30-08-17, 06:02 PM
| #1 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام 
|  تسلية الأقدار / للكاتبة Novels01x_  بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين السلام عليكم ورحمة الله وبركاته نقدم لكم رواية تسلية الأقدار للكاتبة/ Novels01x_ | ||||
|  |
|
30-08-17, 06:04 PM
| #3 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
|  \\ الفصل الاول الساعه 12 الليل : ها حبيبي وش ناوي تفاجئني فيه السنه بعيد ميلادي : ي عمري قلتيها افاجئك يعني مايصير اقولك : ي الله مره متحمسه : والله انا المتحمس مهوب انتي : طيب ممكن تلمح لي وش هي الهديه : لا احلمي اصبري كلها اسبوع وتعرفين : ي طولها اسبوع والله مافيني صبر ... تكفى طلبتك : لا خلاص يلا نامي بكرى عليك مدرسه : طيب خلاص اصلا لو ما الوقت متأخر كان ما نمت نشبت لك : طيب احلمي بي ها هههههههه : ي سمجك ي شيخ ... مسوي حركات الي ياي واحلمي بي وحركات نص كم : امزح وش فيك قلبتي ههههههه : طيب خلاص بنام : يلا تصبحين على خير ي بعدي : وانت من اهله سكرت منه وهي تتنهد بفرح وتقول : الله يخليك لي الساعه 5 وخمسه واربعين جلست على صوت المنبه غسلت وصلت ولبست التنوره والقميص وكوت قصتها ورتبت شعرها وتعطرت ولبست عبايتها وجزمتها ونزلت لقت اخوانها جالسين منفسين وكأن ميت عندهم احد وقالت بروقان : صباح الورد ابو حسن : صباح النور غريبه مروقه اليوم ليان : اكيد كلها كم اسبوع ونتخرج متحمسه مره ابو حسن : عسى دوم ليان : وش فيهم الاخوان منفسين هادي عطاها نظره ناريه و حسن طنشها ابو حسن : اليوم الاحد مافي جديد ليان : الحمدلله والشكر ... الا وين امي ابو حسن : امك تعبانه اليوم فما صحت ليان : اها شوي وسمعوا صوت هرن باص ليان وطلعت تركض ركبت الباص وجلست مكانتها المعتاده ووقف السواق عند بيت يبعد عن بيتهم بثلاث بيوت وركبت البنت برزانه مصطنعه وجلست جنب ليان ليان : تعالي جبتي الي قلت لك عنه؟ مروج : جبته افا عليك اجيبه واجيب ابوه ليان : ي اني متحمسه اشوف وجهها اذا شافتهم مروج : ههههههههه وانا اكثر وصلوا المدرسه ونزلوا وهم متحمسين واستقبلتهم وسن وسحبتهم : يلا يلا وين العلبه؟؟ مروج : في الحفظ والصون ركبوا بسرعه للفصل وفرغوا العلبه في الدرج الاول من المكتب وحطوا فيه اقلام السبوره ونزلوا للطابور وبعد الطابور ركبوا الطالبات وفيهم حماس ولما دخلت الاستاذه وسلمت وجلست تعطي نبذه عن الدرس وسألت عن اقلام السبوره وقالوا لها انهم في الدرج الاول وفتحت الدرج ودخلت يدينها وتناظر للطالبات ولما نزلت عيونها انصدمت ان كله صراصير و مقاريص وتجمعوا على يدها ولسعوها المقاريص وهي متقززه من الصراصير وهم يركبون على يدها وهي تصارخ من الخوف والالم و التقزز والبنات ماسكين ضحكتهم بالقوه ويسألون ببراءه وش فيك وهي حاقده عليهم وتصرخ وتتوعدهم الساعه 1:15 رجعت ليان من المدرسه وهي هلكانه و?ان لسى اخوانها ماجو راحت المطبخ سلمت على امها وسولفت معها وفي نص سوالفهم ليان : تصدقين يمه اليوم سوينا مقلب في الابله ام حسن : وش سويتوا هالمره بعد؟ ليان وهي تضحك : هههههههه حطينا اقلام السبوره في الدرج وحطينا الحشرات فيه ومن ضمنهم المقاريص عشان تضطر تفتح الدرج وهي تصارخ من الالم ومتقززه من الصراصير صراحه شكلها تحفه وهي تصارخ هههههههههههههه ام حسن ضحكت : هههههههههه اكيد الي جابتهم مروج ليان : هههههههههههه اكيد عندك شك؟ ام حسن : آخر مره تسوونها عيب مهما كان هذي ابلتكم والمفروض تحترمونها وبحسبة امكم ليان : تخسى الا هي تكون امي وبعدين اذا احترمتنا ذيك الساعه نحترمها والله ام حسن : الله يهديك ليان : يمه انا بنام خلاص ما اشوف الطريق من النعس و صحيني الساعه 3 وعشر ضروووووري واذا مارضيت اصحى كبي علي مويه ام حسن : والغدا؟ استوى وابوك واخوانك على وصول تغدي ونامي ليان : مابي يمه بالعافيه وصحيني ها لا تنسين انا بأقت جوالي بس يمكن ما اصحى عليه ام حسن : من السهر انا كم مره قلت لك لا تسهرين عشان تركزين في الدراسه زين ليان : يلا انا بنام تمسين على خير ام حسن : وانتي من اهل الخير ركبت ليان غرفتها بدلت وصلت ومسكت جوالها عشان تضبط المنبه لقت رساله من خالد يقول لها اول ما توصل من المدرسه تكلمه سحبت عليه وقالت من اول ماتصحى بتكلمه ضبطت المنبه وطفت الانوار وشغلت التكييف وسكرت الستاره وتلحفت وراحت في نوم عميق >> اه اشتهيت النوم تحت بعد عشر دقايق وصلوا هادي وابوه وسلموا على امها وحطت الغدا وجلسوا يتغدون هادي : الا وين ليون ام حسن : نايمه نعسانه ابو حسن : انا قايل لك من الساعه 10 نطفي المودم بس انتي ... زين كذا يرجعون مثل مايروحون ولا يركزون في الحصص من النعس هادي : يبه حنا مب بزران اذا نعسنا بدري بننام مب سالفة سهر ما سهر بس اذا جانا نوم بننام ماجانا نشغل انفسنا لين مايجي النوم ام حسن : لا ي شيخ هادي : يبه حنا كبار ونعرف مصلحتنا ابو حسن : لو انكم تعرفون مصلحتكم كان ما سهرتهم طول الليل وبالدوام عين مفتحه وعين مغمضه ام حسن : خلاص سكروا الموضوع وتغدوا كملوا غداهم وقامو الساعه 3 الا ربع جا حسن من الدوام وسأل عن ليان وقالوا له نايمه ركب غرفتها طق الباب وطق وطق ماسمع جواب فتح الباب شافها في سابع نومه فتح الانوار وطفى التكييف وفتح الستاره والنافذه لان النافذه تصير جنب السرير يعني بيجي الضوا والحراره بوجهها وجلس على الطاوله الي جنب السرير وحط يده على خده وناد ببرود وهدوء : ليان ليان ليان ليان ليان ليان ليان ليان ليان ليان ليان ليان ليان ليان ليان ليان ليان ليان بنرفزه : حسنوه ترى مالي خلقك اطلع برى حسن ولا كانه سمع شي : ليان ليان ليان ليان ليان ليان ليان ايان ليان ليان ليان ليان ليان ليان ليان ليان ليان ليان ليان ليان ليان ليان ليان ليان ليان ليان قامت وصرخت : وجع حسن قام يركض ولما وصل للباب شاف ليان رجعت تلحفت بتكمل نومها : ليان ليان ليان ليان ليان ليان ليان ليان ليان ليان ليان ليان ليان ليان ليان ليان ليان قامت اووووووف حسنوه حسن من سمع صرختها حسها بدت تصحصح فراح وتركها ليان تأففت وسكرت النافذه وراحت الحمام ( الله يكرمكم) وطفت الانوار ونزلت ابو حسن : عبدالله ام حسن : علياء حسن : عمره 25 آخر سنه له في الجامعه تطبيق لأنه ضل ينتظر القبول لسنتين بعد التخرج من الثانويه ويدرس تمريض واسراره عند اخته ميسان وكل يومين رايح لها شقتها وعيالها متعلقين فيه ميسان : عمرها 23 متزوجه وعندها ولدين ( وليد 3 و فارس سنه ونص) ليان : عمرها 19 في 3 ثنوي بعض الأحيان عاقله وبعض الاحيان عبيطه هادي : عمره 18 رفيق ليان في البلاوي والتخطيط وفلاوي مره فايز : اخو عبدالله الوحيد وامهم وابوهم ماطلعوا من هالدنيا الا بهالاثنين وعمره 28 فلاوي مره وقريب من اولاد اخوه مره ويحبهم وعلى طول يزورهم ويحب يكون كأخ بالنسبه لهم قبل ما يكون عم وبالفعل قدر من تواجههم مشكله او حبوا يفضفون راحوا له الا ان في بعض الاشياء يخبوها عليه ومرح و سامج وعزابي يسكن في عماره وارثها من ابوه وجالسين في شقه مع امه وكل مره اخوه يعرض عليه انهم يسكنون معهم بس هو يرفض عشان زوجة اخوه تاخذ راحتها وهو بعد مروج : عمرها 18 في 3 ثنوي رفيقة درب ليان جارتهم وصديقتها الروح بالروح وسن : عمرها 19 في 3 ثنوي صديقة مروج وليان وعندها شلة ثانيه غير ذيلا وبعض الاحيان تروح لهم | ||||
|
| |
|
30-08-17, 06:23 PM
| #4 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الفصل الثاني ليان وهي جالسه مع اهلها في الصاله : اي يبه عادي اروح بيت الجيران حسن : ووش عندك في بيت الجيران هادي : نسيت ؟ صديقتها مروج بنت الجيران حسن : مافي تروحين ليان : مالك دخل انا سألت ابوي عبدالله حاط يده على خده : خلصتوا؟؟ ليان : يبه ماعليك منه الحين عادي اروح لها ولا لا عبدالله : منهي؟؟ ليان : ي الله ابوي بيت جيرانا بيت صديقتي عبدالله يبي يطفرها : اي جيران ؟؟ ليان : يببببببه بيت حمدان ال....... عبدالله : اي ووش عندك تروحين بيتهم ليان : يبه بيت صديقتي صديقتي عبدالله : اي روحي بس لا تتأخرين ساعتين ساعتين ونص وانتي راجعه ليان : ان شاء الله يبه قامت بتروح غرفتها ورجعت لهم : محد بيوصلني بسيارته حسن : ي السودانية تراه البيت بعد ثلاث بيوت مشي رجل وانتي واصله ليان مدت برطمها: طيب لبست وطلعت وراحت لمروج وهم في نص جلستهم صرخت ليان : ي ربيييييييييييه مروج تروعت : بسم الله وش فيك ليان : خالد قالي اذا رجعت من المدرسه ادق عليه وقلت اذا جلست من النوم بدق عليه وصار لي نص ساعه من صحيت ولا دقيت عليه نسيت مروج : كلميه يالخبله كلميه اكيد الحين خايف عليك عند خالد من الساعه وحده للحين الساعه 3 وربع ما اتصلت وخايف عليها بيموت من الخوف بس مايقدر يسوي شي لها وهي مو من عادتها تسحب عليه الوقت الي يقولها فيه اتصلي تتصل في نفس الوقت وهو رايح جاي في غرفته مقطع روحه من التفكير حتى جت له اخته تقول له ان ابوه يبيه ينزل يجلس معهم صرخ عليها وهو معصب وقلقان وطردها برى الغرفه شوي وسمع صوت جواله يرن فز وراح يركض وعلى طول رفع واول كلمه قالها وهو مبين من نبرة صوته الخوف : وينك انتي كنت بموت من الخوف عليك وين رحتي ليان : بسم الله عليك آسفه بس لما شفت الرساله كنت بنام وقلت اذا صحيت بكلمك وصحيت ونسيت توني ذاكره لمن جيت لصديقتي خالد من العصبيه والخوف عليها صارخ : ثاني مره لا تعيدينها دقي لو بس رنه طمنيني او عطيني خبر انك بتنامين برساله مهوب اصير زي المجنون عليك ليان ميلت فمها : طيب قلت آسفه ماله داعي الصراخ خالد حس على روحه وارتخت اعصابه وقال بهدوء : طيب لا تعيدينها صرت زي المجنون من خوفي عليك ليان ضحكت : هههههههههههه اجل مننا ورايح بسميك المجنون خالد يسوي روحه معصب : مالمجنونه والمهبوله الا انتي ليان : طيب انا مجنونه ومهبوله بس لا تعصب هههههههه اي وش تبي فيني خالد : لا كنت بس ابي ادردش معك شوي بس لكن انتي اقلقتيني حتى اختي طردتها من التوتر ليان : هههههههههههههه مسكينه حرام عليك خالد : منك ليان : انا مالي شغل خالد : طيب اخليك مع صديقتك ومره ثانيه لا تيعدينها ليان : طيب مع السلامه ... اليوم لا تدق خالد رفع حواجبه : اعتبرها طرده الكترونيه ولا وش ليان ضحكت : ماقصدي بس لان بكرى عندي امتحان وجايه اذاكر مع صديقتي وبكمل في البيت قلت يعني لا تشغلني عن المذاكره وبس اخلص انا ادق عليك خالد : اييي ذاكروا زين ها واتركوا البربره عنكم الي ماراح تفيدكم ليان : لا هو هالامتحان كتحسين درجات يعني مو اجباري للي يبي بما ان بقى ثلاث اسابيع على الاختبارات خالد : يلا موفقين انتي وصديقتك وركزوا زين يلا مع السلامه ليان : مع السلامه دعواتك خالد رمى الجوال على السرير وضحك : ههههههههههههه مجنونه ونزل لاهله وهو رايق وطبعا هزئه ابوه كم تهزيئه لانه مانزل معهم وهو مرسل اخته له خالد مازال مروق مع كرهه لهالاجتماعات الي تصير يمكن بالسنه مره : روق روق ماتسوى اخته غزلان : سبحان مغير الاحوال خالد فهم قصدها وضحك : سبحانه غزلان : الظاهر ان طير السعاده وصل لك خالد : ههههههههههههه وصل وصل غزلان : اييي الحمدلله على السلامه اجل خالد ابتسم وهو فيه الضحكه : الله يسلمك ام غسان ( ام خالد ) تستحقرهم : وش فيكم تتكلمون بالالغاز تكلموا زين عشان نفهم غزلان : يمه كلامي واضح طير السعاده محلق في بيتنا ام غسان مافهمت عليها : الحمدلله والشكر اي طير حننا ماعندنا طيور خالد وغزلان ناظروا بعض وماتوا من الضحك ام غسان بكره : مهابيل ؟؟ قلت شي انا ؟؟ ابو غسان تكلم بعفويه وهم اول مره بحياتهم كلها يشوفونه يمزح وتكلم كذا ويحسسهم انهم عائله بجد بس لانه كان رابح صفقه كبيره مره ومهمه جدا للشركه فكان مروق على الاخر : شيفرات شباب يام غسان شيفرات شيفرات ام غسان : وش شيفراته ابو غسان : تخذلك اسرار شباب يام غسان يتكلمون بالالغاز عشان مانفهم عليهم والي يفك الشيفره هو الشاطر غزلان وخالد فجروا ضحك مره ثانيه من كلام ابوهم مع استغرابهم للجو الحميمي الي صاير لاول مره بحياتهم بس مع ذلك مامنعهم من لذة هاللحظه الي ماراح تتكرر ام غسان بإستحقار : الحمدلله والشكر لا من الزوج ولا من اولاده ابو غسان : صاحب شركات مايهتم في عياله واهتمامه كله فلوس يعني اذا قالوا له عياله متضايقين قام حول لهم فلوس ويجمع اهله مره كل خمس اشهر او مره في السنه يعني على حسب فراغه ومتسلط ام غسان : انسانه بليده تستحقر عيالها ماتحبهم وعندها كل شي مايمشي الا بالفلوس والجمال ... تحب المظاهر كثير بس الشي المميز فيها مايهمها الطبقات الاجتماعيه ... صح انها تبع مظاهر لكن بإستثناء الطبقات الاجتماعيه غسان : عمره ٣٠ متزوج من بنت اعجبت امه بجمالها وخطبتها له ومتزوجين صار لهم ٦ سنوات ... انسان فلاوي ومرح ويعشق زوجته ويخاف عليها كثير ... اشتغل لمدة خمس سنوات مع ابوه بمنصب عالي واخذ خبره وراح يشتغل بشركه ثانيه بعيد عن تسلط ابوه الي لاغي شخصيته بحضور الموظفين افراح : عمرها ٢٤ معها مرض الصرع " الله يكفينا وإياكم من كل شر " طيبه وحبوبه ومملوحه وتعشق زوجها من اهتمامه فيها تركي : ولد غسان عمره ٥ سنوات خالد : عمره ٢٦ يكره تصرفات ابوه وامه وبسبب تربيته من قبل المربيه صار عديم المسؤوليه وحساس بشكل مو طبيعي ويتأثر بشكل سريع ويبكي من المواقف الي يحسها جرحته او متأثر فيها بسرعه ... مايشتغل وابوه يصرف عليه وبعض الاحيان تخلص فلوسه ولا يقول لأبوه وابوه مايحول له فلوس ويجلس مطفر زولا يفكر انه يشتغل غزلان : عمرها ٢٠ انسانه طيبه مره وحبوبه وعلى نياتها وامنيتها يلتم شمل عائلتهم ويكونون على قلب واحد وتسعى لهالشي مروج : وش يبي ليان : بس كان يبي يدردش فديته خاف علي لما مارديت عليه للحين مروج : اسمع صراخه واصل لعندي ليان : اي يقول كان بيجن من الخوف وينتظر اتصالي من زمان مروج : اقول خلينا منه وخلينا نذاكر يلا بعد ما فهموا الي مستصعب عليهم رجعت ليان وكملت مذاكره في البيت ولما خلصت كلمت خالد وتعشت ونامت الساعه 10 ونص في المدرسه ليان : تصدقين امس اول مره احس اني مهمه وفي ناس تخاف علي مروج باستهزء : ليش يعني انتي مو مهمه عند اهلك ولا يخافون عليك؟ ليان : لا يالخبله ماقصدي كذا ... هذول اهلي اكيد بكون مهمه عندهم ويخافون علي بس الي اقصده ان اول مره احس ان في ناس غير اهلي اكون مهمه عندهم ويخافون علي مروج : طيب يمكن يلعب عليك؟ ليان : لا واضح من نبرته انه صدق خايف علي مروج : يمكن يتصنع الخوف ليان : صراخه علي ونصيحته لي طالعه من قلب مروج : قلتها لك كثير واقولها للمره المليون الي تسويه غلط وانتبهي لنفسك علاقات هالايام ينخاف منها ليان : ماعليك مني انتي وش ناويه اذا تخرجنا تقدمي وين مروج : تونا بسم الله بعد ثلاث اسابيع الامتحانات وانتي تتكلمين عن التخرج والتقديم للسنه الثانيه ليان : ي خي متحمسه ابي اكمل دراستي واخلص وارتاح مروج : وش الفايدة بتكملين دراستك وانتي ماتبين تتوظفين ليان : على الاقل اكون متعلمه اكون جامعيه مروج : اقول ماعندك ماعند جدتي في المستشفى حسن : اففففف اقسم بالله جو المستشفى يجيب الكآبه باسم : هذا وانت لسى تطبيق اجل بعدين اذا توظفت وش بتسوي حسن : خلها على ربك بس ساعات اذا فكرت اندم اني دخلت هالتخصص باسم : صدقني هالتخصص احسن من غيره وكفايه انه انساني وتنفع اهلك ونفسك ودينك حسن : صدقت في مدرسة البنين الثانويه هادي : عيال شرايكم نهرب دام مايعطوننا حصص ومابقى شي على نهاية الدوام بسام : فكره ناااار قيدام منيف : لا عندي خطه شبه نظاميه يعني نقولهم نستأذن وبعدين نسحب على اوم امها هادي : والله انها طلقه استأذنوا وبالموت وافق يطلعون كلهم بشرط اول مايخلصون الزياره يرجعون ( مكذبين عليه ان خويهم في المستشفى مريض وبيزورونه وهو يبيهم ضروري يحس انه مابيشوفهم مره ثانيه ف يبيهم عنده وجلسوا يرقرقون عيونهم عشان يصدق لين كسروا خاطره ووافق ) طلعوا فطروا في فوال و جلسوا يفرفرون وراحو بيت واحد من اخوياء هادي يجلسون فيه لان البيت فاضي لان امه موظفه في التوجيه ومحد بيدري عنهم وبيجلسون لين وقت انتهاء الدوام وبيرجعون بيوتهم انتهى | ||||
|
| |
|
30-08-17, 06:24 PM
| #5 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الفصل الثالث بعد اسبوع الساعه 2 ونص جالسين بالصاله يتقهوون بعد الغدا ليان : اخواني اعزائي والداي الغاليان غدا عيد ميلادي ... يعني قرقشوا مخابيكم ويلا يدكم على الهديه هادي : م لك الا عصير سن توب ليان : مالت عليك وعلى هداياك حسن : انا واحد مطفر مره لو تنفضيني مانزلت عشره ريال ليان : عاد عطيتكم خبر من الحين عشان بعدين ما تقولون م درينا حسن يغير الموضوع: تعالي ليون انتي السنه بتتخرجين صح؟ ليان : اي حسن : طيب ماشفتهم سوو لكم حفل تخرج ولا قلتي انهم بيسوون ليان : المدرسات البقر مب راضيين يسوون لنا حفل يقولون ماتستاهلون هادي : لو انا اقلب المدرسه على روسهم غصباً عليهم يسوون حسن : انت كل شي عندك بالغصب ليان : الله يعين مرتك عليك هادي : الا ي حظها اني انا هادي ال....... زوجها حسن : خف علينا يا توم كروز هادي : يخسى اكون توم كروز هالشايب هذا انا احلى منه ليان تضحك : اسمع من يقول احلى هههههههههههه انت شفت وجهك بالمرايه؟ علياء : وش فيه ولدي احلى منك هادي وحسن انفجروا ضحك على وجه ليان حسن : واااااااك الجبهه الجبهه تعالي امسكيها اشوفها هنا بحضني عبدالله : يلا عاد كل شي ولا ليان حسن : خلاص نعلنها حزب انا وهادي وامي حزب الشجعان وانت وليان و ميسان حزب الابطال ليان : امحق شجعان هادي : امحق ابطال علياء : ماتحسون انكم جالسين تغلطون علي وعلى ابوكم وساكتين لكم ليان : لا يمه ما اقصدك اقصد اولادك النجباء حسن : خفي علينا يالنجباء هادي : اتحداك تعرفين معناها ليان : اسكت اسكت يالبزر حسن وهادي ناظروا بعض وفجروا ضحك ويسوون كفك : اسمع من يتكلم حسن وهو يضحك : مين البزر مين ليان : الجني يعني مين الي جنبك حسن وهادي زادوا في الضحك : بزر تقول بزر ليان : اعتقد ماقلت شي يض... "قطع عليها صوت جوالها الي يرن شافت الاسم وقامت تركض فوق لغرفتها " هادي وهو يأشر على الدرج وهو يناظر اهله : وش فيها ذي المهبوله حسن : ها انت قلتها مهبوله يلا سلام انا بركب انام انتهيت هادي : وانا بطلع الشباب بيمرون علي بعد شوي علياء : استأذنت ؟ هادي : اي قلت الى ابوي قبل الغدا خمس دقايق ورن جوال هادي وطلع لأخوياه اما فوق عند ليان كان داق عليها خالد ليان : هلا والله ومسهلا ... هلا باللي لفاني ي هلا به وعدد دقات قلبي في غيابه خالد : ي قدمك ي شيخه ليان : كيفني بس وانا رومنسيه خالد : هههههه ع هالكلمتين صرتي رومنسيه ليان : اي هذي الرومنسيه القوليه وش عرفك انت بالرومنسيه وبهالشغلات خالد : الا انا ما ابي هالرومنسيه القوليه على قولتك ما تعجبني انا ابي الرمنسيه الفعليه ليان : تحلم ي حبيبي تحلم ههههههههههههههه انا بالرومنسيه القوليه ومدوختك اجل لو بالفعليه خالد : اموت ههههههههههه ليان : بسم الله عليك ... اي صح وش محضر لي لبكرى خالد : وش فيه بكرى؟ ليان : لا تقول نسيت؟ خالد : نسيت وشو ليان : عيد ميلادي عيد ميلادي خالد ضرب يده على جبهته : يوه تصدقين نسيت ليان : لا يازمن همهمهمهمممممم ... مالت عليك عيد ميلادي انا تنساه خالد انفجر ضحك : امزح معك مانسيت ابي اشوف ردة فعلك ليان : اي اي اكذب علي عشان ترضيني خالد : والله ماكذب خلصت تجهيز المفاجأه تو وعشان كذا دقيت عليك وصار لي اسبوع اجهزها ليان بصراخ وحماس : ي عُومريييييييي خالد ضحك : طيب هدي هدي ... اسمعي بكرى اختي بتكلمك وبتمر عليك تاخذك لمكان المفاجأه احفظي رقمها من هالحين عشان لا تجيبين العيد بكرى مع اخوانك ليان شهقت بقوه : هاااااا اختك تدري؟؟ خالد : ي حبيبتي اختي تعرف من اول مكالمه بيننا ما اخبي عنها شي وطول هالثلاث سنوات وهي متحمسه تبي تشوفك بس انا م ارضى لأنك ماتعرفين انها تعرف عن علاقتنا ليان : ي الخاين " غطت وجهها بيدينها " ي الفشله وش اسوي الحين انا وين اودي وجهي عنها خالد : ماعليك ماعليك تراها فلاويه وهذا هي جنبي تسمع المكالمه حاط سبيكر بس انا حاط يدي على فمها عشان ماتتكلم ليان شهقت شهقه قويه لدرجة حست ان نفسها انقطع خالد مات عليها من الضحك : بشويش على نفسك ي الخبله ليان : بلا كذب ترى كاشفه حركاتك ماتمشي علي خالد : طيب ليه الشهقه الكبيره طالعه ليان تسلك لنفسها لأنها اول شي صدقته بعدين تذكرت حركاته : امشيها عليك اني صدقتك شوي وجاها صوت انثوي يصرخ : واخيراً سمعت صوتك ليان تفشلت وسكرت في وجهه : فشله فشله فشله حسبي الله عليك ي خلود شوي ورن جوالها ورفعت وهي ساكته خالد : الو ليون ليان : ...... خالد : ليان ليان الوووووووو ليان : ......... خالد ضحك : ترى طردتها خلاص ليان ماصدقته : احلف خالد : والله ليان : طيب؟ خالد : خذي رقمها عشان بكرى اذا دقت عليك واذا سألوك اهلك قولي لهم صديقتي ماره علي بنروح بيت صديقتنا ودبري عمرك بمروج وفهميها السالفه لا تنكبنا ليان : طيب خالد : يلا فأمان الله اشوفك... " وسكت كان بيقولها اشوفك بكرى لكن لو درت بالي بيسويه ماقبلت بالمفاجأه " ليان : مع السلامه ليان كانت تتكلم كلمتين بس عشان اذا كانت اخته جنبه واخذت نفس ونزلت تجلس مع امها اليوم الثاني الساعه 4:15 اندق جرس بيت عبدالله نزلت ليان من الدرج تركض وهي متكشخه على الآخر بتفتح الباب ام حسن : بشويش انزلي بشويش لا تطيحين ليان راحت فتحت الباب ودخلت غزلان ليان وهي مستحيه : تفضلي غزلان : لا وش اتفقنا فيه ليان : على الاقل على ما البس اجلسي مع امي بالصاله اخواني مو فيه وابوي نايم غزلان : بصراحه ماتوقعتك بهالجمال ... مو منا للطاقه اخوي متخبل فيك " وغمزت لها " << طبعاً هي تمزح تدري ان ليان وخالد ماشافوا بعض بالرغم من انهم صار لهم سنتين يكلمون بعض وبيكملون الثالثه ليان استحت : تفضلي دخلوا ليان وغزلان ليان لأمها : يمه هذي صديقتي علياء عاقده حواجبها ومستغربه اول مره تشوفها : هلا هلا حياك الا وش اسمها ليان : غزلان وسلمت عليها علياء : اول مره اشوفك واسمك شوي صاير غريب علي ذاكرتي الظاهر خانتني غزلان : لا ماخانتك احنا ماصار لنا شي من تعرفنا على بعض علياء : حياك حبيبتي حياك ليان : يمه انا بركب بلبس عباتي علياء : ليه وين بتروحين ليان : بروح بيت صديقتي... يمه وش فيك نسيتي امس قايله لك علياء : اي صح نسيت ... ما اشوف مروج مابتروح معكم؟؟ ليان توهقت : الا يمه هي سبقتنا علياء : كان رحتو مع بعض احسن لك ولغزلان طاقه مشوار عشان تمر عليك غزلان : لا عادي خالتي اصلا اخوي فاضي ماعنده شي يشغل روحه شوي بمشاويري << وطبعاً هذي كانت كذبه لان اخوها الي وصلها متزوج ركبت ليان تلبس عبايتها وهي حاطه يدها ع قلبها علياء : الا يمه انتي قد ليان ؟ غزلان : لا انا اكبر منها بسنه ادرس بالجامعه علياء على ملامحها علامات الاستنكار : اي الله يوفقك غزلان حست ان علياء مستنكره كيف هي اكبر من ليان وتدرس بالجامعه وتصير صديقتها يعني كيف تعرفت عليها : تعرفنا على بعض بالببي وحبينا نقابل بعض اول مره هذي نشوف بعض علياء : اي الله يدوم صداقتكم عزلان ابتسمت : آمين نزلت ليان وقامت غزلان : يلا خالتي مع السلامه علياء وقفت : وين ماضيفناك غزلان : اخوي برى ينتظر مره ثانيه ان شاء الله لما طلعوا من الصاله ليان التفتت على غزلان : خالد الي بيوصلنا؟ غزلان : لا غسان ليان ارتاحت : اها وراحوا على بيت ابو غسان او بالاصح ( قصر ) نزلوا وكان البيت فاضي دخلو من الباب الجانبي وكان فيه على اليمين مدخل فيه ستاره هالمدخل يوصل لغرفه وحمامات ومغاسل وقالت لها غزلان تفصخ عبايتها لان البيت فاضي وتدخل الغرفه وهي بتركب شوي وبتجي دخلت ليان الغرفه وماتشوف الا احد ناقز من الزاويه انتهى | ||||
|
| |
|
01-09-17, 12:48 PM
| #6 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الفصل الرابع دخلت ليان الغرفه وماتشوف الا احد ناقز من الزاويه بين الكنبتين : سبرااااااايز ليان على طولت غطت نفسها بالعبايه وهي تصرخ : هي ماتستحي على وجهك اطلع برى ماتشوف في بنت هنا الولد خاق : ها لا بس كنت افكرك غزلان " وطلع وهو رايح فيها " ليان كانت لابسه فستان يوصل لنص الركبه عند الصدر مليان كله كرستال بدون اكمام نوعه صدري ومن تحت الحوض منفوش وشيفون ولونه وردي فاتح زاهي ومفيره اطراف شعرها الي يوصل لأردافها وصابغته بني وحاطه مكياج خفيف مسكره وكحل جاف وروج وبلاشر بس وكانت مزززززه وطبعا لما طلع الولد استوعبت انه خالد عرفته من صوته لأنها ولا مره شافته وكل ما قالت له ارسل صورتك ودي اشوفك قال لها اخليها مفاجأه بيوم من الايام وتحسفت انها ما دققت فيه وتسبه في نفسها لأنه مو راضي يرحم حالها وتشوف صورته شوي ونزلت غزلان ودخلت لها وسحبتها لفوق وقالت لها ان مافي احد توه خالد طالع وامها وابوها مو موجودين واخوها الكبير في يبته بعد سحبتها لداخل جناح ومن اول مادخلت كان ظلمه وفجأه شافت الورد الوردي والاحمر والابيض يتناثر عليها من فوق وينزل اوراق الزينه وتسمع اغنيه بأسمها واسم خالد وكأنها زفه وفي ورد منثور زي الممر وشموع وصلها لطاوله كبيره مره مره مره وكان مصفوفه فيها اكثر من 15 علبه مغلفه وسته اكياس مختلفين في الاحجام وباقتين ورد وكانت الارض ماتبان من البالونات الي فيها كلها بالونات وورد مجفف من ورد طبيعي وفي ريحة الفراوله على زهور وبالونات هيليوم بأسمها حرف حرف وفي كيكه صغيره مكتوب كل عام وانتي حلوتي وجميلتي ونبضي ♥♥ وفي تحت الكيكه ورقه صغيره مكتوب فيها : كل عام وانتي لقلبي اقرب ... ان شاء الله الاحتفال الجاي ولدنا بوسطنا وتكونين آنسة هالبيت ي بعدهم ♥♥ ليان خلاص خنقتها العبره ونزلت دموعها من الفرحه شوي وانتبهت ان غزلان مب موجوده وحست بباب ينفتح وطلع منها خالد وهو لابس قميص سماوي والكم يوصل للكوع وبنطلون ابيض ومرتب شعره وكان مز بمعنى الكلمه خالد خلاص منهبل على ليان : ها وش رايك بالمفاجأه عساها اعجبتك بس ؟ ليان لا شعورياً راحت حضنت خالد وبكت بقوه : شكراً والله مو قادره اعبر وكيف اتكلم ووش اقول اقسم بالله شي فوق الخيال شي ماتوقعته خالد جلس يمسح على شعرها ويضحك : الحين ليش تبكين فهميني ليان ضحكت : مدري متأثره بس ماتوقعت كل هذا تسويه عشاني خالد : مو بس هذا سويت اشياء اكثر بعد ماشفتيها تعالي معي اوريك ياها سحبها خالد ودخلها غرفه كبيره وكان فيها سرير نفرين وكانت الغرفه جدا كلاسيكيه وناعمه والي مفخمها المفرش ولون الغرفه ( رمادي فاتح ) وكانت الغرفه روعه ... ليان كانت تتأمل الغرفه بصمت ومو فاهمه شي وسحبها لغرفه ثانيه وكان فيها كنب ابيض ناعم وفي طاوله كبيره بالوسط فيها شموع وكذا ولون الغرفه جدار سكري والباقي ابيض ودخلها لغرفه ثانيه لونها وردي هادي وفيها اسرة اطفال كبار وغرفة متكامله من دولاب وكومدينه والطاوله الي بجنب السريرين ودخلها لغرفه ثانيه لونها ازرق هادي جدار ازرق والباقي ابيض وفيها اسرة اطفال كبار ومثل الغرفه الورديه وراحو للمطبخ وكان نظامه امريكي وناعم وكانت ليان طول الوقت ساكته ومافتحت فمها وبعد ما طلعوا من المطبخ خالد : ها وش رايك بالشقه ؟ ليان ناظرته وسكتت مو فاهمه شي خالد : هذي ان شاء الله بتكون شقتنا اثثتها من الحين عشان من اول ما تتخرجين بخطبك وبعد شهر الزواج مافي اي تفاهم الشقه وجاهزه اما جهازك تلحقين تاخذينه بشهر واذا ماقدرتي تكملينه في شهر العسل وش رايك ؟ ليان سكتت من الصدمه ماعرفت وش ترد خالد : باقي ااثث الصاله بس عشان الحفله والحوسه الي سويتها اليوم ما اثثتها وبعد ماتتخرجين على طول اخطبك والزواج يكون بعد شهر الشقه وجاهزه ويمديك تخلصين جهازك في شهر واذا ما امداك تكملينه في شهر العسل وش رايك ؟ ليان تمت ساكته ودقت على ميكروا وجا اخذها وولا فتحت فمها بشي و راحت بدون ماتاخذ ولا حاجه من الي جابه لها خالد وعلى طول ركبت الغرفه ولا تكلمت مع اهلها وبعد المغرب جت لها امها تقولها تنزل تتعشى قالت ماتبي وامها استغربت لانها من رجعت وهي حالتها مو طبيعيه ما تكلمت وبعد العشى امها دقت على مروج وقالت لها تجي لليان ومروج على طول لبست عباتها وجت لها مروج : افففففف ليون يعني مو ناويه تتكلمين ؟ صار لي ساعه عندك وماقلتي لي شي ليان : .......... مروج : طيب وش صار على مفاجأة خالد ليان نزلت دموعها مروج قربت منها وهي خايفه عليها : ليون حياتي وش فيك " بفجعه " لمسك ؟؟ ليان وهي تمسح دموعها : لا مروج : اجل وش فيك ؟ ليان : توقعي وش سوى لي بهالمفاجأه ؟ مروج : مدري والله مايجي على بالي شي ليان : تخيلي في البدايه جلستني اخته في مجلس الحريم ولما فصخت عباتي ما اشوف الا واحد ناقز لي من الزاويه ويصرخ سوبرايز مروج : هههههههههههههههههههه احلفي ؟ طيب منهو لا تقولين انه خالد ليان : انا اول شي ماعرفته لكن بعد ماطلع اكتشفت انه هو عرفته من صوته وتحسفت اني ما تمقلت فيه مروج : ايوه ؟ وقالت لها ليان كل شي مروج : طيب ليه مارديتي وليش طلعتي من بيتهم ليان : مدري بالكلام الي قاله لي حسيت بالذنب مروج : حسيتي بالذنب من ايش ؟ ليان : مدري يمكن لأن خنت ثقة اهلي فيني وعصيت ربي وكذا بس قسم بالله لما حضنته كانت لا ارادياً من الصدمه والمفاجأه بس مروج : طيب كان شرحتي له ب الي حسيتي فيه ماخليتيه كذا ... بصراحه لو انا بدالك كان ماطلعت الا بالهدايا يحصل لي واقول لا ؟؟ ههههههههههههههه ليان : اصلا لو جبتهم اهلي بيشكون ان كل هذا من صديقاتي مروج : طيب يعني خسرتي الولد على الفاضي ولا هديه اخذتيها منه ليان : عادي ماهمني بس انبني ضميري من الي اسويه مروج : احسن وبعدين انا لازم اروح البيت الحين تأخرت يلا باي اشوفك بكرى ليان : باي لما طلعت مروج طفت ليان النور ونامت وتركت جوالها مغلق يوم ثاني جلست ليان الظهر طبعا ما داومت قالت لأمها انها تعبانه بس امها سكتت ماحبت تضغط عليها ولا تسأل ليش ماتكلمت معها امس والعصر جت غزلان وعندها سبعه اكياس كبار مره مره مره وسته اكياس مختلفين الاحجام طبعا هذول هداياها من عند خالد جابتهم لها غزلان وقالت لعلياء انهم هدايا ليان من عند صديقاتها وصديقات غزلان وانها من الصدمه والمفاجأه رجعت البيت بدون ماتاخذ ولا هديه ورقعت لها كم حاجه وطبعاً الكيكه غزلان مسحت الكلام الي فيها بسكين عشان اهل ليان لا يشكون وليان كانت فوق وولا درت عنها ولما نزلت تفاجأت بالاكياس الموجودين وضلوا اهلها يطقطقون عليها انها هربت على قولتهم من الهدايا وانها خبله شوي ودق عليها خالد ركبت غرفتها وكلمته خالد : هلا والله ي عمري ماتوقعت تكون ردة فعلك كذا ليان : .......... خالد : وش فيك ليونتي سكتي ... طيب ليه كانت ردة فعلك كذا ؟ ليان بألم : خالد انا حسيت بتأنيب الضمير خالد عقد حواجبه : على وشو ليان : على كل شي على مكالماتنا وعلى الي سويته في بيتكم ( قصدها انها حضنته ومسكت يده وجلست قدامه بدون عباه ) وعلى الهدايا الي جبتها لي بأي حق آخذها منك ؟ خالد : طيب بس انا بكون زوجك يعني عادي ليان بصوت حاد : لا مو عادي اذا صرت زوجي عادي لين الملكه اقعد قدامك كذا واقبل هداياك اما قبل مستحيل انا صراحه ندمانه وما اقدر اكلمك خالد : ليه طيب خلاص ماباشوفك بس الا المكالمات ليان : لا خالد : طيب على الواتس البي بي ليان : ولا الواتس ولا البي بي سكتوا اثنينهم شوي وليان قطعت الصمت : آسفه لازم اسكر سكرت ليان وانفجرت بالبكي ونامت من كثر البكي انتهى | ||||
|
| |
|
01-09-17, 12:50 PM
| #7 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الفصل الخامس سكر خالد والدمعه على طرف عينه بس مسكها وحاول يتصبر ونزل كلم امه : ابي صديقة غزلان اخطبيها لي ام خالد رفعت حواجبها : الحين ؟؟ خالد : لا هي مو بالجامعه بالثانويه عشان كذا اول ما تتخرج ابيك تخطبينها لي ام خالد : من بنته ؟ خالد : اسمها ليان عبدالله حسن ال.......... ام خالد : لا زين العائله معروفه ببناتها الحلوين ... بس عساها تكون حلوه ... اذا هي بنت ال.......... فأعبترها زوجتك خالد ابتسم بألم حاس ان فرحته ناقصه لا وفوقها رد امه الي قهره بس ماحب يتجادل معها قام خالد وركب غرفته وانسدح وهو يفكر ( في يوم تخرجها بخطبها عشان ماتروح علي وتكون لي بأقرب وقت يارب يوافقون اهلها ي رب ) جلس يفكر ويفكر ويخطط لمستقبله مع ليان ودخلت عليه غزلان وشافته مهموم غزلان : سلام خالد لف لها : وعليكم ... ليش تدخلين بدون ماتطقين الباب ؟ غزلان : طقيت لين تعبت بس انت ما سمعتني ودخلت اشوفك ... وش فيك ؟ خالد تنهد : مافيني شي غزلان : الا فيك وتنهيدتك تشهد خالد بضيقه والم : خلاص غزلان مافيني شي غزلان : الا فيك يلا تكلم بسرعه وش فيك ؟ خالد لف لغزلان ونزلت دمعته صد ومسحها وغزلان متفاجأه ليش يبكي غزلان : خالد وش فيك ؟ ليه تبكي ؟ خالد ماتحمل وحضن اخته وبدت تنزل دموعه بصمت : تركتني ماتبي تكلمني غزلان عقدت حواجبها بأستنكار وهي متألمه لأخوها اول مره تشوفه يبكي : مين ؟ ليان ؟ خالد بصوت مخنوق : قالت لي انها ندمانه انها طلعت قدامي بدون حجاب قلت لها طيب مابشوفك بس اسمع صوتك مكالمات بس قالت لا قلت لها طيب محادثات واتس اب او بيبي قالت ماتبي وما بتكلمني الا بعد الملكه يعني حتى لو خطبتها ما بتقبل تكلمني ... غزلان انا م اقدر اعيش بدونها والله ماقدر هي صارت لي الهوا الي اتنفسه ماقدر اعيش بدونها غزلان : طيب احسن زين ماسوت الي تسوونه تراه حرام والله مايرضى فيه اخطبها واملك عليها وخذ راحتك معها خالد : انا ودي اليوم قبل بكرى اخطبها بس هي بعد ثلاث اسابيع امتحاناتها وهذي آخر سنه لها مابي فكرها يتجه لغير الامتحانات مابي اشغلها ... بخطبها بآخر يوم امتحانات عشان محد ياخذها مني غزلان : طيب هذا انت قلتها بتخطبها وانت ضامن موافقتها ليه الحين انت جالس تبكي خالد بعد عنها وصد مسح دموعه وناظرها : بس انا م اقدر اصبر اكثر من شهر ما اسمع صوتها ما اشوف رسايلها البلسم على قلبي اذا انا خطبتها بعد الامتحانات م بيردون علينا الا بعد اسبوع واذا حللنا مابيطلعون التحاليل الا بعد اسبوع وما بنملك الا بعد اسبوعين عشان يمديها تجهز وانا وش يصبرني صارت شهر وثلاث اسابيع كيف بصبر قولي لي كيف ؟ غزلان سكتت خالد : انا بنام تصبحين على خير غزلان قامت من سريره : وانت من اهله وطفت النور وسكرت الباب وراها وتنهدت وهمست : الله يعينك ي خوي الساعه ٤٥ : ١٢ م بعد يومين من مكالمة ليان لخالد كان يوم الاثنين وساحبه على المدرسه لأن مابقى شي على الامتحانات وخلصوا المناهج نزلت ليان الصاله ماشافت احد وراحت المطبخ بتشرب ماء وشافت امها تسوي الغدا سلمت عليها وباست راسها علياء : ترى ميسان جايه تتغدا معنا اليوم ليان : غريبه توي البارحه اسولف معها على الواتس ماقالت لي انها بتجي علياء : يمكن توها تفكر تجي تعرفين اختك ام دقات ليان : اي والله ... وحشوني ولود وفروس متى تجي بس علياء : تلاقينها على وصول سكتوا شوي وتكلمت علياء علياء بحنيه : وش فيك يمه حاستك بهاليومين دابله و متضايقه ومو على بعضك فيك شي ؟؟ ليان تغبنت حاسه بفراغ كبير بدون خالد ومشتاقه له كثير تعودت انها كل يوم تكلمه وبكل حزه صار فمها يرجف بعلامة البكاء م ردت بس هزت راسها بمعنى مافيني شي لان اذا فتحت فمها بتبكي علياء : وش فيك بتبكين ؟؟ اعتبريني صديقتك واحكي لي وش فيك ؟؟ فيك شي اكيد ليان ماتحملت وحضنت امها وانفجرت بكي وجلست تشاهق مشتاقه له كثير كثير وتحس انها بتموت اذا صبرت اكثر مو قادره ودها تكلمه ودها تسمع صوته بس خايفه من ربها اغضبت ربها ثلاث سنين وتو تستوعب الغلط والحرام الي هي ارتكبته وامها خايفه عليها ماتدري وش فيها علياء : وش فيك ي يمه ... ليه تبكين ؟ والله خوفتيني عليك ليان هزت راسها وتكلمت بصوت مبحوح من بين شهقاتها : م فيني شي امها م حبت تضغط عليها يمكن متضايقه من شي ماتقدر تقوله لها ومسحت دموع بنتها وقالت لها : يلا حبيبتي اغسلي وجهك وصلي على محمد وهدي مايصير الا الخير يلا حبيبتي ليان بدت تهدا هزت راسها وركبت غرفتها بعد عشر دقايق دق الجرس ونزلت ليان تركض وهي مبتسمه تحاول تلهي نفسها وتنسى خالد ... فتحت الباب ودخلت ميسان وهي حامله فارس سلمت عليها وهي تقول لها : زوجي " يعني ان زوجها وراها بيدخل " اخذت ليان فارس وراحت للغرفه الي تحت ركض وهي عندها فارس وهو يضحك دخلت وحضنته وجلست تبوس فيه : حياتي قلبي عمري آكلك انا ولا آكلك ... "وهي تسوي نفسها تعضه باطراف شفتها " آكلك ولا آكلك وفارس ميت ضحك وليان ضحكت من ضحكه : عمري " رفعت يدها بوجهه " كفك !! رفع يده وسوى لها كفك وحضنته ليان بقوه وهي تصارخ : حياتيييييييييه ... يلا نروح للديده لبست جلال ومسكت يده بتروح للمطبخ مرت من الصاله وكان جالس فيها طارق ( زوج اختها ) : كيفك طارق طارق رفع راسه : هلا والله ليون تمام انتي اخبارك ليان تنهدت : الحمدلله " انتبهت لوليد الي جالس جنب ابوه وشهقت " هاااااا ولود ي الي م تستحي تشوف خالتك ولا تجي تسلم !! طارق دق جنب وليد : قم سلم على خالتك ي ولد قام وليد وسلم على ليان وليان ضربت خده بخفيف : يعني لو ما اقول لك تعال سلم ماتجي ها ؟ وليد ضحك ببراءه : ههههههههه ليان : مالت عليك هذا الي فالح فيه تضحك وراحت المطبخ وهي ماسكه يد فارس وجلست تسولف مع امها واختها لين استوى الغدا وحطو الغدا وجلسوا الرجال يتغدون في المجلس والحريم في الصاله انتهى | ||||
|
| |
|
01-09-17, 12:51 PM
| #8 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الفصل السادس ليان وميسان وامهم جالسين يتغدون وهم يسولفون ميسان وهي جالسه تأكل فارس بأسى : يمه علياء : نعم ميسان بضيقه وخوف : يمه الدوره للحين ماجتني مأخرتني اسبوع وهي تجيني نهاية الشهر وبيطلع الشهر وللحين ماجتني ليان : احسن افتكيتي منها ميسان : وش افتكيت منها انتي بعد ... انا خايفه احمل وهذي تقول افتكيتي منها ليان تمد يدها اليسار تسلم على اختها لان يدها اليمين وسخه تاكل فيها : مبروك حامل مسيان : فال الله ولا فالك ... اسم الله علي فارس توه صغير علياء : حسبتينها صح ؟ يمكن حسبتك غلط ميسان : لا يمه صح والله خايفه احمل فروس بعده صغير علياء : وش صغير لا خلاص انتي احسبيها لو فرضنا انك حامل في الشهر الاول اذا ولدتي كم بيكون عمره ؟ سنتين وست اشهر زين عمره بيكون كم تبين تجيبي ؟ اذا صار عمره ثلاث ؟ يمكن ربك كاتب لك ... توكلي على الله واخذي جهاز تحليل حمل وشوفي ليان وهي تهز : الله بيجينا بيبي ... فارس الماما فيها بيبي بتجيب لك اخو فارس هز راسه وهو معصب وحضن امه : لا ميسان وهي معصبه ومتوتره : انتي بتسكتين ولا هالليمونه على عينك ليان : خلاص خلاص حشى ميسان وهي منسده نفسها وجالسه تأكل فارس ورى بعض وهو مو ملحق علياء : قلتي لطارق ليان : بس خلاص بشويش على ولدك بيغص لا تحطين حرتك فيه ترى ماله شغل منك انتي وزوجك والله ميسان : انتي جب " لفت لأمها " اي قلت له علياء : وش قال ؟ ميسان بأسى : جلس يضحك ومبسوط يقول ان شاء الله بنت ... اقول له فارس توه صغير وهو يقول لي بكل برود وهو يضحك اذا جبتي على راسه بيكبر ... كان ودي بذيك الساعه آخذه واطق راسه بالجدار من القهر احر ماعندي ابرد ماعنده هالرجال ليان ماتت من الضحك : ههههههههههههههههههههههههه ههههههههههههههههههههه يبي بنت الرجال جيبي له ليش لا ميسان : يمه امسكيها لا اقوم وافرك فيها الارض ليان : ههههههههههههه لا خلاص حامل والدليل من جيتي وانتي نفسك في خشمك ميسان قمطت وتغبنت : تصدقون قالها لي طارق يقول لي شكلك حامل كله معصبه ومالك خلق وكل شوي تصرخين على عيالك شكلك حامل لا محال ليان ماتت ضحك ومو قادره تتكلم من الضحك : هههههههههههه ي هههههههه ي ي ههههههههههههه ي ربي ي برود زوجك مو طبيعي هههههههههههههه الله يرزقني واحد ببروده ميسان : اي ان شاء الله عشان يرفع ضغطك ليان : احسن حاقه " وهي تسوي كذا 👌 " وبعدين عادي متعوده من زوجك يعني بيكون عادي عندي اذا كان زوجي كذا ههههههههه ميسان : خبله شوي وجابو حسن وهادي سفرتهم وشالو الحريم سفرتهم وغسلو المواعين وسووا الشاهي وطلعوا برى يجلسون طارق : الا ليان انتي بأي صف الحين ؟ ليان : ثالث طارق بإستهبال بس يتكلم بجديه : متوسط ؟ ماشاء الله والله كبرتي ليان : هاهاهاها م يضحك للأسف ... وبعدين لما خطبت ميسان من خمس سنوات كنت بمتوسط طايحه من عينك يعني ؟؟ فاكرني كل سنه ارسب ؟؟ طارق رفع كتوفه ويدينه : انا ماقلت كذا ليان : صراحه ي طارق انا ابي هدية تخرجي منك من الحين طارق : حاظر على هالخشم وش تبين ؟ " طبعاً طارق ماعنده خوات عشان كذا يعامل ليان كأنها اخته ومن يعرف انها نفسها في شي يجيبه لها ولما خطب ميسان كان كل يقول ما اتخيلك ي ليان تتغطين انتي اعتبرك اختي لو تغطيتي مابصير معك كذا بستحي فصارت ماتتغطى منه " عبدالله بنبره تخوف : عيب ي بنت علياء خزت ليان وليان خافت وطارق انتبه لنظرة امها ونبرة عبدالله وحب يخفف عنها الاحراج : وش فيكم عمي وعمتي تراي مو غريب وانا احب تكون علاقتها بي كذا ما ابيها تستحي مني ابي احس انها اختي دام م عندي خوات ميسان : شدعوه يبه عادي وش فيها زوج اختها مو غريب علياء : ولو عيب تطلب منك طارق : افا دامكم تعتبروني غريب خلاص مانجيب لها شي ليان استحت ودخلت داخل احرجت نفسها بطلبها واحرجت امها وابوها معها طارق بجديه : عمي عمتي انا احب اشتري لها اي شي تبيه وتطلبه مثل اخوها اذا هي عندها اخوان يجيبون لها الي تبيه انا م عندي خوات اجيب لهم الي يبون ابي البي طلباتها حالنا حال اي اخت مع اخوها ... وبعدين انتوا ماعرفتوني ؟ صار لي خمس سنوات كذا اي شي بخاطرها شريته لها ولو عندي اخت ماسويت لليان كذا بس م عندي ابي اعوض علياء وعبدالله سكتو حسو انه جد يحب يكون دور الاخ لليان وهو من اول ماخطب ميسان وهو كذا معها بعد المغرب مشى طارق وظلت ميسان وعيالها وجلسوا يسولفون ويضحكون وتناست ليان خالد وتعشوا وشاهدوا فلم وجا طارق اخذ ميسان وعياله وركبت ليان انسدحت بتنام وظلت تفكر في خالد حوالي ساعه وشوي لين غفت ونامت يوم الثلثاء دخلت ليان البيت بعد مارجعت من المدرسه وكان باب الشارع مفتوح فدخلت ومادقت الجرس مرت من مجلس الحريم بتدخل تسلم على امها بس سمعت امها تكلم احد وتفاجأت انها تكلم ابوها ... غريبه ابوها راجع بدري شدها الفضول وظلت تتسمع عبدالله : وتبيني اوافق على تعاسة بنتي على حساب الصلح بينكم ؟ علياء : وليش تصير تعيسه ؟ عبدالله : انا اعرف اخوك عدل اكيد هو جابر الولد والولد مايبي علياء : لا حبيبي سعود من وهو صغير محد يجبره على شي فما بالك وهو كبير وانا اكيد قبل م اوافق بكلمه اعرف منه اذا هو مجبور ولا لا عبدالله : انسي الموضوع خلاص انا مو موافق علياء : لا حبيبي انا م اخترتك ودست على اهلي وخليتهم يزعلون مني خمسه وعشرين سنه ولا يكلموني عشانك ولما جت الفرصه لين عندي اضيعها ... خلاص انا صبرت بما فيه الكفايه الا اهلي الاهل مايتعوضون عبدالله : يعني سعادة بنتك تتعوض ؟؟ علياء : اي تتعوض بتزعل وبتحزن يوم يومين ؟؟ وبعدين بترضى وبتدعي لنا ان احنا اجبرناها تتزوجه عبدالله وكأنه بدا يقتنع خصوصاً زوجته اختارته على اهلها وانحرمت منهم خمسه وعشرين سنه ومايبي يكسر بخاطرها وهي فرحانه انها بترجع مع اخوانها مثل قبل مايخطبها عبدالله : الله يكتب الي فيه الخير ليان سمعت لهنا وفهمت السالفه وبدت دموعها تنزل ماتتخيل نفسها لواحد غيره ... واكيد الي خاطبها يا ولد خالتها يا ولد خالها الي عمرها ماشافتهم اصلا ركبت غرفتها تركض وقفلت الباب وانهارت بالبكي وماحست بروحها الا وهي داقه على خالد وخالد اول ماشاف اسمها رد مثل الملهوف خالد : ليان حبيبتي كيفك ؟ والله اشتقت لك ليان وهي منهاره وتبكي بقوه وتشاهق : خالد خالد خاف وحس قلبه بيوقف : وش فيك لينا ؟( دلعها اذا كانت زعلانه ) ليان وهي تبكي بأقوى ماعندها : خالد بيزوجوني خالد حس خلاص نفسه انقطع وسكت لثواني وهو ماهو مستوعب : كيف ؟؟ كيف يعني بيزوجوك ؟ ليان تبكي بكى يقطع القلب : خالد بيغصبوني تو سمعتهم يقولون بيغصبوني اتزوجه خالد : مين الي خاطبك ؟ ليان : مدري ولد خالتي ولا خالي اصلاً انا ماعرفهم ما اعرف خالي ولا خالتي ولا اولادهم عمري ماشفتهم اهئ اهئ خالد وهو يعرف سبب الخلاف قالت له ليان من قبل بلع ريقه بألم : ووش طرى لهم هاللحين ؟ ليان : مدري يقولون عشان يرجعون مثل قبل ماتتزوج امي ويكونون راضين عنها وترجع علاقتهم طبيعيه اهئ خالد بألم : ليان بتوافقين ؟ ليان عصبت وهي تبكي : اهئ اهئ اقولك بيغصبوني تعرف وش معنى بيغصبوني ؟ خالد : بتتحملين تعيشين من دوني ؟! خالد : ببتحملين تعيشين من دوني ؟ ليان عصبت اكثر : خالد لا تزيدها علي ترى والله مب قادره حتى اتخيل اني اكون مع احد غيرك والله ماقدر اهئ اهئ خالد انا مدري وش ممكن يصير اذا تزوجته احس بيكون يوم موتي خالد : بحاول اجي هاليومين اخطبك ليان جلست تصرخ : خالد اقولك بيغصبوني هي مب سالفة انهم يبون يزوجوني سالفة ان امي تبي ترجع علاقتها مع اهلها وهم ماراح يرجعون مثل قبل الا لما اتزوجه خالد وهي تنزل دموعه : الله يوفقك ويهنيك واوعديني ان " حس بغصه في حلقه مب قادر يكمل بلع ريقه وكمل ودموعه انهار على خده " اوعديني يكون اول عيالك سميي ليان ماتحملت وزادت في البكى وسكرت وحست روحها بتطلع من كثر البكي والالم وظلت حابسه روحها طول اليوم واهلها يسألونها وش فيك وهي ماترد حتى امها وابوها شكو انها عرفت بس سألوها سمعتي شي زعلك ؟! ومثلت عليهم ان وش يقصدون تسمع وشو فارتاحوا انها لسى م عرفت انتهى | ||||
|
| |
|
01-09-17, 12:52 PM
| #9 | ||||
| مراقبة عامة ومشرفة منتدى الروايات المنقولة وعضو فريق التصميم و كاتبة في قلوب أحلام
| الفصل السابع خالد بعد ماسكر من ليان جلس يبكي مثل الطفل ... خلاص الي يتمناها زوجته وام عياله مستحيل تكون له الي كانت اكسجينه اخذوها منه وصار ميت الي كانت سعادته اخذوها وصار تعيس يائس من الحياه ... حبها قبل مايشوفها قبل مايشوف ملامحها حبها وهو مايدري كيف هي كيف هيئتها ... مايدري طويله ولا قصيره متينه ولا ضعيفه حلوه ولا شينه عيونها صغار ولا كبار شعرها طويل ولا قصير ... حبها لشخصها مو لشكلها ... ثلاث سنوات يكلمها ولا شافها بس مع ذلك حبها وعشقها ... ومن شافها حبها اكثر ولو كانت شينه بيظل متمسك فيها لانه حب شخصيتها حب اخلاقها واذا شافها وكانت شينه يتخلى عنها لأنها شينه ؟؟ لا طبعاً بيظل متمسك فيها لأخر نفس ... بس كانت حلوه وطيرت عقله اكثر من ماهو طاير ... جلس وهو منهار يبكي بقوه خلاص حبيبته راحت اخذوها منه ومايقدر يسوي شي غزلان كانت ماره من غرفته وسمعت صوته وهو يبكي خافت ودخلت عليه وشافته منهار ويبكي بأقوى ماعنده عمرها ماشافت اخوها بهالشكل حتى بوفاة جدها الي كان اكثر شخص متعلق فيه وعلى طول معاه ويحبه مره ماكان كذا ... قربت منه وهي خايفه وهمست : خالد خالد ماسمعها وعلت صوتها شوي : خالد خالد رفع راسه وما ان شافها قام وحضنها بقوه وجلس يبكي بقوه وبكي الرجال يبكي الصخر وجلس يردد : راحت راحت اخذوها مني حرموني منها ماعاد اكلمها ماعاد اشوفها ماعاد اسمع صوتها غزلان خافت : خالد وش صاير لا تخوفني وش فيها ليان ؟ خالد : بيزوجونها غزلان صرخت بصدمه : ايش ؟ وبتوافق عليه ان شاء الله ؟ خالد : بيغصبونها غزلان : وانت كيف عرفت ؟ كلمتك ؟ خالد : اي غزلان : طيب انت هدي ترى والله انكسر اذا شفتك كذا خالد وهو لسى يبكي : ليان بيزوجونها اخذها مني بتكون ملك غيري كيف تبيني اهدا غزلان : طيب اكيد اذا هي تفاهمت مع اهلها مابيغصبونها خالد هز راسه : السالفه كبيره وبتكون في مصلحة اهلها كلهم يعني ماراح يرفضونه غزلان بصدمه اكبر وهي فكرها راح بعيد : يبيعون بنتهم عشان فلوس ؟؟ خالد : لا اهلها مب كذا ما يركضون ورى الفلوس بس السالفه اكبر من كذا وطويله ... خلاص غزلان لا تسألين ترى والله مب ناقصك غزلان : طيب انا بروح احاول في اهلها خالد : انتي لا تتدخلين وبعدين اهلها مستحيل يغيرون رايهم وهم اصلاً للحين ماقالوا لها بس سمعتهم وهم يتكلمون غزلان : انت متأكد انهم ماراح يغيرون رايهم خالد : مليون بالميه غزلان : طيب خلاص انسى يمكن هي مب من نصيبك وربي مايسوي شي لانسان الا يكون خير ولمصلحته خالد بدا يهدا وحس انه يبكي لسبب تافه هي صح بتتزوج غيره لكن الحمدلله انها عايشه حيه ترزق والدنيا ماتوقف على شخص والدنيا يوم لك ويوم عليك وكل شي الله كاتبه له بيصير وخيره له ( وعسى ان تكرهو شيئاً وهو خيرٌ لكم وعسى ان تحبوا شيئاً وهو شرٌ لكم ) همس : والنعم بالله غزلان : قوم غسل وجهك واذكر الله والدنيا ماتوقف على شخص وادعي ربك يمسح حبها من قلبك خلاص هي بتصير على ذمة غيرك ... ويمكن اذا كانت لك ماراح تسعدك ؟ ولا انت ماراح تسعدها ؟ يمكن ربك يرزقك بزوجه احسن منها ؟ وهي الله يوفقها مع زوجها ... واذا خلصت انزل اجلس معنا ترى غسان تحت احنا كننا نفكرك نايم وراكبه بجيب شاحن لزوجته اثاريك هنا تبكي لشي كاتبه ربك ... يالله انا بنزل ننتظرك تحت نزلت غزلان ومسح خالد على وجهه وتنهد وغسل وجهه ونزل يجلس مع اهله الساعه ١٨ : ١ ص في غرفة علياء وعبدالله علياء : ابيك تطلع لي رقم سعود ولد اخوي عبدالله : انا ماعندي معارف لهالشغلات طلعيني منها علياء : كيفك لبست الروب وراحت غرفة حسن طقت الباب ودخلت علياء : للحين مانمت ؟ حسن : لا لسى مب جايني نوم علياء : ليه ؟ حسن : افكر ... يمه والله مب منطقي تجبرونها ويمكن الولد نفسه مجبور علياء: عشان كذا انا جايتك حسن عقد حواجبه وهو ساكت علياء : ابيك تجيب لي رقمه واكلمه حسن : يمه من وين اجيبه ... انا خلني اعرف ابوه الي هو خالي عشان اعرفه علياء : انا بعطيك اسمه وانت من معارفك جيب رقمه حسن : ماقدر يمه علياء حطت عينها بعينه بتحدي : الا تقدر حسن صد عنها : لا ماقدر علياء وهي مصره : وانا اقولك تقدر حسن تنهد : طيب وش اسمه علياء : اسمه سعود جابر حسن ال............ ... ابيك بكرى تجيب رقمه ضروري حسن اخذ نفس طويل : طيب علياء قامت من سريره : يلا تصبح على خير ولا تفكر كثير طفت النور وطلعت ونامت وهي مرتاحه لأنها بترجع لأهلها اخيراً يوم الاربعاء في مدرسة ليان ليان وهي تبكي : مستوعبين انهم بيغصبوني ؟؟ وسن : طيب يمكن مابيغصبوك انتي اصبري لين يكلموك وشوفي لا تستبقي الاحداث ليان : الا بيغصبوني انا سمعتهم يقولون مروج : طيب ؟ يعني بتظلين كذا تبكين لأنهم بيغصبوك ؟؟ ليان : تخيلي اقوله بيغصبوني يقولي الله يوفقك ويهنيك وسمي ولدك بأسمي وسن : يعني وش تبين يسوي لك الولد وانتي بنفسك قايله انه حتى لو تقدم لك اهلك بيرفضوه وبيزوجوك ولد خالك مدري خالتك مروج : صح كلام وسن تبيه يعني يجي يترجى ابوك وامك ولا يذبح الولد ليان : انا ما اتخيل اعيش مع احد غير خالد مروج : لا لازم تتخيلي لان هذا الواقع ولازم تتقبليه وسن : وبعدين يمكن هذا نصيبك ... ويمكن هذا احسن من خالد الي ميته عليه ليان : بس ابوي يقول ان يمكن ابوه غاصبه مروج : انتي قلتيها يمكن مستحيل ابوك يزوجك واحد مغصوب عليك ليان : بس عادي يزوجني بالغصب وسن عصبت : انا اقوم عنك ي المجنونه ي الخبله هذا نصيبك وش تسوين بعد ؟ تروحين تهاوشين ربك ليه ي ربي خليت ولد خالي زوجي مو خالد ؟ استغفر الله ربي ومشت وسن وراحت لشلتها الثانيه وهي معصبه ليان زادت في البكي وظلت مروج تهدي فيها وتفهمها بالهدواه لين بدت تقتنع ليان بالامر الواقع ١٢ : ٤ م حسن : يمه جبت لك الرقم علياء : زين ابيك تكلمه وانا اقولك وش تقول حسن عصب : يمه وش تقولين ... توك البارحه قايله انك انتي الي بتكلمينه انا م راح اكلم احد انتي كلميه وهاك هذا الرقم رمى الرقم على امه وركب غرفته وصقع بالباب وهو معصب مو عاجبه الي بتسويه امه في اخته بتغصبها على واحد ماتبيه ولا تعرف عنه شي علشان بس تتصالح مع اهلها ... محد قال لها من البدايه تزعل اهلها كان اقنعتهم بالطيب لين يلينون وتتزوج ابوي لازم يعني هالسالفه كلها ؟ وتاكلها اختي المسكينه ... ان شاء الله بس يكون رجال زين ويخاف الله فيها ومايكون مغصوب ... المشكله اني مالي راي قدام امي وابوي بهالمواضيع وكأني بزر بس يعطوني خبر ومالي راي ... اشوف اختي تتزوج غصب وانا حاط يدي على خدي ماقدر اسوي لها شي ... آآآآآآآآه ي القهر ... مالي الا فايز قام وراح لعمه فايز محل الازمات انتهى | ||||
|
| |
 |
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
العرض العادي
