آخر 10 مشاركات
|
| |||||||||||||
 |
| | LinkBack | أدوات الموضوع | انواع عرض الموضوع |
01-05-19, 05:31 PM
| #71 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب  
|  الحلقه ٢٦ والاخيره اسيبكم مع الحلقه واتمني تعجبكم وسوري علي التأخير ادهم : كنت عايز اشوف رد فعلك يا ليلي ده اللي انتي عايزه تسمعيه ليلي سمعته مصدومه لانها متخيلتش ابدا ان ادهم حبيبها يتعمد يجرحها .. كل الشهور اللي فاتت والوجع اللي اتوجعته والالم اللي اتحملته حسته في اللحظه دي تاني .. حاولت تهدي نفسها وتسمعه .. يمكن لما تسمعه الالم ده يهدي ... ليلي بهدوء : ايوه عايزه اسمع اسبابك الحقيقيه .. عيزاك تتكلم عن الثقه اللي بتطلبها مني وانت اصلا ما بتثقش فيا اهوه ادهم : والله يا ليلي انا عمري ما عملت اي موقف معاكي يخليكي تفقدي الثقه فيا لكن انتي عملتي كتير وكتير قوي كمان وكان لازم اقف علي ارض صلبه .. لازم تكون ثقتي فيكي ملهاش حدود وجتلي الفرصه فكان لازم استغلها ليلي : هتفضل لامتي تعاقبني علي الماضي ؟ ادهم : لحد ما تلغيه من ذاكرتي يا ليلي .. انتي خنتيني ومش مره واحده ليلي : انا عمري ما خنتك ادهم بزهق : وانا ما بتكلمش عن الخيانه دي .. خنتي ثقتي فيكي انا لحد النهارده لما بفتكر اللي عملتيه عقلي بيعجز عن التفكير لانه لو فكر مش هسامحك ابدا .. انتي فضحتيني وقتلتيني وبعدها ثبتي عليا جريمه وصلتيني لحبل المشنقه وجيتي تطلبي مني الطلاق علشان ما اتعدمش وانتي علي ذمتي .. انا مش عارف اصلا ازاي الواحد ممكن يسامح علي حاجه زي دي .. فمهما اعمل يا ليلي عمري ما هكون بقسوتك دي .. مهما اعمل .. ليلى :ليه بتقول كدا أنا مش فاهمة ممكن تفهمني.. أنت لما كنت بمحنة تعبك وقتلتني لولا انعشوني بأخر لحظة وبالرغم من دا فضلت جنبك وما تخلتش عنك هو دا ما شفعليش عندك هآه؟ وإلا من وقت ولادة آسيا واحنا عايشين بمنتهى الحب والصفا وتحملي للكل ظروف شغلك اللي كنت حموت فيها فاكر يوم ولادة يوسف ولا لما السواح حاول يقتلني وانا حامل باسيا وإلا وإلا وإلا... مش كل دا حصلي بسبب شغلك قلي أمتى عاتبتك أو حتى لومتك أن لولا شغلك مكنش دا حصل.. نفسي اعرف ليه كل المواقف دي بتنساها وبتفتكرلي السيء بس ليه كل دا ما شفعليش عندك. أدهم : لا يا ليلى طبعا أنا مقدر كل اللي قولتيه وحاسه وشيلهولك على رأسي.. بس انتي كمان لازم تقدري أن أنا غير كل الناس انا انسان عشت حياة صعبة وانتي عارفة دا كويس . أنا إنسان لما بزعل بزعل ضعف الناس ولما بفرح بفرح اقل من فرح الناس مش بإيدي يا ليلى مش بإيدي . عشان كدا يا ليلى جرحك دايما كان بمقتل. ليلى بتنهيدة كبيرة : واعتزرت واتأسفت كتير وبعدين لامتي هنعيش في الماضي ؟لحد امتي هنفضل في دوامه الماضي ادهم : انتي اللي بتفتحي في الماضي مش انا بدليل اهو بدال ما تكوني في حضني بتلومي فيا ليلي : انت خلتيني اصدق انك هتتعدم ادهم : كنت عايز اشوفك هتصدقي اتهامات محمود ليا وهتقفي في صفه ولا هتقفي في صف حبيبك .. هتختاريني ولا كعادتك بتستسهلي الاتهام ليلي : شفت اديك اهو بتتهمني وبتطلب مني اثق فيك طيب ما تثق فيا انت ادهم : انا واثق فيكي لكن ما بثقش في غباءك وانتي كتير بتكوني غبيه يا ليلي ليلي : انا مش غبيه ادهم : امال انتي ايه !! ليلي : انا مصدومه .. مصدومه منك .. انت جرحتني بمزاجك ! سميت اللي حصل بينا شيء ادهم : آس قاطعته : ما تقاطعنيش .. فاكر لما جبت حمدي هنا .. لمتني اني ديما بحاول اخليك تدوق نفس اللي دقته .. لمتني قوي .. وكنت مستغرب ازاي بعمل ده وقوتلي ان اللي بيحب لما حاجه توجعه بيبعدها عن حبيبه مش بيروح يقوله جربها زيي .. انت دلوقتي كنت عايزني اجرب الوجع زيك ..بتدفعني تمن غلطات حصلت من سنين واصلا اتعاقبت عليها ادهم : انا معملتش ده بقصد وبطلي بقي تخلطي كل الامور ببعض .. فوقت لقيتك باعتالي واحده اوضه نومي .. مستغنيه عني .. اكتفيتي مني لمجرد اني غلطت وفقدت الذاكره واه عارف ان جوازي عليكي وجعك وقوي وعمري ما هقدر اتخيل وجعك قد ايه بس كان غصب عني .. مكنتش في وعيي وبعدين ده ربنا نفسه مش بيحاسب طالما العقل مش موجود انتي هتحاسبيني ؟ ليلي : انا محاسبتكش علي جوازك والا مكنتش قبلتها في بيتي ادهم : امال ؟ اكتفيتي مني .. يا ترجع الذاكره يا ما تلزمنيش صح ؟ وعلشان كده بعتيهالي ليلي : بعتهالك لانك رفضت وجودي وكنت تعبان ومحتاج المرهم قاطعها : معلون ابو المرهم علي اللي عايزو وملعون ابو التعب اللي يخليكي تقبلي ان واحده تشاركك في حبيبك ليلي : انت فاكر انه كان سهل ادهم : طالما عملتيه يبقي سهل ليلي : لا طبعا مكنش سهل .. مكنش سهل انك ترجعلي متجوز .. مكنش سهل انك ترجع مش عارفني .. مكنش سهل ان واحده غيري يكون لها حقوق وانا ماليش .. مكنش سهل اشوفك خارج من اوضتها .. مفيش حاجه كانت سهله ابدا ادهم بتعب : ليلي انا تعبان .. انا بقالي تقريبا تلات شهور ما بنامش .. انتي عايزه ايه دلوقتي ؟ اللي انتي عايزاه ويرضيكي هعملهولك .. مهما يكون ليلي : مهما يكون ادهم : اعتقد بس المهم ما يكونش طلب غبي ليلي : لتاني مره هقولهالك انا مش غبيه ادهم : بجد مش غبيه ؟ امال لما اكون غايب بقالي اكتر من سنتين وبدال ما تكوني في حضني واقفه بتلومي فيا فده تسميه ايه لو مش غباء .. خلينا نبدأ صفحه جديده مع بعض بدون كل اخطاء الماضي .. خلينا نبدأ من الاول .. نتعاتب اه لكن ما نبعدش .. كفايه بعد .. تعبت من البعد .. تعبت من اشتياقي ليكي .. كفايه ليلي بصتله كتير جدا وهو قدامها واقف مستني اي رد فعل منها كان في حرب جواها مين هيكسب ؟ عقلها ولا قلبها ؟ ادهم اهانها كتير وضحك عليها بس اهو قدامها فاتح ايديه !! مد ايده ليها : وحشتيني ليلي وقفت جامده باصه لايده مش قادره تسامح علي حيرتها ووجعها واهانتها مره وري مره وادهم منتظر يشوفها هتقرب ولا هتبعد ليلي اترددت وفكرت انه لو خرج من اوضتها ممكن ما يرجعش تاني لانه سبق وعملها وممكن يعملها وممكن تمسك ايده وتمنعه يبعد عنها تاني .. هنا تجاهلت ايده وراحت لشفايفه اللي وحشاها من سنين وهو كمان ما صدق انها بقت في حضنه .. حس قد ايه كانت بعيده عنه .. حس بشوقه ليها .. واخيرا هيا بين ايديه بعد كل البعد ده .. اخيرا هيتنفس من تاني في حضنها .. اخيرا هيغمض عنيه بين ايديها ... بعد فتره طووويله وهيا نايمه علي صدره وهو بيلعب في شعرها : امتي رجعتلك بالظبط يا ادهم !! ادهم : انتي مصره بقي ؟ ليلي : طبعا مصره ادهم : انتي قولي امتي ؟ ليلي : مش عارفه .. مش قادره احدد امتي بالظبط ادهم : فكري ليلي : لما قربت مني اول مره وطردتك؟ ادهم : كنت فاقد الذاكره بس انتي ليه طردتيني صح ؟ جننتيني وجرجرتيني لاوضتك وبعدها طردتيني شر طرده انا لحد دلوقتي مش فاهم ليه ؟ ليلي اتعدلت وبصتله كتير : شايف انت بتبصلي ازاي ؟ بتضمني ازاي ؟ بتحتويني بعنيك ازاي ؟ ادهم اللحظات اللي بنقضيها مع بعض بتكون حب في حب .. بتنفس حبك .. بتكون معايا بكيانك كله ساعتها حسيت اني مع راجل .. راجل والسلام مش ادهمي انا .. مكنتش انت .. حسيتك غريب .. ما اتعودتش منك علي ده .. لما بتكون معايا بيكون منتهي العشق وساعتها حسيت اني بخونك انت .. وماقدرتش اخونك .. بكل بساطه مقدرتش اخونك ادهم كان ساكت تماما مش قادر ينطق او يتكلم : عذبتك كتير ؟ وجرحتك اكتر ! حقك عليا ! بس صدقيني كان غصبا عني ! بس انا يا ليلي في كل لحظه كنت بحبك من اول ما خبطت فيكي في الفندق ووقفتي قصادي وقولتي اسمي وانتي خليتي قلبي يدق .. فعلا يا ليلي قلبي دق ساعتها وبقيت بدور علي عنيكي وبعدها بقيت بجرحك لاني اكتشفت اني مسلوب الاراده معاكي .. كنت خايف من حبك اللي بيقتحمني .. مكنش عندي اي قدره للسيطره فقلت ابعدك انتي عني ليلي : طيب تاني مره بعد ما رجعت يوسف قضيت الليله في حضني ادهم ابتسم : ده كان انا بقي ليلي اتعدلت وبصتله : كانت رجعتلك الذاكره ساعتها !! ادهم ابتسم وشاور بدماغه ليلي : امتي بالتحديد ! احكيلي بالتفصيل ادهم : مفيش تفاصيل .. لما كنت بجيب يوسف وهناك اتخانقت وضربت واتضربت وفي لحظه لقيت دماغي هتنفجر .. كل شريط حياتي بيمر قدامي وقفت مكنتش فاهم اي شيء وايه اللي بيحصل حواليا كل اللي فهمته ان يوسف قدامي ناس مسكاه ومصطفي وعلاء وكان لازم اتصرف وبعدها اتفاجئت بواحده بتنقذ الموقف ولقيت اخوكي بيقول انها مراتي ساعتها كانت صدمه.. دماغي كانت عاجزه علي الاستيعاب .. مراتي ازاي ! وليه انا اخر حاجه فاكرها كانت السفينه والانفجار وبعدها ابيض ؟؟ اسئله كتير مكنلهاش معني .. ليلي : علشان كده لما رجعت ضمتني قوي وكأنك ادهم كمل : وكأني لسه راجع من السفر بس ساعتها لقيتك بتسلميني للورا مكنتش فاهم ازاي اصلا متقبله ده فحبيت استني افهم الدنيا حواليا قبل ما اقولك ليلي : الليله دي انت جيت لحضني يا ادهم ادهم ضحك : مقدرتش ابعد عنك حاولت بس مقدرتش ليلي : وبعدها مشتني من عندك ادهم : بعد ما هديت وشوقي هدي وعقلي اشتغل كان لازم ابعدك .. كان لازم افهم حكايه لورا .. ممكن كان خوف عليكم من لورا ووجودها .. قلت افهم حكايتها قبل ما اتسرع واطردها ليلي : وبعدها ؟؟ ادهم : انتي عايزه توصلي لايه بالظبط يا ليلي !! ليلي : انت كنت بتفكر ازاي ؟؟ ادهم : كنت طول الوقت بشوف ليلي جديده قدامي وكنت عايز اعرف امتي هتقوليلي كفايا مش مستحملاك .. امتي هتطرديني من حياتك وتقولي اكتفيت .. كنت مستنيكي تسيبلي البيت وتقولي خلاص لحد كده .. امتي هتقوليلي بيكفي خد الحب وامشي بعيد عني ليلي : ولو كنت قولتها !! كنت هتسيبني ؟؟ ادهم سكت شويه : اسيبك بمعني اسيبك لا معتقدش .. كنت هقولك ان ذاكرتي رجعت وساعتها كنتي هترجعيلي بس ثقتي فيكي هتكون اتهزت وكنا هنعيش كده .. ليلي : يعني ايه كده ؟ ادهم : يعني مجرد اتنين عاديين بينهم عيلين بيحبوهم وخلاص ليلي : ودلوقتي !! دلوقتي احنا ايه ! ادهم : احنا اتنين مجانين بالحب ومن كتر حبنا لبعض للاسف بنجرح بعض بس المهم اننا ديما بنلاقي الطريق لبعض .. مكانك جوه قلبي يا ليلي ومكاني جوه قلبك لاخر يوم في عمري .. كل لحظه بجرحك فيها كنت بتجرح اكتر منك وبكون خايف من رد فعلك وما تتخيليش فرحتي لما بلاقيكي مستحمله غبائي وجنوني .. كنت اسعد راجل في الدنيا ليلي : وانا كنت اتعس انسانه في الدنيا ادهم باسها وكل كلمه بيبوسها : وانا هعوضك عن كل لحظه زعلتي فيها ايه رأيك ! ليلي ابتسمت : اشوف الاول بعيني عند مصطفي مصطفي : الحفله كانت جميله النهارده جدا .. اقولك علي سر ؟ ميرا بصتله : قول مصطفي : ادهم ده كان واحشني جدا .. مجرد وجوده فعلا بيدي لبيته معني .. بيدي لحياتي معني .. طول عمري وهو مثلي الاعلي ميرا بحب : طيب ليه مش بتقوله انك بتحبه ؟ مصطفي : اعتقد انه عارف .. المهم سيبينا من ادهم زمانه هو و ليلته هايصين .. خلينا فيا انا وانتي ميرا ابتسمت : خلينا فيا انا وانت .. هاه عايز تعمل ايه ؟ مصطفي : عايز اخدك واروح اي مكان نكون فيه لوحدنا انا وانتي وبس ميرا ابتسمت : مش هينفع نكون انا وانت بس لوحدنا مصطفي : قصدك آسر ؟ نسيبه عند اي جد من اجداده او عمته .. لا بلاش عمته .. عمته هتدور علي حد تسيب عيالها عنده .. اقولك خاله .. ايمن ياخد العيال ميرا بضحك : برضه مش هنكون لوحدنا مصطفي كشر كده : اوعي تكوني اتفقتي انتي وادهم نسافر مع بعض ! وتلاقيكي ايمن كمان قولتيله ؟ هو مصيف يا ميرا هنروح كلنا مع بعض ؟ ميرا ضحكت : ما اتفقتش مع حد انا مصطفي بحيره : امال ليه مش هنكون لوحدنا ؟ ميرا مسكت ايده وحطتها علي بطنها : علشان ده هيكون معانا مصطفي للحظه مش مصدق وبعدها قام اتنفض ووقف علي السرير : انتي حامل ؟ ميرا ضحكت : يا مجنون اقعد مصطفي : احلفي .. قولي والله ؟ بجد يا ميرا ؟ ميرا ضحكت : ايوه بجد يا دوش مصطفي شالها : دوش وستين دوش كمان .. بحبك يا مجنونه بحبك بحبك بحبك ميرا ضحكت علي جنون مصطفي وافتكرت ادهم وهو بيقولها قوليله قدامنا وخليه يتنطط متخيلتش انه فعلا هيتنطط بجد ... النهار نور وكالعاده آسيا جايه تتنطط فوق ابوها تصحيه ادهم : يا بنتي سيبيني انام آسيا : نمت كتير كفايه ادهم : لا ما نمتش سيبيني آسيا : انا نمت كتير انت كنت سهران ليه !! مع مامي صح ! تنومني علشان تسهر لوحدك معاها صح لكن انا ما تسهرش معايا مخصماك ادهم اتعدل : يا الله انا هلاقيها منك ولا من امك .. يا بنت الناس آسيا : انا بنتك مش بنت الناس ادهم : يا الله منك عارف انك بنتي .. آسيا مش كل يوم هنتكلم في الموضوع ده .. بعدين انتي ما بتحبيش ماما !! آسيا : بحبها طبعا جدا بس عايزاك تحبني زيها ادهم ضمها : انا بحبك زيها واكتر منها .. ليلي فتحت عنيها : اكتر منها !! ادهم : انتي مجيتيش غير علي الكلمه دي وتصحي !! ليلي اتعدلت : صباح الخير حبيبي ما تقلقش مش هقف عليها .. آسيا حبيبي اخوكي صحي ولا انتي بس ؟ آسيا : اه صحي طبعا انتي يا مامي بتحبي يوسف بس ليلي قامت : لا انا ماليش طولة بال زي باباكي .. انا بحبكم انتو الاتنين زي بعض انا نازله اجهز فطار نزلت وسابتهم وادهم بص لبنته : حبيبتي انا ومامتك بنحبكم زي بعض انتي ويوسف زي بعض في مكانه واحده .. وده شيء خليكي واثقه منه .. وانتي كمان مطلوب منك تحبينا كلنا زي بعض انا زي مامي زي يوسف اخوكي . احنا عيله واحده كيان واحد حبيبتي آسيا : اتفقنا بس هتدربني زي ماوعدتني !! ادهم : طبعا اخدها ونزل وفطروا الاربعه مع بعض في جو هادي وبعدها جرس الباب ضرب وادهم فتح لقي محمود قدامه محمود : ايه مفيش اتفضل ! ادهم فتح الباب وشاورله يدخل والكل بصله وسكت محمود : وبعدين انا مقبضتش علي ابوكو ما تبصوليش كده ليلي : اهلا يا عمي اتفضل تحب تفطر ولا تشرب معانا نسكافيه محمود : لا لو هتعبك يبقي قهوه خلي النسكافيه للعشاق .. سمعت كتير عن النسكافيه بتاعكم ايه بقي حكايه القلب اللي علي الوش ؟ ادهم ابتسم لليلي : ده موضوع قديم .. اتفضل نقعد في الجنينه طلعوا والعيال طلعوا معاهم آسيا : مين فيكم اشطر انت ولا بابي !! سمعت ان بابي اقوي منك ادهم ومحمود ضحكوا وادهم اتكلم : قوليله يا بنتي محمود احتج : ابوكي مش اقوي مني آسيا : طيب ايه رأيكم تدخلوا انتو الاتنين وتتخانقوا ونشوف مين اقوي بجد ؟ ادهم : والله فكره ايه رأيك ولا خايف صورتك تتهز محمود : انا ما بخافش انا بس عامل عليك انت هنا وسط اصحابك وتلامذتك وكل اللي عارفينك لكن انا ما يهمنيش حد ادهم : لا ما تهتمش انت وبعدين انا مبدخلش في اي تحدي الا وانا عارف نهايته محمود : اه قصدك انك واثق انك هتتغلب عليا .. هههههههه وانا احب التحدي ده جدا وموافق عليه حدد المكان والزمان ليلي جت بالمشاريب بتاعتهم : مكان وزمان ايه ؟ بتخططوا لايه تاني مع بعض آسيا : هيتخانقوا ونشوف مين فيهم الاقوي ؟ ليلي : انتو هتعملوا كده بجد ؟ ادهم : هو عايز يعرف حدوده ايه وانا هعرفه لوليتا ليلي : انت بتتكلم جد ولا بتهزروا ؟ ادهم : انا عن نفسي جد محمود : وانا كمان تحب امتي وفين ؟ ادهم : بكره في قاعه التدريب الساعه ١٠ الصبح هاه ؟ محمود : تمام متتأخرش انت بس ليلي : والله انتو مجنانين محمود : تعالي يا آسيا قوليلي بقي اتعلمتي ايه وبتعرفي تعملي ايه .. وبتعرفي تنشني كويس ولا ابوكي ما دربكيش آسيا : بابي دربني بس من زمان ومن ساعت ما سافر ما ادربتش غير علي الكارتيه وبس محمود : طيب تعالي نشوف مستواكي ايه؟ ( بص لادهم ) عندك مكان هنا للتدريب ولا !! ادهم وقف : اكيد عندي .. في الجنينه وراء الفيلا محمود راح وري ادهم في صاله التدريب الخاصه بيه وقضي وقت كبير جدا مع آسيا واندمج معاها وادهم انسحب وراح لمراته ليلي : آسيا فين ؟ ادهم : معاه ليلي : انت ... ادهم : ايه ؟ واثق فيه ؟ اكيد طبعا ده جدها ما تقلقيش تاني يوم في الصبح آسيا صحيت اول حد وراحت لابوها تشرط عليه انها هتروح معاه في التحدي وفعلا اخدها وراحوا كان الكل بيجري يلحق مكان لان طبعا مصطفي نشر الخبر .. الكل عايز يشوف تحدي الشبح مع الاسطوره ادهم واقف مع مصطفي : طبعا التجمهر ده مجهودك ! مصطفي : انا يدوب قلت لفريقي بس وهو قام بالواجب ادهم : اه قلتلي .. المهم آسيا هتفضل معاك بدأ هو ومحمود الاتنين وقفوا قصاد بعض محمود : لو عايز تتراجع معنديش مانع بدال ما شكلك يكون وحش قدام رجالتك ادهم : لو انت عايز تتراجع اتفضل مش همنعك انت برضه راجل كبير وما تخافش هحترم سنك محمود رده كان بضربه من العصايه اللي في ايده بس ادهم صدها وبدؤا الاتنين يتبارو قصاد بعض ومع كل ضربه الكل بيهيج ويصقف وفي اللي ضد ادهم وفي اللي معاه .. الاتنين فعلا كانوا تقريبا في نفس المستوي ومحدش قادر يغلب التاني لحد ما ادهم ضرب ضربه طيرت العصايه من ايد محمود لفوق وهو مسكها وحطهم الاتنين علي رقبته وهنا محمود رفع ايديه يستسلم محمود : كفايه كده ادهم ابتسم : كفايه .. الاتنين سلموا علي بعض والتجمهر اتفك ووقفوا قصاد بعض بيغيروا هدومهم محمود : مستواك رائع ادهم : حضرتك كمان ولو مكنتش استسلمت كان هيغمي عليا محمود ضحك : مش للدرجه دي حسيت كتير انك بتتساهل معايا ادهم : في الاول اترددت بس بعدها لا ما تساهلتش انا لو كنت اتغلبت عليك فده لمجرد فرق السن مش اكتر.. لكن كخبره حضرتك معدي بمراحل محمود : وانا مستعد اقدم كل خبرتي بين ايديك يا ادهم .. اسمحلي اكون جزء من حياتك كفايه اللي ضاع مني .. علي الاقل اشوف احفادي بيكبروا .. وبعدين آسيا محتاجه لمدرب مخضرم لان عندها الامكانيه والرغبه انها تكون حاجه سيبني اساعدها ادهم فضل ساكت شويه مش عارف يرد : انا مش هقدر امنعك عن احفادك بعد اذنك سابه ومشي ومحمود ابتسم بموافقه ادهم وانه مستعد يتقبله في حياته .. ادهم راح لليلي شغلها واول ما شافها ضمها ليلي : فين آسيا ؟ ادهم : راحت مع خالها ليلي : مين غلب فيكم ؟ ادهم : عايزه ظاهريا ولا بجد ؟ ليلي ضحكت : الاتنين .. ادهم : ظاهريا انا لكن بجد محدش فينا غلب ..ولولا انه عجوز حبتين مش عارف كان عمل فيا ايه ؟؟ ليلي بتضحك جامد وحطت ايدها علي كدمه في وش ادهم وباستها : اضحكي اضحكي ليلي : المهم عايز تقول ايه ! ادهم ابتسملها : محمود عايز يستقر ويكون جزء من حياه احفاده ليلي : طيب اعتقد ده شيء كويس .. سيبه يرجع ويعوض احفاده وعياله .. خليه يا ادهم يدخل العيله ادهم : انا ماليش دعوه بالعيله ليلي : انت عارف انك لو سمحتلو اخواتك هيسمحوا .. اخواتك هيعملوا زيك بالظبط .. انت الاساس وانت اللي ماسك العيله دي ادهم : سيبك من محمود والهري ده كله بقولك خدي اجازه من شغلك ليلي : اشمعني ؟ ادهم : هنسافر انا وانتي لوحدنا .. عايز شهر عسل جديد ليلي : اممممم ادهم : ايه اممممم دي ؟ افهم منها ايه ؟ ليلي : انت لسه مقضي شهر عسل مع لورا ادهم : بقولك ايه ! ما تلعبيش في الازرق هتسافري معايا ولا اخد عيالي واسافر ليلي : وتسيبني يعني ولا ايه ؟ ادهم : اعملك ايه يعني ! ليلي : اعملها كده وريني ادهم : طيب مش هعملها اتفضلي سيادتك روحي ظبطي لاجازه ادهم اخدها وطلعوا علي فندق صن رايز وسابوا عيالهم مع ايمن وجدودهم هبه ومحمود اللي قدم استقالته وقرر يستقر مع احفاده وصلوا الفندق وادهم حجز جناح خاص بالعرسان ليلي : الا قولي صح ؟ ادهم : اقولك ايه يا قمر حياتي ليلي : انت فعلا كنت هتغني وتعمل فيديو كليب ؟ ادهم ضحك جامد : امال انا جايبك هنا ليه ! ليلي شهقت : انت بتهرج صح ؟ ادهم ضحك كتير واخدها في حضنه وبالليل وهما سهرانين مع بعض في الديسكو ليلي : بقولك !! ادهم : قولي ليلي : غنيلي ديسباسيتو .. غنيها ليا انا .. ادهم : كنت متخيل انك بتكرهي الاغنيه دي ! ليلي : بكره فكره انك تغنيها لغيري وخصوصا لما قريت كلمات الاغنيه ولقيتها جريئه جدا ادهم : ولما هيا جريئه عايزاها ليه ؟ ليلي : عايزاها ليا .. تقولي انا كل حرف فيها .. انا وبس ادهم ضحك : مجنونه انتي والله ومره واحده قام وغنالها بس مغناش ديسباسيتو اتفاجئت باغنيه تانيه واسمها بايلندو .. قامت ورقصت معاه وفضلوا الليله كلها يرقصوا مع بعض ليلي : ليه مغنيتش ديسباسيتو ؟ ادهم : مجرد ما ينفعش اغني لحبيبة عمري حاجه اتغنت لغيرها حتي لو فاقد الذاكره وبعدين دي كلامتها احلي التانيه كانت مجرد سافله ههههه دي حب يا قلبي وده لينك الاغنيه https://youtu.be/myOJtNouIoM ( معلش الترجمه صغيره ) الرجاله قابلوا ادهم تاني يطلبوا منه يصور معاهم ومعاه مراته ليلي سكتت تماما وهما بيتكلموا وبعدها ادهم بصلها : ايه مش ناويه تقولي حاجه ؟ ليلي: الاول كنت بتكلم نيابه عن حبيبي دلوقتي حبيبي موجود هو يتكلم براحته ادهم ابتسم وبص للرجاله : انتو عارفين انا بشتغل ايه ؟ حسين : ايوه يا افندم بس انا افتكرت بما ان حضرتك هنا فده معناه انك غيرت رأيك وهتوافق علي عرضنا ادهم : كنت فاقد الذاكره وما وافقتش وحاليا رجعتلي فأكيد مش اول حاجه اعملها بعد ما ترجعلي اغني واصور فيديو كليب ولا ايه ! ليلي بتبصله باستغراب وهيا مش فاهمه حاجه حسين : بس حضرتك غنيت امبارح في الديسكو ادهم : غنيت لمراتي .. انا ومراتي وبنرقص مع بعض او نلعب او نتنطط لكن ده مش معناه اني مستعد اشارك العالم كله في ده ودلوقتي اتفضلوا علشان اعرف اقضي اجازتي حسين : في ناس كتيره صورت حضرتك وكده كده هتنزل علي اليوتيوب والفيس وكل السوشيال مديا فليه حضرتك معترض ؟ ادهم هجاوبك : روح كده دلوقتي ودور علي الفيديو القديم لو لقيته في اي مكان علي السوشيال ميديا انا هصورلك الفيديو كليب بتاعك .. وامبارح لو الفيديو لقيت حد معاه اي نسخه صورها برضه هصورلك الفيديو ايه رأيك اتفاقيه حلوه صح ؟ يالا بقي عايز اروح اتغدي حسين : بس يا افندم ادهم بص للراجل بنظره صارمه خليتو يتراجع : انا بتكلم بالذوق متخلنيش اتكلم معاك بطريقه مش هتعجبك ودلوقتي بعد اذنكم اخد ليلته ومشي وايده علي كتفها ضاممها : هاه يا عمري عايزه تعملي ايه ؟ ليلي : الاول قولي قصدهم ايه بانك رفضت ؟ انت وافقت ؟ ادهم ابتسم : وافقت قدامك عندا فيكي لان اسلوبك كان مستفز لكن تاني يوم رحتلهم ورفضت عرضهم بس كنت بشتغلك ليلي : ولورا ؟ كنت عايز تاخدها فازاي ؟ ادهم : كنت بضغط علي اعصابها لان لا يمكن تطلع في فيديو كليب وهيتنشر علي اليوتيوب كنت بضغط عليها قصاد ضغط محمود بحيث نخليها تجيب اخرها ليلي : اهمممممم ادهم : ايه اهممممم دي ليلي : عادي يعني ادهم : طيب المهم دلوقتي مبسوطه يا قمر ليلي : اشمعني بتسأل ! ادهم : بسألك مبسوطه ولا لأ لان ده يهمني ليلي : امم بحسب مبسوطه انك رفضت عرضهم ادهم : وانتي مش مبسوطه اني رفضت عرضهم ؟ ليلي : اكيد مبسوطه بس دي حريتك انت الشخصيه وراحتك ادهم : اللي يسمعك دلوقتي ما يسمعكيش وانتي بتطرديهم ليلي : كنت بطردهم لاني خفت عليك بعد ما ترجعلك الذاكره تندم فكان لازم اتدخل .. مكنتش عايزاك تندم او تزعل وظيفتي كانت اني احميك حتي لو من نفسك ادهم : حبيبتي الحمايه دي مش وظيفتك .. عمر ما دي كانت وظيفتك ابدا .. انت وظيفتك انك تحبيني وبس ليلي : لا طبعا مكنش ينفع اقف اتفرج .. بس صح انت ليه تحديته انه لو لقي الفيديو الاولاني تصورله ؟ ماهو علي اليوتيوب وكل ما ابقي عايزه اتغاظ منك اروح اتفرج عليه ادهم ضحك وطلع موبيله : خدي هاتيه ليلي دورت عليه وملقتوش وطلعت موبيلها هيا وبرضه ملقيتوش ليلي : ده معناه ايه ؟ ادهم : معناه زي ما انتي قلتي ما ينفعش اكون ظابط واروح اصور فيديو كليب ليلي : وامبارح ؟ ادهم : قبل ما اغني عملت حسابي ليلي : ايوه ازاي يعني ؟ ادهم : شغلي ده بقي .. مجرد ان تقدري تقولي ان اي جهاز في الفندق الكتروني ليله امبارح ما اشتغلش ارتحتي ! المهم ( قعد وقعدها قصاده) : احكيلي بالتفصيل الممل .. ازاي واجهتي كل اللي حواليكي ؟ ازاي واجهتي علاء لما طلب يتجوزك او زميلك في الشغل او عملتي ايه لما الكل ضغط عليكي تتجوزي ازاي عرفتي تقنعيهم يسيبوكي في حالك .. والاهم من كل ده ازاي كان عندك يقين اني راجع وليه مصدقتيش مصطفي لما قالك اني ميت !! ليلي : يااااه يا ادهم انت عايزني اقلب المواجع كلها ادهم مسك ايديها : انا جنبك ومفيش مواجع تاني دي بقت مجرد ذكريات ليلي حكتله كل اللي حصلها وازاي اخوها دخلها مستشفي الامراض العقليه وازاي انهارت وازاي رجعت وقفت تاني علي رجليها .. شكتله هموم السنتين اللي فاتوا ليلي : بس يا سيدي ادهم : استحملتي كل ده ازاي !! ليلي : بيقيني اني هقعد معاك القعده دي وهحط راسي علي صدرك واغمض عنيا وارمي كل همومي عليك .. بالامل في بكره لما ترجع وتعوضني .. كنت عايشه علي الامل وبس ادهم : ليلي سؤال غبي معلش بس لازم اسأله ومعلش اسمعيه ليلي : قول يا حبيبي ادهم : لو كان محمود رجع بجثتي ليلي : ادهم ادهم شال ايدها اللي حطتها علي شفايفه تمنعه يكمل : لو محمود ساعتها قرر انه يرجعني مصر كنت هكون ميت .. لان ساعتها لو ماريان ما انعشتنيش كنت هموت بجد فلو هو ساعتها اخدني كان هيجيبني هنا جثه ميت وشبعان موت كمان ليلي : وبعدين عايز توصل لايه ! ان قعدتك وجوازك من لورا هو اللي رجعك ! ادهم : لا مش ده سؤالي او غرضي .. المهم لو هو كان رجعني ساعتها كنت هكون ميت اكيد واملك هينتهي كنتي هتعملي ايه ليلي : ارجوك بلاش السؤال ده مش عارفه ادهم : كنتي عايشه علي الامل فلو الامل راح ليلي : انت عايز تضايقني وخلاص ؟ ادهم : ابدا بس عايز اعرف ليلي : تعرف ايه ؟ ادهم : لو انا ميت وانتي خلاص مقتنعه بموتي ومفيش امل .. هتتجوزي !! هتدخلي حد مكاني تكملي حياتك معاه ؟ ليلي باستغراب : ده سؤالك !! طبعا لأ والف مليون لأ .. لا يمكن ابدا راجل يدخل مكانك في حياتي .. ده انا مقدرتش اسمحلك انت تلمسني وانت مش انت .. يبقي ازاي ممكن ادخل غيرك.. ادهم انا مبشوفش رجاله غيرك .. مفيش راجل في عيني غيرك .. انا فتحت عنيا علي حبك حبيتك من ساعه ما مصطفي رجع اجازه في اول سنه له في الكليه وعشقتك من ساعتها ادهم باستغراب : اول سنه !! ده انا نفسي مكنتش اعرفه ولا شفته ليلي : بس رجع يحكي عنك ومش عارفه ليه اتمنيتك وحلمت بيك وفضلت ارسم احلام في خيالي .. تخيل بقي لما احلامي دي تتحقق واقابلك بجد واتجوزك وابقي ام عيالك .. ادهم انت لا يمكن تتخيل انا بحبك قد ايه .. انت لو قدرت تتخيل هتعملي تمثال ادهم ابتسم : بصي مهما تكوني بتحبيني ضاعفي الحب ده مليون مره وده حبي انا ليكي .. يااجمل هديه في حياتي .. انتي كنتي تعويض ربنا ليا عن كل حاجه في حياتي .. انتي ظهرتي في حياتي وجيبتي الخير كله ليا .. انتي عشقي الوحيد ادهم سمح لمحمود يقرب من احفاده ومع الوقت بيقرب كمان منه وطبعا آسيا اكتر واحده قريبه من جدها لانه كمان استاذها ومدربها .. آسيا عندها اتنين اساتذه من اقوي ما يكون ابوها الاسطوره وجدها الشبح .. توته خلصت الحدوته شكر خاص لكل حد قال كلمه حلوه في حقي او كلمني خاص وقالي اكمل كتابه او شجعني اكتب .. ولعلمكم انا مش كاتبه انا مجرد واحده عندها هوايه وبس .. الكتابه لها اصولها ومبادئها طبعا في حاجات اوفر في الروايه بس دي لزوم الحبكه الدراميه مش اكتر .. جهاز المخابرات جهاز حساس وله وضعه والظباط بيكونوا علي مستوي اعلي من كده بمراحل فآسفه لو كنت قلت حاجه غلط او معلومه مش مظبوطه او حاجه اوفر دي مجرد روايه اتمني ان الروايه تكون عجبتكم شيموووووووووو | ||||||||||
|  |
|
01-05-19, 05:36 PM
| #72 | ||||||||||
| مراقبةومشرفةسابقة ونجم روايتي وكاتبة وقاصة وملكة واحة الأسمر بقلوب أحلام وفلفل حار،شاعرة وسوبر ستارالخواطر،حكواتي روايتي وراوي القلوب وكنز السراديب
| خاتمه بمناسبه الفلانتين ادهم : احنا بقالنا اسبوعين هنا .. عايزه تقعدي لامتي ؟ ليلي : انت زهقت ؟ ادهم : انا عمري ابدا ما ازهق منك يا قلبي بس العيال وحشوني مش اكتر ليلي : انا عايزه افضل هنا العمر كله انا وانت وبس ادهم ابتسم وحط ايده علي خدها بحب : وانا كمان بس كده هنفلس يا قلبي الا اذا .... ليلي : الا اذا ايه ؟ ادهم : عملت للفندق الاغنيه الدعايه !! ليلي خبطته علي صدره : تغني هاه ! لا يا حبيبي بيتنا اولى بينا قوم نروح ادهم ضحك جامد منها : مش قد النيله بتتنيلو ليه !! ليلي : المهم .. نروح الصبح ايه رأيك ؟ ادهم : اوك هقوم اشوف الحجز ليلي مسكت ايده : ما تقومش خليك جنبي ادهم ابتسم : خمس دقايق وجاي ليلي : لا .. عايزه اسافر في عربيه انا وانت مش طيران ادهم استغرب : نعم ! عربيه ! طيب ازاي ؟ احنا جايين طيران يبقي نرجع طيران او اتوبيس ليلي : ولا طيران ولا اتوبيس انا وانت وبس في عربيه .. ده ما اجمل السفر مع حبيبك .. رحله علي الطريق .. نأزز لب ونشغل اغاني ونهزر طول الطريق ادهم ضحك : هيا فكره حلوه .. طيب اديني ربع ساعه وارجعلك ليلي كشرت : يعني انا ما رضيتش بدقيقتين تقولي ربع ساعه ادهم : هروح اأجر عربيه نسافر بيها ولا هنسافر بايه ؟ انتي عبيطه يا بت ليلي : طيب اجي معاك ! ادهم استغرب : تعالي بس الموضوع مش مستاهل ليلي : بالنسبالي مستاهل نزلوا الاتنين مع بعض وادهم اجر عربيه يسافرو بيها القاهره وهنا طالعين اوضتهم ليلي وقفت : تعالي نتمشي في الفندق او نقعد علي البحر ادهم : تعالي يا قلبي اتمشوا وراحوا علي البحر وهناك قعدوا علي مرجيحه احبال .. ادهم رقد عليها وليلي استخبت في حضنه وباصيين للسما والنجوم الكتيره فيها والجو شاعري جدا وصمت غريب بينهم ادهم : بتفكري في ايه ؟ ليلي : في اني عايزه احبسك معايا في مكان ما تخرجش منه ابدت ولا تبعد عني تاني ادهم : وانا موافق ولا عايز اخرج ولا عايز ابعد يا قلبي عايز افضل معاكي طول الوقت ليلي : انا تعبت قوي من غيرك يا ادهم .. ادهم : معلش يا قلبي معلش .. بإذن الله مش هنبعد تاني ابدا ليلي عدلت دماغها وبصتله : انت ازاي اتجوزت لورا ؟ ازاي قدرت تلمسها او تكون معاها !! ادهم سكت كتير : مش عارف .. مش فاكر قوي ازاي اتجوزتها بس كل اللي عارفه ان ماريان انقذتني وودتني عند اخوها اللي فتحلي بيته وعاملوني كويس وحسيت ان ده اللي مستنينه مني وبعدين انتي السبب وحبك السبب ليلي باستغراب : أنا ؟ ازاي ؟ ادهم : حبك يا ليلي مالي كياني كله من غيره حسيت بفراغ رهيب .. فراغ بيقتلني .. ما تتخيليش قد ايه صعب انك تكوني مفتقده حاجه انتي مش عارفاها .. كنت هتجنن .. حاسس اني هموت من شوقي ولهفتي لحاجه مش عارفها ... كنت محتاج اي حاجه تسد الفراغ ده باي شكل وهيا كانت قدامي .. ليلي بعتاب : كنت بتقولي انك بتحبها ادهم مسك وشها بايديه الاتنين : ولا حبيت ولا هحب حد في الكون كله غيرك انتي فاهمه ؟ انتي حبي الوحيد ؟؟ انتي عشقي وجنوني يا لوليتا .. انتي لوليتا قلبي ليلي باست ايده اللي علي خدها بحب : طيب ازاي قدرت تلمسها ؟ لمستها زيي يا ادهم ؟ ضمتها لصدرك زيي ؟ قربت قاطعها ادهم وحط ايده علي بوقها : ما تفكريش كده يا ليلي .. ما تفكريش كده .. انتي مفيش زيك ولا قبلك ولا بعدك ولا في اي حد ممكن يشاركك ابدا .. انا اخدت فتره طويله متجوزها بس مش قادر اكون معاها وعارفه يوم الفرح انا جتلي النوبه .. لورا كانت مستغربه منها ومعرفتش تفسرها .. بس كان قلبي بيعترض وانا بغبائي مسمعتلوش .. اعذريني وما تفكريش كده ارجوكي .. انا بحبك انتي وبس وده المهم قعدوا للصبح علي المرجيحه وناموا فيها والصبح لموا حاجتهم وبدؤا رحله الرجوع للقاهره والطريق كان ضحك وهزار ولعب واخيرا وصلوا بيتهم وسط عيالهم اللي فرحوا بيهم جدا وخصوصا اسيا اللي اعترضت ان ابوها سابها وسافر بليلي الصبح ادهم صحي بدري لانه مش متعود ينام كتير وطلع جري شويه ورجع بيته الهادي .. وشويه حس بآسيا نازله وراه وجت قعدت في حضنه آسيا : غريبه ادهم : ايه هو اللي غريب ؟ آسيا : انت صاحي ومامي نايمه ادهم ضحك : انتي علي طول معترضه ! ما بيعجبكيش اي حال صح ! آسيا ضحكت : انا بس بسأل. يوسف من وراهم : صباح الخير بابي ادهم : صباح النور يا قلب بابي تعال اقعد يوسف قعد جنبه : صاحي بدري ليه ؟ ادهم : انت كمان .. اقوم انام يعني ولا ايه ؟ يوسف : لا خلاص .. المهم انا جعان ادهم : وحياتك وانا يوسف : طيب ايه رأيك نعمل فطار ونفاجيء مامي ادهم بصله ورفع حاجب : اه يا ابن مامتك .. ماشي قوم يوسف ضحك ودخلوا كلهم يعملوا فطار وكان جو مرح . ليلي صحيت مديت ايدها بس ملقيتش حد جنبها في للسرير فقامت وبصت حواليها .. سمعت صوت ضحكهم تحت وابتسمت ودعت من قلبها ان ربنا ما يحرمهاش ابدا من الاصوات دي .. صوت ضحك مالي البيت .. قامت ونزلت لتحت وشافتهم وابتسمت بتلقائيه ووقفت تتفرج عليهم لحد ما ادهم لمحها وابتسملها .. ازاي واحده متجوزه من سنين طويله ونظره وابتسامه جوزها بتخلي قلبها يدق بمنتهي العنف زي مراهقه بسيطه !! فطروا واتبسطوا .. بعد فتره ايمن : هتعمل ايه الاسبوع الجاي ؟ ادهم : اعمل ايه في ايه ؟ ايمن : الفلانتين ادهم : يا راجل هو الاسبوع الجاي طيب كويس انك قلتلي .. انت ناوي تعمل ايه ؟ ايمن : مش عارف ممكن اشتريلها اي حاجه ادهم : عايز نصيحتي ؟ ايمن : يا ريت ادهم : خد ساره وسافر اسبوع في اي مكان لوحدكم بعيد عن العيال وضغطهم ومشاكلهم ودي اجمل هديه ممكن تقدمها ايمن : بجد هتعجبها ؟ طيب والشغل ؟ ادهم زعق : يا اخي ملعون ابو الشغل اللي اهم من بيتك ده ؟ مراتك وسعادتك ولا الشغل وحبه فلوس زياده في البنك ؟ ايمن : خلاص ما تزوقش .. انت هتعمل ايه ؟ ادهم : مش عارف لسه هفكر في اي حاجه فات الاسبوع بسرعه وليلي قامت الصبح مستنيه اي حاجه من ادهم وهو صحي عادي جدا صبح عليها عادي وقام ليلي : ادهم ادهم : ايه يا قلبي ؟ خير ؟ ليلي : انت ؟؟ ادهم : انا ايه ؟ مالك ؟ ليلي : ماليش ؟ انت رايح الشغل ؟ ادهم : اه رايح طبعا انتي مش رايحه ولا ايه ؟ ليلي بسرعه : لا رايحه طبعا رايحه ادهم : عايزاني اوصلك ولا حاجه ؟ ليلي بابتسامه غيظ : لا شكرا مشي خطوتين ويدوب هيقفل الباب كشر ورجع لليلي ادهم : نسيت حاجه مهمه فعلا رجع وليلي فرحت انه افتكر بس ادهم وقف قدامها وباسها في خدها : باي يا قلبي ليلي احبطت جدا وراحت للشغل كل اصحابها مستنين هديه ادهم ايه هيا ؟ بس اتفاجؤا ان ادهم ما افتكرش ابدا ميرا الصبح نازله مكتبها مأريفه ومتضايقه ان مصطفي كان بايت بره وفي الشغل طول الليل والنهارده اهو كل الشوارع مليانه ورود حمرا وكل اتنين مع بعض وهيا جوزها مقضي ليلته في الشغل .. دخلت الشركه والبواب بصلها وابتسم قوي .. استغربت بس كملت عادي .. دخلت جوه لقت الارض مفروشه ورد وفي بلالين كتيره حمرا ومكتوب عليها بحبك وهابي فالنتين وكلام حب كتير وقلوب وهيا اتغاظت اكتر واكتر اكيد ايمن ولا حد عامل مفاجأه لخطيبته .. الكل بيبصلها وبيضحك وهيا حست ان الكل عارف ان جوزها بعيد وبيضحكوا عليها انها جايه الشغل في يوم زي ده بدال ما تكون مع حبيبها .. ( ماشي يا مصطفي الدوش انت علي رأي ادهم .. ماشي ) فتحت مكتبها واول ما فتحته اتفاجئت بكميه ورد غير طبيعيه ومصطفي جوه الورد ده مصطفي : كل سنه وانتي حبيبتي ومعايا وليا ميرا واقفه مش مصدقه عنيها ابدا .. بقي معقول كل ده ليها هيا مصطفي واقف مش فاهم هيا مش بترمي نفسها في حضنه ليه وهو فاتح ايديه ليها مصطفي بقلق : ميرو قلبي مالك ؟ في حاجه ؟ هنا هيا اتحركت وضمته وهو اتشاهد مصطفي : حقك عليا يا قلبي اني كنت بعيد ليله امبارح اعذريني ممكن ! ميرا : بعداللي عملته ده ممكن !! بس كان نفسي تكون معايا مصطفي : النهارده اليوم كله معاكي يا قلبي .. تعالي حضرتلك فطار ايه .. هيعجبك قعدت واتفاجئت علي الترابيزه بعلبه صغيره بصتله وهو ابتسم ومد ايده مسكها وفتحها ووراهالها ميرا : جميله قوي يا عمري مصطفي طلع من العلبه سلسله فيها قلب مكتوب في النص مصطفي وميرا وهيا فرحت بيها جدا ولفتله ورفعت شعرها علشان يلبسهالها .. لبسها وباسها برقه في رقبتها مصطفي : كل سنه وانتي في حضني .. والسنه الجايه يكون معانا بنوته قمره زي مامتها ميرا : كل سنه وانتي حبيبي .. ان شاء الله يا قلبي مصطفي : يالا يا قلبي افطري علشان محضرلك النهارده يوم خرافي اتمني يا روح قلبي يعجبك ميرا : كفايه اننا مع بعض حبيبي ليلي قاعده طول النهار دمها محروق وماسكه موبيلها وبصاله .. طيب يا ادهم طيب ابعت حتي رساله! ورده ! هديه ! اي حاجه لكن ما تفتكرش خالص ؟ طيب ازاي ؟مشفتش في الشارع اي حد ماسك دبدوب احمر او ورد احمر .. اخص عليك يا ادهم ... النهار كله قاعده متغاظه وبتبص لاي واحده معاها ورد بغيظ وصاحباتها فرحوا فيها @ اخيرا ادهمك بقي زي باقي الرجاله .. احسن انه معبركيش £ هاردلك بقي يا ... يا لوليتا & معلش يا دكتوره تعيشي وتاخدي غيرها .. ادهمك بقي مصري ميه بالميه .. ليلي : امشي يا بت انتي وهيا ادهمي مفيش منه وهتشوفوا واخيرا مروحه البيت مليانه غيظ في غيظ في غيظ ... ودخلت الفيلا وفتحت بابها وهنا وقفت عاجزه تماما عن حتي الحركه .. ادهم بعد ما ليلي مشيت الصبح رجع علي البيت بسرعه ومعاه فريق تنظيم حفلات .. المنظم : حضرتك عايز تعمل ايه بالظبط ؟ ادهم : اولا عايز الصاله دي كلها مفروده ورد احمر .. والسلالم لحد اوضه النوم فوق .. واوضه النوم كمان عايز السرير كله ورد والارض كمان .. هنا عايز بلالين كتيره حمرا .. وعايز بلالين ماليه السقف تحط فيها هيليوم علشان تفضل طايره ونازل منها شرايط ذهبي في اخرها قلوب كلها .. كتير جدا .. طبعا عايز عشا وشموع وكمان الشموع تكون معطره وحمرا .. من الاخر عايز كل حاجه هنا تنطق باللون الاحمر الموظف فاتح بوقه ومذبهل : حضرتك متخيل اننا ممكن نعمل الكلام ده في كام ساعه ؟ ده احنا محتاجين كام يوم نجهز بس الحاجات اللي طلبتها ادهم : كل حاجه موجوده وجاهزه انا مجهز كل حاجه كل ما عليك بس تجهيزها .. حتي الاكل متفق مع المطعم اللي هيجيب الاكل انتو عليكم تحطوه بس بشكل حلو الموظف : اه ان كان كده ماشي .. ادهم : واه صح مش عايز اي حد من الرجاله اللي معاك يدخلو اوضه نومي .. اعتقد معاك بنات في فريقك ! الموظف : معايا بس ليه ده شغلنا عادي ادهم قاطعه : وانا حر .. مش عايز الموظف نادي علي واحده معاه : دي انسه نرمين هتكون مسؤله عن اوضه النوم تمام ! ادهم : تمام .. اه انسه نرمين في مفرش هتلاقيه فوق اذا تكرمتي ده اللي تحطيه .. احمر هو نرمين : حاضر يا افندم ادهم سابهم وساب الداده معاهم وهو خرج راح يشوف ايه اللي ناقص .. جاب يوسف وآسيا من مدارسهم واتفاجؤا انهم عند جدهم محمود اللي في شقه ابوهم القديمه يوسف : بابا ليه ؟ ادهم وقف : لو مش حابب هنا اوديك عند جدك محمد هاه ؟ براحتك يوسف : لا مش حكايه مش حابب بس بسأل ليه ؟ آسيا : انا عايزه هنا مع جدو ًمحمود .. قالي في تكتيك جديد هيعلمهولي ادهم ضحك : اسمه تكنيك مش تكتيك .. آسيا ضحكت : المهم انه هيعلمهولي ادهم : ماشي يا ستي .. هاه يا يوسف يريحك ايه ؟ يوسف : حضرتك ما جاوبتنيش ليه الاول ؟ ادهم : اوكي يا سيدي النهارده الفلانتين اوكي وانا عايز اعمل مفاجأه لماما .. آسيا : يا سلام وليه ما تعمليش انا مفاجأه للفلافيل دي ؟ ادهم : لايه ؟ آسيا : اهو اللي انت قولته ده ادهم : ايوه ايه هو اللي انا قلته ؟ آسيا : بابي ما تغيرش الموضوع ليه مش بتعملي مفاجأه ؟ ادهم : طيب وهو انا لو عاملك مفاجأه وقولتلك عليها هتكون مفاجأه ؟ المفاحأه دي يا بيبي بتتفاجيء بيها آسيا ضحكت : يعني انت عاملي مفاجأه ؟ ادهم ضحك : خليها مفاجأه يوسف ضحك هو كمان : يالا بينا عند جدو ادهم طلعهم وخبط وفتح محمود : يا اهلا بحبايب جدو اتفضلوا ادهم : ادخلو يا عيال يالا محمود بعد ما العيال دخلوا : انت رايح فين سيادتك ؟ ادهم : العيال هيباتوا معاك النهارده باي ادهم يدوب هيمشي بس محمود خرج وراه : تعال هنا . انت مجنون ولا ايه ؟ انا عمري ما قعدت مع عيال تقولي يباتوا ادهم : هو مش انت اللي اترجتني تكون جزء من حياتنا .. هو ده الجزء محمود : ايوه جزء بس مش بيات وبعدين انت وراك ايه ولوليتك فين ؟ ادهم : النهارده الفلانتين محمود باستغراب : ايوه وبعدين ؟ ادهم : عايز اعمل يوم اسبيشيال لليلي محمود : تعمل يوم اسبيشيال وتورطني انا ؟ ادهم اتضايق : اورطك ؟ طيب سوري علي التوريطه يا سيدي انا ما ارضالكش تتورط .. يوسف .. آسيا محمود : انت بتناديلهم ليه ؟ ادهم مش قصدي المعني اللي فهمته ده ؟ ومش قصدي اني مش عايزهم ؟ ادهم : امال قصدك ايه ؟ محمود : مش هعرف اتعامل معاهم .. اعمل ايه ؟ يعني ابسط حاجه لو حد فيهم عايز يدخل الحمام ادهم تنح : العيال كبيره مش بيبيهات .. كل المطلوب منك تعشيهم ويناموا بالليل والصبح تفطرهم لحد ما اجي اخدهم محمود : بس كده ؟ ادهم : امال متخيل ايه ؟ نونو هتغيرله وتديه الرضعه ؟ دول كبار محمود : ربنا يسترها.. روح انت لمراتك يالا .. ادهم ادهم وقف وبصله : نعم محمود ابتسم : جبتلها هديه ايه ؟ ادهم : وانت مالك ؟ محمود : ماشي يا عم براحتك ادهم رجع وطلع علبه من جيبه وفتحها : كان فيها خاتم سولتير فيه قلب ماس شكله يجنن محمود : واو تحفه هيعجبها اكيد ادهم : عارف طبعا انه هيعجبها محمود : امشي وانت رخم زي ابوك .. ادهم ماشي بس محمود وقفه تاني : هيا مامتك مبسوطه مع حسين ؟ ادهم : حسين واقف جنبها من اكتر من عشرين سنه وربالها عيالها واستحمل حالتها الصحيه لازم تكون مبسوطه محمود سكت ادهم : ليه بتسأل ؟ محمود : بس بطمن ادهم اتردد : اوعي تكون حبيت ماريان ؟ محمود : طبعا لأ . هو انت لو استعملت واحده في اي مهمه بتحبها ؟ ادهم افتكر نيرفانا وابتسم : لا طبعا محمود : تمام بس هو انا لو ارتبطت بحد ده يضايقك انت او اخواتك ؟ ادهم مط شفايفه : ما اعتقدش . انت من حقك تعيش بدال ما انت قاعد لوحدك زي قرد قطع محمود : زي ايه ؟ انا قرد ؟ ادهم ضحك : قلت زي ما قلتش حضرتك !! شبهتك بس بحالته محمود : ادخل ياد خد عيالك وروح ادهم : خلاص يا عم حقك عليا .. يالا سلام هتأخر علي لوليتا ادهم مشي وراح بسرعه علي البيت ودخل غير هدومه وحط فستان احمر خرافه علي السرير مستني صحبته تلبسه ليلي دخلت البيت واتفاجئت والفرحه ثبتتها مكانها طلعت موبيلها وصورت المنظر لمجرد تتأكد انها مش بتحلم دخلت لقت بلونه متعلق عليها ورقه ومكتوب عليها ( امشي وري الورد الاصفر ) مشيت وراه لقت علي الصفره كوبايه عصير متغطيه مكتوب عليها (اشربيني ) ضحكت وشربتها لانها ديما بتكون راجعه عطشانه مشيت خطوه ولقت سهم بيشاور للسلم طلعت ومشيت لحد اوضه النوم فتحتها اتفاجئت بمنظرها ومفرش السرير عليها قلب كبير في النص وشفايف مرسومه عليه غير الورد واتفاحئت بعلبه عليه مكتوب عليها ( افتحيني ) فتحتها لقت فستان احمر فوق الرائع ومكتوب عليه ( البسيني ) غيرت هدومها وجهزت نفسها ولبست الفستان وعملت ميكب سريع بس كانت زي القمر .. لقت علي التسريحه ورقه ( بعد ما تخلصي الميكب ويارب ما تتاخريش انزلي تحت واطلعي التراس وامشي وري الورد الابيض والانوار الصغيره في الارض ) نزلت ومشيت في طريقها طبعا كل خطوه بتصورها بموبيلها ومستنيه المفاجأه الكبري وهيا انها تشوف حبيبها نفسه اخيرا لقت تكعيبه صغيره معموله متحاوطه بانوار صغيره بتنور انوار كتيره بألوان جميله متغطيه كلها ورد في ورد وفي تربيزه في النص وعليها شموع حمرا جميله وانوار في الارض وموسيقي هاديه جميله وحبيبها واقف ببدله سودا وعاطيها ضهره ومنتظرها .. قربت ووقفت وراه مش عارفه تقول ايه ليلي بهمس : حبيبي ادهم سمعها وبصلها واتقابلت عنيهم في نظره طويله جدا ادهم : كويس انك ما اتأخرتيش ليلي : مقدرش أتأخر وانت مستني ادهم مد ايده ليها ومسكت ايده ورفعها لشفايفه باسها بحب هنا اشتغلت اغنيه سامو ( مش قادر ابعد عنك تاني حبيبي) ورقص معاها سلو علي الاغنيه وفضلوا يراجعوا ذكريات فرحهم ورقصهم اول رقصه كان علي الاغنيه دي .. ادهم بعد ما رقصوا : تعالي ناكل قبل الاكل ما يبرد ليلي : اه ده انا واقعه وما اكلتش حاجه خالص النهارده ادهم : ليه يا قلبي ليلي : نفسي كانت مسدوده كنت فاكراك نسيت ادهم بحب : ازاي انسي حبيبه عمري !! ليلي : ما انت نسيتني !! ادهم : قلبي كان فاكرك .. عقلي كان فاكرك بس كان غبي حبتين .. سامحيني بقي .. ممكن ؟ ليلي بحب : افكر .. اكلني الاول ادهم ابتسم وقعد وقعدها جنبه وكشف الاكل وريحته كانت تجوع ليلي : بما انك سيبتني النهار كله متغاظه لازم تعوضني ادهم : اكتر من كده !! ماشي يا ستي شاوري وادهمك ينفذ ليلي ابتسمت : تأكلني بايدك ادهم : زي ليله فرحنا ؟ ليلي : زي ليله فرحنا ادهم بيأكلها وهيا بتأكله وقضوا وقت حب في حب ليلي : انا حاسه اني اسعد انسانه في الدنيا دي كلها ادهم : وانا كمان اسعد راجل في الكون كله .. ادهم طلع العلبه وفتحها ووراها الخاتم وهيا عنيها دمعت من فرحتها : رائع .. مجرد انه رائع ادهم مسك ايدها وحط الخاتم : اعتبريه خاتم جواز جديد انا بتجوزك من تاني يا لوليتا .. بما ان الفتره اللي فاتت كانت صعبه فأتمني تقبلي تتجوزيني من تاني ونبدأ انا وانتي من تاني ومش هنفتح ابدا جروح الماضي ولا حتي نفتكرها .. ايه رأيك يا لوليتا قلبي ؟؟ ليلي ملقتش كلام فرمت نفسها بين ايديه وضمته قوي وهو ضمها لدرجه انه عايز يدخلها بين ضلوعه .. بعدها عنه ومسك وشها بايديه الاتنين : ليلي انا بعشقك .. بحبك بجنون .. بحبك وبس . بحبك بحبك بحبك ليلي باسته بحب مره وري مره : وانا بعشقك يا قلبي ويا عمري ويا راجلي وسندي في الدنيا دي .. انا مراتك بتاعتك انت وبس حبيبتك انت وبس .. عايزه كل يوم اكون معاك وكل لحظه معاك بحبك امبارح والنهارده وبكره وبحبك وهحبك عمري كله ... ادهم شالها وطلعوا اوضه نومهم يكملوا كلامهم بطريقه العشاق مجانين الحب ... نسيبهم بقي يحبوا في بعض ونرجع احنا للواقع بتاعنا ... كل حب وانتو في حب .. بحبكم كلكم .. دي هديتي ليكم في عيد الحب .. خلو اجوازكم يقروها يمكن ربنا ينفخ في صورتهم ويفاجئوكوا بعيد حب ... اه دي حلقه كده مش جزء رابع ولسه ما قررتش اصلا اكتب رابع علشان محدش يسألني .. كل سنه وانتو طيبين بقلم / الشيماء محمد ( شيمووو ) | ||||||||||
|
| |
|
23-06-19, 02:22 AM
| #75 | ||||||
| نجم روايتي وفراشة الروايات المنقولة  
| الرواية مبالغ فيها بشكل ممل مستحيل الفليم هذا يكون ناجح بصراحة لو الاحداث كانت مختصرة كانت الرواية ناجحة الكاتبه مبدعه في اسلوبها لكنها جمعت احداث الدنيا في رواية وحدة ففقدت الرواية حبكتها وجمالها | ||||||
|
| |
|
| مواقع النشر (المفضلة) |
| أدوات الموضوع | |
| انواع عرض الموضوع | |
|
|
.png)
العرض العادي
