عشان قلبى / للكاتب طارق لبيب ، سودانية مكتملة

لامارا · 16-12-15, 06:53 PM

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
السلام عليكم ورحمة الله وبركاته

نقدم لكم رواية منقولة
عشان قلبى
للكاتب طارق لبيب

قراءة ممتعة للجميع.....

لامارا · 16-12-15, 06:54 PM

بسم الله الرحمن الرحيم

السلام عليكم ورحمة الله وبركاته

نقدم لكم رواية عشان قلبي للكاتب طارق لبيب

تفضلوا

لامارا · 16-12-15, 06:55 PM

رابط لتحميل الرواية

https://www.rewity.com/forum/t337332.html#post10853812

الحلقة 1 .

فتاح ياعليم رزاق ياكريم .. (حمد النحلة) .. طلع بي امجادو .. من البيت كايس الارزاق .. حمد مسمنو النحلة من زمان لمن كان شغال طلبة في المباني الجديدة بتاعة صالحة .. لمن صالحة بدت يادوب .. الزول قالو زمان بشتغل في موقعين .. اول طلبة يشتغل في موقعين في وكت واحد .. بشتغل مع اوسطة لغاية الساعة ..

تلاتة وبمشي للاوسطى ..التاني في موقع تاني يشتغل سهرة ..
والسهرة عند البنوات الشغل من الساعة 3 الى المغرب ..
عشان كدا حمد كان مسمنو النحلة .. لكن سبحان الله مع شغلو الكتير ده زول رزقو معاكسو .. كل ماتتصلح من جيهة تتقد من جيهة تانية .. دايمن اصحابو بقولو ليهو انت زول مدقر .. يعني عندك عوارض ..
لكن هو مصر يشتغل ويشتغل .. واصلو مايقيف من الشغل ..
كدي دقيقة انا ما داير اتكلم عن حمد كتير ..
لانو هسي هو بعد شوية بتكلم براهو ..يوريكم .. هه
اها الزول ده ماشي من جيهة المنطقة الصناعية ام درمان .. من الصباح هو ساكن على جيهة امبدات الكدي ديك .. اها يازول بالشارع الفاصل بين حديقة امدرمان الكبري .. ومقابر البكري تقريبا ..

في الحتة ديك في زول اشر ليهو .. وقف قال ليهو سلام عليكم .. حمد قال ليهو عليكم السلام ..
الراكب .قال ليهو عليك الله عايز اصل سريع الملازمين ..
حمد قال ليهو وين بالضبط ؟ المهم وصف ليهو .. قال ليهو اها بي كم ؟
حمد قال ليهو يازول اركب بالنية ..
قال ليهو بالنية دي معاي مابتنفع يا اخوي.. الاولو شرط اخرو نور ..
المهم في النهاية اتفقو على رقم معين .. وركب معاهو ..
في الشارع حمد قال ليهو من وين في الاهل آ الاخو ..؟
قال ليهو انا اسمي الزاكي .من منطقة في الشمال اسمها كدا وراهو ..لكن هسي ساكن في امبدة الحارة الكدا ..
حمد قال ليهو سبحان الله .. انا ساكن في نفس الحارة .. بس ماحصل اتلاقينا الله يقطع المدن ويقطع ناسا .. يكونو ساكنين في فد فجة .. ومايتعارفو .. حمد قال ليهو .. اها موضوعك شنو في الملازمين ..؟
الزاكي قاليهو انا فني كهربا .. اتصلت علي واحدة من هناك ..وقالت عندها مشكلة في كهربة العمارة ..

وحتى تصدق هسي حقك ماعندي هي قالت لي اركب امجاد وتعال انا بدفع ليك حق الامجاد ..والله جيبي قرش مافيهو ..
قال ليهو يازول لي خير ربك يفتح الارزاق ..
الزاكي قال ليهو وانت ماعرفتني عليك .. قال ليهو والله انا اسكت ساي .. اولا اخوك حمد لو سألت اي زل في الشارع القدامكم .. من زول اسمو حمد النحلة بجيبوك لي ..
قاليهو النحلة ؟ ههههه ..
والله زي السامع بالاسم ده ..
حمد قاليهو لازم تكون سمعت بيهو اخوك مشهور احم احم ههه ..
اها يازول منطقتي من شرق الجزيرة .المنطقة اسمها كدا لو سمعت بيها .. قالو نعم سمعت بيها ..
كنت شغال طلبة في المباني ..
قربت ابقى معلم اوسطه .. وقعت فوق سقاله..
عملت لي مشكلة في كراعي اليمين ..
بقيت مابقدر اقيف عشرة دقايق .. وخليت الشغل .. واشتغلت في السمسرة ..
برضو كجرت معاي لاني مابعرف الف وادور واكضب ههه ..
وبقيت اطمش ساي بلاشغل ..
غايتو لمو فيني اخواني الاتنين الكبار ..عرسو لي عرسة كدا ضربو رماه ..
بقيت مضطر افتش لي شغل غايتو استلمت العربية دي قبل شهرين وشغال فيها ..
بورد يوميا 30 جنية لسيد العربية والباقي يادوبك على قدر اكلي وشرابي انا والمراة ..
والمراة هسي حامل .. والله التقول حامل انا ..
هامي من الولادة اكتر منها هي هاهاها .. واخد ليهو ضحكة ساخرة كدا ..
المهم حمد حكى للزول ده حكايتو ..
الزاكي قال ليهو خلاص نحن قربنا .. انتظرني .. لو الشغل كان سمح توصلني راجع وبتصلح معاك ..
حمد قال ليهو يازول مافي عوجة ..
الزاكي قال ليهو لف بالشارع الجاي .. وقفو قدام عمارة من تلات طوابق فاتحة في الزلط ..
ونزل الزاكي دق الجرس بتاع الباب ..
جاتو واحدة شكلها شغالة .. قال ليها نادي لي فلانة ست البيت .. قالت ليهو طلعت ..

قال ليها طلعت كيف ؟وهي عارفاني انا جاي ..
قالت ليهو انا ماعارفة يا انتظرها يا امشي .. وقطعتو معاهو .. ودخلت طوالي ..
بقو مضطرين ينتظرو المراة لامن تجي .. الواطة صباح ..
وقفو الامجاد في ضل العمارة وبقو يتونسو ..
والزاكي حكا لي حمد معاناتو في تحصيل لقمة العيش ..
وقال ليهو والله يابن العم انا بطلع من الصباح بلف للشغل وبجي .. قروشي البجيبها مابتفوت الوجبه ومرات الوجبة زاتها في تلتة ..
البلد بقت حكاية صعبة خلاص ..
ونحن والله خلاص زهجنا وملينا .. بس ماعارفين نعمل شنو ..
حمد قال ليهو عارف التور وكت يكتفوهو ويضبحوهو ؟
ديل نحن السكين فوق رقابنا وماقادرين نفرفر ..
ربنا يصلح الحال ويرفع البلا يازول .. لكن في النهاية نقول الله ماشقالو حنكا" ضيعو ..
ومادام الله خالقنا .. قادر يرزقنا ..
المهم في ونستهم ديك المرة جات .. راكبة عريبة نيسان باترول جديدة كرت ..
وسايقها سواق ..
نزلت .. قبل ماتدخل الزاكي جا ماشي عليها ..
قال ليها سلام يامدام .. انا الكهربجي .. قالت ليهو معليش انا جبت كهربجي غيرك .وهسي هو شغال ..
قال ليها بس انتي اتصلتي علي .. وانا جيت على حسب اتصالك ..
حتي اجرت امجاد .. وماعندي حق المشوار ..
قالت ليهو يعني ادفع ليك حق الامجاد .. وانت ما اشتغلت لي .. ؟؟
والله خبر !!
اسمع يا استاذ .. انت طالب مني حاجة .. ؟ قال ليها ابدا" ..
قالت ليهو انا مافاضية ليك وفتحت اباب ودخلت وقفلت الباب.. وخلت ليك الزاكي خشمو حنضل حنضل ..
اخد ليهو وقفة وبقى يقول ليها والله دي حقارة .. وانا مابسيبك ..
وبقى يدق في الجرس .. والجرس شدة موعالي .. صوتو برة بنسمع ..
كرررررر .. كرررررر
تاني جاتو مارقة والمرة دي معاها واحد قدر الضربة .لابس فتيلة وشورت مخطط كدا شكلو كان نايم .. و عيونو مورمة وشكلو مرعب ..
وقفت المراة قدام الزاكي الكهربجي .. وقالت للزول الوراها اتصرف مع الزول ده طيرو من هنا .. ودخلت ..
وحمد من هناك يراقب في الوضع ..

الى اللقاء ..

لامارا · 16-12-15, 06:57 PM

الحلقة 2 ..

حمد لمن شاف الزاكي في خطر . جا نازل سريع وقال ليهو دقيقة يابن العم .. لحظة ..
ولا تطيرو بعيد ولا حاجة نحن خليناكم .. ارح يا الزاكي .. سيب الموضوع .. مافي داعي للمشاكل .. الزاكي قال ليهو دقيقة ياحمد .. دقيقة اشوف الزول المنفوخ ده داير يسوي شنو .. ..
قال ليهو مافي داعي .. يعني ضربتو او ضربك .. حتستفيد شنو غير جرجرة البوليس ومحاكم .. وبعدين تطلع انت المدان ..
حتى لو كتلوك .. الناس ديل بالقرش بطلعوك معتدي .. وتطلع غلتان المرحوم .. ارح ارح .. .. ساقو من يدو ومشى ..
الزول المنفوخ . خشه وسد الباب ..ولاقال كلمة .. وحمد فتح باب الامجاد . وقال لي الزاكي اركب .. وخلي الموضوع لله ..
الزاكي قال ليهو طيب حقك انا اجيبو ليك من وين .؟
حمد قال له : انا حق مشواري خليتو .. اعتبرني وصلتك خوة وجيره .. اركب ياخي ..
قال له لا والله سد الباب ده .. مافي كلام زي ده .. قالو اكلو اخوان واتحاسبو تجار ..
حمد قال ليهو طيب اركب النوصلك الشهدا .. لمن تلقى القروش جيب لي حقي ..
قال ليهو لالا خلاص بمشي الشهدا كداري .
بس المشكلة حق المواصلات ماعندي سد الباب .. والكمساري حيمسح بي الواطه ..
احسن حاجة امشي ام بدة كداري بس مافي حل ..
حمد قال ليهو ات مانصيح ؟؟ .. ودخل ايدو في جيبو لقا خمسة جنيه .. بس غيرا مافي نهائي ..
قال ليهو هاك الخمسة دي .. اتوصل وختها فوق الدين .. لمن تجيبن لي جيبن كاملات ..
الزاكي قال له الله يكرمك ياحمد .. ياخي والله الواحد ماعارف يشكرك كيف ..
قال له انت بتقول شنو يا الزاكي؟ نحن بقينا فرد ..
الزاكي قال له خلاص انا ماشي نتلاقا المساء .. المهم .. حمد دور مشى على بحري ..
والزاكي دق الكدر على الشهدا عشان يركب ..
لمن وصل الشهدا غشى واحد من معارفو .. عندو دكان .موبايلات .. اسمو امجد ..
قاليهو كيف يا الزاكي؟ والله يا الزاكي ات ود حلال .. دقيقة دقيقة بس ..
امجد طلع الشارع كورك ليهو لزول ..
قال ليهو يا عم صالح ياعم صالح .. تعال لقينا ليك الكهربجي ..
جا راجع لي الزاكي .قال ليهو عمك ده قبل شويه جا بفتش ليهو لي كهربجي ..
عندو عمارة كهربتا ملخبطه فوق تحت هه.. وماعارفين سبب .. المشكلة وين ..؟
عم صالح جاء .. ولاقى الزاكي .. الزاكي قالو كيف الحال وين مكان الشغل؟ .. قال ليهو في الملازمين ..
قال ليهو وين بالضبط . قال ليهو في الشارع الفلاني كيت كيت وصف ليهو نفس العمارة .. القبل شوية كان فيها الشكلة ..
الزاكي قال ليهو انا اسف ياحاج مابقدر امشي معاك ..
امجد وعمك صالح الاتنين اندهشو وطيرو عيونهم ..
عم صالح قال ليهو ليه ؟؟ قال ليهو ست العمارة دي جابتني من ام بدة .. وقالت لي اجرليك امجاد .. وبدفع حقها .. ولمن وصلت ليها قالت لي جبت زول تاني .. والله حق الامجاد هسي دين فوق ضهري ..
عمك صالح قاليهو بالله ده انت ؟؟
والله انت ود حلال .. انت عارف طبعا انا صاحب البيت . والمرة المستبده دي المدام الله يهديها .. انا كنت بقرا جوه ماسك المصحف .. ازعجني الجرس بتاع الباب وسمعت صوت الضجة جنب الباب .. بس ماختيت بالي ..
البت الشغالة حكت لي المشهد كامل ..
وانا حقيقة زعلت من الظلم الحصل ليك .. واديت الكهربجي قروشو وقلت ليهو ماتكمل الشغل .. وقلت ليهم لازم تقعدو في الضلمة والحر لمدة تلاتة يوم .. عقاب عشان الكهربجي المسكين الظلمتوه ..
بس هسي جابو لي زول من البلد عيان فانا مضطر اصلح العطل ..
لو بتسمح ارح وبي كدا تكون ازلت من قلبي هم ..
امجد قال ليهو يا الزاكي عمك صالح ده رجل فاضل ماتكسر بي خاطرو ..
وفي النهاية اهو شغل ..
المهم يازول الزاكي ركب مع عمك صالح وحكى ليهو موقف بتاع الامجاد .وصالح قاليهو عليك بتاع الامجاد ده اسمو منو؟ قال ليهو والله ده اسمو حمد .. اول يوم الاقيهو الليلة ..
عمك صالح قاليهو سبحان الله .. بالله لسع البلد دي فيها ناس زي ديل ..؟
المهم الزاكي وصل وظبط الشغل .. وعمك صالح اداهو حقو بالزايد .. وادهو حق الامجاد فوق داك .. وبسطو بسط شديد ..
وقال ليهو اديني تلفونك ياباش مهندس .. انا لو احتجت لاي شغل ماعندي زول غيرك .. (الرزق الكاتبو ليك ربك مافي زول بشيلو منك ..)
ومرة قال ود اللبيب..
رزقك كان طفش حام البحار الستة .
في ميعادو بصلك . فأطمئن يا انتـــا .
حت لو كنت كافر فوق معاصيك بتا.
المكتوبة ليك باكر تجـــيك بالحتة .
.
سبحان الله لغاية الزاكي ماطلع من العمارة المراة ماصادفتو .. ولا الزول المنفوخ ..
اظنو رجع نام ههه ..
المهم الزاكي شال قروش بتكفيهو اسبوع ..
ولامتين المساء يجي عشان يمشي يرجع لي حمد النحلة قروشو ..
اما حمد فمشى بحري وقف جنب المؤسسة لمن زهج مافي زول قاله عينك في راسك ..
مشى وقف جنب المستشفى برضو مافي شي .. لغاية الساعة واحدة حق الفطور مالم فيهو .. قال يازول انا جعت لو في زول دفع لي عشرة جنية بوصلو هه ..
والبنزين قرب يخلص ..
قال البنزين ده بوصلني سوق الشجرة في ابروف .. امشي للتاج افطر عندو .. واشوف البحصل بعدين .. اول ماهو طالع كدا في نفرين اشرو ليهو .. قالولو ام درمان بانت قال دي كويسة معاي .. اها اركبو .. قالو ليهو بتوصلنا بكم ..؟
قال ليهم مابنختلف البتقولوهو تاني شنو؟.. واحد فيهم قال ليهو نحن زاتو البتطلبو بنديك ليهو ..قال ليهم اركبو طيب .. قالو ليهو نحن عندنا كم مشوار بس انت الليلة طول بالك ..حمد حس باحساس غريب واتوجس من الناس ديل ..
قال ليهم ماعندي مانع بس اصل هناك اخد لي لقمة ..
لكن من خلال ونستهم الاتنين مع بعض حمد اكتشف حاجه ..
وعرف الناس ديل شنو بالضبط .. لامن نسى الجوع ..

الى اللقاء ..

الحلقة 3 ..

حمد سايق العربية وعامل فيها ماسامع الكلام ..وهم طبعا الاتنين .. واحد راكب قدام في كرسي الشهيد .. والتاني راكب وراء قصادو .. وومنتكل بيديهو الاتنين فوق الكرسي القدامو القاعد فوقو رفيقو .. مربع يديهو كدا فوق الكرسي وخشمو فريب لاضان اخوه..
وبتكلم معاهو .. والكلام براحة .. كلمة تجي لي حمد وكلمة تروح ..
بس حمد بقى يقول في نفسو والله الله يستر الجماعة ديل مايكونو . هناي . المهم
انا مالي وما بتهمهم بالظن .. بس اشوف اخرهم ..
اول ما وصلو بانت قالو ليهو اقيف قدام الباب ده .. نحن بنجيك هسي ..
قال ليهم دقيقة .. انا ماعندي قروش وجيعان .. ادوني حق المشوار ده .. امشي افطر واجيكم .. انا اكون فطرت وانتو تكونو قضيتو الشغل .. ادوهو ورقة ام خمسين قالو ليهو امشي افطر وخلي الباقي معاك وتعال .. شال منهم القريشات ومشى على المورده ضرب سمك لمن عرق .. وشرب سبرايد وكباية شاي كمان .. الحمد لله .. وبدا يفكر في الجماعة ياخوانا الناس ديل ..
قصتهم بالظبط شنو؟
اول حاجة ماعندهم نية ياكلو حقي .. ووثقو فيني ثقة واضحة ..
طيب ظاهر شكلهم ماحاجة عادية .. والوسوسة بتدل على انهم جايين يشيلو حاجة ..مدسوسة .. والزول الضربو ليهو وهم في الشارع ياهو سيد البيت ده ..
طيب انا ما اسبق الحوادث ..
واشوف الحاصل شنو للنهاية .. لكن لازم اعمل حسابي .. والحاجة البجو شايلنها لازم اقوليهم ده شنو؟
لاني ماممكن اشيل لي حاجة ممنوعة في عربيتي تقوم تحصل لي مصايب انا في غنى عنها . ده كلو كلام حمد بينو وبين نفسو ..
المهم دور العربية وسريع مشى وقف قدام البيت وضرب بوري ..
جاهو واحد منهم طالع .. وقال ليهو خلاص نحن حدنا هنا انت ادينا تلفونك بنضرب ليك الصباح تجينا ..
حمد قال ليهو خير يازول بس باقي القروش ..
قال ليهو .. خليهم معاك بكرة عندنا مشاوير وخليهم مع الحساب انت زول ود حلال وبتنفع معانا وتاني ما بنتحرك الا معاك ..
قال ليهو طيب في امان الله ودور ..
اول ما طلع قبل الصينية . اشرت ليهو مرة في التلاتينات . واقفة براها ولابسة توب شفاف ورابطاهو في نصها .. ولابسة دهب وناقشة حنة .ومتقيفة التقول ماشة ليها حفلة .. اها لما حمد وقف ليها .. الريحة جاتو جوة العربية .. ريحة خمرة وحكاية
فظيعة خلاص .. قال والله دي جريمة دي .. ده شنو الليلة الواقع فوقي ده ؟.. ربنا يعدي اليوم ده على خير .. هسع المراة دي تركب في العربية.. الريحة تكون رابطة للمسا..
وسماح تعمل لي بيها موضوع . سماح دي زوجتو ..
المهم قال ليها ماشة وين .؟ قالت ليهو .. الخرطوم العمارات .
قاليها بي مية وخمسين .. عشان يعجزها .ههه .
قالت ليهو ليه ياخوي .. مركبني اف 16؟
قال ليها .. غير كدا مابقدر امشي ..
قالت ليهو خلاص بدفعا ليك .. دايرة تركب قال ليها .. لحظة ..
انا غيرت راي ماماشي الخرطوم شوفي عربية تاني ..
ودور طوالي .. وقلبو يسوس . هسع عليك الله المرة دي كانت دفعت لي مية وخمسين .. . يازول ولايهمك الله اخير منها ..
والحمد لله ما كتير لقى مشوار . والمشاوير اتلاحقت ..
وبي اختصار اليوم ده كان يوم مصلح مع حمد طلع ولقى كم مشوار كدا .. لغاية المغرب جاب قروش ليهو شهر ماجب قدرها ..
الحالة لغاية الساعة واحدة ماكان عندو تعريفة ..
من ترك شيئاً لله ابدله الله ماهو خير منه .. كماقال المصطفى عليه السلام
ومرة قال ود اللبيب ..
الجود والكرم والخير وفعل السالف ..
اسباب للغنى وليك في المحن بتحالف..
كان ضاقت عليك كن للفضيله موالف.
المتعال وعد يخلف يفوق التالف..
اها يازول حمد .. بعد العشا مشا البيت ..
زوجتو سماح .. كانت مقلقة لانو كان بجي يتغدى ويطلع الليلة ماجا ..
اول مادخل .. قالت ليهو حمد؟
الليلة مالك ماجيت الغدا ؟ انا انتظرتك وتلفونك مقفول .؟
كنت وين ؟ اللاقتك دي منو؟ المشيت اتغديت معاها وخليتني ؟
انا عارفة البنات البأشرن لي الامجادات ويستغلن السواقين ..
وانت انا عارفاك عينك طايرة ومخك ده مابجي بالهين ..
قال ليها سماح؟ .. سماح؟.. الله يخيليك سيبي الاوهام دي ..
وخليني اشيل نفسي شوية ... انا الليلة اليوم الوحيد الشغل فتح معاي .. ماتنقنقي
وتشوميها علي ..
انا عارف النقة بتيبس الخضرا.
قالت ليهو . اول حاجة احكي لي برنامج اليوم ده ..
قال ليها ابيت .. مابحكيهو ؟ انتي اصلك مابتثقي فيني ..
وكان حكيت ليك مابتصدقي ..
قالت ليهو الحكاية ماحكاية ثقة .. كل الفهم انا بغير ..
قال ليها يا المبروكة في فرق بين الغيرة والوهم .. والشكوك ..
انتي كدا بتدمري كل حاجة جميلة جواي .. كل يوم شغالة نقه نقة ..
انا والله غلبتا معاك حيلة .. بعدين انا خايف على الجنى الفي بطنك ده .
لانو الحالة النفسية للام بتأثر على الجنين اثر سلبي كان او ايجابي ..
شوية كدا الباب دقه .
مشى على الباب لقا ليك صاحبو بتاع الصباح . الزاكي واقف جمب الباب .سلم عليهو جاهو داير يديهو القروش بتاعة مشوار الصباح والخمسة جنيه ..
حلف عليهو عليهو ودخلو جوه واكرمو .. وعزمو يشرب الشاي وبتونسو بالمراة بتاعة العمارة
وبضحكو الاتنين .. وسماح بتسوي في الشاي وبتسمع بالدس في الكلام .. كلمة تجيها
وكلمة تروح منها .. المهم سمعت الزاكي قال ليهو صاحبتك رجعت ليها تاني .. وعملت
العملة . حمد قال ليهو لكن الزول المعاها ده مخيف شديد..
بس ده الكلام السمعتو سماح .. وخلاص بطنها فارت وفكرت في الطلاق ..
وبقت تنضم براها .. كمان عندهم مراة بمشو ليها الاتنين .. وده منو ياربي الجاهو ده
.. الظاهر عليهو متعود على الحريم من خلقتو دي .. هه
الليلة اليصبر لي حمد بس اليمشي الزول ده .. بس الليلة غير بيت اهلي ماعندي مفاهمة ..(الله يستر ..)
المهم بعد الزاكي داير يمشي دخل ايدو في جيبو وداير يطلع القروش لي حمد ..
حمد قال ليهو يازول انت ما عندك خوة؟؟ قروش شنو الداير تديني ليها؟ ..
على الطلاق قرش مابشيلو .. قاليهو والله ياحمد الزولة ضربت لي براها ..عشان اجيها .. ولمن جيتها ابت .
بس ما دايرك تفهمني غلط .
وسماح بتسمع هههه ..
المهم ودعو وطلع على امل يتلاقو الصباح .
وسماح دي قعدت ترجف من الزعل والانفعال ..
الليلة والليلة ..

الى اللقاء

لامارا · 16-12-15, 07:14 PM

الحلقة 4
..
اها يازول اول من الزاكي مرق بيجاي ..
سماح قعدت في نص السرير ..ومشبحة يدينها كدا ..ماسكة بيهم السرير زي المتكلة.. ومادة كرشها .. هي تقريبا في الشهر السابع لمن برضو بطنها بارزة . وتناهد ونفسها قايم ..ومنفعلة انفعال غريب ..
قالت له .تعال يا حمد ..اقعد لي هنا ..عايزة اتكلم معاك ...
جاء شافها ليك منفوخة نفخة ماعادية .. قال بسم الله الرحمن الرحيم دي هسع مالا؟
قعد واتوهط ..وملص نعلاتو ..وقال كدي رقد على قفاهو .. وقال ليها نعم .. اتفضلي يا سماح انا سامع ..
قالت ليهو ولا كانك مهتمي بالموضوع ..
قال ليها لاني عارفك ماعندك موضوع ,,
قالت ليهو عشان ماعندي موضوع عايزاك تطلقني .. قال ليها تاااااااني ياسماح؟.. تاااااني رجعنا لي نغمة عايزاك تطلقني ..؟؟
قالت ليهو كمان اصحابك بتاعين الحريم بقو يجو في بيتي ..
ويدفعو ليك حق الحريم ,, وانت اظنك بتتوسط ليهم ..وبقيت خبير في الكلام الفاضي ؟
المراة دي منو المشيتو ليها .. المراة دي منو الضربت ليهو براها ..ولمن مشى ليها ابت ؟؟
طيب انت مادام وصفت ليهو دربها وداير يدفع ليك .. ماكان تقنعها ليهو ...!!!
انا زهجت منك وكرهتك وكرهتك حركاتك الما مفهومة ..
الزول ده قام ترترب من الرقدة ..وقعد على حيلو ودو بقى يغلى من الزعل ..
وقال ليها .. والله ياسماح انتي قلبك وسخان .. ياخي حرام عليك .. انتي مالك دايما مخوناني ..
كمان صديقي اليوم اتعرفت عليهو طلعتيهو وسخ زي انا..؟؟
طفح الكيل وانا مابسمح ليك تتهمي الناس بالباطل ..
باختصار يا سماح .المراة دي حاجة كبيرة ضربت للزاكي ..عشان يصلح ليها عطل في كهربة البيت ..
ولمن جاها لقاها جابت كهربجي تاني ..
سماح قالت ليهو عارفاك ح تكذب وعارفاك حاتألف ليك قصة ,,
قال ليها .. طيب اعمل شنو عشان تصدقي ..
قالت ليهو انت عارف اني بتغاظ من الكلام ده ..يعني في داعي تحرق لي قلبي وتسمعني ليهو باضاني ..
قال ليها انتي الوداك تتلبدي وتتصنطي لي كلام الرجال شنو ؟
المهم يازول سماح دي دورت دويرة كعبة خلاص ..بس مصرة يوديها اهلها في الليل داك ..
قام حمد لبس نعلاتو وركب العربية وطلع .. ضرب تلفون للزاكي ..
وقال ليهو انت وين ؟ قال ليهو في البيت .. قال ليهو انا جاي عليك ..
قال ليهو طوالي تعال .. المهم في قلبو قال ..امشي اجيب الزاكي اخليهو يحكي ليها ..
احتمال تصدق ..تاني قال برضها مابتصدق ..لانو بتقول ده صاحبو ومتفق معاهو ..
الزاكي ساكن قدام في اول الحلة .. يعني بعد تلاتة مرابيع كدا .. المهم وصل ليهو وغلبو يكلمو بالمشكلة
قال ليهو والله زهجان وقلت نتونس شوية ..
الزاكي قال ليهو تمام . اصلا بعد شوية جايني زول طالعين الزلط نتعشى .. ونتونس شوية ونجي ارح معانا ...
قال ليهو حلو .. طيب واولادك ؟؟ ..قال ليهو اتعشو قبيل ونامو .. بس المراة صاحية ..
(الزاكي متزوج عندو ولد وبت .. )
حمد قال ليهو المراة مابتسألك طالع بالليل ده ماشي وين ؟
قال ليهو ياخي مرتي دي مافي زيها في الدنيا .. لا بتسأل ولابتنقنق .. ولا شفقانة .. زولة مرحمنة ..
حمد سرح كدا .. وقال ليهو والله انت سعيد الله يخليها ليك ..
اها الزاكي دخل عليها كدا وقال ليها .. اسمعي يا فدوى . انا طالع كدا مع اصحابي ..لو اتاخرتا ماتنتظريني ..
نومي.
قالت ليهو خير يا الزاكي خلي بالك من نفسك ..
قال ليها الزول بتاع الامجاد الحكيت ليك بيهو قبيل .. جاني ماشين نتعشى سوا ..
قالت ليهو ربنا يحفظكم يا الزاكي ديل الاصحاب البصح بصح ,,
فدوي انسانة خلوقة وراقية وسكوتة .. ومع ده كلو هي مضرب مثل في الجمال ..
اها طلع معاهم ومشو اتونسو الليل داك كلو .. معاهم واحد تالت اسمو . بكري . زول تحفة نكتة لدرجة غريبة ..
وزول بحلي الونسة .. اها حمد وكت لقى الجو مناسب ..قال يحكي ليهم الفلم بتاع المراة ..
وبدا يحكي في الكلام الفهمتو المراة بالغلط .. وبكري فقع فقع فقع .. يضحك ويستريح ..
وبعد كمل ضحكو قال ليهو والله ياحمد دي زي قصة الذ قصه في الدولاب كلو ..
حمد قال ليهو ياتو دولاب يابكري ؟؟ الزاكي قال ليهو ياحمد .. اصلا بكري كلامو كلو مقلب كدي .. ههه ..
قال ليهم ياجماعة انا دايركم تدوني حل للموضوع ..
تقول لي الدولاب .. ؟؟
بكري قال ليهو الحل توقف الفيل جنب النخلة هههه ..
حمد قال لي الزاكي ..انت يا الزاكي .بكري ده بسطل؟ ههه
قال ليهو ههه لالا يازول ده سجارة حمرا مابشربا ..
قال ليهو طيب شنو الدولاب والفيل والنخلة؟ حيرتني معاك يابكري .. وبكري بس يضحك ..
قال ليهو والله ياحمد مرتك دي لو معاي ..كنت وريتها ليك النجوم صلاة الضهر ..
ياخي انت لازم مرتك دي تجي تاخد ليها يومين مع وداد .. وللا فدوي ..
قاليهو ديل منو كمان ؟ قاليهو وداد مرتي .. وفدوي مرت الزاكي .. ياخي ديل حريم تاكل وتقش يدك في تيابهم ..
قال ليهو ايوا لازم .. نحن بقينا اخوان ولازم النسوان يتعرفو عشان تبقى معرفة اسر ..
المهم يازول الناس ديل اتونسو ونسة سمحة خلاس ..
وبكري كان فاكهة الجلسة وكلو مرة يجيبلو كلام مطوفش والزاكي ده يضحك لمن يمسك بطنو .. وحمد نسى المشكلة بتاعة سماح مؤقتا" ..
ناس لذيذين خلاص .. في نهاية الجلسة .. وخلاص دايرين يمشو .. حمد شال نفسو وختاهو ..
قالو ليهو مالك يازول مهموم كدي .. قال ليهم والله هامي من المراة دي .. هسي القاها صااااحية .. تساهربي لغاية الصباح نقة ..ولاهسع تكون مصرة على الطلاق ..
بكري قال ليهو يازول موضوعك ده محلول .. كان قالت ليك طلقني جيب الفيل وقفو جنب النخلة هههههه
حمد قال ليهو كويس بس انت فهمني فيل شنو وياتو نخله .. ؟
قال ليهو جيب اضانك الزاكي مايسمعنا .. وسوس ليهو بكلام .. حمد خت يديهو فوق راسو ..
وقال ليهو اكيد انت قاعد تسطل .. هههه لكن والله الا اجيب الفيل جنب النخلة ..
المهم حمد مشى وفعلا لقى سماح صاحية .. وقاعدة في نص السرير وتهوزز في رجليها ..زعلانة فل ..
قالت ليهو دور العربية دي قوم وديني البيت ..
قال ليها طيب هسع ناس البيت بتزعجو .. لكن بوعدك باكر الصباح بوديك.. اطلقك قدام ابوك .. ود وعد الرجال ..
قالت ليهو بس الصباح ما تغير رايك .. قال ليها والله الا انتي تغيري رايك وبراك بتشوفي ..
بس نومي .. طوالي قبلت على الحيطة .. واتلفلفت بتوبها ..
ياربي فعلا حمد بكرة حيضربها بالطلقة دي عشان تعرف حاجة ؟
ولا عندو راي تاني ؟؟ وبكري ده وصاهو بشنو ؟

الى اللقاء ..

لامارا · 16-12-15, 07:16 PM

الحلقة 5
..
صباحات الله بي خيرا المراة قامت قبل الشرقة تكركب في العده وتقفل في بيتها . حمد لمن جهز وداير يمرق لقاها لابسة وقاعدة في الكرسي بتاع العربية وشايلة شنطتها بتاعة اليد الكبيرة ودافسة فيها هدوم
..
في الوكت ده حمد طلع التلفون وضرب للزاكي قال ليهو طلعت ؟؟
الزاكي قالو لسع والله ..
قاللو . البس ليس اي كبة واطلع سريع انتظرني في الشارع .. قال ليهو بس انا طالع الشغل .. قال ليهو بوصلك اي حتة دايرها ..
الزاكي قال ليهو خلاص خمسة دقايق وبتلقاني في المحطة .
حمد طلع وسماح راكبة معاهو . بعد اتقدم شوية .قال ليها انزلي اركبي ورا انا معاي زول .
لبت شنطتها ونزلت ركبت ورا .. وصارة وشها وبتعاين برة العربية بشباك القزاز .. ومربعة يديها وبتتهوزز ..
حمد دور وشغال يصفر .. زي الكانو مامهتم بالموضوع وهي مغيوظة من الحركة دي .. ومرات حمد يقعد ينوني .. من جناين الشاطي ومن قصور الروم .. هه..
مشى لاقه الزاكي .. سماح لمن شافت الزاكي . اخدت لها قنتة بي زعل .. وهزتها زادت .. kiki emoticon
اها يازول الزاكي وحمد سلمو على بعض زي التقول بتعارفو ليهم عشرة سنة وونسة وضحك ويحكو بي بكري ..
وكل مرة يقولو قصة الدولاب كيف ؟؟ وحمد فقغ فقغ فقغ ..
بعد شوية الزاكي يقولو اها الفيل لميتو على النخلة ؟
وحمد شغال يضحك ..
فجأة سماح شقت الونسة بي كلمة .. قالت ليو ..حمد لو سمحت اتحرك اسرع شوية انا تعبانة من القعدة دي ..
قال ليها حاضر ياسماح ..
اها يازول لسع يتوسوسو الاتنين .. حمد والزاكي .. وحمد بتكلم براحة .. وسماح عرفت انو في كلام داسنو عليها .. قربت تتلب بي شباك العربية من الحرقة ..
المهم الزول ده المفروض يوديها اهلها في الهجرة . لفا بيها يمين على الملازمين ..
قالت ليهو انت ماشي وين ياحمد ..؟
قال ليها انتي مش ماشة اهلك .. قالت ليهو نعم .. قال ليها لو سمحتي اسكتي بس بوصلك اهلك ..
مشى وقف قدام باب العمارة بتاعة عمك صالح ..عمارة المشكلة ..
ودقو الجرس وسماح تعاين .. الفتحت ليهم الباب الشغالة ..
قالو ليها ست البيت موجودة ؟؟.. قالت ليهم نعم ..
حمد قال ليها قولي ليها سماح منتظراك برة ..هه
سماح طيرت عيونها من راسها .. قالت ليه ده شنو ياحمد وده بيت منو ؟
قال ليها ده بيت المراة الجيناها ام بارح .. لحظة بس ..
جات المدام طالعة .. سلمت وقالت ليهم مرحب سماح منو ..؟؟
الزاكي قال ليها ببتذكريني .. ؟؟
قالت ايوة انت موش الكهربجي الجيت عشان انا ضربت ليك؟ ولمن اتأخرت علي انا جبت واحد غيرك .. يعني دايرني اقعد ليك في الضلمة والسخانة ؟؟
وانت لمن جيت كان الكهربجي التاني صلح جزء من الشقة التحت .
وماشي على التانية ..
قال ليها وكيف تجيبي زول مخيف وضخم كدا تقولي ليهو طيرو من هنا ؟؟
قالت ليهو معليش انا اسفة كنت مضايقة اتفضلو خشو جوة ..
حمد قال ليها شكرا ليك ياحجة .. بنجيك مرة تانية ..الحجة قالت ليهو سماح دي منو انا ماعرفتها ..قال ليها بنجيبها ليك زيارة يوم ما وفاتو .. خلو المراة متحيرة ومتمحنة ههه
حمد . قال ليها ياسماح ..
دي الفيل ودي النخلة اقتنعتي؟؟ ..
الزاكي قال ليهو غايتو ياحمد. لازم نشوف بكري ده قاعد يعمل شنو بورانا. ههه..
قال ليهو مش كدا عليك الله .. ؟
وسماح دي خجلانة وماقادرة تعاين في وش حمد كلو كلو ..
احساس مرير لمن تكتشف انك متهم ليك زول اتهام باطل . وكمان تواجهو بالاتهام وتذلو . بعدين تكتشف انك ظالمه ..
تتمنى الواطة تنشق وتبلعك ..
ومرة قال اللبيب..
حقو الزول قبل مايقج لهايب ظنو ..
مايكون بالخيال للتهمه ناسج مـنو..
المتهــووم برئ مالم تؤكد إنو ..
فعـلا كان كلامـك بالحقــايق عـنو.
اها يازو ل هم راجعين ..
حمد قال لسماح . اها ياسماح اوديك اهلك ولا ارجعك البيت ..؟؟
قالت ليهو نزلني في الشارع وامشي شوف شغلك انا بصل ..
قال ليها يا سماح انت حامل ومابتقدري على مدافسة المواصلات .
وريني ماشة وين ؟عشان اوصلك ..
قالت ليهو وديني بيت اهلي في الهجرة . وبعدين بنتفاهم ..
قال ليها حاضرين .. ومشى نزل الزاكي في صينية ازهري . ووداها الهجرة ..
قبل مايتحرك قالت ليهو حمد .. انا اسفة .. kiki emoticon
قال ليها بقبل مامشكلة بس تاني ماتكرريها ..
وعلى كدي مشى يشتغل بي مزاج .. ومشى على جماعتو ديك في بانت ..
ودق الباب قالو جاهو واحدمنهم قال ليهو ود حلال والله .. نحن هسي كنا دايرين نتصل عليك ..
وجو شايلين معاهم شنطة دبلوماسية ..
الزول القدام قال ليهو يا حمد . نحن شايلين كيلو دهب .. قول ربك يربط لينا البيعة .. ولو ربطت بنديك الكرامة kiki emoticon ..
والحمد لله الجماعة طلعو كويسين وماشايلين ممنوعات .. والحمد الحمد لله .. لقى منهم قبضة كويسة ..
وشكلو ضمن حق الخروف بتاع السماية .. *_ - والشغل برضو كان كويس ..
ورجع المساء ساق المراة وداها البيت والوضع ماشي عادي والايام مرت ..
وكل يوم حمد بطلع ياخد ونستو مع اصحابو .
وسماح كل كم يوم عندها موضوع واسئلة وتحقيقات وحمد صابر عليها عشان الحمل ..
يوم الزاكي طلع الصباح مع حمد ولمن جاي ينزل نسى تلفونو في الامجاد.
وحمد ما لاحظ ليهو الا قريب الساعة 11بعد الفطور كدا سمع الجرس بضرب فتش لقا تلفون ..الزاكي واقع تحت الكرسي الكان قاعد فوقو ..
رفعو ورد على التلفون .. الو .. جاهو صوت نااااعم ..ومنزعج ..
هلا حبيبي .. حبيبي انت وين؟؟
قال ليها معليش الزاكي ده نسى تلفونو معاي ..
انتي منو لو سمحتي ؟ ... قالت ليهو انت منو؟ قال ليها انا صاحبو حمد ..
قالت ليهو حمد انا فدوى زوجة الزاكي .. حمد انا تعبانة شديد . الزاكي وين؟
قال ليها والله ماعارفو .. نزلتو الصباح في شارع الوادي ..
قالت ليهو انا تعبانة وعندي هبوط لمن بتجيني حالات اغماء .. وما معاي زول ..
حمد قال ليها خلاص خلاص .. يافدوي انا جاييك هسي حا أخلي اي
حاجة واجي اوديك المستشفى ..
قالت ليهو اي عليك الله سريع .. انا تعبانة شديد ..
وقال كدي قلب الدركسون بي سرعة ورجع على الحــلة
..
الى اللقاء ..

لامارا · 16-12-15, 07:17 PM

الحلقة 6

..
اها يازول لمان حمد ماشي علي فدوى في البيت. ما حس بي طول الطريق. ولاشاف مسافة السكة وكان ملخوم جدا .. وبضرب في البوري للعربات عشان يفتحو ليهو الطريق .. ويخرم بيجاي ويتخطا بيجاي .. المهم وصل سريع وقف العربية ودق الباب ..
في بت صغيرة عمر 11 سنة فتحت الباب .. قالت ليهو خش ياعمو خالتو فدوي عيانة .. وبتبكي..وراسها لافي.. قاليها امشي كلميها قولي ليها حمد بتاع الامجاد جا ..
قالت ليهو خش هي عارفاك انت جاي .. المهم حمد خش في اوضة كدا قدامها برنده قعد في البرنده .. البنية الصغيرة دي بت الجيران .. وامها قاعدة جوة مع فدوى الظاهر جايه عشان تقعد مع الطفلين الاتنين ،،
محمد عمرو 5 سنة وايه عمرها تقريبا سنتين ونص والاتنين .لامن حسو بي حمد جا برة .جو جارين الاتنين محمد قال ليهو انت ياعمو صاحب بابا؟
قال ليهو ايوة .. قاليهو بابا وينو .. ماما عيانة . قاليهو في الشغل وانا مودي ماما للدكتور وهسي بتكون كويسة ..
لحظات بس وجات فدوي متكلة على المراة المعاها وظاهر عليها التعب والارهاق..
اول حاجة قبل كل حساب. حمد اتفاجا من الجمال الكابي فوق فدوى زي مطر الخيرسان.. وماكان متخيل انو صاحبو الكهربجي البسيط .. زوجتو بالزي ده ..
المهم احساس الشفقة عليها من الاعياء الظاهر فوقها شتت دهشتو بي جمالها
وغلب عليهو احساس الاشفاق ..
وقام علي حيلو على شان يساعدها ويدررجا مع المراة لكن وقف في اخر لحظة ..
والمراة وفدوى حسو بي شفقة الانسان ده وقام جري فتح باب الامجاد الورا ..
وقال ليهم اركبو ..المراة قالت ليهو لالا امشي انت وصلها .. انا بقعد مع الشفع ما معاهم زول لمن يجي الزاكي انا برسلو ليكم ..
قال ليها خلاص نحن هسي اول حاجة بنغشى المستوصف القدام ده ..لو حولونا للمستشغى انا بضرب ليك اديني رقمك .. شال رقم المراة ومشى .. وتلفون الزاكي مازال معاهو ..تلفون ربيكا وشاشتو مغبشة وقفلو البيورا ملصق بي لستكة قروش وحالتو بالبلا..
دور طوالي ماشي على المستوصف وبتكلم معاها .. فدوى شدي حيلك شويه .. قريبنا نصل الف سلامة عليك .. قالت ليهو الله يسلمك ويبارك فيك يا اخوي ..
تسلم كتير ازعجتك معاي .. قال ليها انتي بتقولي في شنو يافدوى انتي مرة اخوي وفي مقام اختي .. وسايق ماشي على المستوصف قرب يصل عاين ليها بالمراية كدا وقال ليها فدوى البسي التوب كويس وغطى راسك .. ما تتبشتنى كدا .. خلاص وصلنا .. وصل وقف العربية ونزل فتح ليها الباب .. قال ليها بتقدري تدخلي براك ولا اسندك .. قال ليهو بقدر .. المهم اتقدرت ودخلت . انتظرو شوية ودخلا على الدكتورالدكتور .. كشف ليها يدها وربط ليها جهاز قياس الضغط .. لمن الدكتور كشف ليها يدها حمد قبل على الحيطة .. من شنو ماعارف .. المهم .. الدكتور قال ليها الضغط منخفض 80 /50 نازل شديدطبعا .. دخلوها سريع العنبر .. وراح مركب ليها درب بتاع ملح وجلكوز ..
تقريبا ما متاكد المهم شفطت الدرب داك فتحت عينيها شوية .. والوقت ماشي على الساعة 2 .. شالو منها عينات الدم والبول للفحص المعملي عشان يشوفو الهبوط ده اسبابو شنو . ولغاية الوكت ده الزاكي ماضرب .. وحمد ينقنق براهو .. على شوف الزاكي ده .. على الاقل المفروض يشوف ليهو تلفون من اي حتة ويتصل في تلفونو ،، يشوفو وين ..الدكتور لمن اتاكد من انها بقت احسن من حالتها الاولى الجات بيها ..قال ليهو خليها تاخد راحتها شوية على بال ماطلعت الفحوصات عشان نشوف الحاصل شنو ..
حمد قاليها يافدوى لو حاسة نفسك كويسة هسي نوديك البيت وبعدين بنجي راجعين للفحوصات انا والزاكي..
قالت ليهو انا كويسة شديد الحمد لله ..حمد قال للدكتور خلاص نحن بنمشي والمساء بنجي نشوف الفحوصات .. خلاص خير .. وقامت من السرير عادي .. الحمد لله في كامل الصحة .. وطلعو ركبو
وبس ماسكة تشكر في حمد .. الله يبارك فيك ياحمد .. والله حسستني انو انا عندي اخو يتوزن بالدهب .. انا ياحمد اخوي واحد الله يرحمو اتوفى في السعودية السنة القبل الفاتت .. لكن الحمد لله الليلة اتاكدت انو ربنا عوضني ..
قال والله كمان انا ما حسيت الا محاسن اختي عيانة الله يديها العافية ويديك ..
ماشاء الله وليداتك عجبوني ربنا يحفظهم ..
قالت ليهو بس طلبي الوحيد منك خليك قريب من الزاكي . الزاكي ده ياهو الفضل لي في الدنيا ..
قال ليها الزاكي ده اخوي الكنت بفتش عليهو .. وان شاء الله تاني مايفرقنا الا الموت .. قالت ليهو ان شاء بعد عمر طويل .. ربنا يديكم العافية ويخليكم لبعض..
طبعا يا حمد الزاكي حكا لي بسماح .. وياريت تجيبها تعرفني عليها ..
قال ليها حاااضر اوعدك والله .. كان شوية كدا تهديها لي من الوساوس ههه
قالت ليهو ماتشيل هم بس انت جيبها لينا . (دي كلها كانت ونسة حمد مع فدوى وهم راجعين على البيت )وصلو ودخلت المراة اتلقتهم جنب الباب ..
واطمانت جدا .. فدوى قالت لي حمد ادخل نسويلك كباية شاي ،، قال ليها والله مابقدر .. بس اشرب لي كباية موية عطشان .. ومدردق طوالي نشوف الشغل .. بجيكم المساء نمشي نشوف ..دخل قعد جابت ليهو الموية بشرب في الموية كدا وهي واقفة قدامو .مبسوطة منو
وفرحانة بيهو في اللحظة دي . الزاكي جاء داخل
..
الى اللقاء ..

لامارا · 16-12-15, 07:19 PM

الحلقة 7 ..

..
حمد ابدا ما اتفاجأ بوصول الزاكي .. بس قال ليهو حمد لله على السلامة يازول ..
البيت محروس وستو تكوس.. وفدوى لا اتفاجأت لاغيرت وقفتها ..
الزاكي سلم .. وقال ياجماعة ان شاء الله مافي عوجة .. حمد قال ليهو ياخي انت تنسى تلفونك وتاني ماتدق فيهو ..
قال ليهو والله دقيت فيهو تلات مرات ولقيتو مقفول .. هو عليك الله نسيتو عندك؟ ..
قال ليهو نعم وقع منك في العربية . انا اتفاجأت بصوت الجرس تحت الكرسي الكنت انت قاعد فوقو ..
ولقيتها دي فدوى كانت تعبانة لدرجة وديناها المستوصف واخدت درب ..
قال ليهو بسم الله درب شنو مايهدي زي الحصان ..
قال ليهو قول ماشاء الله .. الزولة دي قبل ساعتين كانت في حالة تانية ..
قال ليهو بس كيف هي دقت في التلفون ولقتو فاتح .وانا دقيت فيهو لقيتو مقفول
؟؟
قال ليهو التلفون فاتح يا الزاكي هاك شوفو ..
قال ليهو طيب قفل . وانت فتحتو تاني؟ ..؟؟
قال ليهو ابدا .. اصلا لاقفل لافتحتو ..
الزاكي قال غريبة .. !!! .. فدوى قالت ليهو بتكون الشبكة يا الزاكي ..
حمد قال ليهو هو تلفونك ده بارك الله فيهو اللقط مكالمة دوى ..
ياخي ده تلفون متأسف شديد ..
المهم الزاكي حاسي بي احساس ما مريح من الحاجة دي .. لكن سكت واتعامل عادي .. لكن ظاهر فوق وشو عدم الارتياح ..
فدوى ما شعرت بي احساس الزاكي .. لكن حمد حس انو الزاكي مامرتاح او في حاجة ما مصدقها ..
المهم حمد بكل ابتسامة وطيبة نفس قام داير يمشي وقال لي فدوى ربنا يواليك
بالصحة والعافية ..
يلا يا الزاكي بجيك المغرب نمشي نشوف الفحوصات ..
قال ليهو خير .. ولاعزمو ولاقال ليهو اتغدا الساعة 4 وقت غدا ولاقال ليهو اقعد
شوية ...
حمد طلع والزاكي قاعد يتسهى ويسرح كل مرة ..
والشيطان شغال معاهو شغل شديد ..
المراة وبتها طلعن بعد فدوى شكرتها وقالت ليها ان شاء الله اساعدك في جديد
وليداتك يا سعاد ..
بعد المراة طلعت .. الزاكي قال ليها يعني يافدوى ما كان فيك حيل تنتظريني لمن
اجي اوديك الدكتور .. ؟؟
قالت ليهو والله يا الزاكي كنت تعبانة شديد وحسيت بالموت يحوم حولي ..
لكن والله اخوك ماقصر .. قال ليها اخوي منو قالت ليهو اخوك حمد ..
قال ليها يافدوى الزول ده انا اتعرفت عليهو قريب لسه ماكملت شهر .. ولسه
مابعرفو كويس كيف تطمئني ليهو قدر ده ..؟
بعدين الزول ده لمن تلفونك ضرب وخلاص عايز يجيك قفل التلفون عشان انا ما
اعرف ويطلع معاك براهو .. وتاني لمن جاء راجع من المستوصف فتح التلفون ..
دي حركة انا بعرفها .. تقولي لي شبكة ..
قالت ليهو .. الزاكي ؟؟؟
اعوذ بالله من الظن ياخي استغفر الله العظيم .. حرام عليك والله حمد ده زول
نزيه ونقي لدرجة انا ماشفتها في زول قريب ..
بعدين ده زول صاحبك وصديقك .. وانت عارفو اكتر مني ..
قال ليها يافدوى اي مره تطلع مع راجل غريب بتجي تقول نفس كلامك ده ..
قالت ليهو كمان جابت ليها شك فيني انا؟؟
قال ليها والحاجة البتحير انتي قلتي كنت تعبانة لرجة ماقدرتي تصبري لغاية ما أجيك .. وهسي انتي ماظاهر عليك اي تعب ولا قليل .. وبالعكس احسن من خليتك الصباح ..
قالت ليهو خلاص يا الزاكي الكلام ده لغاية هنا خلص ..
ودخلت جوة بكت بكت .. وقشت دميعاتها وجات طالعة سريع مشت على المطبخ .
و عملت ليهو الغداء ..
وختتو ليهو قدامو .. ومشت ابت تأكل معاهو .. قالت ليهو اكل يا الزاكي انت من الصباح ما اكلت انا ما حاسة باني جيعانة باكل بعدين ..
وهو طبعا يشيل لقمة ويقبل جاي ويقبل جاي .. والاحاسيس جواهو مزحومة ..
حاسي بانو شك في زوجتو .. وشاكي في صديقو .. وبحاول بكل الوسايل انو يلقى ليهم مبرر .. واعذار .. بس الشيطان ملجمو لجيمة كعبة خلاص ..
واثبت كل الحصل بالادلة والبراهين ..
وفدوى حست بالانهيار والهبوط يدب في جسمها مرة تانية ..
لكن المرة دي ابت تتكلم وسكتت ساي بس مشت رقدت ..
والزاكي راقد برة ماشغال بيها الشغله
وسارح مع الوساوس الشيطانة وابليس شغال بعمل ليهو في غسيل دماغ..
وفرمو ليك فرم لغاية ماخلاهو مستوي على نار هاديه..
بعد شوية فتح التلفزيون وبقى يشاهد في برنامج رياضي كدا فيهو ناس شاالين بتكلمو عن الكورة ..
اصلا نحن اكتر شعب بعرف يتكلم لو كان الفوز في المونديال بالكلام نحن كنا شلنا كاس العالم كل اربعة سنة ..
قالو من كثر كلامه قل فعله ودام ملامه..
بعد المغرب وحمد جا وقف برة بالعربية .. ودق بوري ومادخل ..
اول ما الزاكي طلع ركب معاهو قال ليهو كيف فدوى امست ..
قال ليهو كويسة ..
حمد حس انو الزاكي متضايق وماطبيعي .. وخت في بالو انو الزاكي متضايق عشان ماقدر يحصل زوجتو في وقت الضيق ..
او انو خايف من نتيجة الفحوصات بتاعة فدوى ..
وقاعد يجاوبو اجابات مختصرة وبتكلم بالقطارة ..
حمد قال ليهو
يا الزاكي ماتشيل هم انا متأكد انو فدوى حتكون كويسة ..
وماحيكون فيشي خطير صدقني .. بعدين ياخي انت معذور .. وفدوى عارفة انك نسيت تلفونك .. ومتفهمة القصة ..
قال ليهو بس انا ما اقدر اتفهم القصة ..
قال ليهو بتقصد شنو ؟
قال ليهو نحن وصلنا انزل نشوف الحاصل وبقول ليك بعدين ..
نزلو دخلو على الدكتور والدكتور قال ليهو ياجماعة للاسف ..
الزولة دي حالتها ما مطمئنة ابدا .. ربنا يستر .. وانا شكيت في حاجة بس ان شا الله شكي مايكون
في محلو
..
الى اللقاء ..

لامارا · 16-12-15, 07:20 PM

الحلقة 8

طبعا لمن الدكتور قال الكلام ده .. الزاكي اندهش زي الضربتو صاقعه .. وحمد حس بيكرعيهو ماتن .. وقعد في اقرب كرسي ..
والدكتور بقى يعاين ليهم الاتنين .. وقال ليهم انتو بتبقو ليها شنو؟
انا يتخيلي القاعد ده اخوها .. لي حمد ..
وانت زوجها صح ؟ حمد قال صح ..
بس يادكتور قول كلام مطمئن الله يخليك ..
قال ليهم يلا خلو بالكم معاي كويس ..
الهبوط النحن لقيناهو عند المريضة هبوط حاد وخطر وكان ممكن يعمل هبوط عام في الدورة الدموية وتوقف القلب وتموت موت مفاجئ ..
يعني لو حصل اي تأخير لاقدر الله كان ممكن تفقدوها ..
يلا الهبوط ده عندو اسباب محددة ومعروفة ..
السبب الاول .. الحمل وطبعا هي ما حامل .. كويس ؟؟
السبب التاني في بعض الادوية بتسبب النوع ده من الهبوط زي زول مثلا يستعمل حبوب علاج ارتفاع الضغط وهي طبعا" ماقاعدة تستعمل ادوية زي دي ..
وبرضو حبوب النفسيات والتوتر العصبي ..
وادوية معالجة الانتصاب .. البستخدموها زي الفياغرا وغيرو .. ودي كلها مستحيل تكون اتناولت منها حبة صح؟ الزاكي قال ليهو فعلا ده كلو مافي ..
السبب التالت اضطراب الغدد الصماء وبرضو ماعندها ..
السبب الرابع النزيف الحاد كان داخلي كان خارجي وده برضو مافي ..
السب الخامس نقص عنصر غذائي مهم . زي بعض الفيتمينات .
السادس نقص في مقومات الدم مثلا السكر في الدم وانخفاض الهموقلبين
وده كلو مافي ..
السابع ..دخول مكروبات في الدم وبرررررضو مافي ..
بقى في سبب واحد بس .. وهو ضعف القلب وعدم مقدرته على ضخ كمية كافية من الدم تسبب الهبوط الحاد ..
يعني على ما اعتقد انو المريضة عندها صمام يا استاذ..
يلا المفروض كوالي بعدين المساء تمشو تعملو لي تخطيط للقلب ..
ونشوف وماتهملو الموضوع اصلا ..
شالو الاوراق ودفعو العليهم .. وطلعو الاتنين واحد بتكلم مع التاتني مافي كل واحد فيهم شايل هم اكبر من التاني ..
اول ما ركبو قال حمد قال ليهو الزاكي فدوى وضعها خطر ماتكون بعيد منها وخلي تلفونك معاك دايما ..
بعدين التلفون ده حاول غيرو ..
لانو ممكن الحالة دي تحصل لفدوى في اي ظرف واي تأخير بكون خطر على صحتها زي ماسمعت كلام الدكتور ..
الزاكي قال ليهو والله ياحمد انا ماعارف اشكرك كيف .؟
يعني انت لو ما كنت رديت ووصلتها بسرعة كانت فدوى هسي في عداد الاموات ..
قال يازول ان شاء الله بعد عمر طويل وربنا يمتعها بالصحة والعافية وتربي وليداتها ..
وان شاء الله كلام الدكتور ده يطلع شمار في مرقة ..
بس ياالزاكي انا عندي وصية وياريت توعدني بيها .. قال ليهو قول ..
قال ليهو اوووعك تكلم فدوى بكلام الدكتور ده ..
بس قول ليها الدكتور قال اعملو تخطيط للقلب لكن تاني ماتفصل ليها حاجة ..
قال ليهو ان شاء الله ..
حمد قال ليهو تاني في حاجة طبعا انت عارفة الحالة بتزيدا التوترات والمشاكل
حاول بقدر المستطاع خلي فدوى تكون هادية ومرتاحة البال وماتمشي تتهور فوقها تهوراتك البعرفها دي ..
حاجة اخيره معليش يعني انت زي اخوي .. حتى في العلاقة الزوجية وكدا ...خت في بالك نو اي مجهود زايد عن اللزوم بتعب القلب ..
المهم الكلام ده وهم راكبين ماشين علي البيت ..
الزاكي بالرغم من انو اطمأن انو المشوار بتاع النهار ماكان مدبر .. واقتنع انو فعلا فدوى كانت تعبانة على حسب كلام الدكتور ..
لكن حس انو حمد مهتمي بي فدوى اهتمام اكتر من اللازم وشفقان عليها شفقة .. ماقدر شفقة رجل على زوجة صاحبه ..
المهم نزل الزاكي قدام الباب وحمد طلع طوالي وبالو كلو في كلام الدكتور القالو عن فدوى .. وكان منهار جدا وحيلو ميت .. ومشى البيت تاني ماقدر اشتغل كلو كلو ..
اها لمن وصل البيت سماح كانت متوترة توتر غريب ..
عاين ليها كدا في وشها .. وقال ليها ان شاء الله خير مالك الليلة كمان قالت ليهو مافي حاجة ..
قال ليها انا بعرفك كويس .. انتي ماطبيعية لكن مدام ماعايزة تتكلمي ما بضغط عليك راحتك ..
قالت ليهو طبعا راحتي .. وانا بعرف محل راحتي كويس ..
احكي لي يوم الليلة ده كان فيهو شنو والركبت معاك منو من الصباح لغاية هسي ..
طبعا احكي لي يوم الليلة دي نغمة ثابتة عند سماح ..
قال ليها والله اكتر حاجة مهمة في اليوم ده فدوى .. والله فدوى شاغلاني مشغولية شديد
قالت ليهو فدوى شنو كمان ؟؟.. انت والله ياحمد يوم بتكتلني ..
قال لالا ههههه فدوى دي زي محاسن اختي بالظبط ..
فدوى دي زوجة اخوي وصاحبي الزاكي .. الزاكي الكهربجي المشى معانا للنخلة والفيل اتذكرتيهو ..
قالت ليهو خلاص عرفتو أها مالا قشرة زوجتو ؟؟
قال ليها ماقشرة ياسماح .. فدوى .. فدوى عيانة واحتمال يكون عندها صمام ..
وانا بالجد شايل هم الدنيا لدرجة اني ماقدرت اشتغل ..
وطبعا" بتكلم بكل براءة وعواره زي الكأنو فعلا بتكلم عن محاسن ..
قامت قالت ليهو في حاجة انا عايز احكيها ليك اسرع تم لي الكلام ده ..
قال ليها بس مافي حاجة الزولة دي عيانة عليك الله ياسماح ادعي ليها ..انتي زولة صالحة وقلبك طيب ..
قالت ليهو ادعي ليها كمان ؟؟ انت اكيد ماطبيعي .. ومن جواها محروقة من الكلام وهو قاليها الكلام ومفتكرها بتجيها شفقة وبتقول ليهو وديني ليها ..اشوفا واسلم عليها وكدا ..
قال ليها اها قولي لي الكلام .. قالت ليهو ياحمد انا زمان كان عندي علاقة مع ولد جيرانا في الهجرة وانا ماحكيت ليك بيهو .. وهو لاهسي ماعرس . وانا هسي حاسه بميول تجاهو . لانك انت مامهتمي بي .. عايزاك تطلقني وانا بعرسو .. وانت تلقى راحتك في اي واحدة تعجبك مادام انا ماعاجباك موش حل؟؟
..الى اللقاء

لامارا · 16-12-15, 07:23 PM

الحلقة 9..
..
لما سماح قالت الكلام الغريب ده لي حمد .. حمد استاء استياء شديد وبطنو طمت .. وقال ليها خلاص ياسماح مافي مشكلة .. اقتراحك مقبول تب .بس عندي طلب ..
خليك قاعده في البيت .. لغاية ما تلدي الجنا الفي بطنك ..لانو ده جناي انا .. وكانك ما زوجتي .. مابقرب منك ولاتقربي مني .. ولاعندي معاك اي علاقة .. بس بعد تلدي مباشرة بطلقك اتفقنا ؟؟
قالت ليهو اتفقنا ..
شوية هدأت ودخلت جوه جابت ليهو أكل .. قال ليها مستحيل اكل من يدك تاني ..قالت ليهو يلا في ستين .. شالت الاكل رجعت بيهو ..
ما أخد ساعة ضرب لي الزاكي ..عشان يسأل من فدوى .. لقى التلفون مقفول ..
وقلق قلق شديد .. وتاني دقاهو .. مقفول .. وتالت ضربو جاب جرس بس الزاكي مارفع .. وحمد بقى مقلق يدخل ويمرق .. وضرب كم مرة والزاكي مارد ..
وماعارف الحاصل بيغادي شنو وكلام سماح ما هماهو شديد ..ليه ماعارف ..
بس هسي اهتمامو وقلقو كلو على فدوى ..
قامت سماح سألتو قالت ليهو ضربت لي منو .. الماردت ليك دي .. وخلتك مقلق كدي ؟.. قال ليها وانتي مالك ؟؟ وعلاقتك بالموضوع شنو .. ؟
مش اتفقنا اي زول في حالو ؟؟
قالت ليهو يعني اضرب للزول الحكيت ليك بيهو عادي ..؟
قال ليها اضربي ليهو لونفسك بتسمح ليك بالخيانة . وانتي في عصمة راجل .. وجناهو في بطنك .. لو اهلك ربوك على كدا؟ مافي مشكلة اعملي البريحك ..
بس لو سمحتي تاني ماتسأليني من حاجة بتخصني ..وماعندك علاقة بحياتي ..خليك في حالك وخليني في حالي ..
وتاني شال التلفون ضرب للزاكي المرة دي الزاكي رده ليهو ..
حمد قال ليهو انت وين يا الزاكي .. قال ليهو قدام مع ناس بكري .. حمد داير يسألو من فدوي .. عاين لي سماح كدا .. لقاها غازة كوعا تعاين ليهو ..
قال ليهو خلاص انا جاي عليك ..حضر لي حاجة اكلها لاني جيعان شديد ..
وطلع طوالي وعاين لي سماح ..قال ليها مع السلامة ياسماح خلي بالك من نفسك ..قالت ليهو وانت مالك ومالي .. امشي في حالك ..
قال ليها طيب .. طلع طوالي ركب العربية مشى على ناس الزاكي .. وبكري .. والمرة دي معاهم واحد اسمو نميري . برضو من ضمن الشلة ..
المهم الزول ده لمن جا للناس ديل قابلوهو مقابلة باردة شديد ..
حتى بكري الزول الفكاهي .. قابل حمد مقابلة سئيه .. ونميري ده رد ليهو السلام بي تحت نخريهو .. والزاكي مارد السلام ..اساسا صاري وشو ..؟
المهم حمد اتحسس شديد لكن ماعرف الحاصل شنو؟
قام نادى الزاكي قال ليهو الزاكي لو سمحت تعال دقيقة .. جاهو قال ليهو اها شنو؟
قال ليهو انتو مالكم في شنو ..؟ قال ليهو مافي شي ..
قال ليهو ياخي مقابلتكم لي كانت قاتلة والله ..
الزاكي قال ليهو قلت ليك مافي شي .. انت عايزني لشنو؟قول العندك وخلصني ..
قال ليهو انا بسأل من فدوى بقت كيف ؟
قال ليهو انا بٍسألك سؤال وجاوبني بصراحة ياحمد.. انت ليه مهتمي بي فدوى دي قدر ده ..
ياخي فدوى تطير وانت وراها ..
قال ليهو ده كلام شنو يا الزاكي ..؟ انت اخوي والله .. الزول مابسأل من اختو ..الزاكي قاليهو ياخي فكني من الحنك الماجايب حقو ده ..خوة من متين ؟؟
لو سمحت ياحمد .. ابعد من حياتنا وشوف ارزاقك ..
قال ليهو حاضر يا الزاكي .. وانا آسف شديد ..بس ياريت توريني الغلط الحصل مني شنو؟.. الزاكي فات منو طوالي
حمد من كلام الزاكي تاني مارجع للجلسة ..طوالي مشى منهم..وركب العربية ومن الاحراج والزعل قرب يبكي ..
واكتر شي هاميهو انو ماعرف فدوى الحاصل عليها شنو؟
وبتسأءل جواهو كيف يا الزاكي زوجتك مريضة قدر ده .. وانت قاعد تتونس ..ياربي هسي فدوى تكون كيفنها ..
ومشى بقى سايق الامجاد ولافي بالشوارع بدون وعي .. يمرق من شارع ويدخل في شارع .. وهو ماعارف ماشي وين ؟
في لفو داك جاء ماشي على السوق في الشارع بتاع حي العرب بورا هناك مع زريبة العيش وهو متجه جنوب ماشي على مسجد العرضة جا ماري في مراة كبيرة كدا اشرت ليهو ..وقف ليها ..
وقبل المراة دي .. في كم نفر اشرو ليهو ..ابدا ما وقف ..لانه ماعندو مزاج يشتغل ..
المراة قالت ليهو انا ماشة السلاح الطبي ..
قال ليها اركبي .. قالت ليهو اها بي كم ؟
قال ليها عليك الله ياحجة اركبي .. البتدفعيهو لي بشيلو .. انا ماقادر اجادل ..المراة ركبت طوالي .. وهو سايق وماشي .. قالت ليهو مالك ياولدي متضايق قدر ده ؟ الدنيا مابتستاهل ..
قال ليها والله ياحجة انا ما الزول البهتم بالدنيا لكن الظلم حار ؟
قالت ليهو انا مراة قدر امك احكي لي ..
حكى ليها .. مرض فدوى زوجة صاحبو ..وقصة المقابلة القبل شوية ..
وقال ليها انا ماعارف ذنبي شنو؟ ..بعدين اكتر شي مضايقني ماعرفت المراة العدتني زي اخوها ..الحاصل عليها شنو ؟ ..وكيف هي عيانه وراجلها قاعد يتونس؟
المراة الراكبة معاهو دي دي قعدت تبكي .. وتقشقش في دميعاتها ..
قالت ليهو سبحان الله ياولدي .. غايتو حوا والده .. انا من معاملة راجل بتي ليها ..
قنعت من الرجال كلو كلو .. وقلت البلد دي مافيها رجال .. لكن انت بكلامك ده ..غيرت راي ..انا بتي عيانة وراقدة في المستشفي .. وراجلها جدعها وهرب ..
وانا هسي بمشي الثورة وبجي المستشفى تلاتة مرات في اليوم .. بمشي لاولاد بتي الصباح .. والبسهم واعمل ليهم الاكل .. اجي المستشفى اقعد مع بتي .. لما الاولاد يجو راجعين من المدرسة برجع تاني .. بديهم الاكل واجي راجعة المستشفى ..
وامشي ليهم المغرب اعشيهم .. وانومهم واجي راجعة المستشفى المرة التالتة ..
عشان ابوهم هارب من المسؤولية .. وكت مرق قال لي ان شاء الله بتك تموت ..
لكن الحمد لله ياولدي ترا صابرة وراجيه الله ..
قال ليها ماتشيلي هم ياحجة .. انا بحاول اساعدك والله ..
بس انتي ادعي لي فدوى ربنا يشفيها .. وتقوم بالسلامة لوليداتها ..
اها يازول لامن وصلو المستشفى .. نزلت المراة وحلف من القروش اداها تلفونو ..وقال ليها الصباح لمن تجي للاولاد اضربي لي ..
شالت منو التلفون وهو رجع على البيت .. في الطريق تلفونو ضرب ..
الرقم ماغريب عليهو .. لكن مامسجل ..
حمد فتح الخط وقال الو مرحبا ..
جاهو صوت فدوى المابغبى عليهو وصوتها واضح فيهو التعب والاعياء .قالت ليهو ..حمد انا اختك فدوى ..
حمد انت قلت لي انت اخوي .. حمد انا محتاجة ليك شديد ..
حمد انا تعبانة شديد ..

الى اللقاء ..

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري