خريف الحب / للكاتبة خياله،،والخيل عشقي (مميزة)

[lolo ahmed]

طولتى الغيبه يارب يكون المانع خير وييسرلك كل امورك وحشتينا كتيييييييييييييييير

[لامارا]

أشهد أن لا إله إلا الله وحده لاشريك له.. وأن محمدً عبده ورسوله..
اللهم صل على سيدنا محمد وعلى آله وصحبه أجمعين


---------------


الورقة السابعه والثلاثون




عندما تكون إنساناً عفوياً،قد تقع في مشكلات لم تكن تتوقعها !
لإن النقاء الذي بداخلك لايتوافق مع التلوث
الذي تعج به عقول بعض البشر.


----------------------



شافها مشيت واتعدته بمسافه ولاكأنها مسحت بكرامته أرض المزرعه من لحظات وبدون مايحس لقي نفسه يكلمها ببرود/بدل ما تمثلي دور الأم الحنونه لأولادي، أظن أولادك أولى، روحي لاولادك اللي ماأهتميتي لهم وتركتيهم وسافرتي في العيد والحين تاركتهم بعد ومشرفه عندنا.. جايه هنا تلعبي علينا بهالحركات.. قدرتي تضحكي عالكل وتوهميهم بحب وإهتمام موب موجود لأجل أشياء في بالك محد يدري عنها غيري ،ونسيتي إن اللي مافيه خير لأولاده مافيه خير لأولاد الناس.


شهقت بقوه ووقفت مكانها فجأه


كانت شهقتها من القوه لدرجة إنه سمعها بكل وضوح رغم المسافه اللي بينهم، كان واضح إنه كلامه أصابها في الصميم ووجعها بشكل مو طبيعي، غمض عيونه بغضب من نفسه، كل البرود والهدوء اللي مغلفه نفسه بيه بيختفي بمجرد مايسمع صوت ذي الإنسانه، وكل العقل والمنطق السليم اللي بيتميز بيه بيحل محله غضب مجنون بيخليه يفقد السيطره على نفسه كلياً ويحوله لسند ثاني غريب عنه، سند بدون مبادئ وأخلاق بشكل منفر له شخصياً، اتفاجأ بصوته البارد والقاسي وهو يكلمها بذاك الأسلوب وكإنه متعمد يكسرها ويأذيها، أساساً هو مايدري شلون دخل عيالها في السالفه.

كتف أيديه بتوتر وهو يراقب وقوفها اللي طال لدقايق ورغم عبايتها اللي عالرأس إلا إنه لاحظ حركة كتفها القويه وبتفكير " معقوله تبكي! طيب وش اللي موقفها هنا؟ لاهي اللي سمعت كلامي وخذت الفلوس ولاهي اللي راحت! لايكون بتطيح هنا وتبلشني فيها.. أدري إني غلطان من ساسي لرأسي وغلطي الحين زاد الضعف ولو كان رجال غيري اللي سوا كذا كان قلت عليه موبرجال، بس هي اللي جات بوساختها لهنا.. وأنا من حقي أدافع عن أهلي وأحميهم من وحده مثل ذي مهما كانت الطريقه"


شهقت بقوه وجمدت مكانها بصدمه.. رفعت نقابها لنص وجهها وهي تتنفس بعمق وتحاول تهدي نفسها وكلامه يرن في أذنها بقوه " المره ذي أتجاوز كل حدوده معايا
وحشر نفسه في حياتي وخصوصياتي، أنا أخواني اللي هم أقرب الناس ليا ماسمحت لهم يناقشوني في السيره ذي، وذا بكل وقاحه وصفاقه وووو.. ياصبر الأرض عليك ياذا الآدمي..بعدين كيف عرف إني سبتهم وسافرت؟ وأيش حكاية أولاده كمان..بمثل دور الأم الحنون!! وعندي أهداف وأغراض!! وكمان محد كاشفني غيره!!

حست إنها بذلت جهد خرافي وأستنزفت كل طاقتها علشان تهدى وتسيطر على نفسها قبل ماتلتفت له وتشوفه مكتف أيديه على صدره ويطالع فيها كإنه مستنيها تنهار قدامه أو تترجاه وذا الشطيئ خلاها تغلي وتعصب عالآخر، وببرود/ضربتك الأخيره كانت تحت الحزام وغير قانونيه، بس ذا شيئ متوقع من واحد بأخلاقك العاليه ومو غريبه عليك.
سكتت وأخذت نفس عميق علشان تسمعه كم كلمه تبرد حرتها فيه، بس في الثواني اللي سكتت فيها رن جرس الإنذار في عقلها يحذرها من اللي هتقوله.. غمضت عيونها بتردد،صوت العقل بيقلها تطنشه زيه زي الجدار وتسيبه وتمشي.. أصلاً مالها حق توقف تتكلم معاه حتى وإن غلط عليها..وهي عارفه نفسها لو أتكلمت ذحين وهي بالحاله ذي بتفقد السيطره على لسانها وهتقول كلام ماينقال وهتجيب العيد معاه وهي فعلاً بدأت بذا الشيئ.. زفرت بقهر وحسمت أمرها ورجعت خطوه لوراء قبل ماتعطيه ظهرها وتمشي بغيض مو طبيعي.



"أخيراً أتحركت" كان ذا تفكيره أول مالفت عليه وواجهته بس بمجرد ماسمع كلامها عقد حواجبه بصدمه "ضربه تحت الحزام!! ذي وش جنسها بين الحريم.. وبعد مصره تذكرني بسواتي وغلطي ..وبتتصرف كإنها مظلومه وبريئه.. لوماكنت سمعتها بنفسي كان صدقتها"
قبل مابفتح فمه ويرد عليها شافها رجعت لوراء ومشت وسابته بكل سهوله "إنسحابها ذا موبمريحني.. ياترى على وش ناويه.. وش اللي قاعده ترسم وتخطط عليه.. أنا ماأقدر أخليها تروح كذا ببساطه بدون لا أعرف"

مشي وراها بخطوات واسعه وسريعه وفي ثولني كان وراها ومحافظ على مسافه بينهم، وبإستفزاز/ على وين؟
لايكون بتروحين لأبوي صقر ومساعد تشتكين لهم وتنزل كم دمعه علشان تأثري عليهم.
وقفت مكانها وبثقه/دموووع!! وبسببك!! لاتحلم.. ولاتخاف مارح أفتن عليك عند الكبار.
إبتسمت برضى لما زفر بغضب واضح وألتفتت عليه وببرود/أنا إحب أتخطى العقبات اللي تواجهني بنفسي عارف ليه؟ علشان لما أوصل للمقدمه وألتفت ألقى كل العقبات صارت ورايا ومالها حيله عليا، بس بطبيعة الحال ذا شيئ صعب على واحد زيك إنه يفهمه، وبالأصح مستحيل تفهمه.

وأعطته ظهرها وكملت مشيها، مشي وراها بإصرار "أسلوبها ملتوي وأسهل الأسئله بتحولها لإستهزاء بكون أنا هدفه" وببرود/ وأنا هكون أكبر عقبه تواجهيها في حياتك .

مشت بقهر " ياناس ذا عديم إحساس.. مايفهم.. لاتهزيئ نافع ولاتلقيح كلام نافع.. برضه ماشي ورايا" ألتفتت له بحده/أنتا وبعدين معاك.. ماشي ورايا ليه!! لسا في كلام ماقلته..في شيئ حاب تضيفه، قال أكبر عقبه في حياتي!! أنتا يادوووبك مطب وعديته خلاص.


طالع فيها بنفاذ صبر "عسى تطبين في حفره ماتقومين منها أنتي ولسانك ذا" وببرود/أنا ماأحب أخلي أشغالي معلقه ومومنتهيه..كل ما أختصرتي ووفرتي على نفسك حركات التمثيل..كل ماأسرعنا وأنهينا المهزله ذي.

طالعت فيه بعدم تصديق/أنتا من جدك مقتنع بالأوهام اللي تقولها.. إن عندي أغراض وخطط لأهلك وأنتا تبغى تدفع لي علشان تتخلص مني وتطلعني من حياتهم!!

ماقدر يخفي تنهيدة راحه فلتت منه وبهدوء/أخيراً أتفقنا وصرنا على نفس الخط مع فرق جوهري، وهو إني متأكد من كلامي وإنه موبأوهام.

وقفت مكانها تفكر بجديه... وقت التراجع فات وولى من اللحظه اللي فهمت فيها إنه مجنون ومقتنع بفكرته عنها، وماأهتمت لذا الشيئ ولا فكرت فيه لإنه فعلاً هوا ورأيه فيها مايعني لها أي شيئ، بس اللي همها في ذي اللحظه إنه مصر يتفاهم معاها مهما كان التفاهم اللي متخيله وراسمه في باله ومافي شيئ رح يوفقه عند حده ويمنعه من إنه يمشي معاها ويكلمها حتى لو وصلت للحريم، هوا أساساً ماهتم لوجود ثريا فأيش اللي هيهمه في وجود باقي العيله.. أتخيلت عبدالرحمن في ذي اللحظه، كيف هيكون إذا عرف باللي صار؟ أخته مع رجال وفي بيتهم واقفين رأس برأس وبيتكلموا.. ضربها صداع مفاجئ ومؤلم ..مهما كان حب وتفهم عبدالرحمن ليها إلا إنه رجال في النهايه.. وعبدالرحمن مو أي رجال.. عبدالرحمن عباره عن كتلة غيره متحركه عالأرض.. ماقدرت تتخيل أيش يمكن تكون ردة فعله لو وصله خبر عن اللي صار، بس الأكيد إنه هيكون شيئ مو كويس لها وللمجنون اللي معاها..
وأبوها مساعد وجدها صقر إذا عرفوا بذا الشيئ!! هي واثقه إنهم مارح يرضوا على اللي سواه ولدهم.. وأبوها مساعد بيطب ساكت لامحاله.

حست برأسها هينفجر من الألم وضغطت على جبينها بقوه للحظات قبل ماترفع رأسها بهدوء/أنا لأخر لحظه كنت أحاول أتصرف بعقل وماأنزل نفسي لمستواك وأرد عليك وعلى إتهاماتك وأسلوبك اللي أقل مايقال عنه إنه مخجل ومايشرف، وإن كنت ساكته عنك فذا مو معناه إن إتهاماتك صحيحه، أو إنك أفحمتني وحاصرتني في زاوية أفكارك المريضه..أنا ساكته عنك حشيمه لأبويا مساعد وجدي صقر.. ولا أنتا مالك حشيمه ورأيك مايهمني وأنتا كلك على بعضك ماتهمني..
إبتسم بسخريه/لاتحاولي مارح تقنعيني.. بس ليه تسكتين الحين؟ واصلي وسمعيني الدرر اللي عندك!!
هزت رأسها بموافقه وبهدوء/فعلاً ليه أسكت وماأقول إذا كان ذا الشيئ الوحيد اللي ممكن يوقف جنانك ذا ويمكن يخليك ترجع لعقلك.. وبما إنك أتكرمت وأتحفتني بتحليلك وبرأيك فيا بصراحه، فلازم أكون أكرم منك وأقابل حسن وكرم ضيافتك بأحسن منها، وأقول عن تحليلي ورأيي فيك بصراحه أكبر.. بس كون متأكد إن كرمي وصراحتي ماراح يعجبوك..وخليك فاكر إنتا اللي جبته لنفسك.
رد بتأييد/أنا متأكد إن أي شيئ منك مارح يعجبني في كل الأحوال.
أشر لها بيده بمعنى أبدئي وهو يبتسم بإستفزاز "أخيراً أستفزيتها وبتتكلم..غبيه..إلا ماتزل بشيئ يفضح لعبتها ويفضح الرخوم اللي لاعبه عليهم..لكن هين حسابهم عندي بس بعد ماخلص من رأس الحيه ذي"

طالعت فيه ببرود وبدون مقدمات/ليه مألعب دور الأم الحنونه طالما الأب أتخلى عن دوره..
عقد حواجبه وبعدم إستيعاب/وشوو!!!!
رددت ببرود/ذا ردي على سؤالك.. لما الأم تموت والأب يختار إنه يتخلى ببساطه عن أولاده وعن دوره كأب.. لازم يجي طرف ثالث يعادل الكفه حتى لو ماله علاقه بباقي الأطراف.. وأنا أخترت إني أكون ذا الطرف.
صاح فيها بغضب/أنتي أتجاوزتي كل حدودك معي وقاعده تختبري صبري وطولة بالي لأقصى حد، وذا الشيئ ماهوبصالحك أبد.
ردت ببرود/كلام كبير ويضحك بالنسبه لواحد ماعنده صبر أساساً ولا أهتم بمصلحة أولاده من باب أولى..مو هذا كان كلامك ليا.
حس ببركان يغلي داخله وعلى وشك الإنفجار وهي واقفه تكلمه بكل برود.. هي يامجنونه وفاقده أي نوع من العقل اللي ممكن يخليها تخاف من تحديه، وذا هو الأغلب..ياغبيه وماتدري وش اللي ورطت نفسها فيه ومع مين في هاللحظه.. كانت عيونه تلمع بغضب عاصف وقسوه غريبه تنذر بالأسوء، أعطاها ظهره ومشي ببرود/خلك متذكره إنك أنتي اللي جنيتي على نفسك.
ردت بهدوء/وأخيراً وصلنا لمربط الفرس.. الهروب المنتظر.
وقف وردد وراها بعدم فهم/الهروب المنتظر؟
ردت بهدوء/بمجرد ماواجهتك بحقيقتك أخترت أسهل الطرق كعادتك وهربت من المواجهه.. تصرف متوقع من واحد زيك وبسوابقك في الهروب.
ألتفت لهاوطالع فيها بإستنكار/ أنااا أهرب من مواجهه.. ومع من؟ مع وحده مثلك!!
طالعت فيه ببرود/اللي يهرب من مواجهة أولاده وأهله بعد موت زوجته ولمدة شهرين وبدون مايدري عنهم أيش يكون؟ اللي يتخلى عن أولاده في وقت حاجتهم ليه أيش يكون؟ اللي يتخلى عن بنته اللي أنعمت فجأه وولده اللي لقي نفسه بدون أم وأب وأخت أيش يكون ؟

كان صوتها يعلى ويزيد حده كل ماكلمته أكثر ومشاعرها بتطغي على برودها وتزيد من قوة كلامها وهو واقف بجمود بدون أي حركه.. أتحول لتمثال بشري مافي شيئ يدل على إنه حي غير نفس متسارع وعرق ينبض بجنون في جانب رقبته، تابعت بقوه/تقدر تتخيل حالة بتول لما صحيت فجأه ولقت نفسها وسط الظلام.. كانت تصرخ وتناديك أنت وأمها علشان تشغلوا لها أنوار الغرفه لإنها خايفه وموقادره تشوف حتى يدها، تقدر تتخيل كم ساعه مرت عليها وهي تكلم نفسها وتتأسف وتعتذر منك علشان تسامحها وترجع لها.. تقدر تتخيل حالتها وهي تلوم نفسها على موت أمها وعلى هروبك منها.. بنتك عايشه طول الوقت ذا وهي حاسه بالذنب لموت أمها.. مقتنعه إنها السبب وإنها لولا غبائها وإصرارها عليكم ذاك اليوم علشان تروح لصاحبتها،أمها ماكانت ماتت وأنتا ماكنت كرهتها وعاقبتها على ذنبها بتركك ليها.. علشان كذا رافضه تشوفك لإنها من ساعة ماصحيت بعد الحادث ولقتك مو جنبها إقتنعت إنك كرهتها وموحاب تشوفها لإنها السبب في موت أمها، فحبت توفر عليك العذاب وتريحك من وجهها، وذا اللي خلاها ترفض العمليه الأخيره.. تبغى تحبس نفسها في الظلام لبقية عمرها علشان تكفر عن الذنب اللي أنتا أوهمتها بيه بكل غبائك وعدم إحساسك.
سكتت لما شافته يفك أزرار بلوزته العلويه بقوه، وتابعت بقسوه/ أيشبك.. مو قادر تتنفس!! حاس بضغط ووجع من كلامي!! ذحين تقدر تحط نفسك مكان أولادك وتعرف هما بأيش حسوا لما لقيوا نفسهم فجأه بدون أم وكمان بدون أب.. بس هما كانوا فاهمين إن أمهم ماراحت بكيفها ،الله أختارها .. لكن اللي مافهموه هوا سبب أختفائك أنتا، ما فهموا كيف في أب يختار إنه يهرب ويتخلى عن أولاده بكيفه.. تقدر تحس ببدر اللي لقي نفسه لوحده لا أم ولا أب ولا أخت،لقي نفسه لوحده بعد الكل ماتخلوا عنه وبكل بساطه ظن إنك ماعدت تحبه.. تدري إنه قاتل نفسه في المذاكره والدراسه وطالع الأول على مدرسته بس علشان يلفت إنتباهك وتحس بوجوده..تعرف إنه حي وموجود مامات زي أمه ولا أنعمى زي أخته.. تعرف إنه ماله أي علاقات وحابس نفسه بعيد عن الناس علشان لايحس باليتم وبإنه أقل منهم.

سكتت وهي تتنفس بقوه وشاده على أيديها لدرجة إن أظافرها جرحت راحة يدها، كانت في مرحلة فقدان السيطره على نفسها، طالعت فيه بدون أي مشاعر، واقف ومستند على جدار وهو يتنفس بصعوبه ووجهه شاحب، تابعت برجفه/أنتا مجرد طفل كبير..وفي أول مشكله حقيقيه واجهتك
أخترت إنك تهرب وتتخلى عن كل شيئ.. مجرد أناني فكر في نفسه وفي وجعه بس ونسي إنه أب ومسؤل عن طفلين موجوعين ومحتاجين وجوده في ذا الوقت الصعب.. أنتا مجرد إنسان ضعيف وماعنده إراده علشان يلملم حياته ويبدأ من جديد.. ولما أخيراً رجعت أخترت تعيش بدور جديد غير دور الأب..دور الضحيه اللي كره الحياه وصار كل شيئ أسود في عينه وحاط على وجهه عبارة ممنوع الإقتراب، أهملت اولادك وضيعت الأمانه اللي سابتها لك أمهم، على الأقل كنت أتذكر إنهم جزء منها..شيئ حلو يذكرك بيها ويعطيك حافز علشان تعيش ليهم.. عارف..كان مارجعت لهم أحسن لإن وجودك وعدمه واحد.. لا.. عدم وجودك كان أحسن عالأقل كان أولادك اتعودوا على غيابك وقدروا يعيشوا بدونك وبدون عقدك اللي ملت حياتهم وعقدتهم معاك، كرهتهم في حياتهم ودمرت نفسيتهم وجالس تقتلهم عالبطيئ.. بس الحمدلله إن بدر طلع أذكى منك وفكر صح وقاعد يبني لنفسه مستقبل بدونك وهيقدر بالتدريج يسحب بتول لناحيته وهيساعدها وهيطلعها من اللي هيا فيه عن قريب ومارح يكون لك أي فضل في ذا الشيئ.. فيا إنك تفوق لنفسك وتسيبك من دور الضحيه الممل وتنتبه لأولادك وتقوي نفسك بيهم وتقويهم بيك قبل ماتضيعهم من يدك، ياإنك تسوي فيهم خير وتهرب..بس ذي المره على طول وبدون رجعه.. خليهم ينسوك ويبدأوا حياتهم من جديد بدونك..

سكتت أخيراً بعد ماحطت يدها على فمها تمنعه من أي كلمه زياده.. ماعادت تشوف قدامها، حاسه بجسمها يرتجف ورجولها مو قادره تشيلها وأنفاسها تضيق عليها.. اتراجعت بسرعه وهي تمشي بخطوات مهزوزه وهي تعطي الحريه لرجلها تأخذها لأي مكان غير المكان ذا.

هزه عنيفه على كتفه خرجته من حالة الصدمه اللي كان فيها، طالع في ملامح جده
القلقان وثريا اللي تبكي بصمت، الجد بقلق/سند أنت بخير؟
طالع فيه بصمت للحظات قبل مايهز رأسه بموافقه.
اتأمل الجد ملامحه الجامده ووجه الشاحب وهو يتنفس بقوه، شكله ماكان يدل على إنه بخير أبداً.. ومن هيكون بخير بعد الكلام اللي قالته جوري.. حس بكلامها كإنها حجار بترميها في وجه سند حجر بعد الثاني بكل قسوه وثبات.. كان متوقع إن سند هيقتلها لامحاله ومارح يسمح لها تقول جمله ثانيه بعد أول جمله لها، وكان خلاص بيسحبها من يدها ويأخذها بعيد عن سند قبل مايبتلي فيها، بس بعد ماشاف صدمته بكلامها وانتبه لرجفة يده البسيطه وهو يسمعها بكل جمود، إنسحب على جنب وهو يراقبهم بصمت ويشوف لفين بيوصلوا أثنينهم وهو متأكد إن محد فيهم إنتبه لوجوده مع ثريا اللي جات سحبته من وسط الحريم بهدوء ماغطى الخوف في ملامحها واللي دلت على إن فيه مصيبه صايره برا.
مدت ثريا يدها بتردد ومسكت يد سند وببكى/حبيبي لاتزعل هي ماتعرف أنت شكثر عان---
دف يدها وقاطعها بصوت ميت وبارد/بكره الصبح بعد ماتشرب القهوه مع أبوي مواعده واحد وبتقابله عند البحيره..
شهقت ثريا وهو يعطيهم ظهره ويمشي بهدوء ويختفي من قدامهم مثل السراب ، الجد بإستغراب/وش يقول ذا المجنون؟
ثريا بعصبيه/مدري يبه.. هو من اول يلمح لها بحاجات غريبه والحين كلامه ذا.. أنا موبفاهمه أي شيئ منهم الأثنين.
مسكها وجلسها بهدوء/أحكي لي السالفه من أولهاوخل أفهم مثل الخلق.
بلعت ريقها بصعوبه وبدأت تحكي له من أول ماجاهم سند لحد ماسابتهم وراحت تناديه.

[لامارا]

سنتدت ظهرها على أول شجره صادفتها وإنهارت على الأرض وهي تشهق بعنف،شدت نقابها بيد ترجف وإحنت رأسها وهي تحاول تتنفس بعمق وهدوء، كانت تحاول تتنفس أكبر كميه هواء ممكنه وتستفيد منها وبعد عدة محاولات بدأت تحس بتحسن وبنفسها يرجع لطبيعته،سندت رأسها عالشجره بتعب.. صداعها وصل لأقصاه وحاسه بوخز في مؤخرةرأسها وبعيونها بتخرج من محاجرها..مسحت وجهها وهي لسا ترجف واتفاجأت بالرطوبه اللي ملت كفوفها..دمووووع!! بكيت!! غمضت عيونها بقهر وهي تمسح دموعها بقوه وهي ماتبغى تفكر حتى في سبب دموعها، حاسه بضيقه وبألم في صدرها وحاسه بخفقان قلبها مزعج زي الطبل .. جلست بهدوء لفتره قبل ما تعدل طرحتها ونقابها وهي تفكر..لازم تطلع من هنا.. لازم تبعد وبسرعه.. ماتبغى تشوف ولاتسمع أحد تبغى تجري وتجري قد مافيها.. بس وين تروح؟ ماتقدر تقول لأخوها تعال خرجني موحابه المكان، ولاتقدر تجلس .. لوجلست هنا دقيقه زياده يمكن تصرخ بأعلى صوتها، وهيا على وشك إنها تعمل ذا الشيئ، دارت بعيونها في المكان بتفكير سريع، كانت مساحه شاسعه من النجيل الأخر والأشجار والنخل اللي في كل مكان، مكان هادي ومثالي ليها في الظروف العاديه.. إنتبهت إن في شجر قريب من الجدار وبدون تفكير أو تردد رفعت عبايتها ودخلت طرفها في بنطلونها الجينز ونزلت عبايتها على كتفها وأتسلقت الشجره بسرعه ومنها نطت للجدار بحذر، قاست المسافه بين الجدار والأرض وكانت حوالي أربعه أمتار.. حكت رأسها بتفكير "أربعه أمتار مو قليله، يمكن أكسر رجلي إذا مانزلت مزبوط.. بس لو جلست هنا ممكن أتجنن" مافكرت كثير خلعت نظارتها وعلقتها في بلوزتها من جوا وفي لحظات كانت نزلت بجسمها بإنتباه وهي متعلقه بالجدار بقوه، طلت لآخر مره عالأرض وسمت وفكت أيديها وبمجرد مالمست الأرض بقوه أتكورت على نفسها ودحرجت جسمها عالأرض في محاوله منها لإمتصاص الصدمه زي ماعلمها علي.

------------------


ركب سيارته بسرعه ولما وصل للبوابه علق عالبوري بإزعاج مستمر، وبمجرد ماشافوه الحرس أتوجهوا لسيارتهم لكن وقفهم بإشاره منه وطلب يفتحوا البوابه وطلع بسرعه جنونيه وفي باله شيئ واحد بس..إنه يبعد عن ذا المكان قد مايقدر، دخل بالسياره في طريق ترابي ومنه للصحراء وبعد فتره وقف السياره ونزل، شاف الساعه اتجاوزت الخمسه بكثير وأتذكر إنه ماصلى العصر للأن.. أتوضى وصلى وجلس يستغفر لفتره قبل ما يعقد أيديه على مؤخرة رأسه وينسدح عالرمل.. سرح بعيونه في السماء الصافيه وعقله مو قادر يستوعب اللي سمعه.. مو مصدق إن بتول بتفكر بذي الطريقه..معقول حاسه بالذنب ومحمله نفسها مسؤلية موت سمر.. رافضه العمليه علشان كذا.. وبدر بدر من يومه ذكي وشاطر بالمدرسه وهو أساساً موبإجتماعي ولايحب القعده مع الناس.. في شيئ غلط..أكيد اللي سمعه كله كذب..مستحيل يصدق إنه عاش خمس سنين وهو يفكر إن أولاده يكرهوه، وهم عاشوا خمس سنين يفكروا إنه يكرههم.. غمض عيونه بقوه " وش السالفه ياسمر..معقول ضيعتهم مني مثل ماضيعتك.. أنا موبفاهم شيئ ولا عاد بي طاقه لكل ذا"
زفر بضيق وهو يراقب الشمس تبدأ رحلة غروبها وتختفي خلف الجبال بخجل وتلفون السياره يرن بإزعاج متواصل من وقت ماطلع من المزرعه.. حرك السياره وأتصل لوضاح يبلغه بسفره المفاجئ وبعدها أتصل لريان يجهز الطياره ويستناه في المطار، حاس عقله وقف فجأه عن العمل وماعنده إستطاعه يفكر أويحلل أي شيئ من اللي سمعه،كل اللي متأكد منه هو إن وجوده في الرياض حالياً شيئ غير وارد إطلاقاً ولازم يبعد عن هنا ولأي مكان.


----------------------




وقفت فجأه لما شافت جدها مع ثريا، وبإرتباك/هلا يبه ..وش تسوي هنا؟
الجد بإبتسامه/أفا ياسمية الغاليه..ماتبين تشوفيني!!
باست رأسه بإحراج/لاعشت ولاكنت يبه، بس إستغربت شلون تركت الرجال وجيت هنا.
ثريا بهدوء/جاء شاف امي وديمه وقعدنا نحكي شوي.
هزت رجولها بعصبيه واضحه وبتساؤل/أقول ثريا ماشفتي جوري؟
ثريا بإستغراب/ليه ماهيب داخل عندكم.
هزت رأسها بنفي/لا.. كنت أبيها ضروري ودورت عليها ومالقيتها بأي مكان والبنات قالوا إنها معك.
طالعت في جدها بقلق/كانت معي وراحت داخل من أول..قبل أكثر من ساعه.
عضت ديما أظافرها بتوتر/المشكله إنها تاركه جوالها داخل وسألت الحريم والشغالات محد شافها من العصر..
ثريا بإستغراب/ وش الشيئ المهم اللي تبينها فيه وخلاكي تدورين وتسألين عليها بهالشكل.
غمزت لها ديما وهي تشتغل في جوالها وبإرتباك/سالفه كنت بقلها عليها.
قريت ثريا رسالة ديما وبهدوء/ الله يسمعنا خير ، وش المصيبه اللي تحكين عنها.
طالعت فيها بغيض "الحين أنا راسله رساله تقوم تحكي قدام أبوي. وش فيها ذي"
الجد بصرامه/إذا يخص الجوري قولي بسرعه لإنها الحين في مشكله ونبي نعرف السبب.
طالعت فيهم "مشكله!! يعني اللي خفت منه صار" وحكت لهم اللي صار وبعد فترة نقاش، وبحقد/ يبه كله من شذى اهي اللي اتلقفت وسجلت مكالمتها وسمعتها لسند..أنا قلت لها جوري مستحيل تسويها.
هز رأسه بأسف/الحين اللي صار صار، قومي ياثريا شوفي وينها ولا تخلي الحريم يدروا عن شيئ..وإذا سألوا عنها قولي مع أخوها.
ثريا بقلق/وين بتكون راحت.. إذا ديما دورت قسم الحريم كله وماهيب موجوده.
شهقت ديما بخوف/يبه لايكون سند سوا لها شيئ؟ ولا أخذها معه؟
ثريا بحده/أنتي أنهبلتي.. وش اللي يأخذها معه..ذا سند موبواحد من الشارع.
ديما بتبرير/أنتي اللي قلتي إنه كان جان منها وطلع من أول ومايرد عليكي.. اهي بعد مختفيه وماترد علشان كذا فكرت إنه---
قاطعهم الجد بهدوء/سند يمكن فهم غلط وجن من اللي سمعه،بس مهوبمجنون ولاقليل شرف علشان يأخذ البنت معاه..أنا بروح الحين وأنتن دورن ولا أحد يدري عن شيئ، مانبي فضايح للبنت في بيتنا يكفينا سواد الوجه اللي جاها من إخوك.
هزوا رأسهم بموافقه وراحوا يدوروا عليها وراح الجد للبوابه وسأل عن سند وعرف إنه خرج لوحده وماكان معاه أحد في السياره، رجع للرجال وجلس معاهم بهدوء وهو يسرق النظرات لعبدالرحمن، كان حاس بالخجل من تصرف سند وموقادر يحط عينه في عين عبدالرحمن من اللي صار.. هو يدري إن سند ماله في الخرابيط والحال المايل، ويدري إن دمه حار ومايتفاهم في هالأشياء لكن ذا مايعطيه الحق في اللي سواه.. سواته كانت رديه ومو من سلومهم.. مافهم وش اللي خلاه يتصرف بهالطريقه الوقحه معها وهو اللي طالما شهد له الجميع بعقله وحكمته وذكائه.. كان يقدر يتصرف بطريقه أفضل ويفهم السالفه بدون قلة الحياء والشوشره اللي صارت ، سند عاقل ونشمي وماعمره أهان ضيف شلون لو كانت حرمه .. زفر بضيق على الأقل هو يعرف إن سند بخير، لكن الجوري شلونها.. الشمس غربت وهي للحين مابينت والله يستر مايكون صار لها شيئ.

[لامارا]

وقفت بألم تنفض عبايتها وبعد ما أطمنت على نفسها وإن كل جزء من جسمها سليم وفي مكانه بعدت عن السور بكثير وهي تجري بسرعه لحد مانقطع نفسها، وقفت ترتاح وتتأمل المنظر قدامها.. صحراء ممتده على مرمى البصر وأكوام من الرمال بتنعكس عليها أشعة الشمس وتزيد من لونها الذهبي، حست بالرمال تناديها علشان تأخذ راحتها وتسترخي، وهي ماكذبت خبر خلعت جزمتها (أكرمكم الله) وفكت طرحتها
وأنسدحت على الرمل وهي تتنفس بعمق وراحه نسبيه.. فعلاً كان أحسن شيئ سوته هوا خروجها من المزرعه حست بنفسها تهدئ وترجع لطبيعتها المسيطره والبارده.. وبعد فتره أنتبهت لقرص الشمس اللي قرب يختفي وراء الجبال والظلال بتنتشر بسرعه وتعتم المكان.. دارت بعيونها في الأرض في تفتيش سريع وحست براحه وهي تمسك بغصن شجره أجرد وتشد عليه بقوه قبل ماتجري بأقصى سرعتها وتبدأ رحلة رجوعها، مهما كانت قويه وماتخاف من أي شيئ بسهوله إلا إنها ذكيه وعارفه إنها في صحراء ماتعرف فيها شيئ ولوحدها والدنيا تقريباً ظلمت.. ورغم إن المزرعه على مرمى بصرها وشافت أنوارها إلا إنها كانت بعيده عنها، ماحست بنفسها وهي تجري وتبعد، بس ذحين إكتشفت إن المسافه اللي قطعتها كانت جداً طويله، جريت بطاقه أكبر لأن أخر شيئ تتمناه إنه تطلع لها حيه ولا تصادف كلب ولاذيب أو أي شيئ من الأشياء اللي يمكن تكون عايشه في ذي الأماكن..أخيراً وصلت لأسوار المزرعه وكانت الساعه سبعه، وقفت وأنحنت وأستندت بأيديها على ركبها وهي تتنفس بقوه لحد ما أرتاحت نوعاً ما.

زفرت بتعب وجلست عالأرض تتأمل الجدار العالي، ذا كيف بتتسلقه وتدخل المزرعه، نزلتها وإن ماكانت سيئه ولا إنكسر فيها شيئ إلا إنها طلعت بكم رضه والحمدلله إن الأرض اللي أستقبلتها بترحاب كانت عباره عن رمل في رمل ولا كانت النتيجه أسوء من كذا بكثير.. غمضت عيونها بقهر وهي تسب نفسها بصوت عالي على غبائها.. وقتها كان كل همها إنها تطلع من المزرعه وبأي طريقه ومافكرت في موضوع الرجعه وكيف بتدخل مره ثانيه.. كانت الكشافات المثبته على السور بتوفر إضاءه قويه سمحت لها تتأمل أسوار المزرعه بكل سهوله ووضوح.. كان الجدار أملس وناعم ومافيه شقوق أو أماكن بارزه تقدر تتمسك بيها في رحلة صعودها الدرامي وأكيد اللي سواه كان عامل حساب المتطفلين أمثالها علشان كذا خلاه بذا النعومه.. رجعت وراء لمسافه وهي تفكر تنفذ حركه من اللي تشوفها في الأفلام ممكن تساعدها، فكرت تجري للجدار وتحاول تتسلقه وبسرعتها وبقوة إندفاعها ممكن توصل لنص الجدار وتقدر تتمسك فيه بيدها وترفع نفسها لفوق.. ماقلبت الفكره في رأسها كثير وفي ثواني كانت تجري بسرعه ورفعت رجولها عالجدار ووووو

هيا يادوب ثلاث خطوات اللي داست فيها عالجدار صعوداً قبل ماتحس بنفسها طايره في الجو وتطيح بعدها على ظهرها بقوه.. اتلوت مكانها بألم وهي تكح وبعد لحظات أتحولت كحتها لضحكه عاليه.. ضحكت على تهورها وكبريائها اللي اتمرغ في التراب بمعنى الكلمه، في الأفلام كانت الحركه أسهل من كذا بكثير لدرجة إنها إقتنعت إنها ممكن تسويها بكل بساطه .. حست بجسمها بيصرخ من الوجع وكل جزء فيه تحسه صار يمشي في جهه غير الجزء الثاني، وقفت بكلفه وتعب وعدلت عبايتها ونقابها ونفضتها قد ماتقدر من التراب ومسدت جسمها بيدها بألم.. ماعاد قدامها إلا حل واحد والله يستر عليها.. مشيت جنب الجدار لمسافه حستها مو راضيه تخلص لين وصلت للبوابه الكبيره، وقفوا الحرس اللي عالبوابه بمجرد ماشافوها، الأول بقلق/خير أختي، أنتي ضايعه؟
ردت بهدوء/لا أنا بدخل المزرعه.. مو ذي مزرعة المنذر.
الثاني بشك/ممنوع تدخلين بدون أذن.. أنتي وش جابك هنا ومع من؟
طالعت فيهم بصمت كانت أيديهم على سلاحهم وباين إنهم شاكين فيها ومعاهم حق.. وحده طالعه من الظلام لوحدها وفي منطقه شبه معزوله وشايله عصى في يدها ومنظرها مغبر.. موبعيد فكروها جنيه.
الحارس الأول/أختي مانقدر ندخل أي أحد، بس إذا أنتي مخطوفه ولا ضايعه بنساعدك.
هزت رأسها بنفي "ربي يسعدك ياشيخ" وبهدوء/إذا ممكن جوال بس وأنا بتصرف.
أعطاه الجوال وخويه الثاني يتكلم في الاسلكي وثواني ولقيت ثلاثه حرس كمان في وجهها والكل يطالعها بشك وإستغراب، طالعت فيهم ببرود/خير.. في شيئ؟
الحارس الثاني/أنتي اللي خير، وش عندك هنا.. أنا موبمرتاح لك.
طنشته وأتصلت لثريا اللي ماردت، أتصلت مره ثانيه وبهمس/ثريا تعالي أنا عند البوابه وحرسكم مو راضيين يدخلوني....... أنتي دخليني وبعدين أسألي.
قفلت في وجهها وأعطت الحارس الجوال/شكراً.
هز رأسه بصمت وبعد دقيقه رد عالاسلكي وواحد يطلب منه يدخلها بسرعه.
أشر لأصحابه يبعدوا عن البوابه وهو يتقدم ويفتح لها باب جانبي بهدوء/أتفضلي أختي والسموحه منك بس ذا شغلنا ومانقدر ندخل أي أحد.
رت بإمتنان/يعطيك العافيه وماقصرت.
دخلت بسرعه وهي تزفر براحه "الحمدلله أخيراً رجعت بخير" طالعت بحيره في المكان ومشيت وهي ماتدري على وين رايحه، شافت سياره صغيره من اللي يستخدموها في ملاعب الجولف جايه عليها وقبل ماتأشر لها علشان تسأل وين قسم الحريم وقفت جنبها ونزلت منها ثريا وجدها صقر، قررت إن خير وسيله للدفاع هي الهجوم، وبزعل/الله الله ..حركات ياثريا أنتي وجدي تتمشوا بدوني؟
ضمتها ثريا ببكى/وين كنتي ياحيوانه.. وش طلعك برا المزرعه.
جوري بهمس/أنتي هبلا يابنت، ليه جايبه جدي معاكي!
فكتها وبعصبيه/لا ياشيخه ذا اللي همك وحنا قلبنا عليكي المزرعه وبغينا نجن.
الجد/وين كنتي يابوك.. أقلقتينا عليكي.
طالعت فيه بصمت"شكل ثريا قالت له إني ضايعه ولا أيه" وبهدوء/خرجت اتمشى شويه ياجدي.. سامحني ماكلمتكم..بس قلت مابطول وماله داعي أزعجكم.
ثريا بحده/وليه ماتمشيتي هنا.. وبعد تاركه جوالك وحنا ندور مثل المجانين.
ضمتها جوري وبأسف/حبيبتي والله ماقصدت أخوفك..بس كنت..
سكتت وماعرفت تكمل كلامها، سحبتها وركبوا السياره ورجعوا لقسم الحريم، الجد بإستغراب/أنتي شلون طلعتي برا المزرعه؟
كحت بإرتباك/هااا.. طلعت عادي.
الجد بإصرار/شلون طلعتي والحرس قالوا إن محد خرج من البوابه.. تكلمي بسرعه ولا تكذبين.
شتت نظراتها بعيد عنه وهي تحك رأسها وبهمس/ نطيت من فوق الجدار.
ماسمع أيش قالت وعاد سؤاله وكررت جوابها بسرعه وبإحراج/نطيت من فوق جدار المزرعه.
خبطت في الجد لما فرملت ثريا فجأه وبصيحه/وش سويتي!!
بعدت عن الجد بخجل وبعصبيه/أنتي من الغبي اللي علمك تسوقي كذا؟
الجد/شلون نطيتي من فوق الجدار.
عدلت نقابها وبإنزعاج/عادي ياجدي اتسلقت شجره ونطيت عالجدار ومنه للأرض..عادي.
ثريا بعصبيه/عادي! أنتي مجنونه ولا شلون.. ماتفهميني ليه سويتي كذا؟
جوري بهدوء/خلاص ياثريا ماصار شيئ شوفيني قدامك ومافيا حاجه الحمدلله.
الجد بضحكه/منتي صاحيه يابنت شلون سويتيها.. ووش سويتي برا المزرعه؟
حست براحه لإنه ماسألها ليه سوت كذا، وبمرح/عادي ياجدي أنا متعوده عالشجر والجدران وبينا عشرة عمر.. جريت بس لين تعبت ورجعت لك.
الجد بإستغراب/وش ذا اللي معك؟
طابعت مكان ماأشر لها وشافت العصى اللي جابته معاها لسا في يدها وبإبتسامه/ ذي أخذتها لما الدنيا ظلمت..خفت لايطلع لي شيئ قبل ماأوصل وقلت أدافع بيها عن نفسي.
ثريا بحقد/صدقتك أنا..قالت خفت.. وأنتي تخافين أصلاً..منتي بصاحيه أبد.
جوري بضحكه/وليه ماخاف أحد قلك ماعندي إحساس.. عاد لو تعرفي الأشياء اللي أخاف منها بتموتي من الضحك.
الجد بإبتسامه/المهم إنك بخير يابنيتي ورديتي بالسلامه.
جوري بهدوء/الله يسلمك ..جدي أنتا قلت لعبدالرحمن إني موموجوده؟
هز رأسه بنفي/الحريم يظنوا إنك معه وهو يظن إنك مشغوله معهم.
صفقت بإعجاب/الله عليك يالصقر لعبتها صح.
ثريا تقلدها بتريقه/لعبتها صح يالصقر.. تحسبينها لعبه.. بغت قلوبنا توقف حسبي الله عالعدو من مخك ذا اللي مدري شلون قايل.
وصلوا لقسم الحريم وقبل ماتدخل وقفها الجد/بدلي وأرتاحي وتعالي أبي أكلمك شوي.
طالعت فيه بتفكير "مره مو وقته ياجد..على الأقل مو قبل ماعرف ثريا أيش قالت لك بالضبط" وبإحراج/معليش جدي ممكن تعفيني الليله من الكلام.. ترى واقفه بشق النفس وبطيح من طولي إذا تسمح لي بروح أنام وبكره لنا كلام ثاني بإذن الله.
هز رأسه بموافقه/مسموحه يابنيتي ويصير خير إن شاء الله..يلا تصبحين على خير.
ومشي وتركها مع ثريا اللي دخلت معاها، سلمت عاللي لقتهم في الصاله وأستأذنت منهم وطلعت تحت أنظارهم المستغربه من شكلها المعفوس .
دخلت غرفتها رأساً وخلعت عبايتها وفكت شعرها وجلست قدام التسريحه ووجهها بين كفوفها، دق الباب ودخلت ثريا وجلست على طرف السرير وبحنان/تعبانه؟.
فهمت قصدها وظلت على وضعها وبهمس/بموت ياثريا بموت.
أنحنت عليها وضمتها من ظهرها وبهمس/بسم الله عليكي من الموت.
وقفتها بشويش وبأمر/أدخلي أتسبحي وأنا بجهز لك غيار وشيئ خفيف تأكليه وصلي ونامي وأرتاحي.. ولما تصحين كل شيئ بيكون بخير.
هزت رأسها بموافقه وراحت ثريا للدولاب وطلعت لها بيجامه وهي دخلت تأخذ دش وبعد ساعه تحت المويا الحاره خرجت بنفسيه أحسن وهي لابسه بشكير للركبه ولافه شعرها بالمنشفه، كانت تشنجات معدتها كل مالها تزيد وكأن ماكان ناقصها غير الآم الدوره اللي شرفت في الوقت الغلط، شافت صينية عليها سندوتشات وكأسة حليب وثريا مو موجوده، قفلت الباب بالمفتاح واتعطرت ولبست بسرعه وفكت الباب ودخلت تحت اللحاف وفرشتها في يدها، دق الباب ودخلت ثريا بإبتسامه/زين اللي طلعتي قبل ماأكسر عليكي الباب.. خفت تكوني نمتي داخل ولاصار لك شيئ.
بدأت تنشف شعرها وبهدوء/ياريت نمت.. بس أنا أحب أخذ وقتي وأستمتع بدشي، وشعري كمان مايساعد على دش سريع.
جلست جنبها واخذت منها المنشفه وصارت تساعدها وبتسأؤل/عندك أرق صح.. باين من وجهك والهالات اللي تحت عيونك.
عضت شفايفها بإرتباك/أفتكرت إنها أختفت مع كريم الأساس بس شكله مانفع.
مشطت لها شعرها ورفعته لها بمشبك وبهدوء/لامانفع.. الحين صلي وكلي وبنتفاهم.
فكت المشبك وبعثرت شعرها تحت أنظار ثريا المستغربه وبتبرير/ماحب أنام وشعري ملموم ماأرتاح.. بعدين ماعلي صلاه ومابغى أكل.. بحط رأسي قبل مايجوا البنات برجتهم.
قربت منها الصينيه بإصرار/بتأكلين غصب وترى الحليب بالهيل مثل ماتحبين والبنات موبجايين..قلت لهم إنك تعبانه من اللعب مع أخوكي ونمتي.
طالعت فيها بإمتنان/ياعمري أنتي.. تعبتك معايا وخوفتك صح.
حطت السندوتش في يدها وهدوء/أيه حيييل.. وعقلي طار مني وأنا أحاول أعرف وش ممكن يكون صار لك ووين أختفيتي.
أكتفت بالسكوت وبدأت تأكل وتشرب الحليب بدون ماتحاول ثريا تفتح معاها أي موضوع وبعد ماخلصت أكل أعطتها ثريا حبه،جوري بإستغراب/أيش ذا؟
طالعت فيها بهدوء/منوم، خذيهاعلشان تنامي زين وترتاحين شوي.
حطت الحبه في الصينيه، وذكرى الحبوب المهدئه اللي شربتها بعد زواجها واللي صار لها تمر في بالها وبرفض/انا أساساً ماأشرب أدويه فمابالك بمنوم.
أعطتها الحبه بإصرار/أنا دكتوره وفاهمه حبه وحده مارح تضرك، بالعكس ست ساعات نوم بتكون مفيده في حالتك أكثر مما تتخيلي.
طالعت فيها بحذر/ شكلك عارفه عن أيش بتتكلمي بالضبط.
رجعت تعطيها الحبه وهي تبتسم بلامبالاة/ماأنكر إني أستخدمها لما أكون تعبانه وموبقادره أنام.. بس لاتخافي موبمدمنه عليها إذا ذا قصدك.
أخذتها منها بتفكير "فعلاً ست ساعات نوم أكثر من اللي حلمت بيه طول الأسبوعين اللي فاتوا وبتنفعني بدل مايغمى عليا قدامهم من التعب، واساساً مارح أقدر أنام بعد اللي صار" سمت بالله وبلعتها بسرعه مع كأستين مويا، ثريا بضحكه/أنا ماشفت أحد يشرب مويا كثرك..
هزت رأسها بموافقه لطالما حشوها أهلها وحتى عيالها على طريقة شربها الكثيره للمويا، وبإبتسامه/ذا مشروبي المفضل.
فكت جوالها ولقت إتصال من قصي وثلاثه من عبدالرحمن وكذا إتصال غيره، أتنهدت بضيق "أكيد عبدالرحمن قلقان عليا،
مو عوايدي أطنش إتصالاته ومافيا حيل أكلمه" أرسلت له رساله ولقصي وياسمين كمان، حولت الجوال عالصامت وحطته عالكومدينه، وبإحراج/ثريا..ممكن تطفي النور وتجلسي معايا لين أنام.
شالت صينية الأكل وطفت النور وخلت نور خفيف قبل ماتجلس جنبها بضحكه/وأحكي لك حكايه بعد.
أعطتها ظهرها ونامت على جنبها وضمت مخدتها لصدرها بقوه وبرجاء/ مايحتاج حكايه مشطي شعري بس وهكون ممتنه.
اخذت الفرشه وبدأت تمشط شعرها بهدوء/وذي عاده غريبه من عاداتك اللي كل يوم أكتشفها.
هزت رأسها بصمت وهي تقرأ أذكار النوم
وعقلها يغيب بالتدريج عن الوعي لين إنتظمت أنفاسها وغرقت في النوم.

[لامارا]

كان واقف مع الشباب في أسطبل الخيول وكل واحد يجهز حصانه، فتح جواله بسرعه أول ماسمع تنبيه الرسايل ولقي رساله منها (مساء الخير حبيبي.. وحشتني ويارب تكون بخير.. معليش جوالي ماكان معايا وإنشغلت شويه..ذحين بنام حاسه جسمي مكسر من التعب وبكره إن شاء الله من الفجر تلقاني معاك.. أستودعتك الله) أتنهد براحه بعد ماكان باله مشغول عليها، كان حاس إن فيها شيئ وأنشغل باله بزياده لما ماردت على إتصالاته بالعاده ترد عليه من اول رنه.. أستحى يقول لعمه مساعد إنه بيشوفها خاصة إنه كل عيلة المنذر موجوده وصعب يخرجها من وسط حريمهم "الحمدلله إنها بخير وبتنام، على الأقل ترتاح شويه من اللي هي فيه" ألتفت لناصر اللي يكلمه وبتركيز/هلا ناصر معليش ماسمعتك.
ناصر بنغزه/معلوم ماتسمعني.. اللي مأخذ عقلك.
طالع فيه بإستغراب/اللي مأخذ عقلي؟
سحب منه الجوال وحركه قدام وجهه بمكر/أكيد تكلم الحبيبه دامك أفرجت عن إبتسامتك وشفناها أخيراً.. بشوف وش أرسلت لك وخلتك تفهي كذا.
طالع فيه عبدالرحمن بإبتسامه وهو متأكد إنه مارح يفك جواله، خلاص أتعود على حركات ناصر ومزحه اللي مايخلى من الأدب، وبضحكه/أيه الحبيبه عندك مانع.. بعدين طالع شكلك يالتمساح ماعاد إلا أنت أفهي فيك.. الحمدلله على العافيه بس.
ناصر بزعل/الحين هالوسامه كلها وتمساح.. شكلك ماتشوف زيين أنت وعيونك العسليه وشعرك ذا كأنك مصطفى.
حرك يده في شعره البني بإبتسامه/مصطفى مصطفى ماعندي مشكله.. ذي جينات جدتي وأبي الله يرحمهم وماتتعوض.
رن جواله في يد ناصر اللي حطه في جيبه بإستهبال/ اليوم حرمان مافي مسكنات ومنوم.. خلك تتعذب.
قام عبدالرحمن يسحب الجوال بالقوه وبمزح/ وضاح تعال لأخوك قبل مايصير فيه شيئ، أنا غير مسؤل.
طالع فيهم وضاح بإبتسامه/عندك الضوء الأخضر وريحنا من هذرته الزايده وفاتورة المستشفى علي.
طالع فيه ناصر بصدمه/أفااا ياخوي تخون فيني لأجل الدحمي.
أخذ عبدالرحمن الجوال وبلؤم/أنا بريحكم مني وأنتوا حلوا مشاكلكم العائليه لين أرجع.. وحصاني جاهز خرجوه معاكم.
خرج وشاف المكالمه الفائته وعاد الإتصال بفهد وبعد رنه رد عليه بترحيب/السلام عليكم..هلا دحوم لايكون أزعجتك بإتصالي.
عبدالرحمن /وعليكم السلا ورحمة الله وبركاته.. أهلين فهد لا يارجال لا إزعاج ولاشيئ.
فهد/شفتك مارديت قلت يمكن نايم ..عاد مدري وش نظامكم في صنعاء..أخبارك عساك بخير.
عبدالرحمن بضحكه/أي نوم يارجال جالس مع الشباب قهوه وخيل وأمورنا طيبه الحمدلله.. أنت كيفك.
فهد/الحمدلله زين ،ماشاء الله مضبط أمورك وشكلك مطول في صنعاء.
صرخ عبدالرحمن في ناصر/ياولد أنتظر لاتبدوا بدوني.
ورجع يكلم فهد/لا رجعت من ثلاث أيام.. وذحين في الرياض عند ناس من جماعتنا بعيد عليهم.
فهد/من جد عندنا..أنا أقول الرياض منوره هاليومين.. خلاص لازم تجيني البيت قبل ماترد جده.
عبدالرحمن بهدوء/منوره بأهلها، تسلم يافهد بس ماأقدر أوعدك، أنا مو مطول هنا عندي شغل في جده ولخبطه، خلها بظروفها ومايكون خاطرك إلا طيب.
فهد/والله ودي أقوم بواجبك وأعرفك على أخوي فواز والأهل ..أنت شف وش بيصير معك ورد لي خبر.
عبدالرحمن/واجبك وصل وماعليك قصور يافهد.. إذا قدرت بتلقاني عندك وإن مالنا
نصيب نعوضها في جده إن شاء الله.
فهد/على خير.. يلا أشغلتك عن الشباب وبينا ألو.. في أمان الله.
قفل عبدالرحمن مع فهد ورجع للشباب اللي خرجوا الخيول وبدأ كل واحد يستعرض مهاراته قدام الثاني.

---------------

الساعه التاسعه ليلاً

كانوا البنات متجمعات عند المسبح وكلهم مشغولين بالسباحه واللعب، مالت شذى على ديما بهمس/إلا وش صار على *** أشوفها مختفيه..شكلها خايفه تقابلنا.
ديما بحده/شذى أحترمي نفسك وعن الغلط، بعدين هي كانت مع جدي وأخوها طول اليوم طبيعي تتعب وتنام بدري، هي ماسوت شيئ علشان تخاف..أنتي فاهمه غلط.
شذى بشماته/أي غلط واللي يرحم والديك، أنا قلت لكم من البدايه إنها أوفر ومسويه نفسها شيئ وهي ماعندها سالفه.. بس زين إن سند عرف حقيقتها هو الوحيد اللي بيوقفها عند حدها.
ديما ببرود/زين متذكره سند.. يعني أكيد متذكره وش قال لنا قبل.. والله ياشذى إن نطقتي بحرف ولا لمحتي مجرد تلميح لأي أحد، أنا اللي بوصل الخبر لسند بنفسي وساعتها بتتمنين لو مابه سند أبد.
طالعت فيها بحقد/أنا بسكت بس لإن سند اللي طلبني ولا أنتي ماهميتيني..أنا شذى ياديما لاتنسي هالشيئ.
ضحكت بإستفزاز/سند أمرك ماطلبك، ونصيحتي لك لاتتجاوزين حدودك معاه لإنك بتطلعين خسرانه.
سبحت بعيد عن شذى الل بتموت من القهر
" هين ياديما بتشوفين شذى وش تقدر تسوي، وسند وكل ثروته بتكون لي، وأنا اللي بتحكم فيها وفيكم قريب"

-

[لامارا]

الساعه السابعه صباحاً

دارت بعيونها في المكان بإعجاب، رغم إنها رسمت في بالها صوره من الوصف اللي سمعته بس ماكانت متخيله إنه بيكون بالجمال ذا، تل حجري يتخلله شلال مويا بيصب في بحيره كبيره فيها سمك وتحفها اشجار النخيل من كل جانب واشعة الشمس بتنعكس عن سطح المويا وترسم تموجات على الصخورالحجريه المنتصبه بشموخ ..كانت أشبه بواحه إستوائيه منعزله عن باقي العالم.. أتنهدت براحه وهي تخلع نقابها وتنزل عبايتها على كتفها، شافت ساعتها اللي أتجاوزت السبعه بشويه.. أتذكرت كيف صحيت من نومها وهي حاسه بضياع وعدم تركيز من منظر الغرفه الغريب عليها، وبعد عشر دقايق أتذكرت اللي صار لها امس والمنوم اللي شربته ولما شافت ساعتها أكتشفت إنها اتأخرت في نومها وإن الست ساعات اللي كانت مفروض تنامها أمتدت لعشره بقدرة قادر، وفي ظرف ربع ساعه كانت أخذت دش ولبست بدلة وكوتش سبورت ولقيت عبايتها مغسوله ومكويه ومعلقه في الدولاب، جهزت نفسها ونزلت لتحت ولقيت جدها صقر وأبوها مساعد والجده وامه منيره وثريا صبحت عليهم واتقهوت معاهم قبل ماتروح تجهز قهوة عبدالرحمن وتتصل عليه علشان يقابلها وبعد عشر دقايق معاه ودعته وجات للبحيره...

صباح الخير

ألتفتت للصوت الهادي اللي إنتشلها من أفكارها وإبتسمت بحب/ياصباح النور والسرور.
وقفت لما يده يصافحها بخجل ومدت أيديها وبدل ماتصافحه بالمقابل شدته من كتوفه بشويش وضمته بحنان/أهلين بدر..كيفك حبيبي.

أتصلب جسمه للحظات بصدمه قبل ماتبعده عنها بهدوء وحس بالخجل ووجهه صار أحمر، طول الأيام اللي قضتها في بيتهم في العيد اللي فات كان يكتفي بمصافحتها بخجل كل ماشافها مع قصي رغم إنها كانت تتعامل معاه مثل ماتتعامل مع قصي،
كانت المره الأولى اللي تضمه فيها بذي الطريقه واللي حسسته بإحساس غريب ومريح في نفس الوقت، إنتبه لنظراتها المبتسمه وهي تتأمله، وبإرتباك/الحمد..لله..زين.
سحبته من يده وجلست معاه عالأرض وبحنان/أسفه راحت عليا نومه واتأخرت عليك.
هز رأسه بنفي وتابعت/فطرت؟
هز رأسه بموافقه بدون مايرد، وشافها كشرت بزعل/أنتا زعلان مني!! ليه ماتكلمني؟
فرك أيديه بإرتباك من كلامها وهو يشتت نظراته عنها، مايدري ليه حاس بإحراج وصوته رافض يطلع، وقفت فجأه وبهدوء/شكلي أزعجتك أمس وخليتك تجي غصب.. خلاص أنا بروح واسيبك براحتك..أسفه.
وقف وراها بسرعه ومسك كم عبايتها وبإندفاع/لا تروحين.. موبقصدي كذا..بس أنا..مابي اتعبك معاي.
طالعت فيه بإبتسامه/بالعكس أنا مبسوطه بيك ورح نتسلى سوا..ممكن نبدأ قبل ماتسخن الشمس وتشوف قدامك بطاطسه محروقه.

مشي لدارجته اللي ركنها على جنب وجاب معاه كوره وناولها بإبتسامه/يلااا.

-------------
الساعه الثامنه صباحاً

وقف الجد وأبو سند بيطلعوا ، طالعت فيهم أم سند/أم فواز البارح كلمتني وقلت لها تتفضل عندنا اليوم.
أبوسند/الله يحييهم البيت بيتهم.
أم سند بإبتسامه/قلت أعطيك خبر لإن فواز وفهد بيجون بعد وبيكونوا هنا عالساعه خمس.
الجد بتساؤل/منو فهد؟
أبوسند/يبه فهد أخو فواز اللي كان يدرس برا..
الجد بتفكير/هذاك اللي شفته يوم عزاء أبوهم الله يرحمه.
أبو سند بتنهيده/ هذاك قبل عشر سنين .. الحين صار رجال طول بعرض ودكتور مخ وأعصاب.
الجده بلقافه/مهوبمتزوج للحين؟
أبوسند/ مابعد تزوج يمه، كان عايش برا ورد من السفر من كم شهر وصار يشتغل في جده.
أم سند بفرح/الحمدلله اللي قر عين أم فواز بشوفته، المسكينه من بعد زوجها مامات وخلاهم في ديون وهم وحالتها تقطع القلب.
الجد بإعجاب/والله فواز قام فيهم وفي الشركه وردها مثل قبل وأحسن بعد .
أبوسند/فواز والنعم فيه تعب وشقى لين وقف على رجله من جديد ورجع سمعة أبوه في السوق وكبرها عن قبل.
الجده/الله يعوضه بمره سنعه بدل مرته قليلة الأصل اللي خلته وخلت بنتها معه..
أم سند بخيبه/امه الود ودها تخطب له بس هوعيا، يقول مايبي مرة أب لبنته سديم.
أبوسند/الله يعوض صبره خير، المهم قوليلهم الله يحييهم وحنا ننتظرهم.
ألتفت يدور في المكان وبتساؤل/وين ثريا؟
مشي الجد وبغموض/ثريا عندها شغله بتسويها وبتجي، خلنا نمشي الحين ويصير خير.

----------------

الطايف، الساعه العاشره صباحاً

ترك أمه وندى والأولاد وراح يدخن بعيد عنهم، اتأمل ياسمين وقصي بتوتر، أتعمد يسافر عالطايف قبل وصول جوري وكل اللي في باله إنها إذا جات ومالقتهم فأكيد رح يتصل عليه عبدالرحمن وبيلحقوهم عالطايف علشان الأولاد، إذا كان في شيئ متأكد منه بخصوص جوري فهو إنها ماتقدر على بعد ياسمين وقصي وذا اللي خلا حياتهم تستمر كل الفتره اللي فاتت.
كان يراقب جواله بأستمرار على أمل إنه يلقى إتصال من عبدالرحمن علشان يقابله ويأخد الأولاد لكن أمله خاب لما عرف من قصي إنها رجعت وماأهتمت بسفرهم، واللي رفع ضغطه أكثر هو سفرها للرياض ثاني يوم من وصولها.. من وين جابت كل البرود والقسوه ذي .. أساساً كيف طاوعها قلبها تسيبهم في العيد وتسافر وبعدها تروح الرياض بكل سهوله بدون ماتشوفهم أو تتطمن عليهم.. هو عارف مقدار تعلقها في الشايب مساعد وفي أهله بس ماتوقع إنها بتسيب كل شيئ علشان تكون معاهم في ذي الفتره.. معقول يكون صاير شيئ مايدري عنه، معقول يكون في مشروع زواج من واحد من أولاد مساعد أو أهله..لا مستحيل جوري تتزوج واحد بعده..أصلاً لو في بالها ذا الشيئ ليه ماأتزوجت لذحين.. عدتها إنتهت من حوالي شهرين ومادام لذحين ماصار شيئ يعني كل اللي يفكر فيه مجرد تخيلات لا أكثر.. سحب أخر نفس من سيجارته بقوه قبل مايرميها ويدوس عليها بغيض، رحلتهم للطايف إنتهت وماصار في داعي يطولوا أكثر من كذا، والأحسن إنهم يرجعوا جده اليوم مادام اللي في باله ماصار.

[لامارا]

الساعه الثانيه ظهراً

رد بشرود/خلاص أجهزي وانا عشر دقايق وأنا عندك إن شاء الله..سلام.

قفل جواله وحس على يد تهزه، ألتفت وشاف جده صقر وأبوه مساعد يطالعوا فيه بتركيز، الجد/وش السالفه ياعبدالرحمن.
عبدالرحمن/ولا شيئ ياجد، بس بنمشي على جده، أكرمكم الله كفيتو ووفيتوا.
أبومساعد بإستغراب/وين تمشون توكم جيتوا مامدانا نشوفكم.
عبدالرحمن بتنهيده/بصراحه جوري تبغى ترجع جده، أنتا عارف إنها ذي اليومين بالها مو مرتاح.
أبوسند بقلق/أدري ياعبدالرحمن، لأجل كذا خليت بدر وبتول يتصلوا عليها، كنت أدري إنها مارح تردهم وبترضى تجي وقلت هنا بتتونس مع البنات وتغير جو بدل ماتفكر في عيالها.
عبدالرحمن بتفكير/ شكل خطتك مانفعت لإني من أمس حاس فيها شيئ مو طبيعي، يمكن كلامي معاه خلاها ماتحس براحه هنا.
أبوسند/وش اللي قلته لها وضيق خلقها؟
عبدالرحمن بهدوء/سالفه وراحت ياعم مساعد.
وقف الجد وأتكلم لاول مره من بداية نقاشهم وبهدوء/ماعليه ياعبدالرحمن أنا بحكي معها وأشوف وش فيها، أنت خلك مرتاح ومافي سفر الحين لجده.
هز رأسه بموافقه وعيونه تتابع خروج الجد بصمت.

----------

الساعه الحادية عشر ليلاً

أخيراً أتصل لها عبدالرحمن علشان يقول لها تلبس علشان بيرجعوا لجده.. كانت ناويه تمشي الظهر بس جدها صقر جلس معاها ساعتين لين أقنعها تجلس تستقبل معاهم الضيوف اللي بيجوهم وماحبت تبين إن الموضوع اللي صار مأثر عليها علشان لاتحرجه وتزعل فوق زعله بعد ماعرفت إنه كان حاضر كل الموضوع اللي صار مع أبو بتول..يكفي إحساسها بالخجل قدامه وهو يكلمها وماحبت تزيد الطين بله بإصرارها عالسفر.
وبعد ماراحوا ضيوفهم لبست عبايتها وهي تتكلم وتودع البنات بضحكتها المعتاده، ديما بزعل/ترى ماشفناكي مثل الخلق والعالم..
رؤى بتأييد/أبوي صقر ومساعد قعدوا معك أكثر منا.
جوري بإعتذار/معليش بنات أسمحوا لي المره ذي.. أنتوا عارفين إن ورايا قروشه في جده ولازم أرتب أموري، ولا تبغوا شغلي يطلع أي كلام.
شذى بإستهزاء/الحين كل وحده سوت لها شغله تافهه قامت تقول عندي شغل.
ألتفتت لها بإبتسامه/مهما كانت الشغله تافهه في عين الناس إلا إنها مهمه بالنسبه لصاحبها وبتعني له شيئ خاص.
مها بإحراج/ماعليكي منها، شذى ماتقصد.
لبست نقابها بهدوء/ولا تقصد.. كلامها دخل من أذن وخرج من الثانيه بدون مايعمل فرق عندي.
راحت لجدتها وأمها منيره وباست رأسهم للمره الثالثه قبل ماتضمها ثريا بقوه وتهمس لها جوري بصدق/ياعمري ياثريا خلاص، قلت لك أنا نسيت الموضوع.. أصلاً ورايا أهم من إني أفكر في أشياء زي ذي.. أرتاحي بس.
هزت ثريا رأسها بموافقه قبل تسلم عليها لأخر مره وتأخذ شنطتها وتطلع لعبدالرحمن، كان أبوها مساعد وجدها صقر معاه سلمت عليهم قبل مايأخذها جدها على جنب وبإعتذار/أستري ماواجهتي منا يابنيتي وأمسحيها بوجهي ومالك إلا اللي يرضيكي ويطيب خاطرك.
لأول مره تتجرأ وتمد يدها وتلمسه، مسكت يده وباستها من فوق نقابها بخجل/الله يستر علينا وعليك.. بيض الله وجهك ياجدي وماقصرت ورضاك يكفيني.. قلت لك أنتا مالك دخل في اللي صار.. بعدين أنا أخذت حقي وزياده.. المهم أبويا لايدري تراه موناقص تعب.
قرب منها وباس رأسها وبحنان/الله يرحم من رباكي يابنيتي..أنا أشهد إنه عرف يربي.
همست وراه/ الله يرحمه.. يلا ياجدي أشوفك على خير وأستودعتك الله.
راحت لأبوها مساعد ومسكت يده وكررت حركتها بسرعه قبل ماتركب السياره بسرعه تحت أنظاره وأنظار عبدالرحمن المصدومه.. وبعد فتره حست بخنقه من نظرات أخوها اللي كلها تساؤلات ،همست برجاء/واللي يعافيك عبدالرحمن لاتسألني عن شيئ.. ترى مو طايقه نفسي.
طالع فيها بصدمه قبل مايمسك يدها ويضغط عليها بحنان خلت دموعها تنزل بصمت وبدون ماتحس.






إنتهى البارت





أستغفر الله الذي لا إلا هو الحي القيوم وأتوب إليه




السلام عليكم ورحمة الله وبركاته

صباح الخير والورد للجميع.. إن شاء الله الكل بخير وعافيه..

أعزائي مشكورين على صبركم ودعمكم وسؤالكم عليا..أدري إني طولت بس الحمدلله على كل حال.

ولما جيت أنزل البارت الليل أنحذف جزء كبير منه وأضططريت اكتبه من جديد وذا اللي أخرني عنكم..


العذر والسموحه منكم.. وكل من سأل عني الله يعطيكم العافيه وماقصرتوا ولاخلا ولاعدم


دمتم لإحبتكم بخير

أختكم خياله

[شموخي ثمن صمتي]

شـكــ وبارك الله فيك ـــرا لك ... لك مني أجمل تحية .

[رحاب كمال]

البارت جميل ورائع كالعاده
بس قصير وما شفا الغليل متتاخريش علينا
موفقه وربنا ييسر حالك اللهم أمين

[القمر السعيد]

البارت جميييل وعوضنىعن الانتظار ...وكان احلىمن البارت اللى غات,,,ميرسى يا خياله وربنا يوفقكبرافو برافو