حب في صنعاء القديمه / للكاتبة عبير الكبسي ، يمنية

[لامارا]

سما: بتجهز الشنطه وتشوف رشاد زاعل فوق الكنبه ، بككيت عليه ..
رشاد مقهوور: مفكرها بتبكي تشتي ترجع
وقت الغدا..كلهم خارج ف الصاله مراعين لرشاد وسما..
صلاح: مالهم ؟!
عبدالعزيز ، بيقلب بالملعقه في صحنه سكته.
ساره بتغرف له مرق : والله ان قد جننت ابني الصدق ، قلتلك ابردد لك من تيه الزواجه مابتسمعش...
عبدالعزيز: تشتو الصدق احنا قد زيدنا بها عليه ، مش توصل لهذه الدرجه.
ساره: قد نسيت مافعلوو ؟
عبدالغزيز: مافعلو ؟ هو انا الي مابسرتينيش غوا شباب ، نتيجه دلعكم لنا صدقت الكذبه وواصلت فيها.
ساره: بتسمع سكته.
صلاح ماعتفهموناش ماوقع: رشااااد ،،، رشاااد.

ف الغرفه
رشاد :سمع وخرج..
صلاح: ماوقع !
رشاد: حكى له..
ساره انحرررجت: تشتي تررجع !!
رشاد شاف امه: مدري مازعلها وماسمعت ، خلاها تتصل لعمي وعمي اتصل لي.
صلاح: يااااعيباااه
رشاد: بس سدينا تسير تغير جو مش حنقه.
صلاح قام من فوق الاكل: استغفرالله ، وسار يتصل ليحيى...ويفهم منه.

في اليمن ..رد ع التلفون
سلوى: من خالد ابني وصل !!
يحيى: الو اهلاا اخي صلاح حياك الله.
صلاح مستغرب رده عادي: الله يحييك ، ماوقع بين الجهال مال البنت تشتي ترجع ؟
يحيى: قالت نفسها تغير جو وتاعبه شويه.
صلاح: اهم شي مابش شي ثاني.
يحيى: كما جت عنفهم ونسد، ماعلينا احنا منهم يسدو، المهم كيف الشغل ..اخبارك
سلوى مطننه: من ترجع !! سما ؟ليش!. بعد يومين..
محمد وسلا مروحين من المكتب.
ايناس: فتحت الباب..
سلا وملانها دموع: سلمت ،،وطلعت بسرعه.
محمد ضااابح: سلم ، ولحق بعدها.
ايناس: مسررع رجعتو عادو ظهر !.
محمد: تمينا شاصلي وانزل..دخل غرفته..
سلا بضبببح: خلست البالطوو وبتبكي.
محمد: اشتي ادرى ماراس الحنق هذا !!
سلا: ليش توعدني واحنا بندرس نشتغل سوا وذلحين قلبت !!
محمد اخذذ نفسس : يا سلاا

افهمي الله يرضى عليش ، كنت موافق.. والدليل مكتبش معي .
سلا : وما استجد!! مالك نروح وانت مقلوب وضاابح وكان عدوك معك مش حبيبتك.
محمد بقله صبر: ياااسلا مااافعل قدريني..مااقدررش
سلا قاطعته: ليش ماتقدرش ماهو السبب ؟
محمد: اهداي اووول اعرف اتكلم ولاتقاطغيش.
سلا: بتمسح عيونها ، تكلم ماهو.
محمد: اول يوم دخلو لش مقااوولين وسط المكتب وفارر دمي قلت يلله هو عمل سهل..
سلا: ماددخل المقاولين ، او اكتب للنسوان فقط.
محمد: سلا رجااااءً ، اسمعي
سلا: يعني افهم من الاخيررر انه ماداومش صح ! اوصل تسع وترجعني ١٢.
محمد: حنق وخرج من الغرفه.

#bero_alkebsi

[لامارا]

sanaa_love_story



ف امريكا....ف المطار لحظه الوداع..


سما جت تسم عليه:بكيت وحضنته
رشاد : ددمع، وتسخي تفلتيتي ! ماعد بينشوف الدنيا الا بش يا سما.
سما: وانا اكتشفت اني ماقددرش اعيش من غيرك، بس والله تاعبه مضايقه حاسه شاختنق اغير جو وارجعلك.
رشاد: اذا مارجعتي شالحقش..
سما: ياااريت تلحقني نغير جو ونرجع
رشاد: وعد ان شاء الله تبسريني قبالش.
سما: الله يحفظك ويخليك لي.
رشاد: ومايحرمني منش ، اوبهي لنفسش وتواصلي معي طمنيني عليش.
سما: حاضر ، ارجع وغير العطر الشوعه.
رشاد: لا اله الا الله .
سما: محمد رسوله الله، بيباي،، ومشيت.. الليل شقه محمد وسلا..
محمد رجع: دخل ب الشكلاته الي تعجبها
سلا: واقفه بتمشط شعرها ف المرايه.
محمد يشتي يساليها: هزر الفرشه بيمشط لها وبيرفع لها حواجبه ف المرايه.
سلا ماقدرت تمسك نفسها: ضحكت..شووعه ماحبكش ابعد.
محمد: ايووه اغنجي عليا قدش داريه ان سلا قلبي وماسخاش اغثيها.
سلا: كلااام ، قدو باين.
محمد: مسك يدها وبيعدد لها باصابعها..
اولا ، مامنعتش تشتغلي بس ابسر مكتب مرتي رجال مقاولين ومايعرفو يتحاكو سوا ماقدرش
ثانيا، يخرجو من عندش واسمعهم يتغزلو بصوتش وعيونش مااااقدررش ..
ثالثا، انا احبش واتمنالش كل شي اكثر مني بس تعذريني ف الاولات.
سلا: تشتي تتكلم.
محمد: اششش، ماتميت.
رابعا، ادي ف مكتبش سكرتيره تجمع لش كل التفااصيل والتصاميم المطلوبه وتنفذيها من البيت انا اجهز لش مكان كااامل خاص بالتصاميم.
خامسااا، احبش وماشتيش تزعلي مني واتمنى تتفهميني لاني ماشغصبش على شي.
سلا ابتسمت بغمزه: اهم شي فارح بالسكرتيره، تطرحني ف البيت وتديلك سكرتيره

محمد: ضحككك، يامغاااويه فلتي كل شي ومسكتي تيك ،، والاخيره احبششش وانتي لي وحدي .
سلا: موافقه ششتغل من البيت ،
محمد: وبكره اجهز لش كل الادوات وفاكس وتلفون كل شي.
سلا بغنج: الله يخليك لي ياشوعه، ولو انك شرير بس بينحبك قوووي.. ثاني يوم وصلت سما سكته مفاجاه محد داري.
اول مادخلت البيت يووو شممم زحاوق مزحقه
سلوى:سمعتها وحملت للحوي
سما: حضنتهااا وسلمت ع امها.
يحيى: اتصل لسلا..تجي
سلا: وصلت البيت حسست سما موجوده حملت لاداخل.
تحاضنين قوووي وتسالمين.
سلا: اتصلت تقل لمحمد انها ف بيتهم .

سما: خااوره اكل من حقكم ..
سلوى: بعيني ماافعلش؟
سما: زحاوق ولبن ، وخبز خاله ايناس وذمول خاله فاطمه..
سلوى: يو جبرني ببنتي من عيني افعلش كلهن لايطبعين ف الولد.
سما ضحكت: اين ولد!!!



#bero_alkebsi

[لامارا]

سلوى: مافعلتيش فحص؟
سما: ماشي ليش! مش واحمه؟
سلوى: مادراش ؟
سما: مابيندوخش ساع المسلسلات.
سلوى: ضحكككت ، وقامت تزحوق لها..

بعد اسبوعين
رشاد فررح: انها حامل ورجع يغير جو معها اسبوعين ويرجعو امريكا.

سلا بدات تشتغل في مكتبها وتنسق لمحمد التصاميم..

بعد شهر ونص..
تزوجت زهور ويوسف وسافرت الاردن تدرس دراسات عليا ويوسف يتخصص مجالات حديثه..

رويدا وياسر في تعز استقر هانك .. بيطلعو ف العطل والاعياد عند هدى.

بعد ٧شهور..في بيت صغير لحالهم
رشاد: قررت قرارر .
سما مندمجه ب التلفزيون:و بتاكل تفاح حامض، هاا ماقررت !
رشاد: قررته قبل فتره، وجهزت له والان حابب افاجأش..بس امهد لش حامل..
سما: ماهوو ؟؟
رشاد: قررت نرجع اليمن من مره واستقر هانك.
سما بفرحه: صاااحت وفرحت، اخيراا
رشاد: اخيرا، هانا راحه وشغل وكل شي، بس هانك حبيت اجوائكم ، اجتماعيين الناس يزورو بعض ف عرس ف موت ، ف الجمع يوميا بدون مناسبات يجتمعو حالي قوي، يتساعدو كل واحد يدي راسه ع الثاني.
سما: ايوه والله صددقت، بس والكل حبيت امريكا نكون نجي.
رشاد: اكيدد لازم نجي ، وعنرجع بعد ماتولدي امد الجنسيه.
سما: حاضر.

في اليمن..
ايناس: سلا مابتخوريش شي ؟
سلا فهمت سؤال عمتها: لا للمه ؟
ايناس: قلت يمكن تكوني واحمه ومش انتي داريه.
سلا تحسست: لا مش واحمه..

بعد فتره..
ايناس: ايحين عيوقع لي حفيد اتواله؟
محمد: لوما يريد الله.
سلا ماقالت لعمتها بالمشكله: ساكته..
بعد ماطلعو شقتهم.
محمد: لاتكونيش تتحسسي جاوبي ، شي بيد الله مالناش اي دخل.
سلا: كان نفسي اليوم الي يجيلنا نونو يشبه طبعك واخلاقك تحبه الحاره كلها.
محمد: وانا ماشتيش منافسس يسررق حبي ومكاني من قلبش ، واذا كان هذا الشي من عند الله اللهم لا اعتراض.
سلا بكيت: ياااارب افرح قلبنا.
محمد: امين

المهم لاتتهربيش معش تصاميم مشتيش توحمي وتعيفيهن.

بعد شهور ..
رجعو سما ورشاد واستقرو مع ابنهم قصي.
سلا : كانت تشل قصي عندها ويمسي مجنونه عليه..
في يووم
محمد: سلا مالش بتخرررفي !!!
سلا: طعيم والله اطعم .
محمد:بغير جنااان , بتاكلي صابون
سلا: شم فراوله تجنن.
محمد مبهرر: هزر من يدها ،سلااا بتخررفي او منش صدق، شاخرج اشتريلش فراوله.
سلا: هذا الشم
محمد ب استغراب :حاضر..
سلا: شم عطر عمي عمار..
عمار: دق لهم باب الشقه.،محمددد
محمد مفجووع: لفت لسلا وجاوب، من !!
عمار:.كيف من مالك.
سلا: بتضحككك، قد بينقلك عمي.
محمد:فتح، ربشتيني الله يسامحش..معش جن او ماهو
عمار: انزل عبي الخزان.مالكم !!
محمد: حاضر..

#bero_alkebsi

[لامارا]

بعد فتره من زواجهم ..اخيرا سلا وحمت..
محمد: كاان فااارح مزقرع
ايناس: جمعت الحاره كلهن يخورين مرت ابنها..
فعلين صبوح وجلسين ف الحوش...

رشاد وسما فتحو شركه متواضعه ومسكت ادارتها التنفيذيه سما... ورشاد المدير العام.
كان قصي يجلس عند سلوى..

بعد شهورر
سلا بطنها كبررت : بتحووس كيف ترسم ولاقدرت.
محمد: بيتفرجها سكته ويضحك.
سلا: محمددد
محمد:ماسك الاب تب نعم.
سلا: قل لي عيون محمد زي زمان.
محمد: عيون محمد..
سلا:جي تم لي التصميم.. ظهري تعبت.
محمد: قلتي ماتفيضلش في عملش.
سلا: خلاص تميته بقي لمسات بسيطه، قواا.
محمد ضحك: حاضر من عيوني يامكرششه.
سلا:تسلملي عيونك.

بعد يومين..ولدت سلا

محمد: مانسميها ؟
سلا: اسم عادي بس مناسب لي ولك ولها.
محمد: الي هو ؟
سلا: سلمى.
محمد: مم قصدش سلا وميم محمد
سلا: مناسب لاسمي واسمك واسمي واسم سلا وماما سلوى.
محمد: طيب ،بعدش البنت لش والولد لي
ضحكو وفرطوو لسلا اربعين يوم ولاد ضخم كل يوم بززفه..

وبعد سنوووات مجتمعين بيت يحيى الجمعه حقهن.
فوق الغدا..
خالد: ( رجع صنعاء وتزوج من معاريفهم، ومرته واحمه)
كانت مرت خالد في بيتهم معزومه ..
خالد:ابنش طلع ع سلا ..وبنت سلا عليش لقااانه.
سما: ضحكت.
محمد: زد.ناقص بنتي تطلع ساع خالتها تمتني فداج وانا صغير.
رشاد ضحك: الارش عليا.
سلمى: بتبككي، ماااماااا ابسروو قصي ضربني

سما: ليش ياقصي ؟
قصي: بتحانكني، ان خالو محمد بيحب خاله سلا اكثر وان خالو سارلكم لامريكا...
كلهم ضحكووو..
رشاد: وانت قل لها انا ادتني امك لاوسط صنعاء لاني بينحبها اعظم.
ضحكوو كلهم.. قصي وسلوى في حضن يحيى وسلوى بيلعبو ويغنجو عليهم..

زهور ويوسف...وقع لهم ولد سموه غسان.

حارتهم رجعت لها الحياه وعادت ذكرياتهم بجهالهم...

وهكذا صنعاء القديمه افراح واعراس وحب
ومجاوره حقيقيه..الاهل بينهم الفه ومحبه وكل جمعه يلتقو في كل بيت كبير في صنعاء..
تسودنا اجواء روحانيه في وقت كل اذان وفي رمضان تنزل على حواريها الطمأنينه..
اعيادنا صله رحم وافراح رغم كل معاناتنا في الحياه..
لانستسلم لأيه ظروف سواء فقر او مرض او حزن..
هكذا نحن اليمنيين....

الله يوفق بين كل اثنين اجتمعوا على الحلال وخافوا الله في علاقتهم ،، واحترمو وقدرو تعب اهلهم فيهم.
وكل ولد خاف الله في بنات الناس ..
وكل بنت خافت الله في كل تصرفاتها...

حب في صنعاء القديمه

#عبير_الكبسي #bero_alkebsi

[لامارا]

...............وكم ياقص وحكايات في زغاطيط شوارع صنعاء منها حب ومنها مشاكل...
الروايه خيال لكن نقدر نطبقها ع ارض الواقع ..حب شريف عفيف بعلم الاهل ..الي يحبش يجي لش للبيت و يخاف عليش.

بالصبروالوفاء والاصرار تتحقق كل احلامنا..
المشاكل في كل مكان بالصبر والاخلاق والتفاهم نقدر نحلها ونغير من بعضنا البعض..مش علاج اي قصه فاشله الطلاق، ولا حياه مع اليأس.
في ناس ربي بيرزقهم حب ، وناس ربي يرزقهم مال وناس سعاده وناس صحه،، الحمدلله دائماً وابداً على كل احوالنا الي قدرها لنا...

#صنعاء جمالها باهلها وجوها وعاداتها.. ب اسواقها وعفويتها وطبيعتها...صنعاء حوت كل فن وكل حب وكل الجمال.. من سكنها لم يحس ابدا ب الغربه فيها...

الله يلم شملنا ويوحد كلمتنا ويهدينا وينصرنا ويأمن بلادنا ووطننا من كل شر وترجع صنعاء واليمن ب الف خير يااارب ..اتمنى روايتي نالت اعجابكم..

اشكركم كلكم على تفاعلكم وكل واحد بادر باول لايك وكومنت ومنشن وانتظار واراء في الروايه اشكركم ع تصاميمكم واعتذرر لاني مانزلت للبعض بسبب كثره الرسايل ومابتتحمل كل الصور..

شكررر خااااص لايقدر بثمن ل غيداء نبيل تصاميمها للفيديوهات كلها وتصاميم الروايه اغلبها وادارتها لصفحه الفيس..
اشكر كل من انتقد الروايه بذوق وعلق تعليق يدل على شخصيته ..ومكمله معاكم بروايات قادمه ..

تعودت اقولكم
وتصبحوا على الف خيرر

وان شاء الله في هذه اليومتين انزل رواية كونو بالانتظار

#عبير_الكبسي
#bero_alkebse
#حب_في_صنعاء_القديمه
#GHAIDA_NABIL

[فيتامين سي]

[ندى تدى]

رواية ممتعه ورائعه



شكرا حبيبتي ووفقك الله