدمه وماتقدرين تستوعبين فكرة انتقالكم بس هذا اللي لازم يصير .. انتي شابه واخوانج صغار ماتقدرين تعيلينهم بروحج
روان : لا عمي اقدر .. واسمحلي اقول هالشي بس احنا نرتاح اكثر ببيتنا
ابو جاسم : افا عليج يابنتي هذا بيت عمج .. يعني اعتبريه بيتكم
( روان اسكتت حست بغصه اتخاف تبجي لو تناقشت معاه اكثر )
ابو جاسم : باجر اخذج بيتكم تشوفين شنو تبين من اهناك وبنقله لكم
روان : ( طالعته وعيونها غورقت ) عن اذنك ( خلته وراحت الغرفه )
- دشت الغرفه وانسدحت يم اخوانها وحطت ايدها عليهم واقعدت تبجي بس تحاول تقصر صوتها عشان لا يسمعونها -
( مشاري تقلب جان تمسح دموعها بسرعه )
مشاري : ( يبطل عينه ) روان؟؟
روان : هلا حبيبي
مشاري : رحتي شفتي فروس؟
روان : اي
مشاري : متى يرجع البيت؟
روان : أول مايصير زين .. ولا تخاف راح يطيب ان شاءالله
مشاري : بس منول ..
روان : منو اكبر ؟ انا ولا منول ؟
مشاري : انتي
روان : خلاص انا اكبر وانا اقول ان راح يطيب ويرجع
مشاري : ( يبتسم ) انا اصدقج انتي لأنج كبيره
روان : ( استانست لأنها شافت ابتسامته ) عفيه عالشاطر يللا خل انقوم منال عشان تقدر تنام بالليل
مشاري : انا بقعدها .. ( يهز جتف منال ) منول .. منووول قومي يللا
منال : ( تفرك عينها ) اشتبي؟
روان : قومي يللا قعدي معانا
منال : ( تطالعها ) مابي خلوني بنام ماحب اقعد
روان : يللا قومي عشان تقدرين تنامين بالليل
منال : مابي خليني على كيفي
روان : يللا قومي عفيه حبيبتي انتي
منال : متى نرجع بيتنا؟
روان : يمكن باجر
منال : برجع اليوم .. ماحب اقعد اهني
مشاري : انا بعد برجع البيت
روان : ( تبتسم ) زين روحو غسلو ويهكم وبدلو ملابسكم واشوف شيصير
- راحو اليهال وتمت روان قاعده بالغرفه اتفكر شتقول حق عمها .. خلصو اليهال ودشو الغرفه بدلو ملابسهم وانزلوا تحت مع روان –
روان : عمي .. احنا قررنا نرجع البيت
ابو جاسم : ماخلصنا من هالموضوع؟؟
روان : بس عمي كلنا ودنا نرجع
ابو جاسم : ماقدر اخليكم بروحكم
ام جاسم : لا عادي كل يوم طل عليهم ومافيهم الا العافيه
( طبعا اهي قالتها لأن ماتبي احد يسكن عندها )
ابو جاسم : بس يا ام جاسم اشلون بنت بروحها تعيش اهناك ومعاها يهال؟
ام جاسم : عادي شنو بيصير لهم يعني؟ وعندهم فلوس تعيشهم
ابو جاسم : ( يكلم روان ) اي صج المحامي يبي يقعد معاج بخصوص الورث
روان : ( حست شي يعصر قلبها ) مو جنه تو الناس على هالشي؟
ابو جاسم : كل ما خلصنا اسرع كل ماكان احسن
روان : ( اسكتت ) وامسكت ايد اخوانها وراحت اقعدت يمهم عالقنفه
- بعد فترة حطو العشى قامو عشان يتعشون معاهم –
منال : روان مابي اكل مو يوعانه عادي اروح الغرفه؟
روان : لا مو عادي .. قعدي معانا واكلي
منال : بس انا مو يوعانه
روان : ميخالف حبيبتي شوي اكلي وروحي زين؟
منال : ( اقعدت واهي معصبه )
( روان ماتشتهي الاكل بس اقعدت عشان اخوانها واهم ياكلون دش جاسم البيت )
ام جاسم : هلا يمه اقعد اكلك لقمه
جاسم : لا يمه الحمدلله كليت بره
ابو جاسم : شكل الشله اللي تمشي معاها شله فاسده اتوقع ماصليت العشى
ام جاسم : لاتكلمه جذي جدام الغرب
روان : ( غصب ابلعت لقمتها حست ان كلمة ام جاسم قويه )
جاسم : لا يبه ابشرك صليت الحمدلله .. يللا استأذنكم بروح انام ( راح غرفته )
روان : عمي .. بنروح بعد شوي بيتنا
ابو جاسم : خلاص روان وايد تحنين قلت راح تعيشون اهني وهذا اخر كلام
( منال اتطالع روان وشوي وتبجي )
روان : آسفه عمي بس نبي نروح
ابو جاسم : شنو يعني؟؟ ما اتدخل فيكم ؟؟
روان : لا العفو ماقصدت
ام جاسم : خلاص اشفيك بو جاسم خلهم دام هذي رغبتهم كيفهم
ابو جاسم : انا بوديكم اليوم .. بس راح ارد افتح معاج هالموضوع .. ماراح اخليكم تعيشون بروحكم
-----
( بعد العشى خذوا خدامتهم وراحوا مع عمهم ووصلهم و نزل معاهم البيت )
ابو جاسم : ( عطاها المفاتيح) قفلي عليكم الباب واي شي يصير لا سمح الله دقي علي ( عطاها كرت الشغل وفيه رقمه )
روان : مشكور عمي
ابو جاسم : باجر العصر امركم عشان نروح حق فراس
روان : تقدر تمر عليه الحين يمكن صار شي يديد
ابو جاسم : اذا صار شي وصيت الدكتور يكلمني .. اهو حاليا بغيبوبه والله يقومه منها بالسلامه
روان : آمين يارب ..
ابو جاسم : يللا انا ماشي تبين شي؟
روان : لا مشكور ماقصرت
( طلع وخلاهم )
روان : ( اتطالع البيت وحست بغصه اصحاب البيت راحو ومابقى غيرهم )
منال : روان انا بنام بغرفة امي وابوي
مشاري : انا بعد
روان : انا بعد راح انام معاكم فيها
( منال ومشاري اركضو راحو غرفة امهم وابوهم )
خيرية ( الخدامه ) : ماما بابا واجد زين .. انتي بعد واجد زين .. شنو سوي سبحان الله ( يعني قصدها تواسيها )
روان : ( عيونها غورقت ) الحمدلله على كل حال .. انتي روحي نامي مابي شي
- اقعدت بالصاله ودقت على بدر من تلفون البيت –
روان : الو
بدر : الو ؟؟ روان؟
روان : اي اشلونك بدر
بدر : حبيبتي انا بخير انتي اشلونج ؟؟ اشوه انج دقيتي كنت احاتيج
روان : الحمدلله انا بخير .. كنت عند عمي توني راده بيتنا
بدر : بروحكم؟
روان : اي
بدر : زين اشلون اليهال .. واشلون فروس؟
روان : اليهال الحمدلله بخير .. يبجون بين فتره وفتره بس الحمدلله زينين .. وفروس بغيبوبه وتحت رحمة الله
بدر : أي مستشفى؟ باجر بزوره
( روان عطته اسم المستشفى وين موجود اهو بالظبط )
روان : انا بعد صلاة العصر بروحله مع عمي
بدر : خلاص اشوفج اهناك باجر ..
روان : ( ساكته )
بدر : زين انتي اشلونج؟؟
روان : ( تتنهد ) ضاق صدري اكثر من دشيت البيت ماله طعم بدونهم
بدر : ادري حبيبتي .. الله يرحمهم
( مشاري دش عليها واهو يبجي )
روان : ( نزلت السماعه ) مشيري اشفيك؟؟
مشاري : ( يبجي ) منول اتقولي حتى بالمدرسه اذا نجحنا وصارت حفله الكل راح اييون امه و ابوه الا احنا
روان : ( تكلم بدر ) الو.. انا لازم اروح الحين مع السلامه
بدر : روان .. انتي قويه تصرفي معاهم عدل حاولي تنسينهم
روان : ( دمعت عينها ) مع السلامه
- سكرت الخط ولمت مشاري –
روان : الله يخليك لا تبجي .. حبيبي امي وابوي يزعلون اذا بجيت
مشاري : بس اهم ماتو اشلون يدرون؟؟
روان : بلى يدرون .. ويزعلون اذا بجيت .. لا تبجي
مشاري : انتي بعد قاعده تبجين
روان : ( تمسح دموعها ) انا بجيت لأنك قاعد تبجي .. وانا ماحب اشوفك تبجي
مشاري : منول قاعده تبجي بعد
روان : امش انسكتها
( راحت مع مشاري ودشو الغرفه على منال )
روان : منال حبيبتي ميخالف اكلمج شوي؟
منال : ( دافنه راسها بالمخده ) مابي خليني بروحي
روان : مشاري يا بطل .. ميخالف تروح شوي الصاله اتطالع تلفزيون ؟
مشاري : زين .. ( راح )
روان : ( تمسح على شعر اختها ) حبيبتي منوله قومي شوي خل اكلمج
منال : مابي مابي طلعي بره
روان : امي وابوي مايعجبهم اللي تسوينه
منال : ( لفت عليها وطالعتها )
روان : اللي يموت يبي الناس تتذكره وتبتسم ما يحبون الناس يبجون عليهم واذا تذكرناهم وبجينا لازم نحاول نلهي نفسنا بأي شي عشان لا نبجي وايد عليهم موزين
منال : ( تبجي وتطالعها )
روان : وبعدين ياعمري مايصير تقولين حق مشاري كلام يبجيه اكثر .. احنا خواته الكبار .. لازم نصير اقوياء عشان اهو بعد يصير قوي مثلنا
منال : بس امي وابوي ماتو وراح اشتاق لهم .. ومنو راح يدرسنا اذا عندنا امتحان؟
روان : انا
منال : ( تمسح دموعها ) اتعرفين؟؟
روان : ( تبتسم ) اي اعرف انا شاطره كنت بالمدرسه وراح اخليكم الأوائل
منال : زين منو يشتريلنا ملابس؟
روان : هم انا
منال : اتعرفين تسوين مثل اكل امي ؟
روان : لا .. بس كلنا راح اندش المطبخ ونحاول
منال : بس هم راح اشتاق لهم وايد
روان : ( لمتها ) ادري ياقلبي محد يقدر يعوضنا عنهم .. بس لازم مانبجي وايد عشان نقدر نعيش عدل
منال : بس انا مابي اعيش
روان : ( وخرتها عنها واتطالعها مصدومه ) لا منول لا حبيبتي لاتقولين جذي استغفرالله الله مايرضى
منال : ( لمتها حيل واقعدت تبجي وروان تقرا عليها لين نامت )
- اطلعلت من الغرفه لقت مشاري نايم عالقنفه –
روان : مشاري حبيبي قوم نام داخل تعال
( مشاري قام واهو شبه نايم ودته لي السرير ونام على طول )
- روان انسدحت بينهم و غمضت عيونها وتمت تقرى جم سورة حافظتها واهي اتدمع لين نامت –
اليوم الثاني قامو تريقو جدام التلفزيون وحاطين قناة فيها رسوم متحركه و روان كل شوي تعلق على شخصيه من اللي بالتلفزيون وتخليهم يظحكون .. خلتهم يطالعون واقعدت يم التلفون ودقت على فجر

روان : الو.. فجر نايمه؟
فجر : لا لا قاعده .. اشلونج الحين؟ اشلون اليهال؟
روان : الحمدلله زينين .. بغيتج تكلمين عمي يشوفلي مدرب يعلمني اسوق كلها شهر ويردون يداومون لازم اسوق
فجر : اخذيلج سايق احسن
روان : شنو آخذ سايق بروحي بالبيت مو ناقصه كلام عمي .. انا ماقلتله اني بسوق خايفه من تعليقاته
فجر : اهو شكو مايخليج تسوقين؟
روان : مادري ماسألته ومابي اسأله .. كلمي ابوج شوفي شيقول
فجر : زين تعالي عندنا اليوم
روان : خلاص بعد صلاة العصر اقط اليهال عندكم واروح المستشفى وبعدين ارجع.. يعقوب موجود عشان يلعب مع مشاري ؟
فجر : اي موجود
روان : اوكي خلاص عيل اشوفج اليوم .. مع السلامه
- سكرته منها ودقت على بدر –
روان : الو
بدر : ( رد عالتلفون واهو مغمض ) الو؟؟
روان : نايم؟؟
بدر : اي
روان : خلاص عيل اخليك
بدر : باي ( سكر التلفون )
- روان تمت اتطالع السماعه بعدين رجعتها مكانها كله جذي بدر يرد عالتلفون واهو نايم من غير لا يحس –
---
بعد صلاة العصر يالهم عمهم بو جاسم وقعد بالصاله معاهم
ابو جاسم : يللا خل اوديهم بيتنا ونروح المستشفى حق فراس
روان : عمي خل انوديهم عند خالتي احسن منها يلعبون مع يعقوب اهو كبر مشاري
ابو جاسم : عيل نتوكل على الله
- كلهم راحو معاه حتى الخدامه ووصلهم لي بيت خالتهم وانزلوا بس روان تمت مع عمها وراحو المستشفى –
روان : ( تسأل الدكتور ) اشلونه اليوم؟؟
الدكتور : نفس حالته داش غيبوبه والله معاه ان شاءالله
روان : ( اسكتت واقعدت اتطالع فراس من الجام ) يارب ارحمه برحمتك
- واهم بيطلعون لفت ويهها لقت بدر واقف بعيد ويبتسم لها ارتبكت لأن عمها يمها –
( روان ارتاحت لأنها شافت بدر وحست انه مو متخلي عنها )
- بالطريج –
ابو جاسم : يبه يمكن مو وقته اقولج هالكلام .. بس مثل ما انتي شايفه الموت ايي فجأه ومحد يدري بالمكتوب عدل ولا لأ؟
روان : ( تحس بغصه ) عدل
ابو جاسم : يعني انتي باجر اذا الله خذا امانته بعد عمر طويل ان شاءالله .. مو راح تتحاسبين عالحجاب؟
( روان اتطالع عمها مصدومه كلش ماتوقعت اييب طاري هالسالفه بجذي وقت )
------------------------------------------------

[لامارا]

** البارت الخامس **

ابو جاسم : يعني انتي باجر اذا الله خذا امانته بعد عمر طويل ان شاءالله .. مو راح تتحاسبين عالحجاب؟
( روان اتطالع عمها مصدومه كلش ماتوقعت اييب طاري هالسالفه بجذي وقت )
روان : ( ساكته )
ابو جاسم : يابنيتي انا ادري ان مو وقته اقولج هالكلام .. بس مثل ما انتي شايفه محد ضامن عمره ولأني احبج واخاف عليج بقولج خلي اللي صار فرصه لج عشان تتوبين وتتحجبين .. انتي فكري بكلامي عدل والله يهديج ان شاءالله
روان : ( ساكته ماردت عليه وقاعده تشوف الشارع )
- اوصلو عند بيت خالة روان –
ابو جاسم : يللا نزلي نادي اخوانج
روان : لا عمي بقعد عندهم
ابو جاسم : يا يبه مايصير تنامين اهناك والبيت في ريال غريب
روان : لا بس بقعد عندهم وبعدين تردني فجر أو ابوها
ابو جاسم : وهذي فجر جم عمرها؟
روان : 23
ابو جاسم : زين يبه ريل خالتج مو محرم لج .. مايصير تردين معاه بروحكم
روان : بتكون معانا فجر
ابو جاسم : ( يبتسم ) وفجر محرم يعني؟
روان : ( حست بعصبيه بس ماسكه نفسها ) عمي الله يخليك خلاص انا تعبانه
ابو جاسم : روحي يبه الله يهديج حق طريج الصلاح والهدايه
( روان انزلت من السياره حتى ماقالت مع السلامه )
---
أول مادشت البيت شافت منظر خلاها تبتسم وتنسى اللي صار مع عمها .. لقت منال ومشاري ويعقوب يلعبون بليستيشن بالصاله ويمهم قاعد محمد ( 14 سنه )
روان : اهليين بالحلوين
قام محمد سلم عليها : عظم الله اجركم
روان : اجرنا واجرك حبيبي مشكور
مشاري : ( مندمج باللعب مع يعقوب ) روان مابي ارووح تو الناااس
روان : كمل لعب ماراح نروح الحين
منال : ها اشلون فروس؟
روان : زين الحمدلله
منال : يعني راح يقوم؟؟
روان : ان شاءالله راح يقوم
منال : ( ابتسمت ) يارب يقوم لأني ولهت عليه وايد
روان : كلنا ولهنا عليه .. محمد وين خالتي؟
محمد : تصلي تبين اشوفها لج؟
روان : لا لا خلها .. زين فجوره فوق؟؟
محمد : اي بدارها
روان : اوكي انا رايحه اشوفها
- اصعدت فوق طقت الباب 3 طقات ودشت –
فجر : ( قاعده عالنت أول ماشافت روان هدته وقامت لها وسلمت عليها ) اهليين حبيبتي
روان : ها اشغلتج عن شي
فجر : اشهالملاقه؟ تدرين ان ماكو شي اهم منج
روان : ( تبتسم ) تسلمين
فجر : ها اشلون فراس؟
روان : نفس ما اهو .. ان شاءالله يتحسن
فجر : امين
روان : فجور ممكن شوي تلفونج؟
فجر : انتي تاخذينه و من غير استئذان بعد ( عطتها اياه )
روان : وايد مدلعتني اليوم ( دقت على بدر )
روان : الو
بدر : هلا حياتي هلا قلبي هلا بدنيتي كلها .. بسكره وادق حرام رصيد البنت .. باي
روان : ( تبتسم وناطرته يدق )
فجر : شنو ليش سكره مشغول؟
روان : ( رن التلفون ) لا كاهو دق بس يقول فشله رصيدج
فجر : شكو عادي .. بس يحليله جنتل
روان : ( ابتسمت وردت على بدر ) مشكور بدر لأنك كنت يمي بالمستشفى
بدر : شنو هذي مشكور بدر .. جني واحد من الشارع
روان : ليش شكو
بدر : المهم ماعلينا .. تره اول مارحتوا انا قعدت شوي عند فروس ورجعت
روان : ماتدري اشكثر ريحتني شوفتك
بدر: وانا بعد ارتحت من شفتج .. زين روّون اقدر اييبلج خط وجهاز واحطهم عند باب بيتكم وانتي تاخذينه؟
روان : لا ماله داعي .. اكلمك من تلفون البيت
بدر : لا له داعي يعني شوفي الحين قاعدين نتكلم بتلفون البنت بالله احتاجته مو حلوه يعني
روان : اصلا انا لازم اسكره الحين .. بقعد معاها قبل لا ارجع البيت
فجر : لا عااد نامي عندي
روان : لا لا بنرجع البيت
فجر : ( تعلي صوتها ) اقول بدر اقنعها خل تنام عندي وتره مشاري ومنال مستانسين اهني وكلش مابجو
بدر : اي حبي نامي عندهم بعد هم عشان اليهال ترتاح نفسيتهم
روان : لا مادري ..
بدر : شوفي شيصير وقوليلي
روان : اوكي اخليك الحين .. مع السلامه
بدر: احبج باي ( سكر التلفون )
فجر : ها بتنامين عندي ؟
روان : ( ساكته ضايق خلقها )
فجر : يعني روّون قعدتج بالبيت بروحكم احسن؟؟ تكفين مو كله تبجون اهناك؟ والله اهني ماشفت اخوانج يبجون بالعكس مستانسين
روان : خالتي مابجت جدامهم
فجر : ( تظحك ) ابوي زفها يوم بجت جدامج وبس الحين من شافت اليهال يابت لهم بوظه وحركات وتره حرام هذيله يهال خليهم يستانسون .. يللا عاااد ناامي عندي
روان : عمي مايرضى
فجر : واي قطيعه شكو اهو فيج اخاف انتي بنته عشان يتحكم جذي
روان : لا بس لأن عمي الكبير وبحسبة ابوي
فجر : أي حسبه أي خرابيط .. صراحه يغث ماله شغل وراح تنامين
روان : ( دمعت عينها )
فجر : حبيبتي اشفيج الحين؟؟
روان : فجر انا شايله هم بصدري والله احاول ما اطلعه بس جد تعبانه وقاعده اجامل الناس عشان ما ابجي .. وايي عمي يزيدها علي ويكلمني بمواضيع مو وقتها
فجر : مالج شغل فيه لا تبجين واذا تبين ابوي يدق ويكلمه اشرايج
روان : ( تبجي ) مو بس هالسالفه مضايقتني .. تخيلي يعني هذا وقت مناسب انه يقولي ليش مو متحجبه وتحجبي والله يهديج طريج الصلاح جني ماشيه مفصخه
فجر : هذا عمج .. جد جد نوكمنت ( لاتعليق ) موطبيييعي .. زين قلنا مطوع بس عاد تكلم بالوقت المناسب مو بهالظروف
روان : ( تبجي )
فجر : لا جد باط جبدي صبري ( راحت بتطلع من الغرفه )
روان : فجر وين رايحه تعالي لاتقولين حق احد حلفتج
فجر : اي ليش؟؟ خلي ابوي يكلمه والله لاتخافين بس يفهمه ان نفسيتج تعبانه ومايصير يكلمج جذي
روان : لا عفيه خليه .. وخلاص بنام عندكم مو شرط اقوله
فجر : اي احسن لا تعطينه ويه يتمادى اكثر
روان : ( توقف جدام المنظره تعدل شكلها وتمسح دموعها ) امشي ننزل تحت نقعد معاهم
فجر : يللا بس لحظه خل اطفي اللاب توب ( طفته وانزلت معاها )
- بيت العم حمد ( ابو جاسم ) –
ابو جاسم : والله هالعيال مسؤولية كبيره وخصوصا روان .. اهلها خربوها وصعب اعيد تربيتها بهالعمر
ام جاسم : اشفيها؟
ابو جاسم : يعني البنت اكبرت واخوي الله يرحمه معودها عالاستقلاليه وان كل شي عادي .. حجاب مو محجبها وسفر بره مخليها تروح من غير محرم وتخالط الاجانب يعني وايد اشياء غلط كان راضي عنها
ام جاسم : والله انا اشوف هالبنت راسها يابس وماراح تسمعك لو نصحتها
ابو جاسم : انا اليوم كلمتها عن الحجاب وبعد فتره برد اكلمها بس خل يمر وقت عالوفاة
ام جاسم : زين انا مو معاك انها تعيش اهني .. صراحه اهم بنات مابي اتحمل مسؤوليتهم عندي وحده والله ستر عليها و اطلعت من مسؤوليتنا مالي خلق اتحمل بنات غيري بعد
- ابو جاسم عنده غير جاسم بنت اسمها ( هلا ) عمرها 27 واهي تزوجت بحريني وساكنه بالبحرين بس تزورهم وقت العطل –
ابو جاسم : ادري انهم مسؤولية كبيره بس اخوي مات والحين انا مكان ابوهم وماراح اخليهم يعيشون بروحهم من غير رقيب و مادري اشلون بيتربون وخصوصا منال كلها سنتين وتصير بفترة مراهقه
ام جاسم : زين خل يعيشون عند وحده من خالاتهم
ابو جاسم : انتي من صجج ؟؟ اخليهم يعيشون مع رياييل غرب ؟
ام جاسم : ( عصبت وقامت ) بروح اسوي عشى
---
- بيت ابو محمد عالعشى –

مشاري : صج صج راح انام عند يعقوب؟
روان : اي حبيبي صج .. ها منول مستانسه انتي بعد؟
منال : عادي
روان : عادي ؟؟ يعني مو مستانسه ؟
منال : مادري ( تشرب شوربتها )
ام محمد : بلى منوله حلوه وتستانس تنام عند خالتها
( روان ضاق خلقها حست ان منال موقادره تطلع من الحزن اللي اهي فيه )
- بعد العشى اقعدوا كلهم تحت يسولفون واليهال كملوا لعب بليستيشن لين داخوا وراح مشاري مع يعقوب ينامون .. و روان ومنال اصعدوا مع فجر غرفتها –
فجر : ( تفرش حق منال بالأرض ) وهذا فراش منووول
روان : تبين تنامين فوق يم فجور وانا انام تحت؟
منال : لا انا بنام تحت
روان : اوكي
فجر : ( سكرت الليتات وخلت ليت واحد مبطل صارت الاضاءه خفيفه )
( منال انسدحت وتلحفت و روان وفجر انسدحوا عالسرير وقاعدين يتكلمون بصوت واطي ماتسمعه منال )
روان : شسوي؟؟ احسها وايد متضايقه
فجر : ميخالف مع الوقت بتصير احسن
روان : اهي مشتاقه لهم .. والله فجر انا بعد اشتقت لهم وايد ودي لو بس يرجعون يوم واحد وانام على صدر امي وألم ابوي .. منزمان مالميتهم
فجر : أدري والله حاسه فيج .. الله يصبركم
( انزلت دموع روان جان تعطي فجر ظهرها وتتلحف .. شوي جان يسمعون بجي منال )
روان : ( امسحت ادموعها وراحت لها ) منول حبيبتي اشفيج
منال : ( تبجي ) نامي يمي
فجر : روّون تعالي انتي معاها اهني انا انام تحت
روان : ( عيونها مدمعه ) مشكوره فجور
( ناموا عالسرير وتلحفو وروان قاعده تهديها )
روان : ( دموعها تنزل مو قادره تمسكم ) خلاص قلبي لا تبجين والله ما اتحمل اشوفج جذي
منال : ( تبجي ومغطيه راسها ماترد عليها )
روان : عفيه منول اترجاج لاتبجين
- تمت منال تبجي مده طويله لين هدت وعقبها بنص ساعه غفت –
روان : ( تمسك راسها ) والله راسي بينفجر ماتحمل خلاص
فجر : زين قصري صوتج لاتقوم
روان : انا بروح اطل على مشاري لايكون قاعد يبجي اهو بعد
فجر : خليج انا اشوفه ( راحتله وبعد دقيقه ارجعت )
فجر: نايمين يحليلهم
روان : الحمدلله
فجر : ( سكرت الليت وصار ظلمه عدل وراحت فراشها اللي بالارض ) يللا نامي الحين ولا تفكرين وايد باجر وراج روحه حق فروس
روان : زين فجر باجر من الصبح ابيج تودينا البيت
فجر : اوكي
روان : تصبحين على خير
فجر : وانتي من اهله
- اليوم الثاني قامو الساعه 10 ووصلتهم فجر بيتهم وبعد صلاة العصر خذاهم عمها وقط اليهال مع الخدامه عند خالتها و راحت تشوف فراس وكان على نفس حالته .. وشافت بدر اهناك .. وكانت كل ماتشوفه اتحس براحه .. وتكرر هالروتين كل يوم لين صار وقت رجعة بدر حق بريطانيا –

- بيت روان –
( روان تكلم بدر بالتلفون )
بدر : حياتي الله يخليج لاتبجين .. تره اهون وما اروح
روان : ( تبجي ) لا بدر كافي انك طوفت عليك محاضرات مهمة
بدر : والله لو تبين اوقف قيدي اوقفه بس ماشوفج بهالحاله
روان : لا والله مايرضيني انك تتأخر .. عشاني روح ودير بالك على نفسك
بدر : وانتي بعد ديري بالج واول ماتشترين تلفون عطيني الرقم وكل يوم دشي النت .. انا الحين رايح المطار.. راح اشتاقلج
روان : الله معاك .. مع السلامه
( سكرت الخط واقعدت تبجي مده بعدين دقت على فجر )
روان : ( ميته بجي ) فجر تعاليلي بسرعه
فجر : اشفيج؟؟ اليهال فيهم شي؟
روان : لا بس تعالي ابيج توديني المطار
فجر : بدر مسافر اليوم؟
روان : اي واحس خلاص الحين ماقدر اتصرف بروحي
فجر : تعوذي من ابليس كاني يايتج باي
( دشت الخدامه على روان لقتها تبجي )
خيريه : لا هبيبتي لا تبجين مايصير مشيري ومنول شوف انتي يبجي موزين
روان : وينهم الحين؟
خيريه : فوق
روان : ( تسمح دموعها ) قوليلهم يلبسون وانتي بعد لبسي بتروحون بيت خالتي
خيريه : اوكي
- بعد شوي اوصلت فجر و ودت اليهال بيتهم وراحت مع روان المطار –
( بالطريج )
فجر : تره يبين شكلج كنتي ميته من البجي المفروض ماتخلينهم يلاحظون انج باجيه
روان : فجر والله مادري شاللي احس فيه الحين .. احس مختنقه زياده عن قبل اهو كان مخفف علي الحين شسوي والله وجوده يمي كان ماعطيني قوه والحين بيروح
فجر : زين متى يرجع ؟
روان : بعد 3 شهور تقريبا
فجر : بتمر بسرعه لاتحاتين
روان : احس فقدت الكل .. امي وابوي والحين بدر.. كنت متعوده يكون يمي على طول
فجر : خلاص رايح يدرس مو رايح يجاهد .. بيرجع لج لا تبجين

- اوصلوا المطار وانزلوا –
روان : عطيني تلفونج ( خذته ودقت على بدر )
بدر : الو ؟
روان : بدر انا بالمطار
بدر : صج؟؟
روان : اي بشوفك قبل لا تروح
بدر : حياتي والله ونستيني تعالي صوب ستار بكس
روان : اوكي
- راحت ستار بكس لقته واقف بيده هاند باق –
فجر : زين انا انطرج اهني انتي روحي
روان : اوكي ( راحت له اقعدت معاه على طاوله )
بدر : ( مسك ايدها ) الحمدلله اني شفتج قبل لا اروح
روان : ( انزلت ادموعها )
بدر : روّون لا تخليني اهون عن السفرة .. والله ماعندي مانع اكشت بالدنيا كلها بس ماشوف دموعج
روان : ( تمسح دموعها ) خلاص ماراح ابجي .. راح اشتاق لك
بدر : كل يوم راح تشوفيني بالكام
روان : مايكفي
بدر : كلها 3 اشهر بالكثير وراح ايي واخطبج
روان : لا ماقدر .. اهلي توهم متوفين
بدر : انطرج لو طول العمر
روان : ( اضغطت على ايده حيل ) دير بالك على نفسك
بدر : يللا روحي البنت ناطرتج وانا بعد لازم اروح تأخرت
روان : الله معاك توصل بالسلامه
( مشى معاها لي المكان اللي يختمون فيه عالجواز )
بدر : يللا عمري .. شدي حيلج ابي روان القويه ماحب روان اللي كله تبجي .. انا حبيبتي عن الف ريال وتحب اتشرّح الناس
روان : ( اضحكت واهي تبجي ) أحبك .. مع السلامه
بدر : اموت فيج .. باي ( راح وروان تمت واقفه اتطالعه واهو يمشي )

= لحظة وداعك آه يا لحظة وداعك ياهي صعبه بالحيل صعبه =
= وانا الي ابي قربك وابي قلبك وابي بدنيتي تبقى معي تبقى =

= نسيت اني اعشقك ولا تنسى اني بفقدك =
= لحظة وداعك ياهي صعبه بالحيل صعبه =

وللي يحب يسمعها مع اللحن والله جد تعور القلب ولايقه عاللي حسته روان
~ اهداء لكم ~

[لامارا]

** البارت السادس **

بعد ما ارجعوا من المطار كانت حالة روان النفسية وايد تعبانه وكل شوي تبجي بس جدام اخوانها تبين انها طبيعيه على قد ماتقدر .. بس اللي ريحها انها كانت تكلمه كل يوم عالنت وشرت تلفون وكل يوم بينهم مسجات قبل لاتنام ..

- بعد شهر من سفرة بدر ( في بيت روان ) –

روان : واخيييييييييرا طلع الليسن ماني مصدقه
فجر : ( تظحك ) يللا شعليج كلها جم يوم وتاخذين السياره
- فجر حلوه بيضه عمرها 23 اصغر من روان بسنه جسمها متناسق شعرها لي نص ظهرها .. متحجبه بس تحب تكشخ -
روان : ابوج يهبل .. والله ماقصر معاي ساعدني وطلـّع الليسن بسرعه وراح معاي الوكاله يعني جد مادري اشلون اشكره
فجر : يبه اشفيج عادي ماسوه شي
روان : ماتدرين اشكثر محتاجه السياره اليهال راح يداومون بعد جم يوم وفروس لازم كل يوم اروحله
فجر : زين متى تفترين فيني الكويت ؟؟
روان : والله فجور جميلج ماراح انساه كنتي كل يوم اتيين تاخذين اليهال بيتكم وبعدين تردينهم
فجر : اي اصلا كنت اسوي جذي عشان توديني مشاويري لمدة شهر تعويض عن البانزين
روان : ( تظحك ) اي خلاص صار
فجر : زين متى بتقولين حق عمج ؟؟
روان : والله مادري كل ما ابي اقوله ينربط الساني
فجر : واي روّون اتبطين جبدي طلعتي حيل خوافه
روان : شكو خوافه؟؟ بس ماحب اسمع تعليقاته
مشاري : ( دش عليهم الصاله ) روااان شوفي يعقووب ماخذ مني شريط Hulk ومايبي يرده
فجر : هلك هذا الرجل الأخضر ؟؟
مشاري : ( معصب ) اي ويقول ما ارده لك
روان : مشاري حبيبي انتو ربع عادي ياخذه يلعب فيه و يرجعله لك
مشاري : ( يهز راسه ) لا مابي خل يرده
فجر : خلاص خله عنده الحين بس لاتخاف ماراح اخليه يركب معاي السياره اذا مارجعه لك
مشاري : زين ( بيطلع من الصاله )
روان : ( تمسكه ) لحظه تعال وين منال ؟
مشاري : معانا فوق
روان : زين يللا روح بس لا تتهاوشون انت ويعقوب تره بعدين كلش ما ايي بيتنا
مشاري : لا انا ما اتهاوش معاه حيل بس اصرخ عليه
روان : ولا حتى اتصرخ عليه لعبوا مع بعض مابي اسمع هواش تره صج صج بعدين ما ايي بيتنا مره ثانيه
مشاري : زيين خلاص ماقوله شي ( راح وخلاهم )
فجر : اي قوليلي اشلون اليهال الحين ؟
روان : والله اللي مصعبتها علي منال .. بعد عمري كل يوم بالليل تبجي ومشاري اذا شافها هم يقعد يبجي يبي امي وابوي
فجر : الله عطانا نعمة النسيان مع الأيام بيسكتون
روان : يارب
فجر : زين اشلون بدر ؟
روان : ( تبتسم ) يهبل يحليله .. بدو اختبارات عملية وامتحانات الله يعينه
فجر : اشتقتي حق الجامعه؟
روان : اي والله وايد
فجر : زين اذا خذيتي بدر ان شاءالله ليش ماترجعين تكملين ؟
روان : فجر يعني تبيني اهد اخواني؟
فجر : ( ساكته )
روان : ( عيونها دمعت ) بدر ماراح يخلص دراسته الا بعد 3 سنين تقريبا
اشلون اقدر أتزوجه ونسافر بره .. واخواني؟؟ امهم وابوهم راحو وهم انا اروح واخليهم؟؟ وفراس اللي للحين بغيبوبه .. صعبه فجر صعبه
فجر : زين اشراح تسوين ؟ قلتي حق بدر انج ماتقدرين تتزوجينه؟
روان : لا .. انا ودي انطره يخلص دراسته ويرجع اهني وساعتها اقدر اتزوجه
فجر : الله كريم
( انطق جرس الباب وراحت خيريه تبطله وطلع اللي ياي اهو عمها بو جاسم )
ابو جاسم : السلام عليكم
فجر و روان : وعليكم السلام
فجر : ( قامت ) يللا عيل انا اروح تأخرت
ابو جاسم : لا يبه انا اروح خليكم اخذو راحتكم
فجر : لا عمي صج تأخرت لازم ارجع البيت
روان : خيريه نادي يعقوب قوليله فجر بتروح
خيريه : اوكي
- بعد ماراحت فجر -
ابو جاسم : ها يبه اشلونكم محتاجين شي ؟؟
روان : لا عمي مو محتاجين أي شي الحمدلله
ابو جاسم : يبه حبيبتي لي متى تخليني احاتيكم خلاص مايصير لازم تسكنون عندي عشان قلبي يتطمن عليكم
روان : عمي الله يخليك والله جذي مرتاحين الحمدلله .. ولاتحاتينه ماراح يصير لنا شي ان شاءالله
ابو جاسم : بس يابنتي مثل ما انتي شايفه انا صاير دوامه كل يوم ياي ماخذج ورايحين المستشفى واليهال بيداومون وباخذهم كل يوم حق الدوامات
روان : ( تبلع ريجها ) عمي في شي بقولك اياه
ابو جاسم : خير يبه؟؟
روان : عمي انا ..
ابو جاسم : اشفيج ؟؟ تكلمي صاير شي؟
روان : عمي انا تدربت عالسياقه وخذت الليسن وبعد جم يوم استلم السياره
ابو جاسم : ( يطالعها واهو مصدوم ) ومتى صار كل هذا؟؟ واشلون؟
روان : ساعدني عمي بو محمد و ..
ابو جاسم : ( يقاطعها ) وهذا بو محمد ؟؟ عمج خالج عشان يساعدج؟؟
روان : اهو ريل خالتي واشفيها لو ساعدني
ابو جاسم : ( معصب ) وانا وين رحت؟؟؟
روان : عمي ماصار شي اهو كان عنده واسطه ومشى الموضوع بسرعه
ابو جاسم : وانا وين رحت؟؟ ليش ما قلتيلي عالاقل ؟؟ مو كل يوم اشوفج ؟؟ ليش ماعطيتيني خبر ؟؟
روان : ( ساكته )
ابو جاسم : وهذي السياره شنو دفعتيلها كاش ولا اشسالفتها؟؟
روان : ( بصوت واطي ) اي كيشتها
ابو جاسم : ( صرخ حيل ) تتصرفين بالفلوس ومن غير حتى ماتشاوريني ؟؟؟ هذا بو محمد يخليج تسحبين جم ألف ومن غير علمي ؟؟
روان : ( انصدمت من اصراخه وعصبت ) عمي الفلوس فلوسي شنو يعني لو سحبت منها حق سياره ؟؟ انا محتاجتها حيل
ابو جاسم : لا مو فلوسج بس .. تحتج في يتامى وقصّر .. ماتتصرفين بالفلوس على كيفج .. مني ورايح اتقوليلي قبل لا تسحبين جذي مبلغ مفهوم؟؟
( روان عيونها دمعت كلش ماتخيلت ان بيصير جذي وعمها بتجرأ يصرخ عليها بهالطريقه )
( منال ومشاري اركضو حق روان ولموها واهم يبجون )
روان : لا حبايبي لاتبجون ماصار شي ؟؟
مشاري : ( يبجي ويكلم عمه واهو يصارخ ) ليش تصرخ على روان ؟؟
روان : لا مشاري عيب حبيبي لا تصرخ
مشاري : بس اهو صرخ عليج
ابو جاسم : هالشي لازم احط له حد .. حتى تربية اليهال لازم يمسكها احد يعرف معنى التربيه عدل
روان : ( اتطالعه مصدومه وقربت اخوانها يمها ) شنو تقصد ؟
ابو جاسم : يللا فمان الله ( طلع وخلاهم )
---
- بعد هالسالفه بجم يوم روان استلمت سيارتها ( التيما لونها اسود ) و اليهال ردو المدرسه –
روان : ( بالطريج خذتهم من مدارسهم ) ها اشلون المدرسه اليوم؟
مشاري : زينه
روان : وانتي منول ؟
منال : زينه احسن من البيت
روان : زيين اشراايكم اليوم ناخذ فجر ويعقوب و انروح المركز العلمي؟؟
مشاري : ( حده استانس قام من مكانه ) صج ؟؟
روان : اقعد ولا ماكو روحه
مشاري : زين
منال : اندش السينما ولا بس صوب السمج؟
روان : انتي تقررين واحنا انسوي كل شي تبينه
منال : ( ابتسمت ) متى انروح؟
روان : بس ارجع من المستشفى تكونون جاهزين سيده انروح
- ارجعوا البيت تغدوا وناموا وروان راحت اتشوف فراس –
روان : دكتور يعني ماتدرون متى ممكن يصحى؟؟
الدكتور : انا قلت حق ابو جاسم هالكلام وارد اعيده لج .. ماكو شي بعيد عن ربج .. بس اللي شايفينه ان اهو داش بغيبوبه نتيجة الضربه اللي صارت براسه .. والله الشافي
روان : زين حالته الحين مستقره ؟؟
الدكتور : اي الحمدلله
روان : الحمدلله .. مشكور دكتور
الدكتور : العفو .. ماسويت شي
( اطلعت من المستشفى بسرعه ماكانت تبي تواجه عمها من عقب ذاك اليوم )
روان : ( دقت على بيتهم ) الو .. خيريه عفيه قومي اليهال خل يلبسون وقوليلهم روان يايه بالطريج .. وانتي بعد لبسي بنطلع .. يللا مع السلامه
( دقت على فجر )
روان : الو فجور .. لاتقولين لأ .. بنروح الاكواريوم ونبيكم اتيوون معانا انتي ويعقوب
فجر : وااي روّون مالي خلق بكمل نومتي نعسانه .. حتى المغرب للحين ما أذن
روان : فجور حرام عليج خل اونس هاليهال والله صارلهم أكثر من شهر ماشافو يوم حلو .. يللا عاااد عفيه قومي عشان خاطري
فجر : زين زين قمت لاتحنين .. انتي بتمريني ؟
روان : اي لأنج ما ركبتي معاي ولا مره من سقت
فجر : صراحه خايفه على عمري
روان : ( تظحك ) زين اقول قومي عااد تره والله ازعل عليج
فجر : ( تظحك ) لا اذا زعلتي راح اموت
روان : فجوووور عااد قومي بلا مصاخه
فجر : يللا والله قمت خل اقول حق يعقوب يلبس.. باي
- راحو المركز العلمي ودشو الآي ماكس ( سينما ثري دي داخل المركز العلمي ) .. وبعدها دشو الاكواريوم –
مشاري : روّووون تعالي شوفي التمساح اشلون يخز يخررع
روان : ( تظحك ) قصر صوتك فضحتني
يعقوب : اي والله اشكبره يقدر يبلعك بلقمه وحده
فجر : الحمدلله والشكر طاع شيتخليون
روان : ( تظحك ) يحليلهم مستانسين
منال : يللا امشو من اهني بشووف القرش
روان : اي يللا امشو
مشاري : لا نطري انا قاعد اخزه واطق الجام وللحين ماتحرك
منال : يعني التمساح بيخاف منك وينحاش؟؟ امش خلاص عاد والله نروح عنك
مشاري : لا شكله مو صجي اخاف يقصون علينا
منال : يااربي .. مشاري انت انسان غبي
روان : ( تظحك ) منول اشفيج عليه .. يللا امشوا لانروح عنكم
يعقوب : يللا بسبقك حق القرش
مشاري : انطرني لحظه ( لحقه )
روان : منول اسبقونا واحنا لاحقينكم
منال : زين ( راحت ورا الصبيان )
فجر : روان مو ملاحظه ان منول قاعده تتصرف تصرفات كبار .. صارت ماتعجبها سوالف اليهال
روان : ( تظحك ) اي شكلها راح تكبر .. الله يعيني
( رن تلفون روان رنة مسج )
فجر : اكيد بدر
روان : ( تقرا المسج وتظحك ) اي بدر .. يقول ديري بالج واذا واحد خزج قوليلي عشان اكسره
فجر : حشى سوبرمان مو بدر .. ايي من اخر الدنيا ويكسره ويرجع
روان : ( تظحك ) بدزله على قولة فجر حشى سوبر مان مو بدر ( اكتبت المسج ودزته شوي يالها رد منه )
روان : يقول قوليلها انا عن عشر سوبرمانات
فجر : ( تظحك ) هذا واهو دارس بره يقول سوبرمانات عفس ابو الانجليزي
روان : لا تتطنزين عليه
فجر : يمه منج اللي لقى احبابه نسى اصاحبه يعني ؟
روان : مممم تقدرين تقولين
فجر : امبيه لا مو طبيعيه اشكره يعني قطيتيها بويهي
روان : ( تظحك ) لا والله اتغشمر معااج اثنينكم نفس المستوى
- خلصو من الاكواريوم وتعشو وودت فجر ويعقوب .. وارجعو البيت –
ثاني يوم العصر روان راحت المستشفى اتشوف فراس عقب اطلعت مرت على فجر اقعدت عندها شوي وكانت ناسيه تلفونها بالسياره و اهي راجعه شافته الا تلقى 7 مسد كول من بيتهم خافت ودقت بس محد يشيله أول مادشت الفريج انصدمت بسيارتين مطافي وسيارة اسعاف وسيارة شرطه عند بيتهم حست ان الدم كله نزل بريلها –
روان : ( انزلت من السياره وريلها غصب شايلتها اسألت الشرطي ) شنو صار ؟؟
الشرطي : انتي ساكنه اهني؟
روان : اي
الشرطي : لا تخافين ماكو شي بس أي احد يتصل عالثلاث سبعات تطلع الاسعاف والمطافي والشرطه احتياط .. تفضلي ماكو الا الخير
( دشت البيت لقت داخل اثنين من المطافي معاهم عمها بو جاسم )
ابو جاسم : جزاكم الله خير .. تعبناكم معانا
الشاب : لا اشدعوه ماسوينا الا الواجب والحمدلله على سلامته ( اطلعو من البيت )
ابو جاسم : انتي وين كنتي ومخليه اليهال بروحهم ؟
روان : اشصار ؟؟
ابو جاسم : جاوبيني اول على سؤالي ؟؟
روان : لا اول بعرف اشصار اشفيهم اخواني صارلهم شي؟؟
ابو جاسم : ودام خايفه عليهم لهالدرجه ليش ماقعدتي عندهم ؟؟ وين رحتي وخليتيهم ؟
روان : كنت عند فراس بعدين مريت شوي قعدت عند فجر ماطولت ويـ..
ابو جاسم : ( يصرخ ) حضرتج رحتي تستانسين و اخوج صارله ساعتين مقفول عليه باب الحمام .. والخدامه اتقول دقت عليج لين اعيزت وماتردين عليها اخر شي اتصلت على المطافي وبطلو الباب لأن كان يبجي وخايف
روان : ( منصدمه ) اشلون انقفل عليه؟؟
ابو جاسم : ( يصرخ ) الحين هذا اهو المهم ؟؟ اخترب القفل وماتبطل جذي من ربج .. الله سبحانه حط هالحادث عشان يبين لج انج مو قد المسؤوليه والعيال من اليوم يرجعون معاي البيت
روان : لا اليهال بيتمون عندي
ابو جاسم : لا .. وانتي بعد راح اتيين معاي
روان : لا هذا بيتنا وماراح نطلع منه
ابو جاسم : يعني تبين واحد من اليهال يموت يالله تحسين ان لازم يكونون بين ام وابو يديرون بالهم عليهم ؟؟
روان : انا امهم وابوهم
ابو جاسم : اي فعلا وايد واضح انج امهم وابوهم
روان : عمي بكل بيت ممكن يصير اي شي والحمدلله الله ستر ماصار شي جايد
ابو جاسم : وتبين تنطرين لين يصير شي قوي ؟؟ روان انا اتكلم عربي ولا هندي؟؟ اليهال يحتاجون رعاية بين عايله .. اخت وحده وبعمر الشباب ماتسويلهم شي
روان : اذا كان هذا سببك خلاص نسكن عند خالتي حصه
ابو جاسم : لا خالتج عندها صبيان وواحد منهم بعمر مراهقه والثاني جم سنه ويبلغ ومنال بنت المفروض تخافين عليها
روان : عمي بس هذيله اعيال خالتها
ابو جاسم : لأ يعني لأ .. منال راح تكبر واللي اهناك مراهق ماقدر اخليها تعيش عندهم وحتى ريل خالتج مو محرم لكم .. خلاص كلمه وحده ماكو غيرها راح تعيشون عندي
روان : ( تتكلم بعصبيه و عيونها مدمعه ) بس حتى انت عندك شاب نفس الشي يعني
ابو جاسم : انا فكرت فيها .. وقلت منعا للحرج بخليه يملج عليج وتتزوجون بعد سنه
روان : ( منصدمه ) نعم؟؟
ابو جاسم : عموما هالموضوع مو وقته الحين .. اليهال بيرجعون معاي اليوم واذا انتي ماتبين اتيين كيفج بس اهم قصّر وانتي ماتعرفين مصلحتهم كثري
-----------------------------------------------------

توقعاتكم للبارت الياي

[لامارا]

** البارت السابع **

ابو جاسم : عموما هالموضوع مو وقته الحين .. اليهال بيرجعون معاي اليوم واذا انتي ماتبين اتيين كيفج بس اهم قصّر وانتي ماتعرفين مصلحتهم كثري
روان : عمي انت من صجك؟؟
ابو جاسم : خيريه .. خيريه
خيريه : نام بابا ؟؟
ابو جاسم : روحي نادي اليهال
( روان واقفه مو قادره تتكلم بس دموعها تنزل من القهر )
خيريه : ( اتطالع روان ) بابا ..
ابو جاسم : خيريه روحي نادي العيال بسرعه
خيريه : ( معصبه ) بابا .. مشاري منول واجد يبجي والحين نايم حرام مسكينه خلي نايم
ابو جاسم : زين خلاص روحي الحين
خيريه : ( خلتهم واطلعت )
ابو جاسم : ( تنهد ) اعوذ بالله منك يا ابليس .. يبه روان قعدي خل اكلمج
روان : ( امسحت ادموعها واقعدت )
ابو جاسم : ( قعد يمها ) روان أدري انج حاطه في بالج اني واحد ظالم .. بس مثل ما انتي شايفه انا ريال ملتزم واخاف ربي وعمري ماظلمت احد .. يايبه تره تربية اليهال وخصوصا بهالعمر مو شي سهل عشان جذي انا طلبتج اكثر من مره انكم تعيشون عندي بس انتي رافضه هالشي .. و انا صرخت عليج من الموقف اللي شفته .. ماتدرين اشكثر خفت يوم لقيت الاسعاف والمطافي عند بابكم .. يبه انا مابيج تزعلين مني انا عمج واخاف عليكم وكل اللي ابيه انكم تعيشون عندي واليهال يتربون ويكبرون تحت عيني
روان : ( تنزل دموعها ) ادري بس .. ( بجت و ماقدرت تكمل )
ابو جاسم : ( حط ايده على جتفها ) تعوذي من ابليس وسمي بالرحمن واذا غلطت بحقج فوالله من خوفي عليكم
روان : ( تمسح دموعها ) عمي انت تبي تاخذنا بيتكم وتزوجني جاسم وانا مابي هالشي
ابو جاسم : ( يبتسم ويشد لحيته ) يبه يعني انتي شايفه لحيتي هذي تركيب؟؟
روان : ( تطالعه مو فاهمه )
ابو جاسم : انا ريال مطوع واخاف ربي وادري ان الزواج من غير موافقتج مايجوز شرعا .. يمكن قلت اللي قلته بلحظة غضب بس ماكان قصدي اني بزوجج ولدي غصب .. كل اللي قصدته ان اهو ولد عمج و انتي بنت مسيرج بتتزوجين .. فقلت لو تتزوجتو راح يكون احسن لي ولج.. منها انتي تكونين مع اخوانج بنفس البيت ومنها آنا اتطمن عليج.. وتره جاسم قلبه طيب .. انتي فكري بالموضوع وانا ماراح اجبرج على شي انتي ماتبينه
روان : ( ارتاحت من كلامه ) مشكور عمي .. بس ميخالف تعطيني آخر فرصه وتخليني اعيش اهني مع اخواني ؟؟
ابو جاسم : لا روان .. دام انا موجود ماله أي داعي ان تعيشون بروحكم .. باجر بتعيشون عندي .. ولاتصعبينها علي اكثر بارك الله فيج
روان : ( اسكتت )
ابو جاسم : يللا خطاكم السو .. فمان الله ..
روان : مع السلامه
( أول ماراح العم اصعدت روان فوق لقت مشاري ومنال نايمين باستهم وراحت غرفتها ودقت على فجر )
روان : الو .. فجر ماتقدرين اتيين عندي؟
فجر : لا الوقت تأخر ماقدر.. ليش صاير شي؟؟
روان : لا بس ضايق خلقي
فجر : روّون صوتج متغير .. قوليلي اشصاير؟؟
روان : عمي .. يبينا نسكن عنده من باجر
فجر : شوفي انا ادري ان هالشي مضايقج .. بس امس ابوي تكلم بهالموضوع وصح كلامهم مايصير بنت تعيش بروحها بالبيت ومعاها يهال صعبه تره .. تعالي عيشي عندنا
روان : عمي مو راضي .. وباجر لازم انروح بيته
فجر : والله عمج حيل نحيس شيصير لو خلاج تسكنين عندنا
روان : خلاص فجر .. انا بسكره الحين .. انتي شابكه؟
فجر : لا بنام
روان : اوكي انا بشبك عشان اكلم بدر .. باي
فجر : مع السلامه
- دشت روان النت لقت بدر شابك حاطه Away –
روان : بدر موجود؟؟
بدر : هلاا حيااااااااااااااتييييييي .. زيين شبكتي والله قاعد ادرس ومخليه away ناطرج اتدشين
روان : باجر عندك امتحان؟
بدر : شفوي بس
روان : زين عيل افصل وادرس
بدر : صارلي 3 ساعات ناطرج عشان تقوليلي افصل وادرس؟
روان : شسوي اخاف مايمديك تدرس
بدر : خلي عنج هالموضوع وقوليلي شخبارج مع اليهال؟
روان : الحمدلله أحسن من قبل
بدر : زين وفروس؟
روان : نفس ما اهو
بدر : الله يقومه بالسلامه
روان : ان شاءالله .. بدر ولهت عليك وايد
بدر : و انا اكثر حياتي هانت مابقى شي و اكون عندج بالعطله
روان : صار شي اليوم وبقولك اياه
بدر : عسى خير؟
- روان قالتله عن اللي صار مع مشاري و ان عمها يبيها تسكن عنده بس مايابت طاري جاسم -
بدر : بصراحه بعد اللي صار لاتزعلين مني .. بس انا اتطمن عليكم اكثر اذا سكنتي عنده
روان : بس انا ما آخذ راحتي اهناك .. وبيجبرني على وايد اشياء
بدر : قصدج الحجاب؟
روان : هذا واحد من الأسباب
بدر : يعني انتي مو مقتنعه ان الحجاب ستر ؟
روان : بلى بس مادري ماحب يتحكم فيني
بدر : روان قلبي هذا عمج وماجبرج على شي يضرج بالعكس تره هالشي حق مصلحتج والله
روان : ادري بس هم خايفه من العيشه اهناك والسبه مرت عمي كلش ماتحبنا خايفه تقول كلمة تجرح اليهال
بدر : لا تخافين ان شاءالله ماكو الا كل خير
( وتمت تسولف مع بدر مده طويله لين تعبت وافصلت عشان تنام )
- اليوم الثاني بعد الغدى –
روان : مشاري .. منال اسمعوني عدل بقولكم شي ومابي بجي زين
منال ومشاري : زين
روان : من اليوم بنسكن عند عمي حمد
منال : ( انصدمت ) ليش؟؟ ماابي
روان : حبيبتي منول عمي امس كان وايد معصب من اللي صار حق مشاري وخايف علينا ومايبي نعيش بروحنا .. عشان جذي بنعيش عنده
منال : ( اتصرخ على مشاري ) كله منك .. لو ماحبست نفسك بالحمام جان ماصار هالشي
مشاري : ( يصرخ ) انا شكو؟؟ اهو بروحه انقفل
روان : خلاص .. لاتصرخون .. واليوم راح انروح .. خلو خيريه تساعدكم بالملابس
منال : انا ماراح اروح معاكم
روان : منال الله يخليج لا تسوين جذي فيني .. خلينا انروح من غير مشاكل
منال : ماحب اسكن عند عمي
روان : انا راح اكون معاكم و ماراح اخليكم بروحكم
منال : ( اسكتت ) واصعدت فوق
- خذوا جنطتين فيهم ملابسهم وبعض الأشياء المهمه وراحو بالطريج حق بيت عمها –
( رن تلفون روان )
روان : الو .. هلا عمي .. اي احنا بالطريج .. شوي ونوصل .. مع السلامه ( سكرت التلفون )
مشاري : روان ؟؟ الحين خلاص راح انعيش عندهم على طول؟
روان : اي حبيبي
مشاري : وعادي كل يوم نطلع ؟ ولا لازم نقعد بالبيت؟؟
روان : ( تبتسم ) اكيد عادي واذا تبي بعد كل يوم انروح حق بيت خالتي هم عادي
مشاري : ( يبتسم ) منول شفتي عادي
منال : ( ساكته )
- اوصلوا بيت العم بو جاسم ودشوا -
ابو جاسم : هلا بعيالي هلا يبه حياكم الله
روان : الله يحييك عمي .. اشلونج خالتي
ام جاسم : هلا
ابو جاسم : ( يكلم اليهال ) ها يبه اشلونكم مع المدرسه؟
منال ومشاري : الحمدلله
ابو جاسم : الحمدلله .. اذا طافتكم دروس قولولي انا اييب لكم مدرسين
مشاري : روان درستنا كل اللي طاف
ابو جاسم : بارك الله فيج يا بنيتي
روان : تسلم عمي
مشاري : عمي انا ابي غرفه بروحي
ابو جاسم : ( يظحك ) اي انت لك غرفه خاصه فيك.. ومنال وروان مع بعض
مشاري : صج ؟؟ وين داري بشوفها
ابو جاسم : ام جاسم وديهم يشوفون غرفهم
ام جاسم : خل يروحون بروحهم يدلون الغرفه اللي كانو فيها اهي راح تكون حق البنات واللي يمها حق مشاري
ابو جاسم : ميخالف قومي معاهم احسن
( قامت ام جاسم معاهم ودتهم غرفهم وروان حست بضيق لأن هذا اول يوم وجذي عاملتهم الله يستر من الياي )

----------------------------

[لامارا]

** البارت الثامن **

ابو جاسم : ميخالف قومي معاهم احسن
( قامت ام جاسم معاهم ودتهم غرفهم وروان حست بضيق لأن هذا اول يوم وجذي عاملتهم الله يستر من الياي )
ام جاسم : هذي غرفة مشاري
مشاري : خيريه حطي جنطتي اهني
ام جاسم : ( اطلعت ودشت الغرفه يمها الحقوها البنات ) وهذي غرفتكم انتي ومنال .. ( خلتهم وانزلت تحت )
- روان دشت غرفتها اهي و منال وخيريه يت وراهم شايله جنطة ملابسهم .. الغرفه كان فيها سرير واحد بس كبير -
منال : ( اتطالع روان ) ابي سرير بروحي
روان : ( تبتسم لها ) بقول حق عمي واذا تبين غرفتج كلها اييبها اهني هم راح اقوله
منال : لا .. غرفتي لا تجيسونها لأن راح نرجع اهناك على يوم
روان : ( اتطالع اختها ومنصدمه من ردها اتحس انها وايد اكبر من عمرها ) خلاص انييب لج سرير واحطه بهالزاويه .. اوكي؟؟
منال : اوكي
روان : زين الكبت مشترك بينا عادي ؟
منال : اي عادي
روان : خيريه عفيه دخلي ملابسنا بالكبت .. ملابس البيت سفطيهم وملابس الطلعه تتعلق
خيريه : اوكي
روان : انا بروح ارتب ملابس مشاري
- راحت حق مشاري دشت عليه لقته مبطل جنطته ويطلع الملابس –
روان : شتسوي؟؟ خلهم عنك انا ارتبهم بالكبت
مشاري : لا بس بشوف خيريه حطت بنطلوني الجيشي ولا نسيناه ؟
روان : عادي اذا موموجود انييبه يوم ثاني
مشاري : ( رفع راسه وطالعها واهو معصب ) لا .. ابيه الحين هذا كان آخر شي ابوي شراه لي
روان : ( حست بنغزه قويه بقلبها ) حبيبي خلاص اقعد عالسرير وخلني ادوره لو مالقيناه باجر من الصبح اروح اييبه لك
مشاري : زين ( قام قعد عالسرير )
روان : ( قاعده اتدور بالجنطه وقلبها معورها من اللي قاله ) لقييته مو هذا اهو؟؟؟
مشاري : ( نزل من السرير وخذاه منها واهو مستانس ) ايي هذا
روان : خلاص خله اهني وروح حق منال انا بحط ملابسك بالكبت
مشاري : خليه فوق عشان بلبسه اذا طلعنا
روان : زين روح الحين
( طلع مشاري من الغرفه وتمت روان ترتب الملابس وتتذكر امها وابوها وعينها مليانه دموع )

يا حلو الايام لو ترجع على كيفـــــــي
ما كان قلبي شكى فرقا مواليفـــــــــه
كانوا بقربي ولا يحتاجون تكليفـــــــــي
واليوم راحوا ودمعي صعب توقيفــــه
من عقب الاحباب مكسورة مجاديفــي
غرقان والموج يلعب بي على كيفــــه

( واهي ترتب الملابس دش مشاري عليها جان تمسح دموعها قبل لا يشوفها )
مشاري : روان ماخلصتي ؟؟ منال نامت وآنا نعست ابي انام
روان : زين نام شوي وانا بروح حق فروس
مشاري : اوكي
روان : لا تجيس شي بعدين خيريه تكمل اللي بقى .. واذا قمت قول حق منول تدرس وانا اذا ييت اشوف شنو عندك واجبات اوكي؟
مشاري : اوكي
- اطلعت لقت خيريه بويهها –
روان : منول نايمه ؟
خيريه : اي نامت وانا خلاص سويت ملابس كله
روان : زين انا بروح المستشفى حق فروس انتي كملي سوي ملابس مشاري و لا تخلين اليهال ينامون وايد .. قعديهم قبل أذان المغرب
خيريه : ساعه 5 زين؟
روان : اي زين
- راحت غرفتها البست جينز وبلوزه وسوت شعرها عنقوص وخذت جنطتها .. انزلت تحت لقت جاسم وام جاسم –
روان : ( شافت جاسم ارتبكت تذكرت كلام عمها ) السلام .. اشلونك جاسم
جاسم : هلا والله روان اشلونج انتي؟ واشلون اخوانج ؟
روان : الحمدلله .. واخواني بخير واهم نايمين الحين
ام جاسم : شكلج طالعه؟؟
روان : اي بروح اشوف فراس
جاسم : اي انا وابوي مرينا عليه الصبح الله يقومه بالسلامه
روان : تسلم مشكور .. يللا عن اذنكم ( اطلعت )
ام جاسم : ابوك لو شافها طالعه بهالشكل جان تضايق حيل مسكين وايد تعبان بسبة هالبنت
جاسم : يمه ميخالف تره توه متوفين اهلها خل يصبر عليها مايصير بيوم وليله يبي يغير كل شي تعودت عليه
ام جاسم : بس اهي تعودت عالغلط واهلها كانو سامحين لها بهالشي بس احنى مانرضى بالغلط
جاسم : انا ماقلت شي بس عالأقل عطوهم وقت ينسون.. بعدين خل يكلمها بهالمواضيع على راحته
ام جاسم : اوووه عطوهم وقت وعطوهم وقت مادري ليمتى بنصبر عليهم ( وتمت تتحلطم )
جاسم : استغفرالله .. انا قايم انام
ام جاسم : اي روح انت بعد وخلني بروحي .. هذا اللي فالح فيه
---
- بالسياره روان دقت على فجر –
روان : انتي كل ما ادق عليج نايمه ؟؟
فجر : يعني انتي اتدقين العصر طبيعي الناس نايمه وبعدين انا اداوم وارد تعبانه مو مثلج بطاله
روان : ( تضايقت من كلمتها ) انجبرت عالبطاله .. ويللا أخليج كملي نومتج
فجر : روان والله ماقصدت شي لاتزعلين تره والله انا نايمه ومخرفه
روان : لا عادي حبيبتي ماقلتي شي .. مع السلامه
فجر : اكيد مازعلتي؟؟
روان : اي اكيد
فجر : زين اشوه .. يللا عيل مع السلامه
روان : باي
واهي عند الاشاره دزت حق بدر مسج اكتب فيه :
" انا رايحه اشوف فراس دعواتك لي .. وان شاءالله يكون الامتحان سهل موفق يارب "
- اول مادزته الا اللي وراها يطق هرن حيييل عشان تمشي –
روان : اشدعوه عليك راح تموت .. ماصارلها ثانيه شبت خضره
- بعد شوي وصلها مسج من بدر مكتوب فيه -
" nothing is IMPOSSIBLE ..cuz impossible it self says I 'M POSSIBLE "
// ماقدر اترجمه لأن معناه احلى واهو انجليزي .. بس حق اللي مايعرف انجليزي معناه باختصار ( ماكو شي مستحيل ) //
روان : ( قرت المسج وابتسمت ) الله يحفظك لي
- اوصلت المستشفى وانزلت راحت حق فراس تمت مده واقفه اتطالعه وقلبها معورها وتدعيله –
الدكتور : اشلونج اخت روان
روان : ( فزت لأن ما كانت تدري ان واقف وراها ) بسم الله
الدكتور : آسف ماكنت قاصد اخرعج
روان : لا عادي بس انا كنت سرحانه ومانتبهت
الدكتور : الله يلوم اللي يلومج .. لا تخافين على فراس اهو ياهل والأطفال احباب الله .. وان شاءالله يرجع لكم وتشوفينه يراكض جدامج
روان : آمين يارب .. مشكور دكتور والله كلامك ريحني
الدكتور : ( يبتسم ) والله اني كل يوم امر عليه اول واحد واشوف اذا صار بحالته تغيير او لأ
- الدكتور طويل و تقريبا بآخر الثلاثينات شعره كثيف اسود –
روان : ( انحرجت من نظراته ) تسلم يعطيك العافيه
الدكتور : الله يعافيج ماسوينا الا الواجب .. تبين قهوه شي ؟
روان : ( ارتبكت ) لا لا مابي شي مشكور
الدكتور : ( يطالعها ويبتسم ) زين عيل انا اخليج اشوفج باجر ان شاءالله
روان : مع السلامه
( أول ما راح الدكتور روان بسرعه طلعت تلفونها ودزت حق بدر هالمسج )
" بدر تره الدكتور يطالعني بنظرات غريبه وقالي تبين قهوه ؟ ان بعض الظن اثم بس انا مارتحت حق نظراته "
- اول مادزته تحسفت -
روان : ( بقلبها ) ياربي الحين اكدر خاطره عالفاضي .. زين ماقدرت انطر لين يشبك عالاقل؟؟
- شوي رن تلفونها وكان بدر روان انصدمت لأن داق بالعاده يدز مسج .. راحت الممر ودرت عليه –
روان : الو
بدر : ( معصب ) وينج الحين ؟
روان : بالمستشفى
بدر : ووين الدكتور الزفـ..
روان : والله راح وماصار شي اشفيك معصب
بدر : روان لاتعطينه ويه زين؟؟ وان تمادى معاج قوليلي موتسكتين و بالعطله اذا ييت ادشله المستشفى وربي اكسره
روان : زين خلاص بدر ماصار شي
بدر : يللا اذا خلصتي وشفتي فراس طلعي ماله داعي تقعدين بروحج
روان : اوكي الحين امشي
بدر : زين يللا باي
روان : باي ( تمت مده اتطالع الشاشه مصدومه )
روان : ( بقلبها ) اشهالمسج اللي دزيته؟؟ اهو أي شي ينقال ؟؟ والله ساعات احس اني سخيفه
- اطلعت من المستشفى جان اتدق عليها فجر –
روان : الو
فجر : روان حبي تعالييلي
روان : لا ماقدر بروح ادرس اليهال
فجر : اخاف زعلانه وماتبين اتيين
روان : لا اشدعوه والله ما ازعل منج بس صج بدرسهم
فجر : زين قعدي عندي شوووي و روحي .. ضايق خلقي والله
روان : زين و آنا اقدر على حنتج؟
فجر : ( تظحك ) لا طبعا ماتقدرين .. يللا ناطرتج .. باااي
روان : باي
- اوصلت عند بيت خالتها وانزلت –
يعقوب : وين مشاااري ؟؟ ليش مايبتيه معاج ؟
روان : لأن كان راد من المدرسه تعبان ونام
يعقوب : اوووففففففف
ام محمد : يعقوب عيب شنو اوف؟؟
روان : ( تبتسم ) ياهل خليه .. انا بصعد حق فجور
ام محمد : اي حبيبتي روحي
( راحت اصعدت و دشت غرفة فجر )
فجر : ( قامت سلمت عليها ) ولهت عليج والله
روان : انا بعد وتره عندي سوالف اقولها لج
فجر : قعدي بس خل اقولهم اييبون عصير وارجع
روان : لا لا عفيه مابي وماراح اطول قعدي بسولفلج
فجر : زين يللا سولفي ( اقعدت جدامها عالسرير وتربعت )
روان : عمي خطبني حق جاسم
فجر : شنووو؟؟؟!!!
روان : اي امس كلمني بهالموضوع
فجر : وليش انا مادري ؟؟
روان : امس صارت السالفه وكاني قاعده اقولها لج
فجر : لا يعني ليش مادريت امس أول ماصارت
روان : فجر عاد اشفيج لا تطلعين من الموضوع و خليني اكمل
فجر : زين زين كملي واشقلتيله ؟
روان : قلتله مابي جـ..
فجر : ( قاطعتها ) و اشرد عليج؟؟
روان : ( عصبت ) اي خليني اتكلم ماصارت سالفه قطعتيها الف مره
فجر : اي شسوي مو مني والله انصدمت كملي خلاص بسكت
روان : شوفي بكمل واذا قاطعتيني والله اروح زين ؟؟
فجر : زين كملي والله ماراح اتكلم ( حطت ايدها على حلجها )
روان : قلتله مابي جان يقول فكري بالموضوع واحسن لج عشان تكونين يم اخوانج وهم انا اتطمن عليج لأن جاسم طيب وقام يمدح فيه
( فجر حاطه ايد على حلجها وايدها الثانيه ارفعتها جنها تستأذن عشان تتكلم )
روان : فجر عااد وتكلمي والله اني منقهره مالي خلق ملاقتج
فجر : اي اشدراني خفت اتكلم اتقولين قاطعتج .. لا بس يعني جد مافهمت اذا تزوجتي بدر اليهال بيتمون عند عمج ؟
روان : اي هذا اللي فهمته
فجر : زين عادي .. اهو يعني لو مو متوفين اهلج الله يرحمهم وانتي تزوجتي هم كنتي راح تطلعين بيت بروحج
روان : بس في فرق .. اهني بيكونون عند عمي ومرته .. وانا ماقدر اخليهم
فجر : عيل اشبتسوين ؟؟
روان : مادري مابي افكر بشي وبنطر بدر يخلص دراسته بعد 3 سنين والله كريم
فجر : زين قلتي حق بدر هالسالفه ؟
روان : منصجج ؟؟ ماقدر اقول لو شنو .. قلتله عن الدكتور انه يطالعني بنظرات غريبه دق وصرخ علي وحسيته حيل منقهر فاشلون اقوله ان عمي يبيني حق ولده وانا عايشه معاهم بنفس بيت ؟؟
فجر : زين وانتي شكو اتقوليله عن نظرات الدكتور صج لقافه
روان : اي والله اعترف اني ملقوفه بس مادري شاللي خلاني اقوله .. زين فجور والله تأخرت وراي تدريس لازم اروح الحين
فجر : اوكي امشي اوصلج لي الباب
روان : يللا
( راحت و اوصلت بيت عمها )
روان : السلام عليكم
ابو جاسم : وعليكم السلام ورحمة الله وبركاته .. يبه قعدي شوي بكلمج
روان : ( اقعدت ) هلا عمي
ابو جاسم : يبه انا اهني بحسبة ابوج يعني اذا بتروحين مكان عطيني خبر
روان : اي انا قلت حق خالتي اني بروح المستشفى صح خالتي ؟
ام جاسم : اي
ابو جاسم : يعني انتي طول هالوقت عند فراس ؟؟
روان : لا قعدت عند خالتي شوي
ابو جاسم : اي مو لازم تعطيني خبر اول ؟ عالأقل يكون عندي علم اذا لا قدر الله صار شي صح يبه ؟؟
روان : ( تضايقت من كلامه بس ماكانت تبي النقاش يطول ) اي صح
ابو جاسم : وعندي معاج موضوع ثاني واتمنى تتقبلينه وماتتضايقين
( روان اتطالع ام جاسم ماحبت يكلمها واهي جودها )
ابو جاسم : ( فهم نظرة روان ) قومي معاي الصاله الثانيه
ام جاسم : وليش يعني ؟؟
ابو جاسم : ( عطى ام جاسم نظره معناها ميخالف عشان خاطري ) شوي بس ماراح نطول
( راحت معاه روان واقعدت يمه )
ابو جاسم : انا فتحت معاج هالموضوع من قبل والحين بفتحه مره ثانيه .. يبه انتي كبيره ماشاءالله وصرتي عروس والحجاب فرض مو سنـّه وانا والله لأني احبج قاعد اقولج تحجبي .. مايصير أي ريال يشوف شعرج الا محارمج وريلج اذا تزوجتي ان شاءالله
روان : ( ساكته )
ابو جاسم : تدرين كل واحد يشوف شعرج وتعجبينه تاخذين اثمه فوق اثمج ؟؟
روان : ( ساكته وتلعب بأظافرها ماتدري شترد عليه )
ابو جاسم : وهم عشان اختج .. ابيها تشوفج قدوه لها وتقلدج
روان : ان شاءالله راح اتحجب قريب
ابو جاسم : بارك الله فيج ريحتيني
روان : عمي انا الحين لازم اروح ادرس اليهال
ابو جاسم : روحي درسيهم واذا احتجتي شي قوليلي ( يبتسم لها ) تره انا جامعي
روان : مشكور عمي .. عن اذنك ( قامت وخلته اصعدت فوق حق اخوانها )
روان : ( تحاول ماتبين لهم انها متضايقه ) اهليين بالحلويين ها بديتو دراسه ومانطرتوني؟
منال : انتي تأخرتي .. وماعندي شي بس حفظ 10 آيات وحفظتهم و ناطرتج اتسمعينلي
روان : وانت مشاري؟
مشاري : عندي واجب حساب و عربي
روان : وانتو للحين اتسمونه حساب ؟
منال : لا انا اقول رياضيات
روان : ( تبتسم ) اي احسن من حساب
مشاري : زين شالفرق ؟ ليش احسن؟
روان : مادري انا احس حساب كلمة قديمه.. المهم ماعلينا يللا اول خل اسمّع حق منول بعدين ادرسك زين ؟
مشاري : اروح داري ؟؟
روان : لا اقعد اهني لين اخلص منها وادرسك
مشاري : زين
( خلصت درستهم وعقب اقعدت تسولف معاهم )
خيريه : ( دشت عليهم ) روان بابا يقول انتي مشاري منال كله ينزل تحت
منال : انا مالي خلق انزل
روان : ميخالف حبيبتي عشان خاطري امشي نقعد معاهم
منال : شنو اهو غصب ؟
روان : لا ماقلت غصب .. قاعده اقولج عشان خاطري
منال : زين
( انزلو تحت اقعدو مع ام جاسم وابو جاسم )
مشاري : عمي ابي تلفزيون بداري
ابو جاسم : ليش يبه ؟
مشاري : عشان العب بليستيشن .. في بيتنا كان عندي تلفزيون بداري
ابو جاسم : حااضر احطلك تلفزيون بدارك .. وانتي منول تبين شي يبه ؟
منال : اي ابي سرير
ابو جاسم : السرير انا مفكر فيه منزمان ومن باجر بيكون عندج
روان : تسلم علي
ابو جاسم : الله يسلمج .. انتي بعد أي شي محتاجته قولي
روان : لا مابي شي تسلم
- دش جاسم البيت –
جاسم : السلام عليكم
ابو جاسم : هلا يبه وعليكم السلام ورحمة الله
جاسم : ( طالع روان ) اشلونج روان ؟
روان : الحمدلله
جاسم : دوم ان شاءالله .. انا رايح الغرفه عن اذنكم
ام جاسم : لا يمه وين اقعد بعد شوي بنحط العشى
ابو جاسم : لا خليه يروح يرتاح اكيد متعشي
جاسم : ( طالع ابوه ) اي الحمدلله متعشي .. تصبحون على خير
ام جاسم : وانت من اهله يمه .. ( لفت على بوجاسم ) ليش جذي قلت افرض مو ماكل ؟؟ ولا عشان روان اهني ماتبيه يقعد تره ماراح يصير شي كلنا قاعدين .. عاد لا تصير متشدد وايد
ابو جاسم : خلاص نتفاهم بعدين العيال موجودين ماله داعي هالحجي

( رن تلفون ابو جاسم )
ابو جاسم : الو ؟؟ ( قام وقف ) اي اي عرفتك هلا دكتور خير اشصار ؟
روان : ( قلبها قام يرقع وتطالع عمها واهي خايفه )
------------------------------------------------------

[لامارا]

** البارت التاسع **

( رن تلفون ابو جاسم )
ابو جاسم : الو ؟؟ ( قام وقف ) اي اي عرفتك هلا دكتور خير اشصار ؟
روان : ( قلبها قام يرقع وتطالع عمها واهي خايفه )
ابو جاسم : اي خلاص مسافة الطريج اكون عندك .. مع السلامه ( سكر التلفون )
روان : ( دموعها معلقه بعينها من الخوف ) ها عمي بشر ؟؟
ابو جاسم : اللي فهمته من كلامه ان فراس صحى
روان : ( انزلت ادموعها واقعدت عالقنفه واهي تظحك ) الحمدلله يارب الف حمد وشكر لك
مشاري : ( يكلم منال ) شفتي قلتلج راح يقوم
منال : ( تبتسم ) اي صح قلتلي
روان : ( تمد ايدها حق اخوانها ) تعالو
( مشاري ومنال اقعدو واحد يمينها وواحد يسارها ولموها )
روان : قولوا الحمدلله
مشاري : الحمدلله بس ليش تبجين تره قام
روان : ادري حبيبي.. ابجي من الوناسه يللا تعشو ونامو انا وعمي رايحين انشوفه
مشاري : لا بننطركم اتييبونه بنشوفه
روان : لا حبيبي مايطلع اليوم باجر بعد المدرسه اخذكم تشوفونه زين؟
منال ومشاري : زين
روان : ( قامت ) تعشوا وناموا .. تصبحون على خير .. يللا عمي
ابو جاسم : ( يطالع ملابسها – جينز وبلوزه – وده يتكلم بس ماحب يخرب وناستها ) توكلنا على الله
- بالطريج كانت تحمد ربها وحدها مستانسه مو عارفه شتسوي –
روان : عمي ؟؟ اهو صج قال ان صحى ؟؟ ولا بس تحرك ؟
ابو جاسم : قالي فراس طلع من غيبوبته .. طبعا بفضل الله سبحانه
روان : الحمدلله يارب
- اوصلوا المستشفى وانزلوا شافوا الدكتور –
الدكتور : ( يبتسم ) الف حمدلله على سلامته
ابو جاسم : الله يسلمك
روان : الله يسلمك يارب.. زين اكيد قام ؟؟
الدكتور : اي اكيد .. أول شي حرك ايده وريله بعدين فتح عينه وبجى ونقلناه غرفه بس طبعا تحت الملاحظه بس تقدرون تشوفونه تعالوا معاي
( راحوا مع الدكتور ودشو الغرفه كان فراس عالسرير يحن – يبجي بس مو حيل - وموصل بيده الدريب )
روان : ( شافته جان تبجي وتروح تبوسه على راسه وعلى ايده ) حيااتي ياقلبي انت.. الف حمد وشكر لك يارب
فراس : ( يبجي ) ماما
روان : ( ماتت من البجي زياده ) الله يرحمها .. انا ماما حبيبي انت
الدكتور : هدي نفسج اخت روان مافيه الا العافيه كلها اسبوع وبيرجع معاكم البيت
ابو جاسم : ( ماعجبه يكون الدكتور موجود وروان تبجي جذي ) مشكور دكتور ماقصرت تقدر تخلينا مع فراس شوي ؟
الدكتور : اي اي اكيد .. عن اذنكم والحمدلله على سلامته
ابو جاسم : الله يسلمك اذنك معاك
- فراس بس يبجي وروان تبوسه وتحاول تسكته –
ابو جاسم : اتوقع مو عارفج .. لأن ماشافج وايد كنتي مشغوله بدراستج وماتيين الا بالسنه مرتين أو ثلاث
روان : اي ادري بس راح يعرفني وماراح اخليه كلش مره ثانيه
ابو جاسم : الحمدلله الله نقذه
روان : الحمدلله
( تمت قاعده عند فراس واهو كل شوي يحن متملل .. وبعد فترة نام واقعدوا عنده لين تأخر الوقت )
ابو جاسم : يللا نمشي ؟
روان : لا بقعد عنده لي باجر
ابو جاسم : لا يبه قومي معاي نرجع البيت
روان : عمي يمكن يقوم ويبجي مايلقى احد يمه ؟
ابو جاسم : في دكاتره وممرضات لا تخافين عليه
روان : بس اهو مو ولدهم واذا قام ماراح يهدون شغلهم ويقعدون عنده .. و يمكن يخلونه يبجي بروحه .. وبعدين اهو ياهل لازم يقعد احد من اهله عنده
ابو جاسم : تعوذي من ابليس وقومي معاي اخوانج اهناك محتاجينج
روان : اخواني نايمين وباجر انت ودهم المدرسه بطريجك .. عمي والله ماقدر اخليه بروحه
ابو جاسم : وانا بعد ماقدر اخليج بروحج اهني
روان : خلاص اقعد معاي انا ماني رايحه
ابو جاسم : ( يتنهد ) يارب صبرك
روان : عمي ماراح اخليه بروحه .. عفيه افهمني وخلني على راحتي
ابو جاسم : خلاص امشي وانا اقول حق جاسم يقعد عنده
روان : لا انا بقعد عنده اليوم
ابو جاسم : خلاص تمي عنده الليله بس باجر اخلي جاسم مكانج زين؟
روان : ( اتطالع فراس واهو نايم ) اوكي
ابو جاسم : لحظه اكلم الدكتور وارجع
- طلع راح حق الدكتور –
ابو جاسم : دكتور عبدالله .. مافي مشاكل اذا احد نام عند فراس عدل ؟
الدكتور : اي اكيد عادي ماكو أي مشاكل بس لازم شخص واحد مو اكثر
ابو جاسم : مشكور يعطيك الف عافيه مع السلامه
- راح حق روان –
ابو جاسم : خلاص انا رايح ديري بالج على نفسج أي شي يصير دقي علي
روان : ان شاءالله
( طلع عمها جان تروح حق الممرضات اللي بره اطلبت منهم مخده وغطى عشان تنام عالقنفه اللي يم سرير فراس .. وردت الغرفه شوي جان اييبون لها اللي اطلبته )
- اقعدت وسندت ظهرها عالمخده وطلعت التلفون دزت حق بدر هالمسج -
" بدر باركلي فراس صحى وانا الحين نايمه عنده ماقدر اشبك مايبت اللاب توب معاي "
- شوي يالها هالرد –
" الف الف حمدلله على سلامته .. بس انتي نايمه بروحج ؟ "
- ردت عليه –
" اي :× "
- رن تلفونها وطبعا بدر –
روان : الو ؟
بدر : تدرين ان هالشي مايرضيني وهم سويتيه ؟؟
روان : ( مقصره صوتها عشان لا يقوم فراس ) شسوي يعني ؟ اهو ياهل يعني اذا قام ومالقى احد يمه..
بدر : شنو مايلقى احد يمه اهو بمستشفى المريخ ؟؟؟ روان لا تيننيني وهذا الزفـ.. موجود ؟؟
روان : مادري بس اتوقع راح
( انطق الباب ودش الدكتور ماغيره صاحبنا الحلو )
الدكتور : قوه روان محتاجه شي ؟
( روان شافته اخترعت وماردت عليه خافت بدر يطلع من التلفون ويطقها )
بدر : منو هذا ؟؟؟
الدكتور : روان ؟؟ سامعتني؟؟
بدر : روان اكلمج منو هذا
روان : ( نزلت السماعه ) هلا دكتور .. لا مشكور مابي شي
الدكتور : اشغلتج عن شي ؟؟
روان : لا بس كنت اتكلم مع بنت خالتي
الدكتور : ( يبتسم ) خلاص عيل اخليج أي شي تحتاجينه تره انا موجود بس سألي عني
روان : ( ودها تبجي لأن بدر عالخط ) تسلم ما احتاج شي ان شاءالله
الدكتور : ان شاءالله تحتاجين شي .. عشان نكسب شوفتج .. مع السلامه
روان : مـ ـع السـلامـ ـه
( راح الدكتور جان تحط السماعه على اذنها لقت بدر يصارخ )
بدر : اقولج عطيني اكلمه ماتسمعين ؟؟
روان : بدر لا تصرخ .. وبعدين خلاص والله راح
بدر : شكو اتقوليله اكلم بنت خالتي ؟؟ اترقعين ليش ؟؟؟ خايفه على مشاعره يعني؟؟
روان : بدر والله مادري بس ماعرفت شقول و..
بدر : شنو ماعرفت شقول ؟؟ اخاف معجبه فيه وتبينه ؟؟ قولي اذا تبينه عشان اخليج وامشي تره عادي مايهمني
روان : ( انصدمت ) بدر اشهالحجي انت اشقاعد تقول ؟
بدر : اشدراني عنج ؟؟ واخر شي طوّل يسولف معاج مادري اشقال انتي بعدتي التلفون عشان ما اسمع صح ؟
روان : لا ماقال شي مهم بس يتطمن على فراس
بدر : روانووو لا تجذبين تره اعرفج لي جذبتي
روان : بدر خلاص عاد لازم اسكره الحين
بدر : ليش ؟؟ بتروحيله ؟؟
روان : ( اتصرخ ) بدر اشفييك؟؟؟
بدر : واتصرخين بعد ؟؟ ماشي روان يللا اخليج معاه ( سكر الخط بويهها )
( روان انصدمت منه بدل لا يكلمها عدل ويهنيها بقومة فراس بالسلامه قاعد يصرخ عليها بهالطريقة ؟ )

- تمت اتدزله مسجات بس اهو حاقرها و بالليل عالساعه ثنتين تقريبا كانت منسدحه عالقنفه تحاول تنام مو قادره –
( امسكت تلفونها ودقت على فجر )
روان : ردي عفيه ردي
فجر : الو ؟؟
روان : فجر قاعده ؟
فجر : اي كنت بالحمام توني داشه الغرفه .. اشفيج ؟
روان : أول شي فراس صحى

فجر : صج ؟؟!!! الف حمدلله على سلامته خل اروح ابشر امي وادق عليج
روان : لا عفيه لحظه خل اقولج اللي صار اول
فجر : شنو فيه ؟؟ طلع فاقد الذاكره ؟؟
روان : فجووور ؟؟ انتي ولا عمرج صرتي جد ؟؟
فجر : لا والله من صجي وايد اسمع يقومون من الغيبوبه فاقدين الذاكره
روان : فجر يعني جد مادري شقولج اهنيج عالمخ اللي عندج
فجر : روّون عن الطنازه زيين
روان : ( متضايقه ) زين فجر بكلمج بموضوع مضايقني
فجر : شنو صاير قولي؟
روان : انا الحين نايمه عند فراس بالمستشفى .. ودق بدر كان يكلمني جان يدش الدكتور ومادري اشصار المهم عصب بدر حيل وآخر شي سكر الخط بويهي وادزله مسجات مايرد
فجر : اهو اشفيه جذي وايد حار
روان : اي اصلا حتى بره كان مطلع روحي كل ما كلمت احد زفني جدامهم
بدر : الله يعيينج عليه
روان : زين شسوي؟ اهو حاط في باله اني قاعده اكلم الدكتور الحين
فجر : تبيني اشوف اذا شابك اكلمه ؟
روان : اي عفيه قوليله اني والله احبه واموت فيه ولا راح اطالع غيره كلش .. وقوليله بعد اني قاعده بروحي وماعندي احد وافكر فيه بكل ثانيه
فجر : اقول روان اشرايج تكتبين لي مشاعرج مسج لأن جذي ماراح احفظ
روان : فجر عااد لا تذبحيني والله اني متضايقه
فجر : زين زين دزيلي ايميله مسج
روان : اوكي .. بس عفيه ناطرتج قوليلي شيصير
فجر : اوكي .. باي
( سكرته منها ودزت لها الايميل Dr.bader_***@hotmail.com )
---
- بغرفة ابو جاسم –
ابو جاسم : كانت مستانسه ماقدرت اضيق خلقها
ام جاسم : اذا انت تبيها اتعيش اهني خلها تمشي مثل ما انت تبي مو كيفها تكسر كلمتك متى مابغت
ابو جاسم : اهي ماكسرت كلمتي انا اللي سمحت لها تنام عند اخوها .. وبعدين كافي اللي شافوه لازم اخف عليهم شوي
ام جاسم : انت ماسويت شي غلط واهي لازم تمشي على طريقتنا
ابو جاسم : خلاص انا قلت لها من باجر جاسم اللي راح ينام عند فراس
ام جاسم : وولدي اشعرفه منصجك انت ؟
ابو جاسم : لي متى بتعاملين الولد على انه ياهل ؟؟ لو متزوج جان منزمان عنده عيال
ام جاسم : اي لو تزوج ساعتها يصير خير .. الحين اشعرفه يعتني بياهل بالمستشفى
ابو جاسم : استغفرالله يارب .. خليني انام باجر عندي دوام تصبحين على خير
ام جاسم : من يو بيتنا اعفسونا .. لا وبعد بيي ياهل يترس البيت صراخ
ابو جاسم : هذيله يتامى اتعرفين شنو يتامى ؟؟
ام جاسم : وانا اشسويت عذبتهم ؟؟ طقيتهم ؟؟
ابو جاسم : ( حقرها وعطاها ظهر ونام )
--
- بيت فجر –
( فجر ضافت بدر واستقبل الاضافه وكان حاطه Busy – مشغول – بس قررت اتدش وتكلمه )
// ملاحظة الحركات اللي بالحوار :| :S :$ .. الخ.. اذا ماعرفتوها حطوها بالمسنجر شوفو شيطلع لكم

Fjo0oOo0o :
السلام .. اشلونك بدر
Dr.Bader :
هلا منو معاي ؟
Fjo0oOo0o :
انا فجر بنت خالة روان
Dr.Bader :
اهلين فجر .. اشلونج ؟
Fjo0oOo0o :
تمام الحمدلله .. انت اشلونك
Dr.Bader :
بخير الله يسلمج .. ها طرشتج روان ؟
Fjo0oOo0o :
بصراحه اي .. وتره والله حالتها تكسر الخاطر يعني انت تخيل فقدت امها وابوها بنفس اليوم .. وكانت بغربه وتخلت عن دراستها وحلمها ويت تربي اخوانها وواحد منهم كان بين الحياة والموت .. وهم فوق هذا انت تصرخ عليها وتزعل منها ؟
Dr.Bader :
بل بل بل كاتبه قصيده انتي؟ نطري خل اقراها
Fjo0oOo0o :
:s
Dr.Bader :
والله ادري انها تكسر الخاطر بس ماتحملت اسمع الدكتور يكلمها وادري انها عاجبته ويوم سألها منو تكلم قالت بنت خالتي ؟؟؟ شكو تبررله اساسا؟؟
Fjo0oOo0o :
:| اهو شكو يسألها منو تكلم ؟؟
Dr.Bader :
اشدراني عنه الخسيس وتبيني ما اعصب ؟؟
Fjo0oOo0o :
والله مادري اشهالملقوف قطيعه .. زين تره اهي تحبك وايد وعطتني جم شغله ووصتني اعطيك اياهم وصراحه ثقلو على مسنجري اخذهم فكني منهم ... هاك
(L) (L) (L) (L) (L) (F) (F) (F) (F) (F) (F)
Dr.Bader :
اكيد اهي قالت عطيه جذي ؟؟
Fjo0oOo0o :
اي و قالت بعد اشياء اكثر بس انا استحي اقولهم :$
Dr.Bader :
هههههههه زين زين خلاص سامحتها والحين بدز لها مسج رصيدي خلص ماقدر ادق
Fjo0oOo0o :
ونااسه ثااانكس .. يللا عيل سي يووو لييييييتر << تره حتى انا اعرف انجليزي مو شرط الواحد يسافر بره عشان يصير مثقف (H)
Dr.Bader :
ههههههه اي ماشاءالله عليج خطيره .. يللا عيل عن اذنج ادز مسج حق الحب
Fjo0oOo0o :
:$ اووكي .. الى اللقاء
Dr.Bader :
Bye
---
- عند روان –
وصل لها مسج بطلته كان من فجر
" تمت العملية بنجاح نطري بيدزلج مسج بعد شوي مايقدر يدق لأن ماعنده رصيد .. بس عاد هااا ابي الحلاوه "
- ابتسمت روان وتمت اتطالع الشاشه ناطره مسج بدر بعد 10 دقايق وصل لها مسج –

" أحبج يا احلى ماخلق ربي .. مهما سويتي تراج غالية وادري ماتطالعين غيري .. بوسيلي فرفر << دلع فروس الخاص ..
اذا ينقفل باب الغرفه قفليه يكون احسن .. أحببببج نوم العوافي "
- ابتسمت واهي تقرا اللي كتبه وباست الشاشه ودزت هالمسج –
" احبك يالغالي .. تصبح على خير "
- بعد مادزته قامت تشوف فروس كان نايم باسته على راسه وردت مكانها انسدحت ونامت –

( بعد حوالي ساعه ونص حست بحركه بالغرفه افتحت عينها ولا تطالع الدكتور واقف يم سرير فراس ويطالعها أول ماشافها افتحت عينها ابتسم لها )
--------------------------------------------------