05-03-14, 10:52 PM
| #21 | ||||
 
|  الجزء العاشــر خلص الكورس الأول وبلشت عطلة الربيع يعني مر حوالي أسبوعين وشوي من وصول ناصر الكويت,,,,ناصر طول هالفتره ما طلع من البيت الا مرتين لان كان خايف يصادف الزين بهالشكل واهوه بعده ما استعاد شكله وصحته وما كان يبي يصادف وايد ناس ويدرون عنه ان كان مريض ولان الدكتور موصي عليه يحاول كثر ما يقدر ما يطلع وقت فيه شمس عشان مو زينه حق صحته... وقاعد يحاول يكثر أكل باليوم عشان يلحق يزيد وزنه قبل ما يداوم بالكليه الكورس الياي ورجع شعره يطلع...وفرحان انه شكله بدا يتحسن ولونه بدا يرجع ونفسيته صارت أحسن .... ناصر: يمه يووعاااان متى الغداا؟؟ ام ناصر: اسم الله عليك ناصر توك متريق...وبعدين تو الناس الساعه 12:30 ناصر: يمه خليني اكل على رااحتي خو غداكم انحرمت منه اكثر من سنه ام ناصر: اليوم مسويينلك أحلى مطبق زبيدي ناصر: الاااااااااااه...شنو مشتهيييييييه وراح ناصر طل من الدريشه يشوف الزيـن في البيت او لا!!! هذي حالته طبعا كل هالفتره بس يفكر فيها ويحاتيها ولما يطل من الدريشه ويشوف سيارتها موجوده يرتاااح نفسياااا.... الزيـن لحد الحين ما حست فيه ان وصل ولا تدري انه بالكويت واهيه اللي تعرفه أصلا ان ما راح يرجع الكويت الا بعد سنتين من وقت سفرته.... في بيت بوعادل... الزيـن : صباااح الخيـر يمااا ام عادل: هلا قلبي صباح النوور الزيـن: وين عادل؟ ام عادل: والله حبيبتي شكله بعده نايم الزين : من صجه!!! امبيه فشله عبدالرحمن ياي بعد نص ساعه واهوه بعده نايم ام عادل: بعد ما تعرفين اخوج اذا كان عنده عطله اي ساعه يناام الزين : خل ارووح اقعده وراحت الزين غرفة عادل وتطق الباب وتطق الباب لما اخيرا رد عليها عادل بعصبيه : نعمممم....يعني الواحد بهالبيت ما يعرف ينااام الزين : عاادل يلا قوووم بعد شوي ياي عبدالرحمن عادل: لييييش؟؟! الزين :شنو ليش؟؟! اليوم على أساس راح يتغدا عندنا نسيييت عادل: وييييه راح عن بااالي الزين: يلا عفيه قوووم عادل : اووف انزين قايم قايم وراحت الزين ومسكت تلفونها ودقت على عبدالرحمن الزيـن: هاااااي حمني عبدالرحمن: هلا والله هلااا الزيـن: ها حبيبي متى ياي؟ عبدالرحمن : على الساعه 1 اكون عندكم الزيـن: يلا تمااام عيل ..باااي أشوووفك ان شاء الله عبدالرحمن : بااااي يا روح عبدالرحمن في بيت بوناصر.... ناصر: يلا عاد يمه صارت الساعه 1:10 وين الغداااا؟؟؟؟؟ ام ناصر: يلا يلا حبيبي دقايق ونحطه ناصر: صارلج ربع ساعه تقوليلي دقااايق..يووعاااان..احسني مفجوووع من زماان مو مااكل ام ناصر: انزين انزين يمه منك لجيتني وراح ناصر وقف عند الدريشه جان يشوف سياره توصل وتصفط جدام البيت...كانت سياره كورفيت سوده...ناصر مستغرب السياره اول مره يشوفها اتيي عندهم...وبعدين نزل من السياره وناصر ظل يطالعه قاعد يحاول يتذكر شكله!! ناصر يكلم نفسه: اييي عرفته هذا رفيج عادل!! شيايبه عندهم هالحزه؟! شوي جان يشوف الباب ينفتح وتطلعله الزيـن وتضحكله وتناديه..واستوعب ناصر انه اهوه احتمال يكون خطيـب الزيـن دمه غلى...انفعـل...هاااج...ثاااار. ..انفجرررر...ما كان قادر يتحكم بأعصاابه...وخذا فازه كانت على الطاوله وحذفها بالأرض ام ناصر كانت بالمطبخ تحت ما اسمعت شي لكن نور طلعت تركض من غرفتها نور: ناااصر شفييييييييك شصاااار؟؟ ناصر كان يتنفس بسرعه وويهه احمررر وحتى عيوونه كانت حمرره نور: نااصر رد علي,,,شصار؟؟ ناصر: تعرفين صاحب الكورفيت السوده منو؟ نور: اممممم كنت اشوفه بين فتره وفتره اول....ااااه امممم اعتقد هذا خطيب الزيـن لان مرات اهيه واخوها يركبون معاه السياره ناصر حاس نفسه قاعد يتقطع من الداخل... نور: ناصر أذكر الله...شنو نسيت كلامك اول؟؟ مو كنت تقول انا ما تهمني الا سعادتها وانك فرحان انها كملت حياتها ناصر: اييي نوور اييي ادررري ادرري نور: يعني ناصر خلاص انسااها...مو هذا اللي كنت تبيه؟؟؟ مو كنت تقول القرار قراري وخلوني على كيفي...والحين شنو النتيجه؟؟؟ النتيجه انك تظل زعلان عليها لي اخر عمرك؟؟ ناصر: غصبن علي نور قاعد احاول اني امسك نفي بس غصبن علي مو قاادر..ما تخيلته راح يكون بهالصعوبه جذي نور: لا ناصر انت للأسف انك كنت حاط في بالك انك ما راح تعيش وما حسبت حساب انك اذا عشت شنو راح يصير بعدين ناصر: نوور انا كنت خاايف عليييها..ما كنت ابيي اظلمها معاااي....كنت خايف اذا صار فيني شي تضـيع البنت او يصير فيها شي...وبعدين نور تدرين اني صرت عقيم تدررييين؟؟ نور: شنوو؟؟ عقيم!!! ناصر: ايي نور العلاج اللي كنت ااخذه سبببلي العقم...يعني الزين ما تستاهل واحد يكون لها اسره؟؟....نور تدرين في احتمال كبير يرجعلي السرطان مره ثانيه؟؟ لييي متى نووور لي متى بظل عايش بالمستشفيات...شلون اقدر اهتم بزوجتي وانا اللي دايما احتاج من يهتم فيني؟؟؟ نور انصدمت..اسكتت مره وحده..ما تدري عن كل هالأشيااء وقامت تبجي ناصر: نور انا اسف ما كان قصدي أضايقج بكلامي بس ابيج تعرفين وجهة نظري وتعرفين ليش انا سويت جذي وحضن نور وقاعد يحاول يخفف عنها... مرت الأياام وناصر كل ماله يتحسن ويرجع نفس شكله اول وكان على طول يحاول يشغل نفسه بأي شي عشان لا يفكر في الزين واشترك بنادي رياضي وكان ما يطلع من البيت الا الصبح امبجر حيل او بليل متأخر حيـل عشان لا تصادفه الزيـن...واذا طلع ما يطلع بسيارته لكن ياخذ سيارة البيت....اما الزين تحس كل يوم عن يوم قامت تتعلق بعبدالرحمن اكثر.... وبقى أسبوع واحد على دوام الكورس الثاني....ناصر وابوه راحوا الكليه عشان يرجعون يقيدونه لان كان موقف قيده طول هالفتره...وسجل المواد اللي يبيهاا وارجعوا البيت... ناصر طق على نور الباب... نور: تفضللل ناصر: قوووه نور: هلا والله..الله يقويييييك ناصر: نور ابيج تساعديني بشي نور: أساعدك ليش لااا...قول شعندك ناصر: في وايد ناس قلتلهم على أساس بكمل دراستي بره صح نور: صح ناصر: والأسبوع الياي بداوم بالكليه...بالله اذا سألوني شقولهم؟!! نور: اي صح وهقه...امممم شتقولهم شتقولهم؟!! ناصر: تدرين فكرت اقولهم ان صارتلي مشاكل بره ورجعت اكمل دراستي بالكويت وان عادلولي جم ماده بس.. شرايج؟؟ نور: امممم اي صح أصلا ماكو غير انك تقولهم جذي ناصر: اي عاد اذا مشت عليهم مشت ما مشت كيفهم نور: بس ناصر اول وتالي الناس راح تعرف انك كنت مسافر بره تتعالج ناصر: اي ادري بس بحاول كثر ما اقدر ان ما اخلي هالخبر ينتشر عشان لا يوصل اخر شي حق الزيـن نور: تتوقع الزيـن لحد الحين ما تدري انك ييت؟ ناصر: والله ما اعتقد لان ما صادفنا بعض ولا مره...بس يمكن شافتني وانا ما شافتها!! مادري والله نور: اول وتالي راح تتصادفون بالكليه اكييييد ناصر: اي ادري نور: شنو بتسوي اذا شفتها؟ ناصر: ولا شي..شبسوي يعني!! شوي جان يسمعون احد يطق الباب.... بوناصر: نور ناصر عندج؟ نور: اي اي تفضل يبه بوناصر: ناصر تعال معاي ناصر: خير يبه شنو في؟ بوناصر: وصلت ناصر: شنو اللي وصلت؟؟ بوناصر: اللي طلبتلك اياها من بره ناصر: اللي اهيه شنوو؟؟ بوناصر: انت بس قوم تعال معاي وقام ناصر معاه وانزلوا تحت وطلعوا بره البيت جان يشوف ناصر سياره موزراتي كوبيه ااخر مودييل لونها سيلفر ومن داخل أحمر يعني السياره كانت شي شي ناصر طااااح قلبـــه...مو مصدق...هذي السياره اهيه سياره أحلامه نور: واااااااااااااااااو ناصر بانبهار: يبه شنو هذا؟؟ حقييي؟!! بوناصر: لا حق يدتك..اكيييد حقك ناصر: أيبااااااااااااااا...والله صج!!! بوناصر: اي يبه انت تستاهلها ناصر حضن ابووه حيـــــل وباس راااسه... ناصر: ماااني مصدق..!! مشكووور يبه بوناصر: يلا عاد طلعنا فيها ناصر: افا عليكم بس جذي وركبت نور ورا وبوناصر جدام وساق فيهم ناااصر وافتروا بالمنطقه وخذوا من عصير الضاحيه وبعدين ارجعوا البيت,,, الزيـن في غرفتها قاعده تلبس وتجهز نفسها لان بتطلع مع عبدالرحمن واخوها ....دق تلفونها ( حمني يتصل بك ) عبدالرحمن: هاا شلون قلبي اليوم؟ الزيـن: تمااام...انت تحت؟؟ ( وراحت طلت من الدريشه) عبدالرحمن: دقيقتين واكون تحت الزيـن شافت الموزراتي وقاعده تفكر حق منو ممكن تكون السياره عبدالرحمن: زيــن...زيــون الزيـن: اي هلا هلا حمني عبدالرحمن: شفيج سكتي؟ الزيـن: لا ماكو...شنو كنت تقول؟؟ عبدالرحمن: اي اقولج يلا طلعوا بره انا قربت حيل الزيـن: اي يلا يلا وصكت الخط وطلعت من غرفتها وناديت اخوها الزيـن: يلا عادل عبدالرحمن برره عادل: يلا يلا وطلعوا من البيت وركب عبدالرحمن جدام والزيـن ورا عادل: السلااام عليــــكم... عبدالرحمن: وعليــكم السـلام ..هلا والله الزيـن: عبدالرحمن شلونك؟ عبدالرحمن: بخير دامكم بخيـر عادل : هالموزراتي مالت منو؟؟ لا يكون هالخايس ناصر رجع وانا مادري!! الزيـن اول ما سمعت الاسم ارتبكت شوي بس حاولت تتمالك نفسها وجنه اسم عادل ما يعنيلها اي شي عادل: هالانسان اختفى مره وحده ما اعرف عنه شي,,,,عبدالرحمن اعتقد انت شايفه مره؟ عبدالرحمن: اي واحد ذكرني فيه؟ عادل: اللي مره ييتنا وانا قاعد معاه بالمارينا كريسنت...طويل حنطاوي عنده سكسوكه عبدالرحمن : اي اي جنه عرفته...شخبااره؟ عادل: والله مادري على أساس راح يكمل دراسته بره ولا حس ولا خبره!! فاقده والله ( الزيـن صارت تبي تغير الموضوع بأي طريقه) الزيـن: وين راح نروح؟ عبدالرحمن: كيـفكم وين تحبون؟ الزيـن: انا كله واحد عادل: اممممم نروح الأفنيوز نشوفلنا مطعم هناك عبدالرحمن: يلا عيل الأفنيوز وصلوا الأفنيوز وادخلوه وتمشوا فيه شوي وقرروا ياكلون في نينو....عادل طول الوقت يسولف ما سكت كلش وعبدالرحمن وده يتكلم مع الزيـن شوي لكنها طول الوقت ساكته مندمجه بسوالف اخوها وتضحك...عبدالرحمن مللل وحاول يفتح اي موضوع مع الزيـن عبدالرحمن: زيـن جم ماده ماخذه في الكورس الثاني؟ الزيـن: باخذ أربع مواد ان شاء الله عبدالرحمن : موفقه ان شاء الله.... عادل: انا باخذ 5 مواد الله يستر (عبدالرحمن بينه وبين نفسه: اووف انت من حاجاك الحين) عبدالرحمن: اي ساعه تخلصين دوامج؟ الزيـن : امممم حسب في ايام اخلص الساعه 1 وفي ايام اخلص الساعه 12:15 عادل: انا تخيل عندي ماده الساعه 8 الصبح...شكلي بسحب عليها عدل عبدالرحمن: اقول يا جماعه خلصتوا؟ شرايكم نقوم عادل : اي يلا زهقت من القعده...خل نطلب الحساب وقاموا افتروا شوي بالمجمع وعبدالرحمن شاف الزيـن وقفت شوي طلت على الباترينا على ساعه وايد اعجبتها بعدين كملت مشي معاهم... عبدالرحمن: عن اذنكم شوي واييكم؟ الزيـن: وين؟؟ عبدالرحمن : شوي وراجع عادل: يلا اوكي ورجع التقى فيهم عبدالرحمن وخلصوا من الأفنيوز وردوا البيت بليل عالساعه 9 وقبل ما تنزل الزيـن من السياره عبدالرحمن: زيــن...هذا لج الزيـن استغربت الزيـن: شنو هذا؟ عبدالرحمن: هذا شي بسيط مني الزيـن: بس شنو المناسبه؟ عبدالرحمن: يعني لازم اذا بعطيج شي مني يكون في مناسبه؟ الزيـن: لا بس.... عبدالرحمن: يلا الحين راح تاخذينه او لا؟ الزيـن : دام منك لازم اخذه,,,مشكووور عبدالرحمن: ولوو وانزلت من السياره ودخلت البيت وراحت غرفتها ووطلت بالجيس وافتحت العلبه الزيـن: يااااااااااااي ودقت على عبدالرحمن الزيـن: بعد قلبيييي..ِ..شلون عرفت هالساعه بالذات كانت عاجبتني؟؟؟!!! عبدالرحمن: شفتج كنتي واقفه تطالعينها وقلت ما يصير اخلي شي بخاطرج فيه الزيـن: واااااي حبيـــبي وحياااتي انت... عبدالرحمن: حبيبتي انتي تستاهلين اكثر أصلا الزيـن: حياااااتي...أحبـــــك عبدالرحمن: ااااخ يا قلبي...قوليها بعد مره الزيـن : لا بس عبدالرحمن: يلا المهم سمعتها من غير ما اطلبها منج خو انا هالكلمه بالذات اطرها منج طراررره الزيـن: ههههههههههه عبدالرحمن: يلا حبيبتي تصبحين على خيـر الزيـن: وانت من اهله الزيـن واااااااااايد كانت فرحانه من اللي سواه عبدالرحمن..مو علشان الساعه..عشان كافي فكر يسويلها هالشي وييبلها اياه.... ( عبدالرحمن يعشق الزيـن متيم فيــها...بجمالها...بشخصيتها.. .وبكل شي يخصها ومستعد يسوي المستحيل عشانها) ثاني يوم الصبـح في بيت بوناصر..... بوناصر: يلا جهزتوا أغراضكم؟ ناصر: اي انا جاهز ناديه : وانا خالصه بس مادري عن امي ونور ( كانوا قاعدين يستعدون ويجهزون أغراضهم لان ناويين يقعدون في الشاليه أسبوع قبل ما يبلش الكورس الثاني) بوناصر: ام نااصر يلا وينج؟؟ خل نمشي عاد ام ناصر: يلا يلا خلصت وطلعوا من البيت كلهم وناصر ونور اركبوا بالموزراتي...وبو ناصر وام ناصر وناديه اركبوا مع السايق ومشووا.... بعد حوالي ساعه وصلوا شاليهات بنيدر... ناصر: ياااني ولهاان على البحرررر ام ناصر: بس دير بالك تنزل بالشمس... ناصر: اي يمه اول ما تبدا تغيب شوي الشمس بنزل البحر سووا كل شي بالشاليه,,,تسبحوا,,اربكوا الجيتسكيات,,,تمشوا على البحر,,,اركبوا القواري,,,,يعني حس ناصر فعلا صارله فتره ما استانس هالكثر اهوه ونور قاعدين يتمشون جدام الشاليهات,,, نور: ناصر تشيك تشيك هالبنت اللي قاعده,,,اوف قاعده تخزك خززز ناصر: انزين وويعني نور: شوفها ترى حلوه ناصر شافها وفعلا انعجب بشكلها بس ما اهتم ناصر: اي اوكي نور: ناصر شفيك يعني معقوله جذي بتعيش حياتك كلها من غير حب ناصر: ومن قالج انا الحين ما احب نور: ناصر خلاص انسى الزيـن...بتظل تحبها لي متى؟ ناصر: لي اخر يوم بعمري نور: نويصر انت صج مسكيييين ومر حوالي أسبوع واهمه بالشاليه وردوا البيت عشان ثاني يوم دوام... ناديه : شفيك ناصر أحسك على أعصابك؟ ناصر: والله متوترررر ناديه: ليش؟؟ ناصر: باجر اول يوم دوام...احس بشعور جني مستجد ناديه: ويييي عادي طبيبعي لانك صارلك فتره مو مداوم ناصر: اييييي ادري,,,,واللي موترني أكثر اني يمكن أصادف الزيـن باجر ناديه: اهااا صح..... ناصر بالغصب نااااام بليل واهوه بس يفكررر شلون راح يكون الدوام باجر وراح يصادف الزيـن او لا!!!! ثاني يوم الصبـح الساعه 9 قام ناصر لان عنده محاضره الساعه 10 واخذ شاور ولبس بلوزه حمره مع جيـنز وشكله كان وايد حلوو وركب سيارته وطل اذا سيارة الزيـن موجوده او لا...وشافها كانت موجوده وراح الكليه دخل الكليه حس ان صج من زمااااااان عنهاااا...وكل شوي يوقف يسلم عليه احد وحس بفرحه مو طبيعيه انه رجع الكليه وحضر محاضرة الساعه 10 وكان عنده بعد محاضره الساعه 11...ودخل القاعه وقعد جدام ثاني سطره الصوب الثاني من القاعه وكانت قاعه كبيــره حيـــل وفيها حوالي 100 طالب وطالبه ...شوي جان تدخل الزيـن القاعه مع رفيجتها حنان بس ما لاحظت ناصر ولا حتى اهوه شافهاا...ودخل الدكتور الدكتور: السلام عليكم....انا الدكتور محمد...اتوقع اغلبكم يعرفني طبعا مثل ما انتو شايفين القاعه مختلطه لان في نقص في هيئة التدريس لان الدكتورين اللي يعطون هالماده رايحين تفرغ علمي واضطرينا نفتح شعبه وحده....اليوم راح اعطيكم بس فكره عن الماده وباجر نبلش بالجابتر الأول...بس خل اخذ الحضور اول شي.... ( الدكتور قام ينادي اسم اسم عشان يشوف منو الحاضرين) الدكتور: مساعد جابر مساعد: نعم الدكتور: راشد أحمد راشد : نعم ( الزيـن كانت قاعده تكتب مسج بس اول ما اسمعت..... الدكتور: ناصر يوسف ناصر: نعـم تصروعت.....تدودهت...ارفعت ويهها قاعده تدور على الشخص اللي اسمه ناصر يوسف.....قلبها قام يطق بسرررررعه...حست جسمها كله قاعد ينتفض...وايدها بدت ترجف....وتدور وتدور ومو لايقه هالشخص الزيـن: سمعتي الاسم اللي سمعته؟ حنان: اي سمعت...بس يمكن تشابه أسماء الزيـن: حتى الصوووت....الصوت نفسه!!!! حنان: مادري بس مو ملاحظته بالقاعه الزيـن : حنااان شكله ناااصر... والله شكله ناااصر تم الجزء العاشـــر | ||||
|  |
|
06-03-14, 04:27 AM
| #23 | ||||||||
| نجم روايتي و شاعرة متألقة في المنتدى الأدبي  
| الحمدلله والصلاة والسلام على رسول الله وعلى آله وصحبه أجمعين الحمدلله والصلاة والسلام على رسول الله وعلى آله وصحبه أجمعين | ||||||||
|
| |
 |
| الكلمات الدلالية (Tags) |
| السجن |
| أدوات الموضوع | |
| انواع عرض الموضوع | |
|
|
1Likes
.png)
.png)
العرض العادي
